Monday, August 30, 2010
السلام عليكم ..

العام باخر شهر 12 رحت معرض العطور وهناك كالعاده خمطت مع اني مفلسه :\ وكاهم قشي (هنا)

ومريت بيت الصابون اللبناني ع ابو ابي اشوف خلطه عندهم عاد قالي انه عندهم عرض ..

انه اذا شريت هال3 شغلات :

(1)

سنفرة بالشوكولا ..

مكتوب ع المغطاة :

انها منعمه ومجدده ..

وع القوطي مكتوب :

- الخصائص:

تقشير طبيعي للجسم بالشوكولا المضاده للهرم منشط ومنعم غني بالمغنيزيوم المريح للاعصاب والهرم .يساعد ع ازالة الخلايا الميته والاوساخ .

-الاستعمال :

مرتين بالاسبوع قبل الحمام او المغطس , فرك الجسم به بحركة دائرية والتشديد ع المناطق الخشنة ويتم غسلة بالماء الفاتر .

*رايي :
امم من خلال استخدامي لها اكتشفت اني مااحب ريحة الككاو :\ اهي زينه مو ويع بس مو من الروايح المفضله عندي , اما النتيجة اللي حصلت عليه اول شي عيبها انها تزيت الجسم يعني لما اغسلها جني حاطه طبقة زيت ماحب جذي :( بس عادي يروح بالصابون و الحلو فيها تعطي نعومه حلوه للجسم ..

(2)
*الخطة الملكية بالشبه *
قبل لا اتحجى عنها لازم اوضح انه الخلطه الملكيه في منها نوعين هذي اللي بالشبه وال2 اعتقد بالكركم ..

اخترت هذي لانه تناسبني اكثر ال2 اعتقد كانت للكلف والحمدالله مافيني هالشي ..

مكتوب ع المغطاة مثل ماهو مبين عندكم :

لتبيض الاماكن الداكنه من الجلد وتوحيد لونه..

وع العلبه مكتوب :

-الخصائص:
خلطة ملكيه مبيضه ومنعمه للاماكن الداكنه من الجسم . تضب المسام فتنعم الجلد وتهدئ التحسس فيه , توحد لون البشره وتعطيها الاشراقة .لها مفعول مزيل للتعرق ولرائحة الجسم .
-الاستعمال :

مرتين في الاسبوع للوجة اوالجسم ,يرغى على الجلد ويترك لمدة 5 دقائق ثم يفرك بالليفة ويشطف بالماء الفاتر.
يستخدم مع الحمام البخار او الحمامات المغربيه .

رايي:

امم الصراحة مالتزمت بطريقة الاستخدام , بس عموما الزين يفرض نفسه بس نفسيا ماشفت اي تغير حتى لو بسيط هذا بالنسبه لجسمي لويهي مره استخدمتها او مرتين وقفت لانه اخاف استخدم اي شي لويهي بروح بسرعه يقب اهي اهي..

سعرها :
15 د.ك


(3)

*كريم للجسم بالبابونج*
مكتوب ع المغطاة :

مريح للاعصاب ومهدئ ..

اما العلبه فمكتوب عليها :

-الخصائص:

كريم للجسم بزيت الزيتون مرطب غني بالمواد المغذية والمهدئة كالبابونج , العسل والشوفان .

-الاستعمال :

يستعمل لترطيب الجسم خاصة بعد الحمام ..

*رايي :
كمرطب زين ويتم فتره طويله تقريبا يوم او اقل بشوي يعني لما تغسلون تحسون فيه , اميمتي عاجبتها ريحته اول كنت احط ميبو كل مادش تزفني خخخ..

سعره مو متاكده ي10 او 8 ..

لانه الاغراض ال3 طلعوا ب33 اذا ماخب ظني :\

وعطوني هالشغلات هديه :


اهماالصغار اللي جدام صابونتين وسنفرة ويه ..

مو ذاكره اسمهم الذاكره عندي ميح :\ بس الصابونه هذا من احلى الشغلات اللي جربته منهم حبيت وايد احس حلاتايدي مادري شلون اوصفها لكم وحدة لونها - صفتها احس بكتب فيها قصيده خخخ..

والسنفره توني استخدمه هم تخلي طبقة زيته خفيفه للويه بس تنفع للبشره الجافه مثلي اريح بدال لا احط مرطب :)

+

صابونة الشبه قلت لكم عنها من قبل (هني)

وبس جنه طولت خخ..

اي دايما انسى :

p.s : هذي تجربتي الشخصيه البحته عادي جدا امدح شي ومايولمكم لانه في وايد اختلافات ..

- طريقة الاستخدام..
-نوع البشره..
-تفاعل الجسم ..
Sunday, August 29, 2010
السلام عليكم ..

قبل جم يوم كنت اشوف برنامج خواطر 6 والحلقة موضوعها كان عن الاسراف بالمياه وعنوانها وضوء ولا استحمام ..

والحلقه بالنسبه لي كنت حلوه لانه شارك الجمهور معاه بالتجارب سواء كبار ولا صغار ..

هذ رابط الحلقة (هنا)..

تقريبا بالدقيقه   7,42 بيبلش يتحجى عن الجهاز ..

والحين انا بقولكم عنه ,,

هو اخراع ماليزي الهدف منه ترشيد الماء , من وجهة نظري مو بس ترشيد ماي هم اضمن للناس اللي ينسون او يسهون واهما يتيددون لانه طريقة عمل الجهاز كالتالي :


يبدا بذكر اسم الله << جهاز ناطق , وبعدين لما تبلش وضوء يبين لك وصلت لشنو يعني الحركة اليايه بتكون غسل الايد اليسار مثلا يشب الضوء جهة اليسار والخ (باختصار مبرمجة على التسلسل الوضوء )ويختم الجهاز بذكر دعاء الوضوء <اشهد ان لا اله الا الله وحده لا شريك له واشهد ان محمد عبده ورسوله اللهم اجعلني من التوابين واجعلني من المتطهرين  ..

وموبس جذي لما تخلص يشتغل باماكن معينه << الرمادي اللي تحت لتجفيف القدم واعتقد في مكان لتجفيف الايد ..

 وسعرها :

بين ثلاثة الاف واربعة الاف دولار ..

رايي :

فكرة الجهاز مثل ماقالت فوق وايد عاجبتني وسعره مناسب بس حجمه كبير ماينفع للبيت حلاته للمساجد , وحلو نفعل التكنولوجيا لخدمة الدين ..

المصادر :

1 , 2


ولما كنت اسوي بحث بقوقل عن هالجها لقيت انه في انتاج قطري لجهاز مشابه لهذا نفس الفكرة ومبين من التواريخ انه اهما اقدم والله اعلم ..

Saturday, August 28, 2010
السلام عليكم ..

قبل جم يوم كنت احوس بالفيس بوك ولقيت  اعلان جانبي لسايت ديفيدي كويتي ومسوين عرض الفيلم بنص ..

من زمان ادور السايت اللي اطلب منه مسكر :( وماحب البسطات استحي وكومار سليحط يتشرط :\

المهم امس يت طلبيتي ..

اول شي لفت انتباهي جيسهم شغل عدل ع اسمهم ..


ولما فتحت الجيس ولا التغليف سنع مو جيس نايلون :)

هالفيلم كنت بروح له بيوم ميلادي المجيد بس عقب الدوام والسبا و المطعم والهيصه دخت واشوه ماتعنيت له لانه لغوه مدام بيلغونه من الاول لا تحطونه بالسايت :\



الافلام اللي مادحينها لي ..

p.s هذا لاختي انا شفته ..
افلام ولد كابور ..
افلام هنديه متنوعه ماي نيم از خان لاخوي واللي تحته بعد ..

افلام عجبني اسمها ..

السايت : اضغط هنا ..

رايي :

تشكيله الافلام عندهم متنوعه خصوصا الاجنبيه والباباي بعد بس حسافه ماعندهم اكو :(

شفت فيلم وكان الحمدالله زين واضح وترجمته اوكي ..
Friday, August 27, 2010
السلام عليكم ..

صايره مالي خلق بلوقي ..

ولا عندي بوستات كامله حسب اللي اذكره خخ..

اليوم عندي سوال خفيف لطيف..

كل وحده او واحد فينا يحب شي لدرجة الهوس ويحرص ع معرفة اخر المستجدات عنه واقتنائها ..

انا عن نفسي ام هبه كل فتره اهب بشي بس اغلب الشغلات اللي اهب فيها تكون من طفولتي احبها ..

(1)

الكتب لانه من كنت صغيره احب القراءه بشكل كبير يعني تقريبا من الابتدائي وتتنوع اهتمامتي كل سن اقرا مجال معين بداية بمجلات الاطفال سعد وخالد وميكي وميني و باسم و احمد وطبعا الحب الكبير ماجد والعربي الصغير << كلهم صبيان ماعدا ميني خخخ..

ولما كبرت قمت احب اقرا اكشن وجرايم مثل تختخ و مجلة الجريمه وباجي المجلات العاديه النسائية الجميله خصوصا لانه انعكاس عني خخخ..

وبالجامعه روايات بس ب2 جامعه طخيت يعني ب2006 ومارديت اقرا الا ب2008 عقب ماتخرجت ..

ولما رديت قمت انوع واقرا ادب ساخر وروايات ومذاكرات والخ ..

(2)

الاظافر امممممممم خبري بهالهوس بلش من المتوسط لانه ماشاءالله اظافري زينه فهي فرضت حبها علي طبعا كنت كله مخالفه بالمدرسة بس بما اني وايد هاديه فكنت اسوي خطط وانحاش ومااقصهم خخخخ..

بس تدرون اول كنت ماحط الا مقوي او الوان فاتحه يعني فرنش وهالطقه لا ونادر بعد كنت استحي احط الوان واول مره حطيت باخر كورس بالجامعه  وكان لونه فوشي ع حظي صبي يوزع علينا الاوراق مديت ايدي اخذ الورقه عقب خشيتها مستحيه خخخ..

وماحطيت الوان مره 2 الا عقب لما كملت 22سنه يعني العام وبلشت بالقوي لون احمر خخ ومدحوني البنات واستانست خخ ..

وحاليا اشتاق للصبغ هالايام ماحط بس عقب رمضان بعوض ان شاءالله ..

واللي متابعني يعرف انه الهوس مو بس اصباغ بعد صالونات متخصصه وغيره اكسسورات لهم وادلعهم :)

(3)

احب اخمط وافسفس فليساتي اشتري خلاجين وشغلات مالها داعي ودي اخفف هالشي لانه ع قولة ابوي اغراضج شيلمهن شيلمهن وامي تقولج دارج بتمشي << قضبيها يما خخخ..

حاليا هوس مضاعد بس البسهم ماحنطهم خخخ ..

وهالهوس متوارث من امي اهي تحب المضاعد بس الذهب حتى مره قلت بلبس ملوتج يما قلت لا اخذي ملوت المناسبات خخخ << صدقت اميمتي من كول ستايل لي مامي ستايل..

وبالابتدائي كنت اداوم بمضاعد ذهب :)

الحين فالصو خخ..

واحب طبعا باجي الاكسسورات مثل بروشات و القلوب وبالشتا سكارفات احس تحلي الملابس ..

واحب الخواتم بس كل اضيعهم ..

وطبعا التراجي الكبار واول هوس بالحيول حتى بالمدرسه البسهم ..

من ذكرياتي حسي اني ادوم بعرس خخخخ..

(4)



الكريمات والصابون و السنفرات والماسكات والخ من سوالف بشره احبهم واكودهم :\ واذا التزمت ماطول حدي اسبوعين او شهر كلش كلش شهرين وامل :(

وحاليا ادور صالونات سنعه بسوي فيها تنظيف بشره وكورسات عنايه بشعري وجسمي وطبعا ابي ادلع عمري..

جان عندكم اقتراحات او اماكن سنعه دلوني :)

هذا اللي اذكره واللي احبه اكثر شي ..

والحين دوركم انتوا ؟؟
Tuesday, August 24, 2010
السلام عليكم ..

نكمل بوستات دبي ..

مو طاحت بجبدي الصمونه شفت هالمطعم يمي ومن قبل جم يوم وانا متشوقه ابي اجربه ..




كنت ابي صمونه بس اهي قالت لي في عرض سلطة و صمونه و شراب ب18 درهم تقريبا اقل من 1,500

اخترت هالصمونه اسمه شي جذي بتزا هوايان :\

وسلطة امم جنها مكسيكيه شي جذي قبل شهر اكيد بنسى :\

بس طبعا البصل المرزوز شلته وحذفته غير محسوف عليه :\

رايي:

والله كويس , يعني عادي اجربه مره 2 :)

ومكانه :

دبي مول ..
Monday, August 23, 2010
السلام عليكم ..

قبل جم يوم لما رحت جمعيه الخالدية كنت افتر فوق ولا اشوف شي من بعيد كنت ابيه بس موجود بسرداب الشايع وهالمكان اخاف اروح له مع اختي بروحنا لازم امي معاي مع انه في سوالف تشوق ..

وطبعا اهو شي لاظافري خخخ..

لا وطلعت كل الانواع وصورتهم :

(1)

سلفر

(2)
زيبرا
 (3)
ملون
(4)

التايغر في نوعين ..

في نوع جنه طبيعي اهو اللي ع اليمين..


وخذيت لي جم واحد منهم مو كلهم بس لي الحين ماجربته , ومتشوقه اجربه بس عقب رمضان ان شاءالله..

وهذي محتويات العلبه :

مبرد وعصاة و شريحة المنكس..
وهذي طريقة الاستخدام ..

*رايي :

وايد استانست اني لقيته ماتوقعت احصله بهالسعر بهالمكان اول ماشفته من بعيد توقعت اغلى ,  وان شاءالله اعرف اضبطه ..

بس مبدائيا عيبه الاحجام بس بضبطهم ان شاءالله..

*وين تحصلونه ؟؟

وطلع اهو فرع لمحلات فاروق العوضي اللي حصلوه عنده  بنات منتدى  كويتيات بسرداب الشايع ..

+

جمعية الخالدية الدور الاول جبال مذركير اذا ماخب ظني :)
Sunday, August 22, 2010
السلام عليكم ..

واخيرا سويت شي وضبط خخخخ طبعا اشرافي واعداد خدامتنا انا بس اوجه :)

وناويه اسوي جم طبق بس كلهم سهلين يعني مناسبين لقدراتنا :)

المهم هالطبق عرفته من فشونه (هني) وخاتون طبقته (هنا)

*المقادير*


2 ملعقة كبيره جبن قلاص..

1 قيمر كبير او 2 صغار ..

توست ..

شاورما دياي واذا ماتحبونه دياي مسحب ينفع بعد..

جبن مبشور ..

وبصل وبهارات وملح ..

*الطريقة *

1-تقطعين التوست دوائر باستخدام الفنيال او اي بديل :)

تحطينه بقالب الكب كيك ..

2- تحمسين الدياي مع البصل والبهارات والملح << وتقدرين تضيفين خضرا بس انا ماحبها و هم جزر او مشروم ..

وتتضيفين الحميسه ع التوست اللي بقالب ..

3- عقب تجهزين الطبق ال3 واهي الصلصه البيضا وعباره عن 2 ملعقة جبن و قيمر << البنات ضايفين ماينز بس احنا مالنا منتهي واختي ماتحبه :\

وتصبين الخليط ع الدياي..

4-اخر شي ضفت الجبن المبشور ع الويه بس اهو شي اختياري مو الزامي عن نفسي احبه :)

وتحطينه بالفرن لما يتحمر او بقدرة قادر يحترق ويتحمش خخخخ..

*النتيجة *

*رأيي*

طبق حلو وسهل وفنتوقه بسيطه ..
Saturday, August 21, 2010
السلام عليكم..

قبل جم يوم زبوطة حطت بالفيس بوك صورة هالصبغ نفس النوع اللي  انطره وعيزت ادوره وماحصلته بس ماهو اللي ابيه بالضبط تقريبا مثله  ..

المهم اليوم رحت جمعية الخالدية فمريت كليرز واشوه حصلته ..

وصورت لكم اياه << مو انا اختي للامانه حزتها انا كنت لاهيه اجربهم خخخ..

(1)

اخضر+ اصفر+ازرق
(2)

فوشي+بنفسجي غامج +بنفسجي عادي

(3)

سلفر +ابيض+اسود
(4)
درجات البنفسجي = بنفسجي فاتح حيل قريب من الابيض +بنفسجي عادي +بنفسجي غامج هالدرجة مقاربه للون اللي بالنص  بالصبغ ال2


امممممممممممممممممم توقعون خذيت اي واحد فيهم ؟؟!!



خخخخ


كلهم وهذا عقب ماجربته ايدي صايره سودا :(

سعره بدينار ونص ..

ورايي فيه:

للحين مو فاهمه طريقه بالضبط بس اللي شفته انه مع الاستخدام الالوان راح تختلط ببعض فتغير الدرجات ..

هالحجي بناء ع البنفسجي الفاتح التست لون اغمج واحلى ..

واي عيبه لونه نوعا ما خفيف هالحجي اكثر شي ينطبق ع الفوشي :(


شكرا زبوطة ..

وهم  اشكر اختي ع التصوير ميرسي ميرسي ميرسي فطوطه ميرسي لانك اختييييييييييييييييييييييييييييييييييييييييييي :p
السلام عليكم ..

قبل لا اسافر بفتره قريت بوستات لشانيل ولوير وتجاربهم لكاكو حليب النوق ..

عاد حطيته بالسته و لما سافرت دورته وحصلته بالسوق الحره بمطار  دبي ..

ولقيت اكثر من شكل هذا كبير ب100 وشي..

وخذيت اللي ع جمل لريل اختي جنه حصالة الوطني قبل :) ب49 درهم شي جذي  واللي يمه جنه بشي و70 درهم..

وخذينا لنا جم حبه من هالشكل بس في انواع وايد منه ..

 بالتمر ..

وفي برتقال  والجوز ..

والحليب ..


هذيل اليدد توني صورتهم اقصد 3 صور اما ال2 اللي اول شي منقولين من قوقل ..

وفي بعد نكهات بالهيل جنه ماخذينه منه وفي دارك جوكلت اختي جربته ...

رايي:

طعمه زين مو وااو بالنسبه للنوع اللي جربته واهو بالحليب , والحين اكل اللي بالبرتقال اقل من عادي اللي بالحليب احسن ..
واختي عندها المر الدارك احلى من الحليب..

عموما تجربه لن تكرار خخ عاد عطيت مدمد منه عسى مادعت علي :\

ولما سويت سيرج لقيت هالمعلومه ..

(أن حليب الإبل صحي أكثر من حليب البقر، ويحتوي على خمسة أمثال فيتامين (ج) ودهون ولكتوز أقل وأنسولين أكثر، ما يجعله مفيدا لمرضى السكري ومن لديهم حساسية من اللاكتوز.)


Thursday, August 19, 2010
السلام عليكم ..

اليوم مراسلنا وزع علينا هالعلب ..

واهي تمر ..



بس حسافه مو النوع اللي احبه :(

فيها نوعين واحد ساده وال2 باللوز ..
رايي امي بما انها اللي جربته:

اهي الله يحفظها يارب (رمشتين) << مثلا ملاك بزوارة خميس خخخ ..

المهم عند امي كل شي حلو وهذا يهبل وعجبها بالعافيه عليها ..
Wednesday, August 18, 2010
السلام عليكم ..

اليوم بقولكم عن جهاز صغير , اعتقد اول مره اكلمكم عن جهاز :\

المهم اهو جهاز صغير للمساج ..





خذيتها من السوق الصيني بدبي ..

واختي ادمنت استخدامه بالمطار حاطته بالجنطه وتطلعه تتهمز وترد خخخ..

ومره علاوي (عمره سنه) بينام ويبجي << عسر المهم ابوه سواله مساج بهذي جان يطخ وينام ..

و سمسم يمشي واهي بيده ويسوي مساج لراسه و ويه :\

وبالنسبه لي تونس للمقالب توني مخرعه اختي جم مره فيها خخخ اهي تشوف التلفزيون وانا امسجها فجاءه واول مره جربتها باخوي بالمطار وهم اخترع و طبعا جربتها باليهال خخخ احلى شي لما اباغتهم فيها ..


السلام عليكم ..

عندي وايد بوستات بس دايخه مالي خلق اضبط صور..

سو بسالكم شنو طبقكم المفضل اللي يسونه حصريا برمضان وباجي شهور السنه نادر ماتحصلونه ؟؟




عن نفسي القطايف ..

واحبها كموالح باللحم او جبن ..

وكحلو بالجبن الكيري ..

ومااحب اللي بالمكسرات ..

وبجربه كبيتزا ان شاءالله..

وعقبها التشريبه لانه احس خبز الرقاق مو متوفر ع طول مثل رمضان :)

وانتو؟؟
Tuesday, August 17, 2010
السلام عليكم ..

قبل رمضان بيوم رحت مع رفيجتي صالون رشنا عشان نحط نقشه ..

وصلنا له 10 وشي توقعنا مابطل بعده لما دشينا انصدمنا قبلنا 11 تقريبا ماشاءالله دفعنا ورحنا تريقنا وردينا ولا الصالون مفول وكلهم يبون نقشه ..





لا ودورنا طاف خخ ومع الحوسه حكرنا وحده ونقشتنا ..

 
 
رايي :
 
زينه بس كنت ابيها انعم , وماشاءالله طولت يالله راحت تمت تقريبا اسبوع ..
وسعرها مناسب انا اخترت السودا ب3 الايد رفيجتي اختارت العاديه الحمرا بدينارين ..
 
 
عنوانه :
 
بالشعب البحري اجبال مطعم ريوق وفيلا فيروز ..
 

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads