Saturday, October 18, 2014


ليش بكتب هالشي ! مو المفروض انساه او احاول انساه ؟! بكتبه لانه كنت اسوي سيرج وانا مريضه ابي معلومات عنه بالعربي ماحصلت الا شغلات بسيطه ماتفيد واغلبه شغلات علميه وفي بعد شغلات غلط ! 
كنت ابي تجارب تعطيني امل وتفاؤل بالانجليزي حصلت بس مو اللي ابيه ! 
نبلش ..
*البدايه ..
شهر ١٢ -٢٠١١م ..
كنت نايمه وحسيت بعوار قوي من معدتي يصعد لي فوق بشكل عامودي لي صدر عقب صار افقي ع صدر ي (يعني ينتقل يمين ويساو ) ورد كمل بشكل عامودي لي بلاعيمي !
ماكنت مستوعبه العوار حسبالي حلمانه ! بيني وبينكم حتى ماقعدت من النوم دش بالحلم حلمت اني تعبانه ومعاي خالتي ومرت خالي متوهقين فيني ومايدرون شيقولون لامي! ماذكر شنو ردت فعلي لما قعدت ومتى قعدت اصل اذا عقب الحلم او الصبح عادي!
المهم ٢ يوم رد العوار بنفس الحزه بحزة النوم بس هالمره توني غافيه ع طول فزيت وقعدت اتقلب بالفراش من العوار..
٣ مره يالي العوار هم بالليل بس ! هالمره كنت قاعده ولاهيه اطقطق بالاب توب من قوته بچيت ! مادري ليش العاده اتحمل يمكن لانه تكرر ! مايندرا ..

*اعراض اخرى ..

عقب تغير الوضع مو بس عوار بلشت وانتوا بكرامه ارجع / استفرغ ..
وكان كل مره يزيد ! مو بالكميه لا بعدد المرات يعني بالبدايه كان مره بالشهر عقب مره بالاسبوع عقب مرتين او ٣ بالاسبوع بعدين صار بشكل يومي وعقب اكثر من مره باليوم !
وايد شغلات وقفتها لانها تعبني ..
مثل الماي البارد يخلي الاكل يوقف ماينزل حتى بلاعيمي ! متى لاحظت لما كنت ناجبه لي سلطه معكرونه بصحن صغير حيل يعني قفشتين ان كثر وكنت اتناقش مع اختي ناقش حاد بس انا قالبتها كوميديا خخ مامداني شربت الماي مانزل واسمع حس اللي حسبالي بموت ! اخوي كان جبالي يصرخ الله الله الله ! والحمدالله عدت (هالحجي ب٢٠١٢)
 الكباب والتكه والخ اللحم المشوي وايد ثقيل بس عقب ملاحظه الدكتور انه مرضي مو يدد من زمان فيني خلاني اذكر انه انا من قبل لما اكل مشويات اتم اقص جني برجع من كنت بالثانوي جنه ! 
وبالجامعه وقفت ماقمت اشرب عصير او شربت /فيمتو برمضان لانه يخليني انغث ولقمه زايده ماقدر احطه بحلجي!

وهم مقدار اكلي قل ماقمت استمتع بلقمتي كنت اكل صمونتين ! قمت اكل نص صمونه وانغث! 
نزل وزني ؟! 
تصدقون لا باول سنه نزل بس كيلوين كنت ٥٦ صرت ٥٤ وهذا طبيعي يعتبر!

* رحله العلاج ..
خل اقولكم عن شخصيتي بالتعامل مع المرض نوعي ماشاءالله اتحمل لاقصى حد واحاول اخدم نفسي يعني اعتمد ع نفسي ! وحكمتي بالمرض انه اذا مرضت فهو يشفيني ! ساحبه ع شي اسمه طب خخ..
بس بلغ الامر مبلغه ماقدر اتحمل الترجيع وكلماله يزيد شكله مو شي عارض وبيروح لا ! نظريتي لازم اغيرها و واروح الدكتور ..

اول مستشفى رحت له طبعا اهو مستشفى الجهرا الموقر ! 


وهالكلام بمارس ٢٠١٢ للي مايعرفون بالاشهر خخ شهر ٣ ..
رحت الدكتور ماقصر عطاني كل التحاليل والفحوصات اللي احتاجها ( سونار، تحليل دم ، نفخه للتاكد من عدم وجود جرثومه .. ) ماذكر اذا في شي غيرهم ،،
شهر ٤ كان حافل كل جم يوم موعد ..
والحمدالله النتايج كلها سليمه ! انزين شفيني ؟! 
شهر ٥ سحبت ع موعدي بس لما شفت انه ماتعدلت حالتي حطيت موعد يديد وقلت ابي منظار موعدي بشهر ٦ وموعد المنظار شهر ٧ ..

* المنظار ..
تحديدا كان ب٤/٧/٢٠١٢ ..
الصبح طبعا وكانوا منظارين ! منظاره معده ومنظار قولون ..
خرعوني من منظار القولون ومن كثر التخرع كنسلوه خخ لانه ماشربت الجالن كله المفروض كل ربع ساعه قلاص وابلش من ساعه ٢ واوقف ٨ انا شربت ٣ قلاصات بس ! و ساعه اتغصب اشربه !
اما نتيجه المنظار ماشفتها بمستشفى الجهرا خذيت ملفي ورحت الخاص !
لا اللي ضحكني اميمتي الله يشفيها كانت معاي ..
وكانت متوتره اكثر مني قلت لها يما مو اطلع من المنظار انا بويل جير / كرسي متحرك وانتي القاج بواحد ٢ يمي ! جان تقولي لا يما بواحد انا قاعده وانتي بحضني خخ ضحكتني ..
واذكر كنت احاتي السايق يتاخر ع اختي واهي برا الجهرا دوامها فتميت احن وانا مبنجى / مافج البنج / تحت تاثير البنج بس عقب المنظار اقول لامي خل يروح لاختي لا يتاخر ، بعد ٥ دقايق ارد خل يروح لها لا يتاخر ! 
لا وكنت اسولف بتويتر و الواتس اب! وعقب نمت بالصاله قعدت ع حس موسيقى بالتلفزيون حسبالي منبهي يرن خخ ! عقب صعدت داري ونمت ماقعدت الا ١.٣٠ الظهر واهني صحصحت لانه اكتشفت اني نايمه بدون لا احط (تقويمي المتحرك ) كنت البسه لازم البسه وانا نايمه ! 

* المرحله ال٢ بالعلاج ..
هالمره اخترت الضامر ليش مو لانه ابي يشوفون نتايج المنظار لا لانه صار رمضان وذبحني الحارج مااقدر اقرا قرآن ع راحتي عسى ماقريت صفحتين او ٣ الا نشف ريجي !
خذيت موعد بعياده الانف والاذن والحنجره وموعد بالباطنيه مادري الجهاز الهضمي ..
مادحين لي دكاترتهم ..
اللي بالانف والاذن والحنجره تقيس حرارتي مادري سمع بجهاز حاطته ع ضروسي! قلت لها بسرعه لا يتعفسون توني معدلتهم مااستانست فيهم خخ ..
وقالت لي فيج حموضه قلت من شنو ! قالت من التفكير الزايد ..
رحت العياده ال٢ جان يشوفني الدكتور وفقص بطني وياب المطرق طق ركبي جان تنقز ساقي باول ريل استغربت بال٢ ضحكت حسبالي مسكونه ! شلون تحركت ريولي بدون لا احركها ! جان يقولي هذا فحص لاعصاب الريل و سالني شنو الاكلات اللي اتعبج قلت كلشي الا الككاو جان يفتح درجه ويعطيني ككاوه خخ ..
واذا ماخب ظني قالي مو حموضه !
وعطاني ادويه ترخي الاعصاب عشان مااتوتر و الحبه اللي قبل الاكل بنص ساعه عاد رمضان ! واشوف السماط متروس ماشاءالله وانا قاعده انطر نص ساعه و كوكت / وقت منبهي يرن اول مارن ركضه لي السماط خخ ..
الله وكيكلكم ماذكر اني كليتها مره ٢!
عقب رديت الضامر عقب جم شهر تقريبا ع شهر ١ ب٢٠١٣ او شهر ٢ قبل عيد ميلادي باسبوع جنه اللي سالوني جم عمرج قلت ٢٥ ودور الاسبوع ٢٦ �� سويت تحليل شامل وطلع كلشي اوكي الحمدالله وتحليل الجرثومه وهم مافيني شي بفضل الله وهالمره دشيت للدكتور الهندي ! وقالي حموضه ولا تاكلين الروب الا فريش قلت شلون ! وبقلبي اقول شنو اخض البقره واحلبها عقب خخ قال يعني اللي بتاريخ اليوم حموضته اقل وبصل وثوم ممنوع وشغلات ٢ ماذكرها ،.
وعطاني ادويه ومكملات غذائيه هم يوم او ٢ وهديتهم ..
وباجي ٢٠١٣ كانت صخه مو ما ارجع امبلى ارجع بس متنت ! وقام يزيد وزني اللي استغربت !
*المرحله ال٢..
وبشهر ١٠رفيجتي هالمره ودنتي شيخ يقرا علي بالجهرا (بدون ذكر اسماء) سالني عن وايد شغلات من اللي اذكرها اذا في وحده تجهض في بيتنا ؟! واذا احلم اني اطير ؟! وقالي عطيني ايدج ومسكها بس بكلينكس مو لاني وصخه خخ لانه مايجوز!
المهم انا مديت ايدي ولا اشوف صبغي الاحمر ! حده مو وقته ! نسيت اوخره ! المهم قالي فيج واهنه واهي مرض بالمعده والاطراف وصج هالشي عقب بتلاحظونه !
وانا ع قولت رفيجتي رخوه ماعبر افتح حتى بطل الماي بروحي!
وكان علاج الشيخ مجموعه سور اقراها لمده ٤٢ يوم و زيت زيتون مقري عليه اتدهن فيه وماي وزعفران اشربهم و سدر اغسل فيه اخلطه مع الماي المقري وارش ملح في بيتنا لمده اسبوع ..


ابوي شاف شنو يايبه من الشيخ جان يروح ايب لي اعشاب يقولي شربيهم ! نعم يبا مابي ! الا غصب شربيهم وقايل للخدامه كل يوم بالليل سوي لها وتيب لي غصب ! ولازم اخلص كل الكميه ولما شافني رضخت له قال شربيهم ٣ مرات ! لا ويسال الخدامه اذا شربت ولا لا ! 

* الاعراض تزيد .. ومرضي مجهول!
باخر ٢٠١٣ قامت تطلع اعراض يديده !
اول شي قمت انغث وانا نايمه بعد ! وعقب قمت ارجع بعد !!
هالحجي بشهر ١٢ -٢٠١٣ ..
قمت انام عند امي بطلب منها لانه خرعتها قلت اللي مثل حالتي يرجعون واهما نايمين يختنقون ويموتون .،
اول يوم نمت عندها عسى ماتحركت عسى ماكحيت كلمتني ها شفيج ها شفيج ! 
ليما فجاءه فزيت من نومي اركض ! واسمعها اتصرخ اسم الله عليج اسم الله عليج اهني استوعبت انه صج مو حلم ورحت الحمام وانتوا بكرامه ارجع وانا ارجع رفعت راسي ولا اشوفها بعد عمري تركض تيب لي ماي عقب رديت الدار ولا معاها دلاغ تقولي لبسيه دلاغج توصخ #بعد عمري الله يشفيج اميمتي ❤️❤️
وبلشت ٢٠١٤ والحاله تزيد لا تاكلين قبل النوم بجم ساعه اوكي سويت لا تنامين الا وانتي حاطه تحت راسج جم مخده هم حطيت ٢ !
مافاد بدال مره قمت ارجع اكثر مره اتم طول اليوم مصدعه  ومتكسره غصب اتحرك لانه رجعت ع طول وانا نايمه ماكحيت لا شرقت فيه ! 
وصار شهر ٢ رحت هالمر سي ام اس مادري شسمه بالجهرا عند د عياده اهني انصدمت قاسوا وزني ولا زايد بعد وصلت ٥٧ شلون ! 
سوالي تحاليل دم وهم سليمه عطاني ادويه والصراحه مالتزمت فيها!
والترجيع زاد كنت مارجع بالدوام قمت ارجع وساعات مايمديني اوصل الحمام وانتوا بكرامه!

وصار شهر ٣ هالمره مو ترجيع عادي وانتوا بكرامه لا فيه دم  وعوار صوب البلاعيم العاده العوار صوب المعده! اهني مو انصدمت لا تصرقعت !
رحت لمستشفى الجهرا ما اتوب ! طبعا اول رحت المستوصف واهو حولني ..

المهم وصلت ودشيت عند الدكتور وشرحت لها حالتي جان يعطيني تخطيط قلب و اشعه لظهري!
وقياس حراره وضغط وجنه تحليل دم !
ورحت سويتهم كلهم وقعدوني بالملاحظه وعطتني السستر ادوا عشان ارجع !


 جان اقولها انا خلقه امشي وارجع !
رحت ولا مغيرين الدكتور خلص شفت الاول تخيلو من ٥ لي ال١٠ بالمستشفى جان يسالني الدكتور ال٢ الدم وايد ! ولا خيوط قلت له خيوط قالي بسيطه هذا جرح من الترجيع مو شي جايد !
وقالي عمودج الفقاري عوي خخ لي الحين مو قادر استوعب ليش خلوني اسوي اشعه لظهري!

*واخيرا عرفوا مرضي 
لاحظتوا كل شهر بهالسنه انا بالطبيب :/ الحمدالله الله سخر لي رفيجتي حبيبتي ودتني عند دكتور مساعد العصفور وهذا كان ب٢١ مايو ..
لانه اخر مره طلعت معاي انصدمت اني ارجع مرتين او ٣ بالوجبه الوحده!
اي وصلت هالمرحله ارجع  بالدوام بس ٦ الى ٧ مرات !
فجاءه بنص الوجبه اقوم واركض وساعات الحق وساعات لا !
المهم رحت له وسوالي تحليل دم و سونار واهو يسويلي سونار وانا اطل بالشاشه ! هذا شنو وهذا شنو خخ وقاسوا حرارتي وضغطي ووزني كان حزتها ٥٢ ..
ومنظار يومها ماكنت ماكله الا حلاوه صغيره جيلي علبو مابي ادوخ وهالحلاو خربت كلشي!
بالمنظار حاشني هبوط وشبت علي الكحه اهما حسبالهم احس بشي بس انا ماكنت حاسه بو لا شي من سبت هالاعراض ماقدروا يكملون المنظار و قالولي باجر تعالي نعيده ومن الساعه ٨ مادري ٩ صومي لا تاكلين او تشربين شي!
وهذا اللي صار ٢ يوم رحت والحمدالله سولي المنظار وقبلها اشعه بيتاكدون مافي سوائل بصدري وطلع الحمدالله مافي..
والنتيجه عقب جم يوم كانت ضيق بالمرئ وقوي جدا بعد سالته والمعده قال سليمه الحمدالله !
اي ع طاري المنظار كنت متصله ع عياده خاصه اسالهم عن سعر المنظار جان تقولي ب٧٠٠ جنه قلت للمعده بس ! جان تقولي ٣٠٠ وشي جنه !
بعياده الدكتور مساعد ب١٢٠ او ١٤٠ جنه لا ومره ٢ لما عادوه ماخذوا مني الا فلوس التخدير ..
وعطاني تحويل لثنيان الغانم فيه اخذ موعد لقياس المريئ ..
رحت وكان موعدي ١/٦ ..
صار اليوم الموعد طبعا قبلها قالولي اصوم و لما صار دوري شرحت لي شنو راح يسون لي وعطتني صحن ستيل قالت اذا بترجعين رجعي هني ، قلت لها مايكفي !
قالت عادي نبلش جان افتح حلجي قالت لا بندخله  بخشمج ومن الخشم لي المريئ ! 
اول شي وانا قاعده ورجعت عادي وعقب وانا منسدحه جان اشرق وافز ارجع وانتوا بكرامه بالزباله لا تشوفون شسوت الدكتوره ال٢ اللي شغلتها تكتب القياسات بالكمبيوتر..
ردت بالكرسي ورا وتطالعني بقرف! حزتها مو بس تضايقت تكدرت ودمعت انا اتحمل العوار بس ماتحمل هالحركات لا وكنت اغمض مابي اشوفها ولانه وحده قالت لي في وحده من قوة الترجيع انبط شريان بعينها جان اتصرقع وقمت اغمض اذا رجعت واهما يقولون لي فتحي عشان تشوفين شاشوف  شي يكدر الخاطر!  عقب لما بنسدح مره ٢ عطيتها الزباله وانتوا بكرامه لانه ماقدر اجندس جان تقول مش لابسه قلفز ! بس خليتها تاخذها!
خلصوا الفحص جان تقولي انتي زي مستحمله اعملي توسعه! جان ارد بسوي ان شاءالله :/
ورحت عند ابوي اكمل بجوتي!

*العلاج ..
رحت اروي الدكتور النتيجه قالي الحل توسعه بالمنظار واذا مافاد جراحه بس اتاكد وارد لج خبر ..
عقب اتصل علي قالي لسنج الجراحه انسب واحسن دكتورين باسل السميط بالسيف و د. جنه اسمه سالم الصباح برويال حياه ..
وانا اخترت د.باسل السميط وليش خاص ؟
١-لاني مستعيله عليها ٢-لانه الحكومه الجراحه مايسونها اول شي اول شي النفخه بالمنظار عقب الجراحه ..
حاولت بالحكومه الصراحه بس مابي الجهرا يابولي واسطه فيه بس هم مابي تعقدت منه وهم مايسوي جراحه لازم نفخه عقب جراحه ..

اتصلت ع السيف وخذيت لي موعد مع دكتور باسل وفيه شرحلي طريقه العمليه وذكر لي انه اللي سوها ٧٠٪ ردوا طبيعين ٢٠٪ يتعبون من اكلات معينه ..
١٠٪ مااستفادوا منها كلش..
توقعوا انا اي فئه ؟!
يتبع !

Tuesday, July 8, 2014
مثل ماهو مذكور بالعنوان ايسنج اهو  محل يديد متخصص بالاكسسورات بكل انواعها من قلوب وتراجي وسورات وخواتم وسكارفات وجناط ...الخ..
هالمحل مثل فكرة كليرز بس لاعمارنا احنا بالعشرينات والاكبر منا اللي بالثلاثينات ..
توه فاتح اول فرع بالشرق الاوسط بالكويت ❤️
مكانه بغراند الافنيو ..
يبيله عاد غرامي الاكسسورات ❤️

سايته: http://www.icing.com/us 

Friday, June 6, 2014




بمناسبة ردت رفيجتي
 لولو من 
اجازتها سوينا لها ريوق بالدوام .
طبعا عقب ٣ ايام حوسه وافراره بالانستغرام ومساعدة اختي وبنت عمي وعقب اشاور رفيجتي اخترنا من @xo_kitchen ..
كنت حدي خايفه يكون مو حلو  ونسيت اكد لها الطلب قبل بيوم وتاخر واكلمها ماترد احتريت ..
بس اشوه اتصل المندوب ولا يطلع مايدل واضطريت اطلع له ومسكين اهو محترم يقولي وين المكان القريب لج ايبه يقصد البوابه قلت له لا ..
رايي:
وعقب كلمتها اتشكرها وايد عجبني الشغل راهي وذرب ومرتب بوكس للسلطات والملفوف (فته، سلطة المعكرونيه ، فتوش ، والناتشوز) وبوكس ٢ للصلصات ماشاءالله جنه تعبئة مكان متخصص مو بيت و جيس فيه جيس صحون بلاستيك كامل وجيس قفاش وجيس كلينكس البوفيهات وسماط..
شغلها وايد مرتب وعقب لما شافت المحادثه انه متاخر الطلب علي اصرت انه يرد المندوب ايب لي فلوس وزفتهم ع التاخير بس طبعا مارضيت اول شي كافي كلمتها ٢ شي شغلها يبيض الويه واسعارها مناسبه ماشاءالله ..
وعجب البنات اشوه..
الله يبارك لها في رزقها يارب ..
يعني طعم وشكل وكميه وخدمه ❤️ماشاءالله
سعره :
ب ٢٠ بس والتوصيل ٣دك ..

اكاونتها بالانستغرام : xo_kitchen@


Tuesday, May 6, 2014
من العام خاطري اجربه ومالله كتب ومع عوار معدتي كشيت من الجباتي بس قبل اسبوعين تقريبا كنت توني بدش الدوام ازحف خخ خطوه جدام و10 ورا ولا رفيجتي يمي تناديني سلمنا والخ الخ جان تقولي انها عازمتنا عليه ..
 
اخترت حلوم وذقت شويه من الاومليت وهم زين بس الحلو بالحلوم انه فيها وايد شغلات (حلوم وزعتر وخيار وطماط ) من جذي طلبتها مره 2 بعد يازت لي ..
 
 
 
 
 
 
 
وماعندي فكره عن الاسعار لانه بالمرتين كنت معزومه عليها ..
 
 
 
ساعات العمل
من الساعه 7:00 صباحا حتى 11:00 مساء

الجمعه والسبت 9:00صباحا حتى 11:00 مساءا

ت 50979000
اكاونتهم بالانستغرام
@karak_house
 
عنوانهم :

المباركية - الدروازه - مقابل البنك الاهلي المتحد
 
Monday, May 5, 2014
 
 



قبل 3 اسابيع دزولي هالكفر انا اخترته خيروني بين اكثر من واحد بس اخترت الشانيل وهالهديه لانه كتبت عنهم  بالانستغرام ..
واهما اكاونت يوفر اكسسورات للهواتف الذكيه و تلفونات ويسوي صيانه لهم وهم عنده مجموعه من الاككسورات اللي تخص التكنولوجيا ..
 
وهذا اكاونتهم بالانستغرام  @hw_777
 
شكرا ع الهديه ️ ماقصرتوا  كلكم ذوق..
Sunday, May 4, 2014
 اخر شي   بيوتي نزل وصار عليه ضجه حمر برجوا الڤلڤت  وايد قريت مدح لهم ..
 
اسمهم : Bourjois Rouge Edition Velvet Lipstick

 
 
رحت بجربهم توقعت راح اخمط كلهم او اغلب غصب طيب اقتنعت بلون ١ منهم ..
بالصوره احلى من الصج و مبدائيا قوامهم غريب مو قلوس ولا اللي الحمر المات اللي متعودين عليها ..
واللون اللي اخترته  هذا اهو رقمه 05 ..
 
 
هذا اللون ع الشفايف بس طبعا هذي اجنبيه بيضا :)
 
 
رايي :
 
عقب مااستخدمتها مرتين او 3 ..
 
ماحبيتها لانه اساسا مااحب الحمر المات وايد احب الحمر الكريميه ..
 
واهي لونها مو غني ولما احطيتها مادري ليش طرت علي الحمرا السحريه احس نفس اللون ..
 
ثباتها امم مو بسرعه تروح حاولت امسحها لما كنت بتريق بس تطبع عادي ع الاكل انا ماحب جذي :\ من جذي امسح الحمره قبل لا اكل او اشرب ..
 
شنو بعد اي بالنسبه لي ميزتها الوحيده انها خفيفه على الشفايف تقريبا جنه مو حاطه شي ..
 
 
سعرها :

وسعرها تقريبا ٥.٧٥٠ دك بس لما خذيتها ماكس مسوين عرض ع برجوا طلعت علي ب٤.٦٠٠ دك ..
 
 
 
 

Saturday, May 3, 2014
 
هالفتره صايره اتابع مسلسلات بقوه واكثر مسلسل شدني اهو صديقات العمر لدرجة شفت 10 حلقات بالتلفزيون عقب باجي الحلقات شفتهم بيومين بس يعني 20 حلقه خخ تابعتها كلها باليوتيوب  ..
 
المسلسل من بطوله بناتيه بحته ..
 
القصه :
 
قصة 4 بنات من مختلف البيئات الكويتيه  جمعتهم صداقة الدراسه بالثانويه واستمرت الى بعد الزواج والانجاب ..
 
ال4 بنات اهما ..
 
(1)
 
ببلش بهند او بالاحرى اللي ادت دورها الفنانه فاطمة الصفي ..
وبلشت فيها لانه اكثر الشخصيات تعرضت لظلم وتعبت وايد كسرت خاطري وتعاطفت معاها ..
 
شخيصتها تمثل البنت المتفوقه دراسيا وبنت الام غريبه (غير كويتيه ) ومتوفيه منذ ولادتها و اب ضعيف الشخصيه (يحرني) و مرت اب قاسيه جدا جدا ..
 
(2)
 
عايشه وادت دورها الفنانه بثينة الرئيسي ..
 
واهي الراويه للمسلسل وشخصيتها فتاة محجبه من اسره متدينة ..
 
اكثر شي عانت منه في اخوها معاذ المتسلط  وعقب زوجها المزواج ..
 
(3)
مريم وادت دورها الممثله صمود الكندري..
 
بنت لام شابه واب كبير بالسن (شايب) ..
 
(4)
 
نجلاء وادت دورها الفنان هنادي الكندري ..
 
هي فتاة من اسره غنيه ماعاشت جو اسري معتدل الام لاهيه بمواجيبها عزايم ومناسبات واستقبالات واب لاهي بسفراته وشغله ..
 
وسلط المسلسل الضوء على العديد من القضايا اهما :
 
1- الزواج ..
- عدم التكافاء ( تفاوت العمر- اختلاف المستوى التعليمي )
- الزواج من جنسيه مختلفه ..
- تعدد الزوجات ..
-الغش في الزواج ..
 
2-التسلط ..
زوجة اب متسلطه - اخ متسلط .- زوجة متسلطه ( مرة ابو هند + ام مريم).
 
3- ضعف الرقابه الاسريه ونتائجها ..
-علاقات غير سويه - جرائم (سرقه- مخدرات ..)
 
4- القروض والاقساط والسلف ( لمجرد البهرجة الاجتماعية ) ..
 
 
ولمشاهدة المسلسل :
 
 
وحاليا يعرض المسلسل على قناة MBC  من الاحد لي الخميس الساعه 11 بالليل  ..
وموجود كامل باليوتيوب هني ..
Friday, May 2, 2014
قبل جم يوم وصلتني هالهديه من بوتس ..

 
 
والهدايا عباره عن مجموعه من مستحضراتهم ..
 
كلها من سوب اند غلوري الا منتج واحد من بوتانيكس ..
 
 
وهذي صور اوضح لهم :
 
(1)
المنتج اللي من بوتانيكس اهو:
مستحضر تقشير طبقة الجلد الميتMicrodermabrasion Polish
 
 
 يعزز من عملية تجديد الخلايا للحصول على إطلالة شبابية وبشرة أكثر نضارة.
 
(2)
 
اما من سوب اند غلوري ..
GLOW GETTER
 
 بخاخ يضفي السُّمرة على الجسم والوجه وبدون الحاجة إلى الفرك، يفوح منه شذا عطر Pinkالأصلي لتنعمي بنسائم الشواطئ الرائعة على الفور.
 
(3)
 مُقشّر البشرة BREAKFAST SCRUB:
 
 
 مزيج شديد الفاعلية مكون من الشوفان والسكر وملح البحر يعمل على إضفاء النعومة على البشرة أولًا ثم يقوم بتهدئتها وتلطيفها.
 
 
(4)
 
PEACHES AND CLEAN™ 3-IN-1 WASH-OFF DEEP PURIFYING CLEANSER
 
 
غسول لطيف على البشرة يتميز بفاعليته وقدرته على إزالة مستحضرات التجميل (حتى الماسكرا المقاومة للماء) ويعيد إلى البشرة نشاطها في دقيقتين.
 
(5)
 THE ULTIMELT™ DEEP PURIFYING HOT CLOTH CLEANSER
 
 
 
 
مستحضر تنظيف مُركّز للغاية يعمل على تهدئة البشرة وتجديد شبابها وحيويتها حيث يتغلغل بعمق للتنظيف  ذو تأثير يماثلتأثير الخضوع لجلسة سبا للتخلص من سموم البشرة.
 
 
 
 
 
 
 
 
 
 
 
THANX BOOTS :*
Wednesday, March 19, 2014
 
هاللوو ..
 
قبل شهر ونص وزود بعد شفت هالمجموعه بابليكشن h&m  وعجبتني فكرة المجموعه ..
 
ونزل قبل اسبوعين او اكثر بس ماشريتهم الا السبت اللي فات ..
 
اهما نزلو مجموعتين هذي البينك وفيها درجات الوردي ومجموعه 2 بدرجات البيج اسمه النيود ..
 
والمجموعه عباره عن 5 اصباغ اظافر 4 لون +1 توب كوت ..
 
*تجربتي *


جربت كل الوان الا التوب كوت ..

وتجربتي كانت بطريقة الاومبري تدرجات لون يعني كل ظفر لون وعادة الالوان كلها تكون درجات للون واحد وموجوده هالطريقه من سنين مو يديده بس انا اول مره اجربها ..
وحطيت منه طبقتين ..
 
رايي :
 
كطريقه واايد حبيتها والعاده ماتم بالصبغ اكثر من يوم ومرات جم ساعه واغيره هذا تميت 3 ايام يومين بارادتي واليوم ال3 كنت بغيره بس مامداني ..
 
المهم :
كثبات يتم ومايتقشر بسرعه ..
كاللون الوانه اغلبها حلوه ماشاءالله ..
اما قوة ووضوح اللون زوينه مو خفيف حيل ماي مايوه ع قولتنا لا زوين بس حلاته طبقتين ..
وحسيته مو بسرعه ينشف :\
سعره رخيص ..
 
وعلى فكرة هذا رايي الاولي :)
 
سعره :
 
المجموعه كامله ب 2.900 دك ..
 
 
Monday, March 17, 2014
هالبوست كل مابنزله يصير شي ان شاءالله هالمره تضبط ..
 
تجربتي له كانت بعيد الاضحى اللي فات ..
 
 
 
 
طلبنا كان ..
 
سلطة الجرجير ..
وBBQ برغر ..
لازانيا..
عصير لرفيجتي..
وماي لي..
 
الاسعار ..
المولتن كان بفاتوره 2 وجنه كان ب7 دك لانه ميكس ..
 
رايي باختصار :
 
الخدمة : زينه ..
 
الاسعار : مناسبه ..
 
الاكل :مو ذاك الزود اقل من عادي ..
انا ذقت البرغر بس ولازانيا ماكليت السلطه لانه مااحب الجرجير ..
اكثر شي عجبنا الصلصه اللي مقدمينها مع البطاط والبرغر :\
 
وخيارات الاكل محدوده جدا جدا يعني 3 او 4 انواع سلطه 3 برغر وجم نوع مقبلات ..
 
المولتن زين  بس انصدمت من شكله بالبيت اتوقع من سبت الجيس كان عادي مو اللي مخصص للحلو يكون له قاعده عريضه !
 
 
عنوانه :
 
بغراند الافنيو ..
 
برج جاسم بمنطقة المرقاب ش السور
 
والفرع ال2 بجمعية الخالديه ..
 
الموقع الكتروني :  linK
 
الانستغرام : @chocolatenesskw
 
t
 
Chocolateness-Phone:- 22960606
 
 
تجاربي السابقه :
 
 
 
 
 
 
Sunday, March 16, 2014
قبل اسبوعين تقريبا حطيت لكم  بالانستغرام اني شريته وعقبها نزلت لكم تجربتي الاوليه ..
 
هذي صورتها من السايت
 
 
 
وهذي اهي صور من تصوير اللي نزلتهم بالانستغرام ..
 
 
وقلت بسوي مقارنه بينها وبين ذا بالم وسوفت اند جنتل من ماك بس بالنظر مبين غير ..
 
اللي بالصوره من ذا بالم وال2 عقب الصوره انكسروا واحد بنفس الوقت وال2 عقب يومين تقريبا لما رديت استخدمه خخ بس استخدمها عادي ماضرني ولا ردني انها انكسرت ..
 
اتوقع اهو اقرب لجديد ذا بالم بس مو متاكده ماشفتها بالطبيعه ..
 
 
رايي :
 
اهي زوينه بس مو نفس اللي ابيها اهي احس فيها تج لون وردي انا احب ع ذهبي او برونز ..
 
انا احطها بذمه وضمير :) واستخدمتها مره وحده لتحت حواجبي كانت مو زود عند مدمع العين  هم زوينه بعد حللتها خخ ..
 
بس عادة احطها ع اعلى الوجنتين كانت زوينه ..
 
كثبات هم زوينه اخر مره بنهاية الدوام حطيت منها مره 2  بس اول مره استخدمتها بالبيت تمت ثابته يمكن لانه ماكنت باذله مجهود نفس الدوام :\
 
 
 
سعرها :
 
ب 2.500 دك ..
 
من h&M
Saturday, March 15, 2014
 
كالعاده بوست قديم بس لازم انزله لانه قلبي متروس حده منهم ..
 
تقريبا باخر شهر 10 دشيت دبنهامز وبطلعتي مريت بالصدفه عند ماركة لورا مارسيه جان اشوف عنده علب كل علبه فيهم مجموعه من الاغراض واغلبهم فيهم برايمر ورفيجتي مادحتلي برايمرهم توبه امشي ع كلامها  خخ  من تمدح شي يكون مو حلو :\
 
ومندوبتهم نظامها بمشي شغلي وببيع بس ! كلش ماحبيت باخر البوست اشرح لكم ..
 
الست  يحتوي على :
1-تنتد مستوريزر :
 
يعني مرطب بلون اهي قالت فونديشن اهي اهي قصت علي:/ << اول جذبه1
2 شي ماقالت انه متوفر بلونين اللي اهما :
-نيود << وهذا للبشرات الفاتحه جدا << واهو الللي دبستني فيه ..
- وساند شي جذي << واهو الللي لنا << عرفت هالشي لما رحت ايفنتهم وهم كان فيلم :\ اخلص من الفيلم الاول وابلش لكم ال2 ..
2-برايمر :
 
وايد يمدحونه عشانه خذيت البوكس واهو موجود باغلب البوكسات ال٢ ..
 هم طلع منه انواع  وماقالت لي بس اعتقد البوكس يوفرون فيه هذا بس مو متاكده ..
3-كونسيلر:
 اهو من فوق في لونين ونوعهم كريمي واللي تحت لوس باودر.. << ماجربته الا مره وماقدر احكم ماحط كونسيلر الا نادر ..
4-فرشتين و اسفنجتين وجنطة..
<< هم ماجربت الفرش ولا الاسفنجة ..
سعره:
 ب٢٢.٥٠٠دك
 
رايي :
 
ماعجبني لا الكريم ولا البرايمر لا القوام ناسبني ولا لون ..
 
اللون يصير ممولح بايخ قمت اخلطه مع سي سي كريم من ماكس فاكتر اهو برونز واحط بودره عساس يناسبني << عباله ..
القوام توني جربته ع ايدي بدون برايمر الكريم اسهل بالفرد ع بشره وبالنسبه لفري اويل احس عقب جم ساعه ويهي يدهن عادي !!
 
المهم صادف عقب ماجربته ع طول عزموني ع ايفنت لورا مارسيه يفافافوم المارينا ورحت له ويارتني مارحت له انا رايحه له وقايله لهم بالايميل بس عشان اتاكد من منتجاتهم كنت حاسه فيها انه السالفه :\
 
كنت بروح ابجر من 4 اهو يبلش 4 لي 9 ..
 
قالي مايصير الخبيره بتي 4 ونص قلت له اوكي بشوف ..
 
قلت لرفيجتي نطلع عقب الدوام نتغدا ونمرهم قالت اوكي مريناهم ماذكر اذا مره او مرتين بس اذكر طلعت منهم 5 جريب النص والخبيره مايات :\ واللي تبيع استغفرالله دفشه ماحبيت اسلوبها مادري ليش مايختارون مندوبات زينين مو معقوله جذي شي يطفش ..
 
لما قلت لها عن تجربتي اهي اللي قالت لي عن الدرجة ال2 من الكريم :\ وقالت هاج بنعوضج وعطتني اياه وعقب قالت لي شوفي البرونز قلت لها انا مو يايه اشتري :\ اساسا كنت مفلسه :|
 
وعطيتها الكريم اشوه ماخذيته معاي جان كلبجوني عند الباب حسبالهم سروق خخ انا ورفيجتي حسبالنا هديه بس اشوه رديته ..
 
وزعلت وطنقرت و حطيت هالماركه بالبلاك لست :\
Monday, February 17, 2014
 
اول ماعرفتها ماكان متوفر بالكويت ويطلبونه من النت وبنهاية السنه العام دريت انه بمركز السلطان ورحت خذيت لي واحد ..
 
 
 
فكرته :
 
هو من شاركة فازلين لكن بدون تدبق وثقل فرق عن الفازلين الاصلي هذا سبري وخفيف ..
 
متوفر 3 انواع :
 
  (الاصفر ) Total Moisture
  (الادعم \ البني) Cocoa Radiant
  (الاخضر ) Aloe Fresh
 
تجربتي  + رايي..
 
خذيت الاصفر وجربته كذا مره 3 او 4 ماحبيته مااحس اني متدهنه ! بشرتي ترد ناشفه عقب ساعه او ساعتين ! جني راشه عليها ماي مو مرطب او جني مو مستخدمه شي ..
 
باختصار مااحس يفيد للي بشرتهم جافه او بالشتا (يبيله البرد ترطيب اقوى لانه ينشف البشره )وهم ماينفع بالصيف عقب السبوح ع طول  ..
 
لو ماعطيته اميمتي الله يطول بعمرها جان استخدمته بس مو عقب السبوح مثل ماقلت فوق لا عقب يوم من السباحه لانه اكون مستخدمه بعد السباحه مرطب قوي يتم مفعوله يوم او 2 ولثبيت وزيادته استخدم سبريه فازلين..
 
واللي عجبني فيه ريحته  بس ..
 
سعره :
 
ب3 وشي ..
Sunday, February 16, 2014
قبل فتره يابته زميلتي بالدوام وزعته علينا ..
 
 
 
هني بالجار ^^^
 
وهني شكله بالايد ..
 
انا خذيت وحده كليتها ماشاءالله تذوب بالحلج وشكله نتفه يشوق جان اقولها عادي اخذ 2 ولو مو الفشله جان حطيت الجار بحظني خخخ ..
 
وهذا مو بس رايي يت زميله 2 واستلمت الجار ماشاءالله تقول مااقدر اوقف خخ  قلت لها كلنا جذي ...
 
وعلى فكره اهو ميكس اكثر من نكهه لا تقولون شنو لاني مو ذاكره ..
 
 
ولقيت اكاونتها بالانستغرام اسمها ميني اند نايس ..
 
@miniandnice بس الحين سوته برايفت ..
 
اللي مستغربه منه كاتبه بالبايو الجار ب6 والاثنين ب12 ؟
 
للطلب :
عن طريق الواتساب وقبل يومين :
90964512
Saturday, February 15, 2014
بما انه خلص عيد ميلادي اقدر اكتب عن الهدايا ع راحتي خخخ ..
 
في شغله احبها بالهدايا اذا بدز نقصه لاحد او صوغه او هدية عيد ميلاد او زواج غير انه تكون شغله يحبها الشخص انه تكون معده او مصنوعه خصيصا له ..
 
بس ماقط صارلي هالشي خخ الا بالكيك ..
 
المهم من الشغلات اللي هبيت فيه العام وتحمل هذه الميزه او الصفه ..
 
اهي كوكيزة نستله ..
 
جربته اكثر من مره ..
 
(1)
اول مره بشهر 5 العام هديه لرفيجتي عروس + فلوس  << وكان بفرع صليبخات ..
 
(2)
 
وماحطيتها بالانستغرام عشان ماحرق الفكره ع نفسي ولانه عجبتني وبسويها لعيد ميلاد رفيجتي << وهالمره مارحت كنا برمضان واتصلت عليهم وقلت لهم ابي نفس اللي حاطينها باكاونتك بالانستغرام 2 يوم اتصلوا ياكدون الطلب وصلوها لي بيتنا ..
 
(3)
المره ال3 اختي عجبتها الفكره فسوتها لعيد ميلادها وعيد ميلاد رفيجتها << وهذا فرع الافنيو ..
 
(4)
المره الرابعه هم اختي سوتها لرفيجتها بس هالمره يابولها ايها مو زود كلمتهم جان ايبون لها وحده اكبر واحلى ..

والكوكيز تكون شغله من مجموعة شغلات اقدمها كهديه و بالنسبه  لكوكيز اللي مكتوب عليها عيدكم مبارك مو طلبي صورتها بالكافيه دشوا اكاونتهم بتشوفون اشكال ورسومات واحجام مختلفه ..
 
نستله خدمتهم حلوه خصوصا اللي بالافنيو و كوكيزهم لذيذ ..
 
الاسعار :
 
الكوكيز اعتقد 8 وتوصيل للجهرا رخيص بنص جنه ولما وصلوه لدوامي كان بلاش ..
 
فروع نستله :
 
مارينا:25732046
ذا فلج:23909021
سما صليبخات:22219138
الافنيوز:22200669
 الليوان:65548380
منيوز:22250101
الفتوى:22941000 ext.19988 ا
لأشغال:25306000
 
الانستغرام : @nestlecafekw
 
 
 
تحديث :
هالبوست كان مجدول يعني مكتوب قبل عيد ميلادي قبل 11 - 2 ..

المهم بعيد ميلادي اختي سوت لي الكوكيز خخ ..

 
بعد عمري كنسلت موعد طبيب الاسنان وتعنت نستله وتمت ساعتين تنطره وعلها مافهم ولا في الوان عنده << فرع صليبخات ..

شكرا الجعده :*

Search

Loading...

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

Followers

انستغرام المدونة (roroalk)

follow me

My Blog List

Ads