Tuesday, June 19, 2018



من بعد ماتابعت مسلسلات مي عزالدين  وعد وحاله عشق يازت لي اختياراتها مسلسلاتها مو مثل الدارج لازم في قصه ماشاءالله ..
وهذا المسلسل كان مفروض ينعرض العام وتأجل لي هالسنه ..
 
قصته باختصار:
 شابه اسمها #هاله_بديع شايله مسئوليه اسرتها (اهلها من اب واخوان  هاني وهند وهشام امبرطورية هاء :) وهالشي يخلي وقتها اغلبه معاهم رغم زواجها وانجابها لولد..
مو هذي القصه :\ القصه انه تتعرض لحادث مع شاب اسمه #سامح_الخربوطلي ويدشون غيبوبه اهيا ٣ ايام واهو .... خلال هالفتره وعقبها تحلم بشغلات لها علاقه بسامح و هالاحلام تتحقق ! كل حلم يمثل مشكله او حدث بحياه سامح اهيا لازم تحله وتساعده فيه ( بعد الجوع لاهله اخوه يحيي الخربوطلي وبنت عمه جيهان -جيجي )
المسلسل متروس احداث ..
اعطيه ٤ من خمسه ليش نقصه درجه يمكن لانه في حدث ناقص اللي اهو قدره ولدها هم بسالفه الاحلام ماركزوا عليها ..
 
 
.
السلام ..
او على قولتهم بالمسلسل (سعيده)
 
من مسلسلات رمضان 2018 اللي تابعتها ..
من #مسلسلات_رمضان_2018  اللي تابعتها هالسنه #ليالي_اوجيني 
مسلسل مصري نقدر نقول كلاسيكي يمثل حقبه الاربعينات بمصر تحديدا في بورسعيد ..
يقال حسب ماقريت بالنت انه مقتبس من مسلسل اسباني ..
 
بطولة :
 
 
#ظافر_العابدين بشخصيه دكتور فريد اللي متزوج مرت اخوه المتوفي عايده ويبين علاقته معاه وعلاقته مع الحريم ال٢ مثل لولا وكريمه ..
 
#امينة_خليل  ودورها كريمان او كريمه هاربه من جريمه قتل زوجها بعد علاقتها السيئه معاه من طق واهانه وصول لي خطف بنتها منها وابعدها عنها راحت لي بور سعيد وهناك تعرفت ع ابطال المسلسل ..
 
#انجي_المقدم  بدور صوفيا ايطاليه عايشه بمصر صاحبه كافيه كانت بعلاقه حب وصداقه مع عزيز .. وايد حبيت شخصيتها ..
 
#اسماء_ابواليزيد بشخصيه جليله فنانه التياترو بنت صعيديه تركت اهلها وحاربت بس لحبها للفن من غناء وتمثيل وغنت كذا اغنيه او #مونلوج مثل اما جرئ  واهيا صديقه كريمه واهيا اللي استضافتها بعد (مانحاشت-هربت من زوجها) في بورسعيد وصاروا صديقات عقب ..
 
#مراد_مكرم بدور عزيز رجل متربي تحت ايد ام مسيطره لابعد الحدود ! تتحكم بتصرفاته بشكل قوي تعامل معامله الياهل ! بالكويتي العن من ديايه امه 🙃
واهو صديق فريد وحبيب صوفييا ..(بدع بالشخصيه #حبيت تمثيله)
 
# ليلى _عزالعرب #ام_عزيز نفس ماقلت الام المتسلطه رغم مرور سنين ع علاقه ولدها بصوفيا الا انها ماتحبها وتداحرها 🤣 من الشخصيات اللي وجودها فعال بالمسلسل .. ( الدور ضابط عليها 100% )
 

 
 
#مريم_الخشت اول مره اشوفها بس مثلت دور البنت المايقه بجداره .. (المغروره ) واهيا بنت صاحبه التياترو وصديقه عايده وصوفييا وجاره عزيز ..
 
#نادين مثلت دور لولا بطله من ابطال التياترو ولها علاقه سابقة بفريد .،
 
#كارمن_بصيص  بدور عايده زوجه فريد لبنانيه ..
 
#بطرس_غالي ابو نبيله وصاحب التياترو وزوج نعمات .. شخصيه فضيعه احب الابو اللي جذي ❤️
 
#انتصار بدور نعمات احد العاملات بالفندق يحبها صاحب الفندق ويتزوجها رغم معارضة بنته وايد حلو دورها وعلاقتها وايد زينه مع اغلب الشخصيات مثل صوفييا وجليله وكريمه .. الخ .،
 
#خالد_كمال بدور اسماعيل زوج كاريمان امبيه شنو دعله بس دوره قوي ومهم  مع انه مساحته صغيره اقصد طلع بحلقات قليله
 
رايي :
المسلسل هادي احداثه بسيطه في تمغيط بالاحداث واهم حدث يكون بالحلقه الاولى وكعاده اغلب المسلسلات باخر دقيقه او دقيقتين من الحلقه اقوى الحلقات اهما الاولى وال٢٩ وال٣٠ ..
كنت احب اشوفه الفير كنت الا الحلقه الاخيره من قوه النهايه بحلقه ٢٩ ماقدرت انطر ودورت الحلقه الاخيره بشوف شبيصير ..
يعني اقدر اقول زين مو وواو للي يحبون الافلام الكلاسيك اوبالاحرى يحبون حقبه الاربعينات و للي يبون مسلسل هادي.. .
.
 
 
 
 
 
 
السلام ..
 
برد للبلوق << اتمنى هذا ..
 
 
فبنزل جم بوست بعد التعديل كنت منزلتهم بانستغرام ..

 
من افلام العيد 2018
 
 
 
بطولة : ياسمين عبدالعزيز 
 
نوعه : كوميدي ..
 
الفيلم فيه فكره :
اهو عن بنت وحيده ابوها من كثر مايخاف عليها خلاها تخاف من كلشي!
هذي الفكره الاساسيه بس عقب يصير الوضع .
.
 أن فيلم “الأبلة طم طم” يدور حول مجموعة من المساجين، يهربون من السجن، ويختبئون داخل مدرسة؛ الأمر الذي يجعلهم يدخلون في مشاكل مع ياسمين عبدالعزيز، والتي تلعب دور إحدى المعلمات”.
👆🏼👆🏼 نقل عن #إرم_نيوز 
الفيلم اقل من عادي في افيهات تضحك بس تعرفون لما خلص الوضع صار خلص ولا في تكمله العموم قاعد ينطر الباجي 🤣 الفيلم كله على موقف واحد يعني ولو  مركزين على موضوع الفوبيا والحرص الزايد بالتربيه و تاثيره ع يهال وعلاجه احسن من موقف المساجين اللي فجاءه طلعوا !
 
رايي:
 
مايسوى العنوه مافيه قصه ، واغلب التعليقات عليه كانت تذمه تقول سخيف :\


About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads