شخبوطة كويتيه: فندق

Showing posts with label فندق. Show all posts

Saturday, August 8, 2015

Nidya Hotel Galataport‏

11:00 AM

ع شهر 12 العام رديت اتعب :( فكلمت اخوي بداية السنه اذا يقدر يسفرنا باخر شهر 1 لانه صج كنت محتاجه اغير جو ..

والحمدالله رضا ..

اخترت اسطنبول وكانت اقامتنا بهالفندق Nidya Hotel Galataport ‏..

احنا نسميه ناديه :)

واقامتنا كانت 5 ليالي ..

اهو 4 نجوم ..

واخترته لانه تعبت وانا ادور ولما سالت ولا زميلتي مجربته وتمدح ..

هذي واجهته ..

هذا اللي جباله ..

محطة الترم ورا هالمباني البسفور ..

وهذا الصوب 2 ..

* الاكل بالفندق *

حجزنا كان شامل الريوق ..

وكان بوفيه ..

اكثر شي حبيته وكنت احلي فيه كل يوم فنايين البسكوت واحط معاها كراميل او فول سوداني وجنه في مربى او عسل ..

واحط فوقه كورن فليكس ..

وهذي كل اصورها خلية عسل << انا مسميتها جذي ماعرف شسمها !

الريوق ككل زين مو وواو ..

واول يوم ماتعشيت بالمجمع فطلبت من مطعم الفندق لي ولخواتي سيزر وكلوب ساندويش وتحت الصحن مخشوشه شوربه ..

وكان اقل من عادي ..

*الغرف *

حجزنا غرفه ثلاثيه ..

كانت شرحه ونظيفه بس احنا مختارين لغير المدخنين :\ وعطونا لمدخنين لما كلمناهم قالو لنا بدال الغرفتين << الغرف ال2 غرفه اخوي بيعطونا سويت اغلى بجم 100 يمكن 500 ماذكر اذا ليره او يورو ..

لما رحنا له ولا صغير وعشان نصعد له ناخذ اصنصير وعقب نصعد دري (درج) خارجي وفي قطوه استقبلتنا ! فقلنا خلاص خلنا ع غرف المدخنين ..

رايي فيه ككل :

-الاكل:

زوين مو وااو يعني تصبيره بس ..

-الغرف :

زينه ونظيفه ومو صغيره ..

الحمام وانتوا بكرامه مافي شفاط - هوز- اسونده- خرطوم !

-الفندق :

ككل نظيف ومرتب ..بمنطقه هاديه وامان مره نسينا نصكر الخزانه اللي فيها فلوس (التجوري ) وماحد جاسهم الحمدالله .. عقب ال١٠ هدوء بالشارع كله يمكن مره بس قعدت ع ازعاج وماطول ..

-الواي فاي :

زين اول يومين كان ممتاز بالغرفه ومافي تحت عقب صار العكس خخ كلمتهم دزولي المختص وقالي المشكله بتلفونج !

في شي يمه ع طول ؟

لا بس حيل قريب من البسفور وفيه عبارات تودي لجزيرات ومناطق 2 ورخيصه ..

يم كارفور صغير بينهم جم مبنى ..

وراها تقسيم مانطول بالتاكسي ان كثر 5 دقايق ..

بس مشي ماشفت شي لازق فيه الا كارفور وكافيه والباسفور ومو يمه اغلب مباني بنوك وغيره ..

سعره :

مناسب ..جنه الاقامه كانت ب170 وشي دك مو متاكده ..

هني صفحتهم في سايت booking link

Labels: اسطنبول, تركيا, سفر, فندق |

0 comments

Saturday, November 10, 2012

Berjaya Times Square - برجايا تايمز سكوير

4:25 PM

نكمل بوستات ماليزيا , هالمره عن مجمع اسمه Berjaya Times Square - برجايا تايمز سكوير

و الحلو فيه انه مجمع شامل لانه :

1- فيه فندق (هذا سايته link )

2- مدينة العاب 3>

3- سينما ..

4- سوق 3>

والاحلى انه يمه محطة مترو توصل دايركت له , واهو قريب من شارع العرب ماجربت اروح له منه بس اخوي يقول ومكتوب بالنت بعد انه تقدرون تروحون له مشي ..

نبلش بالسوق بس ماصورت وايد فيه ..

السوق ينقسم بالنسبه لي (من وجهة نظري ) الى قسمين للتسوق :

الاول :الخاص ببضاعتهم نفس اللي نشوفها بالسايتات الكوريه والصينيه اللي رايحين تايلند نفس اللي ببلتينيوم ونفس اللي بسايت نفنوف الكويتي ..

ال2 :محلات منوعه ماذكر شنو بالضبط لانه ماافتريت فيه عدل ..

اول ادشينا شفنا هالمناظر ..

سنوايت والاقزام هذا اعلان او بالاحرى ديكور بنص الجمع لمحل مكياج حبيت الفكره وهالمحل اسمه صعب بس خذيت منهم ماسكرا فايبر كنت حاطته بالبيوتي ليست ..

وهالتمثال عجبني هم كان بنص المجمع ..

وهذا قسم من اقسام المجمع..

وصلنا لصور القسم المنشود..

هالمحل حبيته لانه حصلت جم شغله فيه حلوه ..

منهم هالكارديغانات احترت اختار شنو ؟؟واخر شي خذيت 2 من كل موديل وحده ..

من محل 2 ماصورت اسمه عجبوني هالجناط ..

وفي وايد محلات حلوه غيره بس كنت لاهيه بالشوبينغ فما صورتهم..

من المحلات الموجوده فيه وكتبت لكم عنها قبل (اذا حابين تقرون البوستات القديمه ضغطوا على كلمة ؛اسم المحل؛)

Sasa

Elianto

ووصلنا لي مدينة العاب الداخليه اهي بالدور ال5 وال7 مافي دور 6 بالنص لانه العاب كبيره :)

اسعار تذاكر تختلف باختلاف العمر وباختلاف يوم الزيارة :

- بالايام العاديه :

للاطفال (اقل من 12 سنه ):28 رنجت

للبالغين (اكثر من 12 سنة): 38 رنجت

كبار السن (55 سنة وفوق): 15 رنجت

الاطفال اقل من 3 سنين : بلاش (فري)

-بايام العطل والمناسبات :

للاطفال (اقل من 12 سنه ):33رنجت

للبالغين (اكثر من 12 سنة): 43رنجت << هذي مالتنا :)

كبار السن (55 سنة وفوق): 15 رنجت

الاطفال اقل من 3 سنين : بلاش (فري)

لقطات عامة للصالة :

في وايد العاب (مثل قطار الموت ولعبة التخضخض ولعبه الفراريه ولعبة يقولبون فيج ليما تتغير ملامحج من الخرعه خخخ وسيارات التصادم هذا اللي اذكرهم )

وفي العاب بفلوس مو مثال الباجي وكانوا مسوين عليهم عروض مثل سينما 5D و قصر الرعب ...

وفي وايد كشكات مثل كشك البرد وهذا كشك 2 مخصص للشمع ع شكل ايدكم ..

وكلشي بالالعاب حلو الا اللوكرات عله كل مابطلتيهم بتحطين شي روحي دفعي !! استخدام واحد بس كل مره وبعض العاب مافي مكان تحطين فيه اغراضج فتضطرين تاخذين لج 1 واحنا اساس كنا ماخذين واحد للمشترياتنا لما بنلعب مارضوا نحط جناطنا ع كتر فاضطرينا نفتح ونروح ندفع مره 2 :\ ماكفا قشنا رحنا دفعنا لواحد 2 ..

ساعات العمل بالنسبة لصالة العاب:

بايام الاسبوع العاديه (من الاثنين الى الجمعة )من 12 ظ الى 10 م ..

بايام العطل والسبت والاحد من 11 ص الى 10 م ..

وبالنسبه للمطاعم مااذكر الا اللي كليت فيهم :

-ماكدونالدز ..

-ويندز ..

راايي:

عموما المكان حلو وصالة العاب تعتبر اضافه مميزه للسوق تعطيه طابع عائلي اكثر ..

الموقع الكتروني للسوق LINK

Labels: سفر, شرق اسيا, فندق, ماليزيا-malaysia, محل |

2 comments

Sunday, October 7, 2012

Swiss-Garden Hotel

12:21 PM

عقب يومين بسلانجور بفندق برميد رحنا لكوالالمبور فندق سويس جاردن هوتيل تمينا فيه تقريبا ٦ايام..

(الصورة من النت )

من الاول وبصريح العباره ماااااحبيناه ليش !!

اول صدمة : كل الغرف الكرفاية (السرير) كنج سايز ماكو تونز ! اي شي تنحنا الا نبي تونز تقول باجر قلنا لا قالت الساعه ٨ بالليل ع ما نظفها قلنا لا قالت يو ار لاكي لقينا لكم غرفة جاهزة ونظيفه بعد !! اشكره تقص علينا ..

هذي غرفه منهم

٢ صدمة واهي الاكبر :المهم رحنا غرفنا واحنا قاعدين انا واختي ما وعينا الا هاللي مدرعم علينا !! الحمدالله اني كنت قاعده بمكان صاد جان شافني بدون حجاب وبنص جم !! لبست ملفعي وكارديغاني ونزلنا انا واختي معا الريال الرسبشن اثر الاذكيه مخلين حجزنا بالغرفة القديمه اللي قلنا مانبيها ومفتاحها عندهم وحاجزين لنا والريال بنفس الغرفة !! اي شي !

٣ صدمة وانتوا بكرامه : الفندق وايد قديم وداثر باب غرفة اخوي كله يلك ومايبطل الا بطلعت الروح ، وانتوا بكرامه اختي تعقدت من الحمام ماتبي تدش لاعت جبدها من كثر ماهو قديم الحنفيه عادي تطفح لانه الحديده مو راضيه تطلع صرت سباك وهم ماقدرت اطلعها..

هذا عيب مو صدمة الرسبشن غبي !! غير سالفة الحجز يقول لنا لما بنطلع وين ورقة الحجز رحنا ندورها لما ردينا طلع مايبيها بس يسال جذي ، نتصل عليهم نقول نبي رووم سيرفس لي يومكم مايا , وهم اخوي يتصل عليهم ويحقرون!!

واخر شي غثني انه انا حاجزه فيه بناء ع مدح وحده تقول بمستوى الفنادق ال٥ نجوم وصلته لي السما!! اهو نجمه وحده ويمكن مايستاهلها بعد ( اهو ٤نجوم)

اذا بطلع له ميزه :

١-انه قريب من شارع العرب مو فيه فاهدى الوضع، وهم نقدر نروح مشي لاغلب المجمعات مثل بي بي بلازا سونجو و فرنهايت ، لويات ، بافليون وغيرهم وهم قريب من المترو والمطاعم العربيه ..

٢-سعره زين نوعا ما ومايحتاج ندفع اي دفعة مقدمه مثل بعض الفنادق الماليزيا في موقع بوكينغ ، سعره تقريبا ٢٥٠٠ او ٢٦٠٠ رنجت (للغرفتين) بس اقامة بدون ريوق ..

Labels: سفر, شرق اسيا, فندق, ماليزيا-malaysia |

2 comments

Sunday, September 16, 2012

Sunway Pyramid Hotel @ Sunway Resort

9:05 PM

لازالنا بسلانجو ولازلنا باليوم الاول :\

بهالسفره قعدنا بفندقين هذا اهو الاول :

اهما فندقين يم بعض ونفس الاسم وجنهم واحد بعد بس واحد خمس نجوم واسمه ينتهي اعتقد بكلمة spa واحنا فندقنا 4 نجوم و اسمه ينتهي Resort..

ماصورت فيه وايد بس صورتين برا وصورت غرفة الاوتي :\

هالصوره من تصوير اختي لغرفتنا ..

حبيتها مريحه ونظيفه وكرفايه (السرير) كبير والحمام وانتوا بكرامه في هوز ع قولته (شطاف مادري شفاط حلاته تطلع ولا وحده خخ) ماصورته :\ وهالشي مو متوفر بكل فنادقهم غريبه ديرة مسلمين ومايهتمون بتوفير هالشغله بالفنادق :\

وفي بالفندق غرفة اوتي مره رحنا كوينا فيها ماكو غيرنا فاسمتعنا فيها ..

احلى شي الاوتي الوردي :)

ومن مميزات الفندق انه بمثابه مدينه (فندقين + مجمع + مدينة العاب )

هذا المجمع كتبت عنه بوست قبل لقراته اضغط هنا ..

اما مدينة العاب ..

مارحت لها لانه اغلبها مائية بس اخوي واختي الصغيره راحوا لها يقولون كبيره بس ع كلشي ياخذون فلوس المفروض يكون في سعر خاص اذا مو مجانا دخول لسكان الفندقين ..

وهذا موضوع عنها باحد المنتديات (link)

وبين هالمرافق (المجمع + المدينه ) وبين الفنادق ممر تقريبا نفس طريقة الاتلانتس بدبي ..

سعره :

احنا اقامتنا فيه كانت ليلتين (غرفتين) كلفنا بحدود 2500 او 2600 رنجت بدون الضريبه وبدون تامين ..

رايي :

مثل ماقلت الغرف زينه ومريحه ونظيفه وفي هوز وانتوا بكرامه بالحمام , وكلشي فيه مجمع والعاب فوايد اريح واوفر من عنوة الطريج والتكاسي ..

وحجزنا كان من خلا موقع بوكينق صفحته (هني)

Labels: سفر, شرق اسيا, فندق, ماليزيا-malaysia |

2 comments

Thursday, November 10, 2011

Corp Executive Doha Suites

12:19 PM

بالدوحة اخترت لنا بنت عمي هالفندق لأنه الوحيد اللي في سويت 3 غرف ..

وهو 4نجوم ..

صور من سويتنا

حوض سباحةموجود بالدور ال10..

رايي:موقعه مو ذاك الزود
الغرف كلها الفرش مزدوجة مافي كرافي منفصله (بسويتنا) ومافيه إلا حمامين وأنتوا بكرامة .
الخدمة لكم عليها بين زينه الى لا يعني مره حطينه علامة تنظيف الساعه 11الصبح ردينا الساعه 3مو منظفينها :/ والتنظيف موذاك الزود بعد ,أحسن شيء فاطمة اللي بالرسبشن وفي عربي بالبوفيه هم زين .
ميزته في نت مجاني بس مره تنح خخخ بس إذا اشتغل ماشاءالله سريع .
ريوقهم بسيط بس متجدد يعني كل يوم في أصناف يديده للأطباق الرئيسية ..

ككل زوين كتقزوره ..

سعره

لأربع ليالي تقريبا 500 دينار كويتي ..

وحجزنا كان من خلال موقع بوكينق صفحةالفندق هني

Labels: qatar, سفر, فندق |

0 comments