Thursday, June 30, 2011
مؤقتا بوقف بوستات عن "اماكن رحت لها" بالسفره لانه في صور يدد بتدزهم لي بنت عمي فماتسوى انزل شي ناقص :\

بتكلم عن شغلات عامه سويته بالسفر..

بالطياره ومن الملل شفت جم فيلم بس مااكملهم لانه بايخين قبل لا نوصل بساعه لقيت هالفيلم ومن زمان خاطري اشوفه , وماقدرت اشوف الا نصه وبس بردتنا كملته ومن كثر ماسولفت لبنت عمي عنه شوقتها وشافته خخخ..

من زمان مو منزله بوست كامل عن الافلام العاده استعين بسايت السينما :\

بطولة :
زينه , صبا مبارك ..

قصته :

عن بنتين تجمعهم صلة قرابه (بنات عم) وصداقه, صبا بدور دكتوره اسمها داليا عمرها 32سنه , اما زينه فامينة مكتبة وعمرها 30 ..
من خلالهم يعرض الفيلم العديد من المشاكل اللي تخص الشباب وتمس المجتمع , مثل الفساد و البطاله و الهجره والخوف من تاخر الزواج .. الخ ..

لمشاهدة تريلر الفيلم (اضغط هنا)

رايي :

بداية الفيلم كانت برتم بسيط وبطئ بعض الشي وعاديه , منتصفه بدات تتسارع لاحداث واغلبها بطابع درامي حزين , النهاية صدمة توقعتها بتكون اقوى واحلى بس كانت مفتوحة ..
نكمل ثاني يوم بالسفره << اليوم الاول رسميا لانه وصلنا بالليل :\

رحنا نتمشى ونستكشف شارع العرب وبالمره نتعشى لقينا هالمطعم ..


وهو مطعم عماني ..
 قعدته عاديه ..

 خبز ..



حمص ..
 السلطات (تبوله +فتوش) واللي يم التبوله مقبلاتهم ..

عرايس..

سباغتي <طعمه حالي

وجبتي كنت ابي لحم وياب بالغلط دياي :\
اهي شي 2 ماله شغل بالهمبرغر..
 وطلبنا معكرونيه وجم صمونة شوراما , وجبه 2, شبس ,سمبوسة خضار  ... الخ..

طلع حسابنا =1675بات =14.9824 د.ك

وعقب جربناه اكثر من مره توصيل للفندق ..

مره ريوق خذينا شكوكه وفول وشي 3 نسيت شنو اهو !!

وجربناه غدا ..

صورت بس طلبي (سلطة بطاط بالمايونيز+ هاريس عماني)
السلطة زينه بس لو يخففون الماينونيز شويه :\

مثل فكرة الهريس عندنا..

رايي :
اغلب اكلهم زين الى عادي, حبيت التوصيل اكثر من القعده بالمطعم ..

عنوانه :
75-75\1 ,سوموخفيت soi 3\1
واي شطوله :\ في باجي بس احس للي فوق كافي خخ
ت : 9\6557778  -02
Wednesday, June 29, 2011
مااستخدامت وايد سوالف بيوتي وعنايه بالسفره والحين كليتها :(

بس كنت ماخذه معاي هالصابون..

قبل لانرد بيوم او يومين قضينا عليه انا وبنت عمي خخخ..

مكتوب عليه :

Dettol
Natural الطبيعي
 الملطف Soothing
  Handwash
  Gently cleans and  hydartes sensitive skin
صابون سائل تنظيف لطيف وترطيب للبشره الحساسه ..

مع الكاليندولا والبابونج ..

رايي :

كل اسمع ديتول يجفف البشره , بس هذا غيييييييييييييير عجيب انا وبنت عمي بشراتنا حساسه ع ادناة دون(من اقل شي) تقب بس هذا الحمدالله ناسبنا وما ضرنا و انا واهي  حبيناه :)

سعره:
 جنه دينار و100 و قل و كثر بشوي هالمحاري مو متاكده بجم بالضبط!!
هيهيييي مارضى ينزل الصوره بالطريقه العاديه ادبته وخليته ينزلها بطريقه 2 ماشاءلله علي ذكيه خخخ..

موضوع افرش وسريع ..

رحلتنا كانت ترانزيت مرينا قطر فبردتنا دشينا سوق الحره وعند الكاشير شفت هالحلوه مرتزه قلت بديل لمولتن ..

وخمطت 4, 2 لي ولخوتي و2 لبنات عمي ..

وتوني ذقتها..

رايي :

استغفرالله استغفرالله استغفرلله الله يزيد النعمه ..

ماقدرت ابلعها ياااااااابوي حتى ريحتها مو ككاو جنها كلييا <<كليجا من حلو القصيم يدتي الله يرحمه كانت تيب لنا منه ..

وطعمها طاغي عليه الفواكه المجففه جنه زبيب او عنب مادري شي مااحبه ..

مره 2 بقرا للي مكتوب عدل مو بس اخمط :\

سعرها:

بحدود ال4 دولار..

ياااااااا مولتن مالك شبيه ..
عسى ماشر فيفا من امس واهما محسرين فيني مو قادره اشبك 5 دقايق ع بعض :\

ولا انزل صور :\

اسوء خدمة نت جربتها :(

اللي مدحوها لي استاثموا فيني :(

لي الحين اعرف وحده تعاني مثل اهي كويتيه ..

بس احنا ولا في غيرنا ؟؟
عقب ماتريقنا التم شمل العايله ورحنا اول مجمع وكان :


اهو من شهر مجمعاتهم لما كنت اسوي سيرج الاغلب كان يتكلم عنه وينصح فيه , واهو كبيررررررر 7 طوابق وكلشي فيه واسعاره اغلبها بين مناسبه ورخيصه ..

بكتب لكم عن خلاصة تجربي فيه رحت له 3 مرات , اول مره كانت استكشاف سريع وجوله بسيطة + غدا , 2 مره فصفصته عدل فريت كل الادوار تقريبا بس وصلت لي ال5 ووقفت لانه بلشوا محلات الاثاث وسولف 2 ماحتاجها وقلت محلات الهدوم البيوتي والاكسسورات ..

واحلى شي بمجمعات بانكوك انه بكل مجمع موفرين خريطة بالتفصيل وبعضها مترجم بالعربي :)

ملاحظة:ماصورت شي بالمجمع لانه ممنوع التصوير فاغلب الصور من النت .
 لا ولم تدشين يفتشونج اول مرتين فتشوني ال3 طوفني خخخ الظاهر حفظ ويهي :\

المحلات :

* البيوتي :

فيه وايد محلات بس اانا دشيت 2 :

الاول كنت ريحة لمجمع مخصوص عشانه :

اسمه:
beauty buffet

عجيييييييييييييييييييب فصلت فيه دشيته مرتين فاتورتي ماتصير فيه اقل من 2000 بات ..
واهو ماركة كوريه ..
فيه مكياج وفناتق وعنايه بالبشره ..
اللي شريت مكياج كريم وبودره و حمره وشدو ..
من فناتقهم قطرة الماسكرا و نفس منتج بنفيت لتوريد البراتم والخدود ..
عنايه :ست لويهي وكريم وصابونه لجسمي و ماسكات لرفيجتي..
واسعاره وايد مناسبه ..
واهو موجود بالدور ال2 ..

سايته (هني)

المحل ال2 اهو :
oriental princess

دشيته اتطمش طلعت بكريم وسنفره لجسمي واسفنجة فيشل لويهي ورحت مره 2 خمطت لرفيجاتي من االاسفنجة :)

سايته (اهني)

-*الملابس :
مااحس انه في وايد محلات ملابس ..
اكثر شي كشكات تبيع تيشرتات ..
بس المحل اللي حبيته اسمه vivi
موجود بالدور الارضي..
شريت منه تنوره ماكسي طلعت مقصمله خخ<< بلبس بين :\  بس عاجبتني :(
وخذيت قميصين طوال ..
وعيب محلات الهدوم ببانكوك انه ماكو مقاسات كله فري سايز
الاغلب كبري بس فيه عيب يامقصمل ياا الجم كاش اعاني من سالفة قصره اكثر من ضيجة :\
وفي محل بالدور لربع جنه خذيت من كارديغان ..
وميزتهم اسعارهم رخيصه :)

الاحذيه :
في محل بالدور الارضي تبدي اسعاره من 199 بات يعني دينار وشي ..
عندهم موديلات وايد بس ذا تبون اخذوا فلاتات و صنادل , اما نعل البحر وانتوا بكرامه تحصلونهم ارخص برا..
وفي محل بالدور ال2 عنده تشيكله حلوه جنه ااسمه فوتس شي جذي :\

الجناط :
(1)
محلات اللي 199 بات ع قفى من يشيل فيه ..
من الدور الارضي لي اال4 تقريبا ..
جنطة اعجبتج مالقيت منه لون اللي تبينه او حسيتها خربانه مثل جنطة لقيتها بدون العلاق الطويل ماخذيتها مريت محل للي يمهم لقيتها :)
واغلب شغلهم ماتعطينه سعره لانه جوده الجلد زينه و موديلااته ذربه ومضبوطة..
بس عيبه زحمه و ماشاءالله قشهم وايد ومو مرتبينه عدل فلازم تنبشين عشان تشوفين عدل :\

(2)
في محل او كشك مادري ربعه صغيره فيها جناط صنعه تايلنديه وسوالف جلديات مثل ابواك وجناط مكياج ..
اكثر شي حبيته فيه الكلاتش خذيت منه 2 ..
واسعارهم رخيص من 250 بات و 290 و 350 هالحروه س شغلهم وايد ذرب ومو مكرر ماشفته بمكان 2 ..
اسمه حسب للي مكتوب علي التاق  COOL.. 

شغلات 2:

-وهم في وايد كشكات تبيع حزامات بس لو تفترون عدل بتلقون سعر انسب يعني في كشك الحزام ب250 جنه ومايقل سعره حتى لو خذيتي اكثر من قطعه , ونفس موديلادته حصلتهم  بمحل ال2 اذاا شريتي 2 في نسبة خصم جنه 15 % ال3 جنه 20 % ..
- محلات الاكل المجفف منتشره فيه ..
-هم السبا وايد , تقريب بكل دور فيه ..
-في بقالات صغار..
- في محل نظارات بس مادشيته ووايد محلات تكنولوجيا وتلفونات ..
- في محل اسمه طوكيو نفس لاندمارك او سنتر بوينت وهم في جم ماركاته وماركات 2 بعد واهو اكثر من دور ..

شنو بعد !!  هذا اللي اذكره :\

المطاعم :

في وايد بس بتكلم عن  المطاعم الحلال ..

بركن المطاعم :
 فيه مطعم علي :


اهو اللي جربناه :

واهو اكثر من قسم بس مو كله حلال ..

بس قسم معين .

اول ماتدشون يعطونكم هالكرت وماتطلعون بدونه , لانه بمثابة كرت تعبي فيه حسابك ولما بتطلع تدفع فلازم يجيكون عليه اذا مستخدمه او لا احنا ماستخدمنا الا واحد اهو مال عمي..
 ماصورت الا الخبز ..
 وطلبنا كان عمي مشكل لنا من كل الاصناف, و الاطباق اغلبها عباره عن عيش و صلصة ع جنب واغلبهم سبايسي حارين لاهوب مااحب جذي :\

وفي مطعم جباله اسمه :

بس ماجربته ولقيت لكم منتدى كاتب معلومات عنه (هني)

موجودين بالدور ال5 ..

خدمات اخرى :

فيه مصلى بس مدشيته الصراحة ...

والحمامات وانتوا بكرامه بفلوس بس فيها هوز خخخ اما اللي صوب المطاعم ببلاش ..

Tuesday, June 28, 2011
ب2 يوم قعدنا متاخر ورحنا نستكشف لمنطقه ع مايون باجي اهلنا << كانوا رايحين مشوار ضروري..

وماكنا متريقين فدخلنا هالمطعم نظامه يوقفون عند الباب يلقطون زباين مو بس اهما اغلب الاماكن..


طاولتنا


المقبلات ..

سمبوسه ..

جباتي ونان بالجبن..
 زووم ع جباتي صدمة مو مثل اللي عندنا جنه خبزة ايرانيه ميني !!
 اومليت ..
الحساب ..
رايي :

الاكل اقل من عادي :\

عنوانه :

Bawarchi Sukhumvit

(F/1-3 Ambassador Hotel)

Sukhumvit Soi11

Bangkok 10110, Thailand

Tel. +66 2225 0444 Ext. 1720

Tel. +66 2253 2394
 
وفي له فرع 2 :
 
Bawarchi Chidlom

Intercontinental Hotel

(President Tower Arcade) B-level

973 Ploenchit Road, Bangkok 10330, Thailand

Tel. +662 656 0102-3

(Features Live entertainment)
 
الموقع الالكتروني (Link)
واذا ماخانتني ذاكرتي عندهم خدمة توصيل ..
Monday, June 27, 2011
اول بوست عن السفره بتكون عن فندقنا ..

نسيت اقولكم كنا رايحين تايلند وتحديدا بانكوك ..

مدة السفره تقريبا 10 ايام من 16- 6 الى 26 -6..


 الفندق مكون من 3 ابراج بالصوره اللي فوق مبين برجين :

اللي ع اليسار اهو الرئيسي رقم 1 , اما اليمين فهو رقم 2 وفيه كانت شقتنا , وال3 مادري وين بالضبط بس حسب العلامات اهو اللي بالشارع المقابل مو يمهم بالضبط .. 

بالبرج 1 ما صورت الا هالطاوله خخ غرامي السبا ..

والحين ننقلكم للبرج ال2 ..

اول ماتدشون بتشفون هالصاله ..

وهذي الجزء ال2 منها..


شقتنا كانت بالدور ال5 ..

ومكونه من غرفتين (ماستر + غرفة مزدوجة) وحمامين وانتوا بكرامه كل حمام داخل غرفه وصاله و مطبخ ..

منظر عام للشقه ..

المطبخ ..

وفيه كل الاحتياجات (جوله وثلاجة وغساله وماكرويف وتوستر , وقلايه )

الصاله..

ماصورت الا غرفة نوم وحده اهي المزدوجة ..


 والحمام وانتوا بكرامة ..
واهم شي واحلى شي انه في هوز :)


وفي بالفندق 3 حمامات سباحة بكل برج حوض ..

صورت 2 اللي بالبرج الاول وال2 بس..

البرج 1 ..

احلى واكبر من ال2 ..


البرج ال2 ..


الريوق :
ماصورت الريوق لانه بس رحت اتريق مرتين او 3 وبدون كامرتي :\ ريوقهم مو ذاك الزود ومو بين اذا الاكل حلال و لا ..
 بس شفنا عايله اماراتيه كل صيف تنزل بهالفندق يقولون العاده يفصلون بين الكل الحلال والعادي ويوضحون هالشي بعلامات بس هالسنه يين ابجر فماسو لي لحين :\
لانه اغلب اللي الفندق اجانب وهنود شوي العرب ..


سعره :

500 وشي متوسط لا غالي ولا رخيص ..

رايي :

الفندق وايد مريح وصغيرون ونظيف وحلو للعوايل والموظفين حليوين(ودودين) ..

عنوانه :
بانكوك ,  سوخومفيت -سوكومفيت  مقارب لشارع العرب ..
لمشاهدة صور اكثر واوضح عن الفندق بالاضافه لخريطة توضح موقعه (اضغط هنا)




بوست خفيف ع ماضبط صور السفره :)

(لمشاهدة الصوره بشكل اوضح اضغط عليها )

FB 




يمدحون السبا مالهم وناطره يسون عروض عليه :)
Sunday, June 26, 2011
توني راده من السفر ..

الحمدالله ع سلامتي ..
Wednesday, June 15, 2011
اول امس رحت تطعمت ضد الكبد الوبائي , وامس قريت بالجريده انه حتى موليد التسعينات لازم يروحون :\

للقراءه بشكل اوضح (اضغط هنا )

استغربت لانه لما رحت قالولي بس مواليد الثمنينات وتحت , يمكن لانه اختي الصغيره ضحكت علينا المره اليايه ناخذها معانا خخ..

وطريقته مثل الكورس عباره 3 جرعات بمواعيد محدده :(هذا اللي لنا اما مواليد ال90 وفوق مادري شلون طريقته بالضبط)
-الاول متى مافضيتوا ورحتوا لهم << ماتحتاج موعد..
- ال2 عقب شهر من الابره ال1 ..
-ال3 عقب 6 اشهر من الابره الاول..

يعني ال2 و ال3 بمواعيد محدده ..

واللي حبيته انه التطعيم متوفر الصبح والعصر , بالنسبه لمنطقتنا الصبح بالمستوصف و العصر بالتخصصي قسم الصحة الوقائية..

وخذوه احسن لكم خصوصا اذا الله لايقول عندكم حاله مصابه بالعايله ..

وعلى قولتهم الوقاية خير من قنطار علاج :)
Tuesday, June 14, 2011
الاسبوع اللي فات كنت اطبع اماكن وتفاصيل للسفره فنبهتني رفيجتي على سالفة الجنطه ..

قلت لي اخذ لي جنطه على الخصر وايد اريح :
-من البوقات :\
-وهم اريح لجتفي ..

وسبحان الله اللي ابيه ينقرض ويختفي من السوق :\

سويت سيرج هالستايل اغلب موديلاته خايسه و مو بناتيه ..

هذا احلى شي حصلته وبناتي..



هذي مو حلوه بس حبيت انه في مكان للماي و هم الحلو فيها انها تنلبس باكثر من طريقة :)


Search

Loading...

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads