Monday, May 31, 2010

postheadericon brownie spot

4:00 PM
السلام عليكم ..
امس وانا احوس بالبلوقات لقيت هالحلو :)
تحديدا حصلته ببلوق اخوي كميل ..
عاد مريته اليوم ..
هو كشك مخصص للبراوني :)

المنيو ..


اول ما وصلنا له كان بس في شغلات بسيطه هذيل اهما و طبعا المشروبات متوفره..






وهذا ركن الاضافات الحلو فيه انه كاتبين ع كل جار اسمه خدود بنات ومكسرات بس بالمعرب بحيث يسهل ع البياع وع الزبون :)
(ديجستف - مكسرات -اريو- خدود البنات- ام اند امز - سنيكرز)


طلب اختي ورفيجتها براوني الكور الصغار مع برد..
والبرد في 3 نكهات (فانيلا-ككاو-كراميل).
اما الصوص (ككاو-ككاو ابيض- ستربوري- كراميل )



كب كيكتي ..





وعقب فترينا وردينا له يابوا باجي الشغلات ..
دونت براوني..



باند براوني ماكو ع فيول :p



كلاسيك براوني..



لوللي براوني ..



حصيلتنا :) طبعا للي بالبيت كلهم مو بس انا واخيتي..







رايي:
جربت ع طاير كل انواع كل واحد لقمه , وتوني سخنت الباندا وكليتها مع اختي طعمها وايد الذ بعد التسخين واحس طعمهم كلهم مثل الشي ماعدا الكب كيك غير وهذا رايي اختي بعد :)
عنوانهم :
جمعية كيفان -الدور ال1 يم بافلوز و جبال النصر ..
رقمهم :
94080032
واللي يشتغل وايد حليو قلت بصور قال اوكي برحابة صدر :) جان زين الكل مثله :)

Labels: | 30 comments
Sunday, May 30, 2010

postheadericon وناسة :)

3:25 PM
السلام عليكم ..
اليوم بالدوام اختي دزت لي صوره بس تلفوني غبي للحين ماعرف له عدل بعدين كنت لاهيه بالشغل والسوالف خخخ فما عرفت شنو الصوره الا مساعه لما رديت البيت ورتني هالمجله عاد كله اشوف هالعدد بس ماتوقعت انه مهم بالنسبه لي ..
وهذي الصفحه المقصوده جيكوا اغلب البلوقات نعرفهم فيونكات و ابو ذياب و اذواق :)


وختامها مسك الجزء المخصص لي :)
 بس جنه الحجي غير عن اللي انا قايلته خخخ ..

عموما شكرا سوالف :)

شكرا اختي..

الشكر موصول لنفسي خخخ..




Labels: | 32 comments
Saturday, May 29, 2010

postheadericon كيكة الجزر :)

10:50 AM
السلام عليكم ..
مشكله لما يصير عندكم زحمه بوستات وكلها عن الاكل خخخ ..
قبل الاسبوعين تقريبا مريت ستار بكس ابي كعكه مالقيت جيز كيك مخلص ,ولفتت انتباهي هالمنسدحه لما سالتها قالت كيكة الجزر قلت نايس ودي اجربها من زمان (شفتها بالنت)و كنت مجيكه قبل بالمنيو ماكانت موجوده, فسالتها اذا يديده قالت يس..
جربتها لانه دايما اسمع كيكه القرع كيكة الجزر وودي اعرف شلون كيكه بهالنكهة احس مو ضابطة :\
وبما اني ما اكل القرع فجربت هالحلوه ..
حجمها راهي من جذي سادحينها بالقوطي ..




*سعرها :

جنه بدينار ونص..

*ورايي فيها..

طعمها غريب ماجنه حلو "اقصد كسويت" لا طعمها اقرب ماله تشريبه امريكيه خخخ لانه فيها الجزر مبشور :\ وهم الكريمه مو حاليه عادي طعهمها غريب ..

بس ككل زينه بس ماتوقع اعيد الكره :\


Labels: | 36 comments
Friday, May 28, 2010

postheadericon صالون رنيم :)

1:45 PM
السلام عليكم ..
قبل جم يوم رحت مع رفيجتي صالون رنيم فرع خيطان ..عاد من زمان عن الصالونات تعود ع الدلع بالسبا او بخدمة المنازل وصج ماارتحت هناك ..
هذا المدخل كل مكان رازين اسمهم خخخ...

وبعد ع طوف :\ خفت نطلع من الصالون خاتمين اسمهم ع ويهنا خخخخ..


من زمان خاطري اسوي نقشه وريتها صوره وسوتلي مقارب لها طبعا كنت فيلم متميعين علي اللي يشتغل بالصالون لو ماخذه من كل وحده ربع جان ربحت خخخخ..


اهني عقب مانشفت ..


وهني لما وخرت الحنه ..



ماحبيت النتيجه :( ارحم شي ال3 وردات ..

ووحده من متابعات فيلمي شوقتها وحطت نقشه ويت لي قالت لي ماتبين تصورينها خخ ماحطيت بخاطرها وصورتها :p


السعر ..



عن نفسي اشوفه مبالغ فيه خصوصا اني حاطه خفيف وبايد وحده واللي حاطته لي مو خبيره ..
وهم مو متقن عريض جنه مسوينه بقلم شيني ..
وع طاري السعر لما رديت قالت لي امي بجم سويتيه ؟؟ بنص !!
قلت لا بجيت عند المحاسب وحسبه لي ببلاش :\


يالله الحمدالله المهم سويت شي بخاطري :)

Labels: | 43 comments
Thursday, May 27, 2010

postheadericon twisty crispy

3:59 PM
السلام عليكم..
اليوم رايحه لولو هايبر بطلعتنا اختي شافت هالكشك اهو يامثل اللي تكلمت عنه جايون دورت بوستها ماحصلته :\ يا نفس الفكره بس شركة غير..
اهو صارله شهر مبطل تقريبا من اول خمسه..
ماخلاني اصور يقول الشركة مانعه هالشي يقول كلميهم قلت عساني ماصورت هم دعايه ببلاش وهم يمنون علينا :\ بس خخخ صورت هاللقطتين :)
كان مسوين عرض انه تشترين وحده ال2 ببلاش..


وهذيل النكهات عباره عن 11 نكهة (دجاج كاري-الجبن-فلفل احمر حار-ملح وبهار-باربكيو-بصل وخل البلسيمك-خل وملح -فلفل هالبينو-لحم بالاعشاب-فلفل وليمون-ثوم)

وكا طلبنا انا اخترت جبن واختي اختارت فلفل احمر ..


رايي:
حلو اي شي في بطاط حلو بس يبيله ملح خخ :)



Labels: | 28 comments
Wednesday, May 26, 2010

postheadericon التاج السلطاني :)

3:27 PM
قوانين التاج السلطاني كالآتي :
اذكر اسم من طلب منك حل هذا الواجب.
اذكر القوانين المتعلقة بهذا الواجب.
تحدث عن ستة أسرار قد لا يكتشفها من يقابلك للمرة الأولى.
حول هذا الواجب إلى ستة مدونين ، واذكر أسماءهم مع روابط مدوناتهم في موضوعك.
اترك تعليقا في مدونة من حولت الواجب عليهم ؛ ليعلموا عن هذا الواجب.
الطلب الاول :
*اذكر اسم من طلب منك حل هذا الواجب.
الطلب ال2 :
تحدث عن ستة أسرار قد لا يكتشفها من يقابلك للمرة الأولى.
قبل لا ابلش الاسرار ماتنقال بالعلن ولا ماتصير اسرار :\
بحط شغلات خفيفه :
-عندي مشكله دلاغات بسرعه تقضض مع انهم قطن :\
- ما احب اللي يتفلسفون ويصلحون البدليات يعني اهما اسكت مايقطونها :\
-اكره ماعندي المعرب شالغه المهجنه انا خابره ياعربي او انجليزي اما المعرب انحول منه خصوصا اذا في بدليات بالله ناقصني :\ ..
-دلوعه مو باقت ريلي عينتها دريول عندي اهي بس توصل للمقبره والمستشفى حلو الحين المستشفيات تطورت وصار فيها سبا :p
-ترا انا متوهقه ياجماعه .. لاني توهقت بوهقكم خخخ ..
-تذكرت اخر سر البلوق هو متنفس وكل موضوع الناس بتحط رايها سواء مع او ضد مجرد ماخالفك براي تقلب علي مو حلوه صج فرقاكم عيد مدام انتوا ماعندكم تقبل للراي الاخر :)
*الطلب ال3 ..
حول هذا الواجب إلى ستة مدونين ، واذكر أسماءهم مع روابط مدوناتهم في موضوعك.
وبس :)
Labels: | 16 comments
Tuesday, May 25, 2010

postheadericon مطعم اوبيكا(obika)

7:53 PM
السلام عليكم ..
قبل جم يوم رحت جربت هالمطعم عقب ماشفته ببلوق سويره..
امبيه عيزت وانا ادوره فريت المجمع كله اخر شي صدفه لقيته بويهي :\
اهو مكانه صاد جبال المتحجبه وبيت الصابون اللبناني بالافنيوز الجزء ال2 اليديد ..
واهو مطعم ايطالي..
 وهذي طاولتنا في قعده برا بعد حسافه وايد اشرح اللي داخل كلشي اسود يقمت حتى صورة اختي مابين الا ويهها خخخ..

المنيو وترا بس بالانجليزي قالت لي عقب ان شاءالله بيسونه بالعربي ..


صراحه ماعتمدت عليه طلبت عقب شرح القرسون ..
هالصوره مو واضحه وحطيتها لانه كنت اصور جان اييلي المدير يقولي انه ممنوع جان اصوره واسكر الكاميرا واقعد مكاني جني بريئة واقوله سوري بس ماراح امسحها خخ..





وماتبعت عقب صورت اكلنا..
طبعا مشروبنا ماي (ماي ايطالي:)




تبع المقبلاتز.



المقبلات ماحبيت (ايونهم ميصصين مو بس اهما اكثر من مطعم)


الباستا طعمهم كويس الا حلو اختي حبتها مع انها ماتحب صوص الابيض بس هذي ودها تاكل الصلصه بروحها من كثر ماحبتها بالعافيه اخيتي..



بيتزا مارغاريتا مع اضافات دياي ومشروم ماحبيناها :\ يعني لاعين ولا صلصة كله اقل من عادي..




بطاطس (اهما ايبونه فرش من المزرعه لي حلجك مو سوالف الجاهز ومجمد )


الفاتوره وجيكوا مو حاسبين البطاط اهي اهي برد لهم مره 2 عساس ادفع مانتبهت الا بالبيت وبقوله شفت فايده الصور :)
لانه عقب ماقالي ممنوع عادي تميت اصور اكلي خو دافعه فلوسه خخخ وصورت الفاتوره سالني ليش؟؟ للمدرسه قلت لا ارويها اصدقائي عشان ايونكم قالي صج قلت يس العاده جذي قالي اتصورين كل المطاعم قالت افكورس :)




وبس :)

Labels: | 32 comments
Monday, May 24, 2010

postheadericon نيو لوك :)

10:14 PM
السلام عليكم ..
الاسبوع اللي فات شاركت بمسابقة من اكون وفزت :)
والهديه كانت تصميم حدي كيفت عليها خخخ واخيرا بلوقي الاقرع طلع له شعر :p

واهي ماقصرت عدلت وضبطت فيه وتمت تعلمني واستحملتني ليما ضبطته بالبلوق
*هذا الاول :* وهذا ال2 اللي اعتمدته ..

اختي تقول الاول احلى لانه الخط فيه حركه انا حسيت ال2 اوضح انتوا شرايكم ؟؟
وحبيت انه بناتي هذي صورتي وانا مسويه تان بس احترقت شوي خخ وجيكو ع الاظافر:p
مشكوره من اكون :*
Labels: , | 44 comments
Sunday, May 23, 2010

postheadericon الابداع في التقليد :)

10:21 PM
السلام عليكم ..
بعيد عن الصالونات والاكل لانه مليت من ال2 :\ بنزلكم عن شخصيه احب اتابعها واهو ماشاءالله مبدع في مجال التقليد..

ومتمكن بتقليد الشخصيات سواء بالشكل او الحركات او الصوت ..
طبعا عرفتوه ..
باسم فغالي :)
واهو يستضيفونه ببرامج وهم يكون موجود بالميركس دور و في سنه برمضان سواله برنامج مثل الفوازير اسمه الف ليلة وليله ..
ومره بعد صج بدع ماشاءالله بحفله جدام الناس ينتقل من شخصيه لي ال2 مو بس بالاداء بالشكل بعد :)
هذا جم فيديو له اخترتهم لكم ع لطاير :)
في غيرهم وايد بس مستعيله والنت متنح :\
Labels: | 22 comments
Saturday, May 22, 2010

postheadericon cafe organica

7:05 PM
السلام عليكم ..
امس وانا افتر لفت انتباهي هالكافيه ..
اهو متخصص بالاكل العضوي اللي انتشر موخرا (معلومات عن الاكل العضوي هني و هني)..
للي ماله خلق يقرا اهو باختصار الاكل النباتي او الحيواني اللي توفر له جو طبيعي بحت من زراعه او تربيه , النباتات بتوفير له اسمدة طبيعيه والابتعاد عن الصناعيه والاشعاعات والمبيدات وطبعا مع توفير بدائل للتخلص من الحشرات عن طريق الحشرات النافعه والطيور , اما بالنسبه للحيوانات يتم تربيتها في ظروف طبيعيه بحته من تغذيه والجو و الخ..
*شعارهم :

الكافيه صغيرون هذا الجزء ال1 ..


وهذا ال2


وصورة اقرب هالرفوف تحتوي ع المنتجات عضويه مشروبات (ماي-عصير- حليب) او الاكل (تونا -صلصات - اذا ماخب ظني حلاو)



*وهذي 3 صور للجزء ال3 :

ركن السويت( الكيك )..


بنص في نفس علب الهدايا تحتوي ع المنتجات العضويه ..



واهني المعجنات (فطايس والصمون وهم في سلطات)



وحتى المواعين عضوية !!




*المنيو مكتوب ع الطوفه :
جزء المشروبات ..


جزء الاكل :



*طلبنا :
عصير برتقال ..



صمونتي تركي..


صمونة اختي حلوم..




بعد الاكل انا طلعت الخضر والبصل من صمونتي..




اختي طلعت الخضرا انواع واشكال اللي بصمونتها وتقولكم هذا بس من قطعتين ال3 كلتها عادي خخ..



*الفاتوره :

*رايي :
امم الاكل عادي او اقل انا ماحبيت الخضرا ولا اختي لانه مخلوطه بشي غريب طعمه حالي مو ذاك الزود مع الصمون جنه اكل صيني :\ بس اول مره اكل صمونه واشرب معاها عصير واقوم خفيفه بدون لا تصكني تخمه واتشرقد وتبتلش فيني اللي معاي خخخ..
اذا الله كتب ورحت له مره 2 بجرب الكيك والهوت جوكلت :)

*عنوانه :

بس اللي رحت له موجود بالري تحديد بتروفاليو :)


Labels: | 30 comments
Subscribe to: Posts (Atom)

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

انستغرام المدونة (roroalk)

follow me

follow me

My Blog List

Show All

Ads

Meenakon Design Templates