Sunday, May 16, 2010


ها قد مضى عام على دخول المرأة لمجلس الامة كنائبة وكتطبيق للشرع تم نجاح 4 نساء:p

ومنذ دخولهن والأعين عليهن لمعرفة الانجازات التي سيحققنها خاصة لمتعلقة بحقوق المرأه المدنية بمختلف الاصعدة ..

هل هناك أي تغير ايجابي ملحوظ بهذا المجال؟
رايي :

عن نفسي ماشفت أي تغيير بالعكس في قوانين لصالح المراه مثل المعاش للمراه اللي ماتشتغل ماقروه ..
وهم قانون التقاعد :\

ومعصومه احس تركز على القضايا اللي تمسها شخصيا مثل الكويتيه المتزوجة من غير كويتي والخ ..

رولا هذي حالة خاصة ودي اعاقبها وخليها تتحجى كويتي بدون بدليات قطع..

اسيل ماطاح الا انبطح ..

سلوى الجسار قوليلللللللليش خخخ..
وغيرها من قضايا المراه المهمشه سنه شويه كمقياس بس هم ماشفنا اي بوادر محاولة :\ان شاءالله نشوف تحرك ايجابي ولا بندعي عليك انه ماتفوزون خخ..
ملاحظة : شخبوطة ع الطاير بس الصورة خطيره ذكرتني بمسلسل ام البنات :\

29 comments:

AM.SA.CHANNEL said...

بغيت أعرف شي واحد رولا دشتي كويتيه ولا لبنانية، أنا إنصدمت من فترة يوم سمعتها ترمس كويتي ؟؟ قلت شو السالفة هاي لبنانية و في مجلس الأمة كيف جي ..

أرجوا التوضـــيح ..؟؟

و شكرا

Ducati said...

لووول جان طلع شي من رياييلنا علشان يطلع من حريمنا

الله كريم يمعوده


لووووول ترا انا مو متابع شي بالمره فلا تاخذين برأيي بس حبيت أمر عليج واسلم والقي التحية

Anonymous said...

ما اقدر اقولج نجحوا او فشلوا لاني مو متابعه الساحه السياسيه الكويتيه وخاصه اخبارمجلس الامه الي ما تنفع بس تضر

وبالنسبه لمعصومه نفس رايي همها مصلحتها

باختصار نواب المجلس اغلبهم اذا مو كلهم همهم مصلحتهم اولا ومن ثم المكاسب الماديه



شاي الضحى

Sami said...

على الرغم من حداثة تجربتهم مقارنة مع اخوتهم الرجال , و سنه واحده لا تعتبر فتره كافيه للتقييم , ارى انهن افضل و اكثر نشاط من الرجال

Ms Botamba said...

Eb9ra7a ohma a7sn mn alnwab ele wyahom ele ma hamhom ela elestjwabat !!

Made n Q8 said...

يا فرحه ماتمت قلنا بعدلون المجلس طلع الوجود والعدم واحد :s

انا ودي اقول حق سلوى الجسار جابلي ريلج وعيالج وطبخيلهم هالمجبوس وحطي يمه هالدقوس الكويتي الاصيل ترى وايد احسن من روحتج للمجلس بس صرف بانزين وزحمه وخطه كحل عوية عالفاضي!

Om Hrooby said...

اممم رايي الشخصي المرأة ما تنفع حق هالمناصب ..لانها عواطفها تتحكم فيها ..
مو كل شي لازم الحرمة تدخل فيه ..

وبس..بعد شخبارج رورو^^

BookMark said...

برأيي لم يضف دخول المرأة للمجلس أي شيء يذكر،
بالعكس يمكن زاد الطين بلة

هذا رأيي بحيادية، ولا أحسب على أحد ;)

ebtsamh said...

أي أم البنات الله يسامحج الا الجدات :)

بنظري ما غيروا شيء .. انحسبوا علينا

وبس :) واهما الاربعة مع الحكومة ..

ابو عبدالملك said...

قلنا لكم ان حقوق المرأه السياسيه ماهي الا ارضاء للكونغرس الامريكي لكن ماصدقتوا

وقلنا لكم ان المرأه لايجوز دخولها للمجلس لانها ولايه عامه لكن كابرتوا

وبعد دخول المرأه ماذا حصل؟؟

اللي حصل هو وقوف المرأه ضد المرأه

رورو الشخبوطه said...

هلا شانيل..

كويتيه مايصير الغرب يدشون المجلس اهو مقتصر ع الكويتين جنسيه اولى ..

وماتعرف ترمس كويتي كله بدليات !!

وان شاءالله وضحت لج الامر :)

العفو ولو..

حياج الله..

رورو الشخبوطه said...

هلا اخوي ديكاتي ..

خخ قلنا يمكن مايبونها الا نسونها خخ..

ونعم بالله ..

خخ هذا وانت طالب اعلام ماتقرا جريده احنا كلوا قلوبنا ع هالسالفه اقروا جرايد :\

و لا رايك مهم لانه اللي ينجز شغله بينتشر بين الناس ..

وحياك الله..

رورو الشخبوطه said...

هلا جايونه ..

علامج متنكره :)

صاجه مامنهم فايده ..
اي وايد مبين هالشي عليها حسبالها قاعده بمجلس امهات اللي بالمدرسه مو مجلس الامة البرلمان خخخ..
بالضبط بس ع الاقل يحللون معاشهم ..

وحياج الله..

رورو الشخبوطه said...

هلا اخوي سامي..

انا قلت توهم سنه وهالشي مو مقياس بس المجلس كله 4 سنين هذا اذا مانحل قبل فربع الفتره مرت دون اي تحرك ملحوظ في مجال حقوق المراه..

وحياك الله..

رورو الشخبوطه said...

هلا مس بوتمبه ..

راضين يستجبون اذا في مجال يتحركون بصدد حقوق المراه ..

اهما صايرين حكوميين بحتيين :\

وحياج الله..

رورو الشخبوطه said...

هلا مدمد..

جنه عدمه افضل :p
خخخ اي امبيه مع انه دكتوره اذا ماخب ظني بس كلش ماحس تنفع كنائبة :\

وضحكتني خط الكحل خخ..

مشكوره..

رورو الشخبوطه said...

هلا ام حروبي..

لا في حريم قدها ..

بس الاغلب مثل ماقلتي مو متمكنين حلاته الواحد يدش بمجال يقدر يسوي فيه شي ..

الحمدالله :)

وحياج الله..

رورو الشخبوطه said...

هلا بوك..

اي والله ..

كلنا ردودنا تمثل ارائنا الشخصيه..

جنه شكيت فيج اعترفي انتي تبع منو خخخخ :p

وحياج الله..

رورو الشخبوطه said...

هلا ابتسامه..

خخخخخخخخ اقصد مثل الخلفيه وعند مصور داثر ..

صح هذا اللي شفته..

وحياج الله..

رورو الشخبوطه said...

هلا اخوي بو عبدالملك..

اوله الكونغرس شكو الكونغرس من عمر موجود والحقوق توها اقرت من جم سنه مو كلشي نخليه تحت مظلة المؤمرة الامريكيه :\

وعقب قالوا ربعك انه عادي لانه مقياس نجاحهك وترجيح كفتهم بيد المره وعقب ناشبوها ع لبسها وضيعوا وقت بشغلات تافهة ..

تو الناس في مجال يتغير الوضع ببنطر ونشوف..

واتمنى بعد من البعض اللي يمثلونكم انه يهتمون بالقضايا الاساسيه :)

حياك الرحمن ..

maram said...

معصومه صدمه كنت أتوقع منها الكثير أما رولا فمقلب ... مشكوره .

رورو الشخبوطه said...

هلا مرام..

ماكنت متابعه عدل بس اتوقع بالوزارة كانت وايد احسن معصومه ..

اي رولا مقلب من قلب كله ولا لما صكتها العبره خخخخ..

وحياج الله..

AM.SA.CHANNEL said...

عشان جي أنا مستغربه يا رووروو .. ليش ترمس لبناني .. و اللي اعرفه انه مجلس الأمن لازم اللي يدخلونه كويتيين .. و إنتو بعد عندكم درجات لكن ما كانت عندي فكرة لازم أي درجة يكون بس شكرا للمعلومة ..

بس إنزين ليش تتكلم جي، على الأقل ترمس كويتي على التلفزيون و في المقابلات مب جي عادي تتكلم لبناني و كأنها مب كويتيه ..

رورو الشخبوطه said...

ولكم باك شانيل..

العفو ولو..

تتحجى لبناني لانه اذا ماخب ظني امها لبنانيه واايد عاشت بالغربه ..

وعليه تحاول بس ماتقدر خخخ..

وحياج الله..

Engineer A said...

عام مضى على دخول المرأة الكويتية البرلمان ..

وجم عام مضى من غير ما أمارس حقوقي السياسية ولم أعطي صوتي لأحد!!

السبب؟؟

ما أشوف أحد صج يستاهل ويحب الكويت فعل مو قول!

الله كريم!

يعطيج العافية :) بوست غير شكل مافيه لا أكل ولا اسوقه ولا صالونات هههه

رورو الشخبوطه said...

هلا انجو..

اي والله صاجه انا المفروض اكون مقيده من سنتين بس مابي ..

يعافيج يارب..

خخ ترا انوع بس هذا اللي طاغي خو الاكل كل يوم والسبا وهالسوالف تقريبا شهريا وترا لو في احد يخاويني جان انام بالصالون خخخ..

قاعده افكر بشغلات يديده بس ماكو بالي غير مطاعم واكل و صالون :\

حياج الله..

خاتون said...

أنا لحد اللحين ما كونت راي عن دخول المرأة المجلس هل أايد أم أعارض بشكل قطعي
لكن أنا أشوف أنه اللي نزلوا نفسهم مو كفاءة و عار على نساء الكويت
مع أحترامي لهم كبشر باستثناء جم وحدة لكن كأناس كفء فالكفاءة كشرط لم يتوافر فيهم
هذا ما رأيي و الله أعلم
شكرا على المواضيع المميزه صج مدونتج تغطيات *_^
موفقة

رورو الشخبوطه said...

هلا خاتون ..

اهو مو المقصد انه نوافق ع وجود بالمجلس المراه او نعارض الهدف هو معرفة اراء الاغلبيه بتواجد النائبات هل في تغير ايجابي لصالحنا ..
بالضبط هذا اللي ابيه يعني انتي معاي ماكو انجاز يذكر..

بعد عمري العفو ولو ومشكوره ع الاطراء..

اجمعين يارب..

حياج الله..

cheese 7cake said...
This comment has been removed by the author.

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads