Friday, May 31, 2013
دزولي مكياجي ايميل عن المنتجات اللي متوفره عنده وتناسب حراره الصيف ..
 
اول منتج اهو الفاونديشن - الكريم الاساس وسبق ان جربته ونزلت تجربتي له هني
وعقب حجيهم شوقوني ارد اجربه مره 2 يارب ماقضيت عليه خخ ..

 
 
 
 
اسمه :Minx Ready-to-Wear Fluid Foundation
 
باختصار :
 
قوامه : سائل وحلو سهل المزج ويتحول مع الوقت جنه بودره ورطب ومايتقشر ..
 
تغطيته : وسط حبيته غطت مسامي هذي المشكله اللي مااحبها بشرتي ..
 
الوانه :متوفر ب6 درجات لونيه ..
انا جربت اغمج درجه ع تان وايد حلو للصيف ..
 
وفي حمايه من الشمس 15 ..
 
رابط تجربتي له للتذكير هني
 
في صور وتفاصيل اكثر ..
 
2 منتج اهو حمره ..
 

 
اسمها :Minx Sealed with a Kiss Matte & Shimmer Lipstick
 
للامانه ماجربتها بس انا احب حمر مكياجي جربت اكثر من نوع وعجبوني نزلت لكم بوست عنهم هني وهني وفي نوع باكتب عنه عقب ان شاءالله حلو ومو هديه منهم من حر مالي خخ عشان ماتقولون امدح الهدايا انا ماامدح كلش ملش مااعرف اجذب ولا اجامل الحمدالله ..
 
المهم ..
 
هالحمر نزلت لكم صورتها بالانستغرام ..
 
اهي عباره عن حمرتين بعلبه وحده والفرق بينهم ان وحده مات وال2 بلمعه ..
 
المات  تغطيته متوسطه اما اللي في لمعه لؤلؤيه ع قولتهم تغطيته خفيفه تقدرون تستخدمونه مع بعض تحطون الكريميه عقب فوقها اللمعه او كل وحده بروح ..
 
ومن مميزاتها :
غير انه 2 في واحد مات ولمعه ..
 
انه في حمايه  20 أشعة الشمس فوق البنفسجية UVA وUVB
 
وانه يحمي الشفاه من الجفاف والشيخوخه والخطوط الرفيعه (لانه يرطب ويحمي من اشعة الشمس )
 
ومتوفر ب8 درجات لونيه ..
 
شوفوهم هني
 
والمميز بالمنتجين غير انهم مخصصين للصيف من ثبات وحمايه وترطيب هم خالين من مادة البارابين ..
سويت سيرج عنه طلعت ماده حافظه تستخدم بوايد شغلات مثل الادويه والاكل ومواد التجميل كثرتها مضره تأدي لوايد امراض الله يكيفنا الشر مثل الاورام السرطانيه بالثدي والتجاعيد وشيخوخة البشره .. الخ ( المصدر هني )
 
وكالعاده اختم بوستي بشكري لشركة مكياجي ع ثقتهم فيني :*
 
شكرا مكياجي .. شكر امينه .. شكرا رغد ..



بالانستغرام : @Mikyajy1


t

والسايت :LINK
 
Thursday, May 30, 2013
اليوم شروف رفيجتي ودتني وشرت لي اغراض من هالبوث ..
 
 
 
اهو كشك صغير لشغلات بيوتيه من ماركة امريكيه هاند ميد و بمكونات طبيعيه مثل (فانيليا - زنجبيل - زيت الاركان .. ) واللي متوفر فيه صابون و كريمات وسنفرات وعطور ..
 وشغلهم يشوق ماشاءالله ..
 هذا صابون جنه حلاو (المصاص ) مثبت بعود خشب وفي ع اشكال وراويح والوان مختلفه ..
 
وهذي بعض النماذج من الصابون المتوفر شكله مربع ومن داخل في رسومات مختلفه وفي ع جواتي وانتوا بكرامه وع مايوه وع كيك .. الخ ..
 وحجمهم كبير شوفوه صابونة برج ايفيل بالنسبه لحجم ايدي ماشاءالله ..
 
وسعرهم الوحده ب2.750 د ك ..

 والشغلات ال2 تغليفه يشوق حبيت الكتابه اللي ع علب بالاستراس او اللولو معطيهم رقي وينفعون كهدايا ..
 
وهذا اللي خلاني اتشوق ابي اروح له ..
 
المربعه ريحتها مو زود بس لانها الاخيره وع براتم فخذيتها ..
 
وهذي حصيلتنا ..
 
انا خذيت صابونتين البراتم مع ست ميني في سنفره وعطر رول و لوشن ..
وشروفه خذت صابونتين ماشاءالله ريحتهم حلوه وفواحة عليها بالف عافيه وتتهنا فيهم يارب ..
الاسعار :
 
التوتل طلع 19 د .ك ..
 
الصابون الوحده ب2.750 ..
 
الست ب8 ..
 
عنوانه :
 
جمعية الدعيه فوق ..
 
الانستغرام : @primal_elements_kuwait
 
سالتها اذا في توصيل تقول يمكن بالمستقبل القريب :)
 
اللي تبيع كانت كريكره ههه تونس ..
 
مشكوره شروفه :*
Wednesday, May 29, 2013
 هالبوست مفروض انزله قبل شهرين والصور منزلتهم من شهر بالبلوق :/ صايره حدي كسوله ..
 
المهم هذي تجربتي للفراوله بالككاو او المارشيملو @ROSHA_SUGAR
 
 اختي الجوز طلبت لنا درزنين اعتقد ..
 
الصور مو واضحه لانه كان يومها لويه ..
 
 
هني لما حطيناهم بالصحن ..
 
 
الاسعار :
درزن الشيز كيك ب10 ..
مكس مع شيز كيك 9 ..
مكس بدون جيز كيك ب8 ..
والتوصيل للجهرا جنه 4 ..
 
رايي :
جربت نوعين ..
المارشميلو حبيته و الككاو كان زين ..
 
 
بالانستغرام : @ROSHA_SUGAR
 
للطلب :
what's app only: 96616428واتساب فقط ويفضل الطلب قبلها بيومين
Monday, May 20, 2013
 
مركز صابونتي كنت اشوف اعلانته بالجرايد الاعلانيه قبل سنه او سنتين واللي شدني له انه صابون طبيعي وعلاجي و هاند ميد وعقب شفته بالانستغرام وعجبتني فكرتهم اليديده اللي اهي
توزيعات الميني صابون المعطر للمناسبات المختلفة مثل ولادة و تفوق ونجاح .. الخ
 
وهذي بعض صور شغلهم بالتوزيعات منقوله من اكاونتهم بالانستغرام ..
 
 
 
 
وهذي صور اوضح ..
 
والصابون يسونه باشكال مختلفه ورد \ فراش \ دبدوب .. الخ ..
 
 
 
وغير التوزيعات عندهم وايد انوع صابون علاجي بالشوفان والمره .. الخ وعندهم خلطه صابونيه وعندهم بعد صابون لليهال هذا اهو ..
 
 
 
واذا حابين تشوفون صور اكثر لشغلهم وتكون عندهم فكره اكبر هذا اكاونتهم بالانستغرام : @mysoapcenter
 
للطلب -
واتس او مسج 0096560440360

Sunday, May 19, 2013
دار نوره << حلاته من اسم يكفي فخامته :) متخصص بالتنانير والنفانيف واغلب شغلهم للمتحجبات بما انه هالشغلتين غرامي وانا احب انزل الشغلات اللي تعجبني ببلوقي وهالبوستات مني انا مو بطلب من اصحاب المشاريع ..

 
حاليا عنده عروض ع مجموعه من التنانير من هذي العروض ..
(1)
 
اشتري تنورتين تور واحصلي على الثالثه مجانا .. سعر التنوره الوحده 20 دك

 
 
(2)
 اشتري التنوره واحصلي على الحزام والتوب مجانا .. سعر التنوره 30 دك

 
 
 
لحقوا عليه بس باجي يومين عليه يعني بيخلص يوم الثلاثاء ان شاءالله ..
 
وللطلب :
 
whatsapp : 509 44016
 
اذا حابين تشوفون شغلهم وباجي المجموعه هذا اكاونتهم بالانستغرام ..
 
الانستغرام : darnoora
Saturday, May 18, 2013
من المصممات اللي لفتت انتباهي  بتصاميمها الراقيه والمخصصه للمتحجبات من نفانيف واسعه وطويله وتنانير بستايل حلو وبسيط ومحتشم ..
 
وهم حبيت شعارهم لانه ع براتم ..
 
 
 

 
 
وهذي مجموعه بسيط من الصور لبعض موديلاتها ..
 
اكثر بدله عجبتني من التنانير هذي اهي ..
 
حبيت فكره البدله تنوره سكيني مع النفنوف او التوب الطويل من ورا وقصير من جدام ..
 

 
 

 
 
 
هالنفنوف سويت مثله
وان شاءالله يضبط ومقلدينه ببلوكات بعد ..
 
وهذا عجيب ماشاءالله غرامي الدانتيل ..
 
الصور كلها منقوله من اكاونتها بالانستغرام @heba_bodahoum
 
المفروض انها تعرض مجموعتها او جزء من مجموعتها في موقع le_touch  هني بس انا مو طالعين عندي :(
Friday, May 17, 2013
من زمان ماكتب بوست عاديي ببلوقي ( ع قولتي ماشخبطت ) ولهت ع شخابيطي العاديه ..
 
واللي خلاني ارد واكتب هالخبر اللي دزته لي رفيجتي من ابليكيش الدروازه ..
 
 
 
 
ليش ؟؟
 
احس فيه نوع من الظلم !!
 
واذا بيطبقونه الاولى يطبقون او بالاحرى ينزلون قرار بتوحيد جميع الرواتب لموظفين القطاع الحكومي اصحاب نفس المؤهل والتخصص والدرجة ..
 
صح ولا لا ؟؟
 
مايصير وزاره معاشهم فوق ال1000 وزاره يالله 800 وكلهم مثل التخصص والدرجه والشهاده واللي معاشه 800 يكرف اكثر من بو 1000 لانه هذاك على ادارتها اقبال وطق عصي وبالمكتب يقعد بدال الموظف 4 من كثرهم ماشاءالله !!
 
واللي يحر بو 800 شغيل و يايب معدل قوي شاطر و بو 1000 كسلان !!
 
ومعاش الجامعي نفس معاش الفني مو الدبلوم لا اللي 4 متوسط !!
 
ظلمممممممممممممم
 
مادري متى ديوان الخدمة يكون منصف وايد صارت لي مواقف من سبته مسمى غلط عدلنه مو راضي يرقوني للمسمى الاعلى لانه تعيني كان ع مسمى غير !! شي ياثر ع شي ..
 
الكوادر لناس وناس التخصصات اللي لها ادارات معينه تشتغل فيها تنصرف كوادرها بكل مكان و الاعلاميين اللي يمشون باي قسم ويقدرون يشتغلون باغلب الاقسام كوادرهم ماتنصرف الا بادرة اعلام او علاقات عامه !!!
 
وااي قلبي متروس ..
 
حسبي الله ونعم الوكيل ..
Thursday, May 16, 2013
 
توه مبطل بس بشكل مو رسمي تجريبي من يومين او 3 بس ..
 
ويبطل رسميا بعد اسبوعين ان شاءالله ..
 
انا مريته قبل شهر وشي وشدتني هالرسمه اهي تارسه الطوفه كلها و بمثابة لوحة للكافيه  واللي راسمها شاب كويتي مايحضرني اسمه الحين للاسف ,,
 
واسم المحل معناه كرسي الحديقة  باليوغسلافي ..
 
جزء من المكان لانه كان متروس ماشاءالله ..
 
طاولتنا ارتزينا عليها انا ورفيجتي ننطر المنيو خخ لما طولوا اكتشفتنا انه ماكو منيو وانه مثل طريقة الكافيهات العادي ستار بكس وغيره انتي تروحين تطلبين ..
 رحنا نطلب ..
 
كان في منتجات بسيطه (صمون 4 انواع جنه وسلطات هم 4 او 5 و سويت بعد 3 او 4 ) ..
 
وفي مشروبات حاره وبارده ..
 
وهذا مو المنيو الاساسي في اضافات بالفتره القادمه هذا شي بسيط وتجريبي ..
 
واللي مسويه المنيو الشيف هنوف البلهان ..
 حبيت القلاص مالهم  الرسمه تشوق ماشاءالله ..
 
وطلبنا كان ..
 
سلطة ماثبت ع اسمها بس اهي عباره عن خس و دياي بالقسماط (فيليه تقريبا ) مع نودلز وبالصلصه الصينيه ..
 حبيت مكوناتها بس الصلصه شويه وطعمها خفيف ..
 
و صمونة جبن مع صلصة البيتزا ومكونات 2 انا اقول بطاط ورفيجتي تقول بديان من جذي ماكملتها لاني مااحب البديان بس الجبن عجيييب ماشاءالله ..
 صمونة دياي وخس وفستق ..
اضافة الفستق ع الصمونه كانت شي غريب شجعني اني اجربها واشوه طلع طعمها زين ..
 
وقابلنا  صاحبة المطعم اعتقد اسمها  ( تم حذف اسم صاحبة الكافيه بناء ع طلبها !) كانت حليوه سمعت ملاحطاتنا ولما عرفتها بنفسي ماتوقعت انه انا انا خخخ ..
وبطلعتنا عطتنا كرت الكافيه واهو عباره عن بوك مارك بعد (وايد حبيت الفكره ) من باب التشجيع ع القراءه..
 
 
والسعر:
 
مع ماي لي بطل صغير + حليب لرفيجتي طلع 6 وشي ..
 
رايي :
 
المكان حلو ماشاءالله وشرح صج جنه بحديقه قاعدين..
 
الاسعار وايد زينه ..
 
الاكل حجمه راهي (الصمون) وعموما خفيف ونظيف ..
 
الخدمه ماحتكيت فيهم وايد  (رفيجتي اللي طلبت )بس كانت عاديه ع شوي شوي بطيئه ..
 
مواعيد العمل :
 
من 7 ص الى 11 م ..
 
وعنوانه :
 
كويت سيتي (الداون تاون ) برج جاسم - ش السور - الميزانين ..
 
ت : 22960666
 
الانستغرام : @lavickakw
 
 
 
Wednesday, May 15, 2013
 
من شغلات البيوتي اللي شدتني بمحل
Etude House
 
لزقات الخشم ..
 
اهي مغلف واحد بس مقسم لقطعتين ..
 
اول ماشفته حسبالي بصوب لزقه وبالصوب ال2 تونر ..
 
لانه انا لما احط اللزقه العاديه كنت اسوي سنفره وعقب احط اللزقه ولما اشيل امسح بتونر عساس اسكر المسام المفتوح عقب ماشلت الوصخ والروس السودا اللي كانت سادتها ..
 
 
بس لما استخدمتها امس اكتشفت انه عباره عن شريحتين ..
 
1- رطبه ومافيه لزاق تنحط عادي ع خشم لمدة ربع ساعه ..
2- عقب تحطون ال2 واهي اقرب للعاديه بس لزاقها اخف وهم تنحط ربع ساعه ..
 
 
 
رايي :
 
حسيت بنعومه وترطيب اكثر من التنظيف ..
و اذا بقارنها باللصقات العاديه هذي اخف بوايد ع خشم لما شلتها مادمعت عيني العاديه عيبها تعور شوي ..
بنفس الوقت العاديه تتميز بان مفعولها اقوى وتحتاج مده اقل بس ربع او ثلث ساعه هذي نص ساعه ...
 

سايته :(هني)
وبلشوا يوفرون منتجاتهم بالكويت بالانستغرام :etudehouseq8
 
 
__________________________________
 

(بوستاتي القديمه عنه ..
هني (فرع ماليزيا )
وهني فرع تايلند ..
- وهذي تجربه لي نزلتها قبل جم يوم
 

 

 
Tuesday, May 14, 2013
 
الاسبوع اللي فات جربت بينز كوكيز..
 وفي قعدات برا وداخل ( الصوره للي برا واللي داخل الصوره مو راضيه تتحمل :\)
 هذا جزء من انواع الكوكيز ..
 
جربنا نوعين ع اساس انه البيست سيلر ..
 هذا اسمه ميلك جوكليت
 
السعر :
 
الوحده ب750 فلس..
 
رايي :
 
حجمهم كبير ماشاءالله و متفوخين (اكبر من الكوكيز العادي ) و طعمه اقرب للكوكيز اللي جنه كب كيك مو الكوكيز العادي والاهم فريش قلنا سخنوها قالوا ماكو مايكرويف وماتحتاج مام اهي فريش وصج لما جربناها ماتحتاج ماشاءالله..
 
وحبيت الميلك اكثر من ال2 بوايد وصارلي جم يوم خاطري فيه ..
 
العنوان :
 
الافنيو - الغراند الدور الاول بسطرت محلات اليهال ريفر ايلاند و وصوب كيدزانيا وهالطقه ..
 
للتوصيل
22201222
 
الانستغرام :
Monday, May 13, 2013
 
من المحلات البيوتي اللي حبيتها بشرق اسيا ورحت لها بتايلند وماليزيا وله افرع 2 اعتقد بكوريا وسنغافوره ..
 
Etude House
 
وقبل كتبت لكم عنه هني (فرع ماليزيا ) وهني فرع تايلند ..
 
المحل يشوق كديكور يشد من بعيد ومنتجاته مميزه واغلبها تغليفها كيوت ..
 
من الشغلات اللي خذيتها منه وجربتها لاكثر من مره يمكن اكثر من 10 مرات بعد يعني اقدر احكم عليه ..
 
هالمنتج :
 
 Magic Enzyme Pack Peeling
 
اقرب منتج بيوتي له كنتيجة يمكن السنفره بس مافي حبيبات بس مثلها استخدام سريع وتفريك ونتيجة واضحة ماشاءالله او مثل الماسك بس مايحتاج يتم فتره ع ويه مجرد توزيع عقب تفريك وهم نفس فكرة الغسول بس مايرغي وهم استعمله بس مره او مرتين بالاسبوع مو يومي (يعني ميكس من اكثر من منتج)
 
 
قوامه :
اقرب للغسول ونوعه مايروح بالماي اذا في مكان حطيت عليه ومافركتيه عدل او نسيت تفركينه بتشوفين نفس خط ابيض مكانه وشويه دبق..
 
طريقة استخدامه :
(موجوده بالصوره بس ضغطوا عليها عساس تكون اوضح )
 
مثل ماقلت فوق مره او مرتين اسبوعين وطريقة استخدامه  توزيعينه ع ويه واهو ناشف وعقب لما تخلصين من توزيعه ع كل ويهج تفركينه بلطف راح تشوفين يطلع خيوط وصخ مثل فكرة المغربي !
وعقب ماخلص من تفريك ويهي اغسله بماي عشان اوخر الوصخ وماحب احط عقبه شي كريم ترطيب او ماسك اكتفي فيه ..
 
النتيجة :
 
ماشاءالله فوريه وسريعه لون افتح بشكل ملحوظ انا ماخذيته الا لما شفت نتيجته ع ايدي لما جربته بالمحل فرقت على ايدي صارت افتح وانعم وقارنتها بايدي 2 وكان في فرق واضح ( مو تبيض لا يرد اللون الاساسي تقريبا  يعني تنظيف )..
 
يعني اينظف ويفتح وينعم ..
 
رايي :
 
حبيته وقلبي يعورني لانه ع وشك يخلص وعادي من كثر ماحبه واحب نتيجته ومفعوله مره استخدمته لجسمي كله خخخ ..
 
 
سايته :(هني)
 
وبلشوا يوفرون منتجاتهم بالكويت بالانستغرام :etudehouseq8
 

Search

Loading...

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads