Wednesday, March 10, 2010
السلام..
توني خلصت هالقصة ..
بالبداية بنقل لكم شعوري الحالي (مخي مفتر :\ دايخة) بالنسبه لي اعتبر القراءه تغيير جو و روتين بس هالمره السالفه ماضبطت , القصة ماطولت فيها وقت قرائتي لها ماعتقد تجاوز ال3 ساعات واهي عباره عن 170 صفحة.
اما نوعها فهو رعب ..
باختصار اهي قصة ل3 ابطال هم سام ودانيال زوجته وحبيته وصديقتهما سارا , تبدا القصة في الطب النفسي حيث تم ادخال سام اليه دون توضيح السبب سوى انه يريد قتل زوجته المريضه بالمشفى الاخر , ثم تنقلناالاحداث الى طائرة (طيران داخلي امريكي)تنقل المسافرين الى احد المسارح الرومانيه واثناء الرحلة تحدث امور غريبه مثل توقف الطائرة بالجو و انقطاع الاتصال باجهزة التحكم وتوقف الساعات عند ال7 والنصف , لتقع بهم الطائرة ويكون الناجيين هم 15 راكب ومضيفتان يصلنا الى احد المنازل(بالاحرى المنزل الوحيد) وبه يتم ابادتهم ليبقى منهم فقط ابطال القصة ال3 ... الخ .
بتكلم عن العيوب غير مخي اللي افتر منها واني دخت بسبتها :
- بالنسبه للسرد الرواي يظهر في بعض المقاطع كانه يتحدث مع القارئ امم مثل يقول في ص 96 (عزيزي القارئ لاتلومها على ماقالته , فماحدث لايصدق , ...... الخ ).
بمقطع اخر اخبرنا انه سيقص علينا قصة حب دانيال و ساما وانتهت القصة دون ان يتم هذا الامر .
اضف انه القصه بحاجة الى فواصل بين المقاطع المختلفه حتى لاتختلط الاحداث على القارئ وحتى يتم التوضيح انه ماسيروى بعد هذا مقطع جديد لحدث يختلف عن السابق .
- امم القصة تفتقد للمنطق فظهور البطل في بداية القصة ع انه مريض نفسي ومن ثم اختفاءه بالنهايه امر غير طبيعي فحسب مافهمت انه تمت استخدام الهرم المقلوب بسرد احداثها فالبداية تمثل خاتمها والمنتصف اهو استرجاع للاحداث .
-راودني احساس انني اشاهد فيلم رعب اجنبي لابطال مسلمين وذلك لتكرار عبارات ( اعوذ بالله - حسبي الله ) ولعل ماضحكني موقف قتل مصاصة الدماء لابنتها وطلبها منها بذكر الشهادتين:\
- ورود عبارات او كلمات كويتيه (اهو مو غلط) وقد تستخدم لكن بشكل بسيط ومحدد عباره اضحكتني (يعني لن تبكي وتتنهوص على راسك بعد الان) .
لفظ تكرر واستغربت منه (ماصادفني قط بروايات او قصص او اخبار) نشبت حاجبيها باستغراب !! مامعنى كلمت نشبت ؟؟
لفظ اخر متجرات هل المقصود به جمع متجر ؟؟
- بالعودة الى نقطت المنطق بالبدايه اعتقدت ان القصة عن المرضى من فئة(اعداء الشمس)ثم بالمنتصف اعتقدت انها عن مصاص الدماء ثم بالنهاية احسست انه المقصود بها اعداء الحقيقه .
هذا اللي اذكره بس جد صدعت :\
يجدر الاشاره انه مؤلف القصة مواليد سنة 1990 اي انه شاب في مقتبل العمر له العديد من المؤلفات :
1-لعنة عزرانة - رعب
2-صوت في بيتنا - رعب
3-أعداء الشمس - رعب
4-كيد اليافعات - رومانسية
5-أهل الأرض - رعب
6-بنات الثانوية - شبابية رومانسية (اعتقد بالعاميه).
اما على صعيد الاعمال التلفزيونه فهو مؤلف المسلسل التلفزيوني عزف الدموع في 2004..
نقل بالتصرف من صفحته بالفيس بوك :





24 comments:

كوكتيل said...

رعب على باليل يارورو

مو مشكلة اهم شيء إستانستي :)

e3lamidiaries said...

انا قريتها بس مادري يعني عليها نقاط استفهام كثيرة بس هم حلوة القصة يعني

mazyona said...

مشكووووووووورة
شكله قصة مشوقة

Made n Q8 said...

نايس

يعطييج العافية

عنّاي العيون said...

تحية طيبة..

يعافيك ربي اختي..
وماتشوفين شر يارب..

والله من كلامك حسيت ان هالراوية لخبطة..

مدري عن الكاتب ..
لكن فية نوع من الكتابة يسمى تجريبي..
يعني الكاتب يحاول يطلع بأسلوب جديد ضمن النطاق الأدبي للكتابة طبعاً..

وفية طريقة استخدام الفلاش باك ..
وهي ترك فواصل واسترجعات زمنية او مكانية ضمن السرد..

والله يعين القراء.. اللي طالعين حقل تجارب للكتاب الأعزاء..!!

اهم شي استمتعي ..

اعذري اطالتي..
واطيب تحية

ba6alah said...

allah yaster ro3b 3ad

36uofa said...

اهم شي يستاهل القراءه ولا لاء اذا ايي عشان بحظه بلستت الكتب :$
:*

36uofa said...

سوري علبدليه بحطه**
ومشكوره سويتيي :*
وماقريت فكره الكتاب عشان يمكن اشتريه مابي اخرب على نفسيي :pp
:*

مبدعه said...

مدري ليه ما احب اقرا رعب احب اشوف افلام رعب

شكلك قارئه مجتهده الله يحفظك

يعطيك العافيه

رورو الشخبوطه said...

هلا كوكتيل..

خخ مو رعب عادي وانا متشبعه رعب :\

وقلت لج قصتها ايوم امبيه تضحج..

اي الحمدالله صج دخت بس استانست اني خلصت كتاب وتعرفت على الكاتب اليديد..

ومشكوره..

رورو الشخبوطه said...

هلا اخوي اعلامي..

مثل اللي طرحتهم ولا غير ؟؟

وحياك الله..

رورو الشخبوطه said...

هلا مزيونه ..

العفو ولووو..

بالنسبه لي اهي اقل من عاديه..

وحياج الله..

رورو الشخبوطه said...

هلا مدمد..

الله يعافيج يارب..

وشكرا..

رورو الشخبوطه said...

هلا اخوي عناي..

الله يعافيك والشر ماييك يارب..

اي بعض الشي يبيلها تعديل باكثر من موضع..

اها مشكور ع المعلومه ماكنت اعرف عن هالنوع ..

بس الفلاش باك اتوقع بشك يخدم الموضوع وبشك بارز مو عايمه ع بعض..

خخ اي الحين الكتابه هبه كل من نزل له كتاب..

اي الحمدالله ..

لا بالعكس اثريت الموضوع ..

حياك الله..

رورو الشخبوطه said...

هلا بطالي ..

خخخ هذي رعب كوميدي ..

انا ماحسيت انها رعب وايد قاريه رعب بس هذي عاديه كلش..

وحياك الله..

رورو الشخبوطه said...

هلا عطوفه..

مادري انا عن نفسي ماعجبني وترا مو حارقه الاحداث :p

والعفو ولو..

حياج الله..

رورو الشخبوطه said...

هلا مبدعه ..

انا عندي القراءه تخوف ساعات بس مو كثر الافلام واتوقع بسبب المؤثرات المستخدمة بالافلام عموما انا اجرب ال2 ..
الله يسلمج يارب مشكوره..

يعافيج..

وحياج الله..

Lotus said...

يعطيج العافية
وسلامات :)

هذا الكاتب استضافوه مره برايكم شباب و يقول لقى تفاعل ايجابي كبير بالامارات ..!

بس اقولج شغله - على قد قراءاتي لأدب الرعب في الوطن العربي - مشكله انهم يقتبسون كل الأفكار الرعب الأجنبي في الأحداث و النهايات تحسين تقرين شي مكرر من دون معنى ..!

أشهر مؤلف عربي في أدب الرعب أهو د. أحمد خالد توفيق في سلسلته ماوراء الطبيعة هاذي بداياتها كانت اعتبرها طفرة كبيره بس حالياً بعض اعداد هالسلسلة بدت شوي تصير عاديه و مليقه :(

اسفه عالقرقره بس اذا تبين رعب على أصوله ما تنامين بالليل اقري رواية دراكولا لـ برايم ستوكر بترجمة لوسي يعقوب بدار الهلال ..

لول كوابيس شغاله والله عمري ماخفت من قبل لي هالدرجة ..!

Lotus said...

ويه بدليه

برام ستوكر مو برايم ..!

؛)

رورو الشخبوطه said...

هلا لوتس ..

الله يعافيج ويسلمج يارب..

امم اتوقع في نسبه من الناس تحب كتاباته ولاجان ماستمر ..

صاجه وايد احس بهالشي..


اي قريتا تقريبا 30 عدد من هالسلسله وعندي اياها كامله مستوى اعدادها يتفاوت وهم قريت له اصدارات اخرى رعب اقوى شي حظك اليوم ..

ان شاءالله اقراها ..


مشكوره ..

وخوش قرقه :)

حياج الله..

e3lamidiaries said...

تقريبا نفس اللي طرحتيه،يعني انا حتى قلت لكاتب الرواية انه يفضل الشخصيات تتماشى مع الحوار لان مثل ماقلتي شفنا الشخصية اجنبية والحوار فيه قطاات كويتية

رورو الشخبوطه said...

ولكم باك اخوي الاعلامي..

اها ..

مشكور ع التوضيح..

خاتون said...

لوووووووووول
اهم شي
لن تتنهوص على راسك الظاهر انه ماخذها من يدتي
نشبت الله يسلمج أشتقاق من "نشبه" و النشبة مثلي و مثلج عارف انه معناها لصقه عله و هنا جائت بعنى أنه الحواجب نشبو ببعض أي تعكفو أي صاروا 88 و لزقوا في بعض
أي تفسير بعد حاضرين و بالخدمة
لا بس حلوة الروح المرحة اللي بالموضوع و بعدين صغر سنه و عدد رواياته يخدمه
شوقتيني اقرا بس أتوقع بقراوحده ثانية

رورو الشخبوطه said...

هلا خاتون ..

الله يخليها لكم يارب انا اقولها بس احس ماتضبط بالفصحى ..

اي النشبه اعرفها الدعله الزقه خخ بس اهي ماجنها غلط بالفصحى اهو قصد رفعت حواجبها ..

مرسي ..

معاج انه سنه صغير بس بالنسبه للكم مو مقياس المهم الكيف اهو يبيله يتدرب بعد لانه قريت انتقادات عليه عقب ماكتبت عنه ببلوقي مثل المحتوى تقريبا من بنات له باع بالقراءه اكثر مني بوايد ..

اي وقولي رايج فيها عشان اقلدج خخ..

وحياج الله..

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads