Wednesday, September 2, 2015
ماكنت بكمل بس لانه في ناس الحمدالله استفادت من المعلومات وناس تسال تبي تعرف اكثر فبكمل جود افيد احد بعد اهم شي وحده تشجعت مني وسوت العمليه والحمدالله تبارك الرحمن الله يتمم عليها شفاها وسوتها عند د. باسل << دكتوري ..
 
مالكم بالطويله ..
 
اممم وين وصلت اي ليوم موعدي تحديد ب3-8-2014 ..
 
رحت موعدي ! طبعا ماعندي هدوم كبري حتى لقنزي صار حيل وسيع علي بس الله يسلم العباة..
ولانه تاخرت شوي فدشت حاله قبلي لما وصلت خلوني اقعد بالغرفه اللي يم الدكتور وفيها ميزان ..
رفيجتي قايست وزنها جان ارتز واقيس وزني معاها!
وانصدمت انه وزني صار ٤١ !
يعني ٩ كيلوات مطيحه!

الدكتور اول ماشافني قال جنج ضعفانه قلت نزلت ٩ كيلوو !
عاد شرحت له شصار لي وقلت له عن حالتي وانه ريولي ثقيله غصب احركها ..
جان ينزل ويمد ايده انا حسبالي بيشوف ساقي!
ولا يقول لي دوسي ع ايدي جنج تدوسين بريك مادري بانزين مااعرف بهالسوالف مااسوق المهم واي فشله :/
المهم خلصنا والحل اهو انه بيحولني مستشفى مبارك اسبوعين لي ١٠ ايام مغذي بالوريد عساس ارتفع وعقب يسون لي منظار توسيع بس هالمره نفخه مادري بالون ..
قالي تقدرين تروحين اسبوعين قلت اي قالي يناسبج الصبح قلت اكيد!
وعطاني ورقه باسامي الدكاتره و رقم الجناح وقالي اذا وصلتي كلميني ..
رديت البيت نمت ريحت شوي عقب يمعت اغراضي وتسبحت ودخت بعد خخ وعلى ال٧ طلعت من البيت ..
 
*مستشفى مره 2 :\
 
رحت الطبيب اول شي كنت امشي عادي عقب جان ادوخ الدكتور اذكر كان اسمه د.فهد (وايد مريح بالتعامل ) يكلمني وانا اقوله ترا دخت وياب لي كرسي وعقب نزلنا واكمل اجراءات وطبعا مال الرسبشن استغرب اول شي امشي عقب بكرسي يدزوني !
المهم انا اول ماوصلت كلمت الدكتور باسل واهو كلم دكاتره الجناح ..
خلصت ورديت الرسبشن الجناح في دكتور كان يكلمهم عقب لف علي قالي تبين غرفه خصوصي قلت اي ؟ عاد كلمهم يودوني ولا عمومي خخ ..
انا حسبالي بيودوني خصوصي ع طول راهيه ..
المهم قعدت ع كرفايتي ولا مافي مخده قلت ايبولي وعقب ودوني اسوي تحاليل وحطولي ابرة المغذي بس ماحطوا جياس المغذي ..
 

الصوره من النت نفسه بس انا مخيطينه برقبتي والبلاستر اثري كان :\
 
عقب اعتقد ع ال١١ او عقب اذان الظهر يولي ركبوا الجهاز (مغذي بالوريد )برقبتي ..
وقبلها كانوا حاطين ويرات بجسمي نفس ملوت تخطيط القلب ..
طبعا واهما لبسوني هدوم العمليات وقالوا قسطره !
انا اتصرقعت طبعا انا بمكاني ماقمت ..
المهم يابوا روب عمليات ٢ وغطوا ويهي فيه ! عطوني ابرة بنج موضعي وبلشوا تركيب الجهاز واهما يركبونه انا كنت عادي بس فجاءه شفت ابره وخيط جدام عيني ! سألتهم هذا لشنووو! قالي نثبت الجهاز ! اهني بلشت احس فيه واهو يخيط اقوله احس بالابره ! يقولي قاعد ازيد البنج قلت له ترا مافرق شي ! فجاءه البنج اختفى !
المهم ركبوه بس ماحطوا الادويه نطروا يسون لي اشعه يتاكدون انه مثبت صح ..
يا مال اشعه لي للجناح وحط نفس لوحه وقالي انسدحي انسدحت عليه جيك قالي اوك كان معاها سستر وصلته وراحت ! الحين بقوم عن الجهاز شلون ! بروحي مااقدر متشجنه من المغذي اللي برقبتي ! مالقيت احد يقومني الا مال الاشعه ! الشكوى لله ! لا وقاضبه ايده من صوب الجم يعني مايجوز ! استغفرالله ..
صار المغرب بلشت ايوع ماحطوا الادويه بالمغذي وابره برقبتي وابره بايدي :/ كلمت الدكتور قالي شوي ويركبونه . .
ناديت السستر قلت لها يوعانه :/
اخر مره كليت الفير بسكوت مالح لا ونتفه بعد ورجعته وانتوا بكرامه ف حطت لي مغذي بايدي تقولي عشان ماتقولين يوعانه وعقب ركبوا الادويه بالمغذي الاساسي بالوريد بس متى ماذكر .اللي اذكره العصر غيروا جناحي العمومي لي ٢ هم عمومي وبالليل ع ١٢ فجاءه انفتحت البرده ودشوا سسترتين عندي مع ظلمه الوضع رعب لا ودعموا الكرفايه (السرير)  لين قلت بس ! حزتها كنت متشنجه من الجهاز وعطشااااااااااانه حدي جني باذله مجهود راكضه الساعه ١٢ الظهر بالبر وبالعه فوطه :/
المهم عدت ..
في ٢ يوم رحت الحمام وانتوا بكرامه طبعا مغذي بالوريد ماينشال نفس العادي حطوا الادويه بعصايه او حامل اخرها تواير علبو لما اتحرك اسحبه معاي ..
المهم بطلعتي من الحمام دخت فجاءه الدنيا سوده :/ مادري منو اللي حاط كرسي عادي يم الحمام خذا فيني اجر قعدت عليه انطر اختي تخلص شافتني سستر هذي فلبنيه وحامل بس عجيبه وشاطره ماشاءالله كذا موقف صارلي معاه خلاني احبها اول موقف هذا 👆 يتلي ولما درت اني دايخه يابت لي ويل تشير(كرسي متحرك) ودتني للجناح وطبعا مغذيب تليته معاي وصلت للكرفايه جيكت ع ضغطي والسكري ولا كلشي اوك ! #الحمدالله ..
قلت ابي الدكتور اقصد دكتور الجناح مايالي بس قالت لي يقولج اكلي جان اسايره اقول شنو مالح ولا حلو ! قالت مادري قلت لايي كيفه بس قوليله انا مااكل اساسا !
المهم عقب يالي دكتور باسل وقلت له دكتور عادي اكل حلاو ولا علج شي ماينبلع بس نفسيا احس اني اكل قالي اكلي اي شي مايتعبج ويخليج ترجعين مانبي المعده تتعب وتزعل ! وانا بقلبي تزعل ! اهي بتموتني خل تزعل خخ ..
وقالي تمضمضي بالماي اذا عطشتي ..
المهم نظامهم : قبل ٧ يمرني دكتور الجناح ٧ وشي قروب الدكاتره االي يتعلمون علينا ! ع ١١ ايلي دكتور باسل وهذا الوحيد اللي كنت انطره ..
السسترات ايون لي الصبح والعصر وبالليل والفير ع ٤ وغالبا يسون لي تحليل هالحزه ..
اللي مره قلت للسستر بطلع ايدي من الكفر لا تقعدوني خخ.
 
والظهر كل يوم وترك ابره ع خاصرتي نفس اللي كنت اخذها بالمستوصف ..
والعصر يولي قالولي ب٢ يوم لقينا لج غرفه خصوصي جان اقول صج Ilove u للسستر ..
ودوني الغرفه انا ع كرفايه هالمره مثبتين المغذي بالكرفايه وكنت كاشخه بيجاما تايغر وفوقها بليزر 😂
المهم وصلت الغرفه جني داشه الجنه عسى الله يرزقنا الجنه من غير حساب او سابق عذاب امين ..
الهوى غير كلشي غير كافي الخصوصيه ..
كنت موقايله لاحد اني داشه المستشفى فكان الوضع اريح من السيف ..

 
وبلشوا ايبون لي اكل اتوقع ٢ يوم بدوا شنو استانست مو لاني ميته ع اكل خو باكله ورجعه وانتوا بكرامه ! بس وجوده يحسسني اني انسانه طبيعيه اول جم يوم كنت استانس فيه بس عقب لا لانه طعمه ضيم مع انه شغلات اللي احبها مثل مولوخيه وبطاط مهروس وكريم كراميل ومشخول (عيش ابيض) كلهم احبهم بس طعهم مو حلو بس كنت احب الجيلي لانه كان لذيذ ..
والموظفه اللي توزع الاكل لاحظت اني مااكل بس ايمع القفاش الفاكهه والتوست :/ جان تقولي ليش ماتاكلين قلت لها ماحبيت الا الجيلي جان تقولي في وتروح تيب لي كسرت خاطرها خخ ..
اختي الكبيره يبت لي ثلاجه صارت متروسه جيلي :/
 
مواقف عامه
المهم من اكثر المواقف بس مالها شغل بمرضي كنت مو حابه اكون بالمستشفى وبعيد ميلاد اختي يصير اهي ب٧-٨ وانا دشيت المستشفى ب٤-٨ فدورت لها كيكه بالانستغرام ماعجبتني الاسعار كيكه ب٦٥ ! قلت لرفيجتي قالت شوفي كرمز كلمتهم واتس اب ماردوا قلت لرفيجتي جان تتصل عليهم هم ماردوا قالت لي عقب الدوام امرهم بعد عمري ماقصرت الظهر دزت لي صورة انها طلبت الكيكه ودفعت بعد كنت بزنط عمري بالمغذي :/
 
 
المهم جان اقول لرفيجتي ال٢ مايخالف تشترين هديه لفجر بعيد ميلادها اعطيج كرتي البنك وبالمره اشتري لج هديتج كل اللي احبهم مواليد برج الاسد خصوصا شهر ٨ !
واشوه يابت لها واستانست اول مره اشوفها مستانسه هالكثر ،.
والحمدالله عدت .،

 
 
حطيت صوره الكيكه باكاونتي واهما يدرون اني بالمستشفى فدزولي هالبوكيه بعد جم يوم وحبيت الكلام المكتوب ع الكرت ومامداني حطيته بالانستغرام كليت شويه من وحده بخشها جان تطيح تفلش خخ ..
 
*"السستر والمغذي *
 
المهم مر بسرعه الوقت اغلبه ركود لازم اتحرك اذا نمت بدون لا امشي بالجناح احس جسمي متكسر الدكاتره يقولون لي امشي مانشوفج تمشين قلت افتر مرتين الساعه ٣ و الساعه ٩ او عقب عساس يكون فضى الجناح !
ع طاري يفضي الجناح اول يوم بالغرفه الخصوصي بنام مو قادره انام واقوم ! الغرفه اللي يمي يتهاوشون زوارهم مع بعض! وقته ولا مكانه تهاوشوا ب بيتكم !
يتلي الدكتوره قلت لها مو قادره انام منهم سكتتهكم ونمت اشوه ..

 
اول تحليل كان كلشي منخفض الا البروتين عقب جم تحليل البوتاسيم مازال منخفض قاموا يحطون لي جياس بوتاسيم بالمغذي ،.
والعاده جيسين ادويه مو اكثر مره يت سستر ذكيه وحطت لي بدال ال٢ خلتهم ٣ يعني زاده واير ع رقبتي مامداها طلعت الا انعفست احس الماي يصعد لي مخي وجسمي كش يلدي جني بردانه المسام بارزه ! بنسدح مو قادره بقعد هم مو قادره !
طقيت الجرس مايا احد خليت اختي تناديهم تقول اشر ويحقروني خليت رفيجتي تروح لهم جان تحكر وحده وتيب لي غصب !
ع حظي طلع حزة تبديل شفتات الممرضات واللي يت لي مسلمه متحجبه وعربيه تقولي بس خلص شفتي :/ بسكر المغذي وخليهم عقب يشوفونه لج ! هذي ملاك الرحمه ولا ملاك الموت !
المهم عدت تساهيل من رب العالمين ..

ع طاري المغذي شفتوا هذا اللي بالنص اللي عليه قصدير ترا هذا لافينه بقصدير عشان مايصير يمتص الاضاءه او يحوشه نور !
مافي تقنيه احسن من القصدير !
المهم شفتوا اللي مايحوشه نور ! انا طلعت فيه بالشمس :p والظهر بعد ..
مره قلت للدكتور ابي تقرير للعلاج بالخارج عساس اذا الله لايقول ماصرت زينه خلاص اخر حل العلاج برا مدام جربت كل الحلول هذا مع اني ماابي علاج برا ! المهم قالي تحت يسون تقارير دزي اختج تطلبه ..
قلت لها راحت جان ترد تقولي مارضوا لازم امي او ابوي وجنه امي مع اثبات ماذكر اذا عقد الزواج او شهاده الميلاد و يدي او يدتي ! او المريض اذا كان ذو اهليه ..
نزلت اسويه طبعا انا المفروض ماطلع من الجناح بس نزلت بيجامتي المشمشيه اللي مقاس امي يعني ساتره مع ملفعي ولوني الاقحواني وطبعا المغذي و عدته وحزتها كانوا حاطين لي المغذي اللي مايصير يحوشه نور ..
وانا امشي وناس تطالعني يعني مريضه طوفوا !
المهم خلصنا جان اقول لاختي وين الفرع قالت يم الباب انا حسبالي من داخل اثر برا ونزلته مكسره ودري وصعبه حسبالكم هونت لا كملت وانا امشي واختي تساعدني بالمغذي واسمع اختي تكلم بس مو معاي لفيت ولا وراي سستر عند الباب تناديني كم باك وانا طاف كملت ودشيت الفرع واقعد امشي واخمط من زمان مو طالعه ! وفرعهم ضيج مايكفيني انا وعدتي بس هم عادي ..
انا نازله ابي كريم ! اول ماوصلت قسم الكريمات وقاعده انقي جان اسمع احد يقول كاهي لفيت ولا ٢ مجبلين علي نعم ! حلاته اعطي اختي المغذي واقولها و ركضي ! خخ بس ماكانت يمي !
قالي الكبير يبا مايصير جذي تطلعين انتي مريضه ! قلت له السستر لو اناديها ٧ سنين ماتيلي بس حق التفتن ماشاءالله دايركت !
قالي يبا انتي باي جناح قلت ١٨ جراحه حسيته انصدم ! ومايصير تطلعين وبلا بلا باا ماذكر شقال ،،
قلت اخلص وارد قالولي ماتشوفين شر وراحو ..
حاسبت وطلعت ..

ومره كنت امشي بالممر وكانت الممرضه الفلبينيه اللي احبها بالرسبشن بس ماكانت ضمن حالات اللي تتابعها اليوم وانا امشي اشوفها تطالع المغذي جان تقولي لحظه ترا المغذي مايشتغل ! وسوته لي ! من جذي احبها ..

ومره لانه مااشتغل بدال لا الادويه تدش بجسمي دمي ترس واير المغذي حزتها كان الدكتور مو دكتور باسل دكتور الجناح يفتر ع حالات بالجناح وانا افتر ادور احد يشوف شسالفه المغذي :/ صادفته عند غرفتي قلته جان تقول السستر هالمره هنديه اللي قالت لي عن غرفه الخصوصي انا اسويه وتشرح لي جان الف للدكتور اقوله شلون الحين ! اخر شي يت السستر وسوته لي ..
هذي صورته مع المشمشي خخ ..

ويا الدكتور باسل بيوم من الايام اتوقع ب٢ اسبوع وقالي موعد منظارج بيكون الاحد ان شاءالله ب١٧ الشهر عند الدكتور جابر العلي جان اقوله لا ابيك انت تسويلي ! صراحه مااثق باحد غيره ! رد قال انا ماسويها ..
اللي ريحني انه ساله عن احسن دكتور لمرضي قالولي جابر العلي وجم دكتور غيره بس ماذكرهم ..
انه اختاروا ١٧ اقرب تاريخ لانه طقت جبدي من المستشفى ولانه لازم بين منظار وعمليتي الاولى شهرين ع اقل فب١٧ بيكون شهرين الا ٥ ايام ..
 
وقالي مدام مليتي تقدرين تطلعين وتردين بيوم العمليه للمستشفى بس مارضيت مالي
 خلق لويه وانا معتمده ع مغذي اخاف اطلع انتكس ..
وكان الوضع اوكي قاعده اشوف تحسن بجسمي صج لازلت ارجع بس شكلي بلش يرد نفس قبل الحمدالله ..
بيوم الخميس الفير يعني قبل العمليه ب٣ ايام تقريبا كنت بالحمام وانتوا بكرامه اتيدد للصلاة (اتوضا) فجاءه رجفه بريولي ال٢ ! ماهتميت كملت التيدد ولا الرجفه توصل لايدي! طاف كملت لا الوضع مو طبيعي الرجفه وصلت راسي !
طلعت من الحمام وانتوا بكرامه طبعا عقب ماخلصت التيدد وناديت اختي بشوفها قاعدها لماردت قلت لها تعبااااااااانه قالت ريحي قلت اصلي اول مو ضامنه عمري اخاف انسدح وتروح علي نومه! قالت صلي وانتي قاعده لا تعبين اكثر !
قلت لها اوك ..
جان اقوم اوقف واقول الله اكبر واصلي واقفه خخ احس اختي انصرعت حزتها !
المهم انا كنت اصلي قاعده اذا بسجد او اركع اقعد ماقدر اسجد بالقاع اخاف ينشلع الجهاز اللي برقبتي :/
خلصت رحتي انسدحت ونادينا السستر يت قالت شفيج ماتكلمت بس قلت لها شوفي الرجفه بكل جسمي شي موطبيعي حطيت ايدي ع راسي مو قادره اثبت ايدي ولا راسي ! جان تشيل وايرات الدريب عن الجهاز بس الجهاز تم مثبت !
 
(اشوه الحمدالله ماطلعت .. طولت صح .. اكمل لكم عقب ان شاءالله باخر جزء قبل العمليه و العمليه ... يتبع )

5 comments:

Sh5abe6 said...

الله يشفيج يا اخت

Anonymous said...

إجتهدي بالدعاء و إستغفار .. وقرآءة القرأن و خصوصا الفاتحة بالنفث علي (اليد ) و مسحها علي صدرك و الجسم .. ولازم تكوني مؤمنه بأن القرأن هو علاج شافي بإذن الله

Anonymous said...

https://www.youtube.com/watch?v=QzuykfcldrE

Lulwa said...

ما تشوفين شر يارب، الله يشفيج ويعافيج ويرفع عنج..
بشرينا شصار عليج؟

رورو الشخبوطه said...

هلا لولوه ..

الشر ماييج وامين يارب جزاج الله خير ..

الحمدالله :)

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads