Monday, January 10, 2011

postheadericon CHIC BEAUTE SALON & SPA

4:54 PM
واخيرا بعد 3 اشهر ..

اليوم رحت سويت اظافيري ..

اتصلت ع اول صالون رد علي انسر ماشين وال2 مشغول وماردوا الا ال3 الحمدالله ال3 ثابته خخ..



وايد عجبني مدخلهم احب اللون الابيض شرح ماشاءالله ..
  مكان السبا اهما 2 بس ال2 انا مرتزه فيه خخخ ..


وهذي ضيافتهم لي ..

حبيت الكاكاوه واخترت جاي اخضر..
 انا :)ودلاغي يمي خخخ ..


اخترت هالصبغ ..

وهذا اسمه ..

والنتيجة داخل الصالون ..

برا الصالون ..

نسيت اقولكم اني اخترت كلاسيك مانيكير وبديكير..

تضبيط اظافر و برافين و وسنفره هذا الذكره للايد والريول في كريم بعد زياده ..

سعره : 14 د.ك ..

اللي سوت لي اسمها كوماري..

رايي :

حبيت المكان والشغل زين والستاف ماشاءالله اينن معاملتهم وايد محترمه وراقيه سواء اللي خدمتني او ال2 او صاحبة الصالون حتى الزبونه اللي قبلي كانت حليوه :)
وماحسيت بالوقت لاني تميت اقرق مع صاحبة الصالون خخخ تونس ماشاءالله ..

في شغلات يديده عندهم بجربها لما توصل وعندهم مساج واسعارهم حلوه الله يتمم :)

و اي صبغ زويا عندهم مجموعة كبيره ماشاءالله وسعره ب1.750 د.ك ارخص مكان لي الحين الاغلب يبيعه ب3 وفوق ..

عنوانهم :

الشعب البحري ,ق8 ,شارع بن سلام ,عمارة 42 الدور الاول ..

ALSHAAB ALBAHRY - BLOCK 8 ,BIN SALLAM ST , BLDNG 42 1ST FLOOR .
TEL #:22665737. 99433222.
 
FB : LINK

مادري احس حدي مستانسه ودي الفح ودي ايبب خخخ..
Labels: , , , , | 24 comments
Sunday, January 9, 2011

postheadericon Smarties

9:15 PM
السلام عليكم ..

قبل فتره كنت بلولو هايبر وشريت هالكيك وكان في نوعين بعد اكبر ونوع بس 1 بروحها ..

خذيت الوحده وبقدرة قادر اختفت :\

و زين لقيت ال2 ماتصادر خخخ..



كعكتي ..
 ومصوره بعد مالت سمسم خخ ..
وهذي مالتي من داخل ..
رايي فيه :

طعم الكيك زين بس ماحبيت الحبوب اللي دخل كليت نصها وخليتها :\
بس اختي عجبها ..
Labels: | 14 comments
Saturday, January 8, 2011

postheadericon جديد هارديز (تشيلي فرايز)

3:53 PM
السلام عليكم ..

قبل جم يوم شفت اعلان هاريز وكان عن هالبطاط ..

وغرامي البطاط ومع الجبن بعد يصير يمي يمي ..

اليوم طلبت غداي منهم ..



طلع مو اللي بالي كالعاده اتوقع شي حلو وانصدم خخخ ..
 الجبن والصلصة مع اني قلت لهم  مابيه ..

2 صدمة الجبن صغيرون ماتوقعته جذي جنه حالفين عليه :\

كا الصلصه المرزوز بدون دعوه :\ خخ اهي شنو بالضبط ؟ انا حسبالي لحم وطعمها جنه فول :\

وكاهو عقب الخلط :

سعره 800 ..

رقم هارديز بكتبه لانه كله انساه 1888333

رايي :

الحمدالله زين صج متوقعته الذ , بس ماشي الحال بس للحين احلى بطاط مع الجبن كليته بقريت ستيك ..
Labels: | 30 comments
Friday, January 7, 2011

postheadericon واخيرا لقيت بطاطسي :p

1:14 PM
السلام عليكم ..

تذكرون قبل جم يوم كنت ادور هالبطاط وسالتكم عنه (هني) ودليتوني على اكثر من مكان ..

رحت لولو هايبر مالقيته :(

قلتولي بالرقه ماقدر اروح لها بعيده وماادلها :\

واخوي ناقد سياسي قالي انه موجود بالقصور بس هم بعيده علي :( بس رفيجتي راحت ويابت لي وناسه خخ..

بس لحظه انا الفت الظاهر وقلت فرع قطعه 3 وطلع صح خخخ  اشوه ..

وماحطيت لك جيس لانه مالي اخر واحد 2 شي لانه توصيه :p

وامس وصلي :)


 كاهو حلاته ..
ماشاءالله يحتفلون بمرور 27 سنه عليه ..


منقوووله :p

وهذا طعمه ماتغير ..

مستانسه اني لقيته ومشكوره وايد لولو :*
Labels: , , | 33 comments
Thursday, January 6, 2011

postheadericon No7 Quick Thinking 4 in 1

11:34 AM
من زمان ماحطيت شي عن تجاربي البيوتيه ..

واليوم بقولكم عن منتج استخدمه الحين اسمه ..

No7 Quick Thinking 4 in 1

اهو كلنيكس (مناديل) للويه 4 في 1 ..

يستخدم كمنظف وتونر ومرطب للبشره + انه مزيل لمكياج العين ..


انا استخدمه اذامستعيله و ماعندي وقت بدال عبالة الغسول والماي وعقب التونر والقطن بعدين التدهن بالمرطب اختصر كل هالخطوات باستخدامي له ..


ينفع لكل انواع البشره حسب ماهو مذكور عليه ..


موجود ببوتس..


وسعره تقريبا 3,250 د.ك ..


رايي فيه :


مثل ماقلت فوق حلو للاستخدام السريع باوقات الازمات وحلو بعد اذا كنت برا البيت سواء بالدوام ولا طالعه بدال لا اخذ كل عدتي اخذه اهو وحمايه بس , رطب مو بسرعه ينشف اهو للويه وانا امسح فيه ويهي عقب امسح ريولي احلله ههه , وعجبني طريقة تغليفه وانه يتسكر ويتبطل بكل سهوله والاهم انه مغطين الفتحة ببلاستيك بحيث مايحوشه الهوا لانها ماتخترب مو مثل لما يحطون قرطاس بسرعه تتعكف وتتعفس وتخترب ..


Labels: , | 16 comments
Wednesday, January 5, 2011

postheadericon Lulu Gift Boutique

9:25 PM
السلام عليكم..

اصعب شي بالنسبه لي اشتري هديه لانه مو كلشي ابالي احصله ومو كلشي اقدر اضبطه وونادر يعجبني شي :\

ورفيجتي لي توهقت ادور شي ينحط عليها اسمها او حرفها ادري هالشي بيخلي الشغله وااو بعيونها صارلي سنين اتبع هالخطه خخخ ..

وانا احوس لقيت هالسوالف حبيتهم فلما توهقت معرفت شيب قلت ماكو الا اطلب منها ..

وطلبت حدده حده اهو مفروض اسبوعين قبل المناسبه انا طلبت قبل تقريبا 10 ايام واهي ماقصرت خلصت لي اياها ابجر بعد تقريبا بحدود الاسبوع كانت عندي ..

براويكم نماين من شغلها ..

طخم لمعاريس :)
النوع الاول :
النوع ال2 ..


وطخم فردي :

وفي بس روب :
وفي طخم فوط ..


وفي طخم لبيبي بعد حلاتهم والله ..
 طبعا انتوا تختارون اللون لفوط ولون التطريز ..

وعلى اساساه يكون التغليف ..


ماتوقعته ايالي جذي انا كنت ادري بيلي زاهب بس ماتوقعت انه بيحطون نفس الكرت عليه الظاهر يدرون انه عندي عقده من الكروت خخخ..
سايتها :link ..

رايي :

عجبني الشغل من الى يعني من مجاميعو ع قولتهم , وحبيت انه جاهز مايبله عبالة تغليف بعد , واهي وايد محترمه وانا ويد طنقرت عليها خخ بس قدرت تهديني مادري علامي هالسنه صايره طناقر :\

وحتى المندوب زين ماشاءالله مو من النوع الغثيث اللي رنه ويسكر بويهج ..

والحمدالله عجبت سوسو :)
Labels: , , | 26 comments
Tuesday, January 4, 2011

postheadericon كل عام وانتي بخير سوسو صديقتي الصدوقة (كوكتيل)

7:20 PM
اليوم شنو؟

بالنسبه لي يوم مهم لانه يوم مولد اعز صديقاتي مو اي صديقه اهي اختي الرابعه :*

من قبل عيد ميلادها باقل من شهر اتعب ويصكني رهاق افكر شيب لها وشسوي لها بهاليوم ..

العام مااحتفلت فيها الا بهديه هالسنه وانا امس اجهز طر بالي اسويلها مفاجاءه بالدوام << اللي احب يسون لي اطبق عليهم خخ مو نغزه عيد ميلادي هالسنه والسنه اليايه كله عطلة :p

رحت شريت الكيكة قبلها بيوم فمامداني اسوي اوردر خاص ..

قلت بخشها بالصوب ال2 ولما مريت سمعت حسها سالت المراسل اهي وين اشار ع المكان اللي خفت تكون موجوده فيه المكن اللي بخش فيه كيكه  !

جان احط الكيكة بالممر جبال المراسل ودشيت اغني عادي جنه الوضع طبيعي  وقدرت اصرفها عادي وخشيت الكيكة مثل ماخططت وعقب شغلنا وصيت البنات يضبطون الكيكه ع ما الهيها شوي خخ..

بس جكتنا :\ كالعاده خخ لا والشمع اقل من 5 دقايق ذاب وخرب الكيكة ناديتها تلحق عليه :\



وعقب طلعنا وعطيتها الهديه كنت خاشتها بسيارتنا ..

ورحنا انا واهي واختها شرق نتريق واختها اختارت هالكافيه  لامارينا ..

وهذا المنظر اللي جبالنا ..
 المنيو ..

فطور عربي ..

كلوب ساندويتش ..
 اومليت ..
والحمدالله الاكل زين ..

بالعافيه علينا :)

وكل عام وانتي بخير ..
كل عام وانتي الله الله اقرب..
 ويارب تكون سنة خير عليج  ..

cha cha cha :@

نسيت اقول اهي المدونه كوكتيل
Labels: , , | 30 comments
Monday, January 3, 2011

postheadericon bb :p

10:44 PM

واخيرا واكبت التطور والتكنولوجيا وخذيت لي بي بي ..

كنت محتاره بينه وبين جالكسي قالولي القرقه والحش حلاته بي بي اما الجالكسي حلو للي يحبون العاب ..

وانا ماخذته القرقه خخخ ماحب العاب ..

مدمد ابشرج 24 ساعه بتبتلشين فيني :p

وخذيت لي كفرين بس :(

واحد ع سبونجي وال2 لونه يشوق ربل كنت ابي فوشي ماكو :(

وابي قروبات بناتيه حلوه فيها خرابيطي اللي احبها ؟ هلب مي :)
Labels: , | 34 comments
Sunday, January 2, 2011

postheadericon جرد @@

1:09 PM
السلام عليكم ..

امس سويت جرد لخرابيطي الجميله في شغلات انقطت وفي شغلات انفقدت :(

واحس ماعندي شي :\بنفس الوقت احس انه مو محتاجه شي :\

صورتهم عشان اعرف شنو عندي وشنو ناقصني واكتشفت انه مو ناقصني شي خخ بس ابي اشتري :(

اول شي صابوني :


من باث ند بودي ورك حصيلتي مجموعة الجبنيز جنه اسمه جذي هذا اكثر شي حبيته عندهم اما الكريم اللي نوع 2 اخترته ع ابو انه فري قلت بجرب نوع يديد كنت ابي دارك اللي مجربته مدمد بس ماحصلته , اللي تبي شي من باث اند بدي ورك تروح فرع المارينا احسن من لافنيوو كلشي فيه عكس الافنيو كلشي مخلص :(

الجاي الاخضر المجموعه من بوتس وناقصها التونيك مادري وينه :\ واللي بالصوره غسول واللي جنه حمره هذ للنفر بس يديد ماجربته , والكلينكس من بدي شوب ..

جربت الغسول والتونر يمكن 3 يام نشفوا ويهيييييي بشكل قوي اللي قام يحرقني ويحكني :( ومن قبل كنت مجربه سنفرة الجاي الاخضر من بودي شوب هم نشف ويهي :\

 كريمات لايدي :
البرتقالي ست من سالي هانسن معاهم بعد مقوي للاظافر وقفزات وجنه مبرد  جربته اسبوع تقريبا وحبيته ومادري شصار اللي خليته بس برد له ان شاءالله..
اللي جنه ريحة (عطر) منعم ومعطر للايد من بوعابد احب ريحته ..

كريمات لقاعة ريلي وسنفرات والخضرا بودره والابيض ستيك والازرق سبري , ماصورت جم شغله موجودين بالحمام وانتوا بكرامه اهما الجل والسنفره ..
 شامبوات وبلسم ..

هالزيوت كودت منهم وايد وماستخدمتهم بس الحين مابيهم لانه شتا مالي خلق اتيمد , وحاليا استخدم شامبوهم و هم حمام زيت بس اذا لي خلق احط الحمام :)
 شامبو البيض عجبني ليش مادري خخخ قلت اذ ماطلع زين بغسل فيه الحمام وانتوا بكرامه واللي يمه سبريه معطر للشعر , ونسيت اصور امبولات ايفا :\
 سنفره وبودر ومسك القرشي نوعين سائل وجامد ..
المفقود بودرت جونسون صغار وكلونيا :\
 خرابيط لجسمي سنفره وجل كنت بخلطه مع كريم اساسا لجسمي وحبيته :) استخدمته لحفله بس مع اضافه , والصفر زبدة الشيا ..

لويهي الجميل ..
كريمات مرطبه بلون مع حمايه من 2سيفورا وستيلا ومن 2 بيوتي بار , وكريم ليل من روك لمشاكل البشره الدهنيه , و المدورين كريمات لويهي مرطبه وللي من المرز هم فيه جنه حمايه واللي فوق بالنص يم البرتقالي هذا مرطب من بوتس..
 كريم وجل للعين ملوت اختي بس انا استخدمتهم :)

اول 2 من اليسار من رفيجاتي بالدوام جربت اللي بالمرز زوين وال2 نسيت شنو فايدته وطريقته بسأل اللي يابت لي :) والسبري خذيت من بوتس جنه لبعد الواكس بس ماستخدمته ومدد قلت لي انه زين واللي ع طرف كريم الليزر مالنا انا واختي ..
 لبراتمي :
احس ناقصين بس اللي ذكره ناقصين السنفرت 3 وحده من بيوتي سيدز وسيفور ولاش ..
 مجموعتين لويهي :
من لوريال ناقصها الغسول بالحمام وانتوا بكرامه ..

ومن كلينك ناقصها الغسول والسنفره هم بالحمام وانتوا بكرامه و وخلص المرطب انا ماحبيته بس اختي استخدمته وعجبها و كريم العين انتهت صلاحيته , اختي شرت يدد منهم توه الشهر اللي فات ..

 الابيض الكبير خذيته لما ويهي حرقني من مجموعة الجاي الاخضر اهو نفس ماي ترشينه بس استغليته خخخ كنت ابي مال ايفيان ماحصلته :\ واللي جنه قلم معقم وصابون سائل اسبونجي و خلطة جربتها شهر ماحبيتها وايد ماستفدرت شي منها :\


ماسكات اللي فوق لويهي ناقصهم وايد من كوريا وهم مال نيفيا واحد رفيجتي يابت لي مع سيرم مادري وينه :( هذا غير اللي ناسيتهم ..
واللي تحت الجيس ماسك مغربي للويه جنه والشعر , واللي يمه للريول ..
وي بس جنه شويه :\

بس اللي يريحني انه مو مصوره كل شي بجي صابون مغربي وفوم وماسك للجسم  والسنفرات هذا اللي اذكره بالحمام وانتوا بكرامه :\ وفي كريمات للجسم مختفيه :\

وست تبيض الايد مال اختي بس بخشه بداري واستخدمه معاها ..

وجم طخم كريمات وسنفره وصابون قلت لكم عنهم من قبل هون و هون ..

يارب اخلصهم وينفعوني خاطري بشغلات يدد ..

امم ميمه شفتي ماعندي وايد اغراض وانتي مره قلتي بتشوفينهم كاهم شرايج ؟
Labels: , , , | 45 comments
Saturday, January 1, 2011

postheadericon 3d drawing pad

2:55 PM
السلام عليكم..

امس كنت اسوي جوله بالنت ادور افكار ليوم ميلاد رفيجتي بعد جم يوم ان شاءلله ..

عاد لقيت هالنوت كلش ماتوقعت انه الـ 3d بيوصل لنا بهالبساطه :)


صوره توضح فكرته ..

باختصار فكرته انك ترسم رسمه او تكتب كلمه عاديه ع الدفتر وبمجرد ماتلبس النظره بتشوفها ثلاثية ابعاد ..

احس حلو للي يحبون الرسم :)

فيديو بس مو توضيحي : p (هني)

وين تحصلونه ؟؟

برا الكويت (هني)

بالكويت (هني)

فرق السعر :p
Labels: | 16 comments
Friday, December 31, 2010

postheadericon The best & worst of 2010

1:30 PM
اليوم اخر يوم ب2010 يعني باجي شهر وشي ع يوم ميلادي خخخخخ مادري شسوي فيه من الحين اخطط افكاركم بليز :)

طبعا 2010 مثل اي سنه فيها شغلات مميزه وشغلات سيئة حبيت اسوي استفتاء بسيط للاحسن والاسوء :

1: احسن فيلم ؟ اغلب الافلام الهنديه حبيت وهبيت فيها هالسنه مثل ماي نيم از خان , هم حبيت السينما السداسيه الابعاد كسينما وامكانيات مو فيلم..
اسوء فيلم ؟ هم وايد مثل 3 يشتغلونها , الصلاة والحب والبلعه .. الخ

2- احسن اغنية ؟مرت سنه , هذا انا
اسوء اغنية ؟ماذكر لانه ماسمع اغاني وايد واذا سمعت اعلق عليها..

3- احسن اعلان ؟نبي عيديه مال بنك الوطني,دعاية الوطنيه اللي برمضان , دعاية اسنان الجزء ال2 اللي تحر اللي خطبها خخ.. 
اسوء اعلان ؟اعلانات اذاعة لمارينا :\

4- احسن رواية او كتاب ؟القلادة اياها لسارة الميكمي
اسوء رواية او كتاب ؟ كتابين لمدونين معانا اخاف يزعلون لي قلت شنو هما :p

6- احسن مسلسل ؟امم يمكن عايزه اتجوز ماتابع وايد:\
اسوء مسلسل ؟ اميمه في دار الايتام..

ودي اقول احسن كريم وسبا بس احس ذاكرتي اندثرت خخخ بس بيمع المعلونات ببوست خاص ان شاءالله ..

واهم شي اسوء واحسن انجاز سويتوه ب2010 ؟
الحمدلله 2010 كنت سنه خفيفه صج روتينيه وطويله بس مافيها احداث سيئة ومقارنة ب2009 تهبل 2010..
الاحسن انه سويت شغله كنت بسويها او بالاحرى بلشت فيها لم كنت بالثانويه عمري 15 سنه ب2003 هالسنه كملتها وان شاءالله ب2011 تخلص يارب متشوقه اشوف النتيجة ..
وامنياتكم ب2011 ومخاوفكم منها ؟؟

اتمنى اشوف نتيجة حلوه للشغله اللي فوق :)
ويكبر حظي ..
اذا تعدل وقام عزالله كل شي ابيه صار والله كريم :)
ودي اضعف واصير تحت الوزن المثالي بس الاغلب يقولي مو حلو :(يعني ابيه 50 وانا حاليا 57 :\
شخاف منه ماكو الله كريم ويخليها سنه حلوه علينا وعليكم يارب..


وبس كل عام وانتوا بخير :)

ودوركم جابوا :)
Labels: , | 34 comments
Subscribe to: Posts (Atom)

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

انستغرام المدونة (roroalk)

follow me

follow me

My Blog List

Show All

Ads

Meenakon Design Templates