Friday, November 14, 2014
السلام ..

اليوم حابه اتكلم عن هالكبت ..
اهو منظره كبيره تتبطل ومن داخل في ارفف وعلاليق للاكسسورات ..


اول شي من فوق ع اليسار للخواتم ..
تحته للسلاسل والقلوب /العقود ..
بعدين كله ارفف لشنو مادري !
وعقب درجين صغار ..
من يسار للتراجي ..
عقب علاق غريب انا خليته لاساوري ..
عقب نفس علاليق القلوب بس ع اصغر ..

سعره :
شي و٢٠

وحصلته بسيتي ستارز عقب رخصوه وصار بالتعش .،

رايي:
كفكره حلو  ٢ في ١ منظره وكبت بنفس الوقت فما يحتاج مساحه ..
بس كاستخدام ماعجبني ..
احسن شي مكان الخواتم اما القلوب والباجي مايكفي من اول مااستخدمته ماتسكر هذا واغراضي اقل من الحين بعد ! 
عقب عادي القى الشغله طايحه ! وانكسرت ترجيه وع طاري التراجي مكانهم مو عملي مايثبتون التراجي العادي تثبت التراجي اللي حديدتها من ورا معكوفه :/
الارفف والادرج وخصوصا الادرج مايكفون شي كنت بحط فيهم بوكسات شانيل ماكافوا !

ماانصح فيه الا للي اغراضها شويه !

عنوان سيتي ستارز :


افرعه:
الجهرا واحد من المجمعات اللي جبال جمعية الجهرا القديمة ..
الفروانية :بسرداب مجمع الهدى ش حبيب يم مجمع المغاتير وجبال الجمعية 
حولي : ش تونس ، برشا مول يم دوار صادق 
العقيلة : سرداب مجمع الدرة ق4 يم البيرق ..
الري  الدائري الرابع صوب المشاتل وبسطرت دريم مول ولولو هايبر وماكس .. الخ وبسرداب سيتي ستارز مول


Sunday, November 9, 2014
الله يتمم علي هالنشاط خخ ..
اليوم بتكلم عن صبغي المفضل لهالسنه ..
من ماركة قولدن روز -golden rose ..

 اول شي خذيت منه ٣ الوان لاني ماحب المات وايد قلت اجربهم ..
اخترت اللي بالصوره تحت ع اليسار الاحمر والفوشي ورمادي لونه غريب ..
جربتهم وعجبوني جان اخذ المجموعه اللي بالصوره اللي فوق سماوي وكحلي وبنفسجي واسود واخضر ..

تجربتي ..
الاحمر عشقي الازلي وعادي احطه كل يوم ❤️ الفوشي هم احبه ولما ضاع تضايقت ..
البنفسجي ماحبيته بروحه استخدمته مع صبغ رفلون  اللي فيه لمعه والنتيجه عجبتني احلى من الصبغ بروح حتى رفلون بروحه ماعجبني :/ لانه خفيف ..
الرمادي والسماوي لونهم غريب ..
والباجي ماجربتهم الصراحه ..
سعره :
٧٥٠ فلس ..
متوفر ب سيتي ستارز ..

وهذا عنوانه ..
افرع  سيتي ستارز :
الجهرا واحد من المجمعات اللي جبال جمعية الجهرا القديمة ..
الفروانية :بسرداب مجمع الهدى ش حبيب يم مجمع المغاتير وجبال الجمعية 
حولي : ش تونس ، برشا مول يم دوار صادق 
العقيلة : سرداب مجمع الدرة ق4 يم البيرق ..
الري  الدائري الرابع صوب المشاتل وبسطرت دريم مول ولولو هايبر وماكس .. الخ وبسرداب سيتي ستارز مول

رايي :
ساعات طبقه وحده اكتفي فيها الوانه مميزه مرات احسه بالليل او ٢ يوم تقشر ع الطرف شوي فاجدده وماحسيت يطول يالله ينشف بالعكس زين ..
باختصار
احبه احبه احبه  ..

انا كنت ماحب الاصباغ المات بس هذا غير بالنسبه لي ❤️
Saturday, November 8, 2014

من زمان مانزلت بوست اكل نظرا لظروفي الصحيه ..
بس مو معناتها ماجربت شي ..
لا وايد جربنا شغلات من الانستغرام لانه ادارتي اليديده نحب نحتفل المهم ..
من الشغلات اللي جربناها وكررناها يمكن ٣ او ٤ مرات تقريبا جربنا اغلب منتجاتهم اهما @dishes_kw 


هذي صور لمرتين وفي غيرهم ٢ جنه بس ماصورتهم ..


*طلباتنا:
بكتبهم كلهم مره وحده لانه الانواع تكرر ..
- رولات الراب بحشوات مختلفه (خلطة اللبنه ،خلطة الجبن ، بطاط بالاجار ، مشروم وذره مع كريمه )
-ديناميت كيك 
واهي كيكة ككاو ..
-حليب بالفستق ❤️
_حليب الورد ..
-سلطة الجرجير ..

الاسعار مومتاكده منها :
بس الراب جنه ب١٠ دك جنه ٤ درازن المهم كميته راهيه ماشاءالله وحجمه زين مو ميني ..
الكيكه جنه بعد ب١٠ ..
السلطه اعتقد ٨ ..
الحليب اهو الوحيد اللي متاكده من سعره اهو ب٦ ..

رايي :
كشكل مرتب ماشاءالله ..
الكميه راهيه ..
الطعم  :
الرولات زينه واقوى نوع بالنسبه لنا المشروم والذره مع الكريمه دايم اهو اول واحد نخلصه ماشاءالله..
بس بارده مو حاره ..
السلطه ماذقتها لانه مااكل جرجير ..
الكيكه انا عندي عاديه وثقيله (انا مريضه ولما ذقتها كنت بعز مرضي قبل لا اعالج فوضعي غير عن الباجي) بس احب ككاوه اللي ع الطرف منكت اقولهم ابيه وبس خخ ..بس البنات عجبتهم ووحده سالتني شسمها قلت ديناميت قالت صج ديناميت فجرت فينا خخ صارت دعايه 😁

حليب بالورد زين ولونه يشوق وردي بس اللي بالفستق غرامي احبه من اول مره جربته ومره ٢ خليتهم يطلبون بطل مخصوص عشاني 😁 بس اعتقد اغلب البنات عجبهم اللي بالورد اكثر واحسن لي عشان استفرد بالفستق خخ ..
واهم شي انه يوصلنا حار ..
الخدمه :
ماجربت انا اطلب منهم العاده تطلب وحده من البنات بس جنه يرطنون مو متاكده 😁 
اما التوصيل ؛
اللي اشوفه زين وخصوصا انه الاكل ايي مرتب والحليب حار ماشاءالله ..

وهذا اكاونتهم بالانستغرام @dishes_kw 
Friday, November 7, 2014
هالو ❤️


هالفتره شركة حبشي وشلهوب مسوين اوت لت لd&g بالحمرا تاور ..

*مدته:
ابتداء من ٤الى ٨ نوفمبر ..
ومن الساعه ١٠ لي ساعه ١٠ ..
وموفرين بضاعه متنوعه رجاليه ونسائيه ..
النسائيه جناط وبواك ..

اسعارهم :
تتراوح مابين ١٥٠ لي ١٧٥ دك ..

البضاعه ؟!
في اغلب الموديلات بس من الكلاسيك ماكان في الا وحده حمرا وبسرعه خلصت بعد :/ التايغر ماكان في الا وحده رماديه وشوبينغ باغ ووايد كبيره :/ 



وفي بعد كلاتش للحفلات وفي جناط مكياج وبواكه ..

عجبتني هذي بس كبيره علي بس في اصغر منها جم حجم وبالوان مختلفه احمر وبيج اكثر من درجه وخضرا ..
ومن قسم الجواتي وانتوا بكرامه ماصورت الا هذا ..
بس في كعوبه وايد موديلات العادي وفي جم حبه من موديل الودج وفي بوتين او ٣ وفي فلاتات بمختلف الخامات لذر عادي و ربل وحياكه ودانتيل وترتر و تايغر ..
اسعارهم :
من ٣٠ الى ٥٠ دك ..
وفي بعد بالنص ستاندين للهدوم في جاكيتات دانتيل سمت واحد اسود ب١٧٥ بس قصته مو لايقه علي :/ وفي نفانيف سهره ماشفت بجم ! 
اما قسم الرجالي ففي جواتي وانتوا بكرامه وجناط بس..

رايي بالمعرض :
حلو ومرتب ماشاءالله واسعاره مناسبه ومكانه حلو والخدمه هم زينه والبضاعه اغلبها زينه مو قديمه او داثره واسعاره جدا مناسبه ..
لما شفته قارنته باللي يصير بالزمرده فرق وحرام اقارنه معاه :/ اللي بالزمرده داثر وقديم واغراضه اغلى بعد ! 
Saturday, November 1, 2014

كعاده اتش اند ام  كل جم شهر يتعاون مع مصمم عالمي ..
مثل فيرزاتشي ولانفان وانا ديلو روسو وغيرهم ..
حتى كارل لاغرفيد وغميظه طافني :/ 

هالمره التعاون بيكون ان شاءالله مع alexander wangny..

دزولي دعوه بالايميل قبل جم يوم لايفنت الكولكشن وكنت مترردده اروح ولا لا !
ع اخر لحظه قررت اروح مدام فاضيه والوقت يناسبني ..
وصلت المكان كان صغير ومتروس مصورين بس الاجواء حلوه ماشاءالله ..

هذي الضيافه كانت نفيش/بوب كورن وعصير و ماي..



ماصورت وايد لانه كان زحمه فكتفيت بجم لقطه ع طاير ..


واهني الويل بيبر عجبني تقريبا مغطي طوفه كلها حلو للتصوير صورت عنده 😁

#معلومات عامه عن الكولكشن ..
مثل مالحظتوا الكولكشن شبابي وسبورت وطاغي عليه اللون الاسود ..
وهالكولكشن للجنسين الرجالي والنسائي يمعت لكم صور النسائي من الابليكشن وتحصلونهم بالسايت بعد ..
الكولكشن تقريبا فيه كلشي جناط واحذيه عزكم الله وملابس واكسسورات ..
تقريبا حوالي ٥٤ قطعه حسب ماهو مبين بالابليكشن ..
اما اسعارهم بين الرسط المناسب والغالي ..



النفنوف ب ٣٤.٩٠٠ دك ..
البنطرون ٩٩ دك ..


النفنوف اللي فوق ب٢٩.٩٠٠ اما اللي تحت ب٣٤.٩٠٠ دك ..

الجاكيت ب ٥٩ دك ..
النفنوف ب٤٩.٩٠٠ 
البنطرون ب٩٩ 
البنطرون اللي فوق ٣٤.٩٠٠ اللي تحت ب١٩.٩٠٠ النفنوف بهم ١٩.٩٠٠ دك ..
البنطرون ب ٢٤.٩٠٠ خوش للطيحلت مايعور خخ ..
الليقنز ب١٩.٩٠٠ دك ..
اما الجاكيت ب ٧٩..

الكولكشن الرجالي متوفر بالسايت والابليكشن ..
راح يتوفر الكرلكشن ب٦نوفمبر ٢٠١٤ يعني الخميس الياي ان شاءالله ..
واحتمال يكون بفرع الغراند بالافنيو بس << جنه مو متاكده ..
ومن الساعه ٨ الصبح ..

توني جيكت ع كولكشن الرجالي في شغلات حلوه للي تحب تطقم اهي وريلها اقصد النسائي مشابه للرجالي ع اختلاف القصات ..
تعبت :/ ولا جان نزلت لكم صور توضح قصدي ..

Thanx Sophia Banoori ❤️

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads