Saturday, December 27, 2014
![](http://img811.imageshack.us/img811/8549/postdateiconmx.png)
....
وعقب عطاني مجموعه فحوصات اسويها مثل تحليل دم وقاسوا وزني ودقات القلب والضغط وغيره وزني صار ٥٠ ..
خلصت قالت تتصل تقولي موعدي طبعا نستني وانا اتصلت وطلع موعدي ٢٢/٦/٢٠١٤ الساعه ٨ الصبح ! قلت لها دوام حشى خخ بس تصدقون احسن مبجر ..
قالولي قبلها بيومين مااكل شي بس اشرب سوائل واتصلوا علي قبل ٣ ايام يذكروني جان اقولها عاد توني قايله لهم يسون غدا خخ كسرت خاطرها قالت بس هذا وعقب حولي سوائل ..
*العمليه ..
وصار يوم العمليه الحين قاعد اكتب واحس قلبي يرقع يومها مانمت وقعدت طول الليل الهي عمري بسوالف البيوتي تسبحت وسويت فيشل لويهي ودهنت رويلاتي و صورت بطني ! اكثر شي كنت احاتيه الجروح واثارهم ! وقعدت اسولف مع رفيجتي الكلوز وهم كانت وايد تحاتيني بعد عمري وماقلت لها متى عمليتي بالضبط لانه ادري بلقاها بالمستشفى قبلي ولما اكسرت خاطري قلت لها ١٠ اخلص !
وهم ع حظي عشان يمر الوقت حطوا الحلقه الاخيره من نساء حائرات الجزء ال٢ فتابعتها ..
عقب الساعه ٥ الفير طلعت من بيتنا مريت اختي الكبيره وكانت اهي مرافقتي ..
امي ماكانت تدري متى موعد عمليتي ماقلت لها لانها تحاتي!
المهم وصلنا المستشفى سويت اجراءات الدخول خلصت رحت غرفتي كانت رقم ٨٠٣ بالدور ال٨ ..
تنحت الا ابي اقيس وزني وطولي حسبالي ضعفت بعد بس طلع لا وزني ٥٠ ..
وبدلت ونظفوا بطني و قعدت احوس اصور سلفي واختي متوتره وتزفني بس انا عادي اضحك ماكنت حاسه بشي وكنت حدي متفائله ..
يا دكتور الجناح خذا بياناتي و سالني تدخنين ؟! هذا السؤال اللي اذكره جان اضحك واقوله من صجك هالسؤال! قال شي روتيني !
المهم قالي توافقين بحالة صارت مضاعفات بالعمليه يشقون بطنج هذا انا اللي فهمته قلت لا ابد !
المهم جريب ال٨ نزلوني غرفه العمليات وانا اوصي اختي مو تنسين حجابي عقب العمليه دخلوني اسمع حس اختي تقولي مع السلامه ومبين صوتها بتبجي اهني عورني قلبي ..
حطولي ويرات وايد بجسمي وشغلات ماذكر شنو بالضبط بس انا كنت منتبهه ع الساعه!
صارت ٨.٣٥ وماسولي العمليه ؟! يالي د. باسل ويقولي انا اول مره اشوف مريضه ماترضى انه نساعدها اذا تطلب الامر ؟ قصده عن شق بطني قلت دكتور جان يقول بالحاله القصوى ونكتب هالشي هني قلت اوكي! #اقنعني اهو ماشاءالله جنتل وذوق وذرب ..
وعقب ما اذكر شي ...... لي ساعه ١ وشي الظهر فتحت عيوني مكاني متغير واسمع صوت البنات يونون ! وانا بالي مع الساعه لي الحين خخ لاحظت اخر شي افكر فيه قبل لا ادوخ من البنج اهو اللي افكر فيه اول شي ! يالي واحد من الطاقم الطبي مادري اهو منو ولا شنو وظيفته يناديني جنه جان اقوله ال ساااااااع ه ج م ؟! لساني كان حده ثقيل ! الترجمه اسأله الساعه جم؟
وماكنت الرؤيه واضحه عندي كنت اشوف العقرب الصغير بس الكبير لا وكانت الساعه ١ وشي..
ومااحس الا بشي شاد ساقي ! حسبالي ملبسيني دلاغ العائله خخ طلع جهاز يحرك الدم عشان مايتجلط ..
حركوا كرفايتي ودوني لي الباب ولقيت كرفايه ٢ قالوا روحي له طلعت ولا اشوف اختي ورفيجتي وحجابي !
وعقب حجابي ع ويهي وحده تغطيه وال٢ تطلعه !
لي الحين الوضع اوكي ريحت شوي عقب قلت بصلي ودوني لي الحمام وانتوا بكرامه جان تعطيني السستر بربيش !
هذا شنو قالت ديري بالج عليه ! لايك يور بيبي !
انا لي الحين مو مستوعبه هذا وين حاطينه بالضبط طلع بخاصرتي!
والستتر اتيينن ماشاءالله كنت اتيدد /اتوضى واهي تساعدني وعقب قالولي صلي وانتي قاعده يت بقعد ماوصلت للكرسي جان يشب جسمي علي عوار مو طبيعي ماقدر اقعد جان ابجي مو بجي عادي هسترت شلون ماقدر اقعد شلون اصلي ! ودوني صوب الكرفايه هم بقعد ماقدرت ورديت بجيت الوضع كان مزري استغفرالله جان يلفون فيني الكرفايه لي صوب الجبله وخلوني اصلي وانا منسدحه #عسى الله يتقبل ..
ماذكر اذا صار شي ضروري ينذكر بهاليوم ! غير انه خواتي ورفيجاتي الكلوز مروني ..
٢ يوم بلشت اللوعه والترجيع ! وبالليل مادري شاللي خلاني ارفع التيشرت واشوف العمليه كان بطني متروس بلاسترات وشاش! ونفسيتي اتعبت!
٣ يوم حاولوا يشربوني عصير تفاح جنه ١٥ مل كل نص ساعه جنه ! مرات ارجعه ومرات لا بس الماي لا كله ارجعه فخلوني اغيره اخذ ماي املاحه اقل ..
بالليل يو خذوني ودوني لي غرفه الاشعه وسويت اشعه اللي نشرب سائل ! طبعا مال الاشعه صرقعني يقولي وانتي منسدحه بنوقف الحديده اللي اهي الكرفايه اللي منسدحه ونخليج توقفين ! وقضبي عدل المسكه !
وانا بايد قاضبه المسكه وبيد ال٢ شايله البربيش واقول واالله ماتسويها شنو قطار الموت !
ونزلت وعدلوها جان اوقف ! واختي تنكت وانا اضحك ! والضحك يعور ! فخليت اختي تطلع من الغرفه ..
المهم طلع المرئ لي الحين وارم عقب العمليه وقالي الدكتور مساله وقت وخلاهم يشيلون البربيش !
كنت خايف لي شالوه يعورني بس الحمدالله سهالات حسيت بشي ينسحب بس عادي والدكتور اللي شاله كان مرح فلهاني بعد ومجرد ماقالهم د. باسل شيلو البريش استانست لانه معناتها هانت ..
٢ يوم الصبح قبل لا اترخص ياللي د. باسل وجيك ع الجروح وغير البلاستر ورخصوني لانه الحمدالله كلشي كان اوكي ..
وقالي لا تقعدين باماكن حاره عشان ماتلتهب الجروح ولا يعرق السر وصفلي ادول اليهال و شراب للمعده نسيت اسمه اهو ينشرب كل ١٢ ساعه انا حسبالي عند اللزوم يعني اذا حاشني حارج فمااهتميت ..
رديت البيت اميمتي بالليالله تمشي اول ماشفتني
فزت من كرسي وانا حاولت اسرع وقلبنها دراما (ببجي)
وبعد عمري مزهبه لي الدار وحاطه لي الكرفايه الطبيه والعصر قعدت من النوم جان القاها خلصت الصلاه وقاعده ع القنفه تطالعني ! بالليل انا نايمه اقوم القاها نايمه ع القنفه ! انزين يما انا تعبانه وانتي تعبانه ليش تزيدين تعبج ؟!
(حبيبتي ) هددتها اذا ماراحت دارها انا بطلع جان تقول لا لا خلاص بطلع ،.
واول يوم كنت امشي بالبيت اهما الدكاتره موصيني امشي جان ارجع فجاءه !
عقب ٢ يوم قعدت من النوم ع ماي يطلع بغزاره من خشمي !
شالسالفه ؟!
* الاكل ..
وعقب صار رمضان نسيت اقولكم نظام الاكل عقب العمليه اول اسبوع سوائل خفيفه وعقب سوائل عاديه وعقب اذا اوكي تحولون ع الاكل المهروس يعني دور الاسبوع (٢اسبوع) وعقب اكل العادي..
طبعا الاكل يكون شوي شوي ومضغ اللقمه عدل لين تذوب ..
وتقسيمه ع كميات صغيره يكون افضل ..
ونفس الشي بالنسبه للسوائل اشرب شوي شوي ..
وبدا الشهر المبروك وحالتي الحمدالله اوك صج دخت مره او مرتين بس عادي مو الدوخه الجايده ..
اول يومين ماكنت صايمه عقب ٣يوم واهو اللي يصادف تقريبا ١٠ يوم من العمليه واسبوع ع طلعتي من المستشفى كان موعدي الاول بالطبيب رحت كلشي اوكي جيك ع جروحي مو ملتهبه الحمدالله وشال البلاستر قال ماله داعي وقالي اذا الوضع تم ع جذي حولي ع الاكل المهروس مثل النخي هرسي والهريس واليريش وبطاط مفيوح والبرد الحين عادي اذا برد موز كي دي دي اول اسبوع ماكان مسموح..
باسبوع السوائل اللي اهو الاسبوع الاول كنت اشرب سوائل خفيفه مثل الماي وعصير التفاح ونسيت شنو من العصاير اللي تكون اقرب للماي مو الدسمه وحليب ولبن كلهم خالي الدسم و برد التوت والبرتقال من كي دي دي اللي جنه بس ماي وشكر ..
و عطاني ادويه للمعده واهي حبوب اخذها قبل الاكل بنص ساعه و صفلي مرهم لجروحي ..
وهالحجي جنه يوم الاثنين او الثلاثا بنص الاسبوع كان ..
وعقب لما اتفطر كنت اكل شويه شويه حيييييل شي لا يذكر بس كنت اقوم لانه احس بلوعه وافتر وافتر جود تخف ! والحمدالله كانت تخف حسبالي من الادوا ؟! جان اوقفه مع انه كنت مستفيده من النص الساعه اقرا فيها قرآن :/
ع يوم السبت او الاحد كليت بطاطه وحده من بفك حار نار شي جذي اسمه وكنت مذوبتها بحلجي ! حسيت اول ماوصلت بلاعيمي جنه انفجار صار بجسمي !
رحت الحمام وانتو بكرامه ماوعيت الا انا مرجعه !
واي لا نفسيتي انعفست كنت قاعده مع خواتي بالغبقه جان اقوم واقعد بروحي (هذا طبعي اذا تضايقت ) ..
نسيت اقولكم من سويت العمليه الحمدالله ماقمت ارجع وانا نايمه اوكي اقوم لي الحمام انتوا بكرامه اقدر اوصل ..
بس ما انسى هاليوم ب٧/٧ قعدت من عز نومي بسبت كابوس كنت حلمانه اني قاعده بحوش بيت يرانه /جيرانا واتل /اسحب خصل شعر من حلجي وكانوا خصلتين الاولى سحبته بصعوبه وال٢ سهالات و قعدت من النوم ع طول رجعت !
رحت موعدي ال٢ بلشت ارد ارجع بس اللي اذكره مو بقوه وكنت قبلها رايحه الصالحيه فارته كله ماشاءالله وحالتي اوك رحت للدكتور انصدم انه لي الحين ارجع قالي العاده اللي مثل حالتج مايرجعون ووصلوا مرحله الاكل العادي انتي شلون لي الحين سوائل مو معبره عليها ! اهو يا في ماي متيمع دار مدار المرئ او العضله مارتخت وهالشي يبين من الاشعه اذا ماي نسحبه واذا شاده العضله مسائله وقت لي عقب العيد اذا ماتعدل وضعج نسويلج نفخه وكان باجي ع العيد اسبوعين..
رحت سويت اشعه وعطيت الرسبشن السي دي مال النتيجه قالت الدكتور يتصل عليج يقولج النتيجه عقب يوم او ٢ اتصل قال الحمدالله مافي ماي والعضله شاده ..
وحالتي من سئ لاسوء ..
الترجيع رد مثل قبل + اتعب وايد من الماي و هبيت بالشربت /الفيمتو وكنت ارجعه بسرعه وبقوه قلت لاهلي وخروه عني بس اروح ادوره ابيه مع اني قاطعته من ١٠ سنين ! لانه لما كنت بالجامعه اذا تفطرت برمضان وشربت الڤيمتو انغث ماقدر اكل واذا كليت لقمه احس ماتحدر مافي مكان لها وهالحزه ماكنت مريضه بعدي ..
جربت ماي زمزم هم مافي فايده !
شصار بعد ! قدرت اكل ؟!
يتبع !
ولمعاناه بقية ...
ماقريت شكاتبه لانه نفسيا مابي اذكر فطوفوا البدليات ..
Friday, November 14, 2014
![](http://img811.imageshack.us/img811/8549/postdateiconmx.png)
السلام ..
اليوم حابه اتكلم عن هالكبت ..
اهو منظره كبيره تتبطل ومن داخل في ارفف وعلاليق للاكسسورات ..
اول شي من فوق ع اليسار للخواتم ..
تحته للسلاسل والقلوب /العقود ..
بعدين كله ارفف لشنو مادري !
وعقب درجين صغار ..
من يسار للتراجي ..
عقب علاق غريب انا خليته لاساوري ..
عقب نفس علاليق القلوب بس ع اصغر ..
سعره :
شي و٢٠
وحصلته بسيتي ستارز عقب رخصوه وصار بالتعش .،
رايي:
كفكره حلو ٢ في ١ منظره وكبت بنفس الوقت فما يحتاج مساحه ..
بس كاستخدام ماعجبني ..
احسن شي مكان الخواتم اما القلوب والباجي مايكفي من اول مااستخدمته ماتسكر هذا واغراضي اقل من الحين بعد !
عقب عادي القى الشغله طايحه ! وانكسرت ترجيه وع طاري التراجي مكانهم مو عملي مايثبتون التراجي العادي تثبت التراجي اللي حديدتها من ورا معكوفه :/
الارفف والادرج وخصوصا الادرج مايكفون شي كنت بحط فيهم بوكسات شانيل ماكافوا !
ماانصح فيه الا للي اغراضها شويه !
عنوان سيتي ستارز :
افرعه:
الجهرا واحد من المجمعات اللي جبال جمعية الجهرا القديمة ..
الفروانية :بسرداب مجمع الهدى ش حبيب يم مجمع المغاتير وجبال الجمعية
حولي : ش تونس ، برشا مول يم دوار صادق
العقيلة : سرداب مجمع الدرة ق4 يم البيرق ..
الري الدائري الرابع صوب المشاتل وبسطرت دريم مول ولولو هايبر وماكس .. الخ وبسرداب سيتي ستارز مول
Sunday, November 9, 2014
![](http://img811.imageshack.us/img811/8549/postdateiconmx.png)
الله يتمم علي هالنشاط خخ ..
اليوم بتكلم عن صبغي المفضل لهالسنه ..
اول شي خذيت منه ٣ الوان لاني ماحب المات وايد قلت اجربهم ..
اخترت اللي بالصوره تحت ع اليسار الاحمر والفوشي ورمادي لونه غريب ..
جربتهم وعجبوني جان اخذ المجموعه اللي بالصوره اللي فوق سماوي وكحلي وبنفسجي واسود واخضر ..
تجربتي ..
الاحمر عشقي الازلي وعادي احطه كل يوم ❤️ الفوشي هم احبه ولما ضاع تضايقت ..
البنفسجي ماحبيته بروحه استخدمته مع صبغ رفلون اللي فيه لمعه والنتيجه عجبتني احلى من الصبغ بروح حتى رفلون بروحه ماعجبني :/ لانه خفيف ..
الرمادي والسماوي لونهم غريب ..
والباجي ماجربتهم الصراحه ..
سعره :
٧٥٠ فلس ..
متوفر ب سيتي ستارز ..
وهذا عنوانه ..
افرع سيتي ستارز :
الجهرا واحد من المجمعات اللي جبال جمعية الجهرا القديمة ..
الفروانية :بسرداب مجمع الهدى ش حبيب يم مجمع المغاتير وجبال الجمعية
حولي : ش تونس ، برشا مول يم دوار صادق
العقيلة : سرداب مجمع الدرة ق4 يم البيرق ..
الري الدائري الرابع صوب المشاتل وبسطرت دريم مول ولولو هايبر وماكس .. الخ وبسرداب سيتي ستارز مول
رايي :
ساعات طبقه وحده اكتفي فيها الوانه مميزه مرات احسه بالليل او ٢ يوم تقشر ع الطرف شوي فاجدده وماحسيت يطول يالله ينشف بالعكس زين ..
باختصار
احبه احبه احبه ..
انا كنت ماحب الاصباغ المات بس هذا غير بالنسبه لي ❤️
Saturday, November 8, 2014
![](http://img811.imageshack.us/img811/8549/postdateiconmx.png)
من زمان مانزلت بوست اكل نظرا لظروفي الصحيه ..
بس مو معناتها ماجربت شي ..
لا وايد جربنا شغلات من الانستغرام لانه ادارتي اليديده نحب نحتفل المهم ..
من الشغلات اللي جربناها وكررناها يمكن ٣ او ٤ مرات تقريبا جربنا اغلب منتجاتهم اهما @dishes_kw
*طلباتنا:
بكتبهم كلهم مره وحده لانه الانواع تكرر ..
- رولات الراب بحشوات مختلفه (خلطة اللبنه ،خلطة الجبن ، بطاط بالاجار ، مشروم وذره مع كريمه )
-ديناميت كيك
واهي كيكة ككاو ..
-حليب بالفستق ❤️
_حليب الورد ..
-سلطة الجرجير ..
الاسعار مومتاكده منها :
بس الراب جنه ب١٠ دك جنه ٤ درازن المهم كميته راهيه ماشاءالله وحجمه زين مو ميني ..
الكيكه جنه بعد ب١٠ ..
السلطه اعتقد ٨ ..
الحليب اهو الوحيد اللي متاكده من سعره اهو ب٦ ..
رايي :
كشكل مرتب ماشاءالله ..
الكميه راهيه ..
الطعم :
الرولات زينه واقوى نوع بالنسبه لنا المشروم والذره مع الكريمه دايم اهو اول واحد نخلصه ماشاءالله..
بس بارده مو حاره ..
السلطه ماذقتها لانه مااكل جرجير ..
الكيكه انا عندي عاديه وثقيله (انا مريضه ولما ذقتها كنت بعز مرضي قبل لا اعالج فوضعي غير عن الباجي) بس احب ككاوه اللي ع الطرف منكت اقولهم ابيه وبس خخ ..بس البنات عجبتهم ووحده سالتني شسمها قلت ديناميت قالت صج ديناميت فجرت فينا خخ صارت دعايه 😁
حليب بالورد زين ولونه يشوق وردي بس اللي بالفستق غرامي احبه من اول مره جربته ومره ٢ خليتهم يطلبون بطل مخصوص عشاني 😁 بس اعتقد اغلب البنات عجبهم اللي بالورد اكثر واحسن لي عشان استفرد بالفستق خخ ..
واهم شي انه يوصلنا حار ..
الخدمه :
ماجربت انا اطلب منهم العاده تطلب وحده من البنات بس جنه يرطنون مو متاكده 😁
اما التوصيل ؛
اللي اشوفه زين وخصوصا انه الاكل ايي مرتب والحليب حار ماشاءالله ..
وهذا اكاونتهم بالانستغرام @dishes_kw
Friday, November 7, 2014
![](http://img811.imageshack.us/img811/8549/postdateiconmx.png)
هالو ❤️
هالفتره شركة حبشي وشلهوب مسوين اوت لت لd&g بالحمرا تاور ..
*مدته:
ابتداء من ٤الى ٨ نوفمبر ..
ومن الساعه ١٠ لي ساعه ١٠ ..
وموفرين بضاعه متنوعه رجاليه ونسائيه ..
النسائيه جناط وبواك ..
اسعارهم :
تتراوح مابين ١٥٠ لي ١٧٥ دك ..
البضاعه ؟!
في اغلب الموديلات بس من الكلاسيك ماكان في الا وحده حمرا وبسرعه خلصت بعد :/ التايغر ماكان في الا وحده رماديه وشوبينغ باغ ووايد كبيره :/
وفي بعد كلاتش للحفلات وفي جناط مكياج وبواكه ..
عجبتني هذي بس كبيره علي بس في اصغر منها جم حجم وبالوان مختلفه احمر وبيج اكثر من درجه وخضرا ..
اسعارهم :
من ٣٠ الى ٥٠ دك ..
وفي بعد بالنص ستاندين للهدوم في جاكيتات دانتيل سمت واحد اسود ب١٧٥ بس قصته مو لايقه علي :/ وفي نفانيف سهره ماشفت بجم !
اما قسم الرجالي ففي جواتي وانتوا بكرامه وجناط بس..
رايي بالمعرض :
حلو ومرتب ماشاءالله واسعاره مناسبه ومكانه حلو والخدمه هم زينه والبضاعه اغلبها زينه مو قديمه او داثره واسعاره جدا مناسبه ..
لما شفته قارنته باللي يصير بالزمرده فرق وحرام اقارنه معاه :/ اللي بالزمرده داثر وقديم واغراضه اغلى بعد !
Saturday, November 1, 2014
![](http://img811.imageshack.us/img811/8549/postdateiconmx.png)
مثل فيرزاتشي ولانفان وانا ديلو روسو وغيرهم ..
حتى كارل لاغرفيد وغميظه طافني :/
هالمره التعاون بيكون ان شاءالله مع alexander wangny..
دزولي دعوه بالايميل قبل جم يوم لايفنت الكولكشن وكنت مترردده اروح ولا لا !
وصلت المكان كان صغير ومتروس مصورين بس الاجواء حلوه ماشاءالله ..
هذي الضيافه كانت نفيش/بوب كورن وعصير و ماي..
ماصورت وايد لانه كان زحمه فكتفيت بجم لقطه ع طاير ..
واهني الويل بيبر عجبني تقريبا مغطي طوفه كلها حلو للتصوير صورت عنده 😁#معلومات عامه عن الكولكشن ..
مثل مالحظتوا الكولكشن شبابي وسبورت وطاغي عليه اللون الاسود ..
وهالكولكشن للجنسين الرجالي والنسائي يمعت لكم صور النسائي من الابليكشن وتحصلونهم بالسايت بعد ..
الكولكشن تقريبا فيه كلشي جناط واحذيه عزكم الله وملابس واكسسورات ..
تقريبا حوالي ٥٤ قطعه حسب ماهو مبين بالابليكشن ..
اما اسعارهم بين الرسط المناسب والغالي ..
البنطرون ٩٩ دك ..
الجاكيت ب ٥٩ دك ..
النفنوف ب٤٩.٩٠٠
البنطرون ب٩٩
الليقنز ب١٩.٩٠٠ دك ..
اما الجاكيت ب ٧٩..
الكولكشن الرجالي متوفر بالسايت والابليكشن ..
راح يتوفر الكرلكشن ب٦نوفمبر ٢٠١٤ يعني الخميس الياي ان شاءالله ..
واحتمال يكون بفرع الغراند بالافنيو بس << جنه مو متاكده ..
ومن الساعه ٨ الصبح ..
توني جيكت ع كولكشن الرجالي في شغلات حلوه للي تحب تطقم اهي وريلها اقصد النسائي مشابه للرجالي ع اختلاف القصات ..
تعبت :/ ولا جان نزلت لكم صور توضح قصدي ..
Thanx Sophia Banoori ❤️
Saturday, October 18, 2014
![](http://img811.imageshack.us/img811/8549/postdateiconmx.png)
ليش بكتب هالشي ! مو المفروض انساه او احاول انساه ؟! بكتبه لانه كنت اسوي سيرج وانا مريضه ابي معلومات عنه بالعربي ماحصلت الا شغلات بسيطه ماتفيد واغلبه شغلات علميه وفي بعد شغلات غلط !
كنت ابي تجارب تعطيني امل وتفاؤل بالانجليزي حصلت بس مو اللي ابيه !
نبلش ..
*البدايه ..
شهر ١٢ -٢٠١١م ..
كنت نايمه وحسيت بعوار قوي من معدتي يصعد لي فوق بشكل عامودي لي صدر عقب صار افقي ع صدر ي (يعني ينتقل يمين ويساو ) ورد كمل بشكل عامودي لي بلاعيمي !
ماكنت مستوعبه العوار حسبالي حلمانه ! بيني وبينكم حتى ماقعدت من النوم دش بالحلم حلمت اني تعبانه ومعاي خالتي ومرت خالي متوهقين فيني ومايدرون شيقولون لامي! ماذكر شنو ردت فعلي لما قعدت ومتى قعدت اصل اذا عقب الحلم او الصبح عادي!
المهم ٢ يوم رد العوار بنفس الحزه بحزة النوم بس هالمره توني غافيه ع طول فزيت وقعدت اتقلب بالفراش من العوار..
٣ مره يالي العوار هم بالليل بس ! هالمره كنت قاعده ولاهيه اطقطق بالاب توب من قوته بچيت ! مادري ليش العاده اتحمل يمكن لانه تكرر ! مايندرا ..
*اعراض اخرى ..
عقب تغير الوضع مو بس عوار بلشت وانتوا بكرامه ارجع / استفرغ ..
وكان كل مره يزيد ! مو بالكميه لا بعدد المرات يعني بالبدايه كان مره بالشهر عقب مره بالاسبوع عقب مرتين او ٣ بالاسبوع بعدين صار بشكل يومي وعقب اكثر من مره باليوم !
وايد شغلات وقفتها لانها تعبني ..
مثل الماي البارد يخلي الاكل يوقف ماينزل حتى بلاعيمي ! متى لاحظت لما كنت ناجبه لي سلطه معكرونه بصحن صغير حيل يعني قفشتين ان كثر وكنت اتناقش مع اختي ناقش حاد بس انا قالبتها كوميديا خخ مامداني شربت الماي مانزل واسمع حس اللي حسبالي بموت ! اخوي كان جبالي يصرخ الله الله الله ! والحمدالله عدت (هالحجي ب٢٠١٢)
الكباب والتكه والخ اللحم المشوي وايد ثقيل بس عقب ملاحظه الدكتور انه مرضي مو يدد من زمان فيني خلاني اذكر انه انا من قبل لما اكل مشويات اتم اقص جني برجع من كنت بالثانوي جنه !
وبالجامعه وقفت ماقمت اشرب عصير او شربت /فيمتو برمضان لانه يخليني انغث ولقمه زايده ماقدر احطه بحلجي!
وهم مقدار اكلي قل ماقمت استمتع بلقمتي كنت اكل صمونتين ! قمت اكل نص صمونه وانغث!
نزل وزني ؟!
تصدقون لا باول سنه نزل بس كيلوين كنت ٥٦ صرت ٥٤ وهذا طبيعي يعتبر!
* رحله العلاج ..
خل اقولكم عن شخصيتي بالتعامل مع المرض نوعي ماشاءالله اتحمل لاقصى حد واحاول اخدم نفسي يعني اعتمد ع نفسي ! وحكمتي بالمرض انه اذا مرضت فهو يشفيني ! ساحبه ع شي اسمه طب خخ..
بس بلغ الامر مبلغه ماقدر اتحمل الترجيع وكلماله يزيد شكله مو شي عارض وبيروح لا ! نظريتي لازم اغيرها و واروح الدكتور ..
اول مستشفى رحت له طبعا اهو مستشفى الجهرا الموقر !
وهالكلام بمارس ٢٠١٢ للي مايعرفون بالاشهر خخ شهر ٣ ..
رحت الدكتور ماقصر عطاني كل التحاليل والفحوصات اللي احتاجها ( سونار، تحليل دم ، نفخه للتاكد من عدم وجود جرثومه .. ) ماذكر اذا في شي غيرهم ،،
شهر ٤ كان حافل كل جم يوم موعد ..
والحمدالله النتايج كلها سليمه ! انزين شفيني ؟!
شهر ٥ سحبت ع موعدي بس لما شفت انه ماتعدلت حالتي حطيت موعد يديد وقلت ابي منظار موعدي بشهر ٦ وموعد المنظار شهر ٧ ..
* المنظار ..
تحديدا كان ب٤/٧/٢٠١٢ ..
الصبح طبعا وكانوا منظارين ! منظاره معده ومنظار قولون ..
خرعوني من منظار القولون ومن كثر التخرع كنسلوه خخ لانه ماشربت الجالن كله المفروض كل ربع ساعه قلاص وابلش من ساعه ٢ واوقف ٨ انا شربت ٣ قلاصات بس ! و ساعه اتغصب اشربه !
اما نتيجه المنظار ماشفتها بمستشفى الجهرا خذيت ملفي ورحت الخاص !
لا اللي ضحكني اميمتي الله يشفيها كانت معاي ..
وكانت متوتره اكثر مني قلت لها يما مو اطلع من المنظار انا بويل جير / كرسي متحرك وانتي القاج بواحد ٢ يمي ! جان تقولي لا يما بواحد انا قاعده وانتي بحضني خخ ضحكتني ..
واذكر كنت احاتي السايق يتاخر ع اختي واهي برا الجهرا دوامها فتميت احن وانا مبنجى / مافج البنج / تحت تاثير البنج بس عقب المنظار اقول لامي خل يروح لاختي لا يتاخر ، بعد ٥ دقايق ارد خل يروح لها لا يتاخر !
لا وكنت اسولف بتويتر و الواتس اب! وعقب نمت بالصاله قعدت ع حس موسيقى بالتلفزيون حسبالي منبهي يرن خخ ! عقب صعدت داري ونمت ماقعدت الا ١.٣٠ الظهر واهني صحصحت لانه اكتشفت اني نايمه بدون لا احط (تقويمي المتحرك ) كنت البسه لازم البسه وانا نايمه !
* المرحله ال٢ بالعلاج ..
هالمره اخترت الضامر ليش مو لانه ابي يشوفون نتايج المنظار لا لانه صار رمضان وذبحني الحارج مااقدر اقرا قرآن ع راحتي عسى ماقريت صفحتين او ٣ الا نشف ريجي !
خذيت موعد بعياده الانف والاذن والحنجره وموعد بالباطنيه مادري الجهاز الهضمي ..
مادحين لي دكاترتهم ..
اللي بالانف والاذن والحنجره تقيس حرارتي مادري سمع بجهاز حاطته ع ضروسي! قلت لها بسرعه لا يتعفسون توني معدلتهم مااستانست فيهم خخ ..
وقالت لي فيج حموضه قلت من شنو ! قالت من التفكير الزايد ..
رحت العياده ال٢ جان يشوفني الدكتور وفقص بطني وياب المطرق طق ركبي جان تنقز ساقي باول ريل استغربت بال٢ ضحكت حسبالي مسكونه ! شلون تحركت ريولي بدون لا احركها ! جان يقولي هذا فحص لاعصاب الريل و سالني شنو الاكلات اللي اتعبج قلت كلشي الا الككاو جان يفتح درجه ويعطيني ككاوه خخ ..
واذا ماخب ظني قالي مو حموضه !
وعطاني ادويه ترخي الاعصاب عشان مااتوتر و الحبه اللي قبل الاكل بنص ساعه عاد رمضان ! واشوف السماط متروس ماشاءالله وانا قاعده انطر نص ساعه و كوكت / وقت منبهي يرن اول مارن ركضه لي السماط خخ ..
الله وكيكلكم ماذكر اني كليتها مره ٢!
عقب رديت الضامر عقب جم شهر تقريبا ع شهر ١ ب٢٠١٣ او شهر ٢ قبل عيد ميلادي باسبوع جنه اللي سالوني جم عمرج قلت ٢٥ ودور الاسبوع ٢٦ 😁 سويت تحليل شامل وطلع كلشي اوكي الحمدالله وتحليل الجرثومه وهم مافيني شي بفضل الله وهالمره دشيت للدكتور الهندي ! وقالي حموضه ولا تاكلين الروب الا فريش قلت شلون ! وبقلبي اقول شنو اخض البقره واحلبها عقب خخ قال يعني اللي بتاريخ اليوم حموضته اقل وبصل وثوم ممنوع وشغلات ٢ ماذكرها ،.
وعطاني ادويه ومكملات غذائيه هم يوم او ٢ وهديتهم ..
وباجي ٢٠١٣ كانت صخه مو ما ارجع امبلى ارجع بس متنت ! وقام يزيد وزني اللي استغربت !
*المرحله ال٢..
وبشهر ١٠رفيجتي هالمره ودنتي شيخ يقرا علي بالجهرا (بدون ذكر اسماء) سالني عن وايد شغلات من اللي اذكرها اذا في وحده تجهض في بيتنا ؟! واذا احلم اني اطير ؟! وقالي عطيني ايدج ومسكها بس بكلينكس مو لاني وصخه خخ لانه مايجوز!
المهم انا مديت ايدي ولا اشوف صبغي الاحمر ! حده مو وقته ! نسيت اوخره ! المهم قالي فيج واهنه واهي مرض بالمعده والاطراف وصج هالشي عقب بتلاحظونه !
وانا ع قولت رفيجتي رخوه ماعبر افتح حتى بطل الماي بروحي!
وكان علاج الشيخ مجموعه سور اقراها لمده ٤٢ يوم و زيت زيتون مقري عليه اتدهن فيه وماي وزعفران اشربهم و سدر اغسل فيه اخلطه مع الماي المقري وارش ملح في بيتنا لمده اسبوع ..
ابوي شاف شنو يايبه من الشيخ جان يروح ايب لي اعشاب يقولي شربيهم ! نعم يبا مابي ! الا غصب شربيهم وقايل للخدامه كل يوم بالليل سوي لها وتيب لي غصب ! ولازم اخلص كل الكميه ولما شافني رضخت له قال شربيهم ٣ مرات ! لا ويسال الخدامه اذا شربت ولا لا !
* الاعراض تزيد .. ومرضي مجهول!
باخر ٢٠١٣ قامت تطلع اعراض يديده !
اول شي قمت انغث وانا نايمه بعد ! وعقب قمت ارجع بعد !!
هالحجي بشهر ١٢ -٢٠١٣ ..
قمت انام عند امي بطلب منها لانه خرعتها قلت اللي مثل حالتي يرجعون واهما نايمين يختنقون ويموتون .،
اول يوم نمت عندها عسى ماتحركت عسى ماكحيت كلمتني ها شفيج ها شفيج !
ليما فجاءه فزيت من نومي اركض ! واسمعها اتصرخ اسم الله عليج اسم الله عليج اهني استوعبت انه صج مو حلم ورحت الحمام وانتوا بكرامه ارجع وانا ارجع رفعت راسي ولا اشوفها بعد عمري تركض تيب لي ماي عقب رديت الدار ولا معاها دلاغ تقولي لبسيه دلاغج توصخ #بعد عمري الله يشفيج اميمتي ❤️❤️
وبلشت ٢٠١٤ والحاله تزيد لا تاكلين قبل النوم بجم ساعه اوكي سويت لا تنامين الا وانتي حاطه تحت راسج جم مخده هم حطيت ٢ !
مافاد بدال مره قمت ارجع اكثر مره اتم طول اليوم مصدعه ومتكسره غصب اتحرك لانه رجعت ع طول وانا نايمه ماكحيت لا شرقت فيه !
وصار شهر ٢ رحت هالمر سي ام اس مادري شسمه بالجهرا عند د عياده اهني انصدمت قاسوا وزني ولا زايد بعد وصلت ٥٧ شلون !
سوالي تحاليل دم وهم سليمه عطاني ادويه والصراحه مالتزمت فيها!
والترجيع زاد كنت مارجع بالدوام قمت ارجع وساعات مايمديني اوصل الحمام وانتوا بكرامه!
وصار شهر ٣ هالمره مو ترجيع عادي وانتوا بكرامه لا فيه دم وعوار صوب البلاعيم العاده العوار صوب المعده! اهني مو انصدمت لا تصرقعت !
رحت لمستشفى الجهرا ما اتوب ! طبعا اول رحت المستوصف واهو حولني ..
المهم وصلت ودشيت عند الدكتور وشرحت لها حالتي جان يعطيني تخطيط قلب و اشعه لظهري!
وقياس حراره وضغط وجنه تحليل دم !
ورحت سويتهم كلهم وقعدوني بالملاحظه وعطتني السستر ادوا عشان ارجع !
جان اقولها انا خلقه امشي وارجع !
رحت ولا مغيرين الدكتور خلص شفت الاول تخيلو من ٥ لي ال١٠ بالمستشفى جان يسالني الدكتور ال٢ الدم وايد ! ولا خيوط قلت له خيوط قالي بسيطه هذا جرح من الترجيع مو شي جايد !
وقالي عمودج الفقاري عوي خخ لي الحين مو قادر استوعب ليش خلوني اسوي اشعه لظهري!
*واخيرا عرفوا مرضي
لاحظتوا كل شهر بهالسنه انا بالطبيب :/ الحمدالله الله سخر لي رفيجتي حبيبتي ودتني عند دكتور مساعد العصفور وهذا كان ب٢١ مايو ..
لانه اخر مره طلعت معاي انصدمت اني ارجع مرتين او ٣ بالوجبه الوحده!
اي وصلت هالمرحله ارجع بالدوام بس ٦ الى ٧ مرات !
فجاءه بنص الوجبه اقوم واركض وساعات الحق وساعات لا !
المهم رحت له وسوالي تحليل دم و سونار واهو يسويلي سونار وانا اطل بالشاشه ! هذا شنو وهذا شنو خخ وقاسوا حرارتي وضغطي ووزني كان حزتها ٥٢ ..
ومنظار يومها ماكنت ماكله الا حلاوه صغيره جيلي علبو مابي ادوخ وهالحلاو خربت كلشي!
بالمنظار حاشني هبوط وشبت علي الكحه اهما حسبالهم احس بشي بس انا ماكنت حاسه بو لا شي من سبت هالاعراض ماقدروا يكملون المنظار و قالولي باجر تعالي نعيده ومن الساعه ٨ مادري ٩ صومي لا تاكلين او تشربين شي!
وهذا اللي صار ٢ يوم رحت والحمدالله سولي المنظار وقبلها اشعه بيتاكدون مافي سوائل بصدري وطلع الحمدالله مافي..
والنتيجه عقب جم يوم كانت ضيق بالمرئ وقوي جدا بعد سالته والمعده قال سليمه الحمدالله !
اي ع طاري المنظار كنت متصله ع عياده خاصه اسالهم عن سعر المنظار جان تقولي ب٧٠٠ جنه قلت للمعده بس ! جان تقولي ٣٠٠ وشي جنه !
بعياده الدكتور مساعد ب١٢٠ او ١٤٠ جنه لا ومره ٢ لما عادوه ماخذوا مني الا فلوس التخدير ..
وعطاني تحويل لثنيان الغانم فيه اخذ موعد لقياس المريئ ..
رحت وكان موعدي ١/٦ ..
صار اليوم الموعد طبعا قبلها قالولي اصوم و لما صار دوري شرحت لي شنو راح يسون لي وعطتني صحن ستيل قالت اذا بترجعين رجعي هني ، قلت لها مايكفي !
قالت عادي نبلش جان افتح حلجي قالت لا بندخله بخشمج ومن الخشم لي المريئ !
اول شي وانا قاعده ورجعت عادي وعقب وانا منسدحه جان اشرق وافز ارجع وانتوا بكرامه بالزباله لا تشوفون شسوت الدكتوره ال٢ اللي شغلتها تكتب القياسات بالكمبيوتر..
ردت بالكرسي ورا وتطالعني بقرف! حزتها مو بس تضايقت تكدرت ودمعت انا اتحمل العوار بس ماتحمل هالحركات لا وكنت اغمض مابي اشوفها ولانه وحده قالت لي في وحده من قوة الترجيع انبط شريان بعينها جان اتصرقع وقمت اغمض اذا رجعت واهما يقولون لي فتحي عشان تشوفين شاشوف شي يكدر الخاطر! عقب لما بنسدح مره ٢ عطيتها الزباله وانتوا بكرامه لانه ماقدر اجندس جان تقول مش لابسه قلفز ! بس خليتها تاخذها!
خلصوا الفحص جان تقولي انتي زي مستحمله اعملي توسعه! جان ارد بسوي ان شاءالله :/
ورحت عند ابوي اكمل بجوتي!
*العلاج ..
رحت اروي الدكتور النتيجه قالي الحل توسعه بالمنظار واذا مافاد جراحه بس اتاكد وارد لج خبر ..
عقب اتصل علي قالي لسنج الجراحه انسب واحسن دكتورين باسل السميط بالسيف و د. جنه اسمه سالم الصباح برويال حياه ..
وانا اخترت د.باسل السميط وليش خاص ؟
١-لاني مستعيله عليها ٢-لانه الحكومه الجراحه مايسونها اول شي اول شي النفخه بالمنظار عقب الجراحه ..
حاولت بالحكومه الصراحه بس مابي الجهرا يابولي واسطه فيه بس هم مابي تعقدت منه وهم مايسوي جراحه لازم نفخه عقب جراحه ..
اتصلت ع السيف وخذيت لي موعد مع دكتور باسل وفيه شرحلي طريقه العمليه وذكر لي انه اللي سوها ٧٠٪ ردوا طبيعين ٢٠٪ يتعبون من اكلات معينه ..
١٠٪ مااستفادوا منها كلش..
توقعوا انا اي فئه ؟!
يتبع !
Friday, June 6, 2014
![](http://img811.imageshack.us/img811/8549/postdateiconmx.png)
بمناسبة ردت رفيجتي
لولو من
اجازتها سوينا لها ريوق بالدوام .
طبعا عقب ٣ ايام حوسه وافراره بالانستغرام ومساعدة اختي وبنت عمي وعقب اشاور رفيجتي اخترنا من @xo_kitchen ..
كنت حدي خايفه يكون مو حلو ونسيت اكد لها الطلب قبل بيوم وتاخر واكلمها ماترد احتريت ..
بس اشوه اتصل المندوب ولا يطلع مايدل واضطريت اطلع له ومسكين اهو محترم يقولي وين المكان القريب لج ايبه يقصد البوابه قلت له لا ..
رايي:
وعقب كلمتها اتشكرها وايد عجبني الشغل راهي وذرب ومرتب بوكس للسلطات والملفوف (فته، سلطة المعكرونيه ، فتوش ، والناتشوز) وبوكس ٢ للصلصات ماشاءالله جنه تعبئة مكان متخصص مو بيت و جيس فيه جيس صحون بلاستيك كامل وجيس قفاش وجيس كلينكس البوفيهات وسماط..
شغلها وايد مرتب وعقب لما شافت المحادثه انه متاخر الطلب علي اصرت انه يرد المندوب ايب لي فلوس وزفتهم ع التاخير بس طبعا مارضيت اول شي كافي كلمتها ٢ شي شغلها يبيض الويه واسعارها مناسبه ماشاءالله ..
وعجب البنات اشوه..
الله يبارك لها في رزقها يارب ..
يعني طعم وشكل وكميه وخدمه ❤️ماشاءالله
سعره :
ب ٢٠ بس والتوصيل ٣دك ..
اكاونتها بالانستغرام : xo_kitchen@
ت:97733145
Tuesday, May 6, 2014
![](http://img811.imageshack.us/img811/8549/postdateiconmx.png)
من العام خاطري اجربه ومالله كتب ومع عوار معدتي كشيت من الجباتي بس قبل اسبوعين تقريبا كنت توني بدش الدوام ازحف خخ خطوه جدام و10 ورا ولا رفيجتي يمي تناديني سلمنا والخ الخ جان تقولي انها عازمتنا عليه ..
اخترت حلوم وذقت شويه من الاومليت وهم زين بس الحلو بالحلوم انه فيها وايد شغلات (حلوم وزعتر وخيار وطماط ) من جذي طلبتها مره 2 بعد يازت لي ..
وماعندي فكره عن الاسعار لانه بالمرتين كنت معزومه عليها ..
ساعات العمل
من الساعه 7:00 صباحا حتى 11:00 مساء
الجمعه والسبت 9:00صباحا حتى 11:00 مساءا
ت 50979000
من الساعه 7:00 صباحا حتى 11:00 مساء
الجمعه والسبت 9:00صباحا حتى 11:00 مساءا
ت 50979000
اكاونتهم بالانستغرام
@karak_house
عنوانهم :
المباركية - الدروازه - مقابل البنك الاهلي المتحد
Monday, May 5, 2014
![](http://img811.imageshack.us/img811/8549/postdateiconmx.png)
قبل 3 اسابيع دزولي هالكفر انا اخترته خيروني بين اكثر من واحد بس اخترت الشانيل ️ وهالهديه لانه كتبت عنهم بالانستغرام ..
واهما اكاونت يوفر اكسسورات للهواتف الذكيه و تلفونات ويسوي صيانه لهم وهم عنده مجموعه من الاككسورات اللي تخص التكنولوجيا ..
وهذا اكاونتهم بالانستغرام @hw_777
شكرا ع الهديه ️ ماقصرتوا كلكم ذوق..
Sunday, May 4, 2014
![](http://img811.imageshack.us/img811/8549/postdateiconmx.png)
اخر شي بيوتي نزل وصار عليه ضجه حمر برجوا الڤلڤت وايد قريت مدح لهم ..
اسمهم : Bourjois Rouge Edition Velvet Lipstick
رحت بجربهم توقعت راح اخمط كلهم او اغلب غصب طيب اقتنعت بلون ١ منهم ..
بالصوره احلى من الصج و مبدائيا قوامهم غريب مو قلوس ولا اللي الحمر المات اللي متعودين عليها ..
بالصوره احلى من الصج و مبدائيا قوامهم غريب مو قلوس ولا اللي الحمر المات اللي متعودين عليها ..
واللون اللي اخترته هذا اهو رقمه 05 ..
هذا اللون ع الشفايف بس طبعا هذي اجنبيه بيضا :)
رايي :
عقب مااستخدمتها مرتين او 3 ..
ماحبيتها لانه اساسا مااحب الحمر المات وايد احب الحمر الكريميه ..
واهي لونها مو غني ولما احطيتها مادري ليش طرت علي الحمرا السحريه احس نفس اللون ..
ثباتها امم مو بسرعه تروح حاولت امسحها لما كنت بتريق بس تطبع عادي ع الاكل انا ماحب جذي :\ من جذي امسح الحمره قبل لا اكل او اشرب ..
شنو بعد اي بالنسبه لي ميزتها الوحيده انها خفيفه على الشفايف تقريبا جنه مو حاطه شي ..
سعرها :
وسعرها تقريبا ٥.٧٥٠ دك بس لما خذيتها ماكس مسوين عرض ع برجوا طلعت علي ب٤.٦٠٠ دك ..
Subscribe to:
Posts (Atom)
About Me
![My Photo](http://blogger.googleusercontent.com/img/b/R29vZ2xl/AVvXsEg7e-8hSO0x0dgwOveCBzdqxOXTV6HutrAOwmhQCon6b3bEdgmubKixD_e444lidtCOFngvPe8QkCKfJPyTKAkY79KDkuWKYY2_NijTULJ3GR11bjh2j1MEInNt4y1uQQ/s220/A2558050.jpg)
- رورو الشخبوطه
- الكويت, قسم الاعلام:), Kuwait
- بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
ايميل المدونة :)
دايركت انستغرام 😁
Labels
- beauty (451)
- chanel (28)
- fashion (239)
- makeup (108)
- Molten (31)
- qatar (19)
- spa (50)
- tv (39)
- wish list (65)
- ا (1)
- احمد الربعي الله يرحمه يارب (6)
- اسطنبول (2)
- اظافر (162)
- اعلان (47)
- افلام (74)
- اكاليزيا ، ضيق بالمرئ (3)
- اكاليزيا، مرض (2)
- اكل (475)
- اكل ، مطعم ، مناسبة (5)
- الجهراء (11)
- الكويت (47)
- تايلند (31)
- تجربة (47)
- تركيا (2)
- تكنولوجيا (48)
- جديد (14)
- جولة مكوكية (18)
- دبي (54)
- ديني (14)
- ذكريات (36)
- سايت (47)
- سبونجي (12)
- سفر (137)
- شخبوطة (53)
- شخبوطة تساؤل (36)
- شخبوطة سياسية ع قدي :p (3)
- شخصي (31)
- شرق اسيا (30)
- صالون (27)
- صحة (57)
- عروض (61)
- عيادة (1)
- فضفضة (34)
- فنتوقه (76)
- فندق (12)
- قراءه (85)
- قهوة (2)
- ماليزيا-malaysia (34)
- محل (150)
- مسمار لحم (1)
- مشتريات (104)
- مطبخ رورو :) (48)
- مطعم (32)
- معرض (34)
- مناسبة (106)
- موقف (21)
- هدية (143)
Followers
My Blog List
-
30 يوما في حياتي .. قصص قصيرة 210 months ago
-
-
-
نواقيس العزلة4 years ago
-
-
عندما نسعى لتحقيق حلم4 years ago
-
-
بينكيو تكشف النقاب عن جهاز العرض TK8006 years ago
-
-
مكتبه ليويلا livraria.lello7 years ago
-
السكوت علامة الرضا7 years ago
-
مع الخيل يا شقرا7 years ago
-
عدنا إليكم من جديد7 years ago
-
سلمان الفاتح!7 years ago
-
مشتاقة7 years ago
-
Summer cooling refreshing drink recipe7 years ago
-
انت مش انت !!7 years ago
-
I'll be Back Soon راجعين قريبا7 years ago
-
-
VARIETY ON BONUS POKER ONLINE8 years ago
-
كاريكاتير مابعد أسعار النفط8 years ago
-
-
Salmon recipe8 years ago
-
Review: The Martian8 years ago
-
ضيفوني8 years ago
-
عرض منتجات8 years ago
-
تعطّل..لا يعطّل الابتسامة :)9 years ago
-
-
هذا قدرنا9 years ago
-
-
-
Soft Opening Of Lavicka Cafe11 years ago
-
الولاده من جديد11 years ago
-
Macdonald photo compitition11 years ago
-
My best purchase for December11 years ago
-
و أخيرا رجعت11 years ago
-
بوت من كروكس للفتيات11 years ago
-
تجهيزات الحج Preparing for Hajj11 years ago
-
لن أعد أحدا مجدداً :**$11 years ago
-
when u have nothing left .....11 years ago
-
Cheap Cash Cars11 years ago
-
-
تمتعي بخدمة منازل صالون ليلي فالي11 years ago
-
-
ساسلة حملة الترتيب12 years ago
-
خوش تسريحات12 years ago
-
في ليلة الزين ..12 years ago
-
Candelite Sweets12 years ago
-
تبا لكم سراق المال العام12 years ago
-
كنتم انتم ... ووداعا12 years ago
-
عين ما صلت على النبي12 years ago
-
إصدارات بلاتينيوم بوك الجديدة 201212 years ago
-
Fwd: فوق السحاب12 years ago
-
تجـربتي للمـيتالك12 years ago
-
تصميم قديم..12 years ago
-
flake12 years ago
-
نقصت سنة .. بلا مليون12 years ago
-
استغفر الله12 years ago
-
هبه قديمة12 years ago
-
مشتاقة لكم12 years ago
-
-
fast 5 .. لايطوفكم !!13 years ago
-
king speech : movie13 years ago
-
ياصباح ومساء الخيرات13 years ago
-
Pappa Roti13 years ago
-
فن الكليبسو13 years ago
-
-
...وحدث أن13 years ago
-
مقال رائع13 years ago
-
Elves is real !!..13 years ago
-
قضى رمضان !13 years ago
-
اسيل ورولا وسلوى مزورين بالقانون14 years ago
-
-
-
-
-
-
-
-
-
-
-
-
-
-
-
-
-
-
-
-
-
-
-
-