Monday, January 31, 2011

بطولة
طارق العلي, حسن حسني


النوع

كوميدي

مدة الفيلم

107 min

تصنيف

PG-13


القصة

تدور احداث الفيلم حول شاب كويتي يدعى سليمان يتعرض لحادث سير في القاهرة بعد ان تصدمه سيارة يقودها رجل مصري يصاب على اثره بفقدان الذاكرة الأمر الذي يدفع الرجل المصري ليساعده حتى يعود لحالته الطبيعية.

جنه غلط ! انا اقول فاقد الذاكرة من زمان أختي تقول لا << داشين لفيلم متاخر :\ قبل الحادث بشوي, وماردت ذاكرته بالنهايه..
 
رايي :
 
الفيلم ما احسه كويتي اذا كل اللي فيه من مصر ماعدا 3 طارق والعجيمي و مادري شسمه 3 والاثنين  بعد كومبارس ..
 
فيه قلت ادب !
 
اللي في اارق ما يقدر ينام يروح له :p
Sunday, January 30, 2011
السلام عليكم ..

اليوم رحت الجمعيه ابي سابليه ولا مسكر :(
قلت ماكو الا دايت كير ابي لازنيا مالتهم ..
عاد لقيت هناك ثلاجة فيها منتجات لوفات اول مره اشوفهم متوفرين بجمعية ..

كان في برياني كثر من نوع (دياي , خضار, لحم)..
خذيت اللحم وطعمه زين بس حبيت اللي بدايت كير اكثر لانه معاه مرق ..


صمون توني كليت نص من وحده وربع ال2 وطعمهم زين :)

وخذيت كيك تشيز كيك وبراوني بس ماكليتهم ..

رايي:

حبيت انه قاموا يوفرونا بالجمعيه واسعاره وايد زينه و حبيت حجم الكيك , شكلي بكود منه للداوم :)

و على فكرة حصلته بجمعية الفيحا..
Saturday, January 29, 2011
السلام عليكم ..

من زمان ماعابلت بقاعة ريلي ..

هالشهر جربت هالكريم قبل لا سوي البديكير تقريبا ب10 ايام او اكثر وعقب ماسويت باسبوعين رديت له تقريبا يومين بس ..


خل اقولكم شنو فايدته حسب ماهو مذكور عليه ..

ترميم الكعب ..

ترطيب .علاج. تلطيف ..

مرهم ممتاز للعناية بالقدم << يمدحون نفسهم :p

ترميم:
مثبت اكلينيكيا..
لراحة من الام الكعوب المتضررة و المتشققة ..

ينعم ويطري ويحمي الجلد في 5 خطوات << مو ذاكرينهم !!
تظهر النتائج خلال 3 ايام << هذا الشي اللي خلاني اشتريه ..

مع القوة العلاجية لـ 7 اعشاب ..

اما من ورا العلبه مكتوب :

للوقاية من جفاف الجلد و تشققات كعب القدم والايدي والشقوق والتقرحات والتقرنات ..

ارشادات الاستعمال :
تغسل القدم بماء فاتر ثم تجفف وتدهن بالمرهم . ويترك ليجف لمدة 15 دقيقة .يستخدم 2-3 مرات يوميا .الاستعمال المتكرر يقي من ظهور التشقاقات مره ثانية ..

رايي :

-اممم عيبه انه دبق بس اهما ذاكرين هالشي :\ بس اخف طبعا من الفازلين .
-استخدامه مكثف يعني مرتين و 3 باليوم بالنسبه لي وايد انا ستخدمته مره باليوم ونادر ستخدمه مرتين وساعات استخدم قبل سنفرة سالي هانسن بس مو وايد يمكن مرتين و 3 ..
فالنتيجة كانت زوينه بس حسيتها بالاثار للي تصير على القدم من سبت الجوتي او الصندل وانتوا بكرامة بنسبة 40 % بس مع البديكير
خفوا تقريبا رحوا يعني مره بديكير احسن واريح من تلطخ فتره << طبعا هالنتيجة كانت لاثار يديده بس كانت كبيره :\
-وبالنسبه للتشققات الكعب عاديه النتيجة مو مثل صواريخهم بالدعاية :\

الزبدة ماحبيته :\

سعره وين متوفر ؟؟

اللي بتجربه تحصله بجيان ولولو هايبر ب800 فلس ..

ارخص من الحوي لانه خذيته منه بدينار ونص..
Friday, January 28, 2011
السلام عليكم ..

اليوم شريت هالست من ماكس لانه غرامي الفوندو .. 

جربته باغلب المطاعم هني و هني وهني ..

والحين بجربه بالبيت ان شاءالله..

مكوناته :

-القندور- الباديه -الطاسه << ترا كل شي 1 خخخ هي اللي فوق للكاكاو ..
-الحديده اللي تمسك القندور..
-4 قفاش ..
-شمعة ..
-صحن للشمعة ..

سعره:
1.400 د.ك..

ماجربته لي الحين من جذي بسألكم شنو احسن كاكاو للفوندو مع الطريقه والتفاصيل ؟
Thursday, January 27, 2011
واخيرا جربته من العام خاطري اجربه وكنت ناويه احتفل فيه بعيد ميلادي بس ما الله كتب ..

اليوم بدون تخطيط رحت له باحتفل مع اختي فيه ..


مكانا وناسه دشيت المطعم فاضي قعدت اطب واتخير اي مكان اختار واحلاهم هالمكان..
 المنيو ماتمقلت فيه عدل ..




ع مايي الطلب نجك جك ..

شوربة الدياي بالكريمة ..

اختيار اختي باستا بيني (يخيرونكم بين لصلصة البيضا و الحمرا)

اختياري فوندو لازنيا توقعت بيبون معكرونيه وصلصات واحنا نبربس فيهم ..
طلع لا 3 انواع لازنيا (بالسبانخ - بالفطر - بالدياي و لحم مو ذاكره )
جم لقمة وخذينه تيك اوي..

فوندو في عندهم نوعين احنا خترنا الكلاسيك ومعاه 3 تغميسات اسااسيه فرولة -خدود البنات - موز و نوعين انتوا تختارونهم اختارنا جيز كيك و كيك ..

الفاتوره ..
رايي :
الشوربه عاديه ..
الباستا حبيتها احلى شي عندهم ..
هم حبيت فكرت الزنيا وشلون يتمغط الجبن خخخ ..
الفوندو توقعته الذ واكثر شي حبيته في الجيز كيك..
وبالنسبه الاسعاره زينه توقعته غالي  ..
والحلو انه هادي وتوقعته كبير طلع مجكلم :)


عنوانه :
جبال مجمع الصالحية ..
Wednesday, January 26, 2011
قبل جم يوم كنت مسويه جوله ومريت النصر ..


قلت بشوف بوتات المطر بالجريده صورهم حلوه وهالايام مطر قلت اشوفه جود القى واحد قصير يوالمني..

لما رحت لقيت كورنر صغير تقريبا 3 رفوف كل رف عليه جم حبه لما سالت اذا في مقاسات قالي ماكو الا هذيل !!!




وكنت ابي واحد لام رفيجتي تبي واحد تلبسه لما تغسل الحوش خخ بس ماكو مقاسها ..

وشلته ثقيل لو هاف فيه اختي جان ماتت :\

وماكو قصار كله طوال ..

الاغلب اشكالهم زينة مو زفت كوالتي .

اكثر شي حبيته هذا :\ في شي حلو لا اعلم مازا هل هو لون ام شي اخر لا ادري خخ تذكرت بعز الناس :\


بس ماخذيت ولا واحد خفت اخرع المطر :p

سعره :

قبل التنزيلات بـ 4,900 د.ك ..

وبالتنزيلات 1.900 د.ك ..
Tuesday, January 25, 2011
قبل جم يوم جربت هالكافيه ..

وكنت وايد قاريه عنه وعجبتني فكرته انه مو مجرد كافيه عادي للاكل بس لا يوفر خدمات 2 :

- فيه غرفه الاجتماعات للاجتماع سواء للبحوث لجامعه و اجتماعات و غيره ..
-فيه مكتبه فيها كتب منوعه علميه ثقافيه مجلات وجرايد..
-يوفر مكاتب وكمبيوترات يمكن استخدامها مجانا وهم فيه طابعه وفاكس..
واهو مشروع كويتي :)

انا مارحت له بس جربته ديلفيري  للدوام ..

المنيو (هني)


طلبت نيوتيلا هوت جوكلت ..

واستانست لانه مانكت ولما دققت اثر مغطينه بمغطاتين :)

وكاهو من داخل ..

وطلبت كيكة كنت ابي جيرمان بس ماكنت موجوده فطلبت الفول السوداني بس ماكليت الا لقمه وخشيتها لاميمتي لانه تحب الفول السوداني ولاني الحمدالله شبعت من الهوت جوكليت واذا كليت شي زيادة بتعب :\

رايي :

الهوت جوكلت زوين اما الكيكة ماذقتها عدل فما أقدر أحكم ,وبالنسبه للخدمة زينه كمعامله بس تاخروا شوي علي ولما تصلت قالي لانه في اكثر من طلب معاي قلت له أي نو ماي فيس أز خير فور يو خخخ ..

عنوانهم :

Sharq, Block 7, Khalid Ibn Al Waleed Street, Building 44, Al Johara Tower, Ground Floor, next to Global & Arraya.

شرق ,ق7, ش خالد بن الوليد  ,مبنى 44 برج الجوهره , مااعرف بالادوار بس توقع قصدهم الدور اللي فيه البابا الرئيسي خخ ..

ت :22954988

صباح الخير ياكويت :)

قبل فتره شفتهم بالنت وعجبوني ..

ورحت شريتهم وامس شريت البرتقالي يعني نيو كوليكشن خخخ ..



احب السوالف العبيط الكول :)

وين تحصلونه ؟؟

موجودين بفيرجن بدينار خرده << حسب اللي سمعته ..

وانا شريت منهم طيور الجنه الواحد 100 فلس ..

هالمحل احبه خخ ع قولت ختي جنج تعرفين من زمان :\

ويقولون في منه اكواب رحت طيور الجنه ماحصلته بس موجودين  بفيرجن ..
Monday, January 24, 2011

قبل جم يوم كنا نتصفح مجلات بالدوام ولفت انتبهانا هالصور وكانت بهالعدد ..


من مجلة ليالينا ..


ملاحظة قبل لا ابلش الصور حلوه عقب بتفهمون قصدي بس جد اللقطات مزبوطة..

هذي لما شفتها تذكرت الحنه ايام قبل لما نحطها وعقب نلف شعرنا بشغله حسب المتوفر ..

بس امس وانا ادقق فيها طرى ع بالي مواقف خخ اللي فجاءه يطلع لج احد وانتي بدون حجاب وشنو تكون ردة فعلج :\

صارت فيني وايد العاده اشهق ومره يكون بتستر غطيت شعري بايدي وايدي وسيقاني بالسكة مادري ليش في ارتباط شرطي بين الشعر والحجاب ! وننسى الباجي :\
ماكو الا اتحجب بيتنا بعد @@

هذا حلاته بعرس ومناسب للشتا ..

ملفع فورير :p

وصلنا للشعر :)


هذي التسريحة :\

وهني عقب الردح والفحة بالعرس خخخخخخخخخخخخخ..

شرايكن بنات :)


Sunday, January 23, 2011
اليوم رحت السوق فمريت بودي شوب وكنت احوس ولفت انتبهي هالكورنر ..

لما قريت ولا عن حملة ..

قلت للموظفة ابي شترك فيه وماقصرت علمتني الطريقه و قلت لها بصور رضت ..


مامداني جككت جم صوره ولا السيكورتي يقولي ممنوع بس لما درا اني بس صور هالمكان واني بدعمهم سكت :)

االكورنر في رفين الاول فيه الاستمارات والـ2 عليه صندوق اللي تنحط فيه الاستمارات عقب تعبئتها ..

الحمله عالمية تهدف لحماية الاطفال والناشئين من الاتجار بهم  ..

واهما بحاجة لى مليون توقيع  ..

وهذي الاستمارة متوفره باللغتين العربي و الانجليزي ..


شنو مطلوب منكم ؟

شي بسيط مثل ماقلت لكم فوق تعبون الاستماره و البيانات المطلوبه شوي بس اسمكم واسم عايلتكم والتاريخ و التوقيع  وعقب قلبوا الصفحة ورسموا ايدكم ..

وحطوها بالصندوق او سلموها الموظف وجزاكم الله خير :)

لتفاصيل اكثر (اضغط هنا)

وبالسايت في منتجات تنباع لدعم الحمله وفي طرق 2 للدعم مثل نشر الحمله لاصدقائك بالفيس بوك او تويتر او بالايميل ..

وانشر ولك الاجر ان شاءالله :)
امس رحنا السينما انا واختي من زمان عنه ولهنا عليه :)

اختي تبي عايلة ميكي وانا ابي باباي بس دشينا هذا ..

في عرضين العادي و ال3d ..

احنا اخترنا ال3 دي بس احس مايسوى ومايفرق عن العرض العادي بشي ..

معلومات عنه والبوست منقولين من سايت السينما ..


بطولة

Jack Black ,Jason Segel, Emily Blunt, Amanda Peet

المخرج

Rob Letterman

النوع

كوميدي, حركي

مدة الفيلم

87 min

تصنيف

PG

الدعايه :

احطها لكم عقب لاني بالدوام واخاف فيها لقطات عيب وتشوفنها واستاثم فيكم :\

القصة

تدور أحداثه حول "جلفر" وهو كاتب يسافر فى مهمة إلى برامودا ، لكن يتنهتى به المطاف إلى جزيزة "ليليبت" التى فيها السكان صغار الحجم.

رايي :
 
الفيلم خفيف وسالفة الاقزام مقتبسه من باباي حفظناه قبل بس مع اضافات شويه مع زيادة تكنولوجيا بعد :p  (يعني قصه مكرره نوعا ما بس كتغير جو زين)
 
ومااحسه يناسب الصغار ولانه في جزء اساسي نظام حبني واحبك وشلون تبوح للي تحبها بحبك :\ والحب الصامت ..
 
***************
 
ع طاري الافلام والسينما ..
 
صج بيرخصون التذكر لمدة شهر من 25 -2 لي 25-3 ..
 
بيخلون الفي اي بي = 2 د.ك
والديجتال = 1,500
والعادي =بدينار ..
 
اذا جذي بطفح افلام خخخخخ ..
Saturday, January 22, 2011
قبل اسبوعين تقريبا اختي قالت لي عن هالمحل شافته ببرنامج نوف بس حسبالها مزرعه لانه ماثبتت ع اللقاء عدل , وعقب جم يوم شفت موضوع عنه بكويتياات للعضوه miss botamba  (هني)

وكل مره بروح له يصير شي بس اليوم قدرت روح له الحمدالله :)



لقطات من المحل :

هني في مربى وتمر ووصحون وسلال..

زيوت وماي ورد والخ ..

اعشااب وحبوب ..

قسم الماعين (الاوني)

زوم ع جزء صغير منه ..

وعقب رحنا صوب الالبان والاجبان وهو يصير بمحل صغير يمه بس تبعه ..

والحلو انه في نفس جدور صغار جذي عشان تذوقون قبل لا تشترون ..

وفي بعد ركن برا جبال المحل في خضره انتاج االمزرعه ..
من المنتجات اللي لفتت انتباهي هذا..

مهياوة ايطالية :p

مشترياتنا:

بصل لاختي تنقنق فيه خخ من ركن الخضره ..


مربى لمامي و معبوج لاختي ..

جاي ابيض بذوقه وصابونه طبعا حقي :)

جبن نوعين ولبنه وزبده ..

الفاتوره عساس يكون عندكم فكره عن الاسعار ..
مميزات المحل :

1- منتجات طبيعيه عضويه ..
2- انه مخصص  جزء ارباحه رح يكون ريع لامراض السرطان وعلاجها ..

عنوانه :

سوق شرق - سوق السمج والخضار..

ساعات العمل :
من 8 ص الى 10 ليلا ..

وعندهم خدمة توصيل اعتقد مجانيه رقمهم :

22454302

Search

Loading...

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads