Friday, November 30, 2012

postheadericon سكارفات ع الاحرف العربيه ..

8:25 PM
امس شفت بالانستغرام صور سكارفات اللي ع احرف العربيه حاطينها البلوقر كاندي وساندي (اساميهم لايقه ع بعض خخ)
 
واليوم رحت معرض الخريف قلت يمكن احصل فيه واشوه حصلت 2.بس مو مثل اللي ابي كنت ابي مثلث (مربع بدون تجفيس ) لون افويت والنقشه ذهبيه ,,.
 
الاول ناعم اسود قطن بنقشه فضيه وفي الوان وايد منه اللي اذكره اوفويت بس بنقشه دعمه (بني )
 
 
 
وببوث ثاني لقيت ابيض بنقشه ذهبيه خامته حلوه وفي منه الوان وايد حلوه حسافه ماصورتهم مثل ازرق واحمر وردي .. الخ ..
سعر الواحد : 3 د.ك ..
 
حبييييييييييييييييتهم ..
Labels: , , | 8 comments
Thursday, November 29, 2012

postheadericon ومرت 5 سنين على التدوين :)

10:53 PM
 
- ب29 -11- 2007 بطلت البلوق كمشروع جامعي باسم ترندي غيرل 87 وكنت مخصصته للفاشن والبيوتي كتبت فيه لمدة شهر بس (عقب ماسلمت الهومورك وقفت ..
 
-وعقب 2008 نزلت بوست ولهيت بالجامعه والتخرج والوظيفه ..
 
-ببداية 2009 سويت لي بلوق اسمه شخبوطة وتميت فيه 3 اشهر وصدفة دشيت ترندي جان اشوف انه الردود كلها فيه خخ جان ارد له وصار عندي بلوقين بلوق بناتي وبلوق لشخابيطي ..
 
-ب2010 دمجت البلوقين  مع بعض ..
 
-ب2011 بلوقي صار بالمرتبه ال14 على مستوى الكويت (هني رابط الترتيب )
 
-ب2012 تجاوز عدد زائرين بلوقي المليون ماشاءالله :)
 
 
**شخبوطتي بالجرايد والمجلات **
 
ومن الشغلات اللي تونسني اني اقرا خبر عن مدونتي وهالشي الحمدالله صار اكثر من مره ..
 
(1)
 
بمجلة روتانا (هني)
 
(2)
 
بمجلة سوالف (هني)
 
(3 & 4)
 
بجريدة القبس (هني)
 
 
وكل عام وبلوقي وانا بخير ..
 
وشكرا لكل من تابعني وشجعني ع التدوين سواء هني او بالانستغرام او تويتر او الايميل ,,
 
بفضل الله وثم تشجيعكم ومتابعتكم اهما اللي خلوني استمر ..
 
 
Labels: , , | 17 comments

postheadericon Rainbow Bites

8:32 PM
حلو اليوم بالدوام كان من رينبو بايتس  ومن زمان خاطري اجربه..


اهو عباره عن 24 قطعه (كوره) ملونه مكونه من بسكوت اذا ماخب ظني دايجستف  محشو بنكهات مختلف (كندر ونوتيلا وغيره) ومغطى بكريمه الملونه ..

هني شكله اوضح ..

وهني حجمه بشكل اوضح ..

الاسعار :
10 دك ..

والتوصيل دينارين ..

رايي فيه :

اممم كشكل يشوق لانه الوان بس الطعم عادي والكريمه نكهتها وحده بس يختلف لونها من نوع لي ال2 ، والحشوه شويه لدرجة يالله نميزها يعني انا اللي متاكده اني جربتها اللي بالكندر بس (من شكله عرفته )والطعم اللي طاغي اهو الدايجستف ..
 
وبالنسبه للتوصيل وايد تاخر علينا اول شي قالوا زحمه عقب اختربت السياره بس قلت له اذا تاخر اكثر ماراح ناخذ الطلب خلص دوامنا (اقص عليه بس لانه من 11 الا 10 لي 12ونص لما كلمني يتاكد من العنوان وايد الصراحه )
 
للطلب :
ت: 94405804
واتساب :99523554
اكاونتهم بالانستغرام :
@Rainbow_Bites

Labels: | 0 comments

postheadericon maison martin margiela for h&m (sale 50%

6:30 PM
توني اجيك ع ايميلات لقيت فيه هالخبر من h&m تنزيلات ٥٠٪ ع كولكشن maison martin margiela


عن نفسي ماعجبني الكولكشن بس حلو الخبر للي عاجبهم شي ❤

- Posted using BlogPress from my iPhone
Labels: , , | 0 comments
Wednesday, November 28, 2012

postheadericon واخيرا جربت السوشي ..

10:14 PM
اليوم مريت جمعية الشاميه وشفت ثلاجه عند الكاشير فيها اغراض هالمطعم قلت فرصه اجربه ..
 
وفي وايد انواع بس انا اخترت اللي احب مكوناته ..
 
 اسمه: تمبورا اورا ..
 
في ربيان تمبورا -خيار-كرسبي..
 ومعاه نوعين من الصلصات في واحد حالي وال2 في مروره شويه وملزقينهم بذمه وضمير خخ..
 
والحلو انه معاه الشوباستيك شي جذي اسمهم العصي ..
سعره :
ب2.500 د ك ..
 
رايي :
 
والله طعمه زين بس مااحبيت الصلصات خاصة اللي في مروره , واحس ثقيل شوي او معدتي ماتقبلته :( عسى ماحط الخيار بلستت الممنوعات :( (اللي مايدري هالفتره تقريبا بيصيرلي سنه منتكسه من معدتي من جذي ماتقبل اكل اي شي يعني غير عسارتي بالاكل هم منتكسه الحمدالله ع كل حال )
Labels: , , | 4 comments
Tuesday, November 27, 2012

postheadericon shizens (eye charm)

11:48 PM
هالماسكرا كانت شغله من الاغراض اللي كنت ميمعتهم بالبيوتي لست لسفرة ماليزيا ..
 
ومن الشغلات القليله اللي خذيتها من اللسته ..
 
وخذيتها بناء على مدح مدونة ليزي ديزي (بوستهم عنها هني)
 
واهي ماسكرا الفايبر ..
 
 
يعني قوامها مو سائل مثل الماسكرات العاديه لا تكون نفس الشعيرات هذي الصوره تبين شكلهم ..
 
وهذي فرشتها (الصوره منقوله من مدونة ليزي ديزي )
اما طريقتها :
تحطين طبقه من ماسكرتج العاديه عقب تحطين اهي (ماسكرا الفايبر) ..
 
رايي:
 
جربتها اكثر من مره للاسف ماعجبتني لانها انها تتناثر ع ويه و تدش بالعين ونتيجتها عاديه جدا جدا انا لما شفت اللي حاطتها  العارضه على عين وحده وال2 مخليتها طبيعيه  كان في فرق كبير واختلاف بينهم (هالحجي عقب ماشريتها ) قلت لها شلون تستخدمينها قالت حطيتها 10 مرات الله ان شاءالله مااحطها هالكثر الدوام يخلص والزحمه تخلص وانا  لي الحين امشط رموشي فيها خخ ..
افكر اسويلها ريسيكل واخليها صبغ اظافر مخملي (فلفت ) 99% تفشل الفكره :)
 
سعرها :
 
اعتقد 128 رنجت ..
 
مورخيصه بعد :\
 
 ملاحظه : باجي الصور من google
Labels: , , , , , , | 6 comments

postheadericon بخصوص الاعلان للمشاريع الشبابيه والمحلات ..

10:52 PM
 
السلام ..
 
انا باختصار كنت مااحب انزل ايميلات الدعايات عموما عقب قمت انزل اللي عاجبني منهم بس لييييييييييييييين صار لي اكثر من موقف معاهم خلاني اقول بس ستوب ماراح انزل عن شي انا مو مجربته اول شي بلوقي لي ساحتي الخاصه والحره اكتب فيها رايي بدون اي مجامله ..
 
اللي عاجبه هلا فيه والمكان مكانه واللي مو عاجبه هم حياه الله بس انسوا اني اجامل عجبني بقول ماعجبني هم بقول مو يعني هديه ولا عشان بلوقي ينشهر برتوتيك اجامل لا حشى عساه مانشهر بهالطريقه ..
 
بلوقي ع قدي حابته جذي مرتاحه فيه جذي ضايقوني وايد مشاريع اي من جذي قررت من جم شهر ماااانزل بوست نهائيا عن اعلان لاي مكان بدون لا اجربه مو القصد هديه الله ماكثر الهدايا والدعوات اللي رديتها ..
 
بس حبيت اقول هالشغله كنت قايلتها بالانستغرام قبل رمضان والحين اعيدها للي مو متابعني هناك ..
 
مو بس عشان غثوني هم بالاعلانات احس مافي تميز ببلوقي والمواضيع بتكون متكرره عكس التجارب الشخصيه لو كلنا نكتب عن نفس المنتج مستحيل تكون بوستاتنا متكرره كل بوست بيكون له طابعه الخاص وروح صاحب المدونه..
 
اعذروني بس هذا اريح شي لي ولكم ..
 
والله لايوريكم طناقري :)
 
والحاااااااضر يعلم الغايب .. 
 
وموفقين يارب..
Labels: , , , , , , | 4 comments
Sunday, November 25, 2012

postheadericon Sparkling eyeliner

10:31 PM
 
هالكحله من اشهر انواع الكحل الملون واهي من bourjois..
 
واهو قديم مو يديد شريته قبل جم سنه بس ماكنت احط مكياج فما استخدمته ..
 
ولاني احب الكحل الملون يعطي الويه لوك حلو وستايل شبابي وهم مو بس احب الملون احب اللي فيه قلتر خفيف ماحب المطفي احس جني متكحله بطبشور :\
 فرديت شريته مره 2 جربت اكثر من نوع على ايدي من ماركات مختلفهم وكان اهو احسنهم ..


 
 
 
 
 
يعني كل الموصفات اللي ابيها متوفره فيه (يمدحونه ، لونه حلو مثل اللي ابيه ، فيه قلتر ، الاحسن بعد تجربه ع ايدي ، سعره مناسب )
 
رايي بعد التجربه :
 
انا احطه داخل عينه من تحت واحاول اعرضه بشكل خفيف لتحت رموشي مو وايد شي بسيط مو اللي واضح ..
 
والنتيجة: طلع مقلب مانسبني مايخط عدل داخل العين امرره ع نفس المكان اكثر من مره وهم احس خفيف وباهت وبايخ وبنفس الوقت هم مو ثابت بسرعه يروح اعترف انه هالشي مو بس من سبته هم عيني مو اي شي يثبت فيها بس هذا بدعه ..
 
باختصار مااحبيته ..
 
كنت بصرفه اعطيه بنت عمي طلع عندها مثل وتمدحه بس اهي استخدامها له غير تستخدمه كايلاينر ..
Labels: , | 2 comments

postheadericon جديد سب وي ..

7:46 PM
 
امس عقب عناء كنت بروح ايفنت للبلوقر ساعتين مالقيت مكانهم رحت صب وي قلت اجرب يديده لانه  غرامي البيتزا و من فتره خاطري اجربه  لدرجة مره واقفه اشوف دعايتهم بالافنيو جان اختي تزفني خخ ..
 
 
اهي متوفره ب3 انواع مثل اهو مبين بالصوره انا جربت اللي فوق بيتزا صب ملت وحسبالي تكون مكوناتها ثابته مايخلوني اختار ..
 
طلع لا اهي فيها شغلات ثابته وفيها اضافات حسب ذوقكم ..
 
الصور مو واضحه لانه مصوره من بعيد وقاصتهم..
 
اهني عقب ماحطوا الببروني (اعتقد هذا اسم اللحم اللي حطوه مو متاكده) وصلصة البيتزا و الجبن  وطلعوها من الشوايه ..
 
 
هني عقب ماضفت قالي تبين خس قلت اوكي و قالي تبين اي صوص ؟؟ قلت عادي صوص !! حط سيزر وايدي ع قلبي (مجازا طبعا خخ) عسى ماتطلع خبيصه وتطيح بجبدي واخر شي ضفت الاورغانوو ..
 
رايي :
 
حبيتها والله زينه و اشوه ماطلعت خبيصه ..
 
ت : 1849999
Labels: | 0 comments
Saturday, November 24, 2012

postheadericon Big Bold Mascara & Precision Mascara

11:37 PM
اكثر شي اعاني منه الماسكرا لانه رموشي قصار + اخاف على عيني :\
 
الشهر اللي فات خذيت 2 من ايزدوا بناء على نصيحة البياعه جربت علي 3 و ال2 الاحسن عطتني اياهم ..
 
الاولى ..
 
Big Bold Mascara   
 
درجتها :
10 black ..
 
رايي :
 
اهي الاحسن من اللي جربتهم تقريبا موخرا جربت 5 او 6 ماسكرات هذي احسنهم بس هم مو توب ولا مثل اللي بخاطري ..
 
وتعطي فيليوم بس عشان اشوف نتيجة لازم احط اكثر من مره بس احب شعور انه رمشي ميبسه :\ او انه متكتله الماسكرا راح افرك عيني واطين الدنيا :\
 
سعرها :
6.500 د
 
اشتريها مره 2 ؟؟
 
لا طبعا لانه ابي ماسكرا احسن ومفعولها اقوى واسرع ويفضل انها تكون طبيه مو بس تجميليه ..
 
ال2 :

Precision Mascara

 
درجتها:
Deep Black10
 
رايي فيها :
اكثر شي ماحبيت فيها فرشاتها ضيعفه واحس قاسيه خصوصا اذا حاشت الجفن من داخل صوب منبت الرموش تعور ..
 
وعموما ما حبيتها كلش احس ما تضيف شي لرموشي  لانه المفروض احطهم 2 مع بعض اهي والاولى بس وجودها مثل عدمه ..
 
سعرها ..
8.500
 
اشتريها مره 2؟؟
مستحيييييييييييييل
 
وجاري البحث عن ماسكرا سنعه وطبيه ..
 
ملاحظة: الصور من سايت الماركة الرسمي
Labels: , | 10 comments

postheadericon قاطعوا .. قاطعوا ..

9:55 PM
 
 
ذاك اليوم تقريبا الاسبوع اللي فات كنا انا واختي نتمشى بالافنيو ولاهيين بالسوالف ماوعينا الا هاللي راز ويه معانا ..
اهو: مساء الخير ..
احنا : @@ @@
والافكار تاخذنا وتيبنا جنه تنقال جذي ( انا حسبالي هدومي انشقت :/ واختي حسبالها لاني اشتطيت بالسوالف فحسي عالي واهو بيقولي قصريه) وطبعا ماردينا عليه
اهو : جزاكم الله خير قاطعوا قاطعوا
احنا : @@ @@
وعلبو انه راح قلت لاختي كملي كملي مالج شغل فيه ( اهي كانت لافه ) بكمل ولا اهو واقف يطالعنا ويتبوسم !! يما ..

لفينا وحقرناه :/
 
عسى ماشر ؟؟ ماتوصل المواصيل فيهم انه حتى بالمجمعات يكلمونا ( بغض النظر عن توجهي ورايي وتوجههم ورايهم اتكلم كمبدأ مايصير الا اذا كانو ماخذين تصريح من هالمكان بخصوص حملة توعية خاصه او شي من هالقبيل)
 
حلاته قايلته انقاطع الدنمارك ! عشان يقدم استقالته من الدنيا خخخ
 
ملاحظة :الصوره منقوله من جريدة الكويتية هني

- Posted using BlogPress from my iPhone
Labels: , , | 4 comments
Thursday, November 22, 2012

postheadericon Revlon Colorburst Lip Butter

8:53 AM
احبــــــــــه .. احبـــــــه .. احبـــــــه ..

من المنتجات  التجمليه واللي بالنسبه لي اعتبرها علاجيه بعد..

زبدة ككاو من رفلون ..

اهي عباره عن 3 في 1..

زبدة ككاو+قلوس+ حمره.

قوامها:
قلوسي نوعا ماثقيل ..

الالوان :

وبالنسبه للون كثر ماتحطينها يغمج اللون ، ومتوفر بالوان وايد بس ماحصلت الا درجات محدده ببوتس ..
 وخذيت منها 3 :
- Berry Smoothie 050  (وردي)
-Pink Truffle 001 (بيج ع وردي)
-Peach Parfait 025 (مشمشي ع بيج ) هذي اول وحده شريتها وبسرعه خلصتها ..

وكل الوان تعتبر طبيعيه (بالنسبه للي جربتهم)..
Peach Parfait 025


Pink Truffle 001


اللون ال3 مالقيت له سواتش سنع ..
وهذا link
(Revlon Lip Butters UK Shades Swatch  ) البوست اللي خذيت منه الصور..

سعر الوحده :

4 دك

رايي:

اللي حبيت فيه والوانه طبيعيه وانه 3 في 1 وترطيبه حلووو وينعم الشفايف ..
Labels: , | 0 comments
Tuesday, November 20, 2012

postheadericon ETUDE HOUSE \ SWEET DREAMS

9:28 PM
هالمحل عجيييييب حبيته اهو مختص بالبيوتي (غرامي) موجود باغلب دول شرق اسيا دشيته بتايلند بس كنت مخمطه لين قلت بس مصختها فماخذيت الا ماسك الايدي لا وبنت عمي خذته لي بعد (اهي مهوسه بالبوتي مثلي)..
 
وباخر يوم لنا بماليزيا شفناه جان ندش انا وخواتي هالمره خمطت عدل وطلعت جان اشوف ماسك عجبني جان ارد ادشه باخذه بدال الماسك طلعنا بماسكات شي للحنج وشي للخشم مع منتجات 2 جربناه وشفنا مفعولهم حلو خذيناهم ..
 
اهم ملحوظه ان هالمحل اسمه اساس  ETUDE HOUSE
 
بس الفرع اللي بي بي بلازا مادري سونجي بلازا (اهما مجمعين يم بعض مابينهم شي يعني تمشين ببي بي بلازا ماتوعين نفسج الا بسونجي :\ خلوه مجمع واحد وفكونا :) المهم اسمه سويت دريمز ..
 صورت جم صوره ..
 
اول 3 صور كريمات للايد ..
 
 
 
وهذول سفنج وفرش للمكياج..
 
 
 
ماصورت وايد لاني كنت لاهيه بالتشري. ، هذي مشترياتنا ..
 
بنزل شنو جربت منهم ورايي فيه ببوستات منفصله ان شاءالله ..
 
سايته :(هني)
Labels: , , , , , , | 7 comments
Sunday, November 18, 2012

postheadericon iphone cases @ claire's

8:16 AM

قبل جم يوم مريت كليرز وشفت كفرات ..

هذا شفته باكثر من مكان بس هني جنه ارخص بحدود 5 ..

وهذا ع جنطة عجب اختي انه بوك وكفر مره وحده عن نفسي مايناسبني لاني اصور وايد ..
 من داخل شكله جذي..

وعلاقه..
 ومتوفر بلونين ..
سعره 7 ونص..

من فرع الافنيو اللي يم كارفور..
Labels: | 0 comments
Saturday, November 17, 2012

postheadericon GARNIER BB Cream @kuwait

7:09 PM
هللوو ..
 
هالبوست كنت متردده انزله او لا علبو انه الاغلب يدري انه بي بي كريم نزل تقريبا من الشهر اللي فات  بالجمعيات هالشي استشفيت من سوالفي مع رفيجاتي بس امس بالنت اكتشفت انه مو الكل يدري..
 
فقلت مدام عندي صور خل انزل حق اللي مايدرون ..
 
 انا خذيته من كارفور وهو متوفر باغلب الجمعيات وبمركز السلطان بعد ..
 
الحلو بكارفور وفي بعض الجمعيات اعتقد الخالديه وحده منهم ،انهم موفرين تستر من الكريم بحيث تجربينه قبل لا تشترينه ويطيح بجبدج ..
 
الكريم متوفر بدرجتين :
-الفاتح ,,
-المتوسط ..
 
خذيت الفاتح ..
وهذا مو اول بي بي كريم من غارنييه عندي اصدار شرق اسيا ، لانه غارنييه من الشركات اللي توفر لكل مجموعة دول اصدار معين من نفس المنتج وبنفس الاسم بس بمواصفات مختلفه..
 
اللي اعرفه لي الحين انه بي بي كريم متوفر ب3 اصدارات :
-صنع بامريكا ..
-صنع بشرق اسيا..
-صنع بالمانيا (وهذا اللي متوفر عندنا)
 
حسافه مالقيت من بي بي كريم القديم اللي عندي الا قوطيه خخ بس ان شاءالله اذا لقيته اسويلكم مقارنه كامله عنهم من حيث القوام والاستخدام والنتيجه .. الخ ..
 
بس هذي بعض الفروقات اللي لاحظته (قريتها على العلبه ):
 
-اللي متوفر بالكويت من حيث الحجم اكبر لانه 50 مل اما اللي من ماليزيا اصدار شرق اسيا 20 مل وماعندي فكره اذا متوفر باكثر من حجم عندهم او لا , بالنسبه للكويت متوفر بحجم 1 ..
-اللي بالكويت من ناحية الفوائد مكتوب انه 5 في 1 :
-يوحد لون البشره ..
-يقلل العيوب والشوائب ..
-يعزز الاشراقه الصحيه ..
-يرطب 24 ساعه ..
-يحمي من اشعة الشمس الضارة  بنسبة 15 SPF ..
 
اللي من ماليزيا مكتوب 10 في 1 :
-يخفف الاحمرار..
-يخفف المناطق الغامج ..
-يقلل من وضوح المسام
-يقلل من وضوح الخطوط ..
هالنقاط احس كل توحيد اللون  وتحسين مظهر البشره..
-يعزز الاشراقه الصحيه ..
-نعومه ..
-ترطيب ..
-تناغم ..
-اشعاع اتوقع قصدهم اشراق اهما فوايدهم مكرره جني قاعده بامتحان او بحث وغصب طيب اطلع معلومات عساس اكتب تعبير 10 اسطر او بحث 10 صفحات ..
-نسبة حمايته من الشمس 26 SPF ..
 
يعني مبدائيا 3 فروقات واضحه الحجم والفوائد ونسبة الحماية ونسبة الحماية من الشمس..
 
ماجربت كريم الكويت لي الحين اللي من ماليزيا جربته مره ومااحبيته وايد بس اذا لقيته باستخدمه مره 2 ان شاءالله ..
 
وبالنسبه لسعره:
 
مناسب جدا جدا كانوا التاجرات بالنت يوفرنه ب13 مادري 15 :\
 
بكارفور سعره2.525
 
بمركز السلطان ب2.750..
 
Labels: , , | 9 comments

postheadericon Dermoviva Wet Wipes

4:38 PM
احب الوايبس (المناديل - الكلينكس) للبشره خصوصا وهم عندي سن بلوك (حماية من الشمس كلينكس واكثر من نوع ديودرنت و اللي للبق قلت لكم عنه هني و اسيتون لصبغ الاظافر قلت لكم عنه هني و هني وهم المعقم بس مو لاقيه لينك البوست :\)
 
بس استخدامي لهم بسيط مو مثل الوايبس الخاص بتنظيف البشره استخدمت وايد انواع  احبها لانه تفيدين اذا كنت مستعيل وماعندي وقت لروتين بشرتي اليومي الغسول و التونر وهم اذا بمسح مكياجي للصلاة بالدوام واذا بنام دايخه ومالي خلق استخدم غسول و مزيل مكياج ..
 
من الانواع اللي استخدمتها غارنيييه و n7 وفيتامين e من بوتس ( اضغط ع اسم الماركة لقراءه البوست الخاص فيهم )..
 
واخر تجاربي اللي بتكلم عنه بوست اليوم اهو

Dermoviva Wet Wipes

من فاتيكا ..
 
 
وهو خاص بالتنظيف العميق ..
 
وفي نوعين غيره:
- مضاد للبكتريا ..
-مزيل مكياج ..
 
بالنسبه للي جربته مكتوب عليه تنظيف عميق مناديل ازالة الدهون غنية بخلاصة الليمون والخيار ، تنظف مسام البشره بالكامل وتزيل الدهون الزائدة والاوساخ ..
 
وفيه حوالي ال20 قطعة ..
 
رايي:
 
كاستخدام حسيته عادي مو وواو اللي يميزه عن غيره ريحته الحلوه الفواحه اهي بس كافيه انها تعطيني احساس بالانتعاش ..
 
سعره:
 
حصلته بكارفور وسعره بحدود 540 فلس او 570 .. << هم يعتبر رخيص مقارنة بغيره واهو اصغر من الاغلب واقل كمية بس فرق بسيط بينهم بالكميه ي5 او 10 حبات بس بالسعر الفرق مضاعف يعني الاغلب جريب الدينارين (وحجمه انسب للجنطه)..

Labels: | 0 comments

postheadericon cup cafe

1:50 PM
 
غداي امس كان من هالكافيه ..
 
طلبت تويستر ..
 سعره 1,500 ..
 
اول ماشفته حسبالي يايبنه لي بدون صلصة كنت بنجلط ولا اشوه الصلصه حاطينه ع كتر بعلبه بروحها احسن عشان ايي البطاط ذاوي \ ذايب ..
 حبيت التويستر 3>
 
وطلبت فوتشيني بالصلصة البيضا ومكس روبيان ودياي ...
الفوتشيني عادي زين مو مميز ..
 
الدياي حلو والربيان غرامي ويا مضبوط مثل مااحبه ماشاءالله ..
 
سعره اعتقد ب2.300 شي جذي ..
 
 
رايي :
 
الاكل ككل حلو وحبيته  واسعاره مناسبه وهالكافيه بيكون من مطاعمي المفضله بالجهرا بس حبيته كتوصيل اكثر من قعده فيه لانه جربته العام جنه وكان مكان الحريم منفصل عن الرياييل (ميزه ) بس ذبحتنا ريحة الشيشه اختنقت منه ، الحين مادري شلون الوضع فيه ..
 
بس الله يسلم التوصيل ..
 
ت : 24563997 - 24563998 ..
 
عنوانهم : الجهرا - بسليل ..
 
هم مكانه حلو للي بيون من برا الجهرا للمنتجع  يقدرون يجربونه ..
Labels: | 0 comments
Friday, November 16, 2012

postheadericon bliss now @ kuwait

7:39 PM
امس يوم الاكتشافات البيوتي ..
 
حصلت ماركة bliss  اعتقد انه توه تتوفر بالكويت لانه قبل ماحصلت الا منتجات بسيطه منهم في بوث سيفورا بمعرض العطور اعتقد 2010 واشوف الاغلب يطلبونها من النت ..
 
 
اللي لاحظته اغلب منتجاتهم متوفره للجسم والبشره..
 
خذيت برشورهم كانو حاطين فيه التوب 5 بس مو محددين الترتيب ..
 
- واكس (شمع ) شفت صور بالنت شوقتني عليه ..
 
 
زبدة جسم بالليمون ..
 
ماسك الاوكسجين ..
 
غسول للوجه ..
 
كريم للسيولاليت اعتقد واهو يكون جزء من الروتين اليوم مع رجيم والرياضه ..
 
 
ومن الصوب ال2 من البرشور حاطين عن هالست متوفر للايد والريل ..
 
 
الست عباره عن كريم للايد او الريل ومعاه اذا للايد قلفز واذا للريل دلاغ ..
 
سمت ست الايد لانه كنت اقرا مدح عليه طلع ب20 د اذا ماخاب ظني ..
 
موجوده الماركة بهارفي نيكلز بغراند الافنيوو ..
 
وان شاءالله يبطلون عند bliss سبا مثل برا اعتقد موجود بقطر..
Labels: , | 0 comments
Subscribe to: Posts (Atom)

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

انستغرام المدونة (roroalk)

follow me

follow me

My Blog List

Show All

Ads

Meenakon Design Templates