Sunday, October 31, 2010
السلام عليكم ..

قبل فتره طرشت لي جايونه ايميل يشوق اجرام عن هالمنتجات ..

دزيته لمدمد وعقب تناقشنا خخ وطلبنا ..

واليوم خذيت غراضي من اختها ..

ماقصرتي مدمد تعبتج معاي وتعبت اختج بعد :\



اغلب الشغلات تشوق بس سويت تصفيه وخذيت هالشغلات ..

للجسم..

سنفرتين وصابون ..

وكلهم خذيتهم الحجم الصغير ..

 نبلش بالسنفرات ..

(1)

خلطة فيري داست Fairy dust


عيشي في عالم الخيال مع مستحضر (فيري داست) والذي يحتوي على أروع أنواع العطور الطبيعية اللذيذة و السكر الطبيعي الذي يساعد البشرة على اعادة توازنها الطبيعي و ازالة التقشرات الناتجة من حروق الشمس ، كما أنه ممتاز لعلاج الحساسية و الأكزيما و ليس له أية آثار جانبية ..

وله تأثير كبير أيضا في القضاء على خطوط السيولولايت و الدهون و يعيد لبشرتك لونها ، و يزيل البقع و يوحد لون البشرة ..كوني لذيذة مع هذا المستحضر الرائع



•Sugar scrubs are the most perfect way of getting rid of the dry, flaky skin that develops over the day.

•Sugar scrubs are user-friendly for all skin types because they leave no side effects in their wake.

•They work wonders in preventing skin ailments like eczema and psoriasis because they hydrate skin so effectively.

•Sugar scrubs are a great way to fight cellulite in the body.

السعر:
Big jar : 7.00 KD

Small jar: 3.500 KD.500

(2)

خلطة ويك آب Wake Up

 انتعاش رائع مع خلطة تقشير القهوة اللذيذة وزيت اللوز الطبيعي ! استرخي وجربي خلطة (ويك آب)فهي مفيدة لأزالة الجلد الميت من الجسم ، و هي مفيدة جدا لإزالة خطوط السولولايت و الدهون من الجسم و يساعد في تكسيرها ..

و الأفضل من ذلك بأن رائحة القهوة الزكية تدوم لفترة في جسمك و تنعمها

wonderful refreshing Coffe and olmond oil body scrub, helps you to remove your dead skin and its powerful for the silhouetted skin..

So wake up !! its time for your coffe


السعر :
3Price :
Big jar : 7.00 KD

Small jar: 3.500 KD.500 KD

(3)
Cotton Candyكوتون كاندي




تلذذي بروعة الرائحة مع صابون كوتون كاندي ستشعرين بالنعومة و الجمال بعد استخدامه اذ اه يحتوي على أنواع الزيوت الطبيعية مثل (زيت الفراولة و اللوز و التوت ) فهو ينعم الجسم ليعطي بشرتك ملمس القطن الناعم .
السعر:
Big jar : 7.00 KD

Small jar: 3.500 KD.500 KD

(4)
الصابون الفوار
Bath BomBs

اسمه :إن لوفin Love


سعره بدينار ونص ..

وفي وايد انواع تشوق ماشاءالله , بس ماخذيتهم لانه ماعندنا بانيو وشكلي بقزرها يابطشت او الحنفيه او ابوق حوض سمسم خخخ..

وخذيت بعد من مجموعة الشفاه ..
Lip Scrub

لشفاة أكثر نعومة جربي خلطات تقشير الشفاة التي تزيل الجلد الميت و تعطيها نضارة و نعومة من أول استخدام فقط!
سعر الحبة :
1.00KD

اخترت هالنوع :

هوليوود لبسhollywood lips


وحبيت تغليفهم ..



وحطينهم بنفس سلاسل بس ماصورتهم ..

متشوقه اجربهم :)

اما طريقة الطلب تكون من خلال مسج ..

مادري اذا عادي احط الرقم او لا :\

تحديث :اللي تبي تشوف المنتجات لباجي وتبي الرقم تدز ايميل لايميل بلوقي وادز لها الايميل الاصلي  اللي في كل المنتجات والتفاصيل:)

تحديث ب12 نوفمبر : طلع عندهم صفحة بالفيس بوك وهذا رقمهم :

65609656

اهني صفحتهم = link
ملاحظة : الشرح منقول من الايميل :)
Saturday, October 30, 2010
السلام عليكم ..

من قبل جم اسبوع وانا اتصفح مجلة زهرة الخليج شد انتباهي هالاعلان ..



خل انقل لكم شمكتوب لانه مو واضح :

نقدم لكم كاميرا a الجديدة .

جودة كاميرات المحترفين .. حجم كاميرات الهواة

تعمل كاميرا سوني  a NEXالجديدة تماما كالمحترفين بينما تتميز بحجمها الصغير .يمكنك بواسطته التقاط الصور الثابته وصور الفيديو بجودة كاميرات المحترفين بكل سهولة .تتميز هذه الكاميرا بنظام استشعار الصور بحجم يفووق حجم انظمة استشعار الكاميرات المدمجة التقليدية ب13 مرة ليتسنى لك تحويل لقطاتك الى صور احترافية.

والانواع اللي بالاعلان :

3-NEX-5 , NEX

وهذي انواعها بسايتهم ومميزاتهم وهم للمقارنة بين الانواع المتوفره (هني)

موجوده بالامارات و بامازون (هني)

اسعارها :

بحدود196.489 هذي الـ 5 ..

اما الـ 3 ب  165.835 KWD..

سالت عنه بالغانم مو موجوده :( واكيد بتكون اغلى من النت .

رايي الاولي واحتمال الختامي اذا ماشريتها خخ :

حبيت فكرتها انه حجمه صغير و وجودة صورها احترافية :)

لاني مااحب شكل ولا حجم الكاميره الاحترفيه ..

س: احد شايفها بالكويت او مجربها ؟.؟


Friday, October 29, 2010
السلام عليكم ..

قبل جم يوم كتبت مدمد عن هالمنتج (هني) وشوقتني عليه ..

امس كنت بكارفور ورحت اشوف اذا موجود او لا ..

حصلت انواع وايد بس اللي قالت عنه مدمد ماحصلته :( حسافه ..

وامس كلمت جايونه عنه قالت حصلته اعتقد بمركز السلطان و لما سالته اي نوع قالت ماكو الا واحد ..

من جذي نزلت البوست انه في شي يديد اضيفه خخخ..

وايد انواع شفتها بس اللي اذكرهم هذول :

(1)
Foamburst Shower & Shave with nourishing whipped cocoa butter & vanilla foaming shower

احب الفانيليا ..

كنت باخذه بس اختي ماخلتني ماتحب ريحتها :\


 (2)
Imperial Leather Foamburst Moisture Plus

اختي قالت لي عنه بس ماخذيته وتحسفت الحين :(
 (3)
Imperial Leather Foamburst Ocean Spa


(4)
Imperial Leather Foamburst Shower Gel Japanese

هذا اللي خذيته عيزت اتذكر ليش خخ وعقب تذكرت لانه مكتوب عليه ليمتد :\

ومكوناته :
 green tea rice milk and jasmine



وفي بعد واحد اخضر وجنه في انواع 2 بعد بس مو متاكده ..
رايي :

توني مجربته مبدائيا زوين بس استانست ع الرغوه وخصوصا لما تتمغط خخخ.., وهالماركة عموما احبها جربت جل شور العادي من زمان اعتقد البرتقالي وحبيته وشريته اكثر من مره وهم جربت صابونه العادي زين بس دسم ..

وسعره ارخص جنه ب100 :p

جنه 1.650 شي جذي ..
Thursday, October 28, 2010
السلام عليكم ..

عندي استئذان من الدوام وبيخلص الشهر وما خذيته :\ خخخ انا اهم شي عندي الاستئذانات ..

المهم اليوم رحت مع اختي نتغدا ونتسوق..

المنيو..


شوربة عدس زينه ..


ملفوف لاختي ماعجبها اذا كلت وحده زين :\ طبعا انا ماذقته لاني مااحبه..

تبولة اختي تقول زين بس ناقصها ملح وليمون ..

هم ماذقتها لاني مااكل بقدونس ..

الخبز ماعبر اللقطة عجيبه ماشاءالله تف تف تف خخخ ..
 فته بالحمص ماعجبتني :\ ولا عجبت اختي :\


طبقي كباب باللبن .. زين ..

الحساب:)
وبالعافيه علينا :)

عنوانه :

موجود بالافنيوز فوق جبال نافورة ..
Wednesday, October 27, 2010
السلام عليكم ..

ماشاءالله جرايدنا بالكويت وايد وحده تسكر وتبطل 2 بدالها !!

من كثرهم ماندري شنقرا بس الاغلب يركز ع جرايد معينه اهما الاساسيين القدم ..



اليوم كنا ناقش شنو مميزات كل جريده وشنو اللي يشد القراء لها تكلمنا عن اشهر 2 ..


الوطن ..

ميزتها ماشاءالله بكثرة الاعلانات , وبفتره تقريب ب2006 كانت تهتم بالملاحق كنت احبهم وخاصة مال يوم الاثنين كان اسمه الجيل الجديد ومختص بالجامعه والتطبيقي ومواهب الشباب بس الحين دمجوها بالجريدة الاساسية..

الراي ..

ميزتها بجرائتها , وتركز ع الجرايم والمشاكل وتعرض التفاصيل وساعات بالصور بعد ..
ولاحظت انه تعرض صور المجرمين بدون لا تغطي ويهم عكس باجي الجرايد !!
هم الاعلانات في صور مو ذاك الزود !

الانباء ..

اذكرها اول ايام عزها كان معاها ملاحق وكانت تنباع 150 فلس اغلى من الباجي وكنا نشتريها عادي ..

صج فرق بسيط بس في بدائل ..


القبس ..

احسها جريدة مثقفين و دكتورنا يقول انها مخصصه للمريشين وتهتم بالاقتصاد ..

اول كنت احب فكرة كل شهر يطرشون كتاب للمشتركين مادري اذا لي الحين معتمدين هالشي او لا ..

السياسه ..

امم مو حيل معها ماذكر قريتها لا قبل او الحين :\

والباجي كلهم يدد ..


دوركم الحين :

 شنو جرايدكم المفضله وليش؟؟

Tuesday, October 26, 2010
السلام عليكم ..

كلش ماكنت مخططه اني انزل بوستين عن الكتب ورا بعض كنت بحط شي 2 بس مالي خلق خخخ..

اليوم بلشت وخلصت هالكتاب ..


نوعه : ادب ساخر

سنة الإصدار :2010

عدد الصفحات :100

 

السعر: 2.500د.ك


تعليقي..

يعد هذا الكتاب الجزء ال2 لكتاب خنفروش التي تم اصداره العام الماضي(نبذه عنه هنا) , وهو عباره عن مجموعة من المقالات  الواقعية الهادفه باسلوب شبابي وباطار ساخر ..
 
تم من خلالها عرض العديد من القضايا :
-كالواسطة ..
-تعميم الاحكام ..
-نظرتنا لنفس المشكله تختلف حسب اثرها علينا وموقعنا فيها ..
-سياسة بعض الجهات بحل المشكلات بعد تفقمها ورغم معرفتهم بامرها منذ بدايتها :\
 
وبعض القيم :
 
-مثل الافكار الجديده والمبتكره دائما ماتحظى بفرصتها للنجاح والتميز ..
-الوفاء ..
- الاستعباط :p
اكثر مقال حبيته عن اغاي جعفر ..
 
رايي :
 
-كتاب خفيف وممتع وهادف واقعي باستثناء قصة بناته خخخ الله يحفظهم عندهم قصيدهم اسمها اجوع عليكم واهو بعدهم ماكملوا السنه ماشاءالله :)
 
-استمتعت بقرائته ماكان ودي يخلص بسرعه ..
 
- بالنسبة لي اشوف انه الاخ احمد الحيدر متميز بالادب الساخر اكثر من الرواية لكن مو مقياس للمقارنه لانه الادب الساخر مو مجال يديد عليه لا صارله سنين يكتب فيه ماشاءالله اما الرواية تعتبر تجربة اولى ..
 
وبنفس الوقت احس عندنا نقص بالكتب الساخره الكويتيه او الخليجة ,مو؟؟
 
اغلب اللي قريتهم لكتاب مصريين زينين كانوا بس ماحبيتهم وايد لانه احس موجهين للمصرين اكثر اغلبهم مكتوب بالمصري و عن مصر ..
Monday, October 25, 2010
السلام عليكم ..

هالرواية صارلي سنة متشوقه اقراها وقبل جم يوم حصلتها بالمعرض وشريتهاوقريتها :)



عدد الصفحات :255 ..

دار النشر : دار الساقي ..

سعرها : دينارين ..

النبذه الخلفيه :

 
قالوا إنها هربت من قبرها!

... منذ كانت صغيرة تتحرّش بالرجال، وتطفح ملامحها بسعادة الدنيا حين يحملها رجل بين يديه.

تقدم لخطبتها عشرات الشبان، ورفض أبوها تزويجها. ربما كان يشخى أن يُفتضح أمر ابنته، ويعرف القاصي والداني أنها فقدت عذريتها، ويلحقه عارها.

... وبعد أن فاحت "رائحتها"، أقامت أمها حظراً صارماً على دخولها وخروجها... لكنها كانت دائماً قادرة على خداع الجميع: كانت تضع في سريرها وسائد تغطيها جيداً، وتنسلّ بعد منتصف الليل إلى عشاقها الكثر... تُغويهم، وتقضي الليل معهم.
 
تعليقي:
 
المحور والحدث الاساسي :
هو اختفاء الشابه "جليلة " من قبرها ..
 
هل هربت ؟؟
 
اختطفت ؟؟
 
سرقت اعضاءها ؟؟
 
قضايا ومشاكل فرعيه عرضتها الروايه :
 
- تاثير الحب ع العشاق ..
 
- هيئة الامر بالمعروف والنهي عن المنكر ودورها !!
 
-هروب ا لفتيات ..
 
-الخيانه الزوجيه ..
 
رايي :
 
في البدايه كانت رواية صعبه من حيث الكلمات المستخدمه في السرد والاسلوب مبهم , بالاضافة الى ان طول السرد و تعدد الرواة شتتني في اكثر من مطرح بالروايه ..
 
مع هذا لم اتركها فقد شدتني لقرائته حتى النهاية ..
 
 نبذه عنها هنا
Sunday, October 24, 2010
السلام عليكم ..

اليوم كنت ماخذه جم شغله معاي الدوام عساس اتشجع واقوم الصبح واروح الدوام خخخخ ..

منهم هالشغله ..


 زميلتي بالدوام تحب الفرنش مانيكير وكنت ماخذته عشان تشوفه عاد زميلتي ال2 قالت احط لج منه طبعا وافقت خخخ وكان مابقى شي ع الدوام اقل من ساعه الا ربع تقريبا باجي نص ساعه..

اول شوفوا فرشة اللون لابيض دقيقه مو عريضه مثل الصبغ العادي ..




وبالعلبه في صبغين ابيض وردي شفاف و لزقات هذيل اهما ع اظافري مع اللون الابيض ..

النتيجة النهائية :)


وين حصلته؟؟

بلولو هايبر الري بس من زمان :\

وسعره ؟؟

كان بحدود الدينارين ..
Saturday, October 23, 2010
السلام عليكم ..

اليوم حاشني عصف ذهني كلمالي بنزل بوست وخليت الصفحة مبطله من ال10 لي الحين واخر شي نزلت شي غير عن للي مخططه له :\

توني راده من لاند مارك وشفت هالكورنر عندهم .
.
كولكشن  Alviero Martini بلمسات باربيكا ..

يعني اشكره مقلدينهم ..



صور قرب لبعض الجناط ..


اغلب اللي شفتهم مختلف الاشكال والاحجم كان سعرهم 1 اهو 9,900 د.ك..
Friday, October 22, 2010
السلام عليكم ..

مؤخرا جربت هالكاكاو اختي الكبيره  تبينا نذوقه عشان نقرر عقب نعتمده لمناسبه او لا ..

عجبني شكل العلبه :)


محتوياتها :


عباره عن نص كيلو منوع من الكاكاو ..

في وايد انواع بشعر البنات والفول السوداني والليمون و الفراوله والبسكوت وجوز الهند وقمر الدين ... الخ ..

الاسعار :

 النص كيلو 5 ..

والكيلو ب9..

والتوصيل المناطق الداخليه دينار ..

والجهرا والاحمدي دينارين ..

عنوانه :

 مدينة أسواق القرين , شارع 25, محل رقم 203 ..

للطلبات و التوصيل :

 99222860-  25232865 ..

*السايت *

رايي :

الكاكاو نفسه طعمه زين , اما الحشوات تختلف ويتفاوت طعمه بين الزوين والعادي واللي مو حلو حسب النوع ..

واللي تشتغل بالمحل عليه نفس اللهم ياكافي خطر لا تطقنا :\ الله يعينها ع نفسها ..
Thursday, October 21, 2010
السلام عليكم ..

هذا 2 كتاب خلصته من المعرض ..

واهو يعتبر اول رواية للزميل المدون احمد الحيدر..


وكانت الروايه مكتوب بالفصحى والعاميه , السرد بالفصحى اما الحوارات فكانت بالعامية ..

اما نوعها فهو قصة اجتماعية عاطفية ..

ركز الكاتب فيها ع العلاقات الاجتماعية والعاطفيه (الحب بين الزوجين , الابوة , الامومة و الصداقةو الانفصال و التضحية)..

طغت المشاعر فيها ع الاحداث ..

الحب والتضحية تمثل بعلاقة يوسف وسارة , وام راكان وابو راكان ..

الابوة بين يوسف وبنته شهودة ..

الصداقة بين يوسف وابو راكان , وردة وام الخير << نكات لاهم الشخصيات :)

الانفصال بين ام روونه و زوجها ..

رايي :

مثل ماقالت المشاعر طغت ع الاحداث , الاحداث بسيطه جدااا ..

انصدمت من النهاية توقعت البطلة ماتت << يعني مابي اقول منو اهي عساس ماحرقها عليكم خخخ..

واسمتعت بالحورات خصوصا اللي تجمع يوسف وبنته و البنات الصغار روونه و شهوودة ..

بس عموما زينه وخفيفه :)

اما سعرها :

2.500 د.ك..

موجوده حاليا بمعرض الكتاب بدار النشر بلاتينوم ..


About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads