Monday, January 28, 2013
بطلعتي من جمعية الروضه شفت هالكشك وانتبهت انه عنده مولتن فخذيت منه لانه اخوي موصيني ايب له مولتن ..
 
 الكشك يشوق ماشاءالله في وايد شغلات  كوكيز وكب كيك ومولتن وطبعا من كل شغله متوفر انواع وايد (وهذا اللي اذكره مادري اذا عندهم شغلات 2 كنت مستعيله طلبت ورحت سحبت ورديت خذيت طلبي من جذي ماشفته عدل )
 
*طلبي *
 
خذيت نص درزن مولتن ..
 
 
واخترت انه يكون ميكس ..
 
سعره :
6 د..
 
رايي:
 
ذقت 2 اللي ع قطع ككاو كبار والساده اللي على اليمين فوق طعمه عادي اللي مخربه انه الكيك واايد والصلصه عادي او شويه خصوصا الساده اللي فوق صلصتها كان طعمها زين بس شويه :(
 
 
قبل فتره شفت هالماركة بالانستغرام وتحديدا باكاونت نوره سمايل واللي شوقني انها ماركة طبيه (احب المكياج العلاجي )
المهم راويتها بنت عمي وعقب راويتها صور ماركة المكياج المينرال اعتقد اسمه مدلي يورز هم بجمعية الروضه جان اشيشها خخ وبنفس اليوم رحنا <<اللي اهو امس ..
 
هذا استاند الماركة .. 
 
 اغلب الشغلات جربتهم بس خذيت هذول ..
 
- كريم اساس تقريبا متوفر ب5 درجات انا اخترت رقم 5 اغمج ني بشوي جربت درجتين غيره ماحبيتهم وخاطري بكريم نفس لوني بالضبط :\ وعيبه مافيه حمااية من الشمس واليوم جربته ماري مبدائيا ماحبيته :\
سعره 13.270 ..
 
-قلوس خذيته لانه تقول مع الاستخدام المستمر يعني بحدود 3 اشهر يورد البراتم << ع قولتها مو نتيجة سريعه وهم جربته اليوم لونه خيف مايبين وسعره ب6ونص ..
-ماسكرا تكثيف مادري ليش مايسون ماسكرا تكثف وتطول :\ المهم كتجربه مبدائيه زينه واهي اكثر شي حبيته منهم ، سعره 8,580..
-حمره رقم 4 ورديه وكنا نبي 2 لونها بين البيج والادعم بس مخلصه وهم حسيت الحمره عاديه :\ سعرها 5,750 ..
-كونسيلر رقم 2 ب7.070  ومماقدر احكم عليه الحين بنطر شوي  ..
 
وبنت عمي خذت كريم اساس وبودر وبلاشر وحمره وكونسيلر وفرش ..
 
انا حسابي تقريبا 41 واهي 65 قلنا نبي هديه قالت الاسبوع الياي تيي الهداية وخذت ارقامنا ننطر ونشوف تتصل ولا لا خخ ..
 
وبجربهم عدل عقب احكم وبنزل فيهم بوستات ان شاءالله..

link

FB

 
Saturday, January 26, 2013
هاالكونسيلر شريته اول ماهبيت بالمكياج كانت متعتي احوس صوب المكياج واخمط العاده احوس اجرب واطلع ههه ..
 
وكنت مجربه مال وحده بالدوام الفاتح وحسيت نور ويهي بس احلى اخذ الاغمج بيطلع انسب لي ..
 
وهذا اللي صار بنفس اليوم صادف مريت بوتس وخذيته ..
 
متوفر بدرجتين :
-لايت بيج ..
-ميديم بيج رقمه 3 << هذا اللي شريته ..
 
قوامه ..
بايخ ومو سهل بالدمج والفرد مع انه سائل وهم يخطط :\ واحسه ثقيل ولي حطيت عقب هي لايت اند سوب اند غلوري اللي قلت لكم عنه هني ماحبيت النتيجه مو مثل كل مره :\ لانه البيس اللي اهو الكونسيلر ماحبيته ..
 
رفيجتي تقولي خطط لانه بشرتج جافه بس هم نوره سمايل بالانستغرام جربته مع كريم مرطب للعين قوي ونفس الشي خطط ..
 
سعره :
ب3 وشي ..
 
رايي :
 
عقب المعلقه اللي فوق اكيد ماحبيته :\
 
 
Wednesday, January 23, 2013
هذا اخر كولكشن عرفت انه نزل من زويا واهو بالنسبه لي مو عادي مميز و عرفت انه نزل من البنات بالانستغرام ..
 
متوفر ب6 الوان ..
 
لونه رمادي واسمه  London
 
  لونه اسود برمادي واسمه Dahlia
 
لونه احمر واسمه Chyna
  لونه بيج و نيود Godiva
 
 لونه اخضر اسمه Vespa
 لونه ازرق واسمه Nyx
 
سعره الحبة ب9 دولار ..
 
 
من زمان عن السبا بس راح يتوفربريكوفري سبا  بالجابري بشهر 3 ان شاءالله ..
 
قبل فتره شفت بالانستغرام اعتقد كاندي كيك منزله صور مولتن الخباز ومنها دريت انه عندهم مولتن والاسبوع اللي فات صادف اني رحت الخباز فخذيتهم اجربهم ..
 
المولتن متوفر ب3 نكهات :
 
بالككاو ، الكراميل والتمر ، التفاح ..
 
خذينا 2 ..
 
انا اخترت الككاو ..
 
واختي الكبيره اختارت الكراميل والتمر ..
 
سعر الحبه :
دينار وربع ..
 
وكل حبه تكون بماعون فخار و تتسخن من 30 الى 45 ثانية بالميكروييف ..
 
وبالنسبة لحجمها تقريبا اكبر بشوي من المولتن العاديه الي تكون بماعون قصدير..
 
رايي :
 
الككاو زينه بس انا احب الي يكون الككاو اكثر من الكيك هذا تقريبا الككاو نفس كمية الكيك ، وبالنسبة للتمر بالكراميل احس مميز اكثر من الككاو ..
Saturday, January 19, 2013
واخيرا باكمل بوستات ماليزيا واكيد نص المعلومات نسيتها وهذا بالنسبه لي اصعب بوست ..

وطبعا الله يسلم قوقل يسهل كل شي قبل السفره كنا مسوين سيرج مكثف انا واختي الجوز واختي طلعت معلومات وايد مفيده منها طريقة الذهاب لجنتغ من حجز وغيره وقارنا  واخترنا الانسب لنا وكان في موضوع سهل علينا بس دورته ماحصلته :\

رحلتنا كانت على يومين اول يوم كان للحجز بس وال2 كان لروحه ,,

الحجز كان عن طريقة شركة قو جنتنغ (LINK)الموجوده بKL SENTERAL ..

رحنا له بالمترو ..
وهذي خريطة سكة المترو ضغطوا على صوره بتكون اوضح  (احنا محطتنا الحمرا  وجتهنا  الثانية KL)


خذينا تذكر المترو او بالاحرى الفيش ورحنا ..
والحمدالله المترو الوضع فيه مريح مو لوية ولا وصخ ، وبالنسبة المحطة مو يم KL بالضبط لا مشينا شويه .. وصلنا للوجهتنا ال2 وصعدنا لي كاونتر الشركة ..
 حجزنا تذاكر وهي عباره عن تذكرة الباص والساكي وي (التلفريك ) وتذاكر دخول المنتزه (الخارجي بس ) جنتغ فيها مدينتين وحده داخليه وال2 خارجيه ..

سعرها بحدود 58 رنجت للشخص ..

ونسيت اقولكم الوسيله ال2 لزيارة جنتنغ اهي التاكسي وسعره بحدود 200 الى 300 رنجت بس تكلفت الطريج ويوصلكم اذا ماخب ظني للتلفريك وعقب دفعوا فلوس للتلفريك والدخله << يعني مكلف اكثر خصوصا اذا كنتوا قروب صغير ..
 وهم احتمال يوديكم لاماكن 2 قبل لا توصلون اذا ماخب ظني مزارع مثل الفراولة وهم حدايق او ماذكر شسمهم حديقة مادري القرية اليابانيه جنه وفي فرنسية بعد يعني هم لوية(غير لوية الطريج) ..

بجذي نكون خلصنا اول يوم اللي كان مخصص للحجز اللي ماخذا من وقتنا ساعه تقريبا الحمدالله كان سهالات ماضيعنا .

 و اي قبل لا انسى كان خاطرنا نحجز مبجر يعني 8 او 9 بس مالقينا الا 11 الباجي كله فل ماشاءالله والرده مالقينا الا 6 هم الباجي فل فحلاته كثر ماتقدرون تحجزون مبجر..

وصلنا ل2 يوم من الصبح قمنا ورحنا المترو ونفس اللي سوينا امس بس مادشينا داخل مبنى KL لانه الباص كان ينطرنا برا ..

ومن الباص رحنا للتلفريك .. كان في زحمه وطابور بس كان يمشي بسرعه كل تلفريك يكفي 8 ..
وعى فكرة ترا له ساعات عمل محدده مو مبطل 24 ساعة ..

وركبنا التلفريك والدريشة جدامي واقعد اجك اجك اجك اجك يعني اصور مو اشربك خخخ ..
 وعقب مشينا شويه ليما وصلنا للمنتزه وهذي تذاكرنا ..
 ذكرتنا بتيخا ولد اختي خخخ ..
 لقطات من المنتزه ..

لعبت تقريبا 4 العاب الدورفه اللي تفتر والقطار السريع ولعبة سبايدر مان وقلاليبه ..





وهذي اهي لعب سبايدر مان اول مره اركب لعبه اكون واقفه فيها خخ بس صج وناسه وضحك بس قبل لا تقفون بالطابور حطوا اغراضكم باللوكر برا يم اللعب عشان اتوهقون مثلنا وصل دورنا وقالوا لنا ماكو مكان لاغراضكم روحوا حطوهم باللوكر :\






مااعبر يالقوي خخخ هذي الباص اللندني وفي وراه كبينات التلفون يم لعبة سبايدر مان .. 


 الاكل :

شفت برا المنتزه وايد مطاعم بس داخله ماذكر الا هذا والحمدالله كان حلوو ..

 و في وايد كشكات جنه لبطاطه حلوه ووافل وغيره احنا جربنا الوافل وفي وايد نكهات صلصة ..
 اخترنا الككاو وماحبيتها :\
 قبل لا نطلع بشوي تغير الجو فجأه ضباب وبرد الجو (عكس اول ادشينا كان الجو عادي اقرب للحر ) ومن جذي ينصحون انه تاخذون معاكم كوت خفيف احنا كنا ماخذين معانا كرديغانات شتوي خفيفه ..

 وطلعنا ورحنا التلفريك هالمره وصلناله بصعوبة شويه مقارنة باول مره بس اشوه لحقنا ع الباص ..

 والمنظر كان عجيب حزة الغروب ..
 
 وهذا باصنا من داخل الاغلب بالرده نايم خخ..
تحسون لوية شويه بس اشوه كانت سهالات وعلى قولتهم اللوية الممتعه ..

واستانست بالمدينة وودي اذا الله كتب مره 2 ورحت لها بتم يومين فيها هالمره ماقدرنا لانه الفنادق كلهم فل ماشاءالله مع انه حجزنا قبل السفره بشهر يمكن ..
Friday, January 18, 2013
شريت هالكونسيلر عقب مااكتبت عنه سباركل بالانستغرام واهو موجود بالمنصور من ماركة لا غيرل الامريكية ..

الحلو فيه انه متوفر بدرجات كبيره انا اخترت درجة كول تان وغامجه مو فاتحه واستانست انه مثل درجه كريمي..
 
وقوامه
خفيف مو ثقيل بنفس الوقت مو سائل بس ماحسيت بصعوبه بدمجه بس عقب استخدام تقريبا اسبوع بشكل يومي طلع من زيت !! ماطول يومين وتعدل الظاهر ياس مني خخ قال هذي مامنها رجا ماراح تعتقني

وتغطيته
متوسطة يغطي لون الهالات بس الخطوط عادي ..

مدة صلاحيته ١٨ شهر..

سعره دينارين ..

 رايي:
اغلب النقاط ذكرتها فوق وامم بس لي الحين ادور ع كونسيلر علاجي وتغطيته ممتازه للهالات والخطوط ..

ببداية الاسبوع كنت اتمشى بالدوام نادتني وحده من البنات لفيت ولا توزع هالمولتن ..


واهو درزن مولتن ملون بدرجات الاحمر red ombre ...

 اخترت الحمرا بس قالولي كلهم نفس النكهة ..

رايي فيه:

طعمه زين بس مو المولتن اللي انا احبه اللي يكون واايد ككاو وشويه كيك ، وحبيت الوانه ..

ت:66870099 ..

وهذا اكاونتهم بالانستغرام : @chocolastic
Sunday, January 13, 2013
من الشغلات اللي دزولي ايها مكياجي للتجربة هالوايبس..
 
 
 
مكتوب عنها بسايتهم :
 
مناديل غرل تولز الرطبة لإزالة المكياج تزيل المكياج عن كل أنواع البشرة. تزيل المكياجي عن العيون، الوجه و الرقبة بفعّالية عالية وتترك البشرة ناعمة ومنتعشة.
 
19.00 SAR/AED/QTR
1.50 KWD
1.90 OMR/BHD
5.50 USD
 
 
مكتوب عليها ..
 
صممت هذه المناديل المزيلة للمكياج لتنظيف جميع انواع البشرة حتى الحساسة منها ، فهي لطيفة على البشرة لانها خالية من المكونات الخشنة. يمكن استخدام المناديل في المنزل اواثناء السفر .
 
ومدة صلاحيتها: صالحة لمدة 6 اشهر..
 
وفيها 30 شريحة..
 
رايي فيها:
انا احب الوايبس اكثر من الغسول خصوصا بالشتا وعموما اريح لي (اذا تعبانه او مالي خلق او ماعندي وقت)اقدر امسح ويهي واحط راسي وانام سهالات واستخدمها بالسيارة بالدوام باي مكان ..
 
وحبيت مالت مكياجي لانها لي الحين اهي التوب من اللي استخدمتهم مفعولها زين وهم  حبيت طريقة التغليف الخاص بالفتح والاغلاق مستخدمين قطعة بلاستيك (مو ورقه عاديه اللي استخدام جم مره الا مختربه وماتلزق :/) سهل استخدامه وانظف بحيث ماتخترب فمايحوشها هوا ينشف الكلينكس او وصخ (غبار وغيره)..
 
وسعرها وايد زين بالنسبه للكميتها و مفعولها..
 

بالانستغرام وتويتر نفس الاسم :
والسايت :LINK
 
Friday, January 11, 2013
من الشغلات اللي لفتت انتباهي بسنتر بوينت اليوم هالطاولة ..
 طاولة لاب توب او بالاحرى مخدة لانها بدون ريول كنت بقول صينيه خخ شكلها كول و فيها ليت ومكان للكوب ومن تحت اذا ماخب ظني في نفس الحشوى عشان تكون اريح بالاستخدام وماتعوركم ..

وبالصوره في الاشكال المتوفره و اسعارهم ..(لمشاهدة الصورة بشكل اوضح اضغط عليها)
احلى شي كاتبين لاب توب مو مشمول خخ حلاته لاب توب ب4 :)

Search

Loading...

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads