Sunday, June 30, 2013
السلاموو ..
 
ولهت ع بلوقي وع متابعيني الصامتيين ..
 
بحاول انزل اليوم اكثر من بوست ان شاءالله ..
 
والمهم خلون نبلش بوست اليوم ..
 
امس اخوي دش يناديني معاه هالجيس لما شفته ولا هديه رمضان @ayarperfumes احلى شي اني مادري انه بيدزون لي بتقولون شهالعبو شهاليور شلون عرفوا عنوانكم معطتهم اياه العام دزولي نقصه ، استانست اول شي لانه مفاجاءه مو متوقعه 2 شي امي تحب عطورهم حيييل لدرجه بعيد الشر والله لايعوده لما انجلطت بالمستشفى وصتني ايب لها اغراض ومنها ست العطور اللي عطوني اياه العام وماشاءالله خلصتهم  هذا بوستي الاولي عنهم (اضغط هنا )..
 
 
اسم الهديه مبخر رمضان ..
 
وهذا شكله علبه مستطيله طواليه من البلاستيك محفور عليها بكل الجوانب نقش الاسلامي او الشرقي ومن جدام اسم الشركة ايار ..
 
وهذا شكله ع جنب ..
 
وهذا الغطا صج جنه مبخر ..
 
 
ومحتوياتها عباره عن :
 

-عطر سما ٧٥مل
-رشوشين (الدروازة ، دسمان) ٢٥٠مل
-تولتين معمول الدانه ..
وبما اني دقيقه وتشدني التفاصيل حبيت الالوان المستخدمه الاسود والذهبي فخامه ورقي شرقي والحلو انه من ورا حاطين نفس النقشه اللي ع العلبه مو مخلينها ساده وهم شدني انه حتى ع جيس مكتوب مبارك عليكم الشهر يعني ماله داعي جيس يديد للهديه وعبالة التغليف مثل ماتشترونها تودونها ..
 
سعر الهديه :
 
ببلاش اكيد يابوها لي خخ بس من اكاونتهم بالانستغرام عرفت انه 25 د ك ..
 
وايد مناسب ..
 
رايي :
 
انا احب هالعطور اسميها العطور الكويتيه الاصيله الخنينه بس مو لي لا لاميمتي و ديده الله يرحمها يارب، و امي كنت انطرها تيي ابي ارويها الهديه حدي متشوقه ابي تشوفها لما يت روايتها استانست وقلت لها شميهم يما قبل لا ارش قالت شحلاتها انا صرت جذي !!! خخ يما مارشيت اشوه اني مو رقيقه وايد جان غشيت واهي رشتهم علي عساس اصحصح ..
 
امي تحبهم وااايد اللي تحبه امي ويفرحها يفرحني امي تقولكم عطور ايار كثر لله خيركم وانا اقولكم شكرا ع احلى مفاجاااااااء ماقصرتوا وجزاكم الله خير اللي فرحتوا اميمتي :*
 
اللي محتاره بهديه رمضان هذي بتكون مناسبه لج حطيها بلستتج وشميها وان شاءالله تعجبج ..
 
اكاونتهم بالانستغرام : @ayarperfumes
 
Twitter: @AyarPerfumes
 
وللإستفسار والطلب:
55501991

"قريبا في برج جاسم"
Monday, June 24, 2013
اول امس يالي بي سي دعوه للافتتاح اللي يعرفني يعرف اني ماحب ايفنتات البلوقر بس هذا كان غير اعرف صاحبة البوتيك تعرفت عليها بصالون كانت عازمتني ورحت وعزمتني مره 2 ع صالون 2 بس ماقدرت اروح بس راح اروح ان شاءالله وهالمره استحيت ماروح تستاهل من يتعنى لها خصوصا انها من اصحاب المشاريع النادرين اللي يخلون نكتب ونصور ع راحتنا مايطنقرون اذا كتبنا انه في سلبيات المهم كنت البلوقر الوحيده بالايفنت وكان بمثابة حفل كوكتيل في قروب من بنات وايد حبيت الاجواء ماشاءالله وتعرفت ع ناس متخصص بمختلف المجالات تصوير - هندسه ومصممات مثل انفال الصالح و تعرفت ع زباين البوتيك السبشل ..
 
وطبعا لازم احط لكم جم صوره ..
 
للامانه ماصورت وايد كنت لاهيه بالسوالف خخ ..
 
رويال بلو من ابرز الوان هالموسم ..
 
حبيت الوانها والرفلز ..
 
ناعمه وبالصج شكلها احلى ..
 
وفي عندها وايد قطع مستخدمه فيها خامات رجاليه ..
 
مثل الشماغ ومستخدمه اكثر من لون ودامجته بالترتر بتقولون وي شخباري قديم بقولكم اهي بدايته من 5 سنين تقريبا كانت فيه يعني هذا جنه ستاندر عنده << هذا كلامي مو كلامها خخ ..
 
 
وهذا البشت الصراحه انا ماحب البس شي اساس كان رجالي بس هالبشت شدني ولما شرحت لي فكرته حبيته اكثر ..
 
فكرته انه ينلبس بطريقتين الاولى كشروال وال2 قالت لي ينلبس بطريقه معينه بالايد مااعرف اشرحها بس اذا دزت لي صور الشو بنزله لكم ان شاءالله ..
 
 
هذا ع الموضه حبيت الخامات ..
 
هذا حلو للي ماتحب الدراريع وهالموديل احس يغطي عيوب الجسم ..
 
احب هالقصه واحب الخامه الطايحه ..
 
وعلى فكره اهي مو بس تصمم ملابس اهي تصمم اكسسورات وكل اكسسوار توفر منه قطعه بس ..
 
اغلب الصور فيها قطع من شغله بس انا صورت لكم 2 بشكل اوضح ..
 
 
هذا حبيت فكرته مو موديله تقول دمجت الفيروز مع مرجان ولولو لان بحكم انها معالجه بالطاقه تقول دمج هال3 شغلات يعطي طاقه ...
في وايد شغلات موجود بالبوتيك ..
 
وهذا صوره لجزء من الضيافه اللي كانت من 1minimany 
 
 
 
عنوانه :
 
الجابريه ق3أ - ش 5 بناية 73 الدور ال2 ..
بالعماره اللي فيها صالون الرموش الذهبيه ..
 
الانستغرام : boboshboutique
Saturday, June 22, 2013

اليوم رحت اوتاد روحه ع السريع وبالنسبه لي هالمجمع بمثابة افنيو الجهرا خصوصا مؤخرا كل ما روح له في محل يديد ماشاءالله ..
 
من الشغلات اليديده فيه هالكافيه ..
 
اهو كافيه نيوزلندي اول مره يبطل بالكويت واول فرع خلص اهو فرع الجهرا وبيفتح 4 غيره 2 بالسالميه واحد بالمجمع يم البيرق والاخير يم اعتقد هيلتون المنقف ..
 
 في وايد شغلات وعلى فكره توه مابطل هذا افتتاح تجريبي وعقب يومين الافتتاح الرسمي ان شاءالله ..
 
صورت لكم جم صوره له ..
 
في وايد اكلت في شغلات جاهزه كسناك وفي معجنات ..
 
مثل الكرواسان والمافن ..
 صمون بمختلف الحشوات والاشكال يعني راب وتوست و وبيغل واعتقد في شابيتا والخ ..
 
وفي سلطات وكيك بعد ..
 وهذي ثلاجة المشروبات البارده ..
 
وهذا صوب الجاي عندهم متوفر ب9 نكهات ..
 بالاضافه انه القهوة بمختلف نكهاتها عندهم اورجانيك ..
 
ويوزعون وايد مشروبات كضيافه ..
 
 وهذا جانب من القعدات ..
 
وهذا طلبنا ..
 
تيركي بيغل..
 والصمونه الورديه هم بالتيركي ..
 وكيكة ككاو بس لي الحين ماذقتها ..
 
الاسعار :
 
مكتوب تونا بيغل ترا مخربطين ..
رايي :
 
ككل الطعم زين وحجم الصمون كبير ماشاءالله، الستاف حاب يخدم وماشاءالله مبدائيا الستاف عدده كبير اتوقع لانه اول فرع عقب بيوزعونهم ..
واسعاره مثل باجي الكفيهات بس تشكيلته اكبر ماشاءالله ..
وراح اجربه مره 2 و3 ورابعه ... الخ بعد :)
 
عنوانه :
 
مثل ماقلت فوق :
 
الجهرا - مجمع اوتاد تحت بالسرداب مكان كارفور قبل ..
 
 
Saturday, June 15, 2013
ساره ارت فنانه احب شغلها شفته بالصج قبل لا اعرفها ولما عرفتها بالانستغرام حبيتها من اخلاقها العاليه ماشاءالله ..
 
توها من جم يوم بلشت مشروعها مبدائيا ترسم صوركم الشخصيه ع اكواب وتيشرتات (احب الشغل اليدوي )..
 
بس لانه توها بالبدايه اكاونتها التجاري بس حاطه فيه صور الاكواب ..
 
والشغل مرتب ماشاءالله واخليكم مع الصور ..
 
 
 
 
 
 
اسعارها للاكواب:
من 5 الى 7 د .ك للكوب ..
 
للطلب :
Connect me on kik : sara_art
 
الانستغرام : sara_art_
 
Friday, June 14, 2013
من مطاعم الطفوله (فرع النزهه ) اول يدتي كله تطلب لنا منه عشا اهو او تب كنتاكي او فتوش جمعية الفيحا او فلفلة ..
 
احبه لانه احب يدتي واحب كلشي منها الله يرحمها يارب ..
 
وخبري فيه من سنين يمكن اخر مره كليت منه قبل 10 سنين ورفيجتي جربت وجبه يديده ومدحتها لي وذاك اليوم صادف انه ردين مع بعض عقب الدوام فمريناه نجرب الوجبه اللذيذه ..
 
انا اللي كنت اعرف عنها انها سبايسي بس لما رحت ولا طلعت بوري بالدياي مادري دياي بالبوري ..
المهم انها لذيذه وحبيتها بس خذيتها بدون الفلفل ..
 
واكرمج الله حبي :*
Thursday, June 13, 2013
وايد بالانستغرام سالوني شلون اخلي الخلفيه مو واضحه بصوري ع قولتي اخليها مغبشه :\
 
الاجابه اهي استخدام برانامج اسمه Big Lens
 
احبه وايد سهل استخدامه وتاثيراتها حلوه تحلي الصوره بيصريلي 4 اشهر استخدمه وماقدر استغني عنه وخلاني بعد استغني عن برامج 2 للتاثيرات ..
 
سعره: انا نزلته من الاب ستور ببلاش ..
 
تبون تعرفون معلومات اكثر عنه ضغطوا هني
 
Wednesday, June 12, 2013
من الاكاونتات التجاريه اللي شدتني بالانستغرام هالاكاونت واهو متخصص بصناعة اليدوية للاكسسورات  وخاصة الكولار (القلبه )
 
ويستخدمون له وايد مواد (دانتيل -هدب- ريش- خرز - لولو ... الخ )
 
احترت شختار واعرض لكم عساس يكون عندكم فكره عن شغلهم مالقيت احسن من الصور الشامله اكثر من قطعه والباجي باكاونتهم بحطه بختام البوست ان شاءالله ..
 
 

 
 
هذا موكولار قلب عادي بس عجبني حيل ..
 
الاسعار :
والحلو فيه انه تحت كل صوره كاتبين السعر ..
 
وماثبت على كل الاسعار بس اللي شفتهم تقريبا من 12 لي 22 د.ك ..
 
للطلب :
whatsapp: 66504215
 
للمشاهدة المجموعه كامله زوروا صفحتهم بالانستغرام : @rosebay_store
 
 
الاسبوع اللي فات كنت وحيده بالدوام فعشان ما امل قزرتها يوتيوب وتجارب يديده ، ومن الشغلات اللي جربتها  هالمطعم ..
 
طلبت سيزر راب و سلطة الناتشوز..
 
 سلطة الناتشوز
مكوناتها ذره وخس واعتقد ملفوف مو متاكده وبطاط ديتوس وصلصه ..
 
 
 
سعرها :
1.600 د ك ..
 
 رايي فيها :
عاديه بس الصلصه شويه مو تارسين كل القوطي جيكو ع صوره موجوده ورا وهم موجوده بالصوره اللي فوق مبينه انه مو تارسينها ..
 
* راب سيزر *
سعرها :
 
1.650 د.ك ..
 
رايي فيها :
 
ككل زينه بس اللي ماحبيته فيها انه الخبز مو الراب اللي متعوده عليه طعمه جنه خبز صاج ..
 
التوصيل :
مدته : ساعه الا ربع تقريبا ..
وسعره : 200 فلس ..
 
رايي فيه ..
 
الاكل نظيف واسعاره مناسبه  و عادي اطلب مره 2 بس اجرب شغلات يديده ..
 
للطلب :
Delivery - 22498466
Sun-Thurs 7am to 5pm
Fri-Sat 12pm to 10pm
الانستغرام : isandwichq8 
 
Tuesday, June 11, 2013
شفته بمجلة سيدتي الصبح وعجبتني فكرته فصورته للانستغرام ...
 
 
 والعصر صادف مريت الافنيو فرحت بودي شوب اجيك اذا موجود ولا لا واشوه حصلته ..
 

loading... Now Loading...
حسب ماهو مذكور بالخبر  فايدته ترطيب ١٢ساعه ويصحح عيوب البشره ويحميها من الاضرار اليوميه..

وفلما وصلت وحصلته جربته بس ع ايدي لانه اوردي ع ويهي حاطه بي بي كريم بس من شركة 2 المهم ..
 
وصورت لكم تجربتي ..
هذي صورته كقوام شكله جنه كريم اساس ..
 
وماصورته عقب ماتدهنت لانه مايبن شي خخ ..
 
سعره:
 ب5 ..
 
رايي فيه :
 
كترطيب و نعومه زين مبدائيا تدهنت فيه العصر والحين الساعه وحده الصبح احس بفرق بين ايدين بالشكل والملمس فرق بسيط طبعا ..
 
بس كلون و تغطيه يمكن التغطيه خفيفه جدا جدا جدا واللون مثل ماقلت انا واختي الجوز جربناه كل وحده فينا لونها غير بس 2 لاحظنا مايبن لونه علينا ..
 
وكقوام هم زين ماذكر انه غثني بالفرد وهم خفيف ع البشره ..
 
ومثل ماقلت هذي تجربتي المبدائيه للتستر وعلى ايدي ..
 
*مصدر الخبر مجلة سيدتي عدد ٨/يونيو /٢٠١٣م
 
Monday, June 10, 2013
قبل جم يوم من الانستغرام دريت انه فكتوريا سيكرت مسوي سيل وعرفت هالشي من اكاونت زميلتي البيوتيه الانستغراميه sofiashe @   ..
 
اليوم مريته وعجبني فصورت لكم جم شغله منه ع طاير ..
 
 
عجبوني المضاعد خصوصا اول 2 ع اليسار ..
 
الاسعار :
كان ب21 صار ب10 ..
الضعيف اكثر من واحد مع بعض عجبني واحد منهم  بس المجموعه سعرها كان 17.750 صار ب8.750 ..
 
النظارات هم في مجموعه مشموله بالسيل هذي كانت بالثلاثينات تحديد 36 صارت بالتعش تقريبا 18  ..
 
 * المكياج *
 
هالطقم عجبني مع انه مادققت بمحتوياته عدل بس احس شامل كان 14.750 د صار ب 7.500 د...
 هذا شكله يشووووووووووووووووووووووق شفته باكاونت sofiashe  توقعته صغير بس طلع بحجم المجله العادي اذا مو اكبر بعد ..
 من داخل ..
 سعره كان ب20.500 صار ب10.250 ..
 
وهذا طقم كل طقم في بلاش وصبغ وحمره وحجمهم ميني ومتوفر بلونين كورال و الوردي ..
 
 
سعر الطقم كان 8.250 صار 6 ..
 
واطقم قلوسات ..
 
سعره كان ..
ماذكر بس جنه 10 وصار 5 وشي مو متاكده ..
 
 
سعره كان 9.500 صار ب7 ..
 
واطقم العطور ..
 
 
اللي شفت اسعارهم :
الجنطه السودا اللي بالنص كان ب 14 صار ب7 ..
الورديه عاد نسيت اي وحده خخ كانت ب14 ونص صارت ب10 ونص << ترا مصوره اغلب التاغ مو معتمده ع ذاكرتي ..
 
هذا ماقريت شنو بس اعتقد البودي ميست كان ب 4.500 صار بدينارين وربع ..
هالصور من فرع الافنيو اللي بسطرت سبلاش ..
 
وفي شغلات وايد ماصورتها ..
 
والتنزيلات مستمره لي 30 \6 ان شاءالله..

Search

Loading...

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads