Sunday, April 3, 2016
السلام عليكم ..
 
من سنتين هبيت اتابع مسلسلات باليوتيوب من طيحتي ال2 بالمستشفى علبو اكسر الملل ..
 
وعقب رديت لحياتي الطبيعيه وبين فتره وال2 اتابع مسلسل شفت وحبيت حيل عشق النساء وشفت مسلسل لو ماكنت اقدر اشوفه بعرضه الاول لانه كان برمضان وكنت حييييل مريضه واهيا البطله مرضت قلت لا مو ناقصني ابي شي يطلعني من جو المرض  << هذول مسلسلات لبنانيه ..
 
شفت مسلسلات كويتيه اللي اذكره يامن كنت حبيبي و رصاصة رحمة هذا كل ب2014 ..
 
العام شفت مسلسل مصري وحبيته غريب احداثه مو متوقعه اهو حالة عشق ..
 
هذا اللي اذكرهم ..
 
وبما انه مزاجي اشخبط قلت انزل بوست عن اخر مسلسل تابعته او بالاحرى قبل الاخير وبما انه مسلسل يديد توه يعرض هالسنه 2016 والحين يحطونه ع mbc4  يسوى اكتب عنه بوست ..
 
شدعوه هالمقدمة خخخ معلقه صارت ..
 
نبلش عن المسلسل ..
 
ابطاله :
المسلسل احداثه في لبنان وقصته لبنانيه واغلب ابطاله هم لبنانين بس في مشاركة من نجوم مصريين و سوررين ..
-نادين نسيب نجيم (سمرا)
 
 -أحمد فهمي ( الحكيم - د . تامر "مصري")
 
-طوني عيسى (سيف ولد عم سمر اهو الريس مادري المعلم ويحب سمرا يحبها ومتزوج 2 وعليه مجابلها يسوطرها خخ ) تمثيله ماشاءالله اهو من عشق النساء وانا احب ادواره وهني متكن ماشاءالله  حتى بنظراته وحركة راسه ..
 
-باميلا الكك ( ريم وصج تقنع بالدور ماشاءالله وايد في مشاهد تصكني العبره من سبتها )
 
-وسام حنّا ( نسيت اسمه !  جنه وائل المهم هم هذا مثل بعشق النساء وبالتمثليتين يبط الجبد دوره يعني اجاده ماشاءالله من الغجر وكل مشاهده بصوب ولما صرخ امييييييييييييييييي يبي يعرف امه منو بصوب كنت بقوله انا امك بس كسرت خاطري بروحي مشاعر الامومه فايضه عندي)
 
-غريتا عون ( ام رامي ومرت ابو سمرا  جنه اسمها هنيه)
 
  -تانيانا مرعب ( مرتوه لسيف اللي كله يطقها ويزفها مسكينه )
 
 -جنيد زين الدين ( الغثيث ليس ع قولتهم يعني ليث اخو سيف ولد عم سمرا )
 
 -خالد السيّد ( ابو سمرا مايحتاج امدح تمثيله لانه من كثر ماضبط الدور ماشاءالله بط جبدي خخخ )
 
-ختام اللحام ( ام سيف - مرت عم سمرا )
 
-سمر سامي (صبحية  مره ربيتها قاصره كلمة بالكويتي يعني مخديه لا هم بالكويتي يعني بالعربي فيها تخلف عقلي وتعرضت لاغتصاب )
 
-محمد حداقي ( دكتور سوري هاجر الى لبنان بعد حرب الشام و اهو صديق د. تامر )
 
  -منى واصف ( المفروض اهيا اسمها بعد نادين اهيا البصاره راويه اي احبها وحابه دورها من جذي برزها فوق خخ )
 
 -حنان سليمان ( ام الدكتور تامر " مصرية ")
 
-ناصر سيف  ( ابو الدكتور تامر " مصري ")
 
وفي وايد شخصيات ماعرف اساميهم بالصج بس لهم دور فعال مثل جميل صديق سمرا و خالة سمرا وميمو بنت عم سمرا واحمد وسحر هذول من الغجر وهم سامر اخو الدكتور السوري له قصه صج دور بسيط بس يمثل بحث مهم ... الخ ..
 
القصه :
تدور احداث المسلسل وسط مجتمع مهمش يسمى بالغجر او النّور او الرحالة ( ماكنت اعتقد انه في عرب من هالفئة توقعتهم لاتنين ومكسيك ربع كساندرا  ) ..
 
ومهمش لانه محروم من ابسط حقوقه اهما ببساطه مجموعة عوايل تسكن في خيم وعشيش ماعندهم هويه " جنسية " ولا اواق ثبوتيه الا ورقه من المختار هالشي يمنعهم من حقهم بالتعليم و العلاج وغيره من حقوق اساسيه لكل انسان ..
فيهم اميين وفيهم ناس متعلمه بس مايكملون حدهم 4 ثانوي ومايدشون امتحانات النهائية !!
 
حرمانهم من ابسط حقوقهم واهمها وتهميشهم خل الجريمه تنتشر بينهم من قتل ! تهريب اسلحة وتجارة مخدرات وسوري ع لفظ هم دعارة !! اغتصاب و سرقة  وخطف...
 
والى اخره من جرايم ..
 
ونتيجة تعرض اطفال المخيم " الغجر" لمرض مفاجئ وغريب تم الاستعانه بطاقم طبي او وفد طبي عربي "خيري\ تطوعي" اسمه اطباء حول العالم لكشف وعلاج هالحالات كان احد هالاطباء الدكتور المصري تامر هناك تلاقى مع سمرا لانه اختها ايه كانت احد ضحايا المرض  وعقب حبوا بعض ( مابي احرق عليكم القصه ) شصار ع حبهم وشنو ردة فعل اهل سمرا خصوصا انا ولد عمها يحبها ويبيها و شنو ردة فعل اهل د. تامر واهو اساس متزوج ومرته تعاني من مرض نفسي اثر ع الانجاب عنده ؟ واهو من عايله غنيه اب عن جد كلهم دكاتره !
 
هذي القصه او الحدث الاساسي ..
 
وفي احداث ثانيه تطرقوا فيها لقضايا مهمه مثل الارهاب والتطرف ..
 
عدد الحلقات :
 
60 حلقه ..
 
موجوده بهالسايت ( هني ) بس ناقصه حلقتين اهما 48 و 52 ..
 
 
ومثل ماقلت فوق حاليا يعرض ب mbc4 
 
 
مواعيد عرضه :
 
الأحد - الخميس الساعه 6 مساءا بتوقيت السعوديه ..
هذا اكاونت بتويتر للمسلسل اسمه @samra_series
 
*اهو اللي خذيت منه الصوره اللي بالبوست ..

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads