Monday, February 28, 2011
بالعيد الوطني تغدينا انا وامي وخواتي بهالمطعم ..

كنت مابي روح عقب قلت طلعه عائليه ماتطوف مو كل مره تصير ..

والجو كان عجيب  ماشاءالله اول شي غيم عقب طق مطر..


اخترنا كبينه ..

عيبها البابا شيفون !!

جزء من الكبينه..

المنيو ..

المقبلات مخلل وزيتون ..

تبولة ..

شوربة دياي بالكريمه ..
ماحبيتها :\


شوربة عدس ..
زينه ..

فته باللحمه ..
زينه ..

كبة بطاط ..
الحلو انه متروسه بطاط ولينه احب اللي جذي :)
 عيش يقدم مع اكثر من طبق مو ذاكره بالضبط  مع شنو ..

فوتشيني ربيان..
 اقل من عادي وايد زفر..

كبه باللبن..
 زوينه ..
 حمص باللحمه ..
هم كويس << يعني مغيره عن زين خخخ..


سلطة بطاط ..

حبيناها :)

المشويات ..

حبيت الدوا..

بس انصدمته  لما شلنا الخبزه شويه :\ جنه احد ماكلهم خخخ..
 الفاتوره ..
رايي :

ياحلات اليمعه ويارب تكون دوم :)

الاكل كل صوره علقت عليها بس عموما الاكل زين :)

عنوانه :

مجمع السليل
Sunday, February 27, 2011
بعيد ميلاد اختي بعد ماطلعنا من السينما تمشينا شوي عقب رحنا هالكافيه من زمان ودي اجربه شكله هادي ..



منيوهم كانت الخيارت فيه بسيطة فطلبنا بمساعدة القارسونه ..

وعلى مايجهز طلبنا صورت جم لقطة بالخش والدس وعلى الطاير خخخ..


صينية فطاير ماعرف شسمها بالضبط بس شفنها واختارنها...
جيكت ع الفاتوره اسمه ميني ساندويش ..

عصير برتقال لاختي ..

هوت جوكلت كيك ..<< اسمها يشوق ..

الفاتوره ..

رايي:

اكلهم حلو وخفيف و الجو العام للكافيه مريح وهادي ..

مكانه :

بالافنيو جبال محلات الاثاث ..
Saturday, February 26, 2011
باليوم اللي كنت رايحة للسبا لما خلصت مريت المارينا ابي اشتري شغله ونتغدى وبطريجنا لمارينا كريسنت ..

شفت هالكشك ..


الاسعار ..

في وردي واصفر \ وردي وازرق..

سالته ايهو الاحسن ؟؟

قالي اللي فيه ازرق ..
رايي :

زين وخفيف ..

مكانه:

موجودين كشكين بالمارينا واحد الدور الاول (دور المطاعم والسينما)
وال2 بالممر لمؤدي لمارينا كريسنت ..
Friday, February 25, 2011
ماصارت متى تنزل بحسابي :\

انا عمري ماسمعت ببنك تعبان كثر البنك اللي فاتحه حسابي فيه ..

ب 22 الشهر دزولي هالمسج ..

لما قريته توقعت قصدهم هالشي لي 24 الشهر عقب بشوفها موجوده بحسابي..

لي اليوم ومانزلت بحسابي ..

انا ماعلي التزامات من اقساط وقروض << عشان لاتقولون خذوها واساس الشيخ مانع هالشي ..

واهما مو من حقهم يجبروني انه لازم اسحبها منهم ..

بالله بشتري شي ومو موجوده مكينتهم شسوي ؟!؟

اجر لي وحده ليما افسفس المنحة ؟؟

بنك متخلف ..

ماعنده كي نت للتوفير بلعناها !! موظفينهم اغلبهم الله بالخير طوفنا !!

بس ابييييييييييييييييييييييييي منحتي ..

يعلكم شقول ..

اذا بشتكي اكلم منو !!

قلبي متروس ..

افكر اصرف منحتي ارباع ورصيدي كله وعقب اسكر حسابي و اغير البنك عقابا لهم :\

فيني ضحكه صج شر البليه مايضحك !

ع الهامش : شكرا بابا صباح ع المنحه تعيش وتعطينا يارب :)


اول شي

كل عام وكويتنا بخير يارب..

والله يحفظها ويديم الامن والامان فيها ياااااااارب ..

وايد مسوين عروض بهالمناسبه منها عرض بيتزا هت شفته اول شي ببلوق مدمد (هني)

عقب شفتها بجريده وكذا مره بنطلبها ونهون اخر مره تهورنا اول امس وجربنها :\

الاعلان اللي بالجريد..


طلبنه :\

امبيه صدمه شهالتغشف والشكل مو مضبوط كلش ماقارنها مع لصوره اللي بالاعلان لا اقارنها مع طلب مدمد شوفوه  



فرق وايد مو ؟!؟

وطعم الببروني اخترب صير زفرررررررررررررررررررر مو مثل قبل كنت اطلب ببروني منهم من 2007 وكان زين اخر مرتين لا مخترب :\

بيتزا هت عروضهم حلو ماشاءلله بس يبيلها تطبيق احسن :\

الحين من وين اطلب بيتزا ماعندنا غيرهم بمنطقتنا اهي اهي :(
Thursday, February 24, 2011
اليوم يوم ميلاد اخيتي الوسطيه ابوي يسمينا الجوز خخخ..

اهي اختي وصديقتي الكلوز ..


**كل عام وهي بخير **

**كل عام واهي الى الله اقرب **

اختي النقيه وانا لتقيه يارب تكون سنة خير علينا :p

والعمر كله يارب..

والله لا يحرمني منج :*

فلازم نحتفل رحنا تريقنا بمطعم بنزل بوست له بروحه بس مو مثل باجي المطاعم بوست تحلطم ..

وعقب رحنا تمشينا وتسوقنا بالافنيو و حجزنا بالسينما لهالفيلم ..



هني الدعاية
الزبده القصه روميو وجوليت بس بطريقه يديده ..

:رايي

عادي جدا توقعته احلى ..


Wednesday, February 23, 2011
امس كنا نفتر ونتشرى سوالف للعيد الوطني والتحرير ..

ولقينا هذا..

عمري ماتوقعت انه بشوف نقاب ع علم الكويت @@



لا ونقاب كامل مو عادي :\

بحركة 2 خخخ..
مادري ماعجبني احس عبط خو الهدف من النقاب الستر مو لفت الانتباه :\

Tuesday, February 22, 2011
مساء الاسترخاء ..

اليوم رحت مع خواتي لماي سبا ..

وهو سبا هندي ..


نزلنا السرداب ومن عند باب الدري عجبتنا الاجواء ..

الباب..

الارضيه مو واضحة وايد بس اهي زجاج وتحته ماي  ..

خخخ اختي خافت و انا بطلعه نسيته لما نزلت فزيت حسبالي طبيت بالماي :\

داخل :

انواع الجاي ..

واخترنا اللي نبي :

اختي الكبيره مساج استرخاء ..

انا مساج استرخاء مع بخار وسنفرة + فيشل ..

اختي الوسطيه فيشل ..

كلمتنا الدكتوره وسالتنا جم سوال قبل المساج ..

عقب عطونا فوط حاره وماي ..


وكل مدلكه تيب المداس لي عندج وتعرفج بنفسها واللي سوت لي اسمها بيبي ..
 شوفوا شنو لقيت خخخ ..<< لجايونه

مساج الاسترخاء والسنفره والبخار :

يخيرونج تبينه بزيت او بدون ..

عقب كل وحده تروح دار المساج الخاصة فيها والحلو فيه خصوصيه اكثر لانه اللوكر و الحمام داخل الغرفه ..

ويعطونكم  نص روب تلبسونه واندروير قرطاس ..

بدلت وعقب غسلت ريولي..

وخففت الاضاءه وقعدت ع الفراش وسالتني اذا ابي زيت لشعري قلت اوكي دهنتني ومسجت راسي ..

عقب مساج الجسمي اول مره اتهور واسويها خخخ..

من قاعة ريلي لي ويهي مساج وزيت ..

والمساج الهندي مو ضغط مثل التايلندي والصيني ..

عقب لبست نعال 2 ودخلت البخار ولما تعبت منه ناديتها يت مع السنفره فركتني ولفت تضبط الماي وانا كملت الباجي المحظور :\

ضبطت الماي ورتني الشامبوو البلسم و وصابون الجسم ومفراكة 2 للجسم غير عن اللي للسنفره ..

غسلت جسمي بروحي طبعا ولما خلصت عطتني فوط ولبستني فوقهم روب خفيف ..

وعطتني اعواد اذن انظف اذني ..

عقب قطنه فيها ماي ورد امسح ويهي ..

ودهنتني بكريم ..

وسالتني اذا ابي استشوار انشف شعري قلت اي نشفته لي ومشطته ..

وعقب رحت غرفه 2 فيها كراسي جنها كرافي واريح من كرفايتي :\ حدها مريحة ماشاءالله ..

حطت لي كمادات جاي اخضر ع  عيني وفوقهم نظارات الجل ماعرف شسمهم  لمدة دقيقتين ..

وردت معاها سلطة فواكهة وماي ..

ولما خلصت بدلت ورحت اسوي فيشل ..

رايي فيه:

ياحلات الدلع خخ المساج زوين بجرب سبا تايم واشوف اللي احسن بس هذا مبدائي حسن من ناحية الخصوصية..

وحسيت نفسي نظيفه وناعمه وخفيفه بس من المدابج راح الاحساس الخفة خخخ..

تنظيف البشره..

عجيب ماشاءالله ويهي ناعم ونظيف ورطب واللي تسويه اسمها روز حليوه وقرقت معاها خخخ..

الروس السوده راحت ..

واختي بعد وايد عجبتها نتيجته لها ولي وتقول هالمره احسن من لما سويت بسبا تايم ورايها مثلي وزياده انه تحس ويها مشدود مو مثل كل تنظيف بشره تحس يرهل ويهها ..

وان شاءالله بنسوي كورس عندها..

مقارنه بفيشل سبا تايم هذا نتيجته احسن وماتحن اخذي كريمات لا اشوه, بس سبا تايم احسن انه في تدليك خفيف ..

الاسعار:

حاليا عندهم عروض لي اخر شهر 2 يعني باجي لهم 6 ايام ..

الفيشل 15 قبل 25 ..
المساج بس 15 واذا سنفره وبخار 20  قبل كان 25 ..
واذا 2 خصم 50 % ع وحده منكم واذا 3 وحده تصير ببلاش <<< هذا للمساج بس ..

عنوانهم :

ميدان حولي -ش بغداد -ق11 -بناية 17 - بالسرداب..

ت: 25645353

وهم الاستقبال وايد حليوه ومحترمه :)

مابقى شي عندهم ماجربت وزنت نفسي قرقت ع روسهم صورت خخ بس داخل الغرفه لا لانه ممنوع ..

وضروري تحجزين قبل لاتروحين ..

خخخ العنوان بحد ذاته بوست :p

شنو اكثر شخصية كرتونية تحسون انها تشبهكم ؟

بالنسبه لي ماركو :)


مثلي تحب النوم و ام هبه وتحط نفسها بمواقف خايسه خخخخ ..


وشنو الشخصيه اللي ودكم تصيرون مثلها؟؟وليش؟

(1)

رنا

لانها خارقه تقدر تشيل راسها خخ و لما تدعمها السياره اهي مايصير فيها شي والسياره تتضرر..


(2)
اكو

ابي صير ربه منزل وام مثلها :)

Search

Loading...

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads