Tuesday, May 31, 2011
قبل جم يوم كنت بلاند مارك ولقيت هناااااك ستاند متروس ستيكرز اظافر وفي تاتو بعد ..


خذيت اكثر من نوع ..

منهم اللي بهالصوره ..

امس جربته زين ثابت بس عيبه بسرعه انمسحت الصوره المفروض كنت احط فوقه طبقه صبغ شفاف بس ماحطيت لانه كنت شويه وبمسحه  ماتسوى !!

واسعاره حده رخيص اول مره القى حلوين بهالسعر :
قبل السيل 550 فلس..
مع السيل 450 فلس..
Monday, May 30, 2011
قبل فتره كنت احوس بنيولوك وشفت هالشغله ..
اللي تنحط بالجوتي وانتو بكرمة لراحة الريول اكثر خصوص للجواتي للي قاعدتها مو مريحة..

 كنت باخذه وهونت قلت بحصله ارخص ..

اهواساسا رخيص بدينار ونص ..

اليوم رحت paprika
جاااااااااان القاه :)

وفي منه نوعين :

خذيت هذا لانه اسهل بالقص ..

شوفوا من داخل شلون صاير ..

ومكتوب انه :
-يقضي على الروائح ..
-لراحة ..
-يحافظ على جفاف القدم.
-ويحافظ على الاحذيه فريش شنو قصدهم بالزبط مافهمت :\

وهم عندهم منتجات 2 لراحة القدم :

للقدم من ورا تنفع للحوتي اليدد هذ ذا في مجال يكفيها خخخ..

وفي نفس فكرة الاولي بس صغير للجزء الامامي بس  اتوقع ينفع للكعب اكثر ..

 السعر :

نص دينار فقط لا غير :)

موجودهالمحل بجمعية الخالدية فوق ..
Sunday, May 29, 2011
الاسبوع اللي فات دزولي ايميل يعزموني فيها اجرب شغلهم..

وحددت لهم الوقت اللي يناسبني وحجزولي فيه :)

واليوم رحت له..


وصلنا ..

الرسبشن :

لقطات من الصالون ..


وكانوا مسوين لي بكج بيوتي ..
(حمام تفريك ملكي+ماسك تعطير شعر + بديكير ومنيكير +استشوار)
اول شي بديت فيه..

ماسك تعطير الشعر ..
وسوت لي مساج لراسي وجتفي وظهري ..

عقب رحت اخترت صابون<<<< هذا اكثر شي شيشني اروح الصالون :)

اهو صابون طبيعي شغل ايد صاحبات الصالون ماشاءالله..

يشوق جنه برد ..
 وفي منه انواع وايد :

اهما :
-عشبة الليمون
-الطيب- البخور
-البحر
-تفاح اخضر
-اناناس مع زنجبيل ..

ونظامهم كل اسبوع يغيرون الانواع واللي عليه طلب يعيدونه..

و تختارونهم اما للبديكير والمنيكير او الحمام التفريك ..

انا اخترت صابون عشبة الليمون ..

و2 شي بالبكج سولي اياه اهو حمام تفريك ملكي ..

دخلوني غرفة بخار فركوني بصابون الذهب واعتقد تميت فيه 5 دقايق وعقب ماسك كركم للتوحيد لون الجسم تميت فيه 10 دقايق واخر شي الصابون وبعدين طلعت وطيبوني بطيب طبيعي ..

واتجهت للجزء ل3 من البكج ..

بديكير ومنيكير :)

واختارولي لنوع الفاخر اللي عندهم واهو بالذهب ..
 وضيفوني خيروني بين جم نوع جاي وقهوة ..
اخترت جاي اخضر ..

وقعدت اتصفح مجلات عن الاظافر ..

جان اقولهم بجرب تصبغكم خخ ..

قلت ولا يهمج سوولها فرنش ..

كانت بتختار لي لونين اخر موضة بس قلت اخترت خخ..

وناسه لقيت الصبغ اللي كنت بجربه من زويا..


اساميهم ..

النتيجة :

واخر شي بالبكج سولي استشوار لشعري ..

رايي :

كالعاده تعرفون لازم اقوله بكل صراحة ..

الحمااااااااااااااااام الملكي عيز اقول عجيب ماشاءالله  نعومة وتفتيح  من ريلي لي ويهي واكيد يبيله استمرار بتكون النتيجة اللي ابيها واللي سوت لي اسمها فطوم حبيتها حليوه ..

الاظافر زينين والتريتمنت عجيب حطولي شغلات عمري ماشفتها باي سبا متخصص مثل فيتامين للاظافر - معقم الاظافر ووخروا مسماري اللحم احسن من اخر جم سبا  ..

المعامله خخ للزباين حسن منه تخيلوا اذا انا اتشرط ويسون لي اللي ابيه فلزبوه شوف عيني دلعهم اكثر ..

ومثل ماقلت قبل اللي يميزهم انه منتجات طبيعيه هاند ميد وصناعه كويتيه :)

وعلى فكرة اسعارهم حيل مناسبه البديكير ولمنيكير الذهب ب10 بس :) الباجي ماعندي فكره عنهم ..


العنوان :

الجابريه ق1ب -ش3 بناية 146 الدور الاول جبال الاصنصير..


ت : 25350205





شكرا على الدعوه وايد حبيت التجربه:*

واسمتعت بتطفيرج بنوكة ولقرقه على راسج  وناطره تجربتج:)
Friday, May 27, 2011
اول تجربه لبراتمي :p

اسمه : Orange Lip Repair
من good life paric

مكتوب عليه :
مستخلص الفواكه الطبيعية
البرتقال لاصلاح الشفاه
من اجل جميع مشاكل الشفاه المتشققة والداكنة ,يعمل مستخلص البرتقال على تفتيح الشفاه تدريجيا وطبيعيا , وتساعد الو فيرا على ترطيب ومعادلة وتنعيم التجاعيد .
توجيهات :ضعيه بحرية على الاجزاء المتأثرة .

رايي فيه :

قريت عنه بالنت وحبيت فكرة انه نتايجه تبين من اول اسبوع ..

بس عقب تجربه حوالي 3 اسابيع وبشكل يومي منتظم  وكنت استخدمه بالليل والصبح احط زبدة كاكاو فيها حماية من الشمس..

اقول اهي اهي :(

ماحبيته ..

قوامه لزج وريحته خايسه هالصفتين حسستني اني حاطه صمغ ع براطمي يعني عادي اقوم من النوم القى المخده لازقه بويهي خخخ اتغشمر :)

ونتيجة مو ذاك الزود وحسيت سودهم و خلهم يخططون ..

ميزاته القليله :
انه يتم مايروح بسرعه يعني احطه بالليل يتم ليما اقعد من النوم ،وحجمه كبير ماجنه منتج للشفاه ..


امس كنت اجيك ع ايميلي (الخاص بالبلوق) اشوف اذا في شي حلو انزله هون ..



اللي بالصوره مجموعة ساعات من كولكشن La Mer  يتميزون بانهم مزجوا بين الساعات بالوان الربيع والصيف الزاهيه +الاساور باكثر من ستايل وشكل مثل بالاحجار او لكرستال ..

وهالمجموعه تعتبر جزء من كولكشن الصيف ولربيع 2011..

ووتتميز باسعارهم المناسبه  اللي تتراوح بين 40 - 50 د.ك..

لمشاهدة لمجموعه (اضغط هنا)
Thursday, May 26, 2011
اليوم بقولكم عن الاماكن اللي سويت فيها اظافري :واكتشفت انه ماجربت وايد اماكن :\ بالكويت مجربه 8 ومصورتهم برا بس جربت 1 وفي اعتقد غيرهم 2 بس ماصورتهم لانه من زمان :\




الخدمة :




حلوه , وحده دلع , ويعطونكم ادواتكم اللي استخدموها لكم اهم مو كلهم بس اهم شغلات مثل المبرد والعصاة و الفرشة , ولاني كنت مختارة الفرنش قلت لي انتي لج عندنا تصبغ اظافر تقدرين تسوينه خلال اسبوع , وعندهم منيو ضيافه ..

واصباغ اظافرهم مجموعه كبيره ماشاءالله عدي وخربطي حزتها انحولت مادري اختاري شنو خخخخ..

النتيجة :

ماجربت الا المنيكير وجلستين لايتينغ لايدي والفرنش وحبيت النتيجة مضبوطة :) وناويه اجربه مره 2 ان شاءالله ..
المعاملة :

زينه ..

السعر:

مو رخيص بس مناسب لخدمتهم ..

المكان :

حلو , واللي يميزه انه بين كرسي والثاني فاصل صج قصير بس على اقل في شوية خصوصية  ..

العنوان :

مدينة الكويت –ش السور –برج جاسم ..




التفاصيل (هني) و (هني)



الخدمة :

عاديه , لا دلع ولا بطيخ , بس باجي السائل الوردي واكون مسوي اظافري بصالون بوطقة :\

النتيجة :

عاديه مو ذاك الزود ..

المعاملة :

اللي بالرسبشن تغث ودايخة توهقج , اما اللي سوالي اظافري زوينين حبيت اللي سوت لي ايدي اكثر ..

السعر:

غاااااااااااااااالي ع غير سنع , عندهم نظام كريه اللي اهو مو كل ترتمنت يشمل منيكير للاظافر مثل التبيض ب10 والاظافر ب5 اذا ايد جنه و6 اذا ريل وطبعا الترتمينت الريل يصير 12 تقريبا :\ مو بس جذي ماصبغوا اظافري

المكان :

موحلو :\ والصور اكبر دليل بس اهي قالت لي انه ناوين يسوين نيل بار ومادري اذا سوو او لا :\

العنوان :
حولي –مجمع المهلب الدور الاخير


التفاصيل (هني)





نيل ستيشن ..



الخدمة :

زينه , عندهم ضيافه بسيطه , شغلهم حلو بس تصبغ الاظافر مو بروفشنال :\ بس للامانه الحلو فيهم لما اخترب عدلوا لي اياه في مكان قالولي انتي اللي خربتيه مايصير :\ \<< عقب اقولكم منو !

واللي حبيت فيه من متابعتي له بالفيس بوك انه يحاولون يطورون خدماتهم ,,

النتيجة :

عجيبه  وخاصة البديكير , كنت مختاره منيكير وبديكير برافيين مع جلسة معالجة جفاف الريل حزتها كانت بدينار بس..

المعاملة :

وايد زينه كلهم وصاحبة السبا تيين ماشاءالله حليوه ..

السعر:

تقريبا ارخص سبا جربته , بس قبل فتره مدمد دزتلي ايميل ببرشورهم اليديد اسعارهم تغيرت :\

المكان :

حلو والوانه تشوق 

العنوان :

السالميه –شارع بغداد ..

التفاصيل (هني)




ام اند ام ..


الخدمة :

زينه فتحولي السبا مخصوص عشاني 

بس مجموعة اصباغ الاظافر شوووويه :\

النتيجة :

زوينه , كتريتمنت مو ذاك الزود بس الاظافر حلوين 

 
المعاملة :

عادية , مااذكر انه عطوني شي كضيافه ..

السعر:

غالي بالنسبه لخدمتهم البسيطة , وحتى السليبر عندهم بفلوس خخخ..

المكان :

شرح

العنوان :

السالميه شارع بغداد

التفاصيل (هني)











بيوتي شيك..

الخدمة :

زينه , بس وايد حككت بذمة لضمير لدرجة جرحتني :\

النتيجة :

زينه مو ووااوو ...

المعاملة :

عجييييييييييييييييييييييييييبه واحلى ضيافه عندهم ..

السعر:

زوين بس عيبه مايشمل صبغ الاظافر :\

المكان :
صغيرونه لانه مو سبا متخصص بالاظافر . فحاطين له ركن صغير ..

العنوان :
الشعب البحري ..


التفاصيل (هني)




24 كي

الخدمة :

زينه , بس واااايد لويه ..

النتيجة :

هم زينه ..

المعاملة :

عاديه والضيافه بفلوس :\ مادري يمكن لانه قفت فاوتشر :\

السعر:

اغلى سبا جربته ..

المكان :

كديكور ماحبيته , بس احلى شي انه بالافينيوز 

العنوان :

مثل ماقلت الافنيوز – فوق 21 فور ايفر..

التفاصيل (هني)


مي تايم ..


الخدمة :

زفت , لويه و قرقه , وكل وحده تحش بالثانيه كلش جو مو مريح ..

النتيجة :

الايد زينه , الريول لا ..

المعاملة :

مثل الخدمة :\ ماحبيته و لا ضيافه ولا عماة عين واخترب صبغي عقب ماتاكدت انه نشف لاني كنت بنزل بنطروني تخيلوا تشلع جنه اسلامي جان تيليي اللي سوت ايدي وخطر لا تطقني :\ انا حسبالي بتعدله :\ قالت لي هذي غلطتج ودفعي دينارين عشان نصبغهم لج مره 2 اهني استنزلت عليها وصبغتهم لي ببلاش خخ..

السعر:

غالي بالنسبه انه لانتيجة سنعه ولا معامله طلعوها من جبدي عاد كنت هديه 

المكان :

شرح , بس كرسيهم حده مو مريح ,وهم الحلو فيه انه بالافينيوز..

العنوان :
 الافنيوز فيز تو ..

التفاصيل (هني)





نيل لاونج ..


الخدمة :

الستاف عجيب .., بس هم اصباغ اظافرهم شويه ..

النتيجة :

زينه

المعاملة :

راقيه بس عيبهم انه المساج ع المزاج نسيت اذكرهم يسون لي اياه ..

السعر:

زين .. >> قفت فاوتشر..

المكان :

زين وهدوء ..

العنوان :

مجمع الصالحية


التفاصيل (هني)


الخلاصة  عقب هالجم تجربة ماافضل اسوي اظافري الا بمكان متخصص فيهم وايد اضبط , وخاطري اجرب نيل بوليش :)
 
شنو احسن مكان سويتوا فيه اظافركم..؟؟
Wednesday, May 25, 2011

شنو تفضلون .؟؟

facebook

او

 twitter

عن نفسي مشتركة بالاثنين :

بس اللي عرفته قبل هو الفيس بوك درسناه بالجامعه بـ2007 وسجلت فيه بس ما قمت ادشه  ع طول الا باخر 2010 تقريبا , ومافي سبا ماسجلت فيه خخ عشان عرف اخر عروضهم وخدماتهم ..

بس كرهته من لما سوو بلوك الاكاونتي وعقب شالوه من عرجه خخخخخخخخخخخخخخخخخخخخخخخ سليحط والسبب اني مسجله بنيك نيم مو اسمي الصجي !!!

بس رديت سويت اكاونت يديد بس مو حبته ابي القديم :\

اما تويتر :

اعتقد شاركت فيه باخر 2009 ,وتوني ماصارلي شهرين هابه فيه مبدائيا زين يوم تشوفوني اقرق ويوم صخة :\ بس اللي حبيت فيه انه صار عندي مجموعة بنات حليوين اسولف معاهم تالي الليل خخخ ..

وعلموني شلون اضيف ايقونه التويتر ببلوقي :\

 
الحين دوركم انتوا شنو تفضلون ؟:)

مصدر الصوره (هني)


About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads