Wednesday, June 16, 2010


السلام عليكم ..

اول شي وناسة البلوق تطور اقصد من ناحية تنزيل صور وغيره اخر فتره كان متنح معاي :)

اليوم ودي اسوالف معاكم عن مجلة كنت احبها واقراها قبل ..

اهي مجلة الجريمه.

وانا وايد اول كنت احب القراءه فكنت افصص المجله ع  قولتهم من الجلده لي الجلده ..

بس هالمجله كان لها تاثير كبير علي وللاسف كان سلبي من كثر ماقريت المصايب والجرايم اللي فيها صرت اخاف من كل شي اخاف اطلع بروحي   لازم معاي امي او اختي الكبيره وهالحاله لي اخر سنة بالجامعه وعقب قمت اطلع مع اختي الوسطيه بس الصبح اريح احس الليل وقت الجرايم خخخ..

و حسبالي بس انا اللي مريت بهالمشكله طلع لا , بايام الجامعه كنت بمادة اخلاقيات اعلام فبنيه قالت عن هالمجله وشلون خلتها تخاف لدرجة لي مشت بالشارع وطاح منها شي تخاف تجندس تاخذه اذا احد وراها تحس بيذبحها :\ او يبوقها ..

واتوقع في غيرنا وايد اثرت عليهم ..

بس الحق يقال كان في عنده صفحه ممتعه اهي مذكرات مراهق سابق للكاتب اعتقد بدر عبدالعزيز >> مو متاكدة من الاسم ..


اما ليش كنت اقراها مادري يمكن لاني كنت احب الاكشن وكان في نية اني ادش حقوق بس كرغبة 2 عقب الاعلام :)

ولقيت عقب البديل عنها واهو المغامرين الخمسه :)

 للي مايعرفها وحاب ياخذ فكره عنها في جم موضوع منها هني ..

37 comments:

daloo3a said...

هالمجله دخلت مره وحده البيت و من كثر الملل قريتها و حفظتها
بس الصراحه وايد مصايب يلاا الحمدلله على كل حال
انا ما خاف عندي تايكوندوا بصفعهم خخخخخخخ

^^

~أم حرّوبي~ said...

في تاثير ثاني لها ..تخلي تفكيرك اجرامي (لووول مثلي )الواحد يكتفي بمشاكله وخل الجرايم بعيد عنا ..

كوكتيل said...

صباح الخيرات :)

أنا بعد يت لي فتره أقراها بس وأنا صغيرة بس حيل كانت تحسسني إن الدنيا كلها جرايم وبلاوي
بس لما كبرت عرفت أنهم يألفون وايد الله يهديهم :)

بس ما أحبها :)

رنداالجنوبيه said...

ولامره بحياتي قرأتها ولاافكر اخاف هههههههه
الله يعطيك العافيه رورو ويبعدك عن الجرائم .

Princess Sara said...

تصدقون حتى انا هبيت فيها من يوم عمري 13 حسستني أنه كل شي يخوف و الكل شرير !! يممه بس أمي منعتهآ بالبيت
شافت تأثيرهآ السيء .. و بعدين بصرآحه أحس فيهآ وايد اكشن! أكثر من الازم ، احساسي يقول نص المقالات تأليف

:)
و نعيماً عالنيو ستايل
أرق التحية

AM.SA.CHANNEL said...

أنا كنت أحب هالمجلة و كنت دوم أقراها
لكن الصراحة بعد ما درست قانون جزيتها لاعت جبدي منها، مجرد ما إني أشوفها في البيت ألف ويهي عنها، ما أحبها أحس بس إطلع المصايب، و على فكرة ما تضيف شي للقارئ أكثر شي مصايب و بلاوي
يمكن فيها كم من شي لكن مجملا المجلة ماشوف إلها تأثير إيجابي

drabel said...

اذكر قبل كان العموم هاب فيها ، وانا كنت احب اقراها حق سوالف الجن وهالخرابيط

وصج كان لها تأثير ان كان في موضوع عن بيت مسكون بصليبيخات وشنو صار بساكنين البيت

صج هالموضوع ظل فترة مأثر فيني سبب لي خوف

Amwaj said...

رورو آنا من غير ما أقراها أخاف من
شي اسمه جرايم

حتى لو أكون بمواقف الجمعية وأبوي ينزل 5 دقايق لازم أقفل السيارة .. لوووول

يعطيج العافية حبيبتي

تحياتي:)

mazyona said...

أنا مثلج من كثر ما قريتها كرهت
كل شيء عن الجرايم
تعقدت

ri7ana said...

اذا انتي من مجلات متعقده انا تعقدت من الافلام الي اشوفها
واتييلي ساعات افكار ان احد بيقتحم منزلنا وياخذني رهينه عشان ابوي يعطيه فديه :p
لول
وملبوس العافيه لمدونتج

قلم ومسّاحة said...

مذكرات مراهق سابق عندي أجزاءه بعضها مفصولة وبعضها تكون مع كتاب جرائم من واقع الحياة وهو فعلاً للكاتب بدر عبد العزيز ما غطلتي بالاسم. أما عن مجلة الجريمة أنا بعد تأثرت فيها حييييييل
وكنت أقراها من سنة 98 عن طريق عمتي حبيبتي الله يرحمها، كانت مشتركة بالمجلة هذي وكنت لما أروح عندها ألاقي المجلة بالصالة ف أشوفها واقراها من الجلدة لي الجلدة.وحبيتها وايد.. لكن قطعت قرائتها من 2004 لأنها صارت مو مثل قبل
ومملة والقصص أحس تأليف وكلش ما تشوق

رورو الشخبوطه said...

هلا دلوعه ..

يالله سمعيها عيل :p

اي والله قلت مواضيع!!

عيل علميني :)

وحياج الله..

رورو الشخبوطه said...

هلا ام حروبي..

اي صاجه تاثيراتها متعدده ..

ومو ناقصنا بلاوي اللي فينا كافينا ..

مشكوره..

رورو الشخبوطه said...

هلا كوكتيل..

مساء الليرات..

حتى انا هالحجي من زمان ..

اي استغفرالله احنا الكويت وجذي شلون لو شيكاغو :\

امين..

ولا انا احبها :(

ومشكوره..

رورو الشخبوطه said...

هلا رندا..

احسن لج ابعد عن الشر وغنيلوه ..

الله يعافيج واجمعين يارب...

مشكوره..

رورو الشخبوطه said...

هلا برنسس..

زين سوت امج ..

اي صاجه يحسسونج انه بعالم متروس جرايم ..

الله ينعم بحالج ..

ومشكوره..

رورو الشخبوطه said...

هلا شانيل..

نفس رايي مافيها شي يذكر ممتع الا مذكرت مراهق سابق و ايجابي ماكو كلش كله تصروع وتخرع :\

ومشكوره..

رورو الشخبوطه said...

هلا اخوي درابيل..

اي صاح اول وايد كانت مشهوره ومنتشره..

اي تاثيرها سلبي ع اغلب من تابعها :\

ومشكور..

رورو الشخبوطه said...

هلا امواج ..

مثلي تقريبا :)

الله يعافيج يارب..

ومشكوره..

رورو الشخبوطه said...

هلا مزيونه..

اي مو خوش مواضيع تطرحها :\

ومشكوره..

رورو الشخبوطه said...

هلا ريحانه..

خخخخ حتى الافلام تاثر فيني بس انا اقرا اكثر من اتابع التلفزيون ..


الله يعافيج يارب..

مشكوره..

رورو الشخبوطه said...

هلا اخوي قلم ..

اي اختي عنده من كتبه تحب تقراله واشوه ذكرتي زينه خخ ..

الله يرحمه يارب..

انا فجاءه قطتعها احسن لي..

ومشكور..

خاتون said...

السلام عليكم

أنا بعد نفس وضعج
سوت لي رعب قريتها بسن صغير أمي كانت قاطتها و قريت جرايم القتل و السطو و صرت بعدها خوافة وايد
بس هالمجلة بعد ساهمت في انتشار
الجريمة صراحة و فعلا ما أمشي لي يومج هذا بروحي إلا بأماكن مفتوحة حيل و الاضاءة فيها عالية و بليل نو وي بدون ما يكون معاي أحد بعد المجتمع صاير يخرع

تسلمين على الطرح الراقي و الجديد

Hopeless Sight said...

أحب هالمجلة بس ما أثق بمصداقية المعلومة المنشورة فيها :)
و صج ترى وايد تأثرت بس أنا أكث شي أثر فيني أفلام الرعب هههههه

Engineer A said...

انا اذكر بايام مراهقتي كنت اقراها واتابع مواضيعها بس على قولتج من كثر الهم والغم هديتها وماقمت اقراها من فتره طويله وايد ..
الناس تقرا شي حلو يحث على التفاؤل على الحب والعطاء مو جرايم وقتل وعنف :(

الله كريم :)

ebtsamh said...

بدر عبدالعزيز اهوا اللي

شاهر المجله :)

شاي الضحى said...

ما احب هالمجله

اذكر بالمتوسط هبوا فيها البنات

ما كنت اقراها كنت احس ان كلها تأليف وخرابيط

:)

Made n Q8 said...

انا هالمجله لما اراقبها اتازم نفسيا وعاطفيا وكليا

مااحبها وترى اغلب المواضيع الي فيها جذب بجذب بس عشان يجذبون القراء

رورو الشخبوطه said...

اهلين خاتون ..

عليكم السلام والرحمه..

اي امبيه مثل وضعي بالضبط نفس الحاله مااحب الاماكن المغلقه او اللي تكون فاضيه..

الله يسلمج يارب..

مشكوره..

رورو الشخبوطه said...

هلا هوبيلس..

انا كرهتها :\

عكسي عيل احس افلام الرعب تمثيل وماعمري شفت فليم رعب يمثل قصه حقيقه كله خيال فما اخاف ..

ومشكوره..

رورو الشخبوطه said...

هلا انجو..

اي والله جنه ناقصنا نكد..

مشكوره..

رورو الشخبوطه said...

هلا ابتسامه..

ماعتقد :)

وحياج الله..

رورو الشخبوطه said...

هلا جايونه..

انا بعد ماحبها بس اول كنت احب اقرا فاشتري اللي موجود اغلب المجلات قريتهم ..

ومرسوو..

رورو الشخبوطه said...

هلا مدمد..

ماتنلامين..

اي مثل الصفحه الاخيره بالغب الجرايد كلها صواريخ خخخ..

مشكوره..

rooowy said...

احيانا تحوش الانسان طاقة سلبية من قراءة هذه الاخبار و مع الاسف هناك جرايد يومية تخصص صفحات لمثل هذه الاخبار المثيرة للفزع منها الراي العام
الله يستر علينا من هالجرايم

رورو الشخبوطه said...

هلا رووي..

والمصيبه اغلبه تشلخ وجذب ..

يعني شنو الفايده منها مادري..

امين يارب..

مشكوره..

رنداالجنوبيه said...

قريتها مره وخفت وقعدت افكر بها المصايب واحللها بعقلي خخخ
وبعدها مافكرت اشتريها
يسلمو ع الموضوع ذكرتينا بها المجلة
بالتوفيق

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads