Saturday, March 6, 2010
السلام عليكم ..
واخيرا بالامس استطعت مشاهدة فيلم ذكريات غيشا والامر حدث مصادفة فبعد انتهاء الفيلم الهندي المدبلج لفت انتباهي الفيلم الذي يليه وعند مشاهدتي لاول مشاهده وهي توديع الاب لابنتيه وقبول احدهن في المنزل الجديد تعرفت ع الفيلم .
و كنت ارغب مسبق بقراءة الروايه ووجدتها بمعرض الكتاب لكن كانت من الحجم الكبير (وايد صفحاته ومترجمه ماافضل اقرا هالشي احس يفقد الروايه روحها).
وللتو فرغت من البحث وقرات بعض الامور التي كتبت عنها بمختلف المنتديات والمدونات ومن خلالها عرفت ان الفيلم يمثل جزء بسيط من الرواية و انه الروايه فيها تفاصيل وامور اكثر حذفت بالاضافه الا انها رواية حقيقه لاحدى فتيات الغيشا اعتقد بالثلاثينات العام الماضي التي كانت تلتقي بالكاتب لتروي له حكايتها ويسجلها هو باداة تسجيل لكنها غضبت منه لنشر اسمها الحقيقي بالاضافة لتشويه لصورة الغيشا لذلك قامت هي بنشر قصتها باليابان .

بالنسبه لي لم اتوقع ان يكون الفيلم بهذا المستوى توقعت ان تكون قصة اجتماعيه خصوصا انها عن اختان افترقتا ومن ثم عملتا جاهدتان ع التقاء مجداا انتهى الفيلم ولم يتم هذا الامر , ومن ثم اخذ الفيلم منحنى اخر هو عرض حياة فتاة غيشا .


والتي تعد من التاريخ الياباني وتمثل الفن الراقي فهي ترقص و تعزف العديد من الالات الموسيقيه ولها زيها ومظهرها الخاص .


فلبسها يتمثل بارتداء الكيمونو (اللباس الياباني التقليدي) مصنوع من افخم انواع الحرير و مزين بالنقوش.

مع ارتداء حذاء عالي (ذكرني بجوتي رفيجتي ع الكعب خايس اللي تبي تسوي كروبات وتطيح تلبسه خخخ)

مع رفع شعرها بشكل معين و تزينه ببعض الحلي..


اما مكياجها فيتمثل في :
بطلائها لوجها ومايظهر من جسدها باللون الابيض اما الشفاه فتدهنها باللون الاحمر وترسم عينها بالكحل الاسود.

العدة (لقيتها بسايت تنكري خخ)

صور تظهر بعض رقصاتها ..






بالاضافة لالتزامها بتقاليد وطقوس معينه للجلوس والحديث .

من افضل ماقراءت عنها :
دعاية الفيلم :
الزبده ماحبيت الفيلم بس تعرفت ع عادة من العادات اليابانيه.
وايد فيه طق حسيت انه اشوف مصارع او مسلسل من مسلسلاتنا .

28 comments:

reemas said...

عرض شيق للفيلم و قصته
فعلا الثقافه والحضاره اليابانيه غنيه بالتفاصيل الدقيقه التي لا نعلمها و هي فريده و حصريه في مجتمعهم
و اعتقد ممكن نتعلم منهم حبهم للجمال و الكمال في كل شي

تحياتي

*Being One said...

عاد انا من زمان و اسمع عن هالفلم و دعايته رفعت منه وايد وايد فقلت لازم لازم اشوفه و انا مادري اصلا شنو قصته
عاد صادف انه يحطونه في بيت عمتي و قتلهم هذا فلم حلو خنشوفه و بنات عمتي كله صغار يمي و على قولتج اول شي عبالنا قصه اجتماعيه اهيا و اختها و لا الفلم طلع حده مو زقرتيP:
و اخر شي حصلت زفه ليش مدحتلهم الفلم ههههههه قالولي اخر مره نشوف فلم انتي منقيته ,
و راي نفسج رايح مو حلو الفلم بس الحلو انه يبين عاداتهم و شسون استانس عالافلام الي جذي
مشكوره عالتقرير تسلم الايادي =)

صمت البوح said...

‏^‏_^ دامه طلع مب شي ..زين اني ما شفته!!
بس صراحه حمستيني من الصور ابا اشوفه لو و و ل
احب سوالف اليابانيين

وتسلمين فديتج ع الموضوع والصور

BeNT JaBeR said...

صباح الخير..

تدرين رورو حتى انا شفته وما عجبني يمكن الشي الوحيد الي جذبني لبسهم والوانهم .. كان شيء غريب فعلا.

ومثل ما قلتي الحسنه الوحيده الي طلعنا فيها من الفلم التعرف على الحضاره اليابانيه ..


وشكرا

Made n Q8 said...

عاد اختي تحب جذي سوالف اليابانيين لبسهم وشعورهم

اذكر مره قامت اتابع مسلسل على قناه دبي جنه اقولها بذمتج شلون تفرقين بينهم البطل والبطله والام والابو وخدامتهم كلهم طقه وحده :s

mazyona said...

ههههههههههههههههههه
أنا بعد سمعت وايد عن الفيلم
بس يقولون الروايه أحلى من الفيلم

شاي الضحى said...

لما قلتيلي عنه شفته توقعته فلم رعب هههههههه

بس ما كملته كنت مندمجه بمادري شنو نسيت

وشكرا على التقرير الحلو :)

رنداالجنوبية said...

الله يعطيك الصحه والعافيه الغالية رورو

دمتي بمحبه

SHa3iRiYaa said...

عجيييب هالفلم انا شفته من زمان
مشكوره سويتيي:**

كوكتيل said...

جنه قلتي لي عنه مرة

أكثر شيء عجبني العدة التنكرية :)

يعطيك العافية حياتي

رورو الشخبوطه said...

هلا اخوي ريماس ..

مشكور..

اي صح مو اهي بس اغلب الدول حتى الكويت في شغلات وايد قديمه مانعرفها..

اي والانضباط والتطور ..

حياك الله..

رورو الشخبوطه said...

هلا بينغ ..

خخ مو خوش موقف وي ماسوت عليج..

اي بس حلاته مقطع لانه يخورونه :\

العفو ولو ..

والله يسلمج يارب..

حياج الله..

رورو الشخبوطه said...

هلا صموته..

مثل ماقلت بينغ اذا بتشوفينه شوفي مقطع احسن ..

الله يسلمج يارب..

وحياج الله..

رورو الشخبوطه said...

هلا بنوته..

مساءالنور..

اي مو حلو وبالنسبه لهدومه استغربت انها طبقات وايد :\.

والعفو ولو..

حياج الله..

رورو الشخبوطه said...

هلا مدمد..

اي ستايلهم يونس..

انا حبيت مسلسل كوري اسمه محبوبتي سام سون ..

وحياج الله..

رورو الشخبوطه said...

هلا مزيونه..

مثل اللي قريته ..

وحياج الله..

رورو الشخبوطه said...

هلا جايونه..

خخ انا اذكر الظاهر تبادلنا الادوار والحين دورج تفقدين الذاكره..

العفو ولو..

حياج الله..

رورو الشخبوطه said...

هلا رندا..

الله يعافيج يارب..

مشكوره..

رورو الشخبوطه said...

هلا شاعريه..

انا ماشفت الا توني وع حظي دبلجوه خخ..

العفو ولو..

حياج الله..

رورو الشخبوطه said...

هلا كوكتيل..

اعتقد مرات مو مره خخخ..

ماتغلا عليج :)

والله يعافيج يارب..

حياج الله..

ميمة السبيت said...

** انا دشيت الفلم بالسينما وايد حبيته مادري ليش ، يمكن عشان اني احب القصص الواقعية شفتيها واهي صغيرة تكسر الخاطر يوم باعوها اهلها قمت ابجي :(

ماميتا said...

تصدقين عفت الافلام عقب ماقال لي اخوي عن الافلام اللي قاعدين يشوفونها في السينما ثلاثية الابعاد عندهم في نيوزيلاندا يقول كني مشارك معهم في الفيلم ...شئ خيااالي
..
يعطيك العافيه حبيبتي ..اول مره اسمع عن هالفيلم ...

ba6alah said...

zain 3ashan ma enro7la

رورو الشخبوطه said...

هلا ميمه..

اهو بدايته حلوه بس عقب تتحول لاستعراض ماله داعي ..

وحياج الله..

رورو الشخبوطه said...

هلا ماميتا..

اي عندنا هالنوع من السينما بس مو كل الافلام تنعرض فيها..

اول كانت اي ماكس بالمركز العلمي والحين حتى شركة السينما العاديه سوت صالات مخصصه لها ..

وصح تعيشين اجواء الفيلم اكثر مثل صخر يطير تحسينه جنه بيحوشج او وحش يطلع جنه هاجم عليج..


والله يعافيج يارب..

حياج الله..

رورو الشخبوطه said...

هلا اخوي بطالي..

اهو مو بالسينما الحين..

اهو ينعرض بالتلفزيون صارله فتره ولما شفته كان مدبلج بعد..

وعموما صح مايسوى تشوفه..

حياك الله..

الوتيــــــــــن said...

@@

تحلفين؟ انتاي من اليوم اهني وىنا كله اقول ياربي وين اختفت هالبنية .. لج وحشه

ومبروك اول شي موضوع المجلة :) خوش خبر

ثاني شي .. تدرين ؟ شفت الفلم ليمن هذيج قالت لها لا تلمسين اغراضي ماحب ريحتج .. وفجأة لقيت نفسي الصبح .. نمت على عمري

مشكورة حياتو

ومبروك النيولوك :*

رورو الشخبوطه said...

هلا الوتين ..

خخ قلت لج من لما قريت كومنتج تسالين عني :)

انتي اكثر :)

الله يبارك فيج يارب مشكوره..

خخ انا كنت اقاوم مابي انا م حسبالي الفيلم يسوى طلع خرطي :\

العفو ولو..

الله يبارك فيج مرسي..

وحياج الله..

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads