Showing posts with label مشتريات. Show all posts
Showing posts with label مشتريات. Show all posts
Sunday, December 1, 2013

postheadericon محل جديد بالجهرا تونتي 4 - twenty 4

10:01 AM
احم احم هالبوست المفروض انزله قبل اسبوعين !
 
المهم محل يديد كنت متشوقه عليه حدي من كثر ماشفت اعلاناته بالشوارع ..
 
وبطل قبل 20 يوم تقريبا ..
 
انا رحت له اول يوم عقب افتتاحه ب4 ايام وتوالت الزيارات له عقب خخ ..
 
واهو يعتبر اول فرع بالكويت واهو نفس شركة رد تاغ ..
 
وتقريبا شامل لكل الاسره ..
 
 
اكبر قسم اهو القسم النسائي وهذي مقتطفات منه ..
 
وعقب قسم الاطفال ..
 
واخر شي القسم الرجالي ..
 
وفي قسم للمنزل اكسسوراته مثل كوشيات - فوط-شراشف .. الخ ..
 
وهذا قسم الاكسسورات النسائية ..
اسعاره :
رخيصه ماشفت شي اغلى من 7 وفي شغلات وايد ع دينارين و3 ..
 
عنوانه :
 
بمجمع العلياء مادري علياء المهم يديد بالجهرا ومكانه صوب القيصيريه ..
Labels: , , , | 0 comments
Friday, August 2, 2013

postheadericon اعادة افتتاح التراث الهندي بالجهرا

3:21 PM
ماشاءالله شخابيط صايره كلها جهراويه خخ لانه وناسه بطلوا عند وايد محلات يديده ..
 
وامس بالصدفه اكتشفت انه ردوا بطلوا عندنا ولما سالتهم متى بطلتوا ؟ قالوا بيصير لهم شهر ..
 
 
شكله من داخل ..
 
فصلت ع هالخامات تشوق الوانهم خذيت لي وحده عن خاطري ولي الحين ما حددت شبسوي فيها ؟
 
حبيت الصفرا
 
وهذا من  صوب الكلف احترت اخذ اي لون
وبعد في قسم للاكسسورات بس مارحت له بس شفت صوب الخامات والكلف ..
 
عنوانه :
 
الجهرا - سليل - البوابه اللي يم صالون برجيت ..
 
 
Labels: , , , | 0 comments
Tuesday, July 30, 2013

postheadericon sembonia @ jahra

2:59 AM
قبل جم يوم  شفت كاتلوجهم واستانست انه بيبيطل عند ..
 
هالمحل من الماركات الماليزيه واعتقد مو متاكده انه هذا اول فرع له بالكويت ..
 
 رحت له يومين ورا بعض..
 
بس ماصورت وايد ..
 
 
ماصورت الاالجواتي وانتوا بكرامه ..
 
 
والكولكشن المتوفر اهو اللي بالسايت اشوه مو ستوكاتهم :)
 
هذا رابط الموقع هني
 
بالنسبه للاسعار:
 
الجناط من شي و20 د لي جريب ال90 د << هذا اللي شفتهم ..
 
الجواتي وانتي بكرامة اغلبه بالتعش اقل من 20 د..
 
والميداليات ب5 د..
 
اما مكانه ..
 
مجمع اوتاد - فوق - بالتوسعه - جبال كافيه بزه ومكان بست اليوسفي قبل جنه .. (سالوا اي احد يدليكم استغرب عند كل بوابه في نفس الرسبشن / الاستقبال والبنات يروحون ويقولون ماندل !  وينه ماشفنه اي سالوهم بيدلونكم مايقصرون)
 
 
Labels: , , , , , | 1 comments
Tuesday, July 2, 2013

postheadericon essence

10:30 AM
 
قبل اسابيع لقيت ستاندها برد تاغ الري وقالت لي دور الاسبوع تنزل ومر اسبوع و2 و3 والاستاند يصفر لي الحين ..
 
امس سويت جوله بالري ولقيته بلايف ستايل (تبع لاند مارك )
 
استانست .. ركضت خخ قويه .. بس ماخمطت :(
 
 
اول شي لفت انتباهي الحب الحب البي بي كريم ..
 
متوفر بدرجتين :
جربتهم ولا وحده ناسبتني رقم 1 ارحم رقم 2 طلع ابلق اموولح اشهب كلش ماناسبني ..
 
وماخذيته :(
 
ومالقيت سعره ولا في احد عبرني جان سالته ..
 
وبس خذيت بيس للشدو شفت بالانستغرام يمدحونه وانا محتاجته ..
 
هذي صورته من النت ..
 
لي الحين ماجربته ..
 
وسعره:
 بدينار ونص بس ..
 
كنت ابي حمره منه شفتها بالانستغرام بس ماحصلتها :(
 
والاسعار :
القيت نظره سريعه وخاطفه << احم احم
كانت تقريبا تبلش من 950 فلس لي 1.950 د.ك ..
 
Labels: , , , | 0 comments
Thursday, May 30, 2013

postheadericon primal elements

1:51 AM
اليوم شروف رفيجتي ودتني وشرت لي اغراض من هالبوث ..
 
 
 
اهو كشك صغير لشغلات بيوتيه من ماركة امريكيه هاند ميد و بمكونات طبيعيه مثل (فانيليا - زنجبيل - زيت الاركان .. ) واللي متوفر فيه صابون و كريمات وسنفرات وعطور ..
 وشغلهم يشوق ماشاءالله ..
 هذا صابون جنه حلاو (المصاص ) مثبت بعود خشب وفي ع اشكال وراويح والوان مختلفه ..
 
وهذي بعض النماذج من الصابون المتوفر شكله مربع ومن داخل في رسومات مختلفه وفي ع جواتي وانتوا بكرامه وع مايوه وع كيك .. الخ ..
 وحجمهم كبير شوفوه صابونة برج ايفيل بالنسبه لحجم ايدي ماشاءالله ..
 
وسعرهم الوحده ب2.750 د ك ..

 والشغلات ال2 تغليفه يشوق حبيت الكتابه اللي ع علب بالاستراس او اللولو معطيهم رقي وينفعون كهدايا ..
 
وهذا اللي خلاني اتشوق ابي اروح له ..
 
المربعه ريحتها مو زود بس لانها الاخيره وع براتم فخذيتها ..
 
وهذي حصيلتنا ..
 
انا خذيت صابونتين البراتم مع ست ميني في سنفره وعطر رول و لوشن ..
وشروفه خذت صابونتين ماشاءالله ريحتهم حلوه وفواحة عليها بالف عافيه وتتهنا فيهم يارب ..
الاسعار :
 
التوتل طلع 19 د .ك ..
 
الصابون الوحده ب2.750 ..
 
الست ب8 ..
 
عنوانه :
 
جمعية الدعيه فوق ..
 
الانستغرام : @primal_elements_kuwait
 
سالتها اذا في توصيل تقول يمكن بالمستقبل القريب :)
 
اللي تبيع كانت كريكره ههه تونس ..
 
مشكوره شروفه :*
Labels: , , , , | 0 comments
Wednesday, May 15, 2013

postheadericon black head remover dual sheet

10:43 PM
 
من شغلات البيوتي اللي شدتني بمحل
Etude House
 
لزقات الخشم ..
 
اهي مغلف واحد بس مقسم لقطعتين ..
 
اول ماشفته حسبالي بصوب لزقه وبالصوب ال2 تونر ..
 
لانه انا لما احط اللزقه العاديه كنت اسوي سنفره وعقب احط اللزقه ولما اشيل امسح بتونر عساس اسكر المسام المفتوح عقب ماشلت الوصخ والروس السودا اللي كانت سادتها ..
 
 
بس لما استخدمتها امس اكتشفت انه عباره عن شريحتين ..
 
1- رطبه ومافيه لزاق تنحط عادي ع خشم لمدة ربع ساعه ..
2- عقب تحطون ال2 واهي اقرب للعاديه بس لزاقها اخف وهم تنحط ربع ساعه ..
 
 
 
رايي :
 
حسيت بنعومه وترطيب اكثر من التنظيف ..
و اذا بقارنها باللصقات العاديه هذي اخف بوايد ع خشم لما شلتها مادمعت عيني العاديه عيبها تعور شوي ..
بنفس الوقت العاديه تتميز بان مفعولها اقوى وتحتاج مده اقل بس ربع او ثلث ساعه هذي نص ساعه ...
 

سايته :(هني)
وبلشوا يوفرون منتجاتهم بالكويت بالانستغرام :etudehouseq8
 
 
__________________________________
 

(بوستاتي القديمه عنه ..
هني (فرع ماليزيا )
وهني فرع تايلند ..
- وهذي تجربه لي نزلتها قبل جم يوم
Etude House : Magic Enzyme Pack Peeling )
 

 

 
Labels: , , , , , , , | 0 comments
Saturday, March 23, 2013

postheadericon زيارتي لمعرض العطور ..

5:09 PM
 
التاريخ-20.03.2013 - 30.03.2013
الصالة: القاعة رقم 5 , 6 , 7

 
كلش ماكنت ناويه اروح المعرض ولما اختي الجوز قالت لي خل نروح قلت حلو عساس اخذ من الماركة sla مادحينها لي لانها عضويه ومسوين عروض بالمعرض فقلت بشوفها بس اللي صار مالقيتها وخمطت غيرها وايد اليكم التفاصيل بالصور ..
 
 
رحت هالبوث واللي شدني له ..
 هالماركه..
 عندي بلشر منه اسمه كابتشينو كتبت لكم عنه هني كل من شافه سالني عنه  وهالماركه دورتها مالقيت الا بالمعرض فخذيت 2 لرفيجتي لانه عاجبها وخذيت حمره منهم ..
 
سعر الحمره 3 ..
والبلاشر قالت 3 قلت كنت ماخذته 2.500 قالت اوكي ..
ولما بتحاسب قلت ابي خصم خخ بعد جان تعطيني سلة اصباغ اظافر قالت اختاري اللي تبينه هديه :)
 
حبيت ..
 
والاهم سالت عن مكان المحل لانه شكثر سالوني وماكنت اعرف وين !!
 
لاني خذيته من المعرض ..
 
افرعه :
* السالمية :
-مجمع جاليري 2000 ش سالم المبارك السرداب ..
-مجمع الزبن ش سالم المبارك بالميزانين ..
*حولي بشارع بن خلدون مركز العثمان \السرداب ..
*الفروانية ش الفروانية مجمع الصيفي بالاس بالميزانين ..
*خيطان :
-جمعية خيطان بالميزانين بقسم التجميل..
-مجمع الدبوس ..
 
(2)
الحب الحب احبها هالماركه واغلب شغلاتها مجربتها..
وبتناغرا للمعرض مسوين عليها عرض اذا خذيتي شغلتين بتحصلين الثالثه فري..
 بس عيب العرض انه محدد بشغلات معينه تختارون منه الشغله الفري ( جنطه- علاق الطاوله للجنطه-اصباغ اظافر -ماسكرا للشعر 4 الوان بس اللي مشموله بالعرض وردي \ابيض\اسود\ادعم -قلوس بيج او شفاف - بودره فاتحه- عطر -ايلاينر اخضر )
 مشترياتي كحل ازرق وكونسيلر بودره و الهديه عقب عناء اخترت الايلاينر اخضر..
 
(3)
 
هالبوث من بعيد شدتني عروضه ..
 
سلاسل كبار متروسه جناط فيها كريمات او مكياج ..
 
وهذي اصباغ اظافر ميني الواحد بربع وال5 بدينار ..
 
 
 مشترياتي :
 
جنطه فيها كريم وسنفره لليد وكريم وسنفره للرجل وحجر بعد ..
 سعرها ب10 ..
 
كان معاها مقوي بدال السنفرة الريل وسالته اذا يصير اغير وقال يصير اشوه ..
 
وهذول خذتهم اختي الجوز ..
 
ماسكرا + مزيل مكياج ب5 د.ك
وللرموش برا جنه ب12 بالمعرض ب7 ..
 
كريم بي بي متوفر عندهم بدرجتين برا ب10 عندهم ب5 ..
واللي جنه حمرا ترطيب لحول العين والشفايف بدينار ونص ..
والاسود سيرم هديه وكابون تنظيف بشره هدية ..
 
(4)
 
هالبوث شدني له استاند نيفيا من زمان عنها كنت ادورها في حمره عاجبتني ..
 
مالقيتها لقيت مقارب لها خذيتها قلت بجم قالت كلشي بدينار جان اخمط خخخخ ..
 مشترياتي ..
حمره ومحددين وماسكرتين وكحل اسد لاميمتي و صبغ اظافر والصراحه كنت ابي بعد بس اغلب الشغلات مخلصه غميظه :(
 
البوث لمحل اسمه فيفنزا  اعتقد موجود بكويت ماجيك وجنه مجمع بيروت ووايد اماكن نسيتها ..
 
(5)
 
هذا صوب ماركة كورف قلت لها ترا اطالبكم هديه وفي احد بالبوث ماقلت له السالفه ..
 
وخذيت منهم ست عنايه للبشره شامل ..
 وعطوني هديه وكلما فتحت حلجي زادوها ومتحسفه اني ماخذيت اكثر دافعه شي وسبعين وقبل فوق 100 ..
عطوني سامبلز كريمات وماسكرا + جنطه ..
وماسك فري مو سامبلز ..
وسامبلز حمايه انا قلت ابي ..
 
ولازالت ابي بعد منهم ليش تقولي باتصل وماتتصل :\
 
 
Labels: , , , , , | 0 comments
Monday, January 28, 2013

postheadericon المكياج العلاجي korff

12:33 AM
قبل فتره شفت هالماركة بالانستغرام وتحديدا باكاونت نوره سمايل واللي شوقني انها ماركة طبيه (احب المكياج العلاجي )
المهم راويتها بنت عمي وعقب راويتها صور ماركة المكياج المينرال اعتقد اسمه مدلي يورز هم بجمعية الروضه جان اشيشها خخ وبنفس اليوم رحنا <<اللي اهو امس ..
 
هذا استاند الماركة .. 
 
 اغلب الشغلات جربتهم بس خذيت هذول ..
 
- كريم اساس تقريبا متوفر ب5 درجات انا اخترت رقم 5 اغمج ني بشوي جربت درجتين غيره ماحبيتهم وخاطري بكريم نفس لوني بالضبط :\ وعيبه مافيه حمااية من الشمس واليوم جربته ماري مبدائيا ماحبيته :\
سعره 13.270 ..
 
-قلوس خذيته لانه تقول مع الاستخدام المستمر يعني بحدود 3 اشهر يورد البراتم << ع قولتها مو نتيجة سريعه وهم جربته اليوم لونه خيف مايبين وسعره ب6ونص ..
-ماسكرا تكثيف مادري ليش مايسون ماسكرا تكثف وتطول :\ المهم كتجربه مبدائيه زينه واهي اكثر شي حبيته منهم ، سعره 8,580..
-حمره رقم 4 ورديه وكنا نبي 2 لونها بين البيج والادعم بس مخلصه وهم حسيت الحمره عاديه :\ سعرها 5,750 ..
-كونسيلر رقم 2 ب7.070  ومماقدر احكم عليه الحين بنطر شوي  ..
 
وبنت عمي خذت كريم اساس وبودر وبلاشر وحمره وكونسيلر وفرش ..
 
انا حسابي تقريبا 41 واهي 65 قلنا نبي هديه قالت الاسبوع الياي تيي الهداية وخذت ارقامنا ننطر ونشوف تتصل ولا لا خخ ..
 
وبجربهم عدل عقب احكم وبنزل فيهم بوستات ان شاءالله..

link

FB

 
Labels: , , , | 4 comments
Subscribe to: Posts (Atom)

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

انستغرام المدونة (roroalk)

follow me

follow me

My Blog List

Show All

Ads

Meenakon Design Templates