Thursday, December 31, 2009
السلام عليكم ..
وكل عام وانتوا بخير يارب..
وان شاءالله تكون سنة خير عليكم ..
وفيها انجازات تذكر لانه هالسنه بدعت ماسويت شي بس دورة وغصب بعد خذيتها خخخ..
وبما ان مناسبه حلوه براويكم ككاوي اللي صارلي قرن ادوره وصيت اخوي لما كان ببريطانيا وشافه باكثر من منطقه والمطار وماحصله الحمدالله اليوم لقيته بجمعية الخالديه عاد ماكنت ادوره كنا ادور ماسك الككاو خخخ..

صوره للي ببطنه ..
وهالنوع اول مره اشوفه ..


وهالحجم هم يديد علي خبري فيه الكبير حلو حجمه عشان مامصخها لانه نظامي لما تفك ماحتسك خخخ ..





وبس سلامتكم ..

Tuesday, December 29, 2009
السلام ..
امس اول مره اطلع مع مدمد و اول مره اشوفه بره ربوع الجامعه وعقب سنتين ونص تقريبا :) وان شاءالله مو اخر مره ..
اول شي دشينا السينما لهالفيلم :
the princess and the frog
دعايته :

القصة
تدور الاحداث في مدينة نيو اورلينز لحكاية كلاسيكية ملتوية، وهي عن الفتاة الجميلة اسمه تيانا والأمير الضفدع الذي حاول بشتى الطرق من أجل أن يكون إنسان مرة أخرى، قبلة واحدة تقودهم لمغامرة من خلال الرحلات المائية الموسيقية في ولاية لويزيانا.
ملاحظاتي :
1- الفيلم زين بس الازعاج كان وايد فتشتتنا يعني مره مخربطين بكراسي اللي يمنا وعقب ياهل كان يدابج ع الدري يمنا عقب ماوعينا الا طراخ طراخ طراخ مو رمي لاتخافون ولا احد يتسطر خخخ بس الياهل بو سنتين تقريبا غيرنشاطه وقام يركض جدام الشاشه @@
المهم ولما اندمجت ماوعيت الا ايدي غرقت خخ مو بالنهر اللي بالباباي بصولص الفلفل مال الناتشوز اهي اهي خبري فيه كان بحضن اختي ..
2- الفيلم احس مو ليهال وترا مقطع خخخ انا استغربت انه مقطعينه مو لانه عادي عندي هالسوالف قطع اول لا لانه فيلم اولاد عم حطوا العن من هاللقطة @@ بس زين سوو مدام الفيلم كله يهال..
وعقب تمشينا ورحنا ناكل فوندو و الميلك شيك لمدمد ..


وع الطاري اختي تقول انه بلولو هايبر حطوا باسكن وفيه هالفوندو :)
Sunday, December 27, 2009
السلام ..
ماكنت ابي اروح له خخخ كل اقول جذي واشوف اغراض البنات واتشوق ..
اليوم رحت له العصر مخصوص للاستهلاكي :
بس راح ابلش بمعرض العطور ..
عيب المعرض الهجوم البربري وانه ما التزموا بموعد الافتتاح4 العصر احنا وصلنا 4 و10 ولي الحين مسكر مافتح الا ع 4 ونص حزتها طبعا احنا صيام تسبحت بالعطور اذا شفتوا وحده تقول انا صايمه هذي انا بكل تواضع خخخ..
اول شي مريت بيت الصابون اللبناني وكنت بساله عن خلطة ولقيت عنده سوالف تونس مثل ماسك الككاو بس اهو للويه وانا ابي شي للجسم والويه ..
وخذيت هالعرض سنفرة ككاو وكريم البابونج و الخلطة الملكيه ..


عطوني معاها هديه صابونة الشبه وصابونتين اعتقد لافندر و كريم اللوز المر ..

بعدين رحت خان حتى جيس ماعطوني :\


ولاحظت ع طول يطلعون الغالي انا ابي صابونه اهو طلع لي خلطه وساعه يشرح عليها ووحسبالي عن صابون وخذي معاه هذا وهذا كود لي اللي بالمحل كله ولما سالته بجم اهي قال ب24 @@ قلت جم عقب طلع يتحجى عن شي 2..

والصابونه البدر ماشميتها عالبو صايمه بس لما فطرت شميتها ماحبيت ريحتها :\ واللي شدني انها بالفانيليا بس ريحته لا جنه عطر عربي من ملوت يدي الله يرحمه يارب :)

سالته عندكم عروض قال لا بس في هدايا..



سيفورا يميعين منتجات وحاطينهم بجيس بس بطلته كل هذول ب10 ..



والحين دور :



مناديل معطره ..




واحد من الشغلات اللي ابيها ..



كنا نبي شعربنات بالككاو بس مافي ..



واختي خذت حب الحمداني مادري همداني بس نسيت اصوره ..
وحلاو احبه هم من الشغلات اللي ابيها..


وهم بي فارما كنت ابيه امس شفت شامبو بالنت منهم يمدحونه وراويته هالمره جاي خخ..
ولقيت عندهم سوالف حلوه كنت ادوره ملوت الكوع خصوصا..
وهذاعرض الواحد ب4 << بالمعرض برا ب5 واذا شريتي2 ال3 ببلاش.. وطبعا كل واحد معاه كريم ..


الي ع اليمين مرطب واليسار مفتح بشره ومزيل اثار حب الشباب وخافي العيوب الواحد ب4 حسبت لنا ال2 ب6..
وجربته عايدي الكحلي اللي يفتح وعجبني ..


الشامبو االلي ابيه اللي ع اليسار بروحه ب4 وهالعرض ال2 ب4 واهو للتساقط قالت ينشف بس ال2 يرطب الشعر ..



ديودرنت و معجون اسنان للالتهابات اللثه ..

شامبو ضد القشره بدينارين و معاه هديه معجون التبيض المعجون بروحه بدينارين بعد و الصابون هم هديه ..

واللي حابه تاخذ فكره عن منتجاتهم وفي للرياييل بعد ..
هذا سايتهم :
واهما بعد يوصلون للبيت ..
وموجودين بمجمع السندس والمعرض..

وخلصوا الاغراض :( و خلصت فلوسي :)

Thursday, December 24, 2009
السلام ..
امس ستاذنت من الدوام ورحت السوق واختي كانت تبي محل مكياجي لحظوا اهي مو انا :\
المهم دشينا وكان في عروض منها ..
تاخذين حمرتين ب6 يعطونج وحده فري..

وخذيت برايه للحمره وال2 لرفيجة اختي لانه خذيت لها معاي حمره ..
وهذا ست كحل تقول اللي تبيع الواحد ب3 و900 بس العلبه كامله ب11 ..
وفي منه مطفي مثل اللي خذيته وفي بقلتر ..
خذيت 2 واحد فتحته وال2 واهو مسكر ..


وكل هذا عشان اختي تبي هالهديه خخ لازم تشترون ب25 عساس تاخذونها :\



واهي مفتوحه ..
طلع معاها كحله ..





ومدمد عطتني سايتهم ..
مرسي :)
واهي تحجت عن كرونر العروض ..
Monday, December 21, 2009
السلام..
رديت للبوستات المزدوجه من كل بستان زهره << شخباري مجلة ماجد :)
اليوم رحت لفيلم معتوق في بانكوك والحمدالله انه التذكره بدينار ونص:p
اللي ما عجبني فيه:
-طارق العلي وايد ماخذ راحته مع هالتايلانديات :\
- الفيلم يبيله بطله اصغر من عمو طارق :p
- مادري شعلاقته بتايلند 2مره يسوي شي فيه عدل !!
- ماكو قصه احس ميمعين جم فكره من افلام قديمه ودامجينها ..(النصب بالسفر- العصابه- الاشخاص متشابهين)
احلى شي في جم موقف بسيط بس يضحكون ..
دعايته :
_________________________________________________________
ريوقي العاده يكون من كاريبو ..
وهذي جم لقطه لطلباتي منهم ..
سيزر و اخليهم يخلطونها وساعات يحطون فيها خبز وساعات لا..

صمونة تركي ذوقته 3 وعجبتهم :)


هوت شوكلت هاليوم كان احلى هوت شوكلت ذقته عندهم كانت الكريمه وايد ونوعيه الككاو مغيرينها :)


طبعا مو كلهم اطلبهم مره وحده..

وهم اطلب كرواسان جبن مره خذيت ساده كرهت عمري خخخ..

وايام الجامعه كنت اطلب منهم براوني لذيذه وصولص الكاكو سايح ايباااه خخخ ..

وهم عندهم كيك انجلش جنه كان حلو بس من حبيته طلبته جم مره وقطعوه @@

____________________________________________________

هالروايه قريتها من زمان قبل معرض الكتاب ..



اسمها :شمس الليل ..


مؤلفها : د. نبيل فاروق ..

القصه عباره عنمجموعه من الرسائل البريديه من البطله صفاء لصديقتها في مدينتها السابقه تروي فيها تفاصيل حياتها واهم الاحداث التي تمر بها هي حبها لجارها الشاب الكفيف .


وبس سلامتكم :)
Sunday, December 20, 2009
السلام..
اليوم وانا افتر بمركز السلطان شرق شفت هالكورنر..
هالماركه من زمان خاطري فيه..
ومن السوالف اللي موجوده بالكورنر :
بلاشر ..
كريم اساس ..

مينرال..


كونسيلر..




وبصوب 2 في قلوسات منها هالنوع ..




وهذا خذيت منهم قبل جم شهر عقب رمضان ع طول ..




و جنه يبيض الضروس :)لانه في كرست ..
وهالمسكرا وحده تقول مثل انها مالت ماكس فاكتر ..

خذيتهااليوم :)





و لما رديت حست بسايتهم جان القى اغراضي محصلين جوائز وناسه ..
http://www.covergirl.com/beauty-buzz/award-winners.jsp

ريهانه من الوجوه الاعلانيه لهم (احب مكياجها)..



ولقيت هالدعايه خخخ..



وبس سلامتكم :)

Saturday, December 19, 2009
السلام عليكم..
وكل عام وانتوا بخير يارب..
واجازه سعيده :)
امس الله يسلمكم رحت الافنيوز خخ المهم وكنت ابي هالكافيه و فيلم امير البحار
المنيو :

بطاط مثل فكرة تويستر بس عيبه مكان الكريمه وايد ومكان شويه ..

بس لذيذ هجمنا عليه خخخ..
في كالعاده صوره مختفيه اهي كانت هالمره لسلطة السيزر و عجبتني حموضتها واختي حبت الدياي..
وهذا باستا عيبه ماصخ :\
اختي زادت ملح وعجبها ..

ملحوظه صغيره احنا اللي عندنا عادي عند الناس مالح :)



همبرغه نايس احلى من مالت فرايديز..

وحلينا بهالحلو اسمه شي جذيبافلوز صنداي براوني..

عباره عن براوني ساخنه مع برد فانيليا وفوق عليها كريمه و كاجو وكوكيز وصولص ككاو ..


واكلهم زين وسعرهم رخيص كل هذا ب11 دينار بس,,
والاهم اختي عجبها المطعم :)
***************************************
عقب رحت فيلم امير البحار للهندي كنت ناطرته من العيد وقبل يومين نزل ..




لما شفت دعايته:
قلت عسى مايقلد اسماعيل ياسين بالبحريه :\
بس طلع لا..
معلومات عنه من سايت السينما وغريبه ليش ما يحطون اسم المؤلف !!
عموما اهو من تاليف يوسف معاطي ..

القصة
تدور احداث الفيلم حول الطالب أمير الذي يفشل كل عام من التخرج من الكلية البحرية وعن حبه لجارته سلوي(ابنه عميد الكلية)ولكن عند تخرجه من الكليه البحرية بعد ثالثة عشر سنة يأخذ سفينة أبيه الخاصة ويخرج بها في البحر مع امه واخوته وسلوي (التي هربت من حفل خطوبتها) و ينفذ منهم الوقود وبعدها يأتي القراصنة ويخطفوا السفينة ومن عليها ويطالبون بفدية مالية كبيرة. وتدور الاحداث الكوميدية.
جنه كاتبين الفيلم كله خخخ ..
رايي فيه يضحك بس توقعته احلى اخر فيلم للهنيدي رمضان مبروك ابو العلمين حموده كان احلى لانه في رساله وركز على قضيه مهمه اهي التعليم ..
وهذا تحسون احداثه معروفه خصوصا عقب ماقريتوا قصه اللي بسايت السينما :p
**********************************************
وطبعا فترينا شوي في جم محل مسوي تنزيلات بس مانغو كان حايشه زلزال خخخخ..
وقبل لانطلع اختي كانت تبي باسكن فشفت هالكشك ..

وخذيت منه كب كيك ..
عجبتني علبته من داخل في شي يقضب الكيكه عساس تثبت ..
لانه قبل هالمره كنت ماخذه كب كيك من دين اند ديلوكا وكان القوطي كبير لمافتحته باكلها توقعت الكيكه مختربه بس اللي لقيته انه متكوكسه ومسويه وقوف ع الراس وثابته على هالوضعيه..



وهذا النوع اللي خذيته :
red velvet cupcakes

وكالعاده لما نجرب الشغله اكثرمن مره نقارن بينهم :
هذي الكيكه ماعجبتني وايد عيبها ماصخه اما الكريمه حلاها زايد و ناشفه :\
كيكه دين اند ديلوكا حلوه و الكريمه ماصخه بس فيها نقط طعمهم حالي وايد بسهذاحبيتها اكثر من اولى ..
اطالب المطاحن يسون لنا هالنوع :)

وخذيت هذابعد اللي لونها وردي ::

وهذا سايتهم :

Search

Loading...

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads