Monday, April 30, 2012
من العام لاحظت انه البق يتسلط علي من بد الكل  بالكويت  مايقصر فيني بمكانين ولا 3 مره وحده (مره بنص يبهتي اختي استلمتني كل كلمه وال2 انتي ودوار البدع اللي بيبهتج خخ) وحتى بتايلند بس هناك يتليعن بحزة النوم اقوم خدي وارم ولا صبعي ,,

يوم اليمعه رد لي لما بلش وتعبت منه تذكرت انه عندي كلينكس يوخره ..

هذا اهو ..

اللي ريحني انه مكتوب مكوناته مواد طبيعيه ..


اللي خوفني :

1-انه الحامل مايصير تستخدمه ..

ملاحظة : لقراءه باقي التفاصيل اضغط ع صوره تتكبر ..

2- لما استخدمته شفت لونه قلب محومر حسبالي لون بيجامتي (ينث ) امم بالعربي شنو امم يتسرب 1!! عقب اكتشفت انه صبغ اظافري اللي راح :\


هذا صوره الكلينكس استخدمته بعد نص ساعه كاسيتون (مزيل صبغ الاظافر) والصراحه مبدائيا حبيته عجيب يوخر بسرعه ونتيجة حلو ومايجفف الظفر واهو الكلينكس نفسه ما ينشف بسرعه ..

يعني اذا ماراح استخدمه كطارد للبق باستخدم كاسيتون :)

وبالنسبه لوين حصلته؟

لقيته بالسوق الحر بمطار دبي ..

اما سعره :

ماذكره لانه مخمطه وايد و مو انا اللي دافعه بس اذكر انه رخيص ..

Sunday, April 29, 2012
اليوم كنا بمجمع وصدفه شفنا اعلان سينابون لمنتج يديد منزلينه :



اعلانه باكثر من مكان بالمحل وباكثر من شكل..





بالهوا وعند الكاشير



واهو عباره عن سينابون العاديه بس ككاو اكثر وكريمه اكثر ، ومتوفره بنوعين الفرق بينهم الكرز (حسب كلام البياع)..





طلبي اخترت اللي بدون كرز ..



متوفر لمده محدده ..

وسعره : ١.٥٠٠ د.ك

رايي :
نفس السينابون العادي مثل ماقات فوق بس جوكلت وكريمه و اثقل شوي..

- Posted using BlogPress from my iPhone
Saturday, April 28, 2012
قبل فتره جربت هالمعجون بعد مامدحولي اياه ودعايته بكل مكان تلفزيون وبالجمعيات وتميت فتره استخدمه وخذيته لانه متخصص باللثه (مكتوب عليه خبير العناية باللثه )





وفي منه نوعين اللي اخترته كان بالفلورايد
ومكون من املاح معدنية وخلاصة ٦ اعشاب طبيعيه (ميرمية،نعناع ،نبات المر،اكيناسيا ،بابونج،راتانهيا)

رايي:
ماحبيته كلش لا من مفعول ( النزيف مستمر وزاد ) ولا من طعم طعمه مر مرررررررررر ماقدرت استسيغه بس كملت علبو انه مفيد لما شفت انه ماكو فايده وقفت ، لانه صج طعمه ضيم !



- Posted using BlogPress from my iPhone
Friday, April 27, 2012
وايد انام ماشاءالله واايد احلم عكس قبل ..

واايد احب افسر احلامي فمره لقيت هالبرنامج متعلق بتفسير الاحلام ونزلته ..


اسمه :تفسير الاحلام والمنامات


 سعره :
في نسختين وحده مجانيه وال2 بفلوس بجم بالضبط ما اذكر بس مقارنة بباجي البرامج يعتبر غالي ..

انا نزلت المجانيه وعسى مافتحت شي قالولي تبين تشوفينه نزلي البرنامج بفلوس !!

حسبالكم مانزلته لا نزلته خخ ..

وتوني للامانه الاحظ انه كاتبين بالابل ستور ملاحظه عن النسخة المجانية بس تمكنك من تصفح الفهرس والمقدمة وبعض اجزاء الكتاب للتحقق من محتواه قبل شراءه..

اول صفحة فيه :.

 

وهذا الفهرس:


رايي :

اهو كبرانامج متعلق بالاحلام الشرح اللي فيه عنه حلو كمعلومات ام التفسير لا , طريقة التفسير مقسم حسب الحرف بس في وايد احرف الرموز اللي فيه شويه 3 او 4 !!

يعني كتفسير ماعجبني :(

متوفر بالابل ستور..

ومصدر الصور هني

اليوم مريت سبلاش وبطلعتنا اختي شافت هالجوتي وانتوا بكرامه نسخة تومز ..


وهذا الاصلي ..


 نفس الشي بالضبط بس فرق العلامه و القاعه الاصلي قش والتقليد ابيض ..

وفي وايد  موديلات صورت هذا بس مالقيت نفسه بسايت تومز..


وفي ساده البيج يبين بالصورة الاولى  وفي الوان 2 منه وفي مقلم جنه بس كله مو نفس اللي بالصوره الاولى ..

انا مستغربه ليش يقلدون تومز ؟؟

اول شي مو غالي 2 شي قصته مو ذاك الزود ماحبيتها 3 شي  ميزته انه مريح و انه اذا شريت جوتي وانت كرامه بيترعون لفقير بجوتي بعد (فحلاته يقلدون هالميزتين مو الشكل والخامه :\)

اللي يبيه موجود بسبلاش الافنيو ..

سعره :
جنه ب6 وشي ..
Wednesday, April 25, 2012
هالكتاب يعتبر ٢ قرائتي لكاتبه علياء الكاظمي :








واهو مقسم لقصتين ؛
الاولى: بعنوان ورود ملونة
قصة مليئة بالشخصيات :(الابطال الرئيسين)
من عائله١
هند: الابنه الكبرى امرأه في منتصف الثلاثينات غير متزوجة وتعمل في مختبر احد المدارس وتحب نقل الاخبار .
هتاف : الابنه ال٢ وهي متزوجة من نبيل الذي تعرض لحادث دخل ع اثره في غيبوبه لعدة سنوات ، ولها منه ابن واحد يدعى فواز.
هبه: البنت ال٣ وهي فتاة ناجحة ومتميز في عملها في مجال التسويق وهذا النجاح اثر ع حبها وزواجها بطارق .
هاله : اصغر البنات واهي فتاة هادئة مخطوبة لمهندس يدعى عماد عاشق للكتابة.
جنات : شقيقتهم من الاب والداتها عربيه واهي طليقة ابن عمها هجرس.
هيثم : الابن الوحيد يعشق الرسم وتجمعه هوايته بسماهر. .
هجرس ابن عمهم ذو الشكل الدميم والشخصية السيئة ولكنه بالمقابل ثري.

المحور الاساسي :
الصراع من اجل الحب .
الزورج ال٢ سواء من مطلقة او من عربيه او بالسر او من اجل الرغبه في انجاب ذكر.

القصة ال٢:
رحلة الصمود:
قصة واقعية لفتاة فلسطنيه تحكي فيها معاناتها مع الغربة والزواج والحب.
غربتها بسبب احتلال فلسطين في الكويت ثم انتقالها الى كندا بسب الغزو العراقي(والهجره الي دوله اجنبيه.)
معاناتها في الزواج كالمصلحة وزواج بالسر وبخل الزوج والزواج الثاني (مع العلم انه في كندا قانون يمنع التعدد).

عبارات اعجبتني:
-في ص ٣١٥ عندما يكتب للمرء نصيب مع شخص ما فانه يجده امامه بلا تخطيط
-ص٣٥٧ من كان بلا وطن عاش بلا اهل .

-.Posted using BlogPress from my iPhone
Tuesday, April 24, 2012
هالسايت قديم هبيت فيه قبل جم سنه وسجلت فيه بعد والحين رديت له ذكرتني فيه مس بوتمبه عضوة بكويتيات حلو للتركيبات :
اي شي اشتريه اتوهق مادري شلبس معاه ادش هالسايت اكتب لون ولا شرح بسيط للقطعه مثل منقط /مقلم/تايقر..
وانبهر بالتركيبات شغلات ماتخطر ع بالي ..



السايت مو يديد بس في وايد مايعرفونه وايد يتوهقون بهدومهم مثلي ..









نمونه من التطقيمات (هذا اللي لقيته جدامي اللي فيه احلي)






مصدر الصور google...
- Posted using BlogPress from my iPhone
من فتره كنت بنزل هالبوست بس اليوم تاكدت من الخبر ..

كالعاده امره خصوصا اذا سوو سييل بس هالمره غير مو مثل العاده السييييل شامل كلشي والمحل يصفر ..

رحت 4 فروع :

-الافنيوز كان الوضع كبضاعه طبيعي مو فاضي مثل باجي بس مافي كولكشن يديد ..

-الجهرا رحت ولا المحل مو بس البضاعه اللي كشت حتى اهو صغر نصه تقريبا  انشال :\

- رحت فرع الخالديه  ولا المحل مسكر وظلمه وجنه فاضي بعد ..

-رحت اليرموك توقعت الجمعيه بكبرها مااحصلها خخخ بس اشوه موجود وفاضي :\..

اليوم رحت له وشريت جم بنطرون لماا سالتهم تسون تصفيه قالت لا بنسكر قلت اي هذا قصدي ليش عاد ؟؟ جان تقول مادري ومو بالكويت بس بكل العالم !!
سالتها متى ؟؟
رت باخر هالشهر ..

وهذي صوره للوضع بالمحل تصوير مدمد اعتقد لفرع الدعيه ..

عاد احبه وايد احصل فيه شغلات خصوصا بالسيل واروح احر رفيحتي فيهم خخ..

حسافه :(

مصدر الصوره الاولى (LINK)
Friday, April 20, 2012

مختصر العرض ع صورة (لمشاهدتها بشكل اوضخ اضغط عليها تتكبر)والتفاصيل هني LINK
بعد شهر وشي ان شاءالله بشيل الريتيرنر وخاطري اسوي ابتسامة هولييود بس محد مشجعني عليها غير اختي ومااعرف دكاتره سنعين :\

المهم حاليا افكر بتبيض ضروسي كحل مؤقت ع مااعاج لثتي وع ما القا دكتور سنع ..


ابي بياض شاهق خخ مو العادي ابي لي ابتسمت الناس عيونهم تدمع ويتصددون  من بريق صفت اللولو :)

عندي هالتبيض المنزلي استخدمته مره وماعجبني طريقته تحطينه بالقالب ع كل ضرس نقطه يعل قلب قوامه جل ماينزل بسرعه وصعب اسوي نقط جربته مره  بس وهم اهو 4 ابر كل ابره اسبوع تكفي انا من اول يوم نص الابره مخلصتها خخ ..
ابي شي غيره اسهل ..

مابي تبيض ليزر مو صحي ولا اللزقات تاثر ع الضروس مو ناقصني واستخدمت معاجين مااستفدت واختي تقول هم مو زين !!

الحل الوحيد التبيض المنزلي ابي 1 سنع بس مو اللي فوق غيره..

جربتوا شي يسوى ؟؟؟؟
Thursday, April 19, 2012
من فتره نزلت بيتزا هت نوعين يدد من البيتزا

 
تشوقت اجرب البرغر خصوصا اني من عشاقها ومو اول مره اجرب التشيز برغر بيتزا جربتها باكثر من مكان

واهي عباره عن عجينة البيتزا مع طماط وخس وبصل (شلته مااحبه ) وجبن وطبعا برغر وصلصة.

وتقدم بطريقتين :
بروحها ب٣ و١٥٠ جنه .
او عرض مع ٦ جوانح دياي وقطع الخبز و بطاط ودجز صغير ب٤،٩٥٠ جنه بعد مو متاكده.

رايي:
حبيتها طعمها زين والمكونات فريش واممم اذا ماخاب ظني الذ بيتزا برغر جربتها وبيتزا هت وايد تطور وقام ينزل شغلات لزيزه .
علي بالعافيه


- Posted using BlogPress from my iPhone
مساعه كنت احوس بربوع قوقل ولقيت هالبلوق عجبني وخصوص البوستات اللي عن تطبيق لوكات المشاهير بسعر ارخص ..

مثل هذا :


Tuesday, April 17, 2012
اليوم قعدنا ع هالكارثة اللي اعرفه بس مو متاكدة عن المكان والحدث بساللي سمعته حريق تواير في امغرة:





الله يحفظ الجهرا يارب ❤


- Posted using BlogPress from my iPhone
Monday, April 16, 2012
Everyone says girls love shoes and that's totally right
feel comfy and elegant with Tory Burch flats & sandals
(بضاعه من امريكا )

sizes from 35 to 42

 







للطلب:99388387
instgaram:qh9111

ابلكيشن يديد نزلته قبل فتره وامس دزوالي ايميل فرديت استكشفه:

اهو متخصص بالستايل والفاشن والبيوتي:



والحلو في انه في تفاصيل اللوك :



وفي سيرج بس لي الحين ماجربته:

والاحلى انه متوفر لاجهزة ابل و لنظام الاندرويد..
وسعره : free

رابط التحميل (link)


- Posted using BlogPress from my iPhone
Sunday, April 15, 2012
اول ماشفتها قبل شهر تقريبا ماكانت عاجبتني بس اليوم لما شفتها بديزينات متنوعه  حسيته احلى ..






ببلز سبا يسونه بس العادي مو النقشات .. 
Saturday, April 14, 2012
هالمره الريوق بيتنا مو الدوام ، امس اختي طلبته لليوم واول ماوصل قعدوني من النوم حسباالي دوام كنت بطيح غشاينة خخخ ..


طلبنا جاطين جاط مقبلات وسلطات وجاط حمسات




جاط الحمسات :
(في حميسه النخي ، ومسخن ، دياي بالكريمة ، حميسة سبانخ ، حميسة بطاط ، حميسة بديان)
بالزوايا الصغار حاطين جبن مثلثات و٢ زعتر ، زيتون


اما جاط المقبلات :
في فتوش و فته بديان وسلطة ماينيز و سلطه ماعرف شنو اسمها و نوعين جبن
والزوايا فيها مثل الاول

سعرهم :
الجاط ب ١٠

رايي :
حجم كبير وكمية راهية وطعم زين بس اغلب الشغلات ماذقتها لانه ماحب البديان ولا البصل ولا الفلفل الاخضر و لا السبانخ (عسره)

- Posted using BlogPress from my iPhone
Friday, April 13, 2012
امس كنت احوس صوب الاكسسورات ابي جم شغله دشيت اكثر من محل منهم سبلاش الافنيو ولقيت فيه هالجنطة:
وفي منها لون ٢ اهو الفوشي

سعرها:
10 د.ك
اضغط ع صوره لمعرفة الاسعار في مختلف الدول ..
موجوده بسبلاش الافنيو ..

وهذي الاصليه؛

 
- Posted using BlogPress from my iPhone

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads