Friday, December 31, 2010

postheadericon The best & worst of 2010

1:30 PM
اليوم اخر يوم ب2010 يعني باجي شهر وشي ع يوم ميلادي خخخخخ مادري شسوي فيه من الحين اخطط افكاركم بليز :)

طبعا 2010 مثل اي سنه فيها شغلات مميزه وشغلات سيئة حبيت اسوي استفتاء بسيط للاحسن والاسوء :

1: احسن فيلم ؟ اغلب الافلام الهنديه حبيت وهبيت فيها هالسنه مثل ماي نيم از خان , هم حبيت السينما السداسيه الابعاد كسينما وامكانيات مو فيلم..
اسوء فيلم ؟ هم وايد مثل 3 يشتغلونها , الصلاة والحب والبلعه .. الخ

2- احسن اغنية ؟مرت سنه , هذا انا
اسوء اغنية ؟ماذكر لانه ماسمع اغاني وايد واذا سمعت اعلق عليها..

3- احسن اعلان ؟نبي عيديه مال بنك الوطني,دعاية الوطنيه اللي برمضان , دعاية اسنان الجزء ال2 اللي تحر اللي خطبها خخ.. 
اسوء اعلان ؟اعلانات اذاعة لمارينا :\

4- احسن رواية او كتاب ؟القلادة اياها لسارة الميكمي
اسوء رواية او كتاب ؟ كتابين لمدونين معانا اخاف يزعلون لي قلت شنو هما :p

6- احسن مسلسل ؟امم يمكن عايزه اتجوز ماتابع وايد:\
اسوء مسلسل ؟ اميمه في دار الايتام..

ودي اقول احسن كريم وسبا بس احس ذاكرتي اندثرت خخخ بس بيمع المعلونات ببوست خاص ان شاءالله ..

واهم شي اسوء واحسن انجاز سويتوه ب2010 ؟
الحمدلله 2010 كنت سنه خفيفه صج روتينيه وطويله بس مافيها احداث سيئة ومقارنة ب2009 تهبل 2010..
الاحسن انه سويت شغله كنت بسويها او بالاحرى بلشت فيها لم كنت بالثانويه عمري 15 سنه ب2003 هالسنه كملتها وان شاءالله ب2011 تخلص يارب متشوقه اشوف النتيجة ..
وامنياتكم ب2011 ومخاوفكم منها ؟؟

اتمنى اشوف نتيجة حلوه للشغله اللي فوق :)
ويكبر حظي ..
اذا تعدل وقام عزالله كل شي ابيه صار والله كريم :)
ودي اضعف واصير تحت الوزن المثالي بس الاغلب يقولي مو حلو :(يعني ابيه 50 وانا حاليا 57 :\
شخاف منه ماكو الله كريم ويخليها سنه حلوه علينا وعليكم يارب..


وبس كل عام وانتوا بخير :)

ودوركم جابوا :)
Labels: , | 34 comments
Thursday, December 30, 2010

postheadericon فيلم زهايمر ..

6:15 PM

بناء ع اختيار اختي وبعد تاجيله اسبوع ..

تونى طالعين منه ..
النوع : كوميدي

مدة الفيلم : 111 min

القصة

ويجسد خلال أحداث الفيلم شخصية محمود شعيب رجل الأعمال الغني المصاب بالزهايمر و الذي يطمع أبنائه في ثروته فيقيمون دعوى أمام القضاء للحجر على أمواله و تعيينهم أوصياء عليه إلا أن ممرضته تقلب أحداث الفيلم رأساً على ... << مادري ليش ماكملوا النبذه خخخ طبعا منقوله من سايت السينما ..

لمشاهدة الاعلان (اضغط هنا)

رايي فيه::

امم الفيلم زين مو وااو وفيه قصه صج مو وايد يديده (مكرره)بس حلو انه ناقشها من وقت لي وقت من باب التذكير :)

وكان عكس اللي كنت متوقعته :\

وهم مايضحك وايد :\
Labels: | 16 comments
Wednesday, December 29, 2010

postheadericon Hunter boots

8:46 AM

Hunter boots

rain boots

بالكويتي بوت المطر ..

هبه يديده !

امممممم مادري شرايكم فيها؟؟

عن نفسي مو عاجبتني عموما و خصوصا ع المتحجبات 

واساسا لي الحين ماطق مطر :\

حلاته نلبس الشي بوقته المناسب :)



الصوره منفوله من قوقل ..
Labels: | 29 comments
Tuesday, December 28, 2010

postheadericon تذكرونه 7؟!؟

11:46 AM
السلام عليكم ..

نكمل سلسلة تذكرونه؟!؟ 

وهذي الاجزاء القديمة ..

(ج1 , ج 2 , ج3 ,ج4 ,ج5 , ج6)

اليوم بتكلم عن شغله كنت احبها ايام الطفوله يعني بالتسعينات , وكنت لما احطها ماقدر اتكلم او اكل اخاف تروح خخخخخخخخخ ..

اكيد عرفتوها الحمره ..

طبعا ايامنا ماكو قلوس بس في حمره كانت مشهوره ..

هذي اهي ..


الحمره السحريه ..

اهي للحين موجوده وتنباع بالحواي وجنه بوميه ماشفتها بس سمعت عنها ..

بس اللي استخدمتها كانت غير مغطتها شفافه ..

واتوقع سموها السحريه لانه لونها اخضر بس لما تنحط ع شفايف يصير لونها وردي او اقرب للفوشي الخايس اذا ماخانتني ذاكرتي خخخ..

وميزتها انها ماتروح خو ايامنا ماكو ميك اب وتر بروف (مكياج ضد الماي) ولا في المكياج الدائم (التاتو)شدعوه لو في امي بتخليني اسويه او استخدمه خخ..

واقصد بانها ماتروح انها تم حتى لو تمسحين بوزج بزوليه خخخ اتم موجوده ..

تعرفونها؟؟جربتوها ؟؟
Labels: , , | 20 comments
Monday, December 27, 2010

postheadericon بطاطس عمان

9:07 PM

هالبطاط من الشغلات اللي كنت احبها ايام طفولتي ..

اذا ماخب ظني كنت اخذه من فرع الفيحا يم بيت يدتي ..

بس من زمان مو محصلته وخاطري فيه هالايام :(

تعرفونه ؟؟ قط مر عليكم هالايام ؟ تهقون للحين موجود او انقرض !
Labels: , , | 49 comments
Sunday, December 26, 2010

postheadericon لا تنسون تجددون بطايقكم المدنيه !

8:27 PM
مادري الخبر صج او اشاعه بس اللي اذكر انه مار علي !!

والخبر اهو انه اذا ماجددت بطاقتك المدنيه وحولتها لي ذكيه خلال هالسنه يعني حدك هالاسبوع راح تغرم ..

شكثر الغرامة مادري ؟!؟

بس خليكم بالسيف سايد وسووها ..

ان امس صورت الله يهداهم كان عندي صوره حلو واحبها ومن كثر ماهي عاجبتني واول مره يصير هالشي طلعت عليها مليون نسخة اللي من كثرهم انمحت ملامحي صار ويهي وخلفية الصوره واحد خخخ ..

الصوره اليديد مو عاجبتني كلش :(

لها شروط مالها داعي خلفيه زرقا - تسكر حلجك شدعوه بصور وانا اقهقه خخ-لازم ويهك سيده واي جنه بدش التجنيد :\ ..

وكل بصوب وشرط انه يظهر الشخص منفرد بالصور بصوب !

يعني معقوله في احد بيدز صوره جماعيه للبطاقه المدنيه خخخ..

مادري ليش لما اختي قالت لي هالشرط تذكرت مسلسل ام البنات ..


عموما للفائدة سايتهم فيه كل المعلومات المهمه وهم فيه تعرفون شنو الاوراق للي ناقصتكم عشان تسون البطاقه (اضغط هنا)
Labels: , | 14 comments
Saturday, December 25, 2010

postheadericon اظافري :(

5:07 PM

3 اشهر  ماسويت اظافري :\

مادلعت نفسي :(

كل مره ابسويهم يصير شي ..

خل افضفض لكم ..

(1)
مره اتصلت ع صالون علبو ابي بديكير ومنيكير وشغله 2 بعد ..

جان يقولون اللي تسوي الشغله ال2 مو موجوده !

شدعوه صالون بكبره مافي الا 1 تسوي هالشغله وياريت شغله عاديه لااساسيه !

(2)

اتصلت على صالون قلت لها ابي بديكير ومنيكير  بجم؟؟
 قالت 3 وترد واهي مالها خلق مثل اللي فوق ..

مادري ليش يحطون ناس ماعندها اسلوب ترد ع التلفون جنه نطر منهم وبيسون لنا ببلاش سليحط ترا الكويت متروسه صالونات..

المهم قلت بشوف الفخم عندهم بجم اهما صالون عادي مو فخم او سبا ..

قلت لي ب18 اللي خطر لا قلبي يوقف ولفيت بدون لا ارد عليها خخ شدعوه 18 اسوي اظافري وباحسن سبا ودلع بالموعد مو اقعد انطر 7 قبلي و ع قولت اختي نشك بنظافتهم واختي الكبيره تقول يسطرونا يم بعض جنه غنم خخخخ قصدها ماكو خصوصيه :\

(3)

بعرس رفيجتي اكيد رحت الصالون المهم قلت ابي اقص شعري واسويه وشغله بناتيه  ومكياج وابي منيكير قالت ماكو !!

كلشي فيه الا المنيكير تبين موجود بالصالون اللي يمنا هالحجي الساعه 6 على ماخلصت كل شي رحت الصالون اللي يمهم كانت الساعه تقريب 8 وثلث قالولي مافي وقت بنسكر الساعه 9 شدعوه عليكم لا وعقب تسالني تبين صبغ بس !

اعرف اصبغ بروحي الحمدالله والشكر !!

محافظه شكبرها صالون سنع مافيها ..

(4)

قبل جم يوم اتصلت ع سبا ايي لي البيت ..

الصدمه الاولى رد علي ريال @@

الصدمه ال2 تعودت عليها اسلوب زفت اساسا ماخلاني اتحجى بس قلت الو قالي ديو اسبيك انجلش ؟ قلت لا قصدي بساله اذا اهو السبا او لا ماعطني مجال رقع التلفون بويهي ..

استغفرالله شالعاهات ..

وبعدين سبا حريم شكو هالاثول يرد !!

(5)

في نادي بمنطقتنا سمعت انه عندهم سبا ويمدحون بديكير ومنيكير قلت خل اجربه اتصلت كله مشغول ! ع الاقل ارحم من انه يرقعون بويهي خخخخ..

اتمنى اسويهم هالشهر لانه في احد فقرني انا اعرفه واهو حسباله مااعرفه قليل ادب يرد بغير معرف بس عادي جبان وماعنده ذرة رجوله لو فيه جان رد باسمه :p

الا مال الله ماسوى تنزيلات خخخخخخخخخخخخخخخخخخخخخخخ << نغزه مو تصدقون :@
Labels: , | 22 comments
Friday, December 24, 2010

postheadericon شكرا Popular popcorn :)

8:06 PM
السلام عليكم ..

الشهر اللي فات قلت لكم عنه (هني)

وامس ماقصروا طرشولي كادو حلو ..



 كارتون متروس نفيش وناسه خخخ..

وهم بيسون نكهات يديده قريب ان شاءالله , واحتمال يسون ع جبن وناسه ناطرته بجربه :)..

و للي حاب يجربهم منتجاتهم متوفره بحوالي 40 جمعيه ماشاءالله..

وهذا قروبهم بالفيس يوك (هني)

شكرااااااااااااااااااااااااا Popular popcorn  :)
Labels: , | 18 comments
Thursday, December 23, 2010

postheadericon عالم سداسي الابعاد 6d

4:20 PM
واخيرا رحت هالسينما من شفتها وخاطري اروح لها بس محد معبرني اليوم رحت لها مع اختي بس دشيت بروحي ..

هذ اعلان اللي خلاني اروح له وهي كانت بالافنيو بس مادري لي الحين موجوده او شالوها..


وصلنا..

هذا الشاشه موجوده ع الصوبين وهالشي اللي خل اختي ماتدشها وبالنسبه لي بالدسكفري ارحم ع الاقل كل يهالوه خخ ..


مكااني ..

الشاشه ..
 وزعوا النظارات وخذيت حمرا مثل لون قميصي :p وسكروا الحزامات والستاير وبلش الفيلم ..


وهذي من الافلام الموجوده تقريبا في 3 افلام او 4 ماثبت انا سالته اي الاحلى قالي هذا دشيته حتى ماثبت ع اسمه بس اهو اللي طياره وقطار ..

مدة الفيلم جنه 7 دقايق شي جذي ..

سعر التذكره :
3د.ك


رايي :

وايد استمتعت فيه صج وناسه الكراسي تتحرك و الهوا ينسنس << جنه تنقال جذي خخ ..
جنه لعبه مو فيلم وانا افضل العاب على الافلام ..

Labels: , | 18 comments
Wednesday, December 22, 2010

postheadericon اتشووووووووو :\

9:16 PM
اتشوووووووووووووووووووووووووووووو اتشووو اتشووو اتشوو :\

بما اني صرت سلاح جرثومي متنقل ..

ونومي مقطع وبلاعمي جنه نابت فيها شعر :s وحسي يهبل جبلي بعد شوي اسجلكم موال خخخخ..

ولاني ماحب الادويه امس مريت الصيدليه ابي حلاو وخبري بالقديم بس مالقيت عنده الا هذا ..


 في انواع وايد بس خذيت هذا عجبني فيه انه فيه 3 شرايط او شرايح كل شريحه نوع ..
لي لحين جربت 2 ..

والحمدالله النتيجة زينه تقريبا مفعوله يوصل لي ساعتين ..

وطعمه هم زين واهم شي شوقر فري :p

سعره:

2.150د.ك
Labels: | 31 comments
Tuesday, December 21, 2010

postheadericon كاكاو :)

7:31 PM
السلام عليكم ..

بوست خفيف لانه ذبحتني النشلة :\
باستقبال اختي رفيجتها يابتلها كاكاو من هالمحل :

واكثر شكل عجبني هذا :)


عنوانه :

اسواق القرين ..

ت: 99980911

او

25470010

رايي :
 
بالنسبه لي الطعم عادي جدا بس عجبني الشكل لانه ملون , اما خواتي عجبهم الشكل والطعم ..
Labels: | 24 comments
Monday, December 20, 2010

postheadericon موسوعة اللهجة الكويتية

8:17 PM
السلام عليكم ..

الاسبوع اللي فات عرفت هالكتاب من برنامج تو الليل تحديدا فقرة العبدالجليل ..

اللي كنت لاهيه بلاب توب اسمع شوي من الفقره واكمل اقرا وحوس بالنت بس لما حطوا مقابلته شلت كنبلي وخليت لاب توبي وجابلت التلفزيون :)

واليوم قابلوه بالمارينا اف ام ولو بيقابلون بعد بسمع او اشوف بدون ملل لانه وايد احب هالموضوع ..


واهو متعلق بالموسوعه اللي اصدرها الباحث خالد الرشيد وفيها بحث وجمع وشرح العديد من الكلمات الكويتيه القديمه اللي اندثرت او مازالت متداوله بينا ..

بين معناها ومتى استخدمها واصلها << حسب اللي فهمته لانه لي لحين ماشريته.

امثلة :

الفرق بين لهجة اهل شرق وهل جبله ؟

شرق يقولون كرفايه اما جبله سرير << وامثله غيرها وايد..

زتات و نفنوف و ترجيه << اصل هالكلمات تركي ..

بطيخة معناه حسب ماذكر واقول الكرفايه الكبير وسموها بطيخة الفيلجاوين لانه كانوا طرق الفراش (بس فراش  اظاهر ماكانت متوفره الكرافي) فكان واحد عراقي اعتقد سواله كرفايه واسمه مادري شنو بطيخ فسموها عليه :) << هذا اللي اذكره طبعا قد يكون الخطا وارد :)

وفي وايد معلومات عن متى نقلب حرف (الجيم) الى (الياء)..

اتوقع وايد بتكون قرأته ممتعه ومفيده خصوصا وانه الحلو فيه ان اهو مو مجرد كتاب مقروء لا مزود بقرص مدمج (سي دي) يحتوي على الكلمات وطريقة نطقها بشكل صحيح هذ اذا ماخب ظني :)

سعر الكتاب :

12 د.ك ..

متوفر في :

مكتبة العجيري بس حاليا بصدد توفير  طبعه يديده ..

سايت الكتاب (هنا)

من جانب اخر في بلوق بنفس الفكره واهو متخصص باللهجة الكويته اسمه حجي (اضغط هنا) هم مفيد بهالمجال ويعتمدون على العديد من المصادر اللي وثقت هالمواضيع :)


ملحوظة :البوست مجهود شخصي فالخطا وارد خصوصا انه معتمد على ذاكرتي قصيرة المدى ..
مصدر الصوره (هنا)

Labels: , , | 23 comments
Sunday, December 19, 2010

postheadericon ودي اصير مكانها ؟!؟

8:14 PM

مااحب اكون مذيعه مو اهتماماتي كلش !

بس ابي افتر العالم مثلها واوثق هالشي  واجرب كل شي..

واهي تسوي هالشي ببرنامجها مشاوير المتعلق بالسفر حول العالم وتعريف المشاهد  بثقافات الشعوب المختلفه وبعض الاماكن المشهوره بكل بلده و اشهر العادات و الاطعمة  الانشطة الممكن القيام بها فيها .. والخ ..

يعرض البرنامج ع قناة ابوظبي بس متى مادري انا القى خواتي يشوفنه ابسط معاهم ..

بس ممتع واهي تقدم بتلقائية وتحاول توفر اهم المعلوماتي السياحيه اللي تفيد المشاهد..

بعض مقاطع البرنامج متوفره (هني )

وماشاءالله الله يهنيها يارب ويرزقنا :)

مصدر الصورة (هذا)
Labels: , , | 27 comments
Saturday, December 18, 2010

postheadericon Finger Teeth Wipes & Tooth Care Pile

5:06 PM
السلام عليكم ..

من زمان كنت بقولكم عن هالمنتج مجربته قبل سنه تقريبا ..

ونسيته وماذكرته الا لما قريت بوست بربل (هذا اهو)

اسمه :

Finger Teeth Wipes

 وهو عباره عن 12 منديل  لتنظيف الاسنان واللسان واللثة , بنكهة النعناع ..

*التعليمات وطريقة الاستخدام*


وشكل المناديل كل واحد يكون مغلف بروح ..

وكاهو من داخل (تلبسونه ع الصبع)
 رايي :

الحلو فيه انه كل واحد مغلف بروح انظف , وحجمه صغير سهل حطه بوكي , ومايحتاج ماي ولا معجون فقدر استخدمه بكل مكان ..

وبعد ماجربته حسيت بانتعاش ونتيجته تقريبا مثل التفريش بالفراشة والمعجون بس الطريقه التقليديه تتفوق عليها طبعا :)

وين تحصلونه ؟؟

شريته مرتين مره من كارفور و مره من مركز السلطان ..

سعره ؟؟

مو ذاكره بالضبط بس جنه بحدود الدينار وربع ..

ماخلص البوست :)

هم عندي منتج 2 نفس فكرته  ماخذته من دايسو..

اسمه:
Tooth Care Pile



كاهو من داخل مثل الفوطه وكل جيسه فيها حبتين بس :\

امم كمقارنه بين المنتجين ..

الاول احسن من ناحية التغليف مثل ماقلت كل واحد بروح فنظف وهم مايضر اذا طلعنا من العلبه الكبيره لانه مغلف , هذا اذا طلعناه لازم نستخدم و نرده ع طول عشان مايتوصخ ..

الاول نتيجته افضل لانه في ماده مثل المعجون وبنكهة النعناع فيعطي شعور بالانتعاش , ال2 لا مجرد فوطة بدون اي نكهة او ماده ..

الثاني اعتقد يمكن استخدامه اكثر من مره عكس الاول بس استخدام واحد , بس لاعاده الاستخدام يبيلها غسيل فعباله الموضوع :\
Labels: , | 29 comments
Friday, December 17, 2010

postheadericon تذكرونه 6 ؟!؟

1:39 PM

السلام عليكم ..
عندي وايد بوستات لهالسلسله بس نسيتها مع اللويه اللي صارت الاسبوعين اللي فاتوا ..

 (ج1 , ج 2 , ج3 ,ج4 ,ج5)

تذكرونه ؟؟

برنامج كيف وليش..

كان ينعرض على فناة LBC الفضائية اللبنانية ..

كل يوم العصر اذا ماخب ظني ..

واغنيته :

احم احم خخخ ..

كيف وليش صار بدي اتعلم عن كل الاشيا اسال ..

(ومادري شنو الباجي ومو متاكدة اذا صح الكلمات لاني برفسوره بتغير كلمات الاغاني اي كلمه نفس الوزن احطها خخخ..)

وكان فيه وايد شخصيات..

-Dede المذيعه ..
-والمهرج نسيت شسمه ..
-والست حشوره
-والست ثرثاره ..

وغيرهم وايد ..

وفي فقرات منها فقرة الاه او اي خخخخخخ ماعرف شسمه بس اهي الفقره التعليمية اللي يحطون تصرف غلط ويقولون ا او اي يدلي انا :d

وعقب يصلحون التصرف..

وكنت احب فقرة الشغال اليدويه ..

اهو برنامج فيه نسبة ملاقة بس بنفس الوقت كان مفيد وممتع بايامنا :)

عرفتوه ؟؟تابعتوه ؟؟



ملاحظه :التظليل القوس قوزح اللي صاير بالبوست :\ بروحه طلع خخخ سكنه مساكنهم  ..

Labels: , | 31 comments
Thursday, December 16, 2010

postheadericon Rainbow Products

3:54 PM
السلام عليكم ..

خاطري بهالسنفره من زمان جريب السنتين قريت عنها بكويتيات يدورونها وحبيت فكرتها ..

اللي اذكره انه كانوا يدورونها لانه الكشك اللي كان يبيعها بالفنار شالوه :(

وهي عباره عن طبقات وكل طبقه لون وريحة وفايدتها نعومه للجسم ..

هذي صورتها من امازون ..


ونا احوس بقوقل اليوم حصلت منتجات 2 شبيه لها ..

اول شي السنفرات :

في نوعين :

(1)




(2)

وفي منه زبدة ..

وسعرهم رخيص ..

متوفرين (هني )

انا ابيهم بس من الكويت اضمن بروح اشمهم اخاف ريحتهم ماتعجبني :)

تهقون احصلهم؟

*ملاحظة العنوان انا مألفته لانه عامل مشترك باسم كل المنتجات :)
Labels: , , , | 16 comments
Subscribe to: Posts (Atom)

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

انستغرام المدونة (roroalk)

follow me

follow me

My Blog List

Show All

Ads

Meenakon Design Templates