Friday, October 2, 2009
السلام..
اليوم بسولف لكم شوي عن اخر فيلم رحت له..


بطولة :Peter Sarsgaard, Vera Farmiga

المخرج :Jaume Collet-Serra

النوع: درامي, رعب

مدة الفيلم :123 min


القصة :

الخسارة المأساوية لطفلهما الذي لم يولد تدمر كيت وجون. وكفاحاً منهما لاستعادة مظاهر حياتهما الطبيعية، يقرر الزوجان تبني طفل آخر من دار الأيتام المحلية، ولكن أمر غريب يحدث مع ايستر
رايي :
القصه باختصار ام تفقد مولدتها اثناء ولدتها مما يؤثر على نفسيتها فتقوم بتبني طفله لتتجاوز ازمتها , شدت انتبها هي وزوجها فتاه تدعى ايستر تبلغ من العمر 9 سنوات وهي هادئه ولبقه وموهبه بالرسم وبعد مشاورة الاخت في الدار التي اشادت بها تم تبنيها .
تتكون هذه العائله اساس من اب وام و طفلين هما صبي بعمر ايستر تقريبا يدعى دانيل و ماكس وهي فتاه صغيره من فئة الصم والبكم (تشوق بسم الله عليها) وبمجرد تبنيها تتولى عليهم المتاعب .
بالنسبه لنوع الفيلم ذكر بموقع السينما انه يندرج تحت خانه افلام الرعب والدراما عن نفسي ارى ان الرعب بطريقة التصوير والاخراج (يمكن لانه متعوده ع الرعب واحس انه الفيلم اقرب للظاهره الخارقه للطبيعه والنادره).
وفيه اكشن شويه واجرام بعد ..
دعايته :
_______________________________
والحين بجاول ع اسالت اخوي نمول ..
اسم مدونتك
المعنى وسبب اختياره ؟
عندي 2 وحده شخبوطه واهي اللي احبها اكثر ليش اسمها شخبوطه لانه فيها انشر شخابيطي اعتبرها جريده صغيره لي ..
الثاني ترندي قيرل واهي بروجكت بالجامعه ليش اخترت الاسم مادري كنت محتاره وحده رشحت لي هالاسم ..

الجنس ؟
مايحتاج خو مبين بنيه..

لماذا تدون ؟
مثل ماقلت بهالبلوق لانه اعتبره بمثابه جريدتي الصغيره اللي اقدر احط فيها اللي ابي .. بديل عن العمل الصحفي اللي اهو تخصصي..
اما الثاني لانه احب الموضه وهالسوالف ..

لمن تدون ؟
للكل ماحب احصر نفسي بشي لو احصرها جان بلوقي ال2 حددته للبنات بس ..

عن ماذا تدون ؟
اهني لكتب قريتها وافلام وبرامج ومسلسلات شفتها ومقالات كتبتها ..
هونيك لاي شي يخص الموضه او البشره او الشوبينغ ..

قدوتك في الحياة ؟
بالمدسه معلمينا ان الرسول صلى الله عليه وسلم قدوتنا بالاضافه له قدوتي ماقدر احصرها باحد معين اي احد مهما يكون مختلف عني عند مبدا او كلمه عجبتني باخذها بالاعتبار..

هدفك في الحياة ؟
امم اني اخذ الدكتوراه بالاعلام ..

اوصف نفسك بسطرين ..
ماعرف اوصف نفسي مادري بنت عاديه اقدس الضحك والوناسه والسوالف واحب اطور من نفسي وصريحه وشويه اللي يعرفوني عدل ..

اكثر صفه تنطبق عليك ؟
اللي لاحظته الاغلب يقول لي اني صريحه و ونيسه بمعنى اني مسويه جو يمكن لاني ماسكر حلجي واحس بسرعه يتعودون علي وياخذون راحتهم معاي حتى اليهال ..
انتو شنو تعرفون عني :)

كاتبك او آديبك المفضل ؟
د.احمد توفيق .

شاعرك المفضل ؟
ماعندي ميول شعريه بس احب الشعر القديم المتنبي و غيره اللي شعرهم متروس حكم ..

اين ترى نفس بعد ١٠ سنوات ؟
اتمنى انه ماكون محلك سر مادري يمكن ام عيال وافتح بلوق 3 لشخابيط عيالي يمدي اصير يده خخ و يارب اكون حققت طموحي وهم ابي اصير ام طماعه شسوي :)

كلمة لقراء مدونتك ؟
امم سوالف الممثلين اتمنى ماكون ثقيله عليكم تعليقاتكم تسعدني ونقدكم البناء ان شاءالله بيفدني ويطورني اللي اشكركم طبعا عليها واتمنى انه بلوقي يفيدكم وبس حياكم الله..
مشكور نمول ..

20 comments:

طماشة said...

هللو

فيلم " اورفان " رحتله الأسبوع اللي طاف، وهو يصنف بنظري إلى " الرعب النفسي " قصة الفيلم حلوة وتعيشك في أجواء من الإثارة وأقدر أقول نوعًا ما فيها شي يديد، الصراحة بآخر الفيلم استغربت بإن البنت طلع عمرها بالثلاثينات لكن " القزامة " وتغيير الأضراس أخفى هالشي. أفلام الرعب النفسي نادر ما تلقون فيه قصة دايركت مثل هالفيلم ف اللي حبه راح يحب أنواع الرعب النفسي. الصراحة من أول ما دخلت الفيلم لحد ما طلعت منه وأنا كنت على أعصابي لان كل الاحداث كانت مشوقة. يعطيج العافية على التقييم.

****

بالعكس انتي مو ثقيلة دم ومواضيعج دايم تكون ممتعة ومنوعة واستفيد منها شخصيًا في بعض المواضيع


عساج ع القوة


طماشة

رورو الشخبوطه said...

هلا اخوي طماشة..

مشكور ع التوضيح ..

اي انا ماتوقعت كلش انها كبيره بس هالمعلومه مو غريبه علي كنت قاريته بنفس الاسبوع تقريبا بالعدد 12 من ماوراء الطبيعه انه في ناس ظاهريا ماتكبر اما انه الضروس ماكنت ادري وانا لماشفته حسبالي متنكره فيهم ماتوقعت مغطيتهم عشان تصغر نفسها ,,

اي الفيلم حلو وانا مو خبره بافلام الرعب تعودت اقرا ونادر اللي اشوف و في فيلم رعب يديد عجبني اللي اهو الصبي يشوف الحدث قبل لا يصير حسيته يونس اقصد غريب انه العاده احس ويصير بس الحمدالله ماشوف الموقف من قبل لايصير ولا جان تعقدت ..

اي وخاصة اخر شي لما بلشت تشطب ع العايله وراحت للابو انا خفت ع ماكس بس اشوه ماسوت لها شي واللي بط جبدي انه محد مصدق الام :(

والله يعافيك يارب ..

مشكور اخوي زين الحمدالله اشكرك..

الله يقويك يارب..

وحياك الله..

طماشة said...

اختي رورو، وانا قاعد أقرا مواضيعج السابقة لاحظت رواية " 11 دقيقة لباولو كويليو " تحمست ل كلامج عنها ودخلت اللنك الي فيه شرح للرواية. والصراحة تحمستله، رحت اليوم العجيري ومالقيته جان أروح جرير وقال مو بالنسخة العربية ما ينزل ممنوع.. ممكن أعرف من أي مكتبة خذيته بالنسخة العربية؟ ويعطيج العافية

شاي الضحى said...

مساء الخير

الفلم اول مره اسمع عنه


انشالله تحققين هدفج بالحياة وتاخذين الدكتوراه وتشوفين عيالج وعيال عيالج

وانتي من الصديقات الي كسبتهم وتستاهلين كل خير حبيبتي :)


يعطيج العافيه :)

نمول said...

ماحب افلام الرعب لاني اخاف
وثاني شي عرنا كل حركاتهم
ايب ياهال يخرعونك
ويحط صوت القطار
طووووووووووط شوي شوي فجأه يعلي الصوت ويخرعك هههههه

شكراً على تلبيه الطلب والاجابه
مبين انج اجتماعيه وان شاء الله تحققين كل احلامج
ومنها انج تاخذين الدكتوراه

بالتوفيق ان شاء الله
وشكراً

رورو الشخبوطه said...

هلا اخوي طماشه ..

صج عاد رفيجتي اتصلت ع العجيري وحصلته و يابتها لي هالحجي بشهر 6 ..

والله يعافيك يارب..

مشكور..

رورو الشخبوطه said...

مساء النور..

هلا جايونه ..

انا لانه بحزت العيد جيكت ع اعلان السينما ولفت انتبهي البوستر وشفت دعايته شدتني ورحت له وعجبني اشوه ..

امين يارب ويارب تحقق امانيج ..

مشكوره بعد عمري وانتي تستاهلين كل خير ..

الله يعافيج يارب..

وحياج الله..

رورو الشخبوطه said...

هلا اخوي نمول ..

مثل ماقلت انه مو خبره بافلام الرعب بس هالفيلم عجبني ومافيه صوت قطار:) وهاليهال عمرها بالفيلم 33 سنه..

العفو ولو..

اي بس هالايام راده اجتماعيه بقوه بخفف لاني قمت اخورها ..

اجمعين يارب ..

جزاك الله خير..

العفو وحياك الله..

ماي بوك said...

اففف ياهو ودر ويه البنت

تصدقين ما قمت اطالع افلام رعب لأنهم يخورونها
شفتي فيلم ويل فاريل ذا لوست وورلد؟

رورو الشخبوطه said...

هلا موم..

خخ حرام بالصج ترا عادي شفت لها مقاله باليوتيوب شكلها تونس..

عيل عكسي انا اول مره اروح رعب بالسينما ..

لا والله منو بطولته ؟؟

وحياج الله..

Fishah said...

موحابه الفلم لان البنت شكلها مو عاجبني :<

وبعدين شالعياره .. الام عندها عيال لييييييش تتبنى !

موفقه يارب .. ان شاءالله تحققين احلامج واهدافج :)

بوستاتج واااايد وايد حلوه وانا استانس لما اقرا شي منج سواء بوست او تعليق :)

رورو الشخبوطه said...

هلا فيشه..

خخ اهي تعابيره مخليتها مرعبه شوي لايقه ع الفيلم اما لما شفتها عادي بمقابله بالعكس تونس ..

تقلد انجلينا :)

يمكن بتعوض عن البنت اللي فاقدتها واختاه لو ماتبنتها جان ماطلعت بالسينما خخخ ..

اجمعين يارب جزاج الله خير..

بعد عمري مرسي وانا استانس لما اشوفج متواجده ماتشوفين خطر لا اطلع بيتكم خخ..

وحياج الله..

ماي بوك said...

إسم الفيلم
The Lost World
الممثل Will Farrell

أنا ما شفته توه يديد بس شكله حلو عبالي رحتي له سينما

رورو الشخبوطه said...

هلا موم..

مرسي..

شفت دعايته توني بس لا مارحت له جان كتبت عنه:)

*Being One said...

انا مادري شفيني صايره ما اخترع من افلام الرعب P:
فصايرة كلش ما احب اشوف افلام رعب احس جنه قام يتهزئون فيني خصوصا هالنوع من الافلام انا احب اكثر شي من افلام الرعب اللي في قاتل متسلسل او على طقة the strangers شايفته ؟ عجيب انصحج فييه

و على الاسئله اي و الله مبين عليج انج ونيسه حيل و الصراحه استانس لما ادش بلوقج و اشووف سوالفج و بوستاتج و حبيتج معني ماعرفج شخصيا بس مبين عليج حبووبه ^^

خاتون said...

بصراحة الأسمـ حلو عجبني و في creativity
و ما في أحلا من الشخابيط لأنها بداية بناءالإبداع
Th!nk! إنج إنسانة عنيدة..وماراح تجعدين بسرعة لأن ستايل حياتج يحطج بالسيفتي سايد عن الهرم و الكبر
تكرهين الأغبياء جداً و ما تحبين تمدحين نفسج..مزاجية
و من جوا عكس برة يعني برة كرسبي و من جوة كريمي *_^
هذا بالنسبة لسؤال شتعرفون عني ^_^
سعدت بالتعرف عليك ..بانتظار شخبوطتك القادمة.

رورو الشخبوطه said...

هلا بينغ ..

يمكن لانه تشبعتي من الرعب مثلي ..

لا والله ماشفته بس في فيلم بينزل شكله يشوق جنه اسمه اختار الموت الافضل اللي واحد يتخيل اللحظه قبل لا تصير و القصه جنها باباي بروح اضحك عليها خخ..

وبدور هالفيلم اللي تمدحين وان شاءالله احصله ..

لا لا استحيت خخ وانا بعد استانس بردود و استانس ع قصصج نبي وحده يديده اذا ماعليج امر ..

حبتج العافيه يارب..

مشكوره وحياج الله..

رورو الشخبوطه said...

هلا خاتون..

حتى انا حبيت اسمج يذكرني بطفولتي :)

مشكوره..

واهي بحد ذلتها متعه ..

اي عنيده وعشان افج لازم احد يقنعي وهالشي صعب جدا جدا جدا :)

امم كستايل اي ستايلي بنوتي شوي و طبعي للي يعرفني عدل اقصد اللي ارتاح لهم يعطيني عمري اما الباجي اذا كنت راكده لا حسبالهم كبيره وخاصة بالنت واجمعين يارب مايبن علينا الكبر مع اني فقدت الذاكره :)

اي ينرفزوني بس ساعات احس اني منهم واختي تعقدت مني بهالشي هذا بخصوص الغباء..

كلش ماحب امدح نفسي ولا احب احد يجابلني ويمدحني حلاته الشي فعل و مو بس حجي وحلاته بظهري تحسين صج يحبني بس بعولتي ابيه من جدامي وراي حاله خاصه اهو خخ..

واي اكره مزاجيتي بس لما تناقشت مع رفيجتي تقول اغلب البنات جذي بسبب الهرمونات ..

بس الحمدالله انا حقانيه ومزاجيتي مو ماثره ع هالشي من جذي مرتاحه ..

بس بجوانب ثانيه تغثني ..

مافهمت شرح الكريسبي قصدج من بره صلبه ومن داخل هشه وحساسه امم تقريبا اي ..

انا اكثر والله..

مشكوره اختي مرورج اسعدني واستغربت انج عارفتني عدل ماشاءالله من اول لقاء :)

حياج الله ع طول ..

خاتون said...

أي قصدي صلبة من برة و حساسة من جوا
و بالنسبةلعارفتج عدل
أي خبرج تخصصي أحلل شخصيات ؛)
بس سر بيني و بينج مو تعلمين أحد ...كبيش *_^

رورو الشخبوطه said...

ولجم باج خيتو..

اي صوح مره وحده قالت لي احسج ماتحسين الحمدالله والشكر زين ماشتها ..

خخ زين ماشاءالله ..

اوكيك سرج بير خيتو :P

ومرسي ع التوضيح..

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads