Saturday, July 31, 2010
السلام عليكم ..

الحين بلشنا بوستات اليوم ال2 اول مكان رحنا له السوق الصيني يونس استانس ع خرابيطهم ..

من المحلات اللي دشبتها هالمحل..




واغلب شغله سوالف هللو كاتي ..


ياحليلهم هالمطارات شفتهم ذكرت امي :) وبهاللحظات امي زفتني خخ لو مو ذاكرتها احسن خخخ..

الجناط اللي فوق جنه موجودين بارض المعارض..

شباصات بس ماعندنا بنوتات جان خمطت..

وهذيل مشترياتي ..

جنطه لاب توبي..
سماعات توني جربتهم واشوه زينين ..
و هالمحل شفت نفسه اذا ماخاب ظني بجمعية الخالديه فوق , وبالامارات في محلات وايد متخصصه لها في الرخيص مثل هذا وفي الغالي بمجمعاتهم الفخمه مثل تايمز سكوير و جنه دبي مول :)
Friday, July 30, 2010
مرحبا الساع :)

السلام عليكم ..



وطلبنا مشويات منوعه << لاختي..
ومرق وملفوف (ورق عنب لاختي)
وشوربتي وكان معاها معكرونه بس خلصت فكنسلت طلبي ورحت خذيت البطاط اللي امس قلت لكم عنه..

*راينا :

انا : الاكل اقل من عادي وماحبيته وايد..

اختي: ماتذكر بس تقول زين ..

وين موجود؟؟

احنا جربنا اللي بالامارات مول وطلبيتنا كانت سفري من جذي تحسون لويه :\

وموجود بوايد اماكن 2 بدبي:

ديرة سيتي سنتر, مردف سيتي سنتر, ابن بطوطه ,ابو الهيل, العربي,جمعية الاتحاد ,مدينة الغرير, فيستيفال سيتي, اوتليت ,الورقاء, مطار دبي مبنى 1 و2 ,جميرا (ام سقيم),دبي مول ,جمعية الامارات التعاونية , داجوان مول( السوق الصيني),دوار الساعة ..

ابوظبي:

مارينا مول , ابوظبي مول ..

الشارقه:
صحاري مول , جمعية الشارقة التعاونيه(السويحات ,دبا)..

العين ..

بالعين مول..

وهم موجود بعمان وتحديدا مسقط:

مركز الفرم ..
Thursday, July 29, 2010
السلام عليكم..

اليوم بحط اكم بوست خفيف عن اول مطعم جربته بدبي ..


وهذا طلبي بطاط مع جبن وجنه دياي امبيه نسيت مامداني بس ماعجبني الدياي مثل اللحم مال تكساس فرايز :\

سعره:

انا اخترت الصغير فطلع لي ب13 درهم ..

رايي:

ماحبيته وايد اهو زين مو وااو ..

ارحم من الانواع الاخيره اللي جربتها بالكويت اللي اذا زدنا جبن ع بطاط لزق بالصحن وعشان اكله جني اتهاوش معاه :\

هذا جبنه النوع اللي احبه بس لو اثقل احسن ..

وبطاطه زين بس لو امتن احسن..

واهو اقرب شي لبطاط great steak بس طبعا ال2 وايد الذ :)
السلام عليكم ..
اليوم عيد ميلاد منو ؟؟

مدمد ..

وماشاءالله صار عمرها 25 يعني ربع :p

وعساه هدد مو عدد ويارب تكون سنة خير عليج..

وبهالمناسبه حبيت نحتفل معاها وع حظنا كان نازل فيلما عنجلينا واهي تحبها ..
فرحناله بس مافاد معاه صراع الجبابره سبقتنا وحجزت لنا فيه خوش احتفال خخ..


*النبذه من سايت السينما ::
بطولة


Angelina Jolie, Liev Schreiber



النوع

حركي, اثارة

مدة الفيلم

95 min


القصة

أقسمت إيفلين سولت كضابط في وكالة المخابرات المركزية على تقوم بعملها بكل شرف وتصون بلدها. إلا ان ولاء إيفلين سولت يوضع تحت الإختبار عندما يقوم لاجئ روسي باتهامها بانها جاسوسة روسية. تهرب إيفلين سولت وتحاول تبرئة نفسها من التهمة.



رايي:

بالبدايه ليما التحقيق مع المتهم حسيته اكشن عقب قلبت جنغر مراه تكفخ 6 او 7 رياييل مره وحده وتسدحهم و تناقز وتخطط بثواني وشطبت على اللي الفيلم كلهم  مابقى احد ماطقته بس باجي تكوفنه انا ومدمد واختي خخخخخخخخخخخخ.. لا كلش ولا النهايه انصدمنا منه لانه ماستوعبنا انه خلص :\

ورحنا تغدينا هون ..




خبز..

شوربة عدس اهي الوحيده اللي خلصناها حلوه..
تبوله ماذقتها لاني مااكل خضرا طلبتها لاختي..


سيزر شريتها ع مدح اخوي ماكيلت وايد منها بس اول شي حسيت بمروره عقب صارت اوكي..


حمص بيروتي اختيار مدمد وكان نايس..

فته باللحمه من قبل جربت بالحمص بصبح ومسا تقريبا نفس الطعم بس حبيت اللي بالحمص اكثر..

كبة باللبن زينه وهم طعمها مقارب للي بصبح ومسا..

ومعاه عيش متفخ يونس..

مشويات مشكله بس ذقت الريش وكان حلوو..

الفاتوره :)
*رايي:

الاكل طعم من زين الى حلو مافي شي مو ذاك الزود:)


تغدينا قبل الفيلم..

وغقبه رحنا نحلي بهاجن داز من زمان كان ودي اجرب فوندوهم ..


وبراوني..

رايي:

اقل من عادي وفوندو باسكن الذ وارخص :)
Tuesday, July 27, 2010
السلام عليكم ..

باول يوم عقب ماحطينا اغراضنا بالفندق و ع مايصير وقت الجيك ان رحنا لسكي دبي ..



التذاكر نوعين :
-العاديه ب120 تشمل الحديقه يعني تمشون وزحلاقيه بس..
-الشامله مثل العاديه بالاضافه انها  تشمل التلفريك والزحلاقيه الحلوه و الكره ومعاه هديه كوبون ب10 دراهم و اي وقت تقدرون تطلعون وتردون لها يعني لليوم كامل ..
احنا اختارنا الشامله وهذي اهيا ع ايدنا ..

انا اي وحده خخخ..؟ 


الكابونات ..

دخلنا وناسه الجو يهبل ماشاءالله..
وهذي درجة الحراره..

خل نستكشفها ..
الزحلاقيه الحلوة :)
هاللعبه حلوه فصلت عليها ركبتها 3 مرات مرتين الطفاحيه المزدوجه مع اختي مره كنت جدام ومره ورا وجربتها مره بروحي بالطفاحيه الفرديه ..

اذا بروحج تخوف اكثر لانها تفتر اما المزدوجه تونس اكثر خصوصا اذا جدام ..

خخ بالنسبه لي هذي احلى لعبه عندهم صرخت وضحكت فيها لدرجة اني قمت ادمع :)

خل نشوف اللعبه اللي يمها واهي كره تدشون داخلها ويدزونكم فيها ماحبيتها وايد خفت لا اطير من الفتحه :\

نكمل تمشي واستكشاف..

كا في لعبه اهي كل من يدخلها عادي مو مخصصه بس للتذكره الشامله خل ناخذ المزلاج ..

وندش الكهف..

ماحبيت هاللعبه حسيت اني اتزحلق ع قار :\
والحين دور التلفريك ..

الصوره مو واضحه تدرون ليش لانه وانا اصور ماوعيت الا الهبله مالت اللعبه اتلني من جاكيتي وتحذفني ع الكرسي خخخ تحمد ربها اني كنت مستانسه ومكيفه مو معصبه جان كفرت فيها :)

نصعد..
ننزل..
منظر من التلفريك ..
وخلال الجوله مرينا عند كافيه بس مانزلنا له كنت بنصعد له مره 2 بس اللي معاي تجمدوا وخافوا :(

لما طلعنا ولا مشغلين ليزر شكله بالصج يونس..

خلصنا بس قبل لانطلع نرد مفتاح اللوكر ونستلم التامين من هالاله ..
التامين 10 دراهم مخصصه للوكر نحط فيه اغراضنا ..

وخل نشوف شنو ناخذ بالكونات لقيت هالبلوره عجبتني فكرتها يحطون صورتكم فيها في مثلها بالكويت .؟؟


سعرها تقريبا 150 درهم..

خذينا ميداليات كذكرى بس ماصورتهم لانهم ضاعوا مني :(


من امتع ماشفت وجربت بدبي ..

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads