Showing posts with label مطبخ رورو :). Show all posts
Showing posts with label مطبخ رورو :). Show all posts
Sunday, July 14, 2013

postheadericon طبقين حلو بالمارس :)

1:23 AM
اختي الصغيره تحب تسوي حلو ويوم الخميس كانت رفيقتي بالجمعيه فجيلنا لاطباقي وقلت لها اخذي اغراض لاطباقج ولانه مو بالها شي خمطنا جم نوع ككاو منهم المارس ..
 
وسوينا منهم طبقين سهلين ..
 
الاول: كرات الكورن فليكس ..
 
 
المقادير ..
 
نص قالب الزبده ..
3 ككاو مارس..
وكورون فليكس حسب الرغبه ..
 
الطريقة :
 
نذوب الككاو مع الزبده بحمام ماي دافي ..
وعقب نحط الكورن فليكس فيه ونكوره ..
 
رايي :
حبيته حااالي ..
 
الثاني : كيك ..
 
المقادير :
 
3 مارس
قيمر
كيك ككاو سارلي كيك ..
وللتزين اي ككاو تحبونه احنا حطينا مالتيزر - ارو- ام اند امز ..
 
الطريقه ..
 
نذوب الككاو بحمام ماي دافي عقب نضيف القيمر له  ونخلطهم..
نقصص الكيك ونصفه بالصحن وعقب نحط عليه خلطة الككاو ونزينه باللي نبيه ..
وعادي تاكلونه ع طول اذا تحبون الحلو حار ..
 
رايي :
 
هم والله زين وسهل ..
 
تسلم ايد خيتو :)
Labels: , | 1 comments
Wednesday, December 26, 2012

postheadericon I ❤ قراميش

7:23 PM
اليوم كنت مركز سلطان سوق شرق ولفت انتباهي هالست حبيته ..



هذا بدينارين ونص وكان في شغلات عليه شلتهم مبيني ع كتر اذا لاحظتوا بس مو متاكده اذا تبعه ولا لا ..

وباجي الشغلات اسعاره موجوده بالصور :)
Labels: | 0 comments
Monday, October 29, 2012

postheadericon اطقم اواني (عجبتني)

4:02 PM
من هبيت بالطباخ هالسنه ونجحت اغلب اطباقي قمت احب احوس صوب الماعين بس عقب قسم الاملابس طبعا :)
 
*للمشروبات *
 
 
 
 
 
 
 
 
*للمؤكلات *
 
للفوندو..
 
وهذول حلوين للسلطات او الحلو لايقين مع هبة الميني ..
 
 
 
 
القفشة اكبر من القلاص خخ ..
 
 
 

 
 
كلهم متوفرين بسيرز الضجيج ..
Labels: | 0 comments
Tuesday, October 16, 2012

postheadericon طقم للبارد والحار

11:27 PM
الاسبوع اللي فات كنت بسنتر بوينت ولقيت هالطقم عجببتني فكرته..


مو ذاكره بجم بالضبط بس جنه ب٤ وشي ..

- Posted using BlogPress from my iPhone
Labels: , | 0 comments
Saturday, September 29, 2012

postheadericon صينية البوب كورن والودجز

12:05 AM
هالطبق اخر طبق سويته برمضان مطلعه الوصفه من انستغرام بس غيرت فيها وايد شغلات مثل كمية الصلصة وبدلت الفيلية بالبوب كورن زدت جبن والخ ، ولانه حبيته وهم اختي الكبيره ماذاقتها سويتها مره ٢ اليوم ..



(المشاهدتها بشكل اوضح ضغط ع صوره تتكبر)



المقادير :
الكميات طبعا كثر ماتحبون :
بالنسبه للصلصة انا اول مره سويتها البيركس كان صغير فاعتمدت ع الغندور الصغير كمقياس اليوم لانه اكبر فاعتمد ع قلاص جبن الصغير (الوصفه الاساسيه تحط علبه كامله من كل نوع احس وايد )
- صلصة فرنسيه
-صلصة ايطاليه
-كريمه حمرا (كريمة كي دي دي)

مع :
-بوب كورن دياي او اذا تبون فليه مثل الوصفه الاساسيه..
-بطاط ودجز..
و٢ مره ضفت مشروم ..
وضفت جبن المبشور ..

الطريقه :
نخلط الصلصه ، نقلي البطاط والبوب كورن ونصفهم بالصينه ونصب الصلصه عليهم ونحط الجبن وعقب ندخلها بالفرن ليما يذوب الجبن بس ..

رايي :

حبيتها ❤ فيها حموضه مثلي خخ

- Posted using BlogPress from my iPhone
Labels: , | 0 comments
Thursday, August 16, 2012

postheadericon اللقيمات الكراميل ، اللقيمات الككاو

8:30 PM
قبل فتره كنت احوس بانستجرام ادور طبخات من الشغلات اللي لقيتها لقيمات بس بدال لا يحطون شيره معاها حطوا نستله او جوكلت صوص..


جربتها مع صوص الكراميل وصوص هيرشي ككاو ال٢ ماحبيتهم طعمهم مو زود لو نوع ٢ يمكن تكون الذ واحبها مع الشيره اكثر ❤

- Posted using BlogPress from my iPhone
Labels: , | 0 comments
Tuesday, August 14, 2012

postheadericon سلطة المعكرونيه

6:22 PM
لانه زادت المعكرونيه اللي كنا مزهبينها لمعكرونيه مع شاورما سويت فيها سلطة:


المقادير:
معكرونيه
خس
ذره
شرايح زيتون اسود
الصلصة:
ثوم
روب كامل
قفشة خل
ليمونه (حطيت ١كامله لانه نحب الحامض)
٢م ك مايونيز
الطريقه؛
طبعا نفوح المعكرونيه بالطريقه العاديه ، ونقصص الخس ونزهب باجي المقادير الصلصه ونخلطهم مع بعض ونصبهم فوق المعكرونيه ونخلط ( يعني الطريقه اخلط وبس خخ خو سلطه)

راينا؛
هم ماذقتها عدل بس طعمها زوين اذا ماخب ظني واختي الوسطيه تقول طعمها احلى من سلطة المعكرونيه اللي نسويه العاده.
- Posted using BlogPress from my iPhone
Labels: , | 0 comments
Monday, August 13, 2012

postheadericon معكرونيه بالشاورما

4:48 PM


المقادير :
شاورما لحم (كوبين) بس اللي حطيته ٣/٤ القوطي (امريكانا)
١ م طحين
١م ص سكر >>> ماضفته
١/٤ كوب صلصة صويا ( حطيت بالنظر اللي يكفي الشاورما)
بصل
ثوم
زنجبيل
مشروم
بهارات
معكرونيه

الطريقه:
نفوح المعكرونيه بالطريقه العاديه مع ماي وزيت وملح..

ونتبل الشاورما بقفشة طحين وصلصة الصويا و قفشة ص شكر (ماضفتها ) ونخلطه عدل ونخليها ساعه بالثلاجه..


-نحمر البصل والثوم والزنجبيل والمشروم والبهارات وماجي (ماذكر اذا حطيت بهارات او لا بس جنه ماحطيت ماجي قاعده انقل الوصفه من انستجرام ! ) ونضيف اللحم لهم ولما استوى ضفت المعكرونيه..


رايي:
توقعت بيكون طعمها حالي ، بس اشوه طلع لا ماذكر الطعم عدل  لاني ذقته لقمه او 2 بس عجبني ..
- Posted using BlogPress from my iPhone
Labels: , | 2 comments
Saturday, August 11, 2012

postheadericon رفيولي بصلصة الفطر

2:12 PM
هالطريقه خذيتها من بتول الكندري حاطتها باكاونتها بالانستجرام (batoul_alkandari@) والوصفه اساسا موجوده بكتابها افكاري في اطباقي ج ٥

المقادير؛


-عجينة الرفيولي الجاهزه ( اهي اختارت اللي بالسبانخ انا اختر فور جيز) وحصلته بلولو هايبر الري ..

الصلصة:
٣قلاصات ماي..
١ قلاص كريمه سائله (كريمة كي دي دي للخفق)
١جيس شوربة فطر ( اللي حطيته كريمة المشروم اتوقع غلط:/)
اهي ضاغت شبنت ١/٢ كوب (ماضفته ماحبه)

وزينته بمشروم محمر ( حطيته بس غرق خخ مو مبين)


الطريقة:
-يخلط الماء مع شوربه البودره ع النار حتى يمتزج جيدا..
-تضاف الكريمه السائله مع شوربه حتى تمتزج ، ثم يضاف الريفيولي لمده ١٠-١٥دقيقه
- يضاف الاشبنت
- عند التقديم يزين الوجه بالمشروم المحمر..

رايي:
بدعت بطريقه توني استوعب بس النتيجه كانت زينه اشوه واخوي واختي الوسطيه مدحوا الصلصه واذا بسويها مره ٢ بغير نوع الرفيرلي ان شاءالله..
- Posted using BlogPress from my iPhone
Labels: , | 2 comments

postheadericon سلطة البرجر

1:01 AM
الوصفه  خذيتها من اكاونت @kitchennoor بالانستجرام ..

المقادير:
-الخضره اللي تحبينها انا حطيت خيار وطماط وزيتون اسود و ذره وخس وزدتها بطاط وماحطيت مثل الوصفه الاصليه لا جزر ولا فلفل اخضر
-برجر
-الصلصة:
صلصة فرنسية+صلصة ثاولزند ايلند

الطريقة:
نقصص الخضره ونقلي البطاط ونشوي البرجر ونقصصه ، نخلط الخضرا مع البطاط ومعاهم الصلصه و اخر شي نحط فوقهم البرغر ، كنت بضيف جبن بس نسيت:/

رايي:
ماحبيت الصلصه حاليه:/اذا سويتها مره ٢ بغير الصلصه لانه كفكره حبيتها..
- Posted using BlogPress from my iPhone
Labels: , | 0 comments
Friday, August 10, 2012

postheadericon بيبي ديناميت شرمب

10:38 AM
من اطباقي اللي سويتها امس ديناميت شرمب وسميته بيبي لانه الربيان طلع صغير خخ , اما الطريقه خذيتها من اكاونت @kitchennoor بالانستجرام ...
المقادير :
ربيان
ملح
فللفل اسود
م ص بابريكا
نص ليمونه
نشا

الصوص :
ربع كوب صلصة فرنسيه ..
ثلث كوب بافلو صوص
3م ك مايونيز
3 م ك سويت تشيلي صوص
3 م ك سومطره
فص ثوم مهروس
رشة ملح

الطريقه منقوله نص من صاحبتها :
- نغسل الربيان وانظفه وانتبله بملح وفلفا اسود وم ص بابريكا ونص ليمونه ونشا ونقليهم وانحطهم بصحن التقديم ..
- نجهز الصلصه ونخلطهم مع بعض ع نار هاديه وتالي انسكر عليها وننطرها تدفي وانصبه ع الربيان وانخلطه وانزينه اهي زينه بصل اخضر بس انا حطيت خس ع كتر لاني ماحب البصل..

راينا :

اشوه مقارب له  تقدرون تقولون ب90%  اهلي قالوا زين, بس تنظيف الربيان متعببببببببببببببببببببببببببببببببببببببببب :(
- Posted using BlogPress from my iPhone
Labels: , | 0 comments
Thursday, August 9, 2012

postheadericon حلو البسكوت ..

3:48 PM




الطريقه:

(اضغط ع  الصوره تتكبر)
- Posted using BlogPress from my iPhone
Labels: , | 0 comments
Wednesday, August 8, 2012

postheadericon سلطة الزعتر

1:44 PM


المقادير :
زعتر
خبز لبناني
زيت زيتون
خس
ذره
زيتون اسود
الصلصه:
روب ١
رانش (بحجم قوطي الروب)
الطريقة:
نقصص الخبز اللبناني بالطول ونقعه لمدة ساعه بزيت زيتون وزعتر ، وعقب الساعه نحطه بالفرن يتحمص بعد مانشخله من الزيت ومانقط الزيت نحطه ع السلطة ..
نزهب مقادير السلطه الباجي ونخلط الصلصه ونصبها ع سلطه ونحط عليها الخبز المحمص..

رايي:
زوينه مو وااو بس مااعتقد اني راح اسويها مره ٢..
طريقتها خذيتها من اكاونت @alshaya بالانستجرام ..



- Posted using BlogPress from my iPhone
Labels: , | 0 comments
Tuesday, August 7, 2012

postheadericon صينية التكساس فرايز

1:46 PM


المقادير :
بطاط ودجز
لحم مفروم
ماجي
معجون طماط
بصل
ثوم
بهارات
فلفل اسود
جبن موزريلا
الصلصة؛
الكريمه الحامضه (نص العلبه)
الكريم سايله (علبه كامله)
جبن شيدر كرافت مبشور
الطريقة:
نقلي البطاط ونحطه بالبايركس كطبقه اولى..
ونحمس اللحم المفروم مع البصل والثوم والماجي وفلفل الاسود والبهارات ومعجون الطماط،ونحطه ع البطاط كطبقه ٢..
عقب نجهز الصلصة البيضه نحط الكريمه الحامضه بجدر ع النار لين تذوب وعقب نضيف الكريم السائله والجبن المبشور(انا كلهم ضفتهم والجدر ع نار) لما اندمجوا المكونات صبيت الخلطه ع اللحم ورشيت عليها جبن الموزريلا وخليتها بالفرن عساس يذوب الجبن ..

رايي:
اقولكم شي خخ انا لما يبت الطبق عقب ماسويته اختي انصدمت لما شافته! تقول شنو هذا اهو تكساس فرايز! قلت صج خخ اهي مو كاتبه يلا عادي صارت صينية التكساس فرايز .
انا حبيته مع اني مااحب وايد اللحم المفروم مع معجون الطماط ، اختي حبته مع الهالبينو ، فاذا سويتوا نصيحه قدموا معاه هالبينو بس خلوه ع صوب مو بالطبق نفسه..

وتسلم ايدي ..
وهالطبق من اكاونت @alshaya بالانستغرام


- Posted using BlogPress from my iPhone
Labels: , | 0 comments
Monday, August 6, 2012

postheadericon سلطة البوب كورن

11:31 AM
الطريقه ماخذتها من النت بس مو ذاكره من اي موقع بالضبط..


المقادير:
خس
ذره
بوب كورن دياي
جبن سلايس (للتزيين)

الصلصة:
علبه روب
٣م ك صلصة رانش
٢م ك فرنسيه
١ م ك مايونيز
نص ليمون
الطريقة:
نقصص السلطة ونقلي البوب كورن..
نضبطها ع مزاجنا ونخلط الصلصة ونصبها ع سلطة ونزينها بالجبن و نحط البوب كورن..

رايي:
حبيت انها بالبوب كورن بس ككل لا مو ذاك الزود مسويه سلطات وايد الذ منها ..

- Posted using BlogPress from my iPhone
Labels: , | 0 comments
Sunday, August 5, 2012

postheadericon معجنات القوارب بالحلوم او التونه

6:08 PM
هالفكره خذيتها من بنت عمي ..


اللي اهي ايب صمون المطاحن العادي واخذ صوب المتفوخ واشيل العيين(العجين ) الزايد اللي بالنص ومكانه احط الحشوه..
اهي كانت محشيته بدياي..
بس لاني مليت من الدياي والشورما والنقانق سويته بحشوتين يدد:
الاولى بالحلوم :(لاني يومها تعبت مو نايمه الظهر وبنجرت سيارتنا ومعدتي شبت علي وسويت مليون طبق فاختي الكبيره دشت المطبخ وساعدتني وسوت هالحمسه)

حميسة الحلوم:
جبن قلاص عادي اي نوع بس مو كرافت الكميه تقول لما تحسين انه صار رايب
جبن مثلث جنه قالت ٤
حلوم جيس كامل
/طماط
/زعتر
/زيتون شرايح

تحمسينهم ع النار .،

حميسة التونه؛ (منقوله من النت بس ضفت الموزريلا ة الطماط)
علبة تونه مصفيه من الزيت +١م جبن قلاص+١م قيمر
تخلطينهم مع بعض وتحشين القوارب فيه في شي زينته برشة سماق وشي بجبن موزريلا وشي بطماط..

الطبق بهالحشوات حلو وخفيف وينفع للريوق:)
- Posted using BlogPress from my iPhone
Labels: , | 0 comments
Saturday, August 4, 2012

postheadericon شوربه البطاط :/

11:44 AM
طريقته حصلتها بالانستغرام بس لغيت جزء اللي فيه الدياي موجوده باكاونت o066..
المقادير:
بطاط مفيوح مع مايته - كانوا 2 كبار
٢ م ك حليب بودر
٢ م ك طحين
٤ م ك جبن قلاص

الطريقه ؛
نفوح البطاط ومانكت الماي نحطهم يميع بالخلاط ونضيف لهم باجي المقادير ..
وعقب مانخلطهم نحطهم بجدر ع نار وذاقته الخدامه طلع ماصخ ضفنا له ماجي ولانه وايد ثقيل زدنا ماي ..
النتيجه شوربه مو حلوووووه كلش ماحبيتها لا انا ولا اختي الوسطيه بس امي عجبتها وقامت تدلل عليها بدالي:/
توقعت النتيجه تكون او بالاحرى تمنيت تكون مثل شوربة بطاط فرايديز !

- Posted using BlogPress from my iPhone
Labels: , | 0 comments
Friday, August 3, 2012

postheadericon صينية الهمبرغر..

10:49 AM
الوصفه خذيتها من هني اخترتها علبو مميزه بالنسبه لي مو مثل الاطباق اللي اسويها بالعاده ..

المقادير :
-همبرغر (الكميه حسب حجم البايركس)
-طماط (هم كميته تعتمد ع حجم البايركس ) بالوصفه الاصليه في بصل وفلفل اخضر بس انا ماحبهم فماضفتهم ..
-بطاط ليز بالجبنه الفرنسيه ..
-جبن موزريلا..
الصلصه (الطبقه اللي فوق)
-نص ظرف باشميل كنور..
-ربع قوطي روب..
-رشه اوريغانو..
-كريمه خفق ( اهي كاتبه صغيره مادري اذا في حجم صغير ! اللي اعرفه عادي وكبير ) فحطيت نص اللي حجمها عادي..
-قلاص ماي..
-2 ملعقه جبن قلاص..
الطريقه :
- نحط بطاط ليز كطبقه اولى ونرش فوقه جبن الموزريلا ..
-عقب نقصص الطماط نص حلقه ونحطه كطبقه 2 وهم نرش فوقه جبن الموزريلا ..
-بعدين نضيف الهمبرغر عقب ماشوينها بالفرن او قلينها , البنت صاحبة الوصفه قلتها بس مااحب المقلي فشويتها بالفرن ونقصها بالنص ونصفها بالياركس..
- الصلصه نخلطها ونحطها بجدر ع نار ليما تثخن \ تثقل لي ثقلت صبينها ع البرغر و حطينا البايركس بالفرن ..
رايي :
زينه مو وااو توقعتها الذ وبعدين بذكر طعمها عدل موقادره لانه ماجابلتها عدل ، اختي الوسطيه ماعجبتها وايد , امي واختي الكبيره عجبتهم << مادري ليش احس يجاملوني !
ملاحظه :اذا مافهمتوا الطريقه تلقونها مذكور بالرابط فوق بالصور ..
- Posted using BlogPress from my iPhone
Labels: , | 0 comments
Thursday, August 2, 2012

postheadericon من اطباق اليوم (سلطة الناتشوز)

10:20 PM
طريقتها خذيتها من زميلتي بالدوام ام فواز ..

المقادير:
خس
شاورما دجاج امريكانا
فلفل هاليبينو
جبن شدر مبشور
ناتشوز دويتورس الازرق والبرتقالي
انا زدت ذره وخيار مخلل..
الصلصه:
الصلصه الايطاليه2 قفشه، مايونيز2 قفشه، ماسترد 1 قفشه( مالتزمت بهالكمية تقريبا دوبلت كل مقدار)

الطريقه:(مادري شلون اشرح)
قصصي الخضرا ، و حمسي الشارما و زهبي الصلصه وخلطيهم مع بعض والجبن المبشور و الناتشوز انا زينت فيهم ..

راينا :
انا واختي الكبيره حبينها نسيت رايي الباجي:/

- Posted using BlogPress from my iPhone
Labels: , | 0 comments
Tuesday, July 31, 2012

postheadericon حلو زبدة الفول السوداني ❤

10:22 AM

امس ضايق خلقي ماطبخت شي هالفتره فيني هوس طبخ ماشالله ..

فقلت اسوي حلو بسيط و متوفره مكوناته ..

وهالحلو قديم خبري فيه قبل جم سنه اختي الكبيره كانت تسويه لنا ..
المقادير:

-بسكوت دايجستف..
-زبدة الفول السوداني ..
-ككاو مالتيزر (للتزيين)

الطريقه وايد سهله وبسيطه..
-تطحنين البسكوت ، حطيته بجيس و طحنته بالهاون..
-عقب حطيته باديه- طاسه وخلطته مع زبدة الفول..
-بعدين شكلته ع ورد باستخدام القطاعه ودائري باستخدام ماعون الفرن اللي للكيك ، اللي مصورتهم شغلي عقب اختي الصغيره ساعدتني بالباجي..
وصفيتهم بصينيه وزينته بالمالتيزر..


- Posted using BlogPress from my iPhone
Labels: , | 2 comments
Subscribe to: Posts (Atom)

About Me

My Photo
رورو الشخبوطه
الكويت, قسم الاعلام:), Kuwait
بنوته كويتيه احب الحياه بالضحك والوناسه والجمعة الحلوه طموحه بس محبطه اكره النفاق والمجامله والتملغ :)
View my complete profile

ايميل المدونة :)

دايركت انستغرام 😁

Followers

Blog Archive

انستغرام المدونة (roroalk)

انستغرام المدونة (roroalk)

follow me

follow me

My Blog List

Show All

Ads

Meenakon Design Templates