Tuesday, July 31, 2012
بعيد ميلاد شروف توهقت شلون اودي لها الهديه ! بيتهم بعيد عن بيتنا وماادله :\

فقلت ماكو الا مستر ديلفيري اتصلت محد رد , تذكرت انه بيرو كانت قايله لي عن شركة توصيل 2 اسمها مطراش طلعت رقمها من قوقل وكلمتهم واتفقنا انه ايولي ساعه 3 قبل 3 بجم دقيقه يولي سلمتهم الهديه تقريبا بعد 45 دقيقه شروف قالتلي انها وصلت لها ..

عحبتني خدمتهم واعيد التجربه  ان شاءالله ..

رقمهم :
55112003

@Me6rash

ملاحظه للصوره منقوله من اكاونتهم بتويتر ..

امس ضايق خلقي ماطبخت شي هالفتره فيني هوس طبخ ماشالله ..

فقلت اسوي حلو بسيط و متوفره مكوناته ..

وهالحلو قديم خبري فيه قبل جم سنه اختي الكبيره كانت تسويه لنا ..
المقادير:

-بسكوت دايجستف..
-زبدة الفول السوداني ..
-ككاو مالتيزر (للتزيين)

الطريقه وايد سهله وبسيطه..
-تطحنين البسكوت ، حطيته بجيس و طحنته بالهاون..
-عقب حطيته باديه- طاسه وخلطته مع زبدة الفول..
-بعدين شكلته ع ورد باستخدام القطاعه ودائري باستخدام ماعون الفرن اللي للكيك ، اللي مصورتهم شغلي عقب اختي الصغيره ساعدتني بالباجي..
وصفيتهم بصينيه وزينته بالمالتيزر..


- Posted using BlogPress from my iPhone
Monday, July 30, 2012
قبل جم شهر نزلت لكم بوست عن هالاعلان (هني) ولانه شرووفه تحب الشموع رحت سويت لها وحده ..


الحلو فيه انه الشمعه انت تختار شكلها بكل التفاصيل اسم او 2 اللون , الريحه , والاضافات مثل الزري ( قلتر ) او الورد ..

صورت جم نمونه من البومهم تصوير ع السريع ..

هذا بالقلتر وفي بدونه ..

 هذا بالورد ..

هذي اللي عجبتني وسويت مثلها الوانها حلوه وبسيطه ..

وكا الطلب (تصويرها) ماشاءالله ماتوقعت هذا حجمها ..
وبالنسبه للروايح المتوفره اذكر قال توت وفراوله وفرنسي وجنه في لافندر مو متاكده بس نصحني اختار فراوله ..

عيبه : مو موفرين نماذج او على اقل سامبلز للعطور بس ..

الاسعار :
الاسم 1 = 15 دك 
الاسمين =20 دك
اضافة قلتر او ورد 5 د.ك

يحتاج الطلب 3 ايام او 4 ويخلص ..

عنوانه موجود بالاعلان فوق ..

حبيت شكلها حلو ماشاءالله والاهم عجبت شروفه الحمدالله ..

وباجي الهديه شغلات عاديه مو مميزه بس هالشغلتين اللي يدد ..
اول امس سويت هالطبق وتعلمت طريقته من كويتيه..

المقادير :
كريمة كي دي دي ..
علبه قيمر ..
م ك مايونيز ..
م ك جبن قلاص..
جبن شرايح ..
كيس توست ( انا حطيت 12 تقريبا مو الجيس كله يعني ع حسب حجم البايركس)
شاورما دجاج امريكانا
ذرة
بصل
مشروم

الطريقة :
-نخلط مكونات الصلصة ..
-نحمس الشاورما مع الذرة والمشروم اهما كاتبين نضيف بهارات وملح وماجي بس انا ماضفتهم اكتفيت باللي متبلين فيه الشاورما واشو ضبط ..
-نصف التوست بالبايركس مكتوب بدون ازالة الاطراف (بس انا ازلتهم )كطبقه اولى عقب نحط حشوة الشاورما تكون هالحشوه بالنص كطبقه ٢ ونحط فوقها الطبقه الاخيره نصف التوست مره ٢ وفوقها نصب الصلصة و نحط عليها الجبن الشرايح و نرش الاوريغانو ..
ونحطها بالفرن ونوصي الخدامه تجابله وتنساه كالعاده ولو مارحت اجيك جان صارت فطيرة الفحم :/

رايي:
حبيتها واسويها مره ٢..

- Posted using BlogPress from my iPhone
Sunday, July 29, 2012
اكثر وحده من رفيجاتي احتار شيب لها لانه تحرجني بكرمها ومهما يبت لها احس مقصره وما اوصل مواصيلها ماشاءالله ..

اليوم يصادف عيد ميلادها كل عام واهي بخير :*

ومن فتره احتار شيب لها ومن اول 7 بلشت اجهز واشري واطلب واستلم وامس خلصت الحمدالله واليوم وصلتها ..

وديت لها اكثر من شغله احب الهديه تكون متنوعه عساس اذا ماعجبها شي جود يعجبها ال2 ..

من الشغلات اللي طلبتها ستاند متروس اوريو بوبز ع السنافر لانه تحبهم ..

شفته باكاونت التاجره بانستجرام وعجبني ..


طلبته ب15 الشهر لامس ..

21 الشهر دزت لي صورة الستاند زاهب ..

وهذي الصوره بعد ماوصل لشريفه ..(تصويرها)

وباكاونتها في وايد تصاميم عجبتني..







هذا كوكيز للقرقيعان وفي مثله للصبيان ..
وفي ستاند ع سبونجي بس الصوره مو راضيه تضبط :\

رايي :
حبيت الشغل حلو ماشاءالله و سعره مناسب او رخيص بالنسبه لستاند متروس 40 قطعه  والخدمة ممتازه ماشاءاللهوان شاءالله يطلع الطعم حلو..

للطلب بالواتس اب  او مسج:

60070404..


 انستغرام : @ luckypumpkinkwt

سويته مرتين اول مره بالفرن
وال٢ بالميكرويف

المقادير :
بطاط نايس احمر (مالح)
جبن شيدر كرافت
جبن موزريلا
جبن قلاص
كريمه حامضه
كريمه مخفوقه (كريمه الحمرا)
نص ملعقة شاي شكر
نص ملعقة شاي ثوم بودر
طماط وبصل وكزبره (انا ماحطيتهم)
الطريقه:
اللي سويته حطيت بطاط بالبايركس و حطيت عليه جبن موزريلا ومعاه بشرت جبن الشيدر .
خلطت مقادير الباجي للصلصة وصبيته فوقه
.
.ومثل ماقلت لكم فوق مره حطيتها بالفرن ومره بالميكرويف بالفرن احسن بوايد صج الخدامه نسته احترق شوي بس احلى من الميكريوف ذوب البطاط وحرق لهاتي ..
رايي:
المقادير حطيتها كامله فطلعت الصلصه واايد اكثر من لازم يومين استخدمتها ل٨ جياس بطاط وماخلصت تم في شويه بعد ..
فاذا بسويها مره ٢ بقلل الكميه وبحطها بالفرن ..
واللي اذكره رايي اخوي اعجبه..

وهالوصفه تعلمتها  من  @kuwaiiitya  بعد عمري ماقصرت من العام واهي مضبطتني باطباق سنعه وسهل وفنتق ولذيذه ماشاءالله :*

- Posted using BlogPress from my iPhone
Saturday, July 28, 2012

طريقته خذيتها من مدونة اكلات هني بس نقل بالتصرف يعني غيرت جم شغله فيها ..
 
الكيكة الوحده عباره عن 3 طبقات ..
الطبقه الاولى اهي اللي تحت :
بكيكة الكندر تكون سارلي كيك الككاو ..
اما كيكه الجيلي تكون سارالي كيك الفانيليا ..
الطبقه ال2 بالنص بالكيكتين نفسها ثابته :

ظرفين دريم ويب = علبه

جيس كريم كراميل

علبتين قشطه او قيمر

8 حبات كيري

(منقوله الكلام والطريقه من بوست اكلات )
الطبقه ال3 والاخيره :
بكيكة الكندر ككاو كندر (اللي جنه جاكليت ) مخففته بكريمه (كريمة الخفق \ الكريمة الحمرا)
كيكة الجيلي جيلي احمر  بس ماحطيت فيمتو وسويته مثل ماقالت طريقة الجيلي العاديه..
الطريقه :
- نقصص الكيك ونصفها بالطبق ..
-نخلط مكونات الطبقه ال2 مع بعض ونصبها ع الكيك و عقب نحطها بالثلاجه عشان تصك ..
-لما تصك نكون مزهبين الجيلي او الككاو ونصبه فوق الطبقه ال2 ونرده الثلاجه عشان يصك ..
رايي :
اول مره اسوي حلو واحبه انا واختي الصغيره حبينا الككاو  اما بنت عمي واختي حبوا الحمرا واختي الكبيره توها قالت لي قصيده فيها خخ  ..
شكرا بنت الديره ع الوصفه :*

- Posted using BlogPress from my iPhone
امس رحت الجمعيه ابي جم شغله ومنهم النوتيلا بس انصدمت انه رفهم فاضي!



طبعا ع طول صورته ونزلت الصوره بالانستغرام ..
وكانت التعليقات اغلبهم تقول انه مو محصلينه مخلص وناس تقول انقطع!!

غريبه ليش !! عاد عليه طق اعصي هالايام صاير هبه !
- Posted using BlogPress from my iPhone
هذا بعد من اطباقي امس بالفطور :

المقادير :
صاج
ميني نقانق
جبن سلايس (شرايح)
جبن موزاريلا
الصلصة ؛
جبن قلاص حسب الرغبه (حطيت تقريبا ٣ قفاش كبار جبن كرفت)
قيمر (علبه كبيره)
فكرة الطبق نفس اللي نزلت لكم العام هني بس فيه فرق بسيط بدال التوست خبز صاج وماحطيت بالحشوه كريمه وبطاط خليت جبن شرايح و نقانق بس.
الطريقة:
-نقص خبز الصاج ، وكل قطعه نحط فيه جبنه و نقانق ونلف القطعه مثل الرول ونكمل الباجي نفس الطريقه لما ينترس البايركس..
- نخلط مقادير الصلصه ونصبها فوق رولات الصاج وفوقها نرش جبن موزاريلا..
ونحط البايركس بالفرن لما يذوب الجبن ويتحمر من فوق ..

رايي؛
اهو حلوو وشكله مرتب بس عباله بالقص اول شي كنت انقهر لما انجب لاحد واشوف الرول انفج وطاحت النقنوقه :/ بعدين تداركت الوضع ، فاذا بعيده مره ٢ افكر انه كل رولا اسكره بجبن باطرافه عساس يثبت اكثر واقص بدقه لما بانجب خخ هندسه مو طباخ ..


- Posted using BlogPress from my iPhone
Friday, July 27, 2012
احب الطباخ خصوصا برمضان وبالويك اند لانه اختي الكبيره تكون موجوده ..
واليوم سويت اكثر من طبق منهم سلطة الفلافل ..
الصلصة ماخذته من النت اما الباجي من كل صوب ..


الصلصة :
روب (علبه)
لبنه (علبه)
ثوم ( شويه)
عصير ليمونه كامله
السلطة :
فلافل نبيل ( فلافل مجمده جاهزه بالجمعيات ) تقدرون تستبدلونها بفلافل عاديه من المطعم..
خبز مقطع ومحمص
بطاط مقطع ومقلي
خس
طماط
خيار

الطريقه :
نخلط مكونات الصلصه.
نقصص السلطة (الخيار والطماط)كنت بحط خس بعد بس مالقيت عندنا وطبعا تقدرون تضيفون اي شي تحبونه ..(هذي الطبقه الاولى) وطبقه ال٢ البطاط والطبقة ال٣ خبز اما الاخيره الصلصة وفوقها الفلافل ونزينها بالمواد المتوفره انا زينتها بخبز محمص وسماق..

راينا :
زينه بس احس لو ضفت تتبيله لسلطة بتكون الذ وهذا رايي اختي الكبيره بعد بس اختلفنا بمكونات التتبيله اهي تقول اللي من كنور وانا اقول ليمون وزيت زيتون وخل وسماق (اذا سويته مره ٢ بضيف هالخلطة للسلطة وان شاءالله تضبط)

- Posted using BlogPress from my iPhone

هالوصفه دزته لي زميلتي بالدوام ام فواز خذيت منها طريقه الصلصة بس وغيرت شويه بالكميات اما الشورما اضافة مني (ابشركم باجي بس كرتون وتخلص مأونتي من الشاورما خخ)


الصلصه:اهي
نص ليمونه
روب قوطي كامل
١/٢ قفشة اكل زيت زيتون
وشوية ثوم بودر
قفشه ونص هرده
ملاحظة كل المقادير بالوصفه الاصليه دبل باستثناء الليمون كان قفشتين وخليته نص ليمونه)
شاورما دياي
خبز لبناني مقطع ومحمص
سماق للتزين
الطريقة :
نحمس الشورما ونقطع الخبز ونحمصه ونحطه بالغندور ونخلط الصلصة ونصبها عليهم و اخر شي نزينها بالسماق (ترا متعوب ع القلب خخ)

- Posted using BlogPress from my iPhone
Thursday, July 26, 2012
قبل فتره @miss_ba6ooo6a نزلت صورة هالطبق مع مكوناته وطريقته بس اهي مسويته بشيش الطاووق انا مالقيته فاستبدلته بشاورما الدياي ..
وسميته الصينيه البرتقاليه لانه اكثر شي لفت انتباه اهلي لونه :




صينية بطاط الودجز البرتقاليه ..
المقادير
بطاط ودجز مقلي
شاورما دياي
كرنب مادري شسمه
ذره
جبن مبشور
الصلصة
الصلصة الفرنسية(تقريبا نصها)
٤قفاش مايونيز
٤ قفاش كاتشب
كريمه حمرا حسب الرغبه
-الطريقة
نقلي البطاط، ونحطه بالبايركس.
نحمس شورما دياي مع كرنب (بس نحمس الكرنب قبل عساس يذبل شوي عقب نحط معاه الشاورما)ونحطها بالبايركس . 
ونخلط الصلصة مع بعض و نصبها فوق الحميسه.
واخر شي نحط ع ويه جبن ونحطها بالفرن

راينا:
انا اشوفها زينه مو وااو شويه حاليه بس فكرتها وطعمها بالنسبه لنا غريب مو معتاد ، واشوه الحمدالله اعجبت اهلي واختي الكبيره تقول لذيذه :)

- Posted using BlogPress from my iPhone
هذا الطبق ال2 اللي سويته امس ..

 
الوصفه ماخذتها من منتدى كويتيات هني ..
 
بس شلت الشغلات اللي مااحبها مثل البصل والفلفل الاخضر والخردل , هم ماخليت كلها بالنقانق حطيت نصها بالشاورما لاختي الوسطيه..
وبالانستغرام علموني شلون اخليها ماتحمش بزود باني ادهن الويه بيض او حليب وانه اشغل الفرن من تحت و انه اقدر استعين بالمكيروف كون كل المكونات مطبوخه و جاهزه للاكل ..

- Posted using BlogPress from my iPhone
Wednesday, July 25, 2012
هالطبق من ارشيف البلوق كتبت بوست عنه هني يحتوي ع مقاديره وطريقته..






بس هالمره ماخليتهم كله نفس الحشوه نوعت شي دياي وشي خليت نقانق مع ملفوف ابيض (حشوة طبق ٢ استخدمتها بالطبقين اللي سويتهم اليوم )

- Posted using BlogPress from my iPhone
Monday, July 23, 2012
من ضمن الصوغات اللي يت لنا من تركيا هالشعر البنات اهو لامي بس انا واختي الصغيره جابلناه :)

اهو شعر بنات مغلف بطبقه خفيفه من الككاو الابيض ..
وطعمه حلو وخفيف ..
شكرا بنت عموو ❤

- Posted using BlogPress from my iPhone
Sunday, July 22, 2012
امس طلعت لي جم وصفه من النت (سهله وبسيطه )من ضمنهم رولات المرتديلا ..


اهي الصغار اللي فوق ..

المقادير :
توست بدون الاطراف
 مرتديلا
 جبن شرايح

 بيض

 بقسماط

جبن قلاص عشان نثبت الاطراف فيه ..
الطريقه :

نفرد التوست بالفراده

نحط على التوست شريحه مرتديلا وفوقها شريحه جبن ونلفها

 ونغمسها بالببيض بعدين بالقسماط ونقليها

بيكون شكلها جذي بايخ , بس لما نقصها تصير مثل اللي فوق وايد احلى ..
وحلات معاها صلصات تغميس ع كتر انا حطيت كاتشب تقدرون تحطون خردل \ماينيز \ صلصة سيزر وغيره ..
والحشوه هم تقدرون تحطون بدال المرتديلا ’ ديج رومي (تيركي) , او اي حشوه ناعمه مثل المسحب او نقانق مبشوره الخ ..
وبالنسبه لكبة البيتزا طريقتها نزلتها لكم العام هني بس غيرت الحشوة لي حشوة البيتزا المعتاده اللي قلت لكم عنها ( صلصة بيتزا جاهز مع زينو والفطر من العلالي و جبن مبشور و نقانق) << فكرة الكبه بيتزا ماخذتها من بيرو..
link الوصفات ..

ورايي :
فيهم زينين مو وااووخصوصا كبة البيتزا لانه حطينها بالفرن مو قلي اتوقع لو قلي الذ ..

وشكرا اخيتي اللي ساعدتني بلف الرولات وسفلت فيني بعد خخ..
Thursday, July 19, 2012
اليوم كنا انا واختي الجوز مخططين لطلعه متروسه انجازات ولا شي منهم صار غير هالشي ! يالله الحمدالله العوض ولا القطيعه..


محلل متخصص بالفراوله المغموسه بالككاو ..
في وايد انواع مثل اللي بالككاو الابيض والدارك (الغامج) و الككاو العادي وكان فيه اكثر من نكهة مثل العاديه او مع كوكيز او مغلف بمكسرات او مع مارشيملوو ..


زووم هالنوعين ذقتهم حلووين ..

وهذا الغامج والابيض (بس ماخذينا منهم )

في اكثر من حجم ماثبت عليهم الصراحه بس شفت ٢ هذا واللي خذيناه..
اللي خذيناهم كلهم الككاو العادي مع الحليب..


البوكس فيه ١٢ حبه سعره ٨..


والحلو انه عندهم رقم للشكاوي :

عنوانه:
مركز التلال التجاري / الشويخ / طريق الجهرا ❤
ت ٩٧٧٣٦٤٤٥
- Posted using BlogPress from my iPhone

Wednesday, July 18, 2012
قبل فتره نزلت لكم بوست عنها (لي شبكت بلاب توب انزل لكم رابط البوست ان شاءالله)
وكان خاطري اجربها واول مره اتهور وادز هديه (اكل ) شي انا مو جربته!


موجوده بانستغرام وبتويتر وفيس بوك ..
هذا اكاونتها بالانستغرام ..


-ماشاءالله شكل متقن والسعر مناسب او رخيص بعد بالنسبه لمشروع كويتي وان شاءالله يكون الطعم حلوو ..

Posted using BlogPress from my iPhone
Monday, July 16, 2012
من جم شهر جربناه اكثر من مره واليوم ردينا طلبنا منه ريوقنا ..
هذا صورة طلب قديم انا كله اطلب منه صاج بس مره جربت عصير برتقال .. 

وهذا طلبي اليوم :



العاده اطلب صاج حلوم كامل وجنه مره طلبت نقانق..

رايي :
قبل طعمه زين وحجمه راهي ، اليوم انصدمت صاير عييين (عجيين) واقرب للسلطة متروس خس وطماط والحلوم نتفه!!

ت:22555280

 عنوانه :
بنيد القار شارع الاستقلال..

تويتر : @39erTime
- Posted using BlogPress from my iPhone
Sunday, July 15, 2012
توني قريت هالخبر بجريدة السياسة :

هذي الزبده :
اللاصقة بحجم لاصقة الجروح الصغيرة توضع أسفل الظهر بموازاة الكلى وتمنع العطش ما بين خمس وثماني ساعات. لكن اللافت أنها لا تباع في الصيدليات, بل في الأسواق وتباع بجنيهين مصريين ..
وعليها جدل شرعي ..

انا خابره انه الحكمه من الصيام انه نحس بالعطش واليوع (نتحكم بغرائزنا ورغباتنا)
استغفرالله ماكو شغل !!

وهذا الخبر :
القاهرة- يو بي اي: قبل ايام قليلة من بدء شهر رمضان المبارك انتشرت في مصر لاصقة طبية تمنع عطش الصائمين وتروج لها شركة صينية, وقد أثارت جدلاً شرعيا بشأن صواب استخدامها. كشفت شبكة "محيط" عن ان اللاصقة ظهرت في الاسواق المصرية خلال اليومين الماضيين, وتصنعها إحدى الشركات الطبية الصينية المتخصصة بصناعة الأدوية الجنسية, وتوردها الى مصر عبر شركة استيراد محلية تروج للمنشطات الجنسية.
واللاصقة بحجم لاصقة الجروح الصغيرة توضع أسفل الظهر بموازاة الكلى وتمنع العطش ما بين خمس وثماني ساعات. لكن اللافت أنها لا تباع في الصيدليات, بل في الأسواق وتباع بجنيهين مصريين
وقال تاجر كبير للشبكة إن:" شركة استيراد كبرى مشهور عنها استيراد المنتجات الطبية الصينية استوردت اللاصقة وأدخلتها الجمارك على أنها لاصقة طبية عادية."
واضاف:" أن التجار الذين يبيعونها حصلوا على فتوى بعدم تحريمها لأنها لا تفرز مواد تدخل في نطاق الطعام أو الشراب, لذا وجدوا أن هذه الفتوى كفيلة بالسماح لهم للاتجار بها."
ولكن رئيس لجنة الفتوى السابق في الأزهر الشيخ عبدالحميد الأطرش اعتبر" استخدامها لا يجوز, بل وحرام أيضاً, لأنه يعد تحايلاً على الدين وعلى فريضة الصيام". واوضح ان "عدم الشعور بالعطش والجوع سيفقدان الصائم إحساسه بالفريضة وبالتالي عدم إحساسه بطاعة الله وتصبح الفريضة كعدمها".
واستطرد قائلا: "ثبت علمياً أن الإنسان عندما يجوع أو يعطش تميل نفسه إلى الهدوء والسكينة وتنطلق روحه إلى مرحلة من مراحل الصفاء وبخاصة إذا تابع الصوم بالعبادة وقيام الليل".
وكانت هيئة الشؤون الدينية التركية أفتت منذ سنوات عدة بجواز استخدام لاصقة تمنع الجوع وتفقد الشهية مستندة في ذلك إلى ان"إذا كان الصيام يساعد في الحفاظ على الجسم ورشاقته عبر تنظيم عملية التغذية فان لاصقة منع الجوع تؤدي الغرض نفسه من خلال تقليل إحساس الصائم بالجوع, وعليه فان استخدامها مباح".
 

Saturday, July 14, 2012
يوم الخميس اختي الكبيره دزت لنا صورة بسبوسه شغل وحده وعجبتنا واتصلت تطلب منها قالت لها اليوم وقفت الطلبات فطلبنا لليمعه العصر ..


درزن بسبوسه مع مطارة قهوة ..


والبسبوسه متوفره ب٤ انواع من الحشوات :(ككاو وكاستر وكاراميل و قشطة)

الشغل مرتب كلشي حاطته بالبوكس حتى الكلينكس..

للطلب:

سعره : ١٢ والتوصيل مجانا .،

رايي:

بالنسبه للبسبوسه مو ذاك الزود اقل من عادي، بس القهوه تمت حاره فتره واختي تقول زينه عن نفسي مااشرب قهوة فماذقتها، وبالنسبه للخدمة تاخر التوصيل نص ساعه تقريبا بس عادي مدام ببلاش خخ امزح ، و اما المعامله اختي تمدح اسلوب المره اللي ردت ع التلفون.،

واكرمج الله اخيتي ام سمسم :* 
- Posted using BlogPress from my iPhone

Search

Loading...

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads