Showing posts with label صحة. Show all posts
Showing posts with label صحة. Show all posts
Thursday, February 13, 2014

postheadericon تجربتي لـ Lily & D

10:00 AM
هالتجربه هم معتقه خخ  صار لها تقريبا 6 اشهر اللي اذكره جربته باول 9 ..
 
كنت امر بفتره بالدوام اسمها للاستقرار  فحبيت ادلع عمري عساس انسى همومي الوظيفيه ..
 
فحجزت لعقب الدوام ع فكره اهو اخر سبا جربته واخترته بناء على مدح صديقتي الانستقراميه صوفي ..
 
 
وصلت ..
 
وهذي الصور عند السبا من داخل ..
 
وهذي لقطات من السبا ( الرسبشن- مكان البديكير والمنيكير والخ )
 
وفي مجموعه كبيره من اصباغ الاظافر مثل زويا و OPI .وشانيل .... الخ ..
 
وشغلهم مو بس اظافر لا عندهم واكس (شمع ) وعناية بالشعر اذا ماخاب ظني وعندهم خدم منازل بس مايون الربع الخالي قصدي الجهرا :\
 
المهم هذي الضيافه اخترت جاي اخضر ومعاه عطوني ككاو لذيذه ماشاءالله ذابت من حراراة الجاي عجبتني جان اقولهم ابي 2 يابتلي عقب تسالني تبين بعد قلت لا بتصير مصاخه بس يبي الصينيه بحظني خخخ اتغشمر اتغشمر ..
 
وهذي العده اللي استخدموها لي ( سنفره وماسك وهذا فاضي خخ مادري المهم وعده الخاص معقمه ومغلفه ومخدة الحاره احبها ع الجتوف ..
 
وعلى فكره ماخترت نوع الخدمه اهما شافوني واختارولي قالت لي ريولج اخترنا لها نسيت شسمه بس للنعومه لانها تحتاج اما ايدج فالعادي لانها ماتحتاج شي ..
 
ويابولي مبرد اللي يلمع الاظافر وكنت خايفه انا يخرب اظافري يضعفهم ويخليهم يتكسرون بسرعه بس اشوه ماخربهم  واللمعه تمت ماشاءالله فتره طويله يمكن اكثر من اسبوع ..
 
وهذي النتيجة ..
الاسعار :
 
الريول علاج الجفاف ب8 د.ك ..
 
والايد ب5 د.ك ..
 
رايي :
 
الستاف : عجييييييييييييييييييييييييييييييييييييييييييييييييييييييب ماشاءالله اول مره اروح سبا استانس واضحك جذي وايد داروني وحافوني حوف وونسوني ..
 
ع سبيل المثال موقف الككاو الللي قلته فوق ..
 
ريولي مثل ماتعرفون فيها مسمار لحم اخاف لما يجسونه واتم متشنجه اللي كانت تسويلي اظافر ايدي تحاول تلهيني تسولف معاي وتدلكني ..
 
ضحكتني تقولي اظافرج حلوه ماراح اقصه بس هالمره المره اليايه لا قلت اقصهم واييج تسوي روحها تبجي << امبيه تينن ماشاءالله ..
 
واللي تسوي ريولي مدحت براتمي خخخ ..
 
ولما بطلع يقولوني حبيناج كل تعالي لنا << والله انا الللي حبيتكم ..
 
وحسبولي رسمة الظفر ببلاش لانه بس ظفر ..
 
النتيجة : وايد حلوه وخصوصا الريل ماشاءالله نعومه ..
 
الاسعار :هم وايد زينه (ارخص سبا جربته وحبيته )
 
عنوانه :
 
مدينة الكويت - مجمع الغوالي جبال مجمع الراية ..
 
ت : 22441585
 
الانستغرام : @lilyandd
 
T
Labels: , , , , | 0 comments
Thursday, October 10, 2013

postheadericon تجربتي لمعجون Darlie Double Action

10:00 AM
هالمعجون كان بلستتي البيوتي بسفرتي العام  لماليزيا واغلب اللسته كنت ميمعتها من بلوق ليزي ديزي ومنها هالمعجون اللي كتبت عنه ستار هني ..
 
من غير شر فاقدتهم كنت احبها بلوقها وبوستاتهم مميزه ماشاءالله عسى مانع غيابهم خير يارب ..
 
وتوني جربته بالفتره الاخيره وحابته واختي لاحظت الفرق بضروسي جان تستخدمه معاي وهم تقول زين ..
 
عاد مايندرا اذا متوفر بالكويت ولا لا لانه ابي منه وخصوصا انه في وايد انواع منه ودي اجربها مثل اللي للتبيض ..
 
والحلو فيه وايد احجام من كل نوع تقريبا 5 احجام وهم في ست صغيرون للعناية بالاسنان بالسفر..
 
وهم في انواع من معجون التبيض مو نوع واحد في الاكستر وفي تبيض لاسنان الحساسه .. الخ ..
 
 
سايته link
Labels: , , , | 2 comments
Tuesday, October 8, 2013

postheadericon تجربتي لفونديشن كورف العلاجي - KORFF Lifting Creamy Foundation

10:00 AM
واخيرا بكتب عنه ..
 
اهو كريم اساس طبي  ..
 
واهو متوفر ب6 درجات لونيه ..
 
انا جربت لي ع ايدي درجة 3 و4 ماحبيتهم وحبيت 5 لانه ع لون التان ..
 
مع انه كل اقول باخذ مثل لوني واخر شي اشتري غامج :\
 
التغطية : وسط الى كامله << بالنسبه لي ..
 
القوام : كريمي وسهل التوزيع ..
 
 
تجربتي :
 
استخدمته اول ماشريته بشهر 1 وماعجبني كان مشقق ع ويهي كرهته وخليته ع كتر عقب بنص شهر 3 رديت استخدمه بس مع مرطب يديد وفرق علي ماشاءالله صار وايد احلى كل محد شافني سالني عنه ماشاءالله ..
 
وجربت اوزعه بايدي او فرشه او بيوتي بلندر من h&m وكل مره يطلع احلى حطيت فوقه بودره شفافه من مكياجي صار احلى بعد..
 
 
سعره :
 
بصيدلية جمعية الروضه : 13.270 د ك ..
 
بصيدلية الغانم بالجهرا ب15 جنه :\ مادري اهما اغلى ولا رافعين اسعارها !!
 
 
 
 
 
 
 
 
Labels: , , | 0 comments
Wednesday, May 15, 2013

postheadericon black head remover dual sheet

10:43 PM
 
من شغلات البيوتي اللي شدتني بمحل
Etude House
 
لزقات الخشم ..
 
اهي مغلف واحد بس مقسم لقطعتين ..
 
اول ماشفته حسبالي بصوب لزقه وبالصوب ال2 تونر ..
 
لانه انا لما احط اللزقه العاديه كنت اسوي سنفره وعقب احط اللزقه ولما اشيل امسح بتونر عساس اسكر المسام المفتوح عقب ماشلت الوصخ والروس السودا اللي كانت سادتها ..
 
 
بس لما استخدمتها امس اكتشفت انه عباره عن شريحتين ..
 
1- رطبه ومافيه لزاق تنحط عادي ع خشم لمدة ربع ساعه ..
2- عقب تحطون ال2 واهي اقرب للعاديه بس لزاقها اخف وهم تنحط ربع ساعه ..
 
 
 
رايي :
 
حسيت بنعومه وترطيب اكثر من التنظيف ..
و اذا بقارنها باللصقات العاديه هذي اخف بوايد ع خشم لما شلتها مادمعت عيني العاديه عيبها تعور شوي ..
بنفس الوقت العاديه تتميز بان مفعولها اقوى وتحتاج مده اقل بس ربع او ثلث ساعه هذي نص ساعه ...
 

سايته :(هني)
وبلشوا يوفرون منتجاتهم بالكويت بالانستغرام :etudehouseq8
 
 
__________________________________
 

(بوستاتي القديمه عنه ..
هني (فرع ماليزيا )
وهني فرع تايلند ..
- وهذي تجربه لي نزلتها قبل جم يوم
Etude House : Magic Enzyme Pack Peeling )
 

 

 
Labels: , , , , , , , | 0 comments
Tuesday, March 12, 2013

postheadericon تجربتي لتبيض وتنظيف الاسنان في ابتسامة كلينك - ebtisama clinic

11:59 PM
هالللو ..
 
وايد بخاسه بلوقي هالايام مانزل عدل مثل قبل :(
 
بس بحاول ارد مثل قبل ان شاءالله مجربه وايد شغلات وحابه اشاركم فيها وهم لنفسي اخزن تجاربي للمستقبل ان شاءالله ..
 
من اخر تجاربي الصحية البيوتي اهي تجربة تبيض الاسنان ..
 
وبشهر 2 كان في وايد عروض خصوصا باخر 2، و من العيادات اللي كانت مسويه عروض ابتسامه كلينك ..
 
 
عرضهم كان ..
 
حجزت باخر يوم ورحت وعلى ماوصلت خخ اتصلت عليهم مليون مره يالله وحده دلتني عدل (انا ماادل والاغلب يقولي اهو يم مركز الفنون بس الاخيره ماقصرت دلتني عدل )
 
وصلت وقعدت بالاستراحة هذا جزء منها ..
نطرت شوي وعقب ودوني للعياده ..
 جزء من العده المستخدمه ..
 
وهذي نظارتي اللي لما لبستها السستر تسولف معاي عن الهوا وانا اقولها اي وفي غبار بعد !! عقب استوعبت اني لابسه نظاره برتقاليه خخخ ..
 
 
تجربتي :
 
مثل ماهو مذكور بالعرض تنظيف وبوليش و تبيض وكان نوعه بليج سمايل ..
والدكتور اللي اشرف علي د. اكرم ..
قالي عن انواع التبيض والتوب نسيت شسمه ويفتح وايد يفرق وسعره 120 ..
كنت بسويه بس انا محدده ميزانيتي والاهم متعنيه عشان العرض قلت المره اليايه ان شاءالله اجربه..
النوع اللي جربته تفتيح طبيعي بو درجة او درجتني ..
وقالي عن ضروسي وشنو بيسوي لهم التبيض ..
و اول شي بلش تنظيف وبعدين بوليش واخر شي تحت جهاز التبيض ..
كعوار كان جدا بسيط ومتحمل الحمدالله عورتني المنطقه اللي صوب حلجي (بشرتي) وصار فيه لطعه غامجه :( اكثر من عوار الضروس ..
ولازم اول 48ساعه لانه مسامات الضروس مفتوحه ماتاكلون او تشربون شي في لون جاي -قهوة-كاتشب-طماط-فراوله- ككاو- حتى الخضره ..
 
رايي :
حبيت الفرق كان طبيعي بس اطمح للمزيد خصوصا عقب 3 اسابيع احس بلش يروح المفعول :( بس مستانسه اني سويت شغله خاطري فيها من اشهر ومن اهم الاشياء بلستت البيوتي ..
والاهم حبيت الستاف ..
 
عنوان العياده :
السالميه  -بشارع عمان -ق12
ت: 25620010
-
link
 
t
 
الانستغرام
Labels: , | 0 comments
Monday, February 25, 2013

postheadericon تخفيضات محلات نزيه ..

9:40 PM
تخفيضات بمحلات نزية المختصه بمستحضرات وادوات التجميل يصل حتى ٧٠% و مستمر حتى ٢٨ فبراير ان شاءالله ..
 
 التنزيلات على اغلب المنتجات مو كلها تقريبا تشمل ثلث المحل ..
 
كيراتين كان 100 صار ب40 ..
 منظره الكترونيه شلون بالضبط مادري كانت ب19.230 د صارت 7.700 د..
 جهاز شيره كان ب41.700 د صار 16.690 ..
 زيت كوبرا مكتوب للبشره والشعر كنت باخذه ، كان ب1.540 وصارت 615 فلس ..
 بديل الزيت كان اعتقد ب1.150 صار 400 ..
 سيروم كان 3.465 صار 1.380 ..
 ماسك للشعر كان ب9 وشي صار ب3.700 ..
 صبغ اظافر opi كان ب4 صار بدينار بس الخصم على مجموعة الكرك بس ..
 اغلبهم صاروا بدينار وشي كانو ب3 و4 ..
 سبري كان ب5 تقريبا وشي صار بدينارين و100 وخرده ، اللي يمه كان بدينارين 465 صار ب985 ..
 مشقر كان تقريبا ب1.850 صار 740 فلس ..
 كريم كان ب3.075 صار ب1.270 , والسبري كان 7 وشي صار ب3 ..
تعبت الصوره توضح السعر ونوع المنتج ..
 
 
 
وبالنسبة لعنوان المحل..
الجهرا مجمع صحاري
و بالبيرق ومجمع اولمبيا 
Labels: , , , , | 0 comments
Monday, January 28, 2013

postheadericon المكياج العلاجي korff

12:33 AM
قبل فتره شفت هالماركة بالانستغرام وتحديدا باكاونت نوره سمايل واللي شوقني انها ماركة طبيه (احب المكياج العلاجي )
المهم راويتها بنت عمي وعقب راويتها صور ماركة المكياج المينرال اعتقد اسمه مدلي يورز هم بجمعية الروضه جان اشيشها خخ وبنفس اليوم رحنا <<اللي اهو امس ..
 
هذا استاند الماركة .. 
 
 اغلب الشغلات جربتهم بس خذيت هذول ..
 
- كريم اساس تقريبا متوفر ب5 درجات انا اخترت رقم 5 اغمج ني بشوي جربت درجتين غيره ماحبيتهم وخاطري بكريم نفس لوني بالضبط :\ وعيبه مافيه حمااية من الشمس واليوم جربته ماري مبدائيا ماحبيته :\
سعره 13.270 ..
 
-قلوس خذيته لانه تقول مع الاستخدام المستمر يعني بحدود 3 اشهر يورد البراتم << ع قولتها مو نتيجة سريعه وهم جربته اليوم لونه خيف مايبين وسعره ب6ونص ..
-ماسكرا تكثيف مادري ليش مايسون ماسكرا تكثف وتطول :\ المهم كتجربه مبدائيه زينه واهي اكثر شي حبيته منهم ، سعره 8,580..
-حمره رقم 4 ورديه وكنا نبي 2 لونها بين البيج والادعم بس مخلصه وهم حسيت الحمره عاديه :\ سعرها 5,750 ..
-كونسيلر رقم 2 ب7.070  ومماقدر احكم عليه الحين بنطر شوي  ..
 
وبنت عمي خذت كريم اساس وبودر وبلاشر وحمره وكونسيلر وفرش ..
 
انا حسابي تقريبا 41 واهي 65 قلنا نبي هديه قالت الاسبوع الياي تيي الهداية وخذت ارقامنا ننطر ونشوف تتصل ولا لا خخ ..
 
وبجربهم عدل عقب احكم وبنزل فيهم بوستات ان شاءالله..

link

FB

 
Labels: , , , | 4 comments
Monday, December 10, 2012

postheadericon bioderma atoderm po zinc cream ultra-apaisante

7:17 PM
واخيرا بوست بويتي عن العنايه بالبشره مو الكياج...
 
واهو عن اخر كريم مرطب جربته ، واهو مال اختي الجوز واستخدمته معاها (عبت لي علبه صغيره حجها مناسب لجنطة مكياجي)
 
 
 
قوامه :
دهني  خفيف :
خفيف يعني لما اتدهن ينساب على بشره بس بنفس الوقت (دهني) احس اني متدهنه كشكل وملمس ومع الوقت يخف هالشعور (احس فيه بس بالبدايه ) وماحسسه يتغلغل بالبشره ..
 
ترطيبه :
عادي جدا او اقل من عادي مؤقت مثل ماقلت مايتغلغل بالبشره من جذي لما اغسل ويهي يروح مفعوله ، مااحب اللي جذي حلاته ترطيب قوي ويستمر ..
 
مدة صلاحيته :
بس 6 اشهر شويه على كريم مرطب :( الاغلب سنه ..
 
مخصص للبشره:
 
مكتوب يناسب الحساسه ويناسب الكبار والصغار واذا ماخب ظني حتى للرضع وللويه والجسم ..
 
سعره :
7 او 7 وشي ..
 
انصح فيه ؟؟
 
لا ..
 
وعلى فكره اختي نفس رايي بعد ..
 
 
 
link الصوره منقوله من هاللينك
Labels: , | 2 comments
Sunday, December 9, 2012

postheadericon G.U.M TRAVEL KIT..

12:25 PM
احب سوالف الميني والشغلات المجكنمه ..

ولقيت هالست للسفر مخصص للاسنان ..

عباره عن جنطه صغيره شفافه تقريبا بحجم البوك وفيها عدة تنظيف الاسنان الفرشاة والمعجون والخيط والاعواد ..

وايد حبيت الفكره ..

وتحصلونها بوتس..

سعرها :
4.750 د.ك
Labels: , , | 0 comments
Friday, November 2, 2012

postheadericon اول ماركة مكياج صنعت بايدي كويتية ..

4:07 PM
من زمان ماحست بكويتيات توني كنت افتر ولقيت موضوع شدني دشيته وحبيت فكرته قلت اشاركم فيه , طبعا قريته كله مع الردود وعرفت انه عندها اكاونت بالانستغرام ..
 
 
وهذي الصور لشغلها ماشاءالله (منقوله من اكاونتها )
 
بس قبل خل اقولكم شنو اللي شدني لها ؟؟
 
انها طبيعيه وتجميليه بنفس الوقت (احب هالشغله)  لانه تم صنعها  من مكونات وزيوت وعناصر طبيعيه مثل زبدة الكاكاو اللي تتميز بقوة الترطيب وتحمي الشفاه , وخاليه تماما من اي مواد بترولية  وغنية بالفيتامينات مثل فيتامين E وتتميز بالثبات لساعات عديده دون الحاجه الاعادة استخدامها , وكما انها صنعت بمقاييس منظمة الغذاء والدواء الامريكية FDA .
 
وهم حسيت انه البنت دارسه الموضوع عدل ماشاءالله مو بس من الناحية الكميائية والتجميلية هم من الناحية التاريخيه لها .
 
وبدايتها مع الحمر وقريب بتنزل انواع يديده منها مع شدوات ان شاءالله ..
 
 
 
 
وعندها اكثر من الكوليكشن :
 
الاول باسم (مجموعة الزهريات Floral collection)
سمت بهالاسم لان استوحت ألوانها من ألوان الزهور الطبيعية 
 
×× ملاحظة :شرح  الكولكشن منقول من موضوع التاجرة في كويتيات اما اللي فوق المعلومات انا ميمعتها من اكاونتها ومن موضوعها وحاولت اصيغها ..
 
حمرة رقم 1 : الوردية Sweat pea لونها مستوحى من زهرة السويت بيا.. قوام الحمرة ترطيبي يعني الترطيب فيه عالي واللون يعطيج هايلايت على شفايفج و طبعا نكهتها ودج تاكلينها علي ورد الجوري المطعم بفاكهة الباشن فروت.. نكهتها وايد منعشة . سعرها ب 6,500 دينار
 
 
واهني صورتها معروضة على الشفايف صورة بفلاش و صورة ثانية من غير فلاش
 
 
 2- حمرة رقم 2 البنفسجية Allium لونها مستوحى من زهرة الآليوم و قوامها ترطيبي عالي و اللون يعطيج هايلات علي الشفايف و نكهتها ورد الجوري مع الباشن فروت. سعرها ب 6,500 دينار
 
 
  من الكوليكشن ثاني Special Collection او المجموعة الخاصة:
 
 رقمها 6 Ruby لونها عنابي زاهي مثل الكرز وفيه لمعة او مثل ما نسميه بالكويتي "زري ناعم" لكن لونها اقوى من كوليكشن الزهريات و نكهتها التوت البري... سعرها ب 7,500 دينار
 
 
 
وهالحمره مادري من اي كولكشن لانها مو ذاكره بالاكاونت ..
 
وموفره باكاونتها قلوسات :
ترطب وفيها لون ولمعه ناعمه وسعرها ب5 ..
 
وغير المكياج تسوي منتجات بيوتي مثل هالصابونه..
 
تشوق ماشاءالله مو ؟؟
 
للمعلومات اكثر :
 
رابط موضوع التاجره بكويتيات هني
 
اكاونتها بالانستغرام @nature_land

 

Labels: , , , | 2 comments

postheadericon simple( refreshing 3 Step Kit)

11:54 AM
من زماااااااااااااان مو منزله بوست بيوتي , اليوم بقولكم عن اخر ست بيوتي استخدمته هالفتره ..
 
 
واهو من سمبل واسمه :
refreshing 3 Step Kit
 
اللي شدني  له وخلاني اشتريه :
1-انه هالماركة اذا ماخب ظني طبيه لانه بنت عمي تستخدم غسولها بوصفة من دكتور الجلدية .
2- حجمه صغير احب الشغلات الصغيره حلوه للجنطه سواء للدوام او السفر ماتحتاج مكان بالجنطه ، وهم لاني ملوله واحب اكود بعد.
3- انه للبشره الحساسه ..
4-سعره رخيص عشان مايعورني قلبي اذا طلع مقلب او اذا الله لا يقول عفس بشرتي (تقريبا شي وعشرين رنجت بحدود الدينارين كويتي).
5- انه ست متكامل بكل الخطوات الروتينيه اللي نحتاجها بعنايتنا اليومية بالبشره.
6-والحلو بعد انه محددين تاريخ نهايته  بالتفصيل باليوم والشهر والسنه وعلى كل عبوة  , وهالشي مفيد بحالة تم عندج وانتي من مهوسين التكود مثل حالتي تعرفين اذا انتهى واهو يديد لي الحين ما استخدمتيه ..
 
 
 
مكوناته ال3 خطوات اهي الروتين اليومي للعناية بالبشره ..
1- غسول ، منظف:
2-تونر -تونيك ..
3- مرطب ..
 
ملاحظه: الصوره اللي فوق اهي الست نفسه بس اللي تحت المنتجات بحجمها الطبيعي ..
 
(1)
 الغسول او المنظف اسمه:
 

Kind To Skin Refreshing Facial Wash Gel

 
 
حجمه : 50 مل ..
مدة صلاحيته :24 شهر من تاريخ الفتح (الاستخدام)
 
قوامه : مبين من اسمه انه جل ..
رايي فيه :
ميزته : خفيف ع البشره
عيبه: احس ينشف ويهي مو حييل بس عقبه احس بحراشيف ع خدي و بخشمي اكثر شي هالشي نفرني منه انا ابي ومحتاجه الترطيب لانه بالنسبه لي اهم شي للتفتيح والبشره الصحيه انه تكون مترطبه عدل ..
 
 
(2)
التونيك او التونر :
 

Kind To Skin Soothing Toner

 
حجمه : 50 مل ..
مدة صلاحيته :12شهر من تاريخ الفتح (الاستخدام)
 
قوامه : خفيف جنه ماي.
رايي فيه :
ميزته : خفيف ع البشره يعني ماحس بحراره او حكه لما استخدمه (الحمدالله) ومافيه كحول.
 
(3)
 
المرطب:
Kind To Skin Hydrating Light Moisturiser
 
حجمه : 50 مل ..
مدة صلاحيته :12شهر من تاريخ الفتح (الاستخدام)
 
قوامه : اقدر اقول انه لوشن خفيف ..
رايي فيه :
ميزته : خفيف من اسمه  لايت وبسرعه تمتصه البشرة .
 
عيبه:
-انه خفيف وايد اكثر من لازم  يعني ترطيبه اقل من عادي .
-ماحبيت ريحته.
-طريقة استخدامه تغث من سبت تعبئة صاير جنه بطل والبلاستيك صلب ماينعصر او ينعفس فقعد اطقطق فيه يالله يطلع ..
 
Labels: , , , , | 0 comments
Subscribe to: Posts (Atom)

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

انستغرام المدونة (roroalk)

follow me

follow me

My Blog List

Show All

Ads

Meenakon Design Templates