Saturday, August 27, 2011

postheadericon لمكة شديت الرحال لبيت الله و اركانة

10:12 PM

ساعات قليله وبكون هناك ياااااااااااارب ..

اول عمره بحياتي الله يتمم علي ,حدي مستانسه :)

باعظم شهر وباخر ايامه بكون باعظم مكان الحمدالله يارب كما ينبغي لجلال وجهك وعظيم سلطانك ..
Labels: , | 17 comments

postheadericon سلطة الحلوم :)

12:13 AM
هم هالسلطة علمتني طريقتها @kuwaiiitya 

واليوم سويتها ..
(الوصفة كمقادير وطريقة منقوله حرفيا منها لما قالت لي عنها بتويتر يعني باسلوبها )

المقادير :
خس
وخيار مخلل شرايح
وزيتون اسود شرايح
وخيار عادي
وذرة

الصلصة:
 3 قفاش صلصة ايطالية جاهزة\ربع كوب زيت زيتون\ربع قفشة عصير ليمون\1 ونص قفشة خل\رشة زعتر

الطريقة :
خلطي المقادير الاولى وصبي عليهم الصلصة ، وشوحي الحلوم عالنار وقصصيه وضيفيه لهم

شرايح الحلوم اقليها بزيت زيتون

اراء المتذوقين :
 
عجبتهم :)
 
اختي الكبيره تقول حلوه وتنفع للريوق بعد :)
 
اختي الوسطيه هم قلت حلوه بس وايد زيت والغلط مني كان في زيت من االزيتون مع اني حاولت اصفيه بس تم شوي اللي بالزيتون نفسه وهم قللت الزيت زيتون نفسه المره ال2 بسوي لزيتون استشوار خخخ  وتقول حلاته االحلوم مقصص ومخلوط معها قلت انا رزته فوق زينه وعقب نخلطه خخخ..
 
اخوي عجبته بس مايبي المخلل يقول زايد من ملوحتها :\ وهم مثل رايي اختي عن الحلوم ..
 
الزبدة من الوصفات اللي اكررها :)
 
شكرا كويتيه :*
Labels: , | 7 comments
Friday, August 26, 2011

postheadericon Blink

12:22 PM
اول مره اكتب عن برنامج لبي بي ..

اهواساسا ماعندي الا برنامجين غير الواتس ب وتويتر وبيبي مسنجر مو حيل اهتم بهالسوالف والبي بي في قحط برامج ..

قبل جم يوم دزت لي اخت رفيجتي بي سي عنه اهو برنامج يغير لون الليت الاحمر اللي فوق ويشب كل مايلك مكالمه و مسج و بي سي او .. الخ وحبيته يونس خخخ قبل لا انام يكون تلفوني سايلنت فجاءه اشوف داري تنور بالوان وناسه بدال الاحمر المليق واتم اطلع الليت ابي تذكر مختاره اللون لشنو !! فما اذكر خخ ..

في وايد الونا خضر - زرق -بنفسجي واصفر ... الخ وهم تقدر تختار مجموعة الوان مره وحده اسمه ديسكو ..

والحلو انه لكل شي تقدر تحدد لون من جذي انا اتخربط خخخ..

والاحلى انه بسرعه يتنزل ويتحمل ..

للتحميل اضغط هنا

Labels: | 4 comments
Thursday, August 25, 2011

postheadericon Nails & Co

8:30 PM
من زمان مو رايحة سبا ولهت عليهم جدا جدا..

ونوره كانت منزله بوست عنه ببلوقها هني شوقتني اجربه ..

 اول ماشفت قلت واو ..

حبيت الرد كاربت ..

هوليود ستارز وكاتبين عليها اذ ماخب ظني تهنئة لصاحبة السبا ..

ونخوش ..

عجيييييييييييييييييييييييبه ماشاءالله اطول مني خخ تقريبا بشبر يعني ااتوقع طولها 180 سم تقريبا ..

وفي ااكثر من قعدة ..

وانا قعدت هني..


وعندهم تشكيلة اصباغ اظافر كالعادة النصيب الاسد لزويا وهم في opi و شانيل و essie وdolce & gabbana و CND‏ وفي واحد اعرف شكله بس ماثبت على ماركته ..
 المنيو ..
 واخترت هالنوع ..
 وفيه :
 + تريتمنت لجفاف قاعة الريل (بدينار) ..
وهذي الضيافه ..

حبيت الكوكيز وحتى كنت بسألهم من وين بروح اخمط منه خخخ..

وفركوني وسنفروني وضبطوا اظافري وعقب يابوا هالجهاز ..


وطلعوا منه هذا لايدي ومثله نوع 2 للريل ..
 ولبسوني فوقه هذا..
 وهوا عباره عن ماسك حار وطري يشوق :)

واخترت هاللون من شانيل لانه ابي لون فاتح وخاطري اجرب هاللون كتغير عن الاحمر والفوشي..

النتيجة ..

ولما حاسبت عطوني كابون اذا استخدمته كله لي جلسة فري ..
رايي:

وايد حبيت المكان والخدمة والكوكيز والستاف وايد حليوين وخدوميين وبطلعتي كنت بزلق وحده شهقت وال2 يت امسحت ريولي عشان امشي ع راحتي  :)

واكثر شي حبيته كنتيجة ترتيمنت قاعة الريل ..

عنوانه:

كويت سيتي (الداون تاون) -ش فهد السالم -برج النصار يم فندق الشيرتون - بالسرداب ..

ت : 22258100 - 22258101

Labels: , , | 18 comments

postheadericon nail spa & nail spa & nail spa

12:02 AM
شنو هذا !!!

حرام عليكم ..

كل يوم مبطلين سبا يديد وانا قلبي رهيف واتشوق بجرب :\

وقول الشهر الياي هالسبا يفتحون 2 اقول لا هذا !!

لو كل ظفر اسويه بسبا ماخلصت :\

نطروني اخلص وفتحوا عقب خخ..

ولا ترا فتح سبا ويب هالمزيون يخرب عليكم :p



Labels: , , , | 4 comments
Monday, August 22, 2011

postheadericon (white impress (whitening‏ LUX

11:06 PM
احلى شي بتايلند كريماتهم خمطت لين قالت الجنطة بس وكليتها بالشحن و بحزت ترتيب قشي ماكفوا جناطي :\

المهم جنطة 25 كيلو 3\4 كريمات وصابون .. الخ من سوالف البيوتي..

استخدمت جزء بسيط منهم مع انه صارلي شهرين راده فيبيلي جرد قوي وكورس بيوتي اقوى ..

من اللي خلصتهم صابون لوكس وماحصلت نفسها بالكويت :\

خذيت نوعين :
الاول :bar soap


وال2 : Body Wash


رايي فيهم:

الصابونه ماحبيتها كلش وايد تنشف , الغسول ينشف بس مو كثرها وبالنسبه لي احسن منها والحلو فيه انه فيه منه اكثر من 4 احجام اللي خذيتهم الحجم الصغير للسفر واشوه ماخمطت وايد الا من الغسول , الصابونه اكتفيت بوحده ..

وهم احس ينظف عدل بس انا عمري مااستخدمته بروحه كل استخدمه مع الصابون الافريقي..
Labels: , , | 10 comments
Sunday, August 21, 2011

postheadericon Pink Pasta

7:57 PM
هذا 3 طبق سويته يوم الخميس وهم علمتني طريقته @kuwaiiitya

بسرعه بسرعه سويتها ع طول من الجدر لي بطونا خخ ولانه اذن فما اهتميت بالتزيين ,واني اسوي خلال نص ساعه 3 اطباق يعتبر انجاز بالنسبة لي ماشاءالله طبعا اختي ماقصرت وساعدتني ..

المقادير :
-معكرونيه
-صلصة المعكرونية الجاهزه من العلالي ..
-كريم حمره
-تباسكو
-موزاريلا

الطريقه باسلوبها:

-سلقي الباستا وخلطي هالمكونات عالنار : علبة صلصة المعكرونية بالزيتون والمشروم جاهزة ١ كريمة حمرا رشتين تباسكو
وعقب ضيفيلهم الباستا وخلطيهم وضيفي شوي جبن مع الخلط صفيها بالبايركس وفوقها موزاريلا بس هذي حلاتها قبل الفطور بشوي تسوينها عشان ماتنشف..

اراء المتذوقين :

انا ماحب البنك باستا بس ذقتها وكانت زينه بس حسيت شوي ماصخه فزدتها جبن موزاريلا  البودر  ,وغلطت اني ماحطيت ملح شويه مع الصلصه مع انها قالت لي و انه ماكثرت الجبن بس هالغلطتين بسهالات رقعتهم :) , واهلي عجبتهم ماذكر رايهم بالضبط بس خلصوها عقب السحور كان في شويه بس ..
وحبيت انها سهله :)

والحين ودي اتعلم شلون ازين الاطباق :)
Labels: , | 12 comments

postheadericon اخر 3 ايام لعرض سبا تايم ..

3:40 AM

قبل جم يوم كنت رايحة سبا تايم اخذ منه قفت فاوتشر لرفيجتي وسمعت عن عرضهم ..
مثل ماهو مذكور بالاعلان نص سااااعة مجانية ولعمل من اختيارج ..

اول مره يسون عرض من عرفتهم يعني من سنه وشي خخ فلا يطوفكم :)

بيخلص ب24 \8 \2011م ان شاءالله..
Labels: , , , | 10 comments
Saturday, August 20, 2011

postheadericon سيزر رورو :)

2:46 PM
هذي سلطة سويتها اول امس وانا مجاابله الفطور لانه اذن :\



اهي الفكره بتزينها بس  وكان ع السريع لانه ابوي بيقوم  زين مالحقته فيها خخ..

المقادير :
-خس ..
-صلصة سيزر جاهزه ..
-خل..
-توست ملون من برد توك ..
-بوب كورن دياي ..

الطريقه:

-نقص الخس , نقلي البوب كورن ..
-ونحمص التوست بالتوستر عقب نقصصه مربعات..
-نخلط الخل مع سلطة السيزر وعقب نخلطه مع الخس..

ونزينه ..

اراء المتذوقين :

امي عجبتها وبسويلها ايها مره 2 اليوم ان شاءالله , اختي الكبيره هم حبتها , اختي الوسطيه ماتحب الخل بس تقول ماحست بطعمه ..


Labels: | 6 comments
Friday, August 19, 2011

postheadericon بيتزا البسكوت :)

10:34 AM
امس قعدت الساعه 6 الا 5 ودشيت المطبخ بسوي 3 اطباق فالاشكال ماكنت مضبوطة وايد :\

هذا طبق من الاطباق اللي علمتني عليه @kuwaiiitya  :*
المقادير:

-توست..
-بسكوت ريتز الاحمر.
-خلطة البيتزا الجاهزه من العلالي بالزيتون والفطر..
-فطر..
-شرايح زيتون ..
-جبن الموزاريلا ..
-اوريغانو ..

الطريقة باسلوبها:

 -تقطعين التوست مدور كبر البسكوتة تدهنين بينهم بجبن قلاص وتكون البسكوتة القاعدة.

-تدهنين بين البسكوت والتوست بجبن قلاص وبعدين تمسحين عالتوسته من صلصة البيتزا وفوق شوية زيتون شرايح(انا زدت فطر بعد وكنت بحط نقانق بس مافي وقت بياذن :\) فوقه جبن موزاريلا ورشة اوريغانو..

و5 دقايق بالفرن.

رايي واراء بعض المتذوقين:

وايد حبيتها سهله وبسيطه وفنتق وطعمها حلو,,

اختي الوسطيه قالت حلوه واحلى من بيتزا القطايف..

اخوي واختي الكبيره هم قالوا حلوه واختي تبي تسويها اذا يالنا احد بعد خخ..

مشكوره كويتيه :*
Labels: , , | 5 comments
Thursday, August 18, 2011

postheadericon تجربتي لـ cracked nail polish by h&m

9:10 PM
قبل جم يوم وانا احوس بالنت دريت اانه H&M نزلوا هالنوع من صبغ الاظافر ..

وخاطري فيه بس لي الحين ابي اللي من بوبا :(  وشفت بنيه مصبغه اظافر ريولها فيه وعجبني ..
 الصوره منقوله من قوقل ..

اول مافتحته بجربه انصدمت انه فرشته مادري شلون قايله حولت اضبطها ماقدرت :(
 2 صدمة انه جربته بس ماتقشر :\

عاد سويت سيرج بالنت وشفت جم فيديو عنه فجربته مثلهم , انه احط تحته صبغ اظافر ..
اول اثنين ع اليسار طبقه ثقيله :\ والباجي خفيفه ..

رايي :

بجميع الحالات ما عجبتني النتيجة , وانصدمت من شكل الفرشة..

سعره :

1.900 ..

ودي اقول شغله عن اسعار المكياج عندهم بس ناطره ردهم اذا ماردوا بقولكم ان شاءالله..
Labels: , | 25 comments
Tuesday, August 16, 2011

postheadericon بيتزا القطايف \ قطايف بيتزا ..

6:35 PM
المقادير:
-عجينه القطايف ..
-كاتشب..
-جبن موزريلا..
-نقاانق..
-مشروم..

وطبعا تقدرون تضيفون فلفل اخضر وغيره ..

الطريقة..

-تشترون عجينة القطايف :p
-تدهنونها بالكاتشب وتحطون عليها باجي الاضافات واخر شي ترشون عليها الجبن , وتدخلونها الفرن ..

رايي المتذوقين:
اختي الصغيره اهي الوحيده اللي ماعلقت :\ ابوي يقول وايد كاتشبب , اختي تقول اهوا للي محليها عيبها العينه , ترد اختي ال2 لو زايده الحشوة لي الاطراف , ترد عليها اختي تقولها الاطراف اليابسه مخليتها الذ..

بالنسبه لي زوينه مو وااو :\

محد علمني اطباق سهله وفنتق :(
Labels: , | 19 comments
Monday, August 15, 2011

postheadericon I Love Suzani (thank :*)

7:25 PM
قبل جم يوم بتويتر كتبت ني لي الحين مو لاقيه هدية لعيد ميلاد رفيجتي اللي بيكون الاسبوع الياي..

عاد وحده من البنات كانت بتفيدني بالخاص اخر شي شوفوا شصار !!

اهدتني هدية لرفيجتي ووصلتها امس لبيتنا جنها تدري انه اليوم عيد ميلادها..

كنت طالعه لما رديت شفت ولا جيسين غريبه :\


ولا هدية لرفيجتي ومغلفتها بعد .. << شغل عدل ماشاءالله..

وقرقيعان ..

وجنطة لاب توب لي مثل مالت رفيجتي ..

امبيه احرجتني بكرمها بس ان شاءالله اسوي اللي قلت لج عليه :*

ومشكوووووووووره ماقصرتي :*

وهذا ربطهم بالفيس بوك ..

وكل عام وصقيقتي بخير يارب :*
Labels: , , | 9 comments
Sunday, August 14, 2011

postheadericon H&M الان بالجهرا :)

11:23 PM
امس كان افتتاح في الجهرا وتحديد بمجمع اوتاد..
واليوم دزولي ايميل , شنو استانست مافي جهراويه اعرفها ماقلت لها حتى اخوي قلت له خخ وطبعا ضحك علي !! خخ

 ويتكون المحل :

من قسم نسائي وقسم اطفال , مافيه رجالي او مكياج ..

*القسم النسائي *

شوفو البنطرونات اللي تحت مثلهم وبالضبط البيج خذيته من مانغو ب7 بالتنزيلات , اما عندهم ب5 ماحطيت بخاطري خذيت واحد كحلي..


في عروض للافتتاح ..
 قسم الاكسسورات ..


 *قسم الاطفال*
 سلم قلب الصبيان احبهم بهالستايل :)


حبيتها :)

ولما طلعت ولا في فعاليات بمناسبة الافتتاح ..

تصوير الاطفال مجانا واستلام الصوره يكون عقب يومين :)
 رسم عالوجوه..
 تاتو ..

ماصورته كامل لانه في ياهل يسون لها..

وفي بوطبيله بس كله اشوفه بعيد ولما كنت بصوره ماحصلته:(
 وهم يوزوعون على اليهال تفافيخ ..
واعلاناتهم ترس المجمع ماشاءالله..
االمحل وايد مرتب وشرح من احلى الفروع ولانه توه مبطل كل المقاسات متوفره, وهم الافتتاح حلو ماشاءالله ماتوقعت اشوف هالسوالف اليوم توقعت اذا بيسون شي بس اول يوم..

وعندهم عرض كل فاتوره ب15 لها هديه :)

برمضان عقب الفطور يبطل 8ونص :) الصبح مادري متى بالضبط ..

Labels: , , , | 5 comments
Subscribe to: Posts (Atom)

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

انستغرام المدونة (roroalk)

follow me

follow me

My Blog List

Show All

Ads

Meenakon Design Templates