Thursday, February 11, 2010

postheadericon يوم ميلادي المجيد:)

10:23 PM



السلام ..

في يوم ميلادي المجيد اعاده الله علي بكل خير وفرح يارب ..
امس كنت لاهيه اسولف بالمسن مع رفيجتي اهي تهنيني وانا اقولها باجي نص ساعه :\ ماوعيت الا خواتي الاصغر مني داشين يغنون ومعاهم كيكه..

جان استلمهم تو الناس مابدا يوم ميلادي ومن وين ومنو يايبتها وليش مو حاطين اسمي جان يزفوني خخخخ..



عقب اختي الجوز صديقتي الصدقه بالحل والترحال والزف خخخخ يابت لي هالعلبتين من رفيجتي خاشتها عندها لانها مسافره الله يردها بالسلامه يارب..



كنت اطلع اغاني يوم الميلاد لقيت وحده حبيتها لكاظم الساهر اللي يقول فيها كلما تكبر تحلا وتصير احلى واحلى :)
صح لسانك ..

هذا ريوقي اليوم كان بوفيه ماعجبني الا اصابع الجبن وبطاط ودجز ..




ويتلي وايد مسجات احلاها ..

في احلى يوم بالشهر حبيت اسبق البشر ..
واهني اللي احلى من القمر ..
واغلى من النظر .
وابارك لها بيوم ميلاد العمر ..
واطلب من ربي يحفظها طول الدهر ..
واقولها كل عام وانتي بخير وعقبال عمر ..


واللي ضحكني كل عام وانتي بخير وعقبال 100000 سنه ترا صرتي قدي الحين :p

العام قلت لها البنت صرت كبرج مارضت خخ اهي اخر الشهر ان شاءالله بتكمل 24 وبتصير اكبر مني ..

والظهر رحت ..




هناك مايصير يصورون مادري شلون البنات صوروا :\


المهم سويت فيشل و سولي مساج لرقبتي وجتفي و قاعة ريلي بس حده مريح ..


ومعاملتهم حلوه حسسوني اني اميره ولما درت اللي تسويلي انه يوم ميلادي غنت لي خخ ..





برشورهم ..





ماقدرت اصور الا الروب ..

كريمات ..




وحبيت النتيجة خففت الهجوم البربري اللي صار فجاءه بويهي ..

وعقب رحت مطعم ماكروني ..


نسيت اصوره من برا مع اني كنت ناويه بس توني ذكرت :\


المنيوو..







المقبلات ..



والحلو انه المفرش نفس الوسيله و حاطين الوان عشان التشخبط خخخ..
خط اختي .. خط القرسون كتب اسمه ..

خطي صاير لوعه :\







من هالكلمه اكتشف انه يوم ميلادي ..




الاكل شوربه دياي..


سيزر ..


باستا..

بيتزا ..


وناسه غنولي وصوروني خخ وهم الكيكه عطوني اياه فري لانه يوم ميلادي ..



وبس خلص يوم ميلادي..

ناطره هداياكم خخخ..
Labels: , , | 46 comments
Tuesday, February 9, 2010

postheadericon باباي 22 اهلا اهلا ب23..

11:59 PM
اخيييييييييييييييييييييييييه طارت السنه ومرت الشهور وركضت الايام و الساعه مثل الثانيه مانحس فيها وفجاءه باجر بودع ال22 او بالاحرى اليوم مدام صارت 12 وباجر بيكون يومي :)
يارب يارب يارب هالسنه تكون سنة خير علي :) وعلى الجميع..
باسترجع معاكم ذكرياتي العام ..
باخر نص ساعة من 10\2\2009 كنت توني متسبحه وفاله شعري الخوص الحرير الجميل الكثير الطويل والوفح فيه مستانسه لفحتين ولا اهو حات بالقاع خخ لا وي لا ان شاءالله ..
جابلت لا بتوب ومسكت كاميرتي اصور نفسي خخ باخر يوم من ال21 ..
طبعا ماراح ارز صوري اخاف ابهركم بجمالي الشقاقي خخخ..
وحزتها هم كنت اسولف مع رفيجتي بالنت ..

يوم ميلاد بدون كيك :\ مايصير ..
بس العام كيكتين ..
الاولى من رفيجتي وال2 من اخوي وكلهم من نفس المكان :\ ..
اخوي استانست عليها كلش ماتوقعتها كنت اصور قشي تحت صعدت داري ولا القى علبة الكيك قلت وي منو يابها فوق حسبالي ماغيرها اللي تحت من رفيجتي لما قربت ولا مكتوب عليها كل عام وانتي بخير زيتونه ولا من اخوي بعد عيني اهي اهي ..
ا
توقعوا اي وحده من اخوي ؟؟واي وحده من رفيجتي؟؟


فستاني الجميل رفيجتي يابت لي هديه ولبسته بس طبعا مع ليقنز لزوم الستر ..
بس كان كبير علي كنت رشيقه الحين اتوقع كبري ..


خخخخخخخخخخخخخخخخخخخخخخخخخخخخخخخخخخخ هالصوره احبه عشتوا يعني كنت اصمم بالفوتوشوب شرايكم بالابداع ..


 رورو وي كنت بكتب اسم عايلتنا @@ 22 سنة من العطاء رغم الاحباط لا متناهي ..

وطبعا بما انه يو ميلادي المجيد احبه حب جنوني واضمه في عيوني لا خخ ماله شغل ابي يكون سبشل ..

اقتراحاتكم بليز ؟؟


من الافكار اللي بالي سبا فندق النخيل مسوي عروض احد جربه من قبل ؟؟



وابي مطاعم حلوه سواء بالنخيل او البدع او 360 مول؟؟

ومرسي..

لا حد يقول كل عام وانتي بخير تو الناس باجي 23 ساعه 35 دقيقة :p
Labels: , | 43 comments

postheadericon بربوع المباركيه هسترت فخمطت :\

12:29 AM
السلام..
امس الظهر رحت المباركيه الهدف كان حواي ومطعم و خرابيط ..
اول شي الحواي ..
جليسويد لاختي وطين خاوه اختي تقول يمدحونه للمسامات ..
هم اختي خذته تقول يخلي شعرنا مثل الامارتيات ماشاءالله بس ماراح اجربه انا ..

اكليل الجبل وبابونج بسويهم خلطه يقولون يخلي الشعر مكتكت ويكثره ..




 معمول ريحته مثل الصابون حلو هالايام كل يوم وترك نسوي سمج صيد ابوي صاير الصياد الصغير خخخ..


بخور زينب مادحينه البنات وعاجب اهلي بس للحين ماستخدمناه شموه بالقوطي نايس..

هم لاختي ..



زعتر هم لاختي تقول مادحينه لها يضعف :\


صابونة الطاووس اختي بتسوي فيها خلطه وبتعطيني منها وكركم للجسم هم لها و زيت النمل يقال انه يخفف الشعر لي وصابونة الكركم بجربها مثل مالت بوعابد ولا لا ؟؟ وصابونة سفيداب ..



وعقب مثل بقاله ..
اختي خذت هذا انا حسبالي بنك طلع حب شمسي بالككاو ذقته خفيف قبل جم يوم سمعت عنه واستغربت حسبالي بقشره طلع لا اشوه :)


شعر بنات من قبل شريت نوع 2 بس ماحبيت ان شاءالله هذا يطلع حلوو ..


بفك احبه ..


نظارة لسمسم وكيكة خذيت وحده لي وحده لاختي الكبيره بزها لها بالبريد :p


هم بفك ..



اللي يبي شي لا يستحي يمد ايده واللي تبي خلطة او اكل حياها الله ..
سين سوال تحبون خلطات وهالخرابيط ؟؟
وشنو جحربتوا وضبط ؟؟

Labels: | 33 comments
Sunday, February 7, 2010

postheadericon رواية يوم الحدث + فيلم اوم شانتي اوم

6:32 PM
السلام..
واخيرا قريت شي وبالاحرى خلصت شي قريت وايد شغلات بس ماكملتهم :\
اسم الروايه: يوم الحدث
تاليف:خالد النصر الله ..
بالبداية هالروايه تعتبر 3 اصدار اقراه لهالكاتب ..
بطل الراويه شاب اسمه سليمان باخر سنة في الجامعه مجتهد يستغل وقته في الدراسه والعمل من مبدأ(اتعب اليوم وارتاح باجر) , خلال يوم واحد يمر بعدة احداث غريبة متنقل بين اكثر من مكان مبتدأ يومه صباح بالذهاب للمقبره و ثم انتقل لمركز الشرطة وبعدها للمستشفى ليختتم يومه ب ....
يغلب على الرواية طابع شبابي من خلال افكار الشاب وحديثه مع نفسه او الاخرين يتناول العديد من القضايا الهامة في مجتمع الكويت كالانتخابات وممثلين الشعب بمجلس الامه وشعارتهم الخياليه و وضعف التعليم والصحة ,و المسرح وتدهوره واختفاء المسرح السياسي ,وعن السياحة ,وعن الرياضه ومنع الرياضه النسائية.
وبالنسبة لقضايا الشباب تحدث عن الوقت و الفراغ (مو العاطفي كلش مو نغزه لبعض الناس خخخ) وضعف الدعم والتشجيع ع الاختراع والابتكار
مقتطفات من الرواية :
عن التاليف قال :
انتم ايها الكتاب تستطيعون ان تجذبوا جمهور القراء باساليب بسيطة :
(اذا اردت ان تجذب الفتيات اكتب عن الحب والرومانسيه , واذا اردت جذب المتحمسين اكتب عن السياسه ,والمتأملين اكتب شعرا , والمراهقين اكتب لهم عن الجنس , والمثقفين اكتب عن الادب العام والافكار العلمية وبحور الفلسفة , واذا اردت ان تسعى للشهرة بسرعة اكتب مايقلك الى السجن او الفضائح ).
- كما اشار الى العادات والتقاليد المخالفة للشرع مثل منع الرؤية الشرعية قبل الزواج و العنصريه فيه , وعن الاختلاف بين الستينات والسبعينات والان من حيث اللبس والتصرفات (في السابق كن الاغلبيه من الفتيات يرتدين التنانير القصير "الميني جوب" او الفساتين رغم هذا لا ينظر لهم احد من الشباب بعكس الان الاغلب محجبات لكن المضايقات زادت ), عن تقديس الشارب :\والتشدد بالدين .
- نحن مسيئون للبلد نحن ومن غيرنا كلنا شياطين خرساء نشاهد الخطأ ونسكت عنه او نساهم فيه .<< عبارة اعجبتني بس الايد والوحدة ماتصفق :\
تحدث عن بعض العلوم كعلم الابراج :
مايوضع في في الصحف هو تنجيم مضحك وكانت تسمى بالسابق الحظ (و مدى ايمان فئة بها وتفاؤلها او تشائمها من مجرد قرائتها للبرج مما اثر على هذا العلم ) .
- وعن تفسير الاحلام وتقدم المسلمين به كابن سيرين وابن العربي وابن خلدون , ويقال ان الاحلام انعكاس لواقع الحياة التي يعيشها المرء وتتشكل على هيئة صور واحداث بسيطة و من جانب اخر يقال انها مخزون محتوى العقل الباطن , والدين الاسلامي فرق بين الاحلام العادية والرؤى حيث بين ان الرؤية هي احد علامات الايمان واعتبرها الرسولى صلى الله عليه وسلم من علامات النبوة ال45.
واحلى شي ختم العبارة بمقولة د. احمد الربعي رحمة الله عليه "تفالوا الكويت مازالت جميلة "

**********************************



يوم الجمعة وكعادة الmbc الاسبوعية تم عرض الفيلم المدبلج وهالاسبوع حطو اوم شانتي اوم ..
في البداية ماعجبني وحسيت انه تمثيل بتمثيل ومن مشهد اللي بين انه البطله متزوجة بالش الاكشن وشدني بس لما مات شاروخان انصدمت قلت معقولة البطل مات @@
عموما حبيت الفيلم وبالنسبه للافلام ال3 اللي شفتها قبل اهو احلاهم واللي عقبه ع طول اول فيلم مدبلج انعرض نسيت شسمه والاخيس ديفيداس :\
ومرسوو..

Labels: , | 26 comments
Friday, February 5, 2010

postheadericon Avatar + low carb.nosugar + الميني عقال :\

11:00 PM
السلام ..
امس يوم اللطعه العالمي انلطعت عند باب المدير وعند الدوام وبالسوق ساعه وشي انطر اختي :\
بس توني عرفت سبب هالشي الظاهر من هالفيلم كل مابروح له يصير شي اول مره كنت بروح له ب360 ولما وصلت المجمع وعند السينما اكتشفت انه اقرب عرض ب6ونص متاخر بالنسبه لي شاورت اختي قالت لا واشوه مادشينا جان وصلنا البيت جريب ال11 ..
فامس رحت له بالافنيوز مو اي ماكس لا ديجتيال بس نفس موصفات الاي ماكس وهم نلبس نظاره ..
هذا البوستر السينما ..
وهذا لقيته بالنت ..

اي احلى ؟؟
بالنسبة لي الاول ميزته غموضه و ال2 مبين نوع الفيلم ..
اهو نوعه خيال علمي في نسبة من الاكشن ..
القصة منقوله من سايت السينما ..
في المستقبل نتعرف على جيك وهو من قدامى المحاربين يجلس مشلول القدمين، يتم احضاره من كوكب آخر يدعى باندورا والذي يسكنه شعب يطلق عليهم اسم نافي، شعب متجانس وله لغته وثقافته الخاصة به. ونرى من هم من كوكب الأرض يدور الخلاف بينهم بشكل مستمر .
فهمتوا منها شي :\
انا مافهمت :)
رايي بالفيلم..
بدايته بايخه كنت بنام وحزتها تذكرت تعليق ميمه جنه بوست اب ذا اير قالت دشته ونامت كذا مره وماخلص خخ لانه طويل كنت بطلع منه اشتري لزقة بواسد لظهري خخ , ونهايته متوقعه بس اللي حبيته طقوس الزرق تونس لو مو اختي يمي وتزفني جان طبقت معاهم ..
وايد مقطع بشكل واضح فجاءة الشاشه سودا حسبالي نمت :\
فجاءه يتغير الموقف اوكي قطعوا بس مو بهالشكل :\
*************************************************

هالصوره مكررتها ادري :)
بس بقولكم رايي فيهم..
البرتقالي اهو ككاو بنكهة البرتقال بس بالاسم جذي بالصج ماكو طعم بس مرورة الككاو ..
الكوكيز خخخ امبيه باختصار ضيم يابس وماكو طعم جنه اكل سميت او فخار :\
القلاص اللي جنه نوتيلا خذيته لامي اهي جربته قبل لا اجرب اكلي قالت مافيه شكر قلت اي اهو نو شوغر بس لما ذقت باجي اكلهم حسيت بامي خخخ..
امم اهما المفروض يحطون مواد تحلي الطعم بدال الشكر وسعرتها تكون اقل طبعا مو بالمره ماكو :\
*******************************************

هبه مش ولا بد بلشت من العام تقريبا بنصه انا شفتها بمعرض اللي من طقت بيت اللوذان جنه اسمه جذي باخر 7 هالايام رد بقوه وبموديلات والوان ..
امبيه حده مو بناتيه وعموما مو حلو تستخدمون شي غير استخدامه الاساسي العقال ينلبس ع راس للرياييل او نلسب فيه خخخ ..
خلصنا من سكارف اللي ع شماغ طلع لنا العقال بس باجي يسون دشاشه بناتيه :\
الوانه :

وفي اضافات وهم شفت ع ورد جنه سوراتنا اول بالعروس اللي طخم مع النفنوف الكشكش ..



للعيد الوطني..

خبر بالجريدة عنه :
وموبس جذي :
مطلعين فتوى فيها @@


وبس شورايكم ؟؟

Labels: , , | 30 comments
Wednesday, February 3, 2010

postheadericon يوميات كويتيه مندقرة 3 (الاخير)

9:25 PM

روتين..

نشرت الجرائد أسماء المقبولين بالديوان وكنت احدهم وتم قبولي في الرغبة الأول هوب لأحد يحسدني ترا هذي غلطة عمري J

طبعا لا يخفي عليكم أمر الإجراءات الروتينية من تصوير 60000 نسخة من كل ورقة رسمية مرورا بالفحوصات الطبية التي تستدعي ذهابك للمجلس الطبي أكثر من مرة ولمستشفى وللمستوصف انتهاء بالديوان الخدمة..

ديوان الخدمة يعني أن تدور حول نفسك في مكان مغلق ولكل مكان رقم أي أن تعود لاستقبال لتأخذ رقم وتعود للمكان الآخر (ودوخيني يالمونه) وهلم جرا..

انتهينا من إجراءاتهم لنعود لوزارة الهنى لنتجول في ربوع أروقتها للنهي أوراقي
(وأخير تم بحمد الله )انتظري اتصلنا بك كان هذا أخر رد سمعته من الموظفة لأعود لبيت العز ابحث عن فراشي J

تم الاتصال وتم الدوام و مرت الأيام بين محاولة تعلم العمل ونصائح مختلفة ومتباينة من زميلات العمل و أعمال وأوامر منهم !!


(المعاش ماعاش)


يوم الرواتب (ها سحبتي معاشج , ترا نزل المعاش ) لسان حال زميلاتي و صديقتي تخبرني عن عدم نزول راتبها اتصلت على بنكي لأتأكد من رصيد لانصدم خخ مبدعة بالتشري الحساب وصل لي القاع والراتب لم ينزل..

راجعنا إدارة الحسابات لتخبرني الموظفة عدم توفر بنك لأنزل راتبنا به (نعم يروح أمك) راجعي البنك وعودي لنا بعد يومين !!

ومتى ينزل الراتب ؟؟ احتمال بأثر رجعي الشهر القادم لالا بتطوفني شغلات وايد وانا مو متعوده اطلب من اهلي فلوس كبرت وتعودت اصرف ع نفسي صج مايقصرون بس هم مابي..

انزين بشيك لا ماعندنا !!

الله كريم ..

ويبون نحب الدوام..

اخر امل :\(امنحوس منحوس حتى لو عطوه فانوس , التم المتعوس ع خايب الرجا )

لم ينتهي مشوار بحثي عن العمل بعد ان توظفت , بل نتيجة لعدم اقتناعي به (مالقى نفسي فيه :\) قدمت على احدى الجهات المستقله في اخر يوم لتقديم بها وكان هذا بعد مضي سنة ع تخرجي و اشهر عدة تقارب ال8 على عملي.
وكانت احد متطلباتها هو اجتياز دوره سجلت بها واستمعت فيها جدا (الحمدالله شغلت مخي بعد ماجيم من الروتين القاتل) .
بعد شهر تم الاتصال بي لاجراء مقابلة التوظيف وهناك التقيت بهم كانت اسئلة بمنتهى السخف وكنت (خايفة حدي من اخاف اعرف انه السالفه ماراح اتم :\) .
و بعد انتهائي منها اخبرتني صديقتي بان هناك من كان ينتظر مقابلته معنا وتلقى اتصال من ادارات اخرى تطلبه للمقابله بعد سواله عن شعبة التخصص (المطلوب صحافة) بس كالعادة تم تطنيشي انا وصديقتي :\
عموما لم يتم قبولنا لامرين :
1- يريدون ذكور فقط لانهم ذكور رغم ان المتقدمات من الفتيات هم افضل منهم وبشهادة القائمين ع مقابلات الاختيار (لم يتم توضيح هذا الامر بالاعلان).
2- عدم عملي بالصحافة .

سوال يسدح نفسه جان سؤلونا قبل لا نقدم عن هالشي شكو يعنونا ع الفاضي :\

بس قالها الرويشد من متى صابت معي حتى تخيب البخت عمره معي ماصدق ..

و هم ال3 ثابته حطيت عليها اكس بشده خخخ..

تم بحمدالله :)

ومشكورين ع متابعة :)


Labels: , | 20 comments
Monday, February 1, 2010

postheadericon يوميات كويتيه مندقرة 2

7:52 PM
يوميات كويتية مندقرة 2

وظيفة جديدة أخوض غمارها هذا اليوم هذه الشركة متطورة مقارنة بوكالة الأنباء فالتقديم كان من خلال الموقع الكتروني لها بالإضافة الإرسال مواعيد الاختبارات عبر البريد الالكتروني والرسائل القصيرة للهاتف النقال .

فبعد عودتي من وكالة الأنباء كان من المقرر علي امتحان في اليوم التالي وتحديدا الساعة السابعة ونصف صباح بالأحمدي لكن لم اذهب وذلك بسبب بعد المكان والوقت المبكر جدا بالإضافة إلى صدمتي من اختبار البارحة.

هذا لا يعني انتهاء المطاف بل يعني هناك أحداث مسترسلة على هذا الأمر ففي أثناء هذه الفترة كانت صديقتي مسافرة مما يعني عدم اجتيازها لامتحان وكالة الأنباء أو امتحان الشركة وعند عودتها اتصلت بهما لتخبرها الشركة بان الامتحانات مستمرة ويمكنها ان تحضر في الغد لاختبار فاتصلت لتخبرني بهذا الأمر .

لم اتصل بهم لأفاجئ بعد عدة أيام برسالة قصيرة أخرى من الشركة فيها موعد آخر لامتحان التخصص(للتوضيح الامتحان الذي لم احضره كان امتحان قدرات و امتحان اللغة الانجليزية)، وقد صادف إن نكون أنا وصديقتي بنفس الاختبار مما شجعني للذهاب كان امتحان سهل وفي مجال تخصصنا بعكس امتحان الوكالة.

بعد انتهائي من الاختبار حاولت الاتصال بهم لكي استفسر عن مدى أمكانية حصولي على موعد آخر لاختبار الذي (فاتني) وكانت نتيجة اتصالي هو عدم الرد ، لم أحاول مجدد وقمت بالتنزه مع صديقتي وفي هذه الأثناء وصلتني رسالة قصيرة لموعد الاختبار الأول الذي لم امتحنه J سعدت كثيرا بهذا الأمر فقلت تباشير العمل خخ..

يوم الموعد حدث أمر غريب إلا واهو تعطل سيارتنا فاستعنت بأخي لنقوم برحله عائلية أنا وأخي وأمي وزوجة أخي (سياحة حشى مو) امتحان والأغرب من هذا الأمر هو إرسال موعد أخر الامتحان التخصص الذي انتهيت منه مسبقا وهذا الأمر أربكني اتصلت بهم ليخبروني انه بالخطأJ

المهم امتحنت امتحان الانجليزي النظام السوال الخطأ يمسح أجابه صح تقريبا بهذه الطريقة و الامتحان عبارة عن مئة سوال مقسم ال4 أقسام مع جهاز كمبيوتر مختبئ تحت الطاولة مما يعني معانة في الامتحان و تكسر رقبتي وبعد الانتهاء انتظرا قليلا لنتقل لامتحان أخر هو امتحان القدرات وهذا الامتحان يعتمد ع الوقت عدد كبير من الأسئلة ووقت قصير وعبارة عن 6 أقسام متنوعة بين أشكال وحروف وكلمات و
أرقام وعمليات تحتاج إلى وقت بالتفكير بالإضافة لقسم مختص بأسئلة لمعرفة شخصية المتقدم.
انتهينا من الاختبارات لننتظر موعد للمقابلة الشخصية جميع هذه الأمور لا تعني القبول.
كانت المقابلة في أول يوم من شهر رمضان الكريم و من حبهم لي أرسلوا رسالتين كل واحد تحمل ساعة مختلف لمقابلة الغد!! احد عيوب الشركة من وجهة نظري هو المواعيد المفاجأة والتي تسبق الامتحان بيوم فقط ..

تأخرت قليلا عن الموعد الأول وذلك بسب ذهاب سائقنا لمنزل أختي بالغلط المهم أنني استطعت الذهاب لفاجأ بالازدحام الشديد وجود الكثير من زملائي بالجامعة
أما عن الوضع في المقابلة كان مريح و سلس فالأسئلة عامة عني وعن تخصصي وعن إمكانياتي وسبب رغبتي في العمل لديهم.

وبعدها انتظرنا شهرين تقريبا ليتم إعلان قبول 700 فقط لأكثر من شركة!! معظم من أبناء موظفي الشركة والآخرين ممن لديهم واسطة.

طبعا محسوبتكم برا الحسبة !!

لدي استفسار برئ لماذا لا يكتبون بالإعلان انه الوظيفة من شروطها وجود واسطة.

واكرر لمن لديه واسطة!!


تعليقي انا رورو حزت لما كتبت السالفة ماكنت رورو بعدي خخخ ..


عقب تقريبا جم شهر صادفت احد دكاتره الجامعه وع السوالف قال لنا انه البترول كانوا طالبين منه يرشحلهم المتفوقين بس اهو ماكان متوقع ان احنا معاهم :\ ولا جان رشحنا اهي اهي خيره ان شاءالله ..
ماراح اطولها عليكم بس باجي جزء 1..
Labels: , | 23 comments
Subscribe to: Posts (Atom)

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

انستغرام المدونة (roroalk)

follow me

follow me

My Blog List

Show All

Ads

Meenakon Design Templates