Sunday, August 5, 2012

postheadericon معجنات القوارب بالحلوم او التونه

6:08 PM
هالفكره خذيتها من بنت عمي ..


اللي اهي ايب صمون المطاحن العادي واخذ صوب المتفوخ واشيل العيين(العجين ) الزايد اللي بالنص ومكانه احط الحشوه..
اهي كانت محشيته بدياي..
بس لاني مليت من الدياي والشورما والنقانق سويته بحشوتين يدد:
الاولى بالحلوم :(لاني يومها تعبت مو نايمه الظهر وبنجرت سيارتنا ومعدتي شبت علي وسويت مليون طبق فاختي الكبيره دشت المطبخ وساعدتني وسوت هالحمسه)

حميسة الحلوم:
جبن قلاص عادي اي نوع بس مو كرافت الكميه تقول لما تحسين انه صار رايب
جبن مثلث جنه قالت ٤
حلوم جيس كامل
/طماط
/زعتر
/زيتون شرايح

تحمسينهم ع النار .،

حميسة التونه؛ (منقوله من النت بس ضفت الموزريلا ة الطماط)
علبة تونه مصفيه من الزيت +١م جبن قلاص+١م قيمر
تخلطينهم مع بعض وتحشين القوارب فيه في شي زينته برشة سماق وشي بجبن موزريلا وشي بطماط..

الطبق بهالحشوات حلو وخفيف وينفع للريوق:)
- Posted using BlogPress from my iPhone
Labels: , | 0 comments
Saturday, August 4, 2012

postheadericon NeFeaaish

9:44 PM
اختي الكبيره كانت معزومه ع حفلة قرقيعان ولد ولد ولد عم ابوي شطول العلاقه خخ ..
ودزت لي صورة القرقيعان .،
هذا للكبار متروس نفيش ملون وطعمه شكر ..


وهذا للصغار جنه لولي بوب:


اعتقد بطعم الكراميل بس ماحبيته مو حلو الملون احلى منه بس هم يعتبر الملون زين مو وااو ..
ت:٩٠٠٦٠٦٥٠
- Posted using BlogPress from my iPhone
Labels: , | 3 comments

postheadericon شوربه البطاط :/

11:44 AM
طريقته حصلتها بالانستغرام بس لغيت جزء اللي فيه الدياي موجوده باكاونت o066..
المقادير:
بطاط مفيوح مع مايته - كانوا 2 كبار
٢ م ك حليب بودر
٢ م ك طحين
٤ م ك جبن قلاص

الطريقه ؛
نفوح البطاط ومانكت الماي نحطهم يميع بالخلاط ونضيف لهم باجي المقادير ..
وعقب مانخلطهم نحطهم بجدر ع نار وذاقته الخدامه طلع ماصخ ضفنا له ماجي ولانه وايد ثقيل زدنا ماي ..
النتيجه شوربه مو حلوووووه كلش ماحبيتها لا انا ولا اختي الوسطيه بس امي عجبتها وقامت تدلل عليها بدالي:/
توقعت النتيجه تكون او بالاحرى تمنيت تكون مثل شوربة بطاط فرايديز !

- Posted using BlogPress from my iPhone
Labels: , | 0 comments
Friday, August 3, 2012

postheadericon قرقيعاني شريته ولنفسي دزيته ❤ من Popcornoplis

2:36 PM
امس كنت بالافنيو ولد اختي يبي يتمشى بروي ! فقلنا خل نشتري نفيش اخترنا خلصنا واختي تدفع جان اشوف هذا:

و هذا ..
عقب شفت هالطاوله :
كنت بصور بس جان الفلبينيه تقولي مسوين خصم كان ب٧ مادري ٧ وشي وصار ب٥.٥٠٠ قلت عيل ابي (ابد مااحب التنزيلات خخ)
كنت ابي اللي ع بنت بس طلع نوع بجدر ونوع جيس عادي وانا ابي اللي فيه ٥ انواع فاخترت هذا:
شلنا التور

اول ماشفته حسبالي انواع مكرره بس اشوه طلع لا :


حبيت الفكره حلوه بس حلاته دامجينه مع القرقيعان التقليدي ..

مادري ليش الصور ماتطلع واضحه اذا نزلت البوست من الاب :\
- Posted using BlogPress from my iPhone
Labels: , , | 0 comments

postheadericon صينية الهمبرغر..

10:49 AM
الوصفه خذيتها من هني اخترتها علبو مميزه بالنسبه لي مو مثل الاطباق اللي اسويها بالعاده ..

المقادير :
-همبرغر (الكميه حسب حجم البايركس)
-طماط (هم كميته تعتمد ع حجم البايركس ) بالوصفه الاصليه في بصل وفلفل اخضر بس انا ماحبهم فماضفتهم ..
-بطاط ليز بالجبنه الفرنسيه ..
-جبن موزريلا..
الصلصه (الطبقه اللي فوق)
-نص ظرف باشميل كنور..
-ربع قوطي روب..
-رشه اوريغانو..
-كريمه خفق ( اهي كاتبه صغيره مادري اذا في حجم صغير ! اللي اعرفه عادي وكبير ) فحطيت نص اللي حجمها عادي..
-قلاص ماي..
-2 ملعقه جبن قلاص..
الطريقه :
- نحط بطاط ليز كطبقه اولى ونرش فوقه جبن الموزريلا ..
-عقب نقصص الطماط نص حلقه ونحطه كطبقه 2 وهم نرش فوقه جبن الموزريلا ..
-بعدين نضيف الهمبرغر عقب ماشوينها بالفرن او قلينها , البنت صاحبة الوصفه قلتها بس مااحب المقلي فشويتها بالفرن ونقصها بالنص ونصفها بالياركس..
- الصلصه نخلطها ونحطها بجدر ع نار ليما تثخن \ تثقل لي ثقلت صبينها ع البرغر و حطينا البايركس بالفرن ..
رايي :
زينه مو وااو توقعتها الذ وبعدين بذكر طعمها عدل موقادره لانه ماجابلتها عدل ، اختي الوسطيه ماعجبتها وايد , امي واختي الكبيره عجبتهم << مادري ليش احس يجاملوني !
ملاحظه :اذا مافهمتوا الطريقه تلقونها مذكور بالرابط فوق بالصور ..
- Posted using BlogPress from my iPhone
Labels: , | 0 comments
Thursday, August 2, 2012

postheadericon من اطباق اليوم (سلطة الناتشوز)

10:20 PM
طريقتها خذيتها من زميلتي بالدوام ام فواز ..

المقادير:
خس
شاورما دجاج امريكانا
فلفل هاليبينو
جبن شدر مبشور
ناتشوز دويتورس الازرق والبرتقالي
انا زدت ذره وخيار مخلل..
الصلصه:
الصلصه الايطاليه2 قفشه، مايونيز2 قفشه، ماسترد 1 قفشه( مالتزمت بهالكمية تقريبا دوبلت كل مقدار)

الطريقه:(مادري شلون اشرح)
قصصي الخضرا ، و حمسي الشارما و زهبي الصلصه وخلطيهم مع بعض والجبن المبشور و الناتشوز انا زينت فيهم ..

راينا :
انا واختي الكبيره حبينها نسيت رايي الباجي:/

- Posted using BlogPress from my iPhone
Labels: , | 0 comments
Tuesday, July 31, 2012

postheadericon Me6rash Delivery

9:36 PM
بعيد ميلاد شروف توهقت شلون اودي لها الهديه ! بيتهم بعيد عن بيتنا وماادله :\

فقلت ماكو الا مستر ديلفيري اتصلت محد رد , تذكرت انه بيرو كانت قايله لي عن شركة توصيل 2 اسمها مطراش طلعت رقمها من قوقل وكلمتهم واتفقنا انه ايولي ساعه 3 قبل 3 بجم دقيقه يولي سلمتهم الهديه تقريبا بعد 45 دقيقه شروف قالتلي انها وصلت لها ..

عحبتني خدمتهم واعيد التجربه  ان شاءالله ..

رقمهم :
55112003

@Me6rash

ملاحظه للصوره منقوله من اكاونتهم بتويتر ..
Labels: , , , | 2 comments

postheadericon حلو زبدة الفول السوداني ❤

10:22 AM

امس ضايق خلقي ماطبخت شي هالفتره فيني هوس طبخ ماشالله ..

فقلت اسوي حلو بسيط و متوفره مكوناته ..

وهالحلو قديم خبري فيه قبل جم سنه اختي الكبيره كانت تسويه لنا ..
المقادير:

-بسكوت دايجستف..
-زبدة الفول السوداني ..
-ككاو مالتيزر (للتزيين)

الطريقه وايد سهله وبسيطه..
-تطحنين البسكوت ، حطيته بجيس و طحنته بالهاون..
-عقب حطيته باديه- طاسه وخلطته مع زبدة الفول..
-بعدين شكلته ع ورد باستخدام القطاعه ودائري باستخدام ماعون الفرن اللي للكيك ، اللي مصورتهم شغلي عقب اختي الصغيره ساعدتني بالباجي..
وصفيتهم بصينيه وزينته بالمالتيزر..


- Posted using BlogPress from my iPhone
Labels: , | 2 comments
Monday, July 30, 2012

postheadericon ج2 هدية للشروفه شمعه ع اسمها :*

11:53 PM
قبل جم شهر نزلت لكم بوست عن هالاعلان (هني) ولانه شرووفه تحب الشموع رحت سويت لها وحده ..


الحلو فيه انه الشمعه انت تختار شكلها بكل التفاصيل اسم او 2 اللون , الريحه , والاضافات مثل الزري ( قلتر ) او الورد ..

صورت جم نمونه من البومهم تصوير ع السريع ..

هذا بالقلتر وفي بدونه ..

 هذا بالورد ..

هذي اللي عجبتني وسويت مثلها الوانها حلوه وبسيطه ..

وكا الطلب (تصويرها) ماشاءالله ماتوقعت هذا حجمها ..
وبالنسبه للروايح المتوفره اذكر قال توت وفراوله وفرنسي وجنه في لافندر مو متاكده بس نصحني اختار فراوله ..

عيبه : مو موفرين نماذج او على اقل سامبلز للعطور بس ..

الاسعار :
الاسم 1 = 15 دك 
الاسمين =20 دك
اضافة قلتر او ورد 5 د.ك

يحتاج الطلب 3 ايام او 4 ويخلص ..

عنوانه موجود بالاعلان فوق ..

حبيت شكلها حلو ماشاءالله والاهم عجبت شروفه الحمدالله ..

وباجي الهديه شغلات عاديه مو مميزه بس هالشغلتين اللي يدد ..
Labels: , , , , | 2 comments

postheadericon فطيرة الدياي

10:56 AM
اول امس سويت هالطبق وتعلمت طريقته من كويتيه..

المقادير :
كريمة كي دي دي ..
علبه قيمر ..
م ك مايونيز ..
م ك جبن قلاص..
جبن شرايح ..
كيس توست ( انا حطيت 12 تقريبا مو الجيس كله يعني ع حسب حجم البايركس)
شاورما دجاج امريكانا
ذرة
بصل
مشروم

الطريقة :
-نخلط مكونات الصلصة ..
-نحمس الشاورما مع الذرة والمشروم اهما كاتبين نضيف بهارات وملح وماجي بس انا ماضفتهم اكتفيت باللي متبلين فيه الشاورما واشو ضبط ..
-نصف التوست بالبايركس مكتوب بدون ازالة الاطراف (بس انا ازلتهم )كطبقه اولى عقب نحط حشوة الشاورما تكون هالحشوه بالنص كطبقه ٢ ونحط فوقها الطبقه الاخيره نصف التوست مره ٢ وفوقها نصب الصلصة و نحط عليها الجبن الشرايح و نرش الاوريغانو ..
ونحطها بالفرن ونوصي الخدامه تجابله وتنساه كالعاده ولو مارحت اجيك جان صارت فطيرة الفحم :/

رايي:
حبيتها واسويها مره ٢..

- Posted using BlogPress from my iPhone
Labels: , | 0 comments
Sunday, July 29, 2012

postheadericon ج1 من هدية لشروفه :* من (lucky pumpkine )

9:09 PM
اكثر وحده من رفيجاتي احتار شيب لها لانه تحرجني بكرمها ومهما يبت لها احس مقصره وما اوصل مواصيلها ماشاءالله ..

اليوم يصادف عيد ميلادها كل عام واهي بخير :*

ومن فتره احتار شيب لها ومن اول 7 بلشت اجهز واشري واطلب واستلم وامس خلصت الحمدالله واليوم وصلتها ..

وديت لها اكثر من شغله احب الهديه تكون متنوعه عساس اذا ماعجبها شي جود يعجبها ال2 ..

من الشغلات اللي طلبتها ستاند متروس اوريو بوبز ع السنافر لانه تحبهم ..

شفته باكاونت التاجره بانستجرام وعجبني ..


طلبته ب15 الشهر لامس ..

21 الشهر دزت لي صورة الستاند زاهب ..

وهذي الصوره بعد ماوصل لشريفه ..(تصويرها)

وباكاونتها في وايد تصاميم عجبتني..







هذا كوكيز للقرقيعان وفي مثله للصبيان ..
وفي ستاند ع سبونجي بس الصوره مو راضيه تضبط :\

رايي :
حبيت الشغل حلو ماشاءالله و سعره مناسب او رخيص بالنسبه لستاند متروس 40 قطعه  والخدمة ممتازه ماشاءاللهوان شاءالله يطلع الطعم حلو..

للطلب بالواتس اب  او مسج:

60070404..


 انستغرام : @ luckypumpkinkwt

Labels: , , , , | 0 comments

postheadericon تويستر

1:12 PM
سويته مرتين اول مره بالفرن
وال٢ بالميكرويف

المقادير :
بطاط نايس احمر (مالح)
جبن شيدر كرافت
جبن موزريلا
جبن قلاص
كريمه حامضه
كريمه مخفوقه (كريمه الحمرا)
نص ملعقة شاي شكر
نص ملعقة شاي ثوم بودر
طماط وبصل وكزبره (انا ماحطيتهم)
الطريقه:
اللي سويته حطيت بطاط بالبايركس و حطيت عليه جبن موزريلا ومعاه بشرت جبن الشيدر .
خلطت مقادير الباجي للصلصة وصبيته فوقه
.
.ومثل ماقلت لكم فوق مره حطيتها بالفرن ومره بالميكرويف بالفرن احسن بوايد صج الخدامه نسته احترق شوي بس احلى من الميكريوف ذوب البطاط وحرق لهاتي ..
رايي:
المقادير حطيتها كامله فطلعت الصلصه واايد اكثر من لازم يومين استخدمتها ل٨ جياس بطاط وماخلصت تم في شويه بعد ..
فاذا بسويها مره ٢ بقلل الكميه وبحطها بالفرن ..
واللي اذكره رايي اخوي اعجبه..

وهالوصفه تعلمتها  من  @kuwaiiitya  بعد عمري ماقصرت من العام واهي مضبطتني باطباق سنعه وسهل وفنتق ولذيذه ماشاءالله :*

- Posted using BlogPress from my iPhone
Labels: , | 2 comments
Saturday, July 28, 2012

postheadericon حلو اليوم : كيكة الجيلي وكيكة الكندر

9:22 PM

طريقته خذيتها من مدونة اكلات هني بس نقل بالتصرف يعني غيرت جم شغله فيها ..
 
الكيكة الوحده عباره عن 3 طبقات ..
الطبقه الاولى اهي اللي تحت :
بكيكة الكندر تكون سارلي كيك الككاو ..
اما كيكه الجيلي تكون سارالي كيك الفانيليا ..
الطبقه ال2 بالنص بالكيكتين نفسها ثابته :

ظرفين دريم ويب = علبه

جيس كريم كراميل

علبتين قشطه او قيمر

8 حبات كيري

(منقوله الكلام والطريقه من بوست اكلات )
الطبقه ال3 والاخيره :
بكيكة الكندر ككاو كندر (اللي جنه جاكليت ) مخففته بكريمه (كريمة الخفق \ الكريمة الحمرا)
كيكة الجيلي جيلي احمر  بس ماحطيت فيمتو وسويته مثل ماقالت طريقة الجيلي العاديه..
الطريقه :
- نقصص الكيك ونصفها بالطبق ..
-نخلط مكونات الطبقه ال2 مع بعض ونصبها ع الكيك و عقب نحطها بالثلاجه عشان تصك ..
-لما تصك نكون مزهبين الجيلي او الككاو ونصبه فوق الطبقه ال2 ونرده الثلاجه عشان يصك ..
رايي :
اول مره اسوي حلو واحبه انا واختي الصغيره حبينا الككاو  اما بنت عمي واختي حبوا الحمرا واختي الكبيره توها قالت لي قصيده فيها خخ  ..
شكرا بنت الديره ع الوصفه :*

- Posted using BlogPress from my iPhone
Labels: , | 4 comments

postheadericon وين النوتيلا ؟؟

3:05 PM
امس رحت الجمعيه ابي جم شغله ومنهم النوتيلا بس انصدمت انه رفهم فاضي!



طبعا ع طول صورته ونزلت الصوره بالانستغرام ..
وكانت التعليقات اغلبهم تقول انه مو محصلينه مخلص وناس تقول انقطع!!

غريبه ليش !! عاد عليه طق اعصي هالايام صاير هبه !
- Posted using BlogPress from my iPhone
Labels: , | 1 comments

postheadericon صينية رولات صاج النقانق

12:09 PM
هذا بعد من اطباقي امس بالفطور :

المقادير :
صاج
ميني نقانق
جبن سلايس (شرايح)
جبن موزاريلا
الصلصة ؛
جبن قلاص حسب الرغبه (حطيت تقريبا ٣ قفاش كبار جبن كرفت)
قيمر (علبه كبيره)
فكرة الطبق نفس اللي نزلت لكم العام هني بس فيه فرق بسيط بدال التوست خبز صاج وماحطيت بالحشوه كريمه وبطاط خليت جبن شرايح و نقانق بس.
الطريقة:
-نقص خبز الصاج ، وكل قطعه نحط فيه جبنه و نقانق ونلف القطعه مثل الرول ونكمل الباجي نفس الطريقه لما ينترس البايركس..
- نخلط مقادير الصلصه ونصبها فوق رولات الصاج وفوقها نرش جبن موزاريلا..
ونحط البايركس بالفرن لما يذوب الجبن ويتحمر من فوق ..

رايي؛
اهو حلوو وشكله مرتب بس عباله بالقص اول شي كنت انقهر لما انجب لاحد واشوف الرول انفج وطاحت النقنوقه :/ بعدين تداركت الوضع ، فاذا بعيده مره ٢ افكر انه كل رولا اسكره بجبن باطرافه عساس يثبت اكثر واقص بدقه لما بانجب خخ هندسه مو طباخ ..


- Posted using BlogPress from my iPhone
Labels: , | 0 comments
Friday, July 27, 2012

postheadericon طبق اليوم : سلطة الفلافل

10:54 PM
احب الطباخ خصوصا برمضان وبالويك اند لانه اختي الكبيره تكون موجوده ..
واليوم سويت اكثر من طبق منهم سلطة الفلافل ..
الصلصة ماخذته من النت اما الباجي من كل صوب ..


الصلصة :
روب (علبه)
لبنه (علبه)
ثوم ( شويه)
عصير ليمونه كامله
السلطة :
فلافل نبيل ( فلافل مجمده جاهزه بالجمعيات ) تقدرون تستبدلونها بفلافل عاديه من المطعم..
خبز مقطع ومحمص
بطاط مقطع ومقلي
خس
طماط
خيار

الطريقه :
نخلط مكونات الصلصه.
نقصص السلطة (الخيار والطماط)كنت بحط خس بعد بس مالقيت عندنا وطبعا تقدرون تضيفون اي شي تحبونه ..(هذي الطبقه الاولى) وطبقه ال٢ البطاط والطبقة ال٣ خبز اما الاخيره الصلصة وفوقها الفلافل ونزينها بالمواد المتوفره انا زينتها بخبز محمص وسماق..

راينا :
زينه بس احس لو ضفت تتبيله لسلطة بتكون الذ وهذا رايي اختي الكبيره بعد بس اختلفنا بمكونات التتبيله اهي تقول اللي من كنور وانا اقول ليمون وزيت زيتون وخل وسماق (اذا سويته مره ٢ بضيف هالخلطة للسلطة وان شاءالله تضبط)

- Posted using BlogPress from my iPhone
Labels: , | 0 comments

postheadericon فتة شاورما الدياي ، فتة الحب ❤

12:16 AM

هالوصفه دزته لي زميلتي بالدوام ام فواز خذيت منها طريقه الصلصة بس وغيرت شويه بالكميات اما الشورما اضافة مني (ابشركم باجي بس كرتون وتخلص مأونتي من الشاورما خخ)


الصلصه:اهي
نص ليمونه
روب قوطي كامل
١/٢ قفشة اكل زيت زيتون
وشوية ثوم بودر
قفشه ونص هرده
ملاحظة كل المقادير بالوصفه الاصليه دبل باستثناء الليمون كان قفشتين وخليته نص ليمونه)
شاورما دياي
خبز لبناني مقطع ومحمص
سماق للتزين
الطريقة :
نحمس الشورما ونقطع الخبز ونحمصه ونحطه بالغندور ونخلط الصلصة ونصبها عليهم و اخر شي نزينها بالسماق (ترا متعوب ع القلب خخ)

- Posted using BlogPress from my iPhone
Labels: , | 0 comments
Thursday, July 26, 2012

postheadericon طبق اليوم : الصينية البرتقاليه

7:46 PM
قبل فتره @miss_ba6ooo6a نزلت صورة هالطبق مع مكوناته وطريقته بس اهي مسويته بشيش الطاووق انا مالقيته فاستبدلته بشاورما الدياي ..
وسميته الصينيه البرتقاليه لانه اكثر شي لفت انتباه اهلي لونه :




صينية بطاط الودجز البرتقاليه ..
المقادير
بطاط ودجز مقلي
شاورما دياي
كرنب مادري شسمه
ذره
جبن مبشور
الصلصة
الصلصة الفرنسية(تقريبا نصها)
٤قفاش مايونيز
٤ قفاش كاتشب
كريمه حمرا حسب الرغبه
-الطريقة
نقلي البطاط، ونحطه بالبايركس.
نحمس شورما دياي مع كرنب (بس نحمس الكرنب قبل عساس يذبل شوي عقب نحط معاه الشاورما)ونحطها بالبايركس . 
ونخلط الصلصة مع بعض و نصبها فوق الحميسه.
واخر شي نحط ع ويه جبن ونحطها بالفرن

راينا:
انا اشوفها زينه مو وااو شويه حاليه بس فكرتها وطعمها بالنسبه لنا غريب مو معتاد ، واشوه الحمدالله اعجبت اهلي واختي الكبيره تقول لذيذه :)

- Posted using BlogPress from my iPhone
Labels: , | 0 comments

postheadericon بريوش النقانق

9:43 AM
هذا الطبق ال2 اللي سويته امس ..

 
الوصفه ماخذتها من منتدى كويتيات هني ..
 
بس شلت الشغلات اللي مااحبها مثل البصل والفلفل الاخضر والخردل , هم ماخليت كلها بالنقانق حطيت نصها بالشاورما لاختي الوسطيه..
وبالانستغرام علموني شلون اخليها ماتحمش بزود باني ادهن الويه بيض او حليب وانه اشغل الفرن من تحت و انه اقدر استعين بالمكيروف كون كل المكونات مطبوخه و جاهزه للاكل ..

- Posted using BlogPress from my iPhone
Labels: , | 0 comments
Wednesday, July 25, 2012

postheadericon كب كيك النقانق /كب كيك شاورما الدياي

7:47 PM
هالطبق من ارشيف البلوق كتبت بوست عنه هني يحتوي ع مقاديره وطريقته..






بس هالمره ماخليتهم كله نفس الحشوه نوعت شي دياي وشي خليت نقانق مع ملفوف ابيض (حشوة طبق ٢ استخدمتها بالطبقين اللي سويتهم اليوم )

- Posted using BlogPress from my iPhone
Labels: , | 0 comments
Monday, July 23, 2012

postheadericon شعر البنات التركي ❤❤

12:31 AM
من ضمن الصوغات اللي يت لنا من تركيا هالشعر البنات اهو لامي بس انا واختي الصغيره جابلناه :)

اهو شعر بنات مغلف بطبقه خفيفه من الككاو الابيض ..
وطعمه حلو وخفيف ..
شكرا بنت عموو ❤

- Posted using BlogPress from my iPhone
Labels: , | 1 comments
Sunday, July 22, 2012

postheadericon اطباق اليوم (رول المرتديلا وكبة البيتزا )

12:24 AM
امس طلعت لي جم وصفه من النت (سهله وبسيطه )من ضمنهم رولات المرتديلا ..


اهي الصغار اللي فوق ..

المقادير :
توست بدون الاطراف
 مرتديلا
 جبن شرايح

 بيض

 بقسماط

جبن قلاص عشان نثبت الاطراف فيه ..
الطريقه :

نفرد التوست بالفراده

نحط على التوست شريحه مرتديلا وفوقها شريحه جبن ونلفها

 ونغمسها بالببيض بعدين بالقسماط ونقليها

بيكون شكلها جذي بايخ , بس لما نقصها تصير مثل اللي فوق وايد احلى ..
وحلات معاها صلصات تغميس ع كتر انا حطيت كاتشب تقدرون تحطون خردل \ماينيز \ صلصة سيزر وغيره ..
والحشوه هم تقدرون تحطون بدال المرتديلا ’ ديج رومي (تيركي) , او اي حشوه ناعمه مثل المسحب او نقانق مبشوره الخ ..
وبالنسبه لكبة البيتزا طريقتها نزلتها لكم العام هني بس غيرت الحشوة لي حشوة البيتزا المعتاده اللي قلت لكم عنها ( صلصة بيتزا جاهز مع زينو والفطر من العلالي و جبن مبشور و نقانق) << فكرة الكبه بيتزا ماخذتها من بيرو..
link الوصفات ..

ورايي :
فيهم زينين مو وااووخصوصا كبة البيتزا لانه حطينها بالفرن مو قلي اتوقع لو قلي الذ ..

وشكرا اخيتي اللي ساعدتني بلف الرولات وسفلت فيني بعد خخ..
Labels: , | 2 comments
Thursday, July 19, 2012

postheadericon مبارك عليكم الشهر

10:58 PM
Labels: , | 4 comments
Subscribe to: Posts (Atom)

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

انستغرام المدونة (roroalk)

follow me

follow me

My Blog List

Show All

Ads

Meenakon Design Templates