Friday, August 27, 2010
السلام عليكم ..

صايره مالي خلق بلوقي ..

ولا عندي بوستات كامله حسب اللي اذكره خخ..

اليوم عندي سوال خفيف لطيف..

كل وحده او واحد فينا يحب شي لدرجة الهوس ويحرص ع معرفة اخر المستجدات عنه واقتنائها ..

انا عن نفسي ام هبه كل فتره اهب بشي بس اغلب الشغلات اللي اهب فيها تكون من طفولتي احبها ..

(1)

الكتب لانه من كنت صغيره احب القراءه بشكل كبير يعني تقريبا من الابتدائي وتتنوع اهتمامتي كل سن اقرا مجال معين بداية بمجلات الاطفال سعد وخالد وميكي وميني و باسم و احمد وطبعا الحب الكبير ماجد والعربي الصغير << كلهم صبيان ماعدا ميني خخخ..

ولما كبرت قمت احب اقرا اكشن وجرايم مثل تختخ و مجلة الجريمه وباجي المجلات العاديه النسائية الجميله خصوصا لانه انعكاس عني خخخ..

وبالجامعه روايات بس ب2 جامعه طخيت يعني ب2006 ومارديت اقرا الا ب2008 عقب ماتخرجت ..

ولما رديت قمت انوع واقرا ادب ساخر وروايات ومذاكرات والخ ..

(2)

الاظافر امممممممم خبري بهالهوس بلش من المتوسط لانه ماشاءالله اظافري زينه فهي فرضت حبها علي طبعا كنت كله مخالفه بالمدرسة بس بما اني وايد هاديه فكنت اسوي خطط وانحاش ومااقصهم خخخخ..

بس تدرون اول كنت ماحط الا مقوي او الوان فاتحه يعني فرنش وهالطقه لا ونادر بعد كنت استحي احط الوان واول مره حطيت باخر كورس بالجامعه  وكان لونه فوشي ع حظي صبي يوزع علينا الاوراق مديت ايدي اخذ الورقه عقب خشيتها مستحيه خخخ..

وماحطيت الوان مره 2 الا عقب لما كملت 22سنه يعني العام وبلشت بالقوي لون احمر خخ ومدحوني البنات واستانست خخ ..

وحاليا اشتاق للصبغ هالايام ماحط بس عقب رمضان بعوض ان شاءالله ..

واللي متابعني يعرف انه الهوس مو بس اصباغ بعد صالونات متخصصه وغيره اكسسورات لهم وادلعهم :)

(3)

احب اخمط وافسفس فليساتي اشتري خلاجين وشغلات مالها داعي ودي اخفف هالشي لانه ع قولة ابوي اغراضج شيلمهن شيلمهن وامي تقولج دارج بتمشي << قضبيها يما خخخ..

حاليا هوس مضاعد بس البسهم ماحنطهم خخخ ..

وهالهوس متوارث من امي اهي تحب المضاعد بس الذهب حتى مره قلت بلبس ملوتج يما قلت لا اخذي ملوت المناسبات خخخ << صدقت اميمتي من كول ستايل لي مامي ستايل..

وبالابتدائي كنت اداوم بمضاعد ذهب :)

الحين فالصو خخ..

واحب طبعا باجي الاكسسورات مثل بروشات و القلوب وبالشتا سكارفات احس تحلي الملابس ..

واحب الخواتم بس كل اضيعهم ..

وطبعا التراجي الكبار واول هوس بالحيول حتى بالمدرسه البسهم ..

من ذكرياتي حسي اني ادوم بعرس خخخخ..

(4)



الكريمات والصابون و السنفرات والماسكات والخ من سوالف بشره احبهم واكودهم :\ واذا التزمت ماطول حدي اسبوعين او شهر كلش كلش شهرين وامل :(

وحاليا ادور صالونات سنعه بسوي فيها تنظيف بشره وكورسات عنايه بشعري وجسمي وطبعا ابي ادلع عمري..

جان عندكم اقتراحات او اماكن سنعه دلوني :)

هذا اللي اذكره واللي احبه اكثر شي ..

والحين دوركم انتوا ؟؟

42 comments:

سمو الأميرهـ ..ツ said...

هوسج حلوو واايد
لووول
وفي أشيا مشتركه
مثل الكتب والأظافر
ومم
و أنا مهووسة بالاكترونيات
وفترة كنت مهووسة بألعاب البلاي ستيشن
بما إني ما أحب الروتين
فكل مره أهتم بشي
أحيانا أتركه وأحيانا أرد له


ثااانكس ألووت مااما رورو

swera said...

ana a7eb elkoteb weresayel wel ekseswarat elli 3la 7aywanat lol :P

5osh mawthoo3 wallah ;)

Katkoota xD said...

انا عن نفسي كل مره اهب بشي

بس اللي صج اسميه هوس و ان التزمت فيه

التصوير

و الرسم

و الكتب

و الكتابة طبعاً

هههه استانست وايد على هالبوست

ذكرتيني بذكريات وايد حلوه

تحياتي

bokeh of magic * said...

لووول و الله سوالفج تونس
انا كنت مهووسه بصبغ الاضافر فتره بس ما كنت احب غير الفوشي و الاحمر و الفرنش بس هالثلاث الوان عمري ما غيرتهم لوول
و مهووسه بالروايات الرومانسيه
هم مهووسه بالسكرافات حتى لو بالصيف اشتري السكارافات الخفيفه حيل احسها تعطي لوك حق اللبس
مهووسه بالابراج وايد احب اعرف شنو ابراج الناس و اقرى عنها
امممم جني قرقت وايد :P
تسلم ايدج شخبووطه :)

Made n Q8 said...

ممممم

انا احب البابون والماسكرات والي خبري خبرج

واحب امي واحب ابوي وخواتي الدوام مااحبه :P

Abd-alrhman said...

تقريبا عكسك ,, لاني ذكر

شسمونه احب اطلع ع جديد التقنيه
ودروس تفيدني في مجالاتي الي احبها
التصوير والتصميم

ومرات اخذ كورسات لغه من عندي
ومنتشره اهنيه في النت

اوما القرايه توني ابدأ فيها
كنت هاجرها من سنين وبنين
تقريبا صالي سنتين اقرا بس
متندم ع الي فات ,, معن توني صغير

مرات احب اشوف الطبيعه
صج ما عندنا بس اخرع جو حلو
وخاصه الصباح اموت فيه

تسوق مو كثير لاني بس دشايش وكم بدله
عنايه في الجسم هم مو كثير تقريبا مو فاضي هع

هذا ما لدي ,, وشكرا لك

//

تقولين اول التدوينه زهقانه من البولجر
شوفي في فكره حلوه انك تفكرين بشي جديد
محد سواه وهذا راح يحمسك ع وصول مرادك
وفي نفس الوقت يونس ,, في اي مجال
بس يكون مميز وفريد ,, ويحتاج تفكير متعب
^_^

دحوم النتفه خطف من هنا

Unique Girl said...

حلوه الأشياء الي متهوسه فيهم (لاتسأليني يعني شنو متهوسه لأني أنا مادري لووول)

أنا عن نفسي

1- البيانو

2- الكتب والروايات

3- فيني هوس بالضروس صج انه شي سخيف بس احبهم

مممم بعد بعد

4- هوس بالاب

5- بالثلج

~أم حرّوبي~ said...

وااااااااي رورو عاد أنا أشترك معاج بالكتب والأظافر
موتي الكتب ..وأنطر معرض الكتاب بس عشان آخذلي كم كتاب ..
ولدرجة إنه في كتاب كنت أبي وتميت سنتين أدوره بالمكاتب وماحصلته الا طلبية من الكويت خخ من عندكم شفتي
ونفس الشي كتاب حياة هتلر حصلته بعد جهد جهيد والحين أدوره بالعربي
وأحيان لما أخلص قراية اللي عندي آخذ من أختي وإذا عيبني الكتاب أسير آخذ نسخة يدية حقي ..لأني أحب أحط الكتب اللي تعجبني عندي ماحبها لما تكون لشخص ثاني ..ولازم الكتب تكون عند متناول يدي فاختي يحليلها متعقدة تقول كتبج بكل مكان خخخ
وكاتبة لستة حق المعرض الياي ..
أما الأظافر هبيت فيهم بآخر سنة ثنوية ..وكل يوم حاطة لون ومنقشة على ظفوري
والحمدلله مانزخيت ولا مره ..
وصايرة كل ماحصل محل يبيع صبغ اظافر أدش واشتري عندي الحين فوق الأربعين لون ومن كل نوع نيفيا وكليرز وماركات ثانية ما عرفها خخخ

أول مرة بوستج يكون طويل خخخ ..تنكتب بالتاريخ ..كثري من سوالفج ^^

ebtsamh said...

موضوعج حلو وأهتماماتج من خلال

متابعتي لبلوغج صحيحه

آنا اهتماماتي

القراءة

الكتابه

الاناقه

الطبخ :)

ومشكوره ع البوست الحلو

alB6h said...

وعليكم السلام
انا نفسج هب هبه واطخ عنها, سوالف الكتب كنت هابه فيها من المتوسطة والحين قل يمكن من ضغط الدراسة, اما الاظافر كنت اطوله ايام المدارس بالاجازات بس بالمدرسة مودبه حدي بس من دشيت الجامعة لا خذيت حريتي, اما صبغ الاظافر انا استحي احطهم واطلع ونادر ما اسويها, اما ع الاكسوارات اللي احب البس صج احب السلاسل او القلاده بس احبها تكون ناعمه لاقصى حد, وترا كلنا نحب نفسفس :)
بس صج الهوس اللي انا فيه الحين عطور وبجايم ماادري شفيني عليهم !!

يعطيج العافية

ميمة السبيت said...

** هاي ام الفاتق شلونج ولهت عليج و على خماجيرج

عليج بالعافية دلعي نفسج عدل باجر ايووونج للعيال ونسونج اسمج بعد مو بس اظافرج

le Koweit said...

انا 3 اشياء عندي هوس فيهم
ودايم حريص على متابعة كل جديد فيهم

1- الأفلام
2- الكتب
3- الموبايلات

:>

قلم ومسّاحة said...

حاليًا عندي هوس بالنظارات الشمسية + الصوابين وانا أشابهج في النقطة الثالثة، عاد اليوم امي قالتلي لو نيييب نقل عفش علشان يشيل الأغراض الي بشقتي ولا سنة يقدر يخلص من الشيل لول.

ماعندي شي مهووس فيه على طول، كل فترة اكون مهووس بشي معين بعدين انتقل على شي ثاني..

ثانكس ع البوست

أبوفلان said...

ماكو هي هبه وحده

التكنلوجيا والإدمان الي اعيشه معاها

bu-saad said...

بوست بناتي 100
احترت هل اعلق ام اكتفي بالمرور
... سؤالك شجعني

توني واصل الديره بعد غياب دام 6
اشهر ..كل يوم معزوم بديوانيه
!

Hanan said...

صباح الخير
أتشارك معاج بنفس الهوس: الخواتم و السنفرات و المجلات بالذات المختصة بالتقنية والكاميرت. أحب التراجي بعد والكاميرات أموت فيها بس صراحة ما أقدر أشتري كل فترة كاميرا لأن توني طالبة و أغلب الكاميرات اللي تجذبني احترافية وأسعارها بـ 300 وطالع وأحب الجواتي تكرمين بس الشي الوحيد اللي ما أحب أكوده عندي المكياج! صج تلوع جبدي لما يتكود عندي لأني ما أحطه إلا خلال الجامعه و الزوارات.

Shelsalfa? said...

هوسي بالروايات والكتب,

والعطور العربيه =p

صايره كشخه ماطلع الا وانا متبخره :)

daloo3a said...

انا ماعرف شو احب
كل مره شي
مره الفوتوشوب و عقب امل
و بعدين الرسم و امل
و بعدين اشياء للبشره و الجسم و امل و بعدين ما ادري شو و امل

Sami said...

ـ البحر

رورو الشخبوطه said...

هلا سمو..

انا الكترونيات مو صوبها كلش ماثق بالتكنولوجيا وايد توهقني :\

ولكم سويتي..

وحياج الله..

رورو الشخبوطه said...

هلا سويره..

شوقتيني ع الاكسسورات :)

مرسي :)

رورو الشخبوطه said...

هلا كتكوته..

خوش هوايات ماشاءالله..

حاولي تنمينهم والله يوفقج يارب..

حياج الله..

Zabo0o6a said...

الهوس الله يسلمج بالكتب روايات وقصص ماتخلص وهوس بالجواتي والجناط كل مرة اقول بس خلاص ماراح اشتري وهم ارد واكود وهاليومين طايحتله اشتري شيلات كل ماشفت معرض فيه شيلات رحتله ركض :P

رورو الشخبوطه said...

هلا ماجيك..

اهي اهي امس رديت بس اخترب النت :(

هذول احلى 3 الوان ..

انا انوع بس الرومانصيه ماحبها وايد :\

والسكارفات حلوه بس مالقيت صيفين حلوين ..

واحس احلى بدون حجاب وصاجه تعطي لوك انثوي ..

والابراج قصدج الصفات ؟؟ انا الدلو حليلني خخ..

بالعكس وناسه اخذي راحتج..

والله يسلمج يارب..

مشكوره..

رورو الشخبوطه said...

هلا مدمد..

خخخ ..

محد يحب الدوام كافي الطريج :(

وحياج الله..

رورو الشخبوطه said...

هلا اخوي دحيم ..


حلو ماشاءالله..

صح بس يمديك تعوض ونصيحة لا تهد القراءه ..

والحمدالله انك انتبهت لها مبجر..

الصبح حلو خصوصا الفير عقب الشروق بشوي لانه هدوء ..

اي وناسه الصبيان ماتفسفسون فليساتكم :)

العفو ولو ..

//

اي صاج قاعده احاول ومشكور ع النصيحه ..

حياك الله اخوي ..

رورو الشخبوطه said...

هلا يونيك ..

خخ احد تصريفات فعل انهوس :\

حلو ماشاءالله اهتماماتج متنوعه بس الضروس شي مهم مو سخيف زين ماشاءالله تهتمين فيهم الحين احسن من تتوهقين عقب ..

ومشكوره..

رورو الشخبوطه said...

هلا ام حروبي ..

اي انا مثلج بس خفيت عن قبل اول اي معرض اروح له وكل بالمكتبات بشكل اسبوعي تقريبا الحين لا بس اوله ع القراءه ..

زين والله خخخ ..

مثلي وماحب الكتاب يتوصخ واي خخخ...

احنا شهر 10 معرضنا بس ماجهزت لستتي بس خل اقرا اللي بمكتبتي ..

خخ حركات انا بس اطولهم وياكلوني قطع مايشجعون..
وناسه راوينا اياهم خخخ..

انا اكثر شي من كليرز ومثلي احب محلات الاظافر..

لا خخ مو اول مره وايد انل مقالات بس مو ع طول ..

وحياج الله..

رورو الشخبوطه said...

هلا ابتسامه..

تقريبا مثل اهتماماتي باستثناء الطبخ مالي مقاقه ..

وردج الاحلى..

العفو ولو ..

حياج الله..

رورو الشخبوطه said...

هلا بطوطه..

اي بالجامعه ماكو وقت , خخ لا انا بايعتها, هم مثلي قبل كنت استحي الحين لا تعودت, اي حلو بس مع الحجاب ماتنفع ,

اي بنات لازم خخخ..

عطور كلش مو صوبي لاني ماستهلكهم ..

الله يعافيج يارب..

مشكوره..

رورو الشخبوطه said...

هلا ميمه ..

هايات خخ الحمدالله الله يسلمج انا اكثر اخيتي..

الله يعافيج يارب..

خخخ لا تو الناس ع اللويه وكل شي مع تنظيم الوقت يتم :)

وحياج الله..

رورو الشخبوطه said...

هلا اخوي لو كويت..

ونسيت علة القلب السياسه خخخ..

وحياك الله..

رورو الشخبوطه said...

هلا اخوي قلم ..

حتى انا احب النظارات السود :)
انا ناويه اسوي جرد ان شاءالله..

مثلنا عيل كل فتره هبه ..

ولكم ولو..

حياك الله..

رورو الشخبوطه said...

هلا اخوي بوفلان..

اي وابل خصوصا المفروض تصير وكيلهم بالكويت :)

وحياك الله..

رورو الشخبوطه said...

هلا اخوي بو سعد..

لانه بنيه فهذي ميولي بس الكتب والعناية تنفع لنا كلنا ..

لا علق اذا ماعليك امر ...

الحمدالله ع السلامه وبالعافيه يارب..

وحياك الله..

رورو الشخبوطه said...

هلا حنونه.

مساء الخير

شوفي الكاميرات بالنت ارخص ..

بس ماشاءالله تستخدمينه يعني بشكل شبه يومي انا اكود وماستخدم :\

وحياج الله..

رورو الشخبوطه said...

هلا شالسالفه..

خخ مره خميت معرض العطور مع اني ماستهلك هالسوالف :\

وحياج الله..

رورو الشخبوطه said...

هلا دلوعه..

اهم شي الشيبه مو معاهم :)

خخ مثل حالتي عيل..

وحياج الله..

رورو الشخبوطه said...

هلا اخوي سامي..

عاد حب البحر مشكله ديده الله يرحمها من كثر ما تحبه لي رحنا الشاليه تسهر مجابلته ..

اخييييييه..

وحياك الله..

رورو الشخبوطه said...

هلا زبوطة..

اللي اعرفه الجواتي بالجامعه لاحظت هالشي :)

وبالعافيه الملافع يارب..

وحياج الله..

خاتون said...

هوسي
بالكتب والقراءة
والكتابة لازم كل يوم أكتب بالكثير 3 أيام
ولي بين فترة و الثانية هوس بالبرامج العلمية و بالذات من فئة البيلوجيا أحب البيلوجي بشكل جنوني
عندي هوس بالمكياج لكن ما احطه لمن أطلع الحمد الله ..الله تاب علي بس مازال الهوس موجود ولازم أشوف اليديد
وعندي حب للشعر
أحب أصمم أكسسوارات وأزياء يت فترة كان هوسي هالشي بس طفحت تصاميم
وهوسي بالعلوج بشكل موطبيعي لمن أروح المحاسب يخترع من كم العلوج اللي أشتريهم وطبعا طول اليوم بس توني قررت من هالرمضان اعتزل العلوج لمن عرفت مضارهم

رورو الشخبوطه said...

هلا خاتون..

شي حلو ماشاءالله :)

تخصصج بيلوجي عدل ؟؟

حلو المكياج بس لاوقات معينه :)

صج راوينا شي من ابداعتج ولحظت اهتمامتج متنوعه ماشاءالله ثقافيه كتابه -قراءه -شعر..

نسائيه تصميم و مكياج..

انا هبيت بالعلوج بالثانوي تقريبا سنتين بس بالمدرسه برا ماحب ولازم كل يوم يبون لي علج خخخ..

وبالعافيه..

ومشكوره..

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads