Wednesday, September 2, 2015
ماكنت بكمل بس لانه في ناس الحمدالله استفادت من المعلومات وناس تسال تبي تعرف اكثر فبكمل جود افيد احد بعد اهم شي وحده تشجعت مني وسوت العمليه والحمدالله تبارك الرحمن الله يتمم عليها شفاها وسوتها عند د. باسل << دكتوري ..
 
مالكم بالطويله ..
 
اممم وين وصلت اي ليوم موعدي تحديد ب3-8-2014 ..
 
رحت موعدي ! طبعا ماعندي هدوم كبري حتى لقنزي صار حيل وسيع علي بس الله يسلم العباة..
ولانه تاخرت شوي فدشت حاله قبلي لما وصلت خلوني اقعد بالغرفه اللي يم الدكتور وفيها ميزان ..
رفيجتي قايست وزنها جان ارتز واقيس وزني معاها!
وانصدمت انه وزني صار ٤١ !
يعني ٩ كيلوات مطيحه!

الدكتور اول ماشافني قال جنج ضعفانه قلت نزلت ٩ كيلوو !
عاد شرحت له شصار لي وقلت له عن حالتي وانه ريولي ثقيله غصب احركها ..
جان ينزل ويمد ايده انا حسبالي بيشوف ساقي!
ولا يقول لي دوسي ع ايدي جنج تدوسين بريك مادري بانزين مااعرف بهالسوالف مااسوق المهم واي فشله :/
المهم خلصنا والحل اهو انه بيحولني مستشفى مبارك اسبوعين لي ١٠ ايام مغذي بالوريد عساس ارتفع وعقب يسون لي منظار توسيع بس هالمره نفخه مادري بالون ..
قالي تقدرين تروحين اسبوعين قلت اي قالي يناسبج الصبح قلت اكيد!
وعطاني ورقه باسامي الدكاتره و رقم الجناح وقالي اذا وصلتي كلميني ..
رديت البيت نمت ريحت شوي عقب يمعت اغراضي وتسبحت ودخت بعد خخ وعلى ال٧ طلعت من البيت ..
 
*مستشفى مره 2 :\
 
رحت الطبيب اول شي كنت امشي عادي عقب جان ادوخ الدكتور اذكر كان اسمه د.فهد (وايد مريح بالتعامل ) يكلمني وانا اقوله ترا دخت وياب لي كرسي وعقب نزلنا واكمل اجراءات وطبعا مال الرسبشن استغرب اول شي امشي عقب بكرسي يدزوني !
المهم انا اول ماوصلت كلمت الدكتور باسل واهو كلم دكاتره الجناح ..
خلصت ورديت الرسبشن الجناح في دكتور كان يكلمهم عقب لف علي قالي تبين غرفه خصوصي قلت اي ؟ عاد كلمهم يودوني ولا عمومي خخ ..
انا حسبالي بيودوني خصوصي ع طول راهيه ..
المهم قعدت ع كرفايتي ولا مافي مخده قلت ايبولي وعقب ودوني اسوي تحاليل وحطولي ابرة المغذي بس ماحطوا جياس المغذي ..
 

الصوره من النت نفسه بس انا مخيطينه برقبتي والبلاستر اثري كان :\
 
عقب اعتقد ع ال١١ او عقب اذان الظهر يولي ركبوا الجهاز (مغذي بالوريد )برقبتي ..
وقبلها كانوا حاطين ويرات بجسمي نفس ملوت تخطيط القلب ..
طبعا واهما لبسوني هدوم العمليات وقالوا قسطره !
انا اتصرقعت طبعا انا بمكاني ماقمت ..
المهم يابوا روب عمليات ٢ وغطوا ويهي فيه ! عطوني ابرة بنج موضعي وبلشوا تركيب الجهاز واهما يركبونه انا كنت عادي بس فجاءه شفت ابره وخيط جدام عيني ! سألتهم هذا لشنووو! قالي نثبت الجهاز ! اهني بلشت احس فيه واهو يخيط اقوله احس بالابره ! يقولي قاعد ازيد البنج قلت له ترا مافرق شي ! فجاءه البنج اختفى !
المهم ركبوه بس ماحطوا الادويه نطروا يسون لي اشعه يتاكدون انه مثبت صح ..
يا مال اشعه لي للجناح وحط نفس لوحه وقالي انسدحي انسدحت عليه جيك قالي اوك كان معاها سستر وصلته وراحت ! الحين بقوم عن الجهاز شلون ! بروحي مااقدر متشجنه من المغذي اللي برقبتي ! مالقيت احد يقومني الا مال الاشعه ! الشكوى لله ! لا وقاضبه ايده من صوب الجم يعني مايجوز ! استغفرالله ..
صار المغرب بلشت ايوع ماحطوا الادويه بالمغذي وابره برقبتي وابره بايدي :/ كلمت الدكتور قالي شوي ويركبونه . .
ناديت السستر قلت لها يوعانه :/
اخر مره كليت الفير بسكوت مالح لا ونتفه بعد ورجعته وانتوا بكرامه ف حطت لي مغذي بايدي تقولي عشان ماتقولين يوعانه وعقب ركبوا الادويه بالمغذي الاساسي بالوريد بس متى ماذكر .اللي اذكره العصر غيروا جناحي العمومي لي ٢ هم عمومي وبالليل ع ١٢ فجاءه انفتحت البرده ودشوا سسترتين عندي مع ظلمه الوضع رعب لا ودعموا الكرفايه (السرير)  لين قلت بس ! حزتها كنت متشنجه من الجهاز وعطشااااااااااانه حدي جني باذله مجهود راكضه الساعه ١٢ الظهر بالبر وبالعه فوطه :/
المهم عدت ..
في ٢ يوم رحت الحمام وانتوا بكرامه طبعا مغذي بالوريد ماينشال نفس العادي حطوا الادويه بعصايه او حامل اخرها تواير علبو لما اتحرك اسحبه معاي ..
المهم بطلعتي من الحمام دخت فجاءه الدنيا سوده :/ مادري منو اللي حاط كرسي عادي يم الحمام خذا فيني اجر قعدت عليه انطر اختي تخلص شافتني سستر هذي فلبنيه وحامل بس عجيبه وشاطره ماشاءالله كذا موقف صارلي معاه خلاني احبها اول موقف هذا 👆 يتلي ولما درت اني دايخه يابت لي ويل تشير(كرسي متحرك) ودتني للجناح وطبعا مغذيب تليته معاي وصلت للكرفايه جيكت ع ضغطي والسكري ولا كلشي اوك ! #الحمدالله ..
قلت ابي الدكتور اقصد دكتور الجناح مايالي بس قالت لي يقولج اكلي جان اسايره اقول شنو مالح ولا حلو ! قالت مادري قلت لايي كيفه بس قوليله انا مااكل اساسا !
المهم عقب يالي دكتور باسل وقلت له دكتور عادي اكل حلاو ولا علج شي ماينبلع بس نفسيا احس اني اكل قالي اكلي اي شي مايتعبج ويخليج ترجعين مانبي المعده تتعب وتزعل ! وانا بقلبي تزعل ! اهي بتموتني خل تزعل خخ ..
وقالي تمضمضي بالماي اذا عطشتي ..
المهم نظامهم : قبل ٧ يمرني دكتور الجناح ٧ وشي قروب الدكاتره االي يتعلمون علينا ! ع ١١ ايلي دكتور باسل وهذا الوحيد اللي كنت انطره ..
السسترات ايون لي الصبح والعصر وبالليل والفير ع ٤ وغالبا يسون لي تحليل هالحزه ..
اللي مره قلت للسستر بطلع ايدي من الكفر لا تقعدوني خخ.
 
والظهر كل يوم وترك ابره ع خاصرتي نفس اللي كنت اخذها بالمستوصف ..
والعصر يولي قالولي ب٢ يوم لقينا لج غرفه خصوصي جان اقول صج Ilove u للسستر ..
ودوني الغرفه انا ع كرفايه هالمره مثبتين المغذي بالكرفايه وكنت كاشخه بيجاما تايغر وفوقها بليزر 😂
المهم وصلت الغرفه جني داشه الجنه عسى الله يرزقنا الجنه من غير حساب او سابق عذاب امين ..
الهوى غير كلشي غير كافي الخصوصيه ..
كنت موقايله لاحد اني داشه المستشفى فكان الوضع اريح من السيف ..

 
وبلشوا ايبون لي اكل اتوقع ٢ يوم بدوا شنو استانست مو لاني ميته ع اكل خو باكله ورجعه وانتوا بكرامه ! بس وجوده يحسسني اني انسانه طبيعيه اول جم يوم كنت استانس فيه بس عقب لا لانه طعمه ضيم مع انه شغلات اللي احبها مثل مولوخيه وبطاط مهروس وكريم كراميل ومشخول (عيش ابيض) كلهم احبهم بس طعهم مو حلو بس كنت احب الجيلي لانه كان لذيذ ..
والموظفه اللي توزع الاكل لاحظت اني مااكل بس ايمع القفاش الفاكهه والتوست :/ جان تقولي ليش ماتاكلين قلت لها ماحبيت الا الجيلي جان تقولي في وتروح تيب لي كسرت خاطرها خخ ..
اختي الكبيره يبت لي ثلاجه صارت متروسه جيلي :/
 
مواقف عامه
المهم من اكثر المواقف بس مالها شغل بمرضي كنت مو حابه اكون بالمستشفى وبعيد ميلاد اختي يصير اهي ب٧-٨ وانا دشيت المستشفى ب٤-٨ فدورت لها كيكه بالانستغرام ماعجبتني الاسعار كيكه ب٦٥ ! قلت لرفيجتي قالت شوفي كرمز كلمتهم واتس اب ماردوا قلت لرفيجتي جان تتصل عليهم هم ماردوا قالت لي عقب الدوام امرهم بعد عمري ماقصرت الظهر دزت لي صورة انها طلبت الكيكه ودفعت بعد كنت بزنط عمري بالمغذي :/
 
 
المهم جان اقول لرفيجتي ال٢ مايخالف تشترين هديه لفجر بعيد ميلادها اعطيج كرتي البنك وبالمره اشتري لج هديتج كل اللي احبهم مواليد برج الاسد خصوصا شهر ٨ !
واشوه يابت لها واستانست اول مره اشوفها مستانسه هالكثر ،.
والحمدالله عدت .،

 
 
حطيت صوره الكيكه باكاونتي واهما يدرون اني بالمستشفى فدزولي هالبوكيه بعد جم يوم وحبيت الكلام المكتوب ع الكرت ومامداني حطيته بالانستغرام كليت شويه من وحده بخشها جان تطيح تفلش خخ ..
 
*"السستر والمغذي *
 
المهم مر بسرعه الوقت اغلبه ركود لازم اتحرك اذا نمت بدون لا امشي بالجناح احس جسمي متكسر الدكاتره يقولون لي امشي مانشوفج تمشين قلت افتر مرتين الساعه ٣ و الساعه ٩ او عقب عساس يكون فضى الجناح !
ع طاري يفضي الجناح اول يوم بالغرفه الخصوصي بنام مو قادره انام واقوم ! الغرفه اللي يمي يتهاوشون زوارهم مع بعض! وقته ولا مكانه تهاوشوا ب بيتكم !
يتلي الدكتوره قلت لها مو قادره انام منهم سكتتهكم ونمت اشوه ..

 
اول تحليل كان كلشي منخفض الا البروتين عقب جم تحليل البوتاسيم مازال منخفض قاموا يحطون لي جياس بوتاسيم بالمغذي ،.
والعاده جيسين ادويه مو اكثر مره يت سستر ذكيه وحطت لي بدال ال٢ خلتهم ٣ يعني زاده واير ع رقبتي مامداها طلعت الا انعفست احس الماي يصعد لي مخي وجسمي كش يلدي جني بردانه المسام بارزه ! بنسدح مو قادره بقعد هم مو قادره !
طقيت الجرس مايا احد خليت اختي تناديهم تقول اشر ويحقروني خليت رفيجتي تروح لهم جان تحكر وحده وتيب لي غصب !
ع حظي طلع حزة تبديل شفتات الممرضات واللي يت لي مسلمه متحجبه وعربيه تقولي بس خلص شفتي :/ بسكر المغذي وخليهم عقب يشوفونه لج ! هذي ملاك الرحمه ولا ملاك الموت !
المهم عدت تساهيل من رب العالمين ..

ع طاري المغذي شفتوا هذا اللي بالنص اللي عليه قصدير ترا هذا لافينه بقصدير عشان مايصير يمتص الاضاءه او يحوشه نور !
مافي تقنيه احسن من القصدير !
المهم شفتوا اللي مايحوشه نور ! انا طلعت فيه بالشمس :p والظهر بعد ..
مره قلت للدكتور ابي تقرير للعلاج بالخارج عساس اذا الله لايقول ماصرت زينه خلاص اخر حل العلاج برا مدام جربت كل الحلول هذا مع اني ماابي علاج برا ! المهم قالي تحت يسون تقارير دزي اختج تطلبه ..
قلت لها راحت جان ترد تقولي مارضوا لازم امي او ابوي وجنه امي مع اثبات ماذكر اذا عقد الزواج او شهاده الميلاد و يدي او يدتي ! او المريض اذا كان ذو اهليه ..
نزلت اسويه طبعا انا المفروض ماطلع من الجناح بس نزلت بيجامتي المشمشيه اللي مقاس امي يعني ساتره مع ملفعي ولوني الاقحواني وطبعا المغذي و عدته وحزتها كانوا حاطين لي المغذي اللي مايصير يحوشه نور ..
وانا امشي وناس تطالعني يعني مريضه طوفوا !
المهم خلصنا جان اقول لاختي وين الفرع قالت يم الباب انا حسبالي من داخل اثر برا ونزلته مكسره ودري وصعبه حسبالكم هونت لا كملت وانا امشي واختي تساعدني بالمغذي واسمع اختي تكلم بس مو معاي لفيت ولا وراي سستر عند الباب تناديني كم باك وانا طاف كملت ودشيت الفرع واقعد امشي واخمط من زمان مو طالعه ! وفرعهم ضيج مايكفيني انا وعدتي بس هم عادي ..
انا نازله ابي كريم ! اول ماوصلت قسم الكريمات وقاعده انقي جان اسمع احد يقول كاهي لفيت ولا ٢ مجبلين علي نعم ! حلاته اعطي اختي المغذي واقولها و ركضي ! خخ بس ماكانت يمي !
قالي الكبير يبا مايصير جذي تطلعين انتي مريضه ! قلت له السستر لو اناديها ٧ سنين ماتيلي بس حق التفتن ماشاءالله دايركت !
قالي يبا انتي باي جناح قلت ١٨ جراحه حسيته انصدم ! ومايصير تطلعين وبلا بلا باا ماذكر شقال ،،
قلت اخلص وارد قالولي ماتشوفين شر وراحو ..
حاسبت وطلعت ..

ومره كنت امشي بالممر وكانت الممرضه الفلبينيه اللي احبها بالرسبشن بس ماكانت ضمن حالات اللي تتابعها اليوم وانا امشي اشوفها تطالع المغذي جان تقولي لحظه ترا المغذي مايشتغل ! وسوته لي ! من جذي احبها ..

ومره لانه مااشتغل بدال لا الادويه تدش بجسمي دمي ترس واير المغذي حزتها كان الدكتور مو دكتور باسل دكتور الجناح يفتر ع حالات بالجناح وانا افتر ادور احد يشوف شسالفه المغذي :/ صادفته عند غرفتي قلته جان تقول السستر هالمره هنديه اللي قالت لي عن غرفه الخصوصي انا اسويه وتشرح لي جان الف للدكتور اقوله شلون الحين ! اخر شي يت السستر وسوته لي ..
هذي صورته مع المشمشي خخ ..

ويا الدكتور باسل بيوم من الايام اتوقع ب٢ اسبوع وقالي موعد منظارج بيكون الاحد ان شاءالله ب١٧ الشهر عند الدكتور جابر العلي جان اقوله لا ابيك انت تسويلي ! صراحه مااثق باحد غيره ! رد قال انا ماسويها ..
اللي ريحني انه ساله عن احسن دكتور لمرضي قالولي جابر العلي وجم دكتور غيره بس ماذكرهم ..
انه اختاروا ١٧ اقرب تاريخ لانه طقت جبدي من المستشفى ولانه لازم بين منظار وعمليتي الاولى شهرين ع اقل فب١٧ بيكون شهرين الا ٥ ايام ..
 
وقالي مدام مليتي تقدرين تطلعين وتردين بيوم العمليه للمستشفى بس مارضيت مالي
 خلق لويه وانا معتمده ع مغذي اخاف اطلع انتكس ..
وكان الوضع اوكي قاعده اشوف تحسن بجسمي صج لازلت ارجع بس شكلي بلش يرد نفس قبل الحمدالله ..
بيوم الخميس الفير يعني قبل العمليه ب٣ ايام تقريبا كنت بالحمام وانتوا بكرامه اتيدد للصلاة (اتوضا) فجاءه رجفه بريولي ال٢ ! ماهتميت كملت التيدد ولا الرجفه توصل لايدي! طاف كملت لا الوضع مو طبيعي الرجفه وصلت راسي !
طلعت من الحمام وانتوا بكرامه طبعا عقب ماخلصت التيدد وناديت اختي بشوفها قاعدها لماردت قلت لها تعبااااااااانه قالت ريحي قلت اصلي اول مو ضامنه عمري اخاف انسدح وتروح علي نومه! قالت صلي وانتي قاعده لا تعبين اكثر !
قلت لها اوك ..
جان اقوم اوقف واقول الله اكبر واصلي واقفه خخ احس اختي انصرعت حزتها !
المهم انا كنت اصلي قاعده اذا بسجد او اركع اقعد ماقدر اسجد بالقاع اخاف ينشلع الجهاز اللي برقبتي :/
خلصت رحتي انسدحت ونادينا السستر يت قالت شفيج ماتكلمت بس قلت لها شوفي الرجفه بكل جسمي شي موطبيعي حطيت ايدي ع راسي مو قادره اثبت ايدي ولا راسي ! جان تشيل وايرات الدريب عن الجهاز بس الجهاز تم مثبت !
 
(اشوه الحمدالله ماطلعت .. طولت صح .. اكمل لكم عقب ان شاءالله باخر جزء قبل العمليه و العمليه ... يتبع )

Monday, August 10, 2015
 من اكثر الاماكن اللي حبيتها باسطنبول ..
اهو مجمع اوت لت ويمه مدينه العاب مثل مستوى حديقة الشعب بس متطوره ..
 
 
 
*محلاته *
في وايد محلات ماشاءالله  عالميه مثل ماركات و هم في مانغو وربعه  ماصورت وايد كنت لاهيه اتسوق بس بكتب عن اهم المحلات اللي دشيتها ..
 
اول ماتدشون فيا بورت راح تشوفون هالمحل ..واهو فيه ماركات وايد مكتوبه ع صوره ..والمحل اللي جباله نسيت اسمه فيه غوتشي و ارماني ..صورت لكم جم شغله من بربري لانه كنت رايحه مخصوص عشانه ابي سكارفهم بس مالقيته :/
 اذا حابين تشوفون صور لبضاعه المحل موجوده باكاونتي بالانستغرام بهالهاش تاغ Nonatr2015 # ماحطيتهم هني لانه صاروا قدم من شهر 1 بس اللي حابه تاخذ فكره عن مستوى البضاعه ..
 
2 محل  اهو اكثر محل حبيته بتركيا emoji اهو مثل دبنهامز يعني دبارتمنت ستور يعني في اكثر من شغله واكثر من ماركه او قسم للمحل فيه اللي اذكره كوتون ..في مكياج وعطور وهدوم اللي متاكده منه نسائيه وجنه في رجالي ولاطفال ماثبت الصراحه وفي قسم اواني ..تعرفون شعور لماتدشين محل تخمطين وتخمطين جاكيت قميص خواتي راحو عند الاستكانات رحت اخترت معاهم عقب رحت شفت الصوب ال٢ من الهدوم بلوفر لقينز كوت .. علبو بروح احاسب واخمط اللي جدامي واالي بالمحل يركضون ايبون لي سله emojiتحسفت اني مادشيت الا فرع ١ اللي اهو بفيا بورت  وموجود بمجمعات 2 مثل فيا لاند اللي لاحظته بتركيا اغلب محلاتهم مكرره ..
 
محل نفس بوتس في خرابيط بيوتي وفي مكياج ️..عن نفسي حبيتها فيها وايد ماركات مكياج مو عندنا مثل wet n wild ..وفي ماركه بالم واهي ارخص من الكويت ..بس اغلب الشغلات مخلصه رحت اكثر من فرع مافي وميزتها انها بكل مجمع موجوده  ..
بنزلكم بوست عنها بصور وتفاصيل اكثر ان شاءالله ..
 
 
خلصنا من اهم المحلات ..
 
نروح للالعاب ..
 
 
 
 
نظامها تعبين كرت بمبلغ معين وكل لعبه سعر في العاب 6 او 5 ليره هالمحاري والعابها متنوعه في للصغار وفي للكبار ..
 
 *الاكل*
 
المطاعم عدوا خربطوا متروس غير الاكشاك وفي سطرة مطاعم برا ..
 
اللي جربناه بساحة المطاعم ..
 
اسمه : citirusta
 
            الذ كباب بالروب ذقته  فيه..ومن عقبه قمت اي مطعم اروح له بتركيا اطلب هالطبق بس مو مثله اهو التوب فيهم  ..
 
 
**وفي بعد سينما بس مادشيتها ..
 
هذا بوست مختصر جدا عنه مثل ماقلت فوق ماصورت وايد ..
 
Saturday, August 8, 2015
ع شهر 12 العام رديت اتعب :( فكلمت اخوي بداية السنه اذا يقدر يسفرنا باخر شهر 1 لانه صج كنت محتاجه اغير جو ..
 
والحمدالله رضا ..
 
اخترت اسطنبول وكانت اقامتنا بهالفندق Nidya Hotel Galataport ‏..
احنا نسميه ناديه :)
 
واقامتنا كانت 5 ليالي .. 
 
اهو 4 نجوم ..
 
واخترته لانه تعبت وانا ادور ولما سالت ولا زميلتي مجربته وتمدح ..
 
هذي واجهته ..
 
هذا اللي جباله ..
محطة الترم ورا هالمباني البسفور ..
 
وهذا الصوب 2 ..
 
 
* الاكل بالفندق *
 
حجزنا كان شامل الريوق ..
 
وكان بوفيه ..
 
اكثر شي حبيته وكنت احلي فيه كل يوم فنايين البسكوت واحط معاها كراميل او فول سوداني وجنه في مربى او عسل ..
 
واحط فوقه كورن فليكس ..
 
وهذي كل اصورها خلية عسل << انا مسميتها جذي ماعرف شسمها !
 
الريوق ككل زين مو وواو ..
 
واول يوم ماتعشيت بالمجمع فطلبت من مطعم الفندق لي ولخواتي سيزر وكلوب ساندويش وتحت الصحن مخشوشه شوربه ..
وكان اقل من عادي ..
 
*الغرف *
 
حجزنا غرفه ثلاثيه ..
 
كانت شرحه ونظيفه بس احنا مختارين لغير المدخنين :\ وعطونا لمدخنين لما كلمناهم قالو لنا بدال الغرفتين << الغرف ال2 غرفه اخوي بيعطونا سويت اغلى بجم 100 يمكن 500 ماذكر اذا ليره او يورو ..
 
لما رحنا له ولا صغير وعشان نصعد له ناخذ اصنصير وعقب نصعد دري (درج) خارجي وفي قطوه استقبلتنا ! فقلنا خلاص خلنا ع غرف المدخنين ..
 
 
 
رايي فيه ككل :
 
-الاكل:
 
 زوين مو وااو يعني تصبيره بس ..
 
-الغرف :
 
زينه ونظيفه ومو صغيره ..
الحمام وانتوا بكرامه مافي شفاط - هوز- اسونده- خرطوم !
 
-الفندق :
 
ككل نظيف ومرتب ..بمنطقه هاديه وامان مره نسينا نصكر الخزانه اللي فيها فلوس (التجوري ) وماحد جاسهم الحمدالله .. عقب ال١٠ هدوء بالشارع كله يمكن مره بس قعدت ع ازعاج وماطول ..
 
-الواي فاي :
 
زين اول يومين كان ممتاز بالغرفه ومافي تحت عقب صار العكس خخ كلمتهم دزولي المختص وقالي المشكله بتلفونج !
 
في شي يمه ع طول ؟
لا بس حيل قريب من البسفور وفيه عبارات تودي لجزيرات ومناطق 2 ورخيصه ..
يم كارفور صغير بينهم جم مبنى ..
وراها تقسيم مانطول بالتاكسي ان كثر 5 دقايق ..
بس مشي ماشفت شي لازق فيه الا كارفور وكافيه والباسفور ومو يمه اغلب مباني بنوك وغيره ..
 
سعره :
مناسب ..جنه الاقامه كانت ب170 وشي دك مو متاكده ..
 
 
 
 
هني صفحتهم في سايت booking  link












 







Friday, August 7, 2015
كل سنه يهبون بصوص معين للحلو اولت العام هبوا بالنوتيلا عقب البيستاشيو(الفستق) وهالسنه اللوتس ..
بالنسبه لي ماهب معاهم :\ اشوف زحمه عليه وتخلص الكميه ويدورونه وعادي الوضع عندي مستقر !
لي رمضان كنت بالافنيو وكليت  @melenzane.me 
وطلبت وخلصت لما كنت بسكر المنيو جان اشوف صورة الجيز كيك وشدتني وقلت لاختي نطلبها ؟! قالت اوكي ..
وصلت ..
ماتوقعته لذيذ هالدرجه ماشاءالله حبيناها انا واختي ..
المره ال2 بالعيد كنا رايحين الحمرا وتغدينا بنفس المطعم وطبعا طلبناه واحنا ناكل واختي تقول قصايد فيها شوفي تناسق الالوان والطعم بسيط خفيف خفيف بسيط خخخ ..
منهم حبيت هالكيكه وجربت غيرها من الانستغرام بس مايازت لي :\
وسعرها اعتقد بحدود 3دك اذا ماخاب ظني ..
وهذا اكاونت المطعم بالانستغرام   @melenzane.me 
افرع المطعم :
الافنيو - الحمرا -البدع ..
Thursday, August 6, 2015
 
العام هالحزه تقريبا نزل Christian Louboutin مجموعه من اصباغ الاظافر ..
 
اشهر لون اذا ماخاب ظني الاحمر اللي اهو يستخدم بقاعة كعوبهم وانتوا بكرامه ...
 
وعقبه احس النيود ..
 
اللي جربته اهو الاحمر مو لانه الاشهر ! لا لانه لوني المفضل للاصباغ ..
 
هذا شكله من برا ..
 
 
 
طبعا انا ماكنت حاطه بالي اني اشتريه يالي هديه :) انا كانت مخططه اني اروح سبا واسوي اظافري وعقب اجربه هناك ..

المهم هذا شكله اذا تبطل الغرشه صغيره والمغطاة كبيره :|
 
هني اول تجربه كانت باخر شهر 3 مع اني وصلني باخر شهر 2 :\
 
وهذي 2 تجربه قمت اعتمده للمناسبات ..
سعره :
 
19 دك جنه ..
 
متوفر :
 
بالبوتيك بالصالحيه وبعض النيلز سبا ..
 
رايي فيه :
 
لونه حلو كافي انه احمر ..
 
الطبقه 1 زينه بس افضل انه تكون 2  ..
 
ماينشف بسرعه عادي حاله اي صبغ 2 ..
 
عادي يتقشر بنفس اليوم :\
 
سعره اوفر بس اهو ع اسمه مو جودته من جذي كنت بجربه سبا وهم لونه متوفر بارخص الاسعار باغلب الماركات والاصباغ العاديه ..
 
شكله حلو جنه تحفه بس نفس الوقت الراس وايد طويل يغث بالحط ..
 
حلو كهديه مع فاوتشر سبا للاظافر اذا تبين هديه بسيطه بحدود 40 دك ..
 
امم اذا من عشاق الاصباغ بيكون اضافة حلوه لمجموعتج عاجبني شكله خخ ..
 
 

Wednesday, August 5, 2015
 
 
يوم السبت اللي فات دزت لنا مرت ولد ولد عم ابوي :)  بوفيه  على سلامة اختي ..
 
كان شامل كل شي ماشاءالله ..
 
 
4 سخانات 2 مقسمين و2 كاملين ..
 
مرقوق..
 عيش + دياي بالصلصه وفي معاه جدر صغيرون في دقوس ..
رولات بالكريمه + كرات البطاط ..
 
معكرونية + هالطبق غريب سبجاتي فوقه رولات البديان اعتقد محشيه سبغاتي وفوقها دياي بالقسماط ..
 
انا ماكل بديان بس عجبتني الفكره ..
 
 
سلطات نوعين ..
هذي اعتقد الجرجير ماذقتها لانه ماحب الجرجير ..
 
 
وسلطة الناتشوز وكانت زينه :)
 
 
البوفيه كان شامل السيرفس يت مندوبه ضبطت السفره(ومعاها كان الصحون والقفاش والشواك والمفارش الصغار تحت الصحون) + الزينه وحطت الشموع وشبتها وضبطت كلشي وراحت ..
 
وهم معاه كرتون بيبيسي ..
 
رايي :
 
الاكل ككل زين عجبنا اغلبنا ماشاءالله وامي عجبها المرقوق ..
 
والبوفيه من :

 bofehalmasah


^^^ اكاونتهم بالانستغرام ..
 
 
اكرمج الله ام عبدالله :*
Tuesday, August 4, 2015
 
السلام ..
 
عوده متاخره للتدوين :)
 
وبوست بيوتي عن اخر الهبات بالمكياج حاليا واهي حمر بوب كلور ..
 
واهي ماركة امريكية  اكثر شي شفت البنات يطلبون منها شدوات وحمر..
 
لانه غرامي الحمر شفت هالست بالانستغرام وعجبني سعره فطلبته ..
 
في ست الوان طبيعيه وست غوامج اغلبه ..
 
 
اخترت الغوامج ..
 
اسمه : Forget The Fruit Cake
 
 
في 6 حمر ..
 
4 مات و2 قلوسي..
 
 
الحمر المات اهما :
- Cookie  ولونها نيود ع بيج << واهيا بالصوره اللي بالنص اول وحده من اليمين وال2 هم اهيا بس مع الخلط لانه طلعت فاتحه علي فاستخدمها للخلط ..
-Lady  ولونها مدوعم يعني ع ادعم يعني بني :)
-Tutu لونه بنفسجي ع محومر  ماعرف اوصف الالوان خخ  << اهو ال3 من اليسار بالصوره الاولى ..
-Lady << مكتوب انه بورغندي burgundy  ..
 
رايي فيهم :
 
قوامهم حلو وخفيف و لونهم غني واضح ماشاءالله  وثباتهم زين..
 
عيبهم الوحيد :
 
حسيت شوي نشفوا شفايفي ..
 
اما الحمر القلوسيه فاهما :
 
- Confetti >> حمره لونها اينننننننننننننننننننننننننننننننننننن ماشاءالله  اهي قبل الاخيره بالصوره الاولى ..
-Tuxedo << لونها وردي فاقع  وردي باربي واهيا ال3 من اليمين بالصوره الاولى ..
 
رايي فيهم :
 
جربت الحمره لونها حلو ماشاءالله وغني بس عيبه نفس المات شوي تنشف  + تسيح وبنفس الوقت لونها ثابت ازي بعرفش !
 
طلبتهم من هالاكاونت @tulips.love.lashes

اسعارها مناسبه + بنفس اليوم وصلني + اسلوبها زين ماشاءالله :)
سايت الماركة : link

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads