Showing posts with label شرق اسيا. Show all posts
Showing posts with label شرق اسيا. Show all posts
Wednesday, May 15, 2013

postheadericon black head remover dual sheet

10:43 PM
 
من شغلات البيوتي اللي شدتني بمحل
Etude House
 
لزقات الخشم ..
 
اهي مغلف واحد بس مقسم لقطعتين ..
 
اول ماشفته حسبالي بصوب لزقه وبالصوب ال2 تونر ..
 
لانه انا لما احط اللزقه العاديه كنت اسوي سنفره وعقب احط اللزقه ولما اشيل امسح بتونر عساس اسكر المسام المفتوح عقب ماشلت الوصخ والروس السودا اللي كانت سادتها ..
 
 
بس لما استخدمتها امس اكتشفت انه عباره عن شريحتين ..
 
1- رطبه ومافيه لزاق تنحط عادي ع خشم لمدة ربع ساعه ..
2- عقب تحطون ال2 واهي اقرب للعاديه بس لزاقها اخف وهم تنحط ربع ساعه ..
 
 
 
رايي :
 
حسيت بنعومه وترطيب اكثر من التنظيف ..
و اذا بقارنها باللصقات العاديه هذي اخف بوايد ع خشم لما شلتها مادمعت عيني العاديه عيبها تعور شوي ..
بنفس الوقت العاديه تتميز بان مفعولها اقوى وتحتاج مده اقل بس ربع او ثلث ساعه هذي نص ساعه ...
 

سايته :(هني)
وبلشوا يوفرون منتجاتهم بالكويت بالانستغرام :etudehouseq8
 
 
__________________________________
 

(بوستاتي القديمه عنه ..
هني (فرع ماليزيا )
وهني فرع تايلند ..
- وهذي تجربه لي نزلتها قبل جم يوم
Etude House : Magic Enzyme Pack Peeling )
 

 

 
Labels: , , , , , , , | 0 comments
Monday, May 13, 2013

postheadericon Etude House : Magic Enzyme Pack Peeling

12:34 AM
 
من المحلات البيوتي اللي حبيتها بشرق اسيا ورحت لها بتايلند وماليزيا وله افرع 2 اعتقد بكوريا وسنغافوره ..
 
Etude House
 
وقبل كتبت لكم عنه هني (فرع ماليزيا ) وهني فرع تايلند ..
 
المحل يشوق كديكور يشد من بعيد ومنتجاته مميزه واغلبها تغليفها كيوت ..
 
من الشغلات اللي خذيتها منه وجربتها لاكثر من مره يمكن اكثر من 10 مرات بعد يعني اقدر احكم عليه ..
 
هالمنتج :
 
 Magic Enzyme Pack Peeling
 
اقرب منتج بيوتي له كنتيجة يمكن السنفره بس مافي حبيبات بس مثلها استخدام سريع وتفريك ونتيجة واضحة ماشاءالله او مثل الماسك بس مايحتاج يتم فتره ع ويه مجرد توزيع عقب تفريك وهم نفس فكرة الغسول بس مايرغي وهم استعمله بس مره او مرتين بالاسبوع مو يومي (يعني ميكس من اكثر من منتج)
 
 
قوامه :
اقرب للغسول ونوعه مايروح بالماي اذا في مكان حطيت عليه ومافركتيه عدل او نسيت تفركينه بتشوفين نفس خط ابيض مكانه وشويه دبق..
 
طريقة استخدامه :
(موجوده بالصوره بس ضغطوا عليها عساس تكون اوضح )
 
مثل ماقلت فوق مره او مرتين اسبوعين وطريقة استخدامه  توزيعينه ع ويه واهو ناشف وعقب لما تخلصين من توزيعه ع كل ويهج تفركينه بلطف راح تشوفين يطلع خيوط وصخ مثل فكرة المغربي !
وعقب ماخلص من تفريك ويهي اغسله بماي عشان اوخر الوصخ وماحب احط عقبه شي كريم ترطيب او ماسك اكتفي فيه ..
 
النتيجة :
 
ماشاءالله فوريه وسريعه لون افتح بشكل ملحوظ انا ماخذيته الا لما شفت نتيجته ع ايدي لما جربته بالمحل فرقت على ايدي صارت افتح وانعم وقارنتها بايدي 2 وكان في فرق واضح ( مو تبيض لا يرد اللون الاساسي تقريبا  يعني تنظيف )..
 
يعني اينظف ويفتح وينعم ..
 
رايي :
 
حبيته وقلبي يعورني لانه ع وشك يخلص وعادي من كثر ماحبه واحب نتيجته ومفعوله مره استخدمته لجسمي كله خخخ ..
 
 
سايته :(هني)
 
وبلشوا يوفرون منتجاتهم بالكويت بالانستغرام :etudehouseq8
 
Labels: , , , | 0 comments
Saturday, January 19, 2013

postheadericon رحلتنا الى جنتنغ ..

3:59 PM
واخيرا باكمل بوستات ماليزيا واكيد نص المعلومات نسيتها وهذا بالنسبه لي اصعب بوست ..

وطبعا الله يسلم قوقل يسهل كل شي قبل السفره كنا مسوين سيرج مكثف انا واختي الجوز واختي طلعت معلومات وايد مفيده منها طريقة الذهاب لجنتغ من حجز وغيره وقارنا  واخترنا الانسب لنا وكان في موضوع سهل علينا بس دورته ماحصلته :\

رحلتنا كانت على يومين اول يوم كان للحجز بس وال2 كان لروحه ,,

الحجز كان عن طريقة شركة قو جنتنغ (LINK)الموجوده بKL SENTERAL ..

رحنا له بالمترو ..
وهذي خريطة سكة المترو ضغطوا على صوره بتكون اوضح  (احنا محطتنا الحمرا  وجتهنا  الثانية KL)


خذينا تذكر المترو او بالاحرى الفيش ورحنا ..
والحمدالله المترو الوضع فيه مريح مو لوية ولا وصخ ، وبالنسبة المحطة مو يم KL بالضبط لا مشينا شويه .. وصلنا للوجهتنا ال2 وصعدنا لي كاونتر الشركة ..
 حجزنا تذاكر وهي عباره عن تذكرة الباص والساكي وي (التلفريك ) وتذاكر دخول المنتزه (الخارجي بس ) جنتغ فيها مدينتين وحده داخليه وال2 خارجيه ..

سعرها بحدود 58 رنجت للشخص ..

ونسيت اقولكم الوسيله ال2 لزيارة جنتنغ اهي التاكسي وسعره بحدود 200 الى 300 رنجت بس تكلفت الطريج ويوصلكم اذا ماخب ظني للتلفريك وعقب دفعوا فلوس للتلفريك والدخله << يعني مكلف اكثر خصوصا اذا كنتوا قروب صغير ..
 وهم احتمال يوديكم لاماكن 2 قبل لا توصلون اذا ماخب ظني مزارع مثل الفراولة وهم حدايق او ماذكر شسمهم حديقة مادري القرية اليابانيه جنه وفي فرنسية بعد يعني هم لوية(غير لوية الطريج) ..

بجذي نكون خلصنا اول يوم اللي كان مخصص للحجز اللي ماخذا من وقتنا ساعه تقريبا الحمدالله كان سهالات ماضيعنا .

 و اي قبل لا انسى كان خاطرنا نحجز مبجر يعني 8 او 9 بس مالقينا الا 11 الباجي كله فل ماشاءالله والرده مالقينا الا 6 هم الباجي فل فحلاته كثر ماتقدرون تحجزون مبجر..

وصلنا ل2 يوم من الصبح قمنا ورحنا المترو ونفس اللي سوينا امس بس مادشينا داخل مبنى KL لانه الباص كان ينطرنا برا ..

ومن الباص رحنا للتلفريك .. كان في زحمه وطابور بس كان يمشي بسرعه كل تلفريك يكفي 8 ..
وعى فكرة ترا له ساعات عمل محدده مو مبطل 24 ساعة ..

وركبنا التلفريك والدريشة جدامي واقعد اجك اجك اجك اجك يعني اصور مو اشربك خخخ ..
 وعقب مشينا شويه ليما وصلنا للمنتزه وهذي تذاكرنا ..
 ذكرتنا بتيخا ولد اختي خخخ ..
 لقطات من المنتزه ..

لعبت تقريبا 4 العاب الدورفه اللي تفتر والقطار السريع ولعبة سبايدر مان وقلاليبه ..




 

وهذي اهي لعب سبايدر مان اول مره اركب لعبه اكون واقفه فيها خخ بس صج وناسه وضحك بس قبل لا تقفون بالطابور حطوا اغراضكم باللوكر برا يم اللعب عشان اتوهقون مثلنا وصل دورنا وقالوا لنا ماكو مكان لاغراضكم روحوا حطوهم باللوكر :\






مااعبر يالقوي خخخ هذي الباص اللندني وفي وراه كبينات التلفون يم لعبة سبايدر مان .. 


 الاكل :

شفت برا المنتزه وايد مطاعم بس داخله ماذكر الا هذا والحمدالله كان حلوو ..

 و في وايد كشكات جنه لبطاطه حلوه ووافل وغيره احنا جربنا الوافل وفي وايد نكهات صلصة ..
 اخترنا الككاو وماحبيتها :\
 قبل لا نطلع بشوي تغير الجو فجأه ضباب وبرد الجو (عكس اول ادشينا كان الجو عادي اقرب للحر ) ومن جذي ينصحون انه تاخذون معاكم كوت خفيف احنا كنا ماخذين معانا كرديغانات شتوي خفيفه ..

 وطلعنا ورحنا التلفريك هالمره وصلناله بصعوبة شويه مقارنة باول مره بس اشوه لحقنا ع الباص ..

 والمنظر كان عجيب حزة الغروب ..
 
 
 وهذا باصنا من داخل الاغلب بالرده نايم خخ..
تحسون لوية شويه بس اشوه كانت سهالات وعلى قولتهم اللوية الممتعه ..

واستانست بالمدينة وودي اذا الله كتب مره 2 ورحت لها بتم يومين فيها هالمره ماقدرنا لانه الفنادق كلهم فل ماشاءالله مع انه حجزنا قبل السفره بشهر يمكن ..
Labels: , , , | 0 comments
Monday, December 10, 2012

postheadericon RoRo B.B CREAM

11:15 PM
امس استخدمت بي بي كريم يديد متشوقه اجربه من دهر بس كنت انطر اخلص بي بي كريم ايزدورا اللي قلت لكم عنه هني ..
واليديد كان فاشل اهو ملاحظتي على كريمات البي بي كريم اللي جربتهم من شرق اسيا كلهم ناشفين وماينفعون البشره الجافه جربت 3 وهذا الرابع (2 من مايبيلين وغارينيه ) كلهم نفس الشي :\ من ناحية القوام ويبينون القشور اللي ناتجه عن الجفاف ..
 
فقلت اليوم خل ازيد جرعة الترطيب فحطيته مع المرطب بنفس العلبه ..
 
 وهالصوره لقبل وبعد الخلط ..
 
وهذي المكونات ..
 
(1)
بي بي كريم سامبلز (اشوه ) من هالمحل

postheadericon ETUDE HOUSE \ SWEET DREAMS

 
مميزاته :
حمايه من الشمس SPF 50
وتر بروف (ضد الماي ) ولونغ لاستنغ (يدوم لفترة طويله)
يبيض ..
مكافح للتجاعيد ..
مكافح السواد ..
 
(من جذي تشوقت عليه ) بس ناشف ناشف ناشف ويبين عيوب بشرتي (الحراشيف والجفاف ) وفاتح ..
 
بس هم لي الحين خاطري اجربه صج مو مثل قبل بس هم ابي :\ (مشكله اذا تنحت :\)
 
(2)
 
وهذا المرطب اللي خلطته معاه ..
 
اسمه :

postheadericon bioderma atoderm po zinc cream ultra-apaisante

 
قلت لكم عنه توني هني
وصورته منقوله من هني ..
 
ورايي فيهم :
حتى عقب الخلط ما حسيت باي فرق :(
 
وانا ازهب للبوست تذكرت اني قريت بوست عن تجربة وحده باعدااد البي بي كريم طبعا من الى ماشاءالله شي يستحق القراءه

(سويه بنفسك : بيبي كريم ! )

* شكرا ميك اب لوفر على المساعده بالبحث عن البوست ماقصرتي والله :*
Labels: , , , , , , | 2 comments
Wednesday, November 28, 2012

postheadericon واخيرا جربت السوشي ..

10:14 PM
اليوم مريت جمعية الشاميه وشفت ثلاجه عند الكاشير فيها اغراض هالمطعم قلت فرصه اجربه ..
 
وفي وايد انواع بس انا اخترت اللي احب مكوناته ..
 
 اسمه: تمبورا اورا ..
 
في ربيان تمبورا -خيار-كرسبي..
 ومعاه نوعين من الصلصات في واحد حالي وال2 في مروره شويه وملزقينهم بذمه وضمير خخ..
 
والحلو انه معاه الشوباستيك شي جذي اسمهم العصي ..
سعره :
ب2.500 د ك ..
 
رايي :
 
والله طعمه زين بس مااحبيت الصلصات خاصة اللي في مروره , واحس ثقيل شوي او معدتي ماتقبلته :( عسى ماحط الخيار بلستت الممنوعات :( (اللي مايدري هالفتره تقريبا بيصيرلي سنه منتكسه من معدتي من جذي ماتقبل اكل اي شي يعني غير عسارتي بالاكل هم منتكسه الحمدالله ع كل حال )
Labels: , , | 4 comments
Tuesday, November 27, 2012

postheadericon shizens (eye charm)

11:48 PM
هالماسكرا كانت شغله من الاغراض اللي كنت ميمعتهم بالبيوتي لست لسفرة ماليزيا ..
 
ومن الشغلات القليله اللي خذيتها من اللسته ..
 
وخذيتها بناء على مدح مدونة ليزي ديزي (بوستهم عنها هني)
 
واهي ماسكرا الفايبر ..
 
 
يعني قوامها مو سائل مثل الماسكرات العاديه لا تكون نفس الشعيرات هذي الصوره تبين شكلهم ..
 
وهذي فرشتها (الصوره منقوله من مدونة ليزي ديزي )
اما طريقتها :
تحطين طبقه من ماسكرتج العاديه عقب تحطين اهي (ماسكرا الفايبر) ..
 
رايي:
 
جربتها اكثر من مره للاسف ماعجبتني لانها انها تتناثر ع ويه و تدش بالعين ونتيجتها عاديه جدا جدا انا لما شفت اللي حاطتها  العارضه على عين وحده وال2 مخليتها طبيعيه  كان في فرق كبير واختلاف بينهم (هالحجي عقب ماشريتها ) قلت لها شلون تستخدمينها قالت حطيتها 10 مرات الله ان شاءالله مااحطها هالكثر الدوام يخلص والزحمه تخلص وانا  لي الحين امشط رموشي فيها خخ ..
افكر اسويلها ريسيكل واخليها صبغ اظافر مخملي (فلفت ) 99% تفشل الفكره :)
 
سعرها :
 
اعتقد 128 رنجت ..
 
مورخيصه بعد :\
 
 ملاحظه : باجي الصور من google
Labels: , , , , , , | 6 comments
Saturday, November 10, 2012

postheadericon Berjaya Times Square - برجايا تايمز سكوير

4:25 PM
نكمل بوستات ماليزيا  , هالمره عن مجمع اسمه Berjaya Times Square - برجايا تايمز سكوير
 
 
و الحلو فيه انه مجمع شامل لانه :
 
1- فيه فندق (هذا سايته  link )
 
2- مدينة العاب 3>
 
3- سينما ..
 
4- سوق 3>
 
والاحلى انه يمه محطة مترو توصل دايركت له , واهو قريب من شارع العرب ماجربت اروح له منه بس اخوي يقول ومكتوب بالنت بعد انه تقدرون تروحون له مشي ..
 
نبلش بالسوق  بس ماصورت وايد فيه ..
 
السوق ينقسم بالنسبه لي (من وجهة نظري ) الى قسمين للتسوق :
 
الاول :الخاص ببضاعتهم نفس اللي نشوفها بالسايتات الكوريه والصينيه اللي رايحين تايلند نفس اللي ببلتينيوم ونفس اللي بسايت نفنوف الكويتي ..
 
ال2 :محلات منوعه ماذكر شنو بالضبط لانه ماافتريت فيه عدل ..
 
اول ادشينا شفنا هالمناظر ..
 سنوايت والاقزام هذا اعلان او بالاحرى ديكور بنص الجمع لمحل مكياج حبيت الفكره وهالمحل اسمه صعب بس خذيت منهم  ماسكرا فايبر كنت حاطته بالبيوتي ليست ..
 
وهالتمثال عجبني هم كان بنص المجمع ..
 
وهذا قسم من اقسام المجمع..
 
وصلنا لصور القسم المنشود..
 
هالمحل حبيته لانه  حصلت جم شغله فيه حلوه ..
 
منهم هالكارديغانات احترت اختار شنو ؟؟واخر شي خذيت 2 من كل موديل وحده ..
 
 من محل 2 ماصورت اسمه عجبوني هالجناط ..
 
وفي وايد محلات حلوه غيره بس كنت لاهيه بالشوبينغ  فما صورتهم..
 
من المحلات الموجوده فيه وكتبت لكم عنها قبل (اذا حابين تقرون البوستات القديمه ضغطوا على كلمة ؛اسم المحل؛)
 
 
ووصلنا لي مدينة العاب الداخليه  اهي بالدور ال5 وال7 مافي دور 6 بالنص لانه العاب كبيره :)
 
 
اسعار تذاكر تختلف باختلاف العمر وباختلاف يوم الزيارة :
 
- بالايام العاديه :
 
للاطفال (اقل من 12 سنه ):28 رنجت
للبالغين (اكثر من 12 سنة): 38 رنجت
كبار السن (55 سنة وفوق): 15 رنجت
الاطفال اقل من 3 سنين : بلاش (فري)
 
-بايام العطل والمناسبات : 
للاطفال (اقل من 12 سنه ):33رنجت
للبالغين (اكثر من 12 سنة): 43رنجت << هذي مالتنا :)
كبار السن (55 سنة وفوق): 15 رنجت
الاطفال اقل من 3 سنين : بلاش (فري)
 
 
لقطات عامة للصالة :
 
 
 
 في وايد العاب (مثل قطار الموت ولعبة التخضخض ولعبه الفراريه ولعبة يقولبون فيج ليما تتغير ملامحج من الخرعه خخخ وسيارات التصادم هذا اللي اذكرهم )
 
وفي العاب بفلوس  مو مثال الباجي وكانوا مسوين عليهم عروض مثل سينما 5D  و قصر الرعب ...
 
وفي وايد كشكات مثل كشك البرد وهذا كشك 2 مخصص للشمع ع شكل ايدكم ..
 
وكلشي بالالعاب حلو الا اللوكرات عله كل مابطلتيهم بتحطين شي روحي دفعي !! استخدام واحد بس كل مره وبعض العاب مافي مكان تحطين فيه اغراضج فتضطرين تاخذين لج 1 واحنا اساس كنا ماخذين واحد للمشترياتنا لما بنلعب مارضوا نحط جناطنا ع كتر فاضطرينا نفتح ونروح ندفع مره 2 :\ ماكفا قشنا رحنا دفعنا لواحد 2 ..
 
ساعات العمل بالنسبة لصالة العاب:
 
بايام الاسبوع العاديه (من الاثنين الى الجمعة )من 12 ظ الى 10 م ..
 
بايام العطل والسبت والاحد من 11 ص الى 10 م ..
 
وبالنسبه للمطاعم مااذكر الا اللي كليت فيهم :
-ماكدونالدز ..
-ويندز ..
 
راايي:
 عموما المكان حلو وصالة العاب تعتبر اضافه مميزه للسوق تعطيه طابع عائلي اكثر ..
 
الموقع الكتروني للسوق LINK
Labels: , , , , | 2 comments
Subscribe to: Posts (Atom)

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

انستغرام المدونة (roroalk)

follow me

follow me

My Blog List

Show All

Ads

Meenakon Design Templates