Monday, June 28, 2010
السلام عليكم ..

مساء الككاو ..

قبل تقريبا اسبوعين كنت اتسوق بالافنيوز  واشتهيت ككاو فمرينا هالكافيه ..

واختي اختارت كيكة الكتكات واختارت برد فانيليا..

اما انا اخترت جيرمن براوني شي جذي اسمها اللي فوق جيرمن و اللي تحت براوني العاديه واختارت معاها برد ككاو ..

وخليتها يسخنها وايد حبيتها ..




اما بالنسبه لمالت اختي شبعت حتى ماقدرت اكمل كيكتي فذقت بس لقمه عن خاطري طعمها غريب بس زين بس عن نفسي ماطلبها لانه ما احب الكتكات ..

Sunday, June 27, 2010



السلام عليكم ..

قبل جم يوم مريت مكياجي لانه سمعت انه عندهم ست لوشنات وسنفرات ودلع..

وانا احب هالسوالف والصيف يبلج تحسين انج رفيرش ..

رحت هناك ولقيت طلبي في اكثر من نوع بس انا اخترت الفانيلا لاني احبها..



شور كريم ..


سنفرة (غرامي خذيت الست عشانها)



زبدة للجسم


زبدة ككاو لبراتمي ..



امس جربتهم كلهم لما تسبحت ماعدا زبدة البراتم مبدائيا نعومه بسيطه وريحه خفيفه طاغي عليها ريحة البرد ..

وسعرها حلو ب5 او 5 وشي كست اما كقطع يطلع اغلى جنه السنفره بروحها ب3 ..

وحجمهم راهي اذا لاحظتوا وفي اصغر للسفر سعرها ب3 بس بدون سنفره فماخذيتها..

بعد شنو بقول :\

نسيت :s

ابي سوالف حلوه ومنعشه للصيف من هالطقه ؟؟هاتوا مافي جعبتكم :)
Friday, June 25, 2010
السلام عليكم ..

واخيرا جربت اوغستين وفل مع انه كنت بجربه اول واحد بس صار الاخير يالله ختامها مسك :)




وهم عجبني القوطي :)

وهذا طلبي وفل مع نوتيلا وفوقهم موز مع صوص جوكلت ..


طلع لي 1.450د.ك..

رايي :

اهو الحلو فيه انه الخيارات متنوعه اكثر من الباجي (محلات وافل اللي جربتهم قبل) بس مره 2 بقولها ماتخليه وايد احس تحمشت اكثر من لازم مااحب جذي..

والحجيه حليوه :)

مكانه :

وهالكشك موجود بالمارينا مول فوق صوب المطاعم ..

وهم موجود بجمعية الشعب ومشرف ..

وفي توصيل ..
هذا رقمهم :
65058505

وهذي صفحتهم بالفيس بوك

Thursday, June 24, 2010


السلام عليكم ..

اكثر شي يعل قلبي بسالفة صبغ اظافر شلون بوخره مع انه شي سهل بس مادري ليش استثقله :\

من الانواع التقليديه اللي جربته الايستون ..

مثل مال الجمعيه ..

وهذا من رد ارث وكان زين..



من سالي هانسن اقل من عادي الى فاشل..

بس حاليا افضل هالنوعيه ..

اول تجربة لي كانت هذا واهو من بوتس ..


ولما خلص كنت باخذ مثله بس مالقيت الا هالنوع وخذيته حبيت الاول اكثر..

وهذا كنت احوس بجمعية كيفان وحصلته وفي ع انواع فواكهة 2 اذا ماخب ظني..

بالنسبه لي في وايد مميزات :

1- ريحته حلوه ماتبط الراس مثل الايستون..

2- استخدامه سهله وايد عملي مو عبالة القطن وحطي استون لا ورقه خفيفه تفي بالغرض..

3- حجمه صغير ينفع للجنطه والاهم موسائل فماتحاتين يتبطل بالجنطه او ينكت ويدمر اغراضج ويتلفهم :\

4- سعره مثل سعر الايستون وارخص بعد يعني الاول ب800 فلس جنه وال2 بدينار وال3 ب550 ..

5- والاهم يشيل عدل ويوخر اصعب البقع :)وعقب ماتمسحين الصبغ تحسين انه ع اصابعج نفس زيت يرطبهم بس مو دبغ عادي..

هذي الانواع اللي انا افضله انتن شنو تفضلون؟؟


Wednesday, June 23, 2010
السلام عليكم ..

قبل جم يوم جربت هالمطعم واهو موجود بالافنيوز بالبراحة برا ..

المنيو شطوله ماشاءالله طولي خخخ..


وعقب ماطلبنا عطونا هالكلينكس عساس نعقم نفسنا :) العاده يعطونا عقب الاكل بس اما هذا قبل وبعد..



ميني برغر بس كاسم اما الصج الهمبرغر الوحده جنه مخده ماشاءالله كبيره وطعمها زين مو وااو اما الشبس توبه اقول ابي جبن فوقه 2 مره يتكرر الموقف والشبس يتلزق بشكل مليغ من سبت الجبن :\


البيتزا طلبتها ببروني وزدت عليها لحم ومشروم ..

لــذيـــــــــــــــــــــــــــــــــــذه حبيتها :)


الفاتوره :)



وعجبتني الخدمة :)

وبس سلامتكن ..
Tuesday, June 22, 2010




اسم الكتاب : ارزاق







نوعه: رواية اجتماعية طويلة






المؤلف : د.نبيل فاروق






عدد الصفحات: مكونه من 3 اجزاء : الجزء الاول يحتوي على صفحة تقريبا 300 و36


اما الثاني 320


والثالث 404


تقريبا 1056 ص..






مكان الشراء : الظمني للنشر والتوزيع






السعر: بوقت الخصومات حوالي 1.200 اما السعر الاصلي 3 كل جزء دينار ..






الاغلفة والنبذه الخلفيه :









 

















 
مكان الحدث: مصر وتحديد سراي البنهاوي في القريه بالاضافه الى القاهرة وطنطا وفرنسا واسرائيل .






زمن الحدث : قبل وبعد الثروه مرورا بالنكسة ومابعدها ..






الشخصيات الاساسيه :






الحاج محمد البنهاوي ولديه من الابناء 3 اولاد ذكور و5 بنات :






1- نعيمة:


2- توحيدة


3- زينب


4- حسين


5- شريفة


6- حافظ


7- ناهد


8- مفيد






بالاضافة لشخصيات اخرى :






كأزواج البنات : عبد الحكيم وامجد وعمر وفؤاد وماهر..


و فاطمة والاميره عايدة وجيهان وسوسن و مديحه .


والعسكر :ابراهيم مكي ومراد بيك وصلاح و ...الخ ..






تعليقي :


تبدأ الرواية بزواج الحاج البنهاوي و انجابه لابنائه وزيادة ماله مع كل طفل . ثم تنقلنا الاحداث الى الثورة ونتائجها وتحديد الملكية من الأراضي و ازالة القاب كباش وامير والخ أي انهاء العهد الملكي وبداية عهد جديد , فتاخذ الرواية منحنى يغالب عليه الطابع السياسي بالاضافه لعسكرية والعمل في منظمة كل شخص يرغب في الوصل للقمة واطاحة الاخر حتى لو كان من اقرب المقربين اليه ،و هي باختصار تعبير لما تمثله السلطة والنفوذ والنقود والاملاك عندما تتوفر بيد شخص واحد .






فتظهر بالرواية العدي من الشخصيات البارزه سواء بالاشاره او الاسترسال كالسادات وجمال عبدالناصر ..






رايي :






ما يعيب الرواية هي طوالها فالجدير بالذكر انها لم تنتهي بل هناك جزء رابع لها حسب علمي انه لم يتوفر بالاسواق بعد ، وهذاالشي كان صدمة بالنسبه لي :\ (ماحب احد يعلقني يعني اقرا 1000 صفحة ولا اعرف النهايه هزلت بصراحة)..


مصدر الصور منتدىات ليلاس
Monday, June 21, 2010
السلام عليكم ..

قبل جم يوم يانا اخوي ومعاه جيس جمعيه انا اول ماشفت الجيس بيده وداخله كرتون اصفر قلت  الظاهر يايب شداخه..

ولا بعد عمري يايبلي بسكوت ع حبيب قلبي سبونجي :)

شوفوه ياحلاته :)


والحلو انه العلبه من ورا فيها نفس المسابقات حلوه اذا ملل او ليهال وحده متاهة وال2 تلوين ..

والاحلى انا من داخل مغلف بحيث ماياثر اذا فتحتي العلبه ..

واذا لاحظتوا الصور مختلفه اهما 6 بس انا شلت اللي صورهم مكرره ..


وكل مغلف فيه بسكوتين وحده ع باتريك وال2 ع سبونجي..


وهو من تحت مغطى بككاو ..



مبدائيا ذقت نص بسكوته وطعمه كويس :)

شكرا اخوي ياعضيدي وسندي ياحبذا لو تكمل احسانك وتسوي مخططي القادم :)
Sunday, June 20, 2010
السلام عليكم ..

قبل فتره وانا احوس بالنت بعالم اصباغ الاظافر لقيت هالحلو ..

mood nail polish من كليرز..

وفي وايد درجات هذا بعض منهم ..


هني الصور اوضح ..

حلو ..

 

مااحب الاخضريكا :\


بنفسجي مش بطال بس ماافضله ..

احلاهم واحس الصور ظالمته :\


وهذا فيديو يوضح فكرته (هونا)

مايحتاج اشرح الصور ابلغ من الكلام :)

عجبكم ..؟؟

تشوقتوا تبونه..؟؟

نايس صح ؟؟

مااسمع

عيل حطوه بلستتكم لانه دورته وماحصلته خخخ رحت سالت عنه بجمعية الروضه ما اعرفته الحجيه البياعه:\

وقالت ينزل اول بالمجمعات مثل الافنيوز او المارينا رحت الافنيوز وهم ماكو :\


ابيه :(
Saturday, June 19, 2010
السلام عليكم ..

يوم الخميس 17 يونيو كان يصادف عيد ميلاد اختي الكبيره  ام سمسم..





والعاده اهي الخميس عندنا فقلت بيبلها شي بسيط والاهم يمعتنا كاحتفال بسيط فيها ..

تميت افكر قبلها بجم يو وين اخذ الكيكه اخر شي استقريت ع برد توك هالمطعم عرفته ب2006 سويت عنه برزنتيشن بالجامعه وبالنسبه لي من احسن التقديمات اللي قدمتها بالجامعه لانه اول مره اقدم جدام صبيان وانا مو متعوده ع الغرب فقلت اخاف اطقها بجوه ولا من زود الرقه اغشي خخخ او يملغها صبي واضطر ادبه واهف باكبر ماعندي ولزوم الهجمات خذيت امي واختي الصغيره كدعم لي و حماية و بالمره يفزعون لي :)

بس هذي اول مره اجب كيكه اول جربت معجناتهم (فطاير- صمون ساده الخ) وعجبوني..

رحت اختار الكيك قلت شنو احلى كيكه قالي هذي ماعجبتني قلت ال2 قال هذي قلت هم لا اللي وراها هم لا اخر شي اخترت هذي مو من التوب اللي عندهم خخخ..

بس اهم شي عجبت اهلي..


صينية فطاير انا ماحب الملونين احب العاديين الذ وحلاتهم حارين :)


وقالي اذا خذيتي كيكه 2 ماتدفعين الا نص جنه لانه بنخصم لج 5 دنانير قلت يالله فوقه خخخ..

صراحه ماقصر اللي خلاني اخذه وايد ترفه وناطعه صج وعليه قرعه وشكلها مايوحي بس انا توني ذايقتها الظهر يعني عقب يومين بالثلاجة بس طعمه ماجنه بايته كلش جنه توني شاريتها ..




وشفت كب كيك صغير في نوعين ككاو وعادي خذيتهم 2 بس صورت لكم هذي << هذا مو تبع الاحتفال :)


ا

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads