Tuesday, July 27, 2010
السلام عليكم ..

باول يوم عقب ماحطينا اغراضنا بالفندق و ع مايصير وقت الجيك ان رحنا لسكي دبي ..



التذاكر نوعين :
-العاديه ب120 تشمل الحديقه يعني تمشون وزحلاقيه بس..
-الشامله مثل العاديه بالاضافه انها  تشمل التلفريك والزحلاقيه الحلوه و الكره ومعاه هديه كوبون ب10 دراهم و اي وقت تقدرون تطلعون وتردون لها يعني لليوم كامل ..
احنا اختارنا الشامله وهذي اهيا ع ايدنا ..

انا اي وحده خخخ..؟ 


الكابونات ..

دخلنا وناسه الجو يهبل ماشاءالله..
وهذي درجة الحراره..

خل نستكشفها ..
الزحلاقيه الحلوة :)
هاللعبه حلوه فصلت عليها ركبتها 3 مرات مرتين الطفاحيه المزدوجه مع اختي مره كنت جدام ومره ورا وجربتها مره بروحي بالطفاحيه الفرديه ..

اذا بروحج تخوف اكثر لانها تفتر اما المزدوجه تونس اكثر خصوصا اذا جدام ..

خخ بالنسبه لي هذي احلى لعبه عندهم صرخت وضحكت فيها لدرجة اني قمت ادمع :)

خل نشوف اللعبه اللي يمها واهي كره تدشون داخلها ويدزونكم فيها ماحبيتها وايد خفت لا اطير من الفتحه :\

نكمل تمشي واستكشاف..

كا في لعبه اهي كل من يدخلها عادي مو مخصصه بس للتذكره الشامله خل ناخذ المزلاج ..

وندش الكهف..

ماحبيت هاللعبه حسيت اني اتزحلق ع قار :\
والحين دور التلفريك ..

الصوره مو واضحه تدرون ليش لانه وانا اصور ماوعيت الا الهبله مالت اللعبه اتلني من جاكيتي وتحذفني ع الكرسي خخخ تحمد ربها اني كنت مستانسه ومكيفه مو معصبه جان كفرت فيها :)

نصعد..
ننزل..
منظر من التلفريك ..
وخلال الجوله مرينا عند كافيه بس مانزلنا له كنت بنصعد له مره 2 بس اللي معاي تجمدوا وخافوا :(

لما طلعنا ولا مشغلين ليزر شكله بالصج يونس..

خلصنا بس قبل لانطلع نرد مفتاح اللوكر ونستلم التامين من هالاله ..
التامين 10 دراهم مخصصه للوكر نحط فيه اغراضنا ..

وخل نشوف شنو ناخذ بالكونات لقيت هالبلوره عجبتني فكرتها يحطون صورتكم فيها في مثلها بالكويت .؟؟


سعرها تقريبا 150 درهم..

خذينا ميداليات كذكرى بس ماصورتهم لانهم ضاعوا مني :(


من امتع ماشفت وجربت بدبي ..

42 comments:

Crazy Girl in aGood Way said...

وناااسه بس تصدقين كلش ماتحمست لدخلته

عندي الطبيعي احلى واونس :(

اذا 3تحت الصفر تجمدو بساعتين

لو يعيشونها شهرين يمكن اكثر :(

مشكورة وعليكم بالف عافيه ومتابعين الرحله

Unique Girl said...

أمبيييه وناااااسه كشششخه

ودي اروح ان شا الله اذا رحنا دبي اذا الله عطانا عمر

مشكوره حبيبتي

Unique Girl said...

أمبيييه وناااااسه كشششخه

ودي اروح ان شا الله اذا رحنا دبي اذا الله عطانا عمر

مشكوره حبيبتي

swera said...

wanasaaaa ana w9alt hnak bs madasheeeta!
bel3afia 3alech :*

~أم حرّوبي~ said...

أحلى شي الزحلاقية ^^
أهم شي استانستي ^^
ما تشققت ايدج من البرد ..انا جذي صارلي ..لما تطلعين ما توعين الا اصابعج متشققه ومدميه خخخ بس ما تحسين فيهم

le Koweit said...

عجييب
اذكر يوم رحت دبي السنة اللي طافت دخلته
احلى من عالم الثلج حق حديقة الخور
<< شخباااري لووول

والله تمنيت احط فراش واقعد فيه الجو عجبني
لوووووول

جاكليته said...

احلى شي اني اشوف هالبوست عز الظهررر

لاني الحين وانا اشوفه استبردت مادري ليش ؟؟؟ :))
بس عليج بالعافيه الوناسه ..
وبالنسبة للبلوره موجود منها بالكويت وبأماكن وايده بعد ..
وعلى ما اذكر تلاقينها بالمركز العلمي ..

وتسلمين على البوست المثلج :))

هديــل said...

وناااسة

حماس خخ

عليج بالعافية

احلى شي انج تعيشين البرد بعز الصيف لول

عليكم بالعافية

AM.SA.CHANNEL said...

السكي عجيب الصراحة أنا بس سرتله مرتين و حلاته يوم يمعه و حد وياج تستانسين و ضحك خص هاللعبه اللي تيلسين على تيوب و يدزوونج تنقعين من الضحك ..

و أهم شي إنكم إستانستوا
يالله نتريا اليديد

عين بغزي said...

رائع

ri7ana said...

الله يونسج بطاعه الرحمن
وعليج بالعافيه
لو ان ثلج حقيقي جان اكلت منه انا :p

قلم ومسّاحة said...

بالعافية عليج واهم شي استانستوا
وناسة احلى شي درجة الحرارة صج صج راح أكيف بالبرودة داخل واطلع..

alB6h said...

وعليكم السلام
اذكر اخر مره لما رحت ماكانوا حاطين كل هالسوالف .. يبيله بهالحر هالمكان

عليج بالعافية وان شاء الله دوم تستانسين :)

Hopeless Sight said...

ماشاءالله الصور روعه
أول و آخر مرة كانت من سنتين و أبوي ما خذالنا التذكرة الشاملة يقول حدكم الحديقة ههههه مابيكم تكسرون و تخرب العطلة و حتى أختي كان عمرها 3 سنين ما دخلها معانا علشان لا تمرض لأن وايد وايد برد و كللش ما تحملنا نقعد أكثر من ساعتين ونص أعتقد

كوكتيل said...

صباح الخير :)

وايد حلو رورو ماشاء الله :)

أهم شيء إستانستو الحمد لله

وإنت الإيد اللي بروحها سويتي :)

فـ(المطيري)ـدكـ said...

وناااااااسة .. يالله تردون بالسلامة يااااارب ..

عاد اهلي يو من فترة يقولون الجور حرررر ..

التقرير واااااايد حلوو ..

التلفريك جربتة بالاردن بس عاد

ننطر تقريرج الياي .. ^_^

ROro Mania said...

اخر مره رحت دبي كنت بدشه
بس ما رضوا خواتي يدشون وياي و مابغيت
ادشه مع اليهال :)

عليج بالعافيه
ناطرين باجي الاماكن ;)

daloo3a said...

احلى شي سكي دبي

حلووووو وااايد ^^

خاتون said...

و عليكم السلام و الرحمة
عليكم بستين ألف عافية
عجبتني حركة الايدين ذكرتني في بور رينجر
الصور وايد حلوة
تسلمين على النقل الحيوي
و ميغسي بكو ... بكو

رورو الشخبوطه said...

هلا كريزي..

انا ماشفت الصجي..

بس اتوقع هذا اونس خخخ..

لانه في العاب..

اهو حلاته كتغير مو معيشه دايمه ..

العفو ولو..

الله يعافيج يارب..

مشكوره..

رورو الشخبوطه said...

هلا يونيك..

من زمان عنج عاش من شافج..

ان شاءالله تروحين لها باقرب وقت وتستمتعين فيها..

العفو ولو..

حياج الله..

رورو الشخبوطه said...

هلا سويره..

اذا ماجربتيها كلش المره اليايه جربيها اذا تحبين العاب تونس :)

الله يعافيج يارب..

مشكوره..

رورو الشخبوطه said...

هلا ام حروبي..

اي صح اهي احلى شي..

لا انكسر ظفري وماستوعبت هالشي الا لما طلعت اهي اهي...

وحياج الله..

رورو الشخبوطه said...

هلا اخوي لو كويت..

حده..

وناسه بعد عندهم شي 3 عن الثلج انا حسبالي بس هذا والكافيه..

خخ ماتنلام فينا فقر برد..

ومشكور..

رورو الشخبوطه said...

هلا جاكليته..

من النظر ..

الله يعافيج يارب..

انا ابي اللي احط فيها صورتي مو اللي جاهزه..

اهي جذي؟؟

والله يسلمج يارب..

مشكوره..

رورو الشخبوطه said...

هلا هديل..


متعه خخخ..

الله يعافيج يارب..

وخصوصا انه هالشتا ماكان برد الا يوين :(

مشكوره:)

رورو الشخبوطه said...

هلا شانيل..

اي حده وناسه مو مال بروحج لازم معاج احد..
وصح مثلي احلى لعبه الطفاحيه:)

الحمدالله وايد استانسنا..

ان شاءالله قريب..

حياج الله..

رورو الشخبوطه said...

هلا اخوي عين..

الاروع مروركم :)

حياك الله..

رورو الشخبوطه said...

هلا ريحانه..

جزاج الله خير واجمعين يارب..

الله يعافيج يارب..

خخخ ..

حياج الله..

رورو الشخبوطه said...

هلا اخوي قلم..

الله يعافيك يارب الحمدالله وايد..

اي عجيب الجو لا يطوفك :)

وحياك الله..

رورو الشخبوطه said...

هلا بطه..

عيل يبيلج روحه 2 له ان شاءالله..

اي فينا فقر برد..

الله يعافيج واجمعين يارب..

مشكوره..

رورو الشخبوطه said...

هلا هوبيلس..

مرسوو..

ساعتين ونص ..

احنا جنه اقل :\

مجرد ماخلصنا الالعاب طلعنا :)

واي اتوقع اليهال مايتحملون ..

وحياج الله..

رورو الشخبوطه said...

هلا سوسو..

صباح النور..

اي ماشاءالله..

الحمدالله وايد..

البيضه ؟؟ اذا اهي لا :)

ومرسو سويتي..

رورو الشخبوطه said...

هلا فدك..

الله يسلمج يارب مرسي...

مثل جونا او احسن بشوي..

مشكوره :)

انا اول مره اجربه كللعبه ودي اجربه بالصج..

قريب ان شاءالله..

ومشكوره..

رورو الشخبوطه said...

هلا رورو..

اي مع اليهال لويه ماراح تسمتعين ان شاءالله المرات اليايه تدشينه.. :)

الله يعافيج يارب..

ان شاءالله قريب..

مشكوره..

رورو الشخبوطه said...

هلا دلوعه..

اي وايد ماشاءالله..

مرسو..

رورو الشخبوطه said...

هلا خاتون..

الله يعافيج يارب.

خخخ..

مرسو عيونج الحلوه..

الله يسلمج يارب..

دوغيا..

وحياج الله..

Made n Q8 said...

اي هذا الي قلتيلي عنه
واااااو روعه مشالله

والثلج شكله يهبل

عليكم بالعافية

Made n Q8 said...

لوول تذكرت لما تسالين اختج اهوا سكاي ولا سكي خخخخ

شاي الضحى said...

الله وناسه شوقتيني

يبيلنه ثلج على هالجو

عليكم بالعافيه

-------

ههههههههههه تعليق مدمد سكاي ولا سكي

رورو الشخبوطه said...

هلا مدمد..

اي اهو حده يشوق ..

ان شاءالله تروحين له قريب استمري ع الحنه ترا تفيد ..


الله يعافيج يارب..

خخخ يعني لازم تفضحيني خخ..

وفي 3 بعد نسيتها :\

وحياج الله..

رورو الشخبوطه said...

هلا جايونه..

اي والله يبيله :)


الله يعافيج يارب..

الحين خليتي كل الردود وثبتي ع هذا خخخخخخخ..

حياج الله..

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads