Saturday, January 30, 2010

لمن لديه واسطة..

اممم في البداية دعوني أعرفكم بنفسي فتاه كويتيه ابلغ من العمر 21 ربيعا حديثة التخرج من جامعة الكويت تخصص إعلام شعبة صحافة .

كباقي المتخرجين من الجامعة او الهيئة بدأت البحث عن وظيفة كنت متفائلة حيث إنني ولله الحمد امتلك أهم المؤهلات من معدل مناسب و تخصص مرغوب و طموح ورغبة وحب العمل والانجاز, بحثت في الصحف عن اعلانات لوظائف تناسبني كما بحثت في مواقع الانترنت , لتكن النتيجة التقديم في بنكين عن طريق مواقعها و التقديم لأحد وكالات أنباء خخ بالتأكيد لا اقصد كونا و لاحد شركات البترول وبالتاكيد لديوان الخدمة المدنية.

النتيجة ستكون ع مراحل..

أبدائها بوكالة الأنباء ذهبت في البداية لتصوير مستنداتي الرسمية فاهو احد متطلبات العمل نسخ كثير لا اعلم مدى أهمية جمعها لديهم مع أن رفض توظيفنا هو أمر محتم ، وصلت للمكان المحدد قدمت أوراقي وعبئت استمارة التي لو كنت مكان لجنة القبول لقبلت نفسي وذلك بسب المعلقات التي كتبتها والتي بها حاولت أن أقنعهم بقبولي وعرضت لهم إمكانياتي ، وعند انتهائي من الاستمارة تم تسليمي ورقة تحتوي على موعد امتحان التوظيف دون وضع رقم عليها ليخبرني الموظف انه سوف يتم الاتصال بي لتحديد رقمي نظرا لعدم تواجد الموظف المختص بهذا الامر .

و كالعادة بحثت عن معلومات عنها بالانترنت لاجد من يمدحها والاخر يذمها واخر يخبر بان قبولهم يتم قبل نشر اعلان التوظيف بالصحف !!

نعود لورقة موعد الامتحان انتظرت اتصالهم بي منذ منتصف شهر يوليو وحتى يوم الامتحان في 10 من أغسطس وأنا انتظرهم لأقوم انا بالاتصال بهم استفسارا عن رقمي وللتأكد من موعدي وهذا أول مأخذ عليهم (لا توظفوني بس عاد مو من اول شي تكشتون فيني) لغير الكويتين لا توظفوني لكن لا تطنشون بي ...

وحان موعد الامتحان قرأت الجرائد لأنه اخبروني ان الامتحان سيكون بمحتواها ذهبت وانا خائفة وخصوصا انه لم يتم تحديد رقمي رغم ان الموظف المختص طمئنني بوجد اسمي في قائمة المختبرين اليوم.

(يوم الامتحان يكرم المرء او يهان ) الامتحان كان بمنتهى الصعوبة لم يتضمن أي سوال عن تخصصي بل أسئلة عامه .

انتهيت لأجر أذيال الخيبة راجعة إلى دياري منتظره اتصالهم لقبولي خخخ.


ملاحظات :


1-سبب نشري له اليوميات هو سوالفي مع بنات بلوقر قروب عن اهتمامات كل وحده منا وانا من اهتماماتي الكتابه ..


2- شكنت بقول :\ كالعاده نسيت في شي يقوي الذاكره :s


3- هالموضع كتبته قبل سنة وشهرين من جذي حاطه انه عمري 21 ..


4- بقولكم بعض الامثله عن اسئلة الامتحان..



ا- من وزير مادري لشنو :


1- فلان الدويله 2- فلنتان الدويلة 3- علان الدويلة 4- علانتان الدويله..



بيه انا ماحفظ الاسامي وماذكر الا العايله خخخ ..



ب- منو مدير البنك المركزي الامريكي ..... >> فراغ مو خيارات :\



فقرتين ترجمة كل وحده صفحة كامله هذيل زينين ..


و صفحتين نطلع الاخطاء >> صكني عقر بقر :\



واغلب الاسئلة عن برا مو عن الكويت .. انا توقعت بيشغلونا بقسم الاعلام فاهم شي طريقة كتابتنا واسلوبنا وصياغتنا الافكارنا ..


وكتبته بالفصحى لانه افضلهافي كتباتي خو كنت توني متخرجة وخلصه الميداني فكنت مبرمجة مخي ع الفصحى ..

Friday, January 29, 2010
السلام ..
اليوم بحط لكم بوست خفيف لانه امبيه حدي مستغربه احس هذا مو مكاني اهي اهي وانا وهالبلوق الاقرع المهم الظاهر مع الدموع طاحت المعلومات :\
الاثنين اللي فات رحت هالفيلم ..
امم قبل لا قولكم رايي فيه بعطيكم نبذه عنه..
اهو من بطولة جورج كلوني ودوره يتمثل بموظف شغلته انه يروح للشركات عموما اي جهة عمل عشان يبلغ الموظفين انهم نطردوا من شغلهم واستغنوا عن خدماتهم وخل يدبرون عمرهم كيفهم السبب بقيامه بهالشي انه مو كل مدير عنده القدره او الجراءه انه يبلغ الموظف بهالامر :\
انا لو يطردوني اقولهم فرقاكم عيد خخخ ..
نرجع للفيلم و حياته كل تنقل وسفر من مكان لي ال2 الطياره اهي بيته ..
خلال هالرحلات تعرف ع وحده وحب يستقر معاه , وهم راح ترافقه موظفه صغيره عمرها 23 << بصير كبرها فدققت ع حجيها لما قالت انا توقعت بهالعمر اصير ام و الخ الخ انا توقعت اكون ميته :\
رايي بالفيلم..
ولا بيزه مو حلو احلى شي فيه الممثل :\
الفيلم خلص واحنا طالعين لقيت سطرة شياب قاعدين قلت لاختي الظاهر حسبالهم ماخلص خخخ ..
ع طاري عندي سوال :
ما ودكم ترد السينما فتره الراحه بين الفيلم انه تقسمه نصين؟؟
انا ودي ووايد بعد خصوصا انه افلام تكون حزة صلاة فعلى الاقل نطلع نصلي ونرد نكمل واحنا مرتاحين ..
*********************************
والاسبوع اللي فات رحت مطعم زعتر وزيت ...
المنيو يونس .

طلبنا بيتزا ..(زينه مو وااو)

عروسة لبنه شفتها بايميل وتشوقت اذوقها وذقتها وكانت يمي يمي ..

لحم بعجين اختيار اختي شرايكم بالحركات خخ انا افتح واختي ودها تهفني بالكاميرا (حبيتها لزيزه)..


هذا نقانق بالجبن هم زين ..


الفاتوره ..


عن نفسي حبيته وجان زين يفتحون بدوامنا :)

ومرسوو ..

Sunday, January 24, 2010
السلام ..
قبل فتره رفيجتي دزت لي ايميل عن هالمعرض ..
وكان ودي اروح له ع ابو بروح له الاربعا مع رفيجتي بحكم انه عندها دوره هناك بس ماصادف وماتسوى اطلع 10 واهي تخلص دورتها 12 وشي ساعتين شسوي فيهم :\
المهم اليوم رحت له مع امي واختي ..
ماصورته لانه جايونه ماقصرت حطت تقرير كافي وافي عنه ماشاءالله..
بحط لكم حصيلتي ..
القرشه مثل ككاو نتويلا مادري شلون ينكتب لامي وكوكيز و ككاو مع برتقال ..


براوني ماكنت ناويه اشتريه بس ذقته ولا حلو بين وبينكم ذقت نص اللي اللي حاطينه للتجربه اختي تقول الي تبع لو تعرف عربي جان فشلتج خخخ..


وهم الكب كيك حلو.. وفي حجم اكبريصيرالقوطي في 4 قطع حبيته واسعاره حلوه البراوني ب2 والكب كيك هذا ب4 والكبير بو4 ق ب2 ..


ومرينا صوب الكوكيز اختي تبي ع بابا جابر الله يرحمه قالت لا هذا للعرض وطلبات للعيد الوطني مو للبيع قعدت اقط نغزات عليها قلت لها ترا عينهافي اللي ياكله يقص ضحكت وسكتت خخ..


وهم يسون لمواليد والمناسبات القطع اللي شفتها من 750 لي دينارين و يسون بيض الصعو مطبوع عليه اسم او صوره بس ماسمته بجم..

مالتي..





مالت اختي ذقتها توها مو ذاك الزود وهم انا ذقتها طلع التركيز ع الشكل اكثر وفي وحده تبيع اقولها فيه ع سبونج بوب تقرالي السعر خخ كلما سالتها راحت تدور السعر :\





وهم وانا احوس ذى نت تري وطلع عند كازو بككاو خذيت ربع كيلو بذوقه اول كنت اخذه من كاستانيا بس كسروا فيني اخر مره قالوا لي مام نكست تايم يو تك مكس وي كانت دو ذس اقين << انا كنت اخليهم يعطوني اللي العادي مابي مكس ..


وذوقني هالنوع وهم خذيت منه ربع كيلو ..



ويم او بالاحرى جباله كان الميسرة وي طلع اليسره خخخ ذوقوني جايهم ولما سالتهم عن مال الليل قالت تبين عينه تذوقينه قلت لها اي ولا تعطين هالجيس ياحليلهم كريمين خخ وعندهم ككاو لذيذ بس مايبيعونه بالمعرض:\




وبس سلامتكم ..
بدمج البلوقات ادعولي ..

Friday, January 22, 2010
السلام ..
اول امس شاركت بقروب بنات بلوقر تونا بالبدايه نتعرف ع بعض ونسولف احنا مجموعة بنات تقريبا فوق 10 ..
للحين شفت وحيده بلياهم و مخمليه و دلوعه وسمو الاميره وميوسه والطبع الحشيم ان شاءالله ماكون نسيت احد ..
وان شاءالله بيتطور هالقروب ..
مشكوره سمو ع هالفكره الحلوه ..
(2)

مجموعة شباب يصورون فيديوات سواء مواقف من حياتهم العاديه او تمثيل..
في وايد شغلات يدد ماشفتهم ...
بس اللي شفتهم وحبيتهم..
*ليلى والذيب..
*المذيع الجميله..
*بو خرشد ..
صفحته :
(3)

قروب يدز ايميلات كل سبت وميزتهم انهم متنوعين (اسلامية\ للبنات\ للصبيان\اخبار \سيارات\علم نفس\منوعات ..الخ) وايد احبهم وانطرهم..
صفحته :
اذاعة اويامال ..
عرفتها من مسج اعلاني وصلني وقلت بدشها ونسيت :\
عقب كنت افتر بايميلي جان اقى ايميل منهم عن حلقه للمدونات عاد دشيته وسمعته ماشاءالله كانت الحلقه زينه ..
قابلو فيها المدون الطارق واتصلت عليهم المدونه سمبسوت وفيها فقرات متنوعه..
http://oyamal.net/wp/wordpress/

(5)
كنت بقول شي وكالعادة نسيت :\
تذكرت :)
اليوم اليمعه يعني موعد الفيلم الهندي المدبلج كويتي ..
وهالشي بلشوه اعتقد من الاسبوع اللي فات شرايكم بهالشغله حبيتوها او لا؟؟
انا حبيتها ..
بس اغلب اللي اعرفهم لا ماحبوها :\
السلام..
انا عندي بلوقين وهالايام مو حابه هالشي اساسا صدفه صاروا 2 ماكنت مخططه لهالشي الاغلب يعرف قصة بلوقاتي..
المهم انا افكر ادمج البلوقين مع بعض بدون لا تروح الردود ولا المواضيع بس مو عارفه شلون ؟؟ في احد يفدر فيدني؟؟
وشرايكم بهالشي مو احسن ؟؟
ومشكورين :)
Saturday, January 16, 2010
السلام ..
اليوم بتحجى عن الاعلام بحكم انه تخصصي اول <<< ايام الجامعه كدراسه ماشتغلت فيه مع انه احب بس جوه مايشجع و الاهم ماتوفرت الفرصة للاسف ..
المهم بتكلم عن الاعلام الكويتي من حيث القنوات - المذيعين - الجرايد وبقط نغزات واللبيب بالاشاره يفهم :)
واستعنت برسومات الاخ عادل القلاف عنده اكاونت بفلكر و بلوق :)

اول شي بتحجى عن الجرايد خبري فيهم 15 جريده مادري اذا زادوا او لا انا بعرف الوزير اللي غير القانون مايدري انه في اوادم شغلهم يقرون جرايد الله يرضى انه باليوم اقرا 9 جرايد انحولت حسبي الله ونعم الوكيل والمسعوره تقولي انا قبل اخلص بسرعه ..
وانا اهز راسي عقب استوعبت الطيبه تشلخ ع راسي ع ايامهم بس 5 جرايد عن التفلسف ..
ولا الوزير اعلامي اكاديمي قلنا بسوي لنا شي كادر اللي مساكين يشتغلون بالاعلام عيزو واهما يحوسون ويشتغلون وماينعرض الا شغل الحبايب او هيئة للاعلام نتوظف فيها احنا خريجين الاعلام اللي طحنا بجبد نفسنا واهلنا مو راضين ايبونا لنا واسطه بحكم انه احنا مع القانون @@ اتوقع محد يمشي ع هالشي الا عايلتنا خخخ وغير جذي الهيئة تطور الاعلام الكويتي وهذاالاهم ..
يعني مانبي واسطة ونبي شروط للقبول مو كل من هب ودب يشتغل مثل ايام الجامعه طلبة صحافه مايعرفون يكتبون :\
لانه القبول ع الدرجات وفي ناس مضبطه عمرها مثل دكتور عطا بنت اي لانه حضر عرسها مع انه الفاينا ماحلت فيه ولا سوال واهو عليه 30 درجه مو شويه :\
المهم الجرايد كثرتها ع غير سنع زادت علينا المناهج ايام الجامعه و غثتنا بالدوام :\
كل اقول لرفيجتي اهي بعد خريجة الاعلام هذي حوبة دكاترتنا يزفونا ليش مانقرا جرايد يالله سخرية القدر :\
التلفزيون ..
وهم القنوات زادت ع غير سنع ابرز مثل القناة السور مالت حامي الديار اللي يقال انها من غير تصريح شلون بالله مادري @@ وزارة بطيخ..
ودي اعلق بس اخاف يقشوني امن الدوله :p

مو بس جذي كل من هب ودب صار مذيع مابقى الا انا بس انا ماانفع اخورها وصريحه بزود يومين بالكثير و مفنشيني خخخ..
لا وع كثرتهم برامج مبيوقه ومكرره و ماكو اعداد وهواش واثارة الطائفيه والفتنه مع جرعات من الملاغه اللي ماتنبلع ..




خخخخ ..

مره تحجيت عن المذيعات هالمره بتكلم عن اسوء وافضل مذيع ومذيعه ..

الاسوء..


استغفرالله يعني ع شنو صايرين مذيعين مادري لاستايل ولا قدره اعلاميه وماكو مؤهلات تساعد حتى نبرة الحس ما تنفع ..

عيل مذيعه تقدم واهي ماسكه ورقه a4و تقرا منها حتى اذاعة المدرسه ماسوها :\

الافضل :




ماشاءالله متمكن ومتوفره فيها الموهلات الاعلاميه من سرعة بديهة والقاء وينفع بمختلف البرامج سواء الحواريه او المسابقات ..




هم متمكنه القاءجيد وسرعة بديهة وتفكيره زين حسب اللي شفته ببرامجها ..


وصلنا للطامه الكبر المسلسلات ..

سوال يطرح نفسه اهي الرقابة خلت كل شي ويت للبلوقات خل يشوفون المسلسلات تستخف بعقليه المشاهد لانص ولا حوار والاهم ماكو واقعيه ولا منطق وتشوه صورتنا برا..












خلصنا من مسلسلات فجر السعيد بس مافتكينا منها فتحت قناة كامله :\
فطلع لنا النايف مادري الراشد اللي اهو بتاع كلو بالمسلسل بيكمل مسيرتها الظاهر ..
وحتى لو المسلسل حلو احداثه بالكثير10 حلقات بس لازم نمغط الاحداث ونحشيها سوالف بايخ وننسى المنطق ونختمها بشي خيالي سخيف ..


باختصار ليش كل هذا !!!

Thursday, January 14, 2010
السلام..
هالاسبوع بحلقة بنات وبس حطو فقره عن الاظافر واليوم كنت احوس بالمنتدى لقيت بنت مسويتهم كان ودي اجربه بسيطولون يتمون من اسبوع لي اسبوعين..
انا خاطري فيهم كيوم او يومين بس ..
المهم هذا اهما ..
اهما لزقات تحطينهم ع ظفرج وتخلينه تحت ليت مثلا ابجوره عساس يلزق وتقصين الزايد << اللزقات مو شي يديد بس توني ادري انه يبيله حراره عساس يثبت..

هذا بعض الوان اغلبهم الوان معدنيه ..

تكشخين اظافرج ومنظره مره وحده :p












وفي منقش بعد حبيت هالنقشه ..




صور تبين مشاهير مسوينها وهم ريانه وبيونسيه..




وهم مسوينهم ع شكل صور شخصيه جنه هذا اوباما انا ابي احط صورتي خخخ..

نسيت اقولكم انه من فرارتي بالنت عرفت انه اسعاره من 10 لي 15 يسونه لج بالصالون ..
وحده تبيعه كبكج كامل حسب اللي فهمته منها وب25 عاد مادري مع ابجوره ولا لا :p


وبس مرسي..

Tuesday, January 12, 2010
السلام ..
اليوم بسولف لكم عن دكاتره عجبه درسوني بالجامعه بمختلف التخصصات بين كليتي وكلية العلوم الاجتماعيه..
طبعا حش مباح وبدون ذكر اسماء ..
وقبل لا ابلش لازم احمد الله ع تخرجي صاغ سليم بدون اي مرض نفسي يؤدي الى انتحاري خخخ..
(1)
اول دكتور اهو دكتور اعلام غريب عجيب ..
على سبيل المثال ..
1- يعطينا بونس بالامتحان اوكي شي حلو بس البونس عنده لي حليتي غلط ينقصج درجات @@
2-كدشنا كرفنا ع غير سنع اهي ماده عمليه فشي طبيعي نشتغل بس لازم نشتغل مثل اللي موجود بالسوق والمتعارف عليه بالكمبيوتر مو الورق ..
عطانا هوموركين كل واحد (ماكيت) لغير الاعلامين الماكيت مثل الرسم البياني كشكل وتقسيم وعباره عن مسودة لصفحة الجريده ..
وعقب عطانا ماكيت كامل صغيرون بالضبط حجمه اي فور 60 صفحة لجريدة القبس نرسم عليهم 188 اعلان :\
وورقه المتطلبات شمسوي فيها الاخ حاط الاعلانات بس بشكل عشوائي مخربطهم يعني الاول مثل ص 60 ال2 20ص ال3 ص1 والخ ويقول اللي تبيه مرتبه وجاهزه كا في نسخة بس ها انقصها 3 درجات :\
طبعا محد خذاها لانه ينقص درجات بدون لا نغلط فمو ناقصنا بعد ..
اذكر يومها من الظهر لي المغرب وانا اسويه وماخلصت ورديت لي ال9 ظهري انكسر ..
ولما سلمنا اياه عقب ماصلحه قلت ابيه براويه اهلي جان يقول اهلج لو يشوفونا يقعدونج بالبيت مايخلونج تكملين << مدام تدري انه شي يفشل ليش تعطينا اياه :\
- الامتحانات يبي الاجابه اللي باله لو كلمه باله حاطه مرادف له ينقصج وجنه العيد :\
بالامتحان قمت اكتب كل شي عاد اهو طل بورقتي قالي شتكتبن قران 16 صفحه @@
قلت عاد ان شاءالله في شي يعجبك !!
وطبعا الامتحانات ازعاج مادري شلون قدرت احل..
- الفاينل كان مطلوب منا نصمم اعلان انا طلع لي سياييراهو سهل بس انا ميح فيهم المهم لما خلنا نداوم ع ابو كل وحده تقيمم اعلان ال2 ..
انا كنت رايحه مع رفيجتي وحتى لو مو يايين مع بعض شي طبيعي انقعد مع بعض خو رفيجات المهم دشيناالكلاس ولا يقول لنا انتوا كل مع بعض احنا سكتنا وقعدنا و عقب دشت بنيه متاخره قال لرفيجتها بي ليش رفيجتج متاخر شوفي هذيل وياشر علي انا ورفيجتي ويقول يايين مع بعض جان اقوله اي مارتني اليوم قال اخاف يحسدونكم قلت اذا في احد بيحسدنا فهو انت :\ جان يضحك ..
هذا جزء من اللي كان يسويه فينا ..
(2)

دكتور بكلية العلوم الاجتماعيه وايد يمد ايده اول مره شفته مسك بنت ع جتفها قلت يمكن لانها فري فعادي ..
عقب رفيجتي بالميد تيرم تساله حسيت قريب منها قلت معقوله ماسكه لا لا مو معقوله لما طلعت ولا تقولي انه مسكها @@ جان اطفرها و اضحك..
وعدى الكورس وصار يوم الفاينل وصلت لي سوال 27 شي جذي وجنه عن مجلس الخمه قلت له دكتور الاختيارات كله غلط والاجابه مو موجوده قالي امم لا موجوده ركزي وراح ماوعيت الا ايد حنونه ع ظهري قلت يحليها منو اللي بتواسين امبيه طلع اهو سبع البرمبه يقولي حلي ع الاقرب اي اقرب اي بطيخ الحين انا ببجي وين اقدر احل قعدت متنحه وايد وباجيلي نص الامتحان ماقدرت ارد احل الا عقب ماسويت توازن نفسي انه هالشغله موذنبي وبذمته كيفه :\
(3)

باول كورس بالجامعه خذيت عربي فكنت مره رايحه اسلمه البحث وبالمره قلت اشوف درجة الميدتيرم ياريتني ماقالت له ..
قلب السالفه فيلم مدبلج ..
انا:دكتور مايخالف اشوف امتحاني الميدتيرم؟؟
اهو: لا افهم ماتقولين..
انا : امتحان نص الكورس..
اهو : لا افهم ..
انا: منتصف الفصل الدراسي..
اهو: هم لايتعلمون لغتتنا وانتم تتفاخرون بلغتهم الخ الخ ..
انا : امي تتحجى جذي تقول تيرم وكورس..
اهو : ضحك وسكت ..
انا بقلبي سليحط ..

(4)
هذا انا بالميداني تلفون ومسن وايميلات وسايتات وجرايد ومدابج عشان احصل خبروساعات يفشلوني وماينزلونه سليحط :\
محاضرتي 11 بكيفان انا الساعه8 يالجابريه تخلص 12 محاضره كيفان ع طول منها للجابريه او شويخ وكل ثلاثا عقب الميداني اروح اغطي خبر يا بالخالديه او العديليه او الشويخ ارد بيتنا 8 بالليل ..
واخر يوم سلمونا جدول في الشغلات اللي نشرت انا نشرت 33 شغله اهما حاسبينهم لي 9 بس وا فوادي يارني الله يارني الله ...
طبعا ماسكت ..


(5)

دكتوره مليغه نفسيه اللهم ياكافي ..
خلتنا نشتري كتابين ونصور نوت الكتابين مافيهم شي يذكر الا صفحتين و او اكثر بشوي ..
والنوت قلنا صورناه دكتوره قالت اي خلوه عندكم عشان مايقولون ماعطيتكم شي !!
وبالامتحان راح ايكم هالسوالين صح وغلط المهم بالامتحان مايونا هالسوالين يونا غيرهم !!
ومره 2 خذيت عندها ع ابو ماكو مواد الشكوى لله ..
امبيه عاد هالماده ماساءه كدشتنا بجتنا عطتنا كوزات برزنتيشن سوت الشعب خلط واهي لا مايبت صبي او 2 لا شعبه كامله دمجوها معان والبرزنتيشن مجموعة شباب وال2 بنات لنفس الموضوع والطلبه يقيمونا @@
وعطتنا مشروع نصمم بلوق ونحط فيه10 بوستات كل بوست بيوم طبعا حزتها ماكنت اعرفه طلعت روحي يالله عرفت انزل صور و نقيم جم بلوق وهم نكتب تقرير عن البلوقات ..
وعقب نصمم سايت عاد هذاعباله يبيله تعلمنا خو احنا مو عباقره المهم وهقتنا لانها ماتعرف مدام ماتعرفين شكو تعطينا :\
اي ونسيت اقولكم مره زعلت علينا انا ورفيجتي ..
تهقون ليش ؟؟
لانه ماسلمنا عليها بحفلة التفوق هو غصب :\
لا وتبط الجبد تشوف منو اشطر وحده بالكلاس وتقول شغله التوب بس لانه معدلها عالي عسى ماشر:\

جنه وايد قرقت ..
:)
سبحانك اللهم وبحمدك اشهد ان لا اله الا انت استغفرك واتوب اليك ..

Monday, January 11, 2010
السلام ..
اليوم حبيت اسولف معاكم عن تجربة يديده لمنتجات منsally hansen...
اهو عباره عن سيت للريل..
في 4 قطع اللي تشوفونهم(سنفرة وكريم وستيك ومقراضة) والخامسه اهي دلاغ ع قولته بونس ..
طبعا هذي مو اول مره اجرب شي من هالماركه ..
وكانت اول تجربه لي اولت العام وكانت لسنفرة الريل هذي اللي اهي جزء من هالطقم ..
ملاحظة : بحط المنتجات حسب خطوات استخدامي لها ..
وايد حبيتها حسيت بفايدتها من اول استخدام واستمريت عليها لي امس وانا استخدمها وباستمر ان شاءالله ..

2- الكريم ..





الشكل ال2 هو بالسيت اهما نفس الشي بس اللي محطوطين اصغر ..


هم حلو توني امس خلصته صارلي تقريبا 10 ايام استخدم بس بذمه وضمير :)
3- الستيك ..

وعقب ع طول ورا استخدم هالستيك واخر جم مره لبست الدلاغ ونمت (كل استخدمهم قبل لاانام)..







والحمدالله النتيجة وايد حلوه ماشاءالله حتى مابقى احد مارويته قاعة ريلي خخ ..


وهم حبيت حجمهم حلو للي عنده فائض كريمات ويحبون يكودون مثل حالتي :\

وهم للسفرات القصيره ..

ونسيت اقولكم عن الدلاغ وايد حلو ومريح لانه قطن الخفيف مثل خامه البديات والبجايم مو مثل الدلاغات العاديه ..

لاني ماحب البس دلاغ عادي حزت النوم انقمت :\

وهم كبر ريولي بالضبط حسيت انه ريولي مقاس عالمي خخخخ..

وحصلته بلولو هايبر بس حسافه اخر مره رحت له اول الشهر وماحصلته :\ بس عموما منتجاتهم متوفره بلولو هايبرومركز السلطان ..



وبس سلامتكم :)

Saturday, January 9, 2010
السلام ..
قبل فتره رحت مع خواتي مطعم..
العاده كل مانروح له يانهون يا يكون بعد مابطل ..
وهذي المقابلات ..
زيتون وزعتر ولبنه وخبز ..




فتوش بس ماستمتعت فيه انا احبه يكون خيار وطماط وخس و خبز بس ماحب غيرهقلت للريال قال مايصير لانه اوردي مسوينه ..




تبولة لاختي تقول زينه مو وااو ..


هم ملفوف لاختي بس ماعجبها وانا ماحبه فماذقته ..


حمص باللحم او العكس عجبنا ..




روب عابو ماكو كبه باللبن قصوا علي فيه..

كبه زينه مو وااو اهي لي بس وزعته ع خواتي وبقت قطعه ..


مشويات مشكله ياحلات القيصر جبل هذول جعوص خخخ رجيم اجباري طبعا ماخلصناعقب وليمة المقابلات..
اللحم طعمه حلو اما الدياي نو ..


عجبتني خدمته وديكوره لايق مع لبس القرسونات ونوع الاكل:)
واللي حاب يعرف السعر18..
مع ماي كبير و2 بيبسي..


***********************************************
شخبوطة تساؤل ..
شنو عيوب ومميزات البلوق؟؟

بالنسبه لي :
المميزات..
1- امكانية التعديل عالموضوع باي وقت وبكل سهولة .
2-سهولة انشاء المدونه .
3- وجود البلوق رول اللي يساعدنا ع التعرف ع اخرما طرحه الزملاء..
4- سهولة تغير التصميم واضافة صور وغيره .
وبمستوى اجتماعي نتعرف ع ناس يدد نتناقش بمختلف المواضيع ونتفاعل معاهم ..
عيوبه:

1- وايد يتنح يعني ساعات ادش الردود صفر افتح الموضوع القى جم رد @@
2-ردي ماقدر اعدله سواءببلوقي او ببلوق غير.
3- مااقدر اضيف صور للرد ..
4- عادي انزل رد عقب مالقاه !!
هذا اللي بالي الحين ..
وت ابوت يو :)؟


***************************************


قبل فتره شفت هالفيلم ..
والبوستر يعطيكم فكرة مختصره عنه ..
باختصار المرا تدور حب والريال يدورالخرابيط قطع..
وراي فيه :ماحبيته ماكو قصه وفيه قلت ادب بالفكره ..


وبس سلامتكم ..

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads