Thursday, September 30, 2010
السلام عليكم ..

بنات تذكرون قبل اسبوع نزلت لكم بوست عن صبغ الاظافر اللي ع شكل قلم كاهو موجود (هني)...

رفيجتي توها راده من امريكا وعندها منه عاد يابته لي اجربه ..

جربته مرتين اول مره انا سويت لنفسي شخبطت ع اظافري والمره ال2 اهي سوت لي ..


هذا اهو اللي جربته المخصص للرسم ..


وهني رقمه ولونه ..

وريشته جنه قلم شيني احلى من مالي اللي كلمتكم عنه من قبل ..


وهذي النتيجة :

حبيتها ماشاءالله حلوه :)

ورايي بالمنتج :

*مميزاته :
-سهل بالاستخدام ..
-ولونه واضح ..

*عيوبه :

-بسرعه يروح :\ يعني مثل الصبغ الاسلامي يتقشر :\  وهم ينمسح بالماي :\s

وشكرا صديقتي :)
Wednesday, September 29, 2010
السلام عليكم ..

هالبوست كل مابنزله   ادوخ بنام :\

قبل جم يوم شريت لي فرشاة يديده وشكلها غريب بالنسبه لي ..

هذي صورتها..


وهني بشكل اقرب..


وهني لما فتحتها زووم ع راس ..

هني بشكل اوضح مع الشرح

رايي :

لما شفتها استغربت من شكلها بس لما شفت الصور التوضيحية عجبتني فكرتها لكن لما جربتها كرهتها :\ :

- شعر الفرشاة صلب مو مثل الفرش العاديه لا اقرب للبلاستيك احس هالشي قاسي ويضر الاسنان :s
-طريقة استخدامها صعبة جربتها اكثر من مره ماعرفت لها :(

اللي حابين يجربونها تحصلونها بدايسو ..

وسعرها ب600 ..

واسمها فرشاة الاسنان المائلة ..
Monday, September 27, 2010
السلام عليكم ..

قبل اشهر كتبت لكم عن الكوكيز اللي جربته واحبه (هني)...

وهالمره بقولكم عن عشقي الفوندو ..

الموضوع بيكون خلاصة تجاربي الفوندية :)

(1)
جوكلت بار..


اهو اول فوندو جربته بحياتي هالحجي تقريبا بنص 2007 وحبيته ..

ميزته :

1-انه اكثر من نوع ككاو(دارك ,عادي بالحليب , الابيض "الحليب") ..
2-انه التغميسات ماعرف شسمهم بالضبط متنوعين وتقدرين تضفين اللي تبينه احنا ضفنا خدود البنات ..

عيبه:
اخر مره جربته الشهر اللي فات طعم صلصات وخصوصا الكاكاو بالحليب مخترب طاغي عليه طعم الحليب او ضايفين عليه حليب محلى مادري المهم انه طعمه مخترب :(


سعره :
تقريبا ب6 او 6 الا 100 شي جذي ..
التغميسات الاضافيه الصحن بنص ..

اماكن توافره :

بكل افرع جوكلت بار (البدع , المارينا ,الافنيوز << هذيل اللي اعرفهم مادري اذا في غيرهم او لا)

(2)

باسكن روبنز ..

اهو غرامي كتبت عنه اكثر من مره قبل هذا اول بوست عنه (هني)..

مميزاته :
- حجمه راهي ..
-سعره رخيص..
-تغميسات متنوعه (واشكال وانواع برد ,فواكهة "كيوي -فراولة موز والخ" وكيك نوعين فانيليا وبراوني) اهو الكيك ساعات يكون يابس بس لانه بارد نطروه شوي بيفج ويكون حلو ..

عيبه :
اممم انه مو متوفرع بكل افرعهم ..

اماكن توافره:

اللي اعرفه بالمارينا مول وبلولو هايبر الري ..

سعره :
الحجم العادي اللي مثل الصوره ب4 ..
والكبير ب6 ..


(3)

هاجن داز ..


مادري مو مميز بشي يعني مثل مال باسكن كفكره لكن باسكن ارخص والذ ..

سعره :

جنه ب7 او 6 ماثبت ع السعرلانه كنت طالبته مع براوني وماي طلع ب11 جنه :\

اماكن توافره:
اتوقع باغلب افرع الكافيه وعن تفسي جربته بالافنيو ..

(4)

كاكاو كافيه ..

 الحلو فيه :

-انه في انواع واحجام ..
-التغميسات بناء ع اختياركم جربت كيك الفانيلا وحبيته وهم الكوكيز لذيذ ..


اسم النوع اللي اخترنا ..
 الانواع المتوفره والتغميسات ,,


سعره مثل ماهو موضح بالصوره : ب6

متوفر :
ب360 ..

واي اشتهيته خخخخ ..

وين بعد في فوندو؟؟ غير اللي بمطعم فوندو؟؟

وشنو احلى فوندو جربتوه ؟؟


Sunday, September 26, 2010

السلام عليكم ..

امس اتصلت احجز موعد عشان اسوي اظافري بس طلع عطلتهم الاحد قلت لاختي قبل لااسكر منهم التلفون جان تقول الحجيه لا اذا تبين نبطل عشانج وكنت احاتي هالشي قلت معقوله واخاف المديره ماتدري :\

ورحت اليوم واشوه موجوده وبعلم البق بوس مالهم :)

بس شنو وناسه لما يكون الصالون لج انتي بس خصوصي خخخ..



هذي صورت الصالون ماخذتها من الفيس بوك ..

وهذا منيوهم مال البديكير والمنيكير وفي بعد عندهم شغلات 2 مساج وتركيب اظافر وازالة شعر والخ ..

انا خترت سبا منيكير وبديكير ..
وهذا اللون اللي اخترته ..



وهذا اسمه ورقمه ..

مادري شفيها ايدي اهي اهي بس لاتدققون اللون عجبني ولمعة حلوه ماشاءالله اول مره اجرب هالماركه ..

واخر شي حطيت استيكرز ع اظافري .. اهني ايدي احلى مو ؟؟

وخذيت لي شحاطة لانه جوتي مسكر وانتوا بكرامه بس بفلوس مو فري :\

اسعارهم :

المنيكير : 8 د.ك ..
البديكير :10د.ك..
الستيكرز الظفرين بنص ..
والشحاطه دينار ..

رايي :
-اسعارهم زينه .
-الخدمة زينه وعجبني انه فتحو مخصوصا لنا :)
-النتيجة عجبتني سواء صبغ او قص او تريتمنت والشغل من ظفرج لي ركبج هذا بالنسبه للريل والايد لي الكوع في اماكن 2 بس لي الكف والريل يكتفون بالقدم بس :\
-وحبيت اللي سوت لي اسمها ريكا :)

وحاليا عندهم عرض للمنيكير والبديكير العادي بس من 9 صار 5 دنانير ..بس حسافه اللي سويته ماكان شامله العرض اهي اهي خخ..

عنوانهم :
السالميه , ق 9 , شارع بغداد ,عمارة 703
تحديدا :



رقمهم :

25755024

وصفحتهم بالفيس بوك :هني


وياحلات الدلع

ومرسي اخيتي ع تصوير اغلب اللقطات :)
Saturday, September 25, 2010
السلام عليكم ..
 
لاب توبي تنح ساعتين الا ربع اعابل فيه عشان انزل البوست وماكو ماقدرت الا لما غيرت الجهاز اهي اهي ..
 
المهم اليوم رحت سيتي سنتر وكان بالي اجرب جم شغله منهم ستك هاوس..
 
 

واهو برد ايطالي عرفته من الفيس بوك ..



اللي يميزه انه نكهاته متنوعه وطبيعيه ..

نكهات المتوفر :

نقل من صفحتهم بالفيس بوك :



مانجا

فراوله

بلاك بيري ( توت أسود )

روز بييري ( توت أحمر )

رقي

ليمون ونعناع

كاكاو

فانيلا

حليب

باشن فروت

كيوي

أناناس

قهوة

جوز الهند

شمام

برتقال

نوتيلا

بندق

بيذان <<  اختي لما شافته بالكشك تقول بيذان وايطالي خخخ قلت لها اي اهما حاطين الاسم الكويتي منه ..

فستق

موز

رمان

خوخ

منتجات نص & نص
فراولة وأناناس

كيوي وأناناس

كيوي وفراولة

منجا وفراولة


وهذا طالبي ..

اخترت نوتيلا ..

تقدر تضيف على طلبك 4 انواع من المكسرات:

جوز الهند

بندق

حبوب القهوة

فستق

بس ماخترت منهم شي ..
وفي هم 4 انواع صلصه :

شوكلاته سوداء

شوكلاته

شوكلاته بيضاء

شوكلاته ممزوجة بمكسرات البندق ..

انا اخترت الكاكاو العادي ..
هالصورة  حبيتها :)

سعره :

البرد بس ب850 فلس ..

اضافة صلصة الكاكاو 100 فلس..

رايي :

طعمه حلو مع اني ماحب البرد وايد والعاده اذا باكل برد انطره يذوب بس هذا كليته ع طول وتقريبا كنت باكله كله بس ذاب وتلفني ..

وين موجود ؟؟

مثل ماقلت فوق بسيتي سنتر السالميه -السوق الحمر ..
 صوب المطاعم يمه مطعم الخباز ..

وهم عندهم توصيل هذا رقمهم :

25730010

صفحتهم بالفيس بوك (هني)
Friday, September 24, 2010
السلام عليكم ..

امس كنت بجولة كوكية بربوع منطقتي الحبيبه :) واكتشفت وايد شغلات حلوه فيها والاهم انه اختي اللي كنت تبي تشتري اغراض اخر شي انا اللي شريت واهي لا خخ..

ومرينا ماكس هالمحل احبه وايد والقى عنده سوالف حلوه باسعاره حلوه بس مو كل مره مرات اطلع خمه المحل ومرات اطلع ايد جدام وايد ورا ..

امهم لما كنت احاسب عطوني هالبرشور لبرنامج شكرا ..


وفكرته باختصار:
 تجميع نقاط وكل ربع سنه يكافئونك ع حسب عدد نقاطك اللي تعتمد ع قيمة مشترياتك , واهو قبل اسمه نادي الامتياز تبع سنتر بوينت ..

والحلو فيه :
-فكرته (أن برنامج "شكراً" هو طريقتنا للتعبير عن شكرنا لعملائنا الأوفياء) << منقول من المؤتمر الصحفي المنشور بجريدة السياسه على لسان الرئيس الإقليمي لمجموعة لاندمارك في الكويت سايبال باسو ..(1)

-انه كسب النقاط مستمر وديم حتى بفترة الخصومات والعروض ..

-تنوع الجهات المشاركة بالبرنامج , واتوقع نه شامل 7 دول حاليا حسب ماهو مذكور بالخبر بدايته بتكون في الكويت وعمان وقطر وعقبها اعتقد باجي الدول الخليج اضافة انه قريبا سوف يطرح هلبرنامج للمره الاولى بالاردن .. (2)

*الجهات المشاركة*

هي طبعا التابعه لمجموعة لاند مارك ..

 بشكل اوضح :

"ماكس" و"شوإكسبريس" و"نيولوك" و"كيرت غايغر" و"كاسا هافانا" و"سنتربوينت كافيه" و"جنغل فود كورت", إضافة إلى العلامات المشمولة سابقاً وهي "سنتربوينت" و"جونيورز" و"شومارت" و"سبلاش" و"لاف ستايل" و"هوم سنتر" و"بابريكا" و"بوسيني". (3)

وناسه اغلب المحلات المذكوره احبها :)
 
ولما كنت املي الاستماره ضحكت ع اجابات هالسؤال قلت لاختي باختار اني شيخه بس طبعا ماتهورت بالمستقبل احتمال اصير شيخه سهالات ماراح اسوي انقلاب لاتخافون خخ بس اخذ شيخ واصير شيخه :) الصبيان مايصيرون شيوخ مايصر احنا البنات سهالات خخ..
 

وهذي بطاقتي هي تكون ورقية مؤقتا لي ما ايمع 250 نقطة ..

ونظام تجميع النقاط يكون ع هالاساس :

أن البرنامج يتيح للعملاء الحصول على ما يصل إلى 12.5 نقطة مقابل كل دينار كويتي ينفقونه. (4)
ومن ورا لازم توقعون عشان ماحد يبوق بطاقتكم او يزورها :)

وسايت البرنامج بس بعده قيد الانشاء (هني)

الارقام (1,2.3.4) اهي معلومات نقلتها بشكل حرفي او بتصرف من خبر بجريدة السياسه (المصدر)



Thursday, September 23, 2010
السلام عليكم ..

هالاسبوع هابه بهالكيكة طلبته مرتين ..

اليوم و اول امس ..



اسمها:

انا سميها جوكلت كيك ..

الحجي يقول كراميل جوكلت كيك ..

وبالفاتوره مكتوب chocolate brownis..

سعرها بدينار ونص ..

رايي :

حجمها راهي كبيره كليتها ع 3 دفع واول مره مع رفيجتي ولي الحين ماخلصت ماشاءالله, وحلاتها تكون حاره بتصير الذ رفيجتي تقول حطيها بالميكرويف اقولها اطلعها من الدريشه وتذوب بالشمس وطلع صج يصير هالشي خخخ لما ارد البيت تكون الذ من الدوام , وشوي ثقيله لانه كاكاو وكراميل ..

 تحصلونها :gaudi cafe
عنوانه :شرق ,ش احمد الجابر , مجمع دار العوضي ,السرداب ب14 ..
تلفونه :22322733,  22474918



Wednesday, September 22, 2010
السلام عليكم ..

من زمان ماتكلمت عن الاظافر عندي وايد شغلات لهم بس ناطره اضبطهم وانزل بوستات عنهم ان شاءالله ..

وبجولتي المكوكيه بربوع قوقل لقيت هالصوره انصدمت منها خخ امبيه ايدي :\ مثلها ..



وصارلي فتره ادور صبغ لاظافر اللي يكون على شكل قلم ..

وماحصلت الا هذا بالسوق الصيني بدبي وجنه شايفه مثله بالكويت ..
وهذا شكله واهو مفتوح ماحبيت راسه احس صلب ع الظفر :\

وماعرف له عدل توني سويت الفن ا لسيرالي ع ظفري خخ صورته بس اخف تنظلوني :p


ووايد ماركات منزله نفس هالفكره اول وحده عرفتها وقاعده ادورها ابيه بمجمع او محل او حتى صالون مابي من النت لانه بجربها قبل لااشتريها اضمن ..

وهي سالي هانسن ..

راسه جنه قلم شيني احس وايد احسن من للي عندي  حلو للرسم ع الاظافر او الفرنش.. 


وفي منه الوان وايد هني ..

وهذا صبغ العادي بس ع شكل قلم هم احس اسهل بالاستخدم ومكتوب بسرعه ينشف ..

وفي منه الوان وايد هني  وهني ..



وتوني احوس بسايتهم حصلت ست فرنش مانيكير هم بشكل القلم وناسه ..

وهم في منه ا لوان وايد هني ..

والحلو بالسايت تقدرون تغيرون لون الصبغ وتشوفون شكله ع الظفر :)

جربتوا مثل هالنوعيه ؟؟ اذا اي من وين ؟؟

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads