Tuesday, December 11, 2012

postheadericon China Glaze Spring 2013 Tranzitions Collection

9:11 PM
كالعاده احب ارويكم اخر المستجدات والصيحات بعالم غرامي اصباغ الاظافر ..
 
عقب صبغ اظافر الذهب من زويا ،China Glaze بتنزل كولكشن حلو للربيع 2013 فكرته بسيطه وغريبه وحلوه بنفس الوقت..
 
اهي عباره عن صبغ يتغير لونه بمسحه من التوب كوت ...
والتوب كوت اهي الطبقه الصبغ الشفافه اللي تنحط كخطوة اخيره بعد الصبغ الاظافر (اللون ) وفايدتها المحافظه على اللون وانه يتم لفتره اطول ..
 
هذا اهو الكولكشن ومن الصور بتفهمون فكرته (بشكل اوضح) ..
 
 
وبيتوفر ان شاءالله ب6 الوان :
 
From left to right: Split Personality, Duplicityy, Modify Me
 
From left to right: Altered Reality, Metallic Metamorphosis, Shape Shifter
 
وهالصوره توضح الالوان قبل وبعد التوب كوت ..
 
وبالنسبه لطريقته ( مثل الصبغ العادي ):
- تحطين البيس (هالخطوه انا مو وايد معترفه فيها الصراحة :) بس يمكن لهالانوع تكون ضروريه من جذي ذكرتها ..
- عقب الصبغ ..
-عقب التوب كوت ..(وهالخطوه باعتقد حالة تبين درجة اللون اللي معاه)
 
 
واهو حلو اذا بحط نفس اللون لمدة يومين ومالي خلق امسحه (استثقل اني امسح الصبغ :\) احط التوب كوت يتغير وهم حلوو اذا بسوي فرنش او حركات فيه تكون بسيطه ..
 
وراح يتوفر بالاسواق ان شاءالله بشهر 1- 2013..
 
وهذي مصادر المعلومات والصور link ، link
 
Labels: , , , | 2 comments
Monday, December 10, 2012

postheadericon RoRo B.B CREAM

11:15 PM
امس استخدمت بي بي كريم يديد متشوقه اجربه من دهر بس كنت انطر اخلص بي بي كريم ايزدورا اللي قلت لكم عنه هني ..
واليديد كان فاشل اهو ملاحظتي على كريمات البي بي كريم اللي جربتهم من شرق اسيا كلهم ناشفين وماينفعون البشره الجافه جربت 3 وهذا الرابع (2 من مايبيلين وغارينيه ) كلهم نفس الشي :\ من ناحية القوام ويبينون القشور اللي ناتجه عن الجفاف ..
 
فقلت اليوم خل ازيد جرعة الترطيب فحطيته مع المرطب بنفس العلبه ..
 
 وهالصوره لقبل وبعد الخلط ..
 
وهذي المكونات ..
 
(1)
بي بي كريم سامبلز (اشوه ) من هالمحل

postheadericon ETUDE HOUSE \ SWEET DREAMS

 
مميزاته :
حمايه من الشمس SPF 50
وتر بروف (ضد الماي ) ولونغ لاستنغ (يدوم لفترة طويله)
يبيض ..
مكافح للتجاعيد ..
مكافح السواد ..
 
(من جذي تشوقت عليه ) بس ناشف ناشف ناشف ويبين عيوب بشرتي (الحراشيف والجفاف ) وفاتح ..
 
بس هم لي الحين خاطري اجربه صج مو مثل قبل بس هم ابي :\ (مشكله اذا تنحت :\)
 
(2)
 
وهذا المرطب اللي خلطته معاه ..
 
اسمه :

postheadericon bioderma atoderm po zinc cream ultra-apaisante

 
قلت لكم عنه توني هني
وصورته منقوله من هني ..
 
ورايي فيهم :
حتى عقب الخلط ما حسيت باي فرق :(
 
وانا ازهب للبوست تذكرت اني قريت بوست عن تجربة وحده باعدااد البي بي كريم طبعا من الى ماشاءالله شي يستحق القراءه

(سويه بنفسك : بيبي كريم ! )

* شكرا ميك اب لوفر على المساعده بالبحث عن البوست ماقصرتي والله :*
Labels: , , , , , , | 2 comments

postheadericon bioderma atoderm po zinc cream ultra-apaisante

7:17 PM
واخيرا بوست بويتي عن العنايه بالبشره مو الكياج...
 
واهو عن اخر كريم مرطب جربته ، واهو مال اختي الجوز واستخدمته معاها (عبت لي علبه صغيره حجها مناسب لجنطة مكياجي)
 
 
 
قوامه :
دهني  خفيف :
خفيف يعني لما اتدهن ينساب على بشره بس بنفس الوقت (دهني) احس اني متدهنه كشكل وملمس ومع الوقت يخف هالشعور (احس فيه بس بالبدايه ) وماحسسه يتغلغل بالبشره ..
 
ترطيبه :
عادي جدا او اقل من عادي مؤقت مثل ماقلت مايتغلغل بالبشره من جذي لما اغسل ويهي يروح مفعوله ، مااحب اللي جذي حلاته ترطيب قوي ويستمر ..
 
مدة صلاحيته :
بس 6 اشهر شويه على كريم مرطب :( الاغلب سنه ..
 
مخصص للبشره:
 
مكتوب يناسب الحساسه ويناسب الكبار والصغار واذا ماخب ظني حتى للرضع وللويه والجسم ..
 
سعره :
7 او 7 وشي ..
 
انصح فيه ؟؟
 
لا ..
 
وعلى فكره اختي نفس رايي بعد ..
 
 
 
link الصوره منقوله من هاللينك
Labels: , | 2 comments
Sunday, December 9, 2012

postheadericon lush soon @the_avenues & جديده :مكياج

8:51 PM
يوم اليمعه شفته بالافنيو استانست انه بيبطل كنت ناطرته لانه استثقل الروحة ل360 عشانه ..
 
 ولانه خاطري بمكياجه توني من فتره بسيطه عرفته  من dally  لما نزلت صوره بالانستغرام ..
 
ووايد حبيت الحمر والماسكرا وعندهم شدوات وايلاينر ملون وبودرة ..
 
 
كل حمره مكتوب عليها اسمها بالصوره ..
 
وهذي الماسكرا ..
 
 
انا كنت مسويه سيرج بالعربي واليوم سويت سيرج بالانجليزي..
 
استانست انه في سايت لش للكويت هذا لينكه ..
 
بس انصدمت من الاسعار لانه لما سويت سيرج بالعربي كنت لاقيه خبر بمجله امارتيه عن مكياج لش واسعاره ..
 
وسويت سيرج ولقيت سايت الامارات ..
 
بسويلكم مقارنه بسيطه ..
سعر الحمره بالكويت 8.500 د وبالامارات 85 درهم يعني 6.500 تقريبا (الفرق دينارين )
الماسكرا ب7.750 د بالامارات 70 درهم تقريبا 5 وشي هم الفرق دينارين ..
يفرق خصوصا اني ناويه اخمط !!!
 
والباجي جيكوا عليه بالسايت ..
صفحة المكياج بلش الكويتي وهني بلش الاماراتي ..
 
وهالشغله ذكرتني بالبوست اللي نزلته عنهم قبل (هني) ..
 
لا احد يقولي شحن او ضرايب لانه هالشي لو بيحوشنا جان حاش الامارات بعد !!
 
Labels: , , , , | 4 comments

postheadericon G.U.M TRAVEL KIT..

12:25 PM
احب سوالف الميني والشغلات المجكنمه ..

ولقيت هالست للسفر مخصص للاسنان ..

عباره عن جنطه صغيره شفافه تقريبا بحجم البوك وفيها عدة تنظيف الاسنان الفرشاة والمعجون والخيط والاعواد ..

وايد حبيت الفكره ..

وتحصلونها بوتس..

سعرها :
4.750 د.ك
Labels: , , | 0 comments
Saturday, December 8, 2012

postheadericon ريوقنا من Pilatus

8:02 PM
الاسبوع اللي فات عطوني اعلان هالمطعم كلش مو هوايتي تجميع اعلانات المطاعم خخ..
 
وتصفحته عجبني 2 يوم طلبنا منه ..
 
 
وصل بس :( القهوة منكته على الاكل ..
 دمرت كلشي ووصلت لي صمونة والبطاط هذا طلب بيروو ..
 والقهوة اهي طلب مع الفرنش توست اللي كان مووووحلووو كلش طعم البيض وواضح :\
اهو توست ع طريقة الفرنسيه مع العسل ..
سعره:1.100 د ك
 ومو بس جذي كانوا ناسين طلبي الصاج :\
 
كلمناهم ويابوا الطلب بس عقب لويه وحنه كلمناهم 10 وربع تقريبا ما وصل الا 12 ونص تقريبا ( الصاج الناقص والصمونه اللي اختربت )
 
هذا طلب عقب تعديل جيكو البطاط تغير بس طعم صمونه حلووو اسمها كلوب المرتديلا ..
وهي مرتديلا تقدم ع طماط والخس وجبن الشيدر وصلصة برش الليمون ..
سعرها :1.850 د.ك
 
وهذا صاجي (ديك رومي= تيركي )
شرايح التيركي مع خس وطماط وصلصة برش الليمون ..
سعرها :950 فلس..
 شقولكم لذيذه اممم لا شويه عليها من حلاتها داومت 2 يوم بس عشان اطلبها وهم جربتها بيرو وحبتها وطلبتها 2 يوم ..
 
وهذا طلبنا اليوم ال2 ..
 
صاج تيركي + صاج الاجبان ..
 
صاج الاجبان : اهو خليط من الموزاريلا ، القشقوان والحلوم يقدم مع صوص البيتزا والزيتون ( هم حلوو )
سعره : 1.150 د.ك
 صاج التيركي اول مره كان الذ لانه صلصته كانت اكثر ..
 
وشبس..
 
عنوانه :
المرقاب - ش السور -برج التجارية B1 -18
 
ت:22968060\1
Labels: | 0 comments

postheadericon Tangle Teezer @ boots

11:48 AM
هالمشط عرفته العام من النت كالعاده وكل من يمدحه واشوف بس يشترونه من الصالونات او النت ..
 
امس كنت بوتس شفته موجود استانست جان اصوره خخ بس ماشريته توني سويت سيرج عنه عدل وحبيته وناويه اشتريه ان شاءالله ..
 
اول شي شنو اهو :
خلافاً لأي فرشاة أو مشط للشعر من المتاحين في الأسواق، فإن آلية تناسق أسنان فرشاة الشعر هذه تتيح لها الانزلاق بسلاسة على الشعر المتشابك، كما أنها سهلة الاستخدام، وتعمل على تمشيط الشعر بكل سهولة، وفي نفس الوقت لاتسبب أي أضرار لفروة الشعر، بل تعمل على تعزيز نموه، وتجعله يبدو بمظهر كثيف وصحي*
 
وهذا فيديو مقارنة بينه وبين المشط العادي  link (عرفته ونقلته من سباركل @SparkleQ8 مشرفة بمنتدى كويتيات وعندها اكاونت بالانستغرام متخصص بالبيوتي عجيب ماشاءالله )
 متوفر باكثر من لون .. (الوانه تشوق)
و باكثر من شكل :
(اهما 3 وتوه منزلين رابع بسايت بوتس اما بوتس الكويت بس متوفر 2 اهما):
“تانغل تيزر أوريجينال” و”تانغل تيزر كومباكت ستايلار”
وما يميّز “أوريجينال” هو تصميمها الذي يتلائم مع كف اليد، وتتمتع ” ستايلار” بغطاء لحماية أسنان الفرشاة؛ ما يجعلها مناسبة لأن تُوضع في حقائب اليد. **
سعره :
 
5 د.ك ..
 
ملاحظة :
* ،** هالفقرات منقوله من مجلة زهرة رابط الموضوع هني
 
 
 
Labels: , | 8 comments
Friday, December 7, 2012

postheadericon Iconic Now @the_avenues

7:57 PM
عرفت هالمحل بدبي ونزلت لكم عنه بوست هون ، هالاسبوع شروفه رفيجتي قالت لي انه تبطل بالافنيوو ..
 
اليوم مريته وصورت لكم مقتطفات منه >> وعلى فكره هالمحل تبع مجموعة لاند مارك ..
 
 
 
 المحل في اكثر من قسم :
1-رجالي ..
 
 
-نسائي ( ملابس :للطلعه اكثر من ستايل \ للنوم\ ناعمه للحفلات ، احذيه واكسسورات )
 
 
 
 
-اطفال ..
 
 وفي قسم صغير للاكسسورات المنزل ..
 
فيه ابجورات وطفايات واكواب وبراويز .. الخ ..
 
 
والمحل موجود ..
 
بالافنيو بالفيز 3 بالمول بالدور الاول ..
 
رايي:
حبيته حلو ومرتب بس حبيت اللي بدبي اكثر لانه اكبر (اكثر من دور ماشاءالله ) وفي شغلات وايد مو متوفره بفرع الكويت مثل قسم الحلويات وقسم البيوتي ..
 
وبنزل ان شاءالله صور لبضاعه لشغلات غريبه وشغلات عجبتني بالانستغرام باكاوونتي @roroalk
 
Labels: , | 2 comments

postheadericon IsaDora B.B. Cream

9:07 AM
المفروض يحطوني الوجه الاعلامي لهم خخخ صج والله سالوا بنات الدوام عن علاقتي بهالماركة وشلون عرفت بيرو عليها خصوصا و عموما على وايد بنات عرفوا بودرتها حبوه وخذوها عقب ماشافوني حاطتها ..
 
ووايد جربت شغلات منها وكتب لكم عنهم مثل:
 حبي بودرة البرونز منهم (هني) و الكحل الذهبي (هني) وماسكراتهم (هني)..
 
واليوم بقولكم عن البي بي كريم ..
 
قبل لا اشتريه مكيجتني مندوبتهم وجربته على نص ويهي وبالنص ال2 كريم (فونديشن) فول كفر على قولتها بس لما يت بشتري اخترته اهو لانه عجبني قوامه في نسبة ترطيب حلوه ..
 
قبل لا ابلش فيه وبالتفاصيل عنه اللي ماتعرف البي بي كريم شنو اهو انصحها تقرا هالبوست كتبته لكم العام راح تتشوق عليه انا توني قريته مره 2 وطاحوا كل الكريمات من عيني ابيه اهو وبس هذا الرابط  , ولانه اللي متابعتني تعرف شكثر احب المنتجات العلاجيه التجميلية ..
 
بسم الله نبلش اسم الكريم ايزدورا بي بي كريم ..
 
 
ومناسب حسب ماهو مكتوب عليه لجميع انواع البشره ومتوفر ب3 درجات ..
 
اللي جربته التان لاني احب الغامج بس قالولي عقب الميديم احلى عليج رحت بشوف ببوتس طلع مخلص :\ ..
 
اما قوامه :
رطب خفيف على بشره ..
 
وميزة البي بي كريم انه متتعدد الفوايد : (بالنسبه لهذا)
-ترطيب ..
-لون..
-عنايه..
-تغطية..
-حماية ..
 
-بالنسبه للترطيب  مثل ماقالت لكم اهو اول شي شدني بالكريم وخلاني اخذه ترطيبه حلو (انا بشرتي مختلطه جافه حساسه ) وكنت اقدر استخدمه بدون مرطب بس افضله مع مرطب ..
-اما لون :مثل ماقالت لكم كان اغمج مني بس عادي احبه عاجبني بس المره اليايه باخذ كريم مثل درجتي ..
-عنايه :مادري شقصدهم فيها بالضبط بس انا مافرقت علي بشرتي معاه ..
-تغطية :خفيفه طبيعيه مايخفي المسام (مو مثل البي بي اللي بالبوست اللي حطيت لكم رابطه فوق :(  تغطيته مناسبه للي يحبون التغطيه الطبيعه وبشرتهم مافيها عيوب وايد ، وينفع يستخدم كبرايمر قبل اي فونديشن عادي انا اجربته بهالطريقه بس مكتوب بالسايت ويمكن اجربه عقب ان شاءالله..
-حمايه: في حماية من الشمس SPF 12..
 
سعره :
7.750 د.ك ..
 
رايي فيه :
اكثر شي حبيت فيه قوامه ماحسيته بي بي كريم كثر ماهو على قولتهم تنتد مويسترايزر = مرطب بلون ..
 
 
Labels: , | 4 comments
Thursday, December 6, 2012

postheadericon Revlon Grow Luscious Lash Liner

9:46 PM
المكياج كثر بوستاتي الله يكثر خيره خخخ..
 
هذي  تجربه بيوتيه يديده هالمره لكحله من رفلوون شريت لونين منها بس على اوقات متفرقه الاول خذيت كان الاسود قبل هبتي بالمكياج وال2 اخضر عقب هبتي ..
 
 
 
 
الاسود اسمه :Onyx 001
الاخضر : 004 Emerald
لونه اخضر ع زيتي غامج وفي لمعه ذهبيه راقيه << ترا عادي يطلع لونه غير عن وصفي لاني كسلانه بالالوان :\ (بقوقل في صور لتجارب البنات )
 
طريقة استخدامي :
استخدمت الاسود داخل العين وكايلاينر عادي والاخضر بس استخدمه داخل عيني وشويه لتحت رموشي وعادي اسوي فيه لوكات مينونه خخ احط ماسكرا زرقه بس مو اللي حيل واضحه برموشي اللي تحت واحط ع مدمع العين القلم الذهبي من ايزادورا اللي قلت لكم عنه هني  وسميت هاللوك لوك الطااووس) وحبيته ..
وناويه استخدم الاخضر كايلاينر لانه غامج ماراح يكون شاب او شكله غريب او مستنكر ..
 
رايي فيهم :
1- لونهم غني ..
2-بسرعه يخطون ..
3- ثباتهم زين ..
4-سعره رخيص..
5- ماركة زينه ..
 
ومو بس انا استخدمته (الاسود ) اختي الكبيره استخدمته اكثر من مره وحبته ورفيجتي استخدمته اول ماحطته قالت لي هذا شنو ماركته حلو ..
 
سعره :
الاسود ماذكر اما الاخضر ب2,850 د.ك شي جذي ..
 
الصوره منقوله من link
Labels: , | 2 comments

postheadericon حلو اليوم @chocolate_mania_kw

8:36 PM
اليوم بالدوام اخترت رفيجتي نجرب هالمولتن ..
 
الحلو فيه انه وصل بالوقت بالضبط ماشاءالله ..
 
 
اخترنا الميكس فيه 6 انواع (الاورجنال ، بالكراميل ، جيز كيك ، بجوز الهند ، كوكيز ، كندر)
سعره :
12 د.ك
 
للطلب :
ت:60909495
 
الانستغرام : @chocolate_mania_kw
 
رايي :
عجب البنات انه خفيف وحلو / وانا حبيت انه منوع وطعمه زين و انه وصل بالوقت وحار ..
 
 
Labels: , | 2 comments
Tuesday, December 4, 2012

postheadericon IsaDora Twist-up Metallic Eye Pen

11:29 AM
من الشغلات اللي حبيتها للعين وتعطي لوك حلو وناعم لها هالقلم من ايزادورا ..

اسمه :Twist-up Metallic Eye Pen

 

درجته :

44 Golden Khaki



طريقتي :

احطه داخل العين او على مدمع العين بس اموهه  ، ورفيجتي تحطه فوق الايلاينر او تحت العين هم حلوو ماشاءالله ..

سعره :

اعتقد ب6 لانه من رفيجتي ..
Labels: , | 2 comments
Sunday, December 2, 2012

postheadericon امريكانا :بوب كورن ربيان

11:17 PM
مادري اذا هالشي يديد او لا بس خذيته مره بجربه  (لانه هالفتره هابه بالربيان)  وحبيته ولي الحين شريته تقريبا 3 مرات  ..
 
 
 
ومتوفر بالجمعيات ..
 
وبالنسبه لسعره :
اعتقد دينار وشي ..
 
رايي:
 
حبيته الذ واخف من بوب كورن الدياي , واكله مع صلصة التارتار (احب التغمس) وحلو كسناك او عشا او غدا ..
 
ملاحظة الصوره من قوقل ..
Labels: | 4 comments
Saturday, December 1, 2012

postheadericon h&m eyebrow pencil

9:13 PM
هالقلم رفيجتي جربته ومدحته بس ما مدحته لي خخ لاني كنت مااحط مكياج ..
 
ذاك اليوم العب بجنطتها رسمت حواجبي فيه عبط مو اللي عاجبني جان يقولون البنات حلوو استغربت شفت الصور عجبوني حواجبي انا الحمدالله مااحف ولا اشقر ولا ناويه لاني استحرم ، ومع المكياج الخفيف اليومي كرهت حواجبي وكنت ادور فتاوي عن الحواجب بس كنت ادور عند ناس الثقة مثل ابن باز و العثيمين  وكلهم حرموا التشقير بعد فقلت عساني ماحبيتهم المهم يكون الله راضي عني ..
 
بس مع هالقلم حبيت حواجبي انا ارسمه بشكل بسيط يعني اغطي الفراغات بس والحمدالله حبيت حواجبي فيه ...
 
 وعقب مارسمهم اضبط اللون (اموهه مادري شلون تنكتب ) بهالفرشه موجوده ع المغطاة ..
 
واهو متوفر بدرجتين ..
 
-لايت براون = الفاتح << هذا اللي جربته..
-دارك براون =الغامج
 
سعره :
 
ماعندي فكره لانه رفيجتي عطتني اياه ، بس مكتوب بالسايت انه (بدينار ونص )
 
رايي :
حبيته لانه حببني بحواجبي (شعور حلو ) ، وانه لونه طبيعي وثابت ماشاءالله مايروح بسرعه ..
 
 
Labels: , , | 7 comments
Subscribe to: Posts (Atom)

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

انستغرام المدونة (roroalk)

follow me

follow me

My Blog List

Show All

Ads

Meenakon Design Templates