Friday, July 9, 2010
السلام عليكم ..

اليوم رحت هالفيلم الجزء الثالث من هالسلسله نزل برا ب30-6 وامس نزل عندنا ..


مقتطفات منه هون وهون ..

النبذه اللي عنه من سايت السينما:

بطولة



Xavier Samuel, Kristen Stewart

المخرج

David Slade

النوع

عاطفي, خيالي

مدة الفيلم

119 min

تصنيف

PG-13


القصة

نتيجة لسلسلة من جرائم القتل الغامضة التي سيطرت على مدينة سياتل ، بيلا الذي اقترب يوم تخرجها من الثانوية يجب عليها أن تختار بين حبها لمصاص الدماء إدوارد والصداقة مع الذئب جاكوب.

تعليقي:

-وايد في ايحاءات وشطحات والمشكله اللي يمي صبي صغير كنت بطبق دور الام المحافظه عليه خخخ..

-خلص وماستوعبت انه خلص لانه كنت رايحه ابي اشوف بيلا العله بتتزوج او لا وماقالوا :\..

-عجبتني شخصية ادورد لما خطبها خخخ ياحليله مؤدب :)

- جاكوب خو اهو اللي محلي الفيلم ..

-وبيلا اهي علة الفيلم الجزء الرابع انا مستعده امثل بدالها بس يفكونا منها خخخ تخيلو شكلي وملفعي حده مو لايق :p

-لما طلعنا مرت وحده ضحكتني تقول من زينها يتهوشون تلوع الجبد خخخخخخخخخخخخخخخخخخ.. اي والله صاجه ..

شنو بعد اممم 

-اي بهالجزء حبيت انه تعرفت ع عايلة ادورد وماضيهم ..

وبس ناطره الجزء الرابع ..

32 comments:

Unique Girl said...

لوووووووووول اي والله تلوع الجبد من الحره لوووول

احلى اثنين يحبونها بعد شتبي

واااي فدييييته جاكوب يا حلاته والله بس

ابييي اروحله :(

swera said...

lo ray7atla ams chan gelt ana elli ga3da at7al6am lol coz glt nfs eshay! haha 5alf allah 3alay :S

daloo3a said...

اهم شيؤ استمتعتي ؟؟!! ^^

le Koweit said...

اذا بيلا من زينها
منو اللي يا زينها :P

ئال شو ئال من زينها ئال
لوووول مو مربح الفيلم غيرها يمعودة

هديــل said...

ياااي ماحب الشي اذا صار اجزاء وما تكتمل القصة :/

مع اني ما شفت ولا جزء من توايلايت وكل مرة بقرا الكتاب لأن يقولون احلى بس خايفة فيه ايحاءات مثل اللي تقولين عنها وهذا وازد مو جين :p

مشكووووورة =)

قلم ومسّاحة said...

ماحبيت هالفيلم لعدة أسباب

1- توظيف الرومانسية بالرعب بطريقة مملة

2- الابطال دمهم ثقيل وجامدين حيل


3- شخصيًا ما يشدني كلش، حاولت أهضمه بس مو قادر


وأهم شي انج استمتعي

ChuBBy-Doll said...

Eeeee bardaaaaah o kila mbalmah ..

ri7ana said...

شفت الجزء الاول وبس
اصلا مطمطوها عالفاضي
اهم فيمباير يا تصير مثلهم ياتهد ولد الناس وتذلف وتخلص القصه
عاد تغثني اهي وخشمها لا ملح ولا قبله

Sn3a said...

Ehya '3amtha ma tgol elly tbeh
o malame7ha tsa3d
3ashan chethy athnainhm ybonha l2nhm ma ydron shelly braa'ha
bs tra tnf3 7g hal door
a7s lo wa7da thanya chan ma thb6ta methlha
o yaa zeen Jacob o yaa sheen 5shma hehehhe

رورو الشخبوطه said...

هلا يونيك..

خخ ليش حره اهي تحسين بارده ماكو انفعالات ..

وبهالجزء تغث بزود ..

جاكوب الحلو فيه حمش ادورد لايق عليه منعدم الانفعالات مثلها خخخ..

ان شاءالله..

وحياج الله..

رورو الشخبوطه said...

هلا سويره..

خخخ صج حسافه عيل جان شفتج..

ماكو الا نمثل بدالها خخخ..

في اجماع ع ملاغتها..

حياج الله..

رورو الشخبوطه said...

هلا دلوعه..

اي الحمدالله..

مرسوو..

رورو الشخبوطه said...

هلا اخوي لو كويت..

خخخ اي من زينها..

واللي مربح الفيلم انه رومانسي فاغلب اللي يرحون له بنات ..

اهي كريه وشكلها اقل من عادي بس انتو تحبون الغرب لو كويتيه جان صارت كخه عندكم خخخ..

وحياك الرحمن اخوي..

رورو الشخبوطه said...

هلا هديل..

اي ملاغه حلاته مره وحده وبالكثير 2.

الكتاب يمدحونه بس ماقريته والايحاءات لانه مقطع خخخ ..

واللي يخورونها بكل مكان حتى الروايات العربيه ..

العفو ولو..

حياج الله..

رورو الشخبوطه said...

هلا اخوي قلم..

بحاول اعلق ع كل نقطه ذكرتها..

1- اهو مايندرج بخانة افلام الرعب وانا كلش مااشوفه مرعب اهو مشوق وخصوصا الجزء الاول..

2- صاج بس مو كلهم ادورد وبيلا بس..

3- لانك صبي لو بنيه بيشدك الفضول خخخ..


اي الحمدالله ..

حياك الله اخوي..

رورو الشخبوطه said...

ChuBBy-Doll هلا ..

ويتهاوشون عليها @@

حياج الله..

رورو الشخبوطه said...

هلا ريحانه..

احلا جزء الاول ..

اي هالجزئين ال2 وال3 وايد تمغط بالاحداث ع غير سنع ..

للامانه والظليمه شينه اهي تبي بس اهو مو راضي ويماطل :\

اهي غثيثه صح بس ماثبت ع خشمها خخخ..

حياج الله..

رورو الشخبوطه said...

هلا سنعه..

يمكن تنفع ويجوز لانه تعودنا عليها عقب 3 اجزاء ومو بالنا وحده غيرها تمثل مكانها الا انا مستعده خخخ..

اهي قاعده تمصخها وتلعب ع الاثنين انتي شفتيه؟؟

لما عصب جاكوب لانه بتتزوج شلون ساحلته قليلة الادب..

وصح خشمه مخربه خخخ..

وحياج الله..

ebtsamh said...

القصه عجيبه

والناس تنطر اجزاء القصص ع نار

فمبالج بالافلام

الاهم استمتاعج بالفيلم :)

رورو الشخبوطه said...

هلا ابتسامه..

انا انطر الافلام مو لانها عجيبه لانه بعرف النهاية ..

واللي سمعته من اللي قاريين القصص انه الافلام مو بحلاوة القصص ..

اي الحمدالله..

وحياج الله..

نهــــــــــار said...

السلام عليكم..
شفت الجزء الأول يوم حطوه بالتلفزيون
حشى الكل يقلد المسلسلات المكسيكيه
كانت هي تمد 200 حلقه
ألحين كل مسلسل وفلم
له مليون جزء
....
المهم إذا عرست بيلا خبريني منو خذت
من حلات معاريسها عاد
مصاص دماء والثاني ذيب
عافانا الله
...
المهم إستانستي
وإن شاء الله دوم
..
في حفظ الله

رورو الشخبوطه said...

هلا والله نهار..

وعليكم السلام والرحمه..

اي استغفرالله اول كنا نتابع لانه ماكو وسايل ترفيهه غير التلفزيون الحين مليون شي ..


ان شاءالله خخخخ واهي تبي تحول مصاصة دماء..

اي الحمدالله واجمعين يارب..

حياج الله..

شاي الضحى said...

ما احبه

رورو الشخبوطه said...

هلا جايونه..

خخ لاتروحينه :p

توقعت هذا ردج :)

حياج الله..

imac360 said...

ana greta rewaya a7sn mn el film o el tnaa7 :P
o el katba wayed ga3d tktb eb3a6fa mn chii kela msha3r y7asisonich ehya mlkt el 3alm :P,shakla elkatba ga3d mo 7a9lha swt 7lmha film :P

o allah y3enich el jz2 el rab3 ma b5l9on a5r shy el kel bmot ela ehe :P

Sn3a said...

اي علطول رضا
كلش زعله مو جايد هالجيكب
مسكين اهوا

رورو الشخبوطه said...

imac360 هلا اخوي..

اي الاغلب يقولون جذي ..

انا مااحب اقرا 9000 جزء فاشوف الفيلم اسهل واريح ..

خخخ تهقى وعليه عيل انا بكتب بعد ع اقل احصل فلوس خخخ..


الا بيلا @@ اهم شي تتزوج ولا لا خخ..

وحياك الله..

رورو الشخبوطه said...

ولكم باك سنعه..

اهو طيب واهي بارع ..

شلون ترضى بهالشي مو كانت كافخته من قبل بسبت الحركة ..

ومرسو..

captain khalid said...

هههههههههههههه.. هي علة علة عسى العلة على قلبها .. خخهخه..
الجزء الاول كان رووووعة بس الثاني واايد كان سخيف اما الثالث والله مااعرف عنه شي لحد الحين ماسرت ..بس صدقتي يوم قلتي بيلا عله

alri7anh said...

لووووووووول
اي والله تلوع الجبد هالمليقه

الجزء الاول كان راااااااائع
بس الثاني صدمني
وناويه اروح الثالث عشان اشوف بتزوجها ولا لا

بس جنه حرقتي الفيلم :)

رورو الشخبوطه said...

هلا اخوي كابتن خالد..

خخخخ..

اي الاول احلى جزء وال3 احلى من ال2 ..

بس هم مافي احداث قويه..

اي شفت شلون تعل :)

حياك الله..

رورو الشخبوطه said...

هلا ريحانه..

اي حده..

صح احلى جزء الاول وهالجزء احلى من ال2 ..

صج حرقته خخخ..

لا هذي مجرد مقتطفات بتنصدم من التفاصيل..

انا مثلج رحت له بشوفها تزوجت او لا :\

ومشكوره..

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads