Tuesday, December 14, 2010

postheadericon جاكليت .. حلى كل بيت

10:08 PM
السلام عليكم ..

قبل جم يوم اختي الكبيره ولدت الحمدالله ..

فرحت ادور لها كاكاو رحت اكثر من مكان اللي ادلهم كيك ان بيك , الهولندي ,الخباز , الفوز , سابليه, جاكليت ..

واحلى شي لقيت بجاكليت ..


كالعاده اذا ابي كاكاو سوفنير خذ منهم :)

شفتهم كلهم وحبيت اكثر شي هذي .. 


من قريب ..

وهني لما شغلناها بالاستقبال ..
 ومن قريب ..

بالصج وايد احلى :( وفي منها بنفسجي ووردي او احمر :\ وفي صغيره لونها احمر ..

لانه الككاو شويه فخذيت نوع 2 ابسط بس كاكاوه اكثر ..

اهو ستاند وبنفس الوقت يصير صينيه تقديم ..

من قريب قبل لا نفتحه ..

وهالصينه الصغيرونه خذيتها لليومين اللي قبل لاستقبال احتياط اخاف احد ايي فجاءه..

خخخ جان اقول للحجي انا شاريه وايد المفرض تسويلي خصم جان يقولي لك هديه ..

وحاسبت ونسيت السالفه بس اشوه تذكرت قبل لااطلع قلت له وين هديتنا ؟؟


طلعوا المطاطير خخخ اختي الكبيره استانست عليهم :)

(سايتهم)

Labels: , , | 28 comments

postheadericon صباح الريلاكس اخيييييييييييه

11:04 AM
اهو البوست ريلاكس بس الجو العام معافر مع سمسم :\

شنو هذا ؟؟



بشكل 2 ..

وهني اوضح ..

بالضبط هوت ستون اللي اهو بالعربي مساج الاحجار الساخنه ..

واهني عدته ..


الحجر والزيت و الاله ..

وهذ بكج 2 ..


اخيييييييييييه يبيله :)

وحق الريول ..
وفي بديكير ومنيكير مخصص يستخدمون الاحجار فيه ..

شكلي بشتري العده لانه مااحب اسوي مساج بالسبا :\ لعدة اسباب ..

اللي جربته شرايها فيه يسوى ؟؟
Labels: , , | 23 comments
Monday, December 13, 2010

postheadericon عطور غريبه ولها تأثيرات عجيبه :)

1:13 PM
السلام عليكم ..

قبل جم يوم ليزي ديزي منزله بوست عن هالعطور (هني)عاد قلت له انه متوفرين بالكويت..


وامس لقيت السايت قلت اشاركم هالشغلات الغريبه اهي مو يديده صارلها فتره اكثر من سنه بالكويت ومن قبلها طبعا موجوده برا..

في شغلات حبيتها وفي شغلات استغربت منها :\

يشوق احب ريحة اليهال ..
لمدمد :) << مو القاج شاريته ..


هذا مستغربه شلون بتكون ريحته :\

وهم هذا :\

وهذا بعد << عاد في وحده تمدحه ..

هذا مو متاكده اذا متوفر او لا بس جنه اي :\ جنه ويع :\

هذي اساميهم تونس واللي فهمته انه مكوناته تعطيج هالايحاء واي جان زين وفي انواع غير عن الهدوء والخ ..


برشه ع مسعورتي خخخخ جود تحبني :p
متوفرين بسايت trendy&funky (هني )

وفيه عطور وايد غير عن اللي حاطتها ..

واسعارهم تتراوح من 3ونص جنه مو جنيه خخخ لي 8 << اذا ماخانتني ذاكرتي :\
Labels: , | 20 comments
Sunday, December 12, 2010

postheadericon ستايل خطير @@

10:59 PM
السلام عليكم...

اليوم كنت بنزل بوست ريلاكس بس مامداني رحت لاختي بالمستشفى واثناء الزياره كنانشوف بنات وبس و انصدمت بالستايل الخطير..

من زمان مايعجبني ستايلها مكياج اوفر وماتلبس شغلات تناسبها غالبا يكون اوفر بعد من زمان قلت لكم رايي فيها (هني)..

ومثال بسيط اليوم:

مادري اعلق ع الباند..

جنه فتحيه اللوغاني :\


ولا القفاز (التسوس)

حصة جاكسون :\

ولا التنوره :\
اهي اهي ..

والاختلاف بالذوق لا يفسد للود قضيه :)

اختي عاجبها الباند خخخخ..
Labels: | 32 comments
Saturday, December 11, 2010

postheadericon فوندو فرايديز :)

10:16 AM
صباح الخير..

صباح المحاتاة :\

قاعده اسوي اي شي ابي الهي نفسي ومافكر لانه حدي متوتره المهم لله يسهل ع اختي يارب ..

اول امس شفت هالاعلان بالفيس بوك ..


مثل ماتعرفون غرامي الفوندو ومجربه اغلبهم فلازم اجرب اجددهم :p  تجاربي السابقه (هني)

رحت امس جربته ..

اول صدمة انه مال باسكن روبنز بس بالنسبه لي كانت سعيده نوعا ما لانه حب مال باسكن ..


بس كان اغلبه برد مو وايد احب البرد :\

 بس لما كنت بحاسب القرسون استغرب انه البرد جنه مانجاس اغلبه موجود سالني ليش؟
قلت له ماحبه :
قال لي جان قلتيلي جان خليته لج كل كيك وفواكهه ..
 2 صدمه الككاو كان شويه :\ واهما العاده يمرون يسالونج كلشي اوكي قلت له لا مو اوكي الككاو شويه قالي تبين ازيده جان اعطيه اياه خخخ وزاده ..

حبيت مال باسكن اكثر ..


سعره :

مثل ماهو موضوح بالاعلان ب 3,250د.ك

مصدر الاعلان (هني)
Labels: , | 22 comments
Friday, December 10, 2010

postheadericon فيلم لا تراجع ولا استسلام

7:32 PM
السلام عليكم ..

اليوم رحت هالفيلم ..

بطولة :

احمد مكي , دنيا سمير غانم ,عزت بوعوف , دلال عبدالعزيز ..

القصة :

الذراع اليمين لتاجر مخدرات يموت فااحد اركان الاعمال السريه يبحث عن عميل يشابهه وتدريبه ككمين للقبض ع التاجر ..


رايي :

مثل ماقالوا باعلان الفيلم القصة مكرره , ولفيلم توقعته وايد احلى ويضحك طلع اقل من عادي !

اعلانه:
Labels: | 20 comments
Thursday, December 9, 2010

postheadericon مطعم كتكوت ..

8:34 PM
السلام عليكم..

اليوم تريقت من هالمطعم ..

وحصلت معلومات عنه و برشوره (هني) هالسايت وايد مفيد ماقصروا اللي مسوينه :)


طلبت درزن سمبوسه لبنانيه بالجبن وانصدمت من شكلها وطعمها جنه قيمات محشينها جبن :\ البنات حبوها انا احسها عاديه توقعتها سمبوسه تكون بعينه "عجينة" الجلاش ..

بس والله راهيه كلينها 4 بنات و البورتر بعد :p

فطيرة جبن بالنقانق هم مو ذاك الزود بس كليت الصوب اللي في نقانق :\
 ويمدحون صاجهم بجرب ان شاءالله..

وهذي عناوين فروعهم وارقامهم ..
عطلة نهاية اسبوع موفقه يارب..
Labels: | 30 comments
Wednesday, December 8, 2010

postheadericon خيرا رأيت !!

8:27 PM
من الشغلات اللي احبها النوم ..

مستانسه , ضايق خلقي ,ملل ,زعلانه ,تعبانه حتى لو بلبي نداء الطبيعه انام @@

اهلي لي فقدوني يلقوني نايمه !!

صج صج النوم سلطان ..

عادي انام من 11 بالليل لي 3 العصر خخ مره سويتها بالعيد نمت بيت يدتي وعقب قعدوني كملت نومي بالطريج بين بيتنا وبيت يدتي اكثر من نص ساعه وعقب كملت بداري ولما قعدت حاولت انام ماقدرت :\
و لازم انام الظهر ..

اختي الصغيره تسميني فطيست نوم :\
مو بس جذي حتى لو قاعده ماقدر اقوم من الفراش تم اتقلب ع اقل نص ساعه عقب اقوم, حتى اسكر المكيف ماكو فايده :\

اساسا مره قطعوا الكهربا بالليل وكنت نايمه قمت من النوم تحسبت عليهم وفزيت بقوم جان ارد انام ماوعيت الا راده الكهربا :\ تقريبا بو 3 ساعات نايمه بالخيسه لا ومتلحفه بكنبل ..

عادي انام بالازعاج اقوم اصرخ عليهم وعقب ارد اكمل نومتي خخ..

بكل مكان انام هالحجي اول حاليا افضل بداري بس اول كنت انام بالسياره و بالصاله و الاستقبال وبيت يدتي ..

ع طاري بيت يدتي كنت باول سنه جامعه عندي فراغ من 10 لي 1 وبيتنا بعيد عن كيفان فكنت اروح بيت يدتي يم كليتي و انام واقعد ع ال12 خخخخ..

ومره امي تسولف معاي جان انام :\ ومره كنت اسولف بالمسنجر مع مدمد وكنا ننطر صلاة الفير ماوعيت الا عقب فتره وانا نايمه خخخخخخخخخخ امبيه قمت مستغربه شالسالفه :\



ومرات ادرس بليله الامتحان ماوعى الا وانا نايمه ع الكتاب خخخ ..

 
ومره قريت بالجريده انه طق مطر عندنا قلت لامي واختي هذيل يالفون اختي ردت علي امبلى طق مطر وانت نايمه وصار غبار بعد وانتي هم كنتي نايمه !!

ولما كنت صغيره كنت امشي وانا نايمه !!

هذي المقدمه ترا ..



انا ماعندي مشكله بكثرة النوم لانه عادي اقدر اتحكم فيه نوعا ما مشكلتي بالاحلام ..
مااحب احلامي :(
هالمشكله بلشت بشكل خفيف بالثانويه..

- يعني مره احاتي اسقط بماده مع اني مو كسلانه وعمري مايبت مقبول والجيد ايبه عادي بس يكون كل المواد أي الا وحده جيد فيضبط الوضع ..

المهم حلمت اني رايحه اشوف الدرجة وكنت يايبه نسبه معينه, بالصج لما استلمت الشهاده كانت اهي النسبه بالضبط !!

 
مره بالجامعه هم كنت احاتي ماده وانا ماحب البي كلش ملش احب ال أي المهم حلمت انه اختي تكلمني تقولي انتي يايبه أي ماينس واي وبي قلت لها البي بشنو وتميت اصرخ بالحلم ; بالصج كنت مو شايفه الا الاي ماينس الاي والبي ماشفتهم الا عقب الحلم !!

بس 2007 ..
تغير منحنى احلامي صارت عكسيه !!
يعني مره كان عندنا مشروع لماده تصوير وماخلصته بالصج , نمت جان احلم اني مصوره وانا منسدحه بصحن وبدون حجاب وبدراعة البيت وحركات خخ قلت وي امبيه الدكتور بيشوفني بدون حجاب !!

 
بنفس الكورس كنت بقدم برزنتيشن..
حلمت اني اقدم والصبيان ناموا والدكتوره تقولي سرعي !! بالصج صار العكس قالت لي بطئي !
حاليا : هالايام 9000 حلم مره اني انبقت وكان بوكي في 3 دنانير وعفسوا كي نتي !! ومره هم انبقت بس البنت اللي معاي بالدوام اهي باقتني وحذفت اغراضي وكي نتي علي ; (توه من جم اسبوع الاول قبل العيد وال2 عقب مابلش مسلسل البوقات بادارتنا) << وانا من المشتبه فيهم خخخ ياتنافقينهم ياكل بلاوي تطيح ع راسج..

 
مره حلمت اني اصرخ على مسئولتنا واطقها خخخخ حتى تليتها من جاكيتها انا بالصج اطول منها بوايد فبالحلم اتلها من جاكيتها لي فوق وعقب في بنت مو عاجبها الوضع جان اعطيها طراق !! << توه من جم اسبوع

زهيوي:

ومره حلمانه اني لاحقه زهيوي بالنعال وانتوا كرامه جان ينجلط هخخخخ (قبل فتره)
ومره طقيت زهيوي بالحلم وما مات يت امي طقته ومات :\ (توه)

ومره بالصج طقيت زهيوي شلون مادري مع انه اخاف منه لدرجة اني اهستر واصرخ المهم نمت جان احلم اني بنص الدار ودار مداري زهيويه بيهجمون علي !! ( من سنين)
ومره حلمت اني اتعافر مع بعير لونه ازرق انا اصكر الباب واهو يدزه اخر شي قلبته خخخ;<< جنغر
ومابقى احد ماحلمت فيه ومابقى احد من اهلي ماحلمت فيه مفنقش..

ومره حلمانه اني متعلقه بطوفي  وصبي يايبلي صندل شانيل اهو يعطيني اياه جان اقلب الجوتي وانتوا بكرامه و اطالع جم سعره طلع جنه 7 وربع  خوش شانيل خخخ..



وهم بالجامعه حلمت اني متزوجه صبي طويل وبيتنا غرفة السيكورتي اللي تصير عند باب الكليه واحنا طوال ماتكفينا وريولنا تطلع برا الدريشه وستايلنا مثل 5 نجوم لمسلسل يعني مرقع وشغلتنا نبوق دلاغات انا الهي البياعه واهو يخمط الحصيله خخخ

 
وايد احلم اني اشتري جواتي ومره نفانيف ومرات اظافري ومره اشتغل بسبا والخ الخ ..

 
وشكثر عيلت يبت يمكن 6 او 7 صيبان وبنت و اختي توها حلمانه فيني والده ويوعانه :\

وكل مافسر حلم مايعجبني وكل ماحد فسرلي حلم زواج اوف مليت ابي تفسير غير خخخخ..

تحرصون ع تفسير احلامكم ؟؟ وتحبون النوم ؟؟

Labels: | 40 comments
Tuesday, December 7, 2010

postheadericon تذكرونه 5 ؟!؟

7:24 PM
السلام عليكم ..

كل عام وانتوا بخير بمناسبه العام الهجري ويارب تكون سنة خير علينا :)

مو قلت لكم حبيت هالفكره :)

للي اول مره يدش بلوقي او يشوف هالسلسله هذي الاجزاء القديمه منها ..

 (ج1 , ج 2 , ج3 ,ج4)


هالمره جهاز مو انا اللي استخدمته لا يدي الله يرحمه يارب ..

رادو يدي :P





لما دشيت الجامعه الدكتور كان يشرح وياب طاري هالرايود انا حسبالي بس يدي يحبه ويحطه ع قنفته المفضله ويلزقه باذنه لما بيسمع منه شي طلع عادة شيابنا (الله يطول بعمر الحي منهم ويرحم الميت منهم يارب )
وهم استغربته انه لي الحين موجود وينباع حسبالي انقرض انا حصلته بكارفور وهذا سعره :
وامي تقول موجود بالمباركيه بعد..
اتوقع لي رحت المباركيه بسوي مليون جزء لسلسله خخخخ..
مر عليكم ؟؟

p,sاللي عنده اضافه لهلسلسة ياريت يدز لي اياها ايميل :)
Labels: | 40 comments
Monday, December 6, 2010

postheadericon حبيتها :(

3:58 PM
بوست ع السريع لانه صاكني تخبط باحاسيسي بمختلف انواعها :\
 
الله يسلمكم امس لقيت هالنعال انتوا بكرامه وعجبتني قلت اخذها للصيف عاد الله والزمهرير والصقيع اللي حايشنا الحين ..



شكلها من قريب تايقر معجوف ..

سعرها ..
بس ماخذيتها لانه متوفر بس مقاسين منها اهما 36 , 37 ..

وهالمقاسين خبري فيهم من سنين الطواعين جنه كان مقاسي 36 لما كنت ب4 ابتدائي خخخ..

المهم قايست 37 مادشت فيه ريولي وخفت اصر وينقطع فاضطر اخذه واشتري 2 والزق كل 2 مع بعض والبسهم خخخ..

خاطري فيها :(
Labels: | 26 comments
Sunday, December 5, 2010

postheadericon ماشي قطاره :)

9:17 PM

هذا الازرق يالله حيوا هذا الازرق حبيبي :)

يامتكتك الكاس لك لك وحدك من غير شك ..

انت يالازرق مدرسة هندسه في هندسة ..

ماشاءالله ..



الحمدالله يارب..

رد لنا كاس وفرحنا فيه والفال الكاس اسيا يارب..

انا بس سمعت اخر جم دقيقه وكنت قاعده ع عصابي ..

بس الحمدالله ماخيبوا ظنا وفرحت قلبي :)..

ومبرووووووووووووووووووووووووووووووووووووووك :*

الله يعطيهم العافيه يارب..
Labels: | 50 comments

postheadericon تبون تطولون ؟؟

11:09 AM

السلام عليكم ..

قبل جم يوم وانا حوس بالنت لقيت هالمنتج..



تحطونه وانتوا بكرامة بقاعة الجوتي من داخل ويطولكم 1.5 سم ..

لحل مشكلة القصر الشائعه وقد يكون بديل عن الكعب..

واتوقع ينفع الصبيان بعد :)

الحمدالله طولي زين و الاغلب يشوفوني طويله ولا جان جربته وقلت لكم عنه :)

وهم حصلته ينباع بكويتيات (هني)

واحتمل تحصلونه بدايسو بس مو متاكده ..

المصدر..
Labels: | 23 comments
Saturday, December 4, 2010

postheadericon Fashion & Style Tips

9:57 AM

صباح الخير ..

قبل جم يوم كنت احوس بايميلي ولقيت هالسايت كنت متصفحته من قبل بس كلش ملش ماتوقعت انه يكون كويتي ماسسينه اهما سهير الجاسم وانجاد الصبيح ..

اهو سايت متخصص بالستايل والموضة وفي اقسام متنوعه ومتوفر باللغتين العربية والانجليزيه..

الهدف منه تقديم لنصايح والخدمات بهالمجال ,و في خدمات تكون مقابل مبلغ مالي والتقاصيل موجوده بصفحة العضوية ..

وايد حبيته واسمتعت فيه ..

Labels: , | 12 comments
Thursday, December 2, 2010

postheadericon sweete'n cup

3:45 PM
السلام عليكم ..

امس بالدوام يتني الحاله ابي كيكة ..

وق فتره كنت شايفه ببلوقbaby-phat85 بوست sweete'n cup (هني) وتشوقت اجربه ..

قلت للبنات اهما 2 بس الموجودين الباجي 2 طالعين قالوا مايبون قلت ماكو الا اساله اذا يوصل مولتن ..

قالي اوكي لما يه عطيت المراسل دينارين ع ابو مادري اذا توصيل ببلاش ولا فلوس..

جان اييلي المراسل يقول الطلب ب6 قلت لا هذا مو لي بنفس الوقت رن تلفوني ولا الحجي يقولي انه الفلوس قاصره وتميت اتحلطم عليه ع كيفه ايب لي درزن مافن :\

قلت: له انا قلت لك مولتن

قال: انا يفكر مافن :\ مايصير يطلع ع مولتن

 قلت :انا سالتك وانت قلت اوكي :\

ورقعت السماعه << شدعه تلفوني انطلاق 4 خخخ

والله والله لو ما ابي ودي ذوقه جان ماخذيته :\


كاهو من داخل ..


كليت 2وهذي وحده منهم ..
سعره ب6 د.ك ..

طعمه حلو ..

لي الحين اكل منه وماخلص فيه بركة :p

عنوانهم :

جمعية اليرموك , كونا

رقمهم :

 97977967

سايتهم :(هني)

FB:Link
Labels: | 34 comments
Wednesday, December 1, 2010

postheadericon It's 3؟!؟

1:16 PM
السلام عليكم..

توني اليوم انتبه للتاريخ :\

قبل جم يوم وتحديد 29\11 بلوقي كمل ال3 سنين ياحليله :)




من اللويه نسيت انزل بوست بيومها لانه كنت لاهيه بعرس رفيجتي الله يوفقها يارب..

اهو 3 سنين رسميا وانا مسجله ببلوق سبوت ..

بس الصج اقل بوايد تقريبا سنه وشي..

لانه تقريبا شهر ب2007 وبوست ب2008 و انقطاع سنه وشي ورديت له2009 تقريبا بشهر 5 :\

واللي يميز بلوقي انه مشروع اكاديمي جامعي هخخخ..

عموما
 كل عام وبلوقي بخير..

والله يخليني لكم :)

 



Labels: | 44 comments
Subscribe to: Posts (Atom)

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

انستغرام المدونة (roroalk)

follow me

follow me

My Blog List

Show All

Ads

Meenakon Design Templates