Monday, November 2, 2009
السلام عليكم ..
شلونكم ..
اليوم رحت معرض الكتاب مره 2 ..
وهالمره بدون لسته ..
وقبل لا ابلش الصوره اللي فوق عجبني شكلها كنت شا يفتها بتغطية المدون عاجل اذا ماخب ظني للمظاهره اللي كانت ضد الرقابه ولما رحت اليوم صورتها ذكرى :)
****
المهم هالصوره من حصيلتي امس من رفيجتي اتصلت تسالني شنو الاعداد الناقصه من سلسلة ماوراء الطبيعه قلت لها جان تقول موجودين بالمعرض @@ عقب سالتني عن اسامي كتب د.احمد توفيق اللي ابيها قلت وايد قالت قولي اساميهم لما قلت لها احس تقول اي واهي متضايقه ليما وصلت لدماغي كده جان تستانس خخ تقول لقيته @@
انا انصدمت قلت وهذي مالت الحاسب الالي شكو تقولي مافي له شي بالمعرض عموما مرسي صقيقتي << مو بدليه فرحتيني ..

نبلش بحصيلة:
- اليوم اه يادماغي مو لي لصقيقتي وال2 عجبتني صورة البنت :)


اهني تنتحت لمازا لانه دور النشر طلعت ارخص بوايد من المكتبات بتقولون شي طبيعي بقولكم الفرق وايد يعني دينارين واو دينار ونص يعتبر دبل سعر الكتاب اللي شريته الخميس من رابطة الادباء لقيته اليوم ارخص ..
وهم اهما يرخصون بعد هذي اعتقد دار الفرابي وهذي حصيلتي منهم ..
كنت ابي اقرا شي لامين معلوف وخذيت سمرقند بعد ماستشرت البياع ..
اي ذكرت سالفه وانا عند كتب باولو كويلو قالي انه اهو مال الخيمائي قلت اي اعرفه وابي له شي حلو بس مو الخيميائي ؟؟
قال: قريتيه؟
قلت :لا قريت 11 دقيقه
اهو استغرب يقول كنا بنيبها وامنعونا الرقابه منو وين ماخذتها..
قلت من الكويت مكتبة العجيري رفيجتي يابتها لي ولسان حالي يقول ياخرطي رقابتنا اي شي خخخ..




هذي من دار 2 لحظه اجيك ع الاسم اعتقد المؤسسه العربيه للدراسات والنشر امبيه هم لقيت شغله شاريتها اغلى برا قلت شكلي ماراح اشتري الا من المعرض ومن دور النشر اللي برا مو بالكويت ..

هالكتب الواحد بدينار والبرمائي بدينار ونص..






بهالمكتبه فصلت (انا كل مكاتب مصر مريتهم بالمعرض ادور كتب د.احمد توفيق ) بس هذي تنحت فيها احب الكتب المصريه خصوصا القديمه ..



غرامي ايام الثانويه تختخ ..




اي وبقول شي حسافة ع دايموند بوك كانت عجيبه اهي اهي ..


خلصنا من المعرض ..

_________________________________________________

نبلش بكتاب اليوم ..


وهو بعنوان (هرطقة )





ومن تأليف : خالد النصر الله ..



الكتاب مقسم الى 4 قصص متنوعه ومختلفه في طرح ..


الاولى بعنوان :


الظرف الاسود ..


وهي قصة يمكن ادراجها حسب وجهة نظري تحت مفهوم القصص ذات التوجه السياسي ..

حيث يروي لنا السيد رينيه مدير احد الفنادق الفرنسيه قصة تطوره الوظيفي وتدرجه من موظف علاقات عامه وحتى ادارة احد النادق الكبرى في باريس , و ينقل لنا حادث غريبه مرت به وهي صراع بين مسلم يدعى ابراهيم خالد وصاحب الغرفه المقابله له حاييم اليهودي .

وخلال هذا الصراع يشير المولف للوحده والقوميه العربيه والتداعيات السياسيه بين المسلمين واليهود.



القصة الثانيه :



سنوات مع الشيطان ..



يخبرنا في بدايتها انها قصه حقيقيه بلسان معالجة نفسيه تدعى نور لحالة احد مرضها يدعى راشد الذي يعرفنا على نفسه باول جلسه بانه مدلل من قبل جدتها و يبين لنا مدى صدمته من فراقها ومن ثم ينقلنا ال مرحلة مراهقته وسفرته الاولى مع اصدقائه للمغرب والتقائهم باحد الدجالين و التحول الهائل الذي اصابهم واستمر لاكثر من 10 سنوات مرعبة بعد لقائه به .

كنت اقراها ولسان حالي يقول كذب المنجمون ولو صدقوا ..


من العبارات التي شدتني بهذه القصه :


تحدثه عن العمل في القطاع الحكومي قائلا :


هذا القطاع الذي يحد الطموح ، يصرخ في وجهك مكانك رواح , لا تملك القدرة على التوسع والاستفادة من شهادتك وخبرتك الا من ملك الكلام المعسول والنفاق المستمر ، وكانك حصلت ع الشهادة كي تعاقب وتذل وتظلم , لا لتحترم وتعزز وتكرم .


تعرفت بشكل مبسط على نوستراداموس :


http://ar.wikipedia.org/wiki/%D9%86%D9%88%D8%B3%D8%AA%D8%B1%D8%A7%D8%AF%D8%A7%D9%85%D9%88%D8%B3



اما القصه ال3 فهي التي تحمل عنوان الكتاب :

هرطقة:


وهي قصة شاب ناصر يبلغ من العمر23 ربيعا خريج علوم سياسي وفيها يحكي لنا قصة حبه لرغد ابنة احدى صديقات امه و من ثم حبه لدينا التي تعرف عليها بالنت من خلال ردودها على مدونته << (خخ حتى بالبلوق في حب الكتروني الظاهر )..

وكيف استطاع تنمية موهبته في الكتاب وعد الكتفاء بعالم التدوين والانتقال للصحافة كل هذا بفضل والدهم الذي ربها وغرس فيه طرق الحوار و المعرفة ..


القصة الرابعه والاخيره بعنوان :


الحل الامثل..


وبطلها هو جاسم الذي فقد في بدايتها عائلته الصغيره المكونه من زوجته رجاء وطفلين هما ابرار وسالم , و يبين لنا لوعة الفراق ويوضح لنا مدى حزنه الذي يمنعه من النوم لايام عدة و ماينتج عنه من خيالات مرعبه دهمته ومحاولته للهروب منها .


جميع القصص بهذا الكتاب تشترك بالنهايات غير المتوقعه..


باختصار برافوا خالد النصر الله :)

________________________________________________

الجزء الاخير من البوست:

ابي هالكتاب محد شافه بهالفتره..

اتصلت ع الدار اللي توزعه محد رد علي :(








12 comments:

برنسس ايديدي said...

خوش اختيارات :)
جنه شيشتيني شكلي بروح مرة ثانية

بالنسبة لكتاب هرطقة
فهو يثبت مدى براعة النصرالله في الطرح والتنوع باساليب الكتابة :)

يعطيج العافية خيتو ^^

مي said...

أحسن شي انج رحتي بدون لستة..
أنا صار لي شهر أكتب لستة الكتب اللي أبيها
:(
وضاق خلقي لما رحت المعرض وماحصلت منهم الا نصهم ..
للأسف..

مد ان كويت said...

علييج بالعافية وانا ان شاء الله لي رحت بسالج عن كتاب احمد يمكن احصله :)

رورو الشخبوطه said...

هلا برنسس ..

هالفتره غيرتي من ترندي لي شخبوطة ولج ولجم ..

مرسو خيتو..

انا بعد ودي اروح مره 3..

انا عن نفسي ماقدر احكم ع اسلوبه بدون لا اقرا له اكثر منشي بس ماشاءالله مبدائيا يشد ..

والله يعافيج يارب ومشكوره..

وحياج الله..

رورو الشخبوطه said...

هلا مي..

انا من كثر ما كتبت لستات وعدت فيهم وشفتهم صميتهم خخخ..


مي تو ماحصلت شي اغلب لستتي مالقيتها شكلي بجرب اطلبهم من النت ..

حياج الله..

رورو الشخبوطه said...

هلا مد..

الله يعافيج يارب ..

سالتهم قالو بالمتحده رحت لهم قالوا اتصلي اتصلت ماردوا اذا شفتيهم نقلي لهم سالفتي خخ ..

بعد عمري ماتقصرين مشكوره..

وحياج الله سيس..

خاتون said...

سلامـ مربع *_^
شكرا لك متذوقنا على هالباقة الجميلة
و أنا من قبل سامعه عن
هرطقة لكن بعد تلخيصج تشجعت أكثر
مجهود جميل جدا ...يسلموا مثقفتنا ^_^

رورو الشخبوطه said...

هلا خاتون..

العفو ولو..

اي ما يغلا عليج استعيريه مني خخ ..

مشكوره بعد عمري..

الله يسلمج يارب..

وحياج الله..

فارس عبدالفتاح said...

عفواً

هو مش احمد الربعي هذا كان له ميول يسارية ... لاني سمعت هذا الكلام وللاسف لم اقرأ شيء لهذا الرجل او عنه

رورو الشخبوطه said...

هلا اخوي..

ماعندي فكرهات والميول السياسيه ..

اهو الله يرحمه ليبرالي ..

بس انا احبه كونه رجل اصلاحي مفكر وطني راقي باختصار رجل بمعتى الكلمة..

اذا حاب تقرا له شي ..

فهذا البلوق يضم مقالات نشرت له..

http://rob3ylinks.blogspot.com/

حابه تسمعه وتشوفه في العديد من البرامج اللي موجوده بيوتيوب احلاهم لانه شامل ..

وهو بعنوان (كلامك بالقلوب - الدكتور احمد الربعي) وهو عباره عن اكثر من جزء من خلاله بتعرف على احمد الربعي الله يرحمه بشكل بسيط..

كتب عنه وايد بالنت والجرايد وانا بعد كتبت عنه شي بسيط بشهر 3 جنه اذا حاب تطلع عليه..

ارجو ان اكون افدتك..

حياك الله اخوي..

بوح الصمت said...

اللللللللله تختخ ;q

من أي مكتبة شريتيه ؟

مجموعة جمـيلة .. بالتوفيق لألك يا حبيبجي ;q

رورو الشخبوطه said...

هلا بوح ..

وناسه حتى انتي تحبينه خخ..

من مكتبه اعتقد اسمها دار المعارف تبع مصر ..

مرسي..

اجمعين يارب ياختي خخخ..

مشكوره..

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

follow me

My Blog List

Ads