Friday, September 10, 2010

السلام عليكم ..

كنت انطر رمضان يخلص عساس اعرف احكم ع مسلسلات والبرامج اللي نعرضت فيه خصوصا انه اغلبهم كنت ناطرتهم ..

(1)


زوارة خميس :
هالمسلسل الاغلب تابعه واتوقع لانه جو الاسري حلو <<هذا الشي الظاهر , غير انه ينعرض اكثر من مره باكثر من قناة..

تعالوا نحلله مع بعض:
الزمن والمكان :الكويت حاليا..

الشخصيات :
كثيره ومتنوعه واحس تشتت شوي..(خصوصا في اسامي مكرره :\)
1- ثنيان "محمد المنصور" الابو ل5 شباب وبنت وزوج موزه , الزوج المحب باول رمضان وعقب قلب من بنت ا بليس

2- موزه : (سعاد عبدالله) الزوجه المخلصه والام الحنونه والخاله الفريد ه من نوعها بس عيبها تنبش بزبالات وانتو بكرامه جناينها.

عيالهم + وزوجاتهم :

-سعود (خالد البريجي) يحب الحداق واحس مايعرف يتصرف كل بصوبه ولما يابلها خاتم امه هديه بعيد زواجهم بصوب وعليه كسرت خاطري :\

مرته امينه (مرام) اللي تهتم بعمره وستايلها بس لي ماخذ عليها من صالون لي صالون وصبغ اظافره طول المسلسل ماتغير :\ خخخخخ وتحب سوالف الاستقبالات والعروس والخ اكثر من اهتمامها بعايلتها ..

عندهم 3 صبيان و حامل بالرابع وخلص المسلسل بدون لا ندري شيابت :\هذا اساس اذا ولدت خخخ..

-احمد (مشاري البلام) : الملا او المطوع بو طقه ونص خخخخ ..

مرته تسنيم (ملاك) متربيه ع الدين حبيت موقفها لما قالت بتتبرج وعقب هونت لانه استحت من الله هذي ع قولة اختي المقتنعه بالشي .. ,<< بس استغربت لما قريت لها مقابله تقول انها خريجة شريعة @@ الفنانه بالصج ..
بس ضحكتني ماعندها الا حمرتين ومحزرين ..

هم عندهم 3 صبيان ..

وعنده زوجه 2 اهي نجاة (غرور) واي كريها وتقط نفسها ع ليه قط غصب اوف

-مرزوق (خالد امين) الزوج الشكاك من البلاوي اللي يشوفها بالمخفر مكان عمله والمريض ب ms

مرته دلال (لمياء طارق) تكسر خاطري بنفس الوقت بطت جبدي طلقها وتمت عنده اشلون مادري :\

عندهم ولد وبنت ..

-فيصل : (حسين مهدي) الزوج الخاين  ..

مرته زينه (فاطمه الصفي) دكتوره وتحب ريلها ومستحمله خياناته وطقه عشان اهلها مايبون بنتهم تتطلق واحتمال يحرمونها من كل شي حتى شغلها ..

-عز : (حمد العماني) اصغرهم بالبدايه كلنا اعتقدنا يحب جنان طلع بس يبيها لتانيب الضمير اللي حاشه عقب مادعمها ..

مرته جنان (رنده) اهو طلقها او لا؟؟

وطلع يحب زوز بنت خالته لي الحين مو قادره ابلع السالفه في احد يحب و يطب باللي يحبها عند الناس :\ لا تقولون ميانه لو انا اهفه بكبر ماعندي وعجبتني لما يه يتاسف منه قالت ع أي كلمه جارحه :\

- شاهة (بثينه الرئيسي) دورها بسيط واهي بنتهم الوحيد اللي تطلقت وردت لريلها من وراهم وعقب قطت عليه فلوس الدنيا وبي وجنه سياره بعد :\ عاد ماشف او بالاحرى ماحطوا شصار عليها مع ريلها الخاين الانتهازي , بس اخر شي تزوجت ولد عمها..

شخصيات ال2 :

-امم ام نصيب اهي منو بالضبط مادري :\ ناس يقولون اخت ثنيان وناس يقولون رابيه عندهم ..

-ناديه (الهام الفضاله) بواقه الرياييل ماتم ريل رفيجتها يارتها الا خذته ولما خلصوا خذت ريل اختها صج بطة جبدي وجلاويي ومرارتي ..

عندها عيال :
-زوز (موزه - شجون) : اهي اللي يحبها عز وتربيه موزه خالتها ..

ضحكتني بموقف العبايه , وكسرت خاطري من سبت اللي سوي فيها عز ..

-سالم (حمد اشكناني) : ولد هادي وايد حبيت شخصيته وكسر خاطري لما توفى وحطوا ذكريات عنه << مع انه دوره بسيط بس برز الفنان فيه ..

اليهال ثنيان اس تكعيب فتنانين وكالة رويتر متنقله ..

شنو اللي ماحبيته بالمسلسل ؟

- طريقه الاخراج او التنفيذ انه اغلبه ذكريات والشغلات مكرره ..

شلون خل اوضح لكم ؟؟

وحده من الجناين زعلت كلهم زعلوا باستثناء وحده ريلها طردها , واحد يتزوج او يخون الباجي مثله ..
ومثال حلقة ملجة عز الام تبخر كل مابخرت واحد حطوه يتذكر وعقب الخاله تمكيج وكل مامكيجت وحده تذكرت :\
وهم هالشي كان بام البنات الكاتبه تحب تعمم الشغله ع كل الشخصيات ..

اغلب الحلقات تخلص ع حدث 2 يوم يبلش بحدث 2 غير مو حلو جذي :\

في شغلات مايبوا طاريها اقصد ماختموها :\

- الحلقات تسربت اغلب الاحداث عارفينها .

- في ايحاءات مو بسيطه جايده حدها مالها داعي ..
-بعض القصص مقتبسه ومنقوله من مواضيع بمنتديات و من افلام هنديه واجنبيه..

-رتم الاحداث بطئ باول المسلسل عقب اكشن وعقب باخر حلقه حطوا كل الاحداث وبدون لايعطون الموقف حقه مثل مرزوق دش العمليات عقب مادرينا انه زين الا بالموقف اللي امه ماتت فيه ..

وتمنيت تكون النهايه رادعه لاشكال امثال ناديه والمخدين امثال ثنيان ..
وكسرت خاطري موزه ماتت من القهر ولي اخر لحظه ماكنت بي تضره سليحط ..

واحلى شي لما تقول سعاد عبدالله بالاغنيه بيتي يا بعد كل بيت ..
بس للامانه استمتعت فيه خصوصا انه استلمنهم بالدوام خخخخ ..


(2)
وايد حبيت الانجاز اللي سوته الكاتبه والمراحل اللي مرة فيها القصه ماشاءالله من تدوينات بسيطه ببلوق الى كتاب جامعهم الى مسلسل رمضاني ..
الحلو فيه الطابع الكوميدي ..
وانا بالبدايه مو متشجعه اشوفه كوني قاريه الكتاب هني كنت كاتبه عنه , وطبعي مااسمتعت بشي انا اساسا عارفه شنو بيصير فيه بس شفت اول حلقه وعجبتني وتابعته ..

واتضح لي انه في وايد تغيرات بالمسلسل عن المدونه والكتاب مثل اضافة شخصيات اهي يدتها نحمدو و اخوها حازم , و تغيرات بسيطه بسوالف الخطاطيب..
عرضت بالمسلسل نماين وايد من الخطاطيب الشرطي والفنان و المدرس والدكتور والزبال ..الخ , الطويل والقصير , الشخصيه وولد امه , النحس والعبيط ..
وايد متنوع ..
تحجت عن زواج الصالونات عندنا نسميه الزواج التقليدي اللي تنخطبين بناء على مدح او سمعة اهلج ..
اكره شي لما احد يدلل عليج اوف خخخ رورو فلانه اخوها بيي تعالي ارتزي خل يشوفج @@ نعم ..

رورو فلانه تدور لاخوه مره تبين اقولها عنج @@ طبعا لا قوليلها عنج خخخ مابي اكمل الحدث لاتطيح البنيه من عينكم ..

باجي التحلطم عن الخطبه كاتبته بوست الكتاب (هني)..

وبالنسبه للمسلسل احتمال يسون جزء 2 له ..

(3)

مسلسل اميمه بدار الايتام..
عنوانه احسه ناقصه كلمة فوازير لانه كله الغاز ولاحظت الكاتبه ماجددت باسلوب او طريقة طرح القصه في افكار مكرره مثل زوارة خميس و هم كله ذكريات..

والنهايه تبط الجبد سوها فيلم هندي في شي اسمه دي ان أي يبين أي وحده فيهم بنته ماله داعي هالطواله واخر شي عرفنا بنتها من دعاية زين @@ ..

وتوقعته احلى بس طلع اقل من عادي مو وايد يشد ذكرني بالبايات اللي البطله اهي كله اللي صح وخططها ماتخيب :\
ماتبعته عدل بس هذا خلاصه اغلب الحلقات اللي شفتها وزواره خميس احلى منه ..
(4)
برنامج خواطر 6:

اهو زين بس مايقارن بخواطر 5 اللي انعرض العام ..

مع انه متنوع عرض اكثر من دوله ومقارنه كانت اشمل بين المسلمين حاليا وقبل ..
وحتى الانشوده العام احلى ..
بس الحلو بهالسنه عرض تاثير خواطر 5 ع متابعينه مثل المدارس وغيره ومن المناطق اللي عرضها وحبيتها الجبيل الصناعيه متطوره ونظيفه ماشاءالله ..

هذي الشغلات اللي تابعتها برمضان و رأي فيها ..


19 comments:

هديــل said...

لا تذكريني بالمسلسلات المأساة :/

زوارة خميس اهونهم واحلاهم

اما اميمة اي دي النهاية السودا @_@

يعني المسلسل من بدايته قائم على حدث خطف بنتها آخر شي ما يقولون منو اهيا يعني شي مليغ مع ان طول المسلسل كان عاجبني

لا ولا تشوفين نهاية بابا الحارة ما تقولين انه آخر جزء نهااااااية مفتووحة على الآخر :/


يعطيج العافية

Unknown said...

اي صاجة انا تابعت مسلسل واداد الكواري ما اصعب الكلام و مسلسل خيوط ملونة و غيره صراحة ما شفت مسلسل له قصة حلوة و تجذب و نهايتها متكاملة

Anonymous said...

توني ادري انه اعلنوا عن بنت اميمة في نهاية المسلسل. انا ماشفتها عالراي وشفت الاعادة على قناة سما دبي و ماكتبوا شي.

خليتيني احوس بجوجل ادور الجواب :P

و اتوقع الكاتبة ماختارت منهي بنت اميمة و اتركت المجال للجمهور يختارون من خلال التصويت..

شكرا

Anonymous said...

الحمدلله تحليلاتي لأغلب المسلسلات طلعت صحيحة وهذا الي كنت اتوقعه بخواتيم الحلقات. مو ملاحظة إن أغلب المسلسلات نهايتها موت؟ ليش شصاير! بالنسبة حق أعمال هبة مشاري حمادة والي الناس يقولون عندها حلوة وشادين حليهم فيها، انا ما اشوف فيها زود الصراحة، وعلى قولتج في مشاهد وايد مقتبسة من مسلسلات أجنبية وهندية. زوارة خميس اخطاءه وعيوبه غطت حيل على أحداث القصة. أنا صح ما تابعت منه، بس كنت أشوفه مقطع، في وايد تساؤلات غير الي ذكريتها، ترسملي علامة استفهام، مثل شوق شنو الغرض من ظهورها بالمسلسل واختفائها! وشنو اللي نبي نفهمه لما حسين المهدي يتزوجها ويطلقها وما يقول حق مرته! وغير جذي ولد عمتهم الي طلع بآخر الحلقات وطالبهم بورث أبوهم فجأة صار وياهم وتعاطف معاهم! الفلاش باك هذا الي يبط الجبد في مسلسلات هبة، سواء فضة أو أميمية أو زوارة وايد تحب الفلاش باك وتحطه على الي يسوى والي ما يسوى، بمجرد ما نندمج مع حدث فجأة تحط الممثل يتذكر شي ويسدحون لنا الموقف. المسلسل صح نجح لكن مو كقصة ولا كأخراج المسلسل نجح فقط لأن احداثه قريبة من الفئة النسائية وهذا ما يعول إن المسلسل ناجح. هبة مشاري حمادة لازم تاخذ كورسات مكثفة وتحاول تغير جلدتها لأنها ان ستمرت جذي راح تطيح في فخ التكرار
من بعد 3 اعمال من نفس النمط، اما اميمية في دار الأيتام من أول حلقة عرفت انه حق المراهقين واليهالو، كلش ما حاز على إعجابي وماله أي معنى، وإذا كان معطي صدى لأن فئة كبيرة من المراهقات يتابعونه بسبب قروب شوجي وربعها موجودين.. أنا متأكد لو كان هالقروب مو موجود، محد راح يلقي العمل ويه.


أما عايزة أتجوز، ماشفت منه ولا حلقة الا مقتطفات، وكان أهون مسلسل من بين الباجي وقصته حلوة وخفيفة وتنضهم..

يعطيج العافية

Anonymous said...

شفيني بدليات لول اهم شي كاتب أميمية مو أميمة لول

Samt♥AlbadoO said...

عيـــدج مبـآآآرك
وعســـآآآج من العيـآيديين يـآربيــــه ^__^

ebtsamh said...

ضحكتيني ع سالفه صبغ مرام

ماشاءالله ملاحظتج قويه :)

وعايزة اتجوز عجبني يناقش قضيه

جاده بقالب كومدي فاخر

استمتعت بآرائج :)

وعيدج مبارك

بو ذياب said...

حدج لج نقاقة تكتبين كل هذا الحليل واللي ما اختلف معاج فيه ...
عيدج مبارك وقوليلنا جم حصلتي عيدية :)

ساره النومس said...

مسلسلات مليقة حدها


اميمة ذكرتني لفلم مصري قديم بلية اذا تذكرينه نفس اللقطة والبجامة الي كانت لابستها البيبي لووول
خبال يعني

زوارة خميس

ويع الحمدلله ماتابعته

عايزة اتجوز

ضحكني يعني اول جم حلقة بس ماله داعي يكررون الحركات نفسها

رورو الشخبوطه said...

هلا هديل..

اي استغفرالله ..

اخاف بيون جزء بعد :\

والله يعافيج يارب..

مشكوره..

رورو الشخبوطه said...

هلا اميره..

وداد الكوري منزله مسلسل هلسنه :\

توقعت وقفت من مان يسوى نتابعه؟؟

وحياج الله..

رورو الشخبوطه said...

هلا غير معرف..

اي صح وقعت بسما دبي مايعلنون حتى قلت لاخوي لانه طافته عرض الراي قلت ماراح تعرفها الا من الدعايه واهي ماتنعرض بسما..

والظاهر جذي :\

لانه بنات ندري مو بناتها وحاطين اسمهم بالسوال :\

لعفو ولو..

حياج الله..

رورو الشخبوطه said...

اخوي قلم..

هالسنه النهايات تسربت واغلب الاحداث :\


اي انا شفت 3 موت زوارة خميس و اميمه وكريموه الحين خاله رامينه واهوا يبجي يمه روح اتصل ع الاسعاف وده المستشفى :\

هبه هالسنه الناس وايد شاشوا عليه من جذي الاغلب شاف زوارة خميس بيعرفون ليش هالشوشره :\ وشوق صاج حده ماله داعي دورها :\ ولد عمهم حب اختهم خخخ واهما صاروا معاه ضد ابوهم ..


اي يخرب علينا تسلل الاحداث ويشتنا :\
هالسنه نجحت بزوارة خميس لانه الاغلب قام يتابعه من حجي الناس عنه و انه ينعرض بوايد قنوات مو مثل اميمه قناتين بس ووقت خايس :\


انا اشوف انه اول عملين لها احسن من هالسنه لازم تريح عشان اتيي بشي يديد مو لمجرد انها نجحت تنزل عملين مره وحده وتشتت نفسها حلاته عمل بس متعوب عليه :\

اميمه كفكره حلو بس كتطبيق واخراج لا كلش مايشد واتوقع مثل ماقالت اللي ماتابعينه فانز الممثلات :\.


خخ اي صاج يونس :)

الله يعافيك يارب..

وخخ البدليه لو مو متكلم مانتبهت لها :)

وحياك الله..

رورو الشخبوطه said...

هلا صمت..

ايامج سعيده..

واجمعين يارب:)

مشكوره :*

رورو الشخبوطه said...

هلا ابتسامه ..

خخ لا مانتبهت الا عليها وع فرنش فاطمه ..

اهي لانه تشوح بايدها وايد وعوعو وتكم ع عمرها من جذي شفته خخخ..

وصاجه حلو عايزه ..

وايامج سعيده..

ومشكوره..

رورو الشخبوطه said...

هلا اخوي بوذياب..

خخ شفت شلون احب اقرق :p

..ايامك سعيده

لا وين عيادي اهي اهي دا كان زمان :(

ومشكور..

رورو الشخبوطه said...

هلا طموحه..

خخخ اي اللي فيه امنا الغوله مو ؟؟

وعايزه اتجوز اي وايد يكررون بس ممتع :)

ومشكوره ..

Made n Q8 said...

لوول والله نهايات مسلسلاتنا عجيبه مابقى احد مامات
طارق العلي -داوود حسين-حياه الفهد-سعاد عبدالله

وبالنسبه لنهايه اميمه بذمتكم في ام بهالدنيا ماتبي تعرف منو بنتها !

اما زواره خميس ما اقول مو حلو بس في اخطاء والشي الي للحين ودي اعرفه..في لقطه باخر حلقه من الحلقات الي البريكي يقول حق زوجته الثانية لما شاف ورقه تحاليلها وقالها مكتوب رشاد مو رشا انتهت الحلقه وقلنا اكيد بالحلقه الي بعدها بقولون شسالفه وتابعنا الحلقه الي بعدها ولا وضحوا شي!

رورو الشخبوطه said...

هلا مدمد..

وي حتى طارق العلي :\

اي الحمدالله والشكر :\

قصدهم انه التحليل طلع مو لها الشخص 2 يعني مو اهي المريزه..

هذا اللي فهمته..

ومشكوره..

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads