Tuesday, February 22, 2011
مساء الاسترخاء ..

اليوم رحت مع خواتي لماي سبا ..

وهو سبا هندي ..


نزلنا السرداب ومن عند باب الدري عجبتنا الاجواء ..

الباب..

الارضيه مو واضحة وايد بس اهي زجاج وتحته ماي  ..

خخخ اختي خافت و انا بطلعه نسيته لما نزلت فزيت حسبالي طبيت بالماي :\

داخل :

انواع الجاي ..

واخترنا اللي نبي :

اختي الكبيره مساج استرخاء ..

انا مساج استرخاء مع بخار وسنفرة + فيشل ..

اختي الوسطيه فيشل ..

كلمتنا الدكتوره وسالتنا جم سوال قبل المساج ..

عقب عطونا فوط حاره وماي ..


وكل مدلكه تيب المداس لي عندج وتعرفج بنفسها واللي سوت لي اسمها بيبي ..
 شوفوا شنو لقيت خخخ ..<< لجايونه

مساج الاسترخاء والسنفره والبخار :

يخيرونج تبينه بزيت او بدون ..

عقب كل وحده تروح دار المساج الخاصة فيها والحلو فيه خصوصيه اكثر لانه اللوكر و الحمام داخل الغرفه ..

ويعطونكم  نص روب تلبسونه واندروير قرطاس ..

بدلت وعقب غسلت ريولي..

وخففت الاضاءه وقعدت ع الفراش وسالتني اذا ابي زيت لشعري قلت اوكي دهنتني ومسجت راسي ..

عقب مساج الجسمي اول مره اتهور واسويها خخخ..

من قاعة ريلي لي ويهي مساج وزيت ..

والمساج الهندي مو ضغط مثل التايلندي والصيني ..

عقب لبست نعال 2 ودخلت البخار ولما تعبت منه ناديتها يت مع السنفره فركتني ولفت تضبط الماي وانا كملت الباجي المحظور :\

ضبطت الماي ورتني الشامبوو البلسم و وصابون الجسم ومفراكة 2 للجسم غير عن اللي للسنفره ..

غسلت جسمي بروحي طبعا ولما خلصت عطتني فوط ولبستني فوقهم روب خفيف ..

وعطتني اعواد اذن انظف اذني ..

عقب قطنه فيها ماي ورد امسح ويهي ..

ودهنتني بكريم ..

وسالتني اذا ابي استشوار انشف شعري قلت اي نشفته لي ومشطته ..

وعقب رحت غرفه 2 فيها كراسي جنها كرافي واريح من كرفايتي :\ حدها مريحة ماشاءالله ..

حطت لي كمادات جاي اخضر ع  عيني وفوقهم نظارات الجل ماعرف شسمهم  لمدة دقيقتين ..

وردت معاها سلطة فواكهة وماي ..

ولما خلصت بدلت ورحت اسوي فيشل ..

رايي فيه:

ياحلات الدلع خخ المساج زوين بجرب سبا تايم واشوف اللي احسن بس هذا مبدائي حسن من ناحية الخصوصية..

وحسيت نفسي نظيفه وناعمه وخفيفه بس من المدابج راح الاحساس الخفة خخخ..

تنظيف البشره..

عجيب ماشاءالله ويهي ناعم ونظيف ورطب واللي تسويه اسمها روز حليوه وقرقت معاها خخخ..

الروس السوده راحت ..

واختي بعد وايد عجبتها نتيجته لها ولي وتقول هالمره احسن من لما سويت بسبا تايم ورايها مثلي وزياده انه تحس ويها مشدود مو مثل كل تنظيف بشره تحس يرهل ويهها ..

وان شاءالله بنسوي كورس عندها..

مقارنه بفيشل سبا تايم هذا نتيجته احسن وماتحن اخذي كريمات لا اشوه, بس سبا تايم احسن انه في تدليك خفيف ..

الاسعار:

حاليا عندهم عروض لي اخر شهر 2 يعني باجي لهم 6 ايام ..

الفيشل 15 قبل 25 ..
المساج بس 15 واذا سنفره وبخار 20  قبل كان 25 ..
واذا 2 خصم 50 % ع وحده منكم واذا 3 وحده تصير ببلاش <<< هذا للمساج بس ..

عنوانهم :

ميدان حولي -ش بغداد -ق11 -بناية 17 - بالسرداب..

ت: 25645353

وهم الاستقبال وايد حليوه ومحترمه :)

مابقى شي عندهم ماجربت وزنت نفسي قرقت ع روسهم صورت خخ بس داخل الغرفه لا لانه ممنوع ..

وضروري تحجزين قبل لاتروحين ..

26 comments:

Sarah said...

wow shakla raw3a

خاتون said...

عليج بالعافية
؛)

AM.SA.CHANNEL said...

ماشاء الله، من وصفج حسيتبه روعة .. أبا نفس اللي سولج إياه أحس محلاته تسوينه مرة في الشهر

شاي الضحى said...

اهم شي القرطاس هههههه

بالعافيه

شوقتيني

مرام said...

بوست حلو

وصفج له روعه الله يعطيج العافيه

Sweet Revenge said...

عليكم بالف عافية
احب هالسوالف
مشكورة علي التغطية الحلوة

Bint ilKuwait said...

wooow shaklaaaaa mureeeeeeeeeee7 abeeeeeeee:(( 3alaich bil3afyaaaa ;**

Sn3a said...

Wanasa
Ana mn zman ma dalla3t nfsy
Bjrba en sha Allah
Thanx 3al post l jameel

رورو الشخبوطه said...

ساره..

اي يونس كتغير جو :)

رورو الشخبوطه said...

خاتون..

والله يعافيج يارب..

شكرا..

رورو الشخبوطه said...

شانيل ..

اي وناسه..

الشهر الياي بجرب 2 من باب التغيير ولانه ببلاش خخخ..

رورو الشخبوطه said...

جايونه..

خخ لازم تشوفينه :\

الله يعافيج يارب..

مشكوره..

رورو الشخبوطه said...

مرام ..

شكرا..

الله يعافيج يارب..

رورو الشخبوطه said...

سويتي ..

الله يعافيج يارب..

مشكوره..

رورو الشخبوطه said...

بنوته..

الله يعافيج يارب..

مشكوره..

رورو الشخبوطه said...

هلا سنعه..

اي حلاته لما تدلعين عمرج ع الاقل كل شهر و شهرين مره ..

ولكم ولو..

lil.D said...

واااي منج يا شخبوطه
ابا الحين :(

Anonymous said...

عليج بالعافيه
لازم اجربه

بس سؤال
:
تنظيف البشرة لايكون سوت لج بلإبره الحديد اللي تضغط عالخشم؟؟
واااي تذبح

رورو الشخبوطه said...

ليلي..

جربي وقولي لنا عنه اقصد سبا بالامارت وشوقيني مثل ماشوقتج خخخ..

رورو الشخبوطه said...

غير معرف..

والله يعافيج يارب..

شكرا..

لا بااصابعها جنه ويعور بعد ححح ..

Made n Q8 said...

علييكم بالعافية

وعجبتني الارضيه مالتهم

انا جربت المساج بكوين مساج بس ودي اجرب بعد غيرهم

اسعارهم بالعرض مناسبه بس مابقى شي ويخلص الشهر

رورو الشخبوطه said...

مدمد..

الله يعافيج يارب..

شكرا..

حتى انا عجبتني تونس..

صج كوين مساج حلو..؟؟

وجو ريلاكس ..


اي عجيبه عروضه بس قميظه خلص :(

ام بناتي said...

علييج بالعافيه خيتوووووو

حده يبيله سباا

رورو الشخبوطه said...

ام بناتي..

الله يعافيج يارب..

شكرا..

omnia rashid said...

لكل المهتمين بمساج الهيلنج لتوازن الجسم وإزالة الشد العضلي وإرخاء العضلات تابعونا على مدونتنا
http://hercenter.blogspot.com/

jannat moamen said...

لكل المهتمين بمساج الهيلنج لتوازن الجسم وإزالة الشد العضلي وإرخاء العضلات تابعونا على مدونتنا
http://hercenter.blogspot.com/

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads