شخبوطة كويتيه: جولة مكوكية

Showing posts with label جولة مكوكية. Show all posts

Saturday, January 19, 2013

رحلتنا الى جنتنغ ..

3:59 PM

واخيرا باكمل بوستات ماليزيا واكيد نص المعلومات نسيتها وهذا بالنسبه لي اصعب بوست ..

وطبعا الله يسلم قوقل يسهل كل شي قبل السفره كنا مسوين سيرج مكثف انا واختي الجوز واختي طلعت معلومات وايد مفيده منها طريقة الذهاب لجنتغ من حجز وغيره وقارنا واخترنا الانسب لنا وكان في موضوع سهل علينا بس دورته ماحصلته :\

رحلتنا كانت على يومين اول يوم كان للحجز بس وال2 كان لروحه ,,

الحجز كان عن طريقة شركة قو جنتنغ (LINK)الموجوده بKL SENTERAL ..

رحنا له بالمترو ..

وهذي خريطة سكة المترو ضغطوا على صوره بتكون اوضح (احنا محطتنا الحمرا وجتهنا الثانية KL)

خذينا تذكر المترو او بالاحرى الفيش ورحنا ..

والحمدالله المترو الوضع فيه مريح مو لوية ولا وصخ ، وبالنسبة المحطة مو يم KL بالضبط لا مشينا شويه .. وصلنا للوجهتنا ال2 وصعدنا لي كاونتر الشركة ..

حجزنا تذاكر وهي عباره عن تذكرة الباص والساكي وي (التلفريك ) وتذاكر دخول المنتزه (الخارجي بس ) جنتغ فيها مدينتين وحده داخليه وال2 خارجيه ..

سعرها بحدود 58 رنجت للشخص ..

ونسيت اقولكم الوسيله ال2 لزيارة جنتنغ اهي التاكسي وسعره بحدود 200 الى 300 رنجت بس تكلفت الطريج ويوصلكم اذا ماخب ظني للتلفريك وعقب دفعوا فلوس للتلفريك والدخله << يعني مكلف اكثر خصوصا اذا كنتوا قروب صغير ..

وهم احتمال يوديكم لاماكن 2 قبل لا توصلون اذا ماخب ظني مزارع مثل الفراولة وهم حدايق او ماذكر شسمهم حديقة مادري القرية اليابانيه جنه وفي فرنسية بعد يعني هم لوية(غير لوية الطريج) ..

بجذي نكون خلصنا اول يوم اللي كان مخصص للحجز اللي ماخذا من وقتنا ساعه تقريبا الحمدالله كان سهالات ماضيعنا .

و اي قبل لا انسى كان خاطرنا نحجز مبجر يعني 8 او 9 بس مالقينا الا 11 الباجي كله فل ماشاءالله والرده مالقينا الا 6 هم الباجي فل فحلاته كثر ماتقدرون تحجزون مبجر..

وصلنا ل2 يوم من الصبح قمنا ورحنا المترو ونفس اللي سوينا امس بس مادشينا داخل مبنى KL لانه الباص كان ينطرنا برا ..

ومن الباص رحنا للتلفريك .. كان في زحمه وطابور بس كان يمشي بسرعه كل تلفريك يكفي 8 ..

وعى فكرة ترا له ساعات عمل محدده مو مبطل 24 ساعة ..

وركبنا التلفريك والدريشة جدامي واقعد اجك اجك اجك اجك يعني اصور مو اشربك خخخ ..

وعقب مشينا شويه ليما وصلنا للمنتزه وهذي تذاكرنا ..

ذكرتنا بتيخا ولد اختي خخخ ..

لقطات من المنتزه ..

لعبت تقريبا 4 العاب الدورفه اللي تفتر والقطار السريع ولعبة سبايدر مان وقلاليبه ..

وهذي اهي لعب سبايدر مان اول مره اركب لعبه اكون واقفه فيها خخ بس صج وناسه وضحك بس قبل لا تقفون بالطابور حطوا اغراضكم باللوكر برا يم اللعب عشان اتوهقون مثلنا وصل دورنا وقالوا لنا ماكو مكان لاغراضكم روحوا حطوهم باللوكر :\

مااعبر يالقوي خخخ هذي الباص اللندني وفي وراه كبينات التلفون يم لعبة سبايدر مان ..

الاكل :

شفت برا المنتزه وايد مطاعم بس داخله ماذكر الا هذا والحمدالله كان حلوو ..

و في وايد كشكات جنه لبطاطه حلوه ووافل وغيره احنا جربنا الوافل وفي وايد نكهات صلصة ..

اخترنا الككاو وماحبيتها :\

قبل لا نطلع بشوي تغير الجو فجأه ضباب وبرد الجو (عكس اول ادشينا كان الجو عادي اقرب للحر ) ومن جذي ينصحون انه تاخذون معاكم كوت خفيف احنا كنا ماخذين معانا كرديغانات شتوي خفيفه ..

وطلعنا ورحنا التلفريك هالمره وصلناله بصعوبة شويه مقارنة باول مره بس اشوه لحقنا ع الباص ..

والمنظر كان عجيب حزة الغروب ..

وهذا باصنا من داخل الاغلب بالرده نايم خخ..

تحسون لوية شويه بس اشوه كانت سهالات وعلى قولتهم اللوية الممتعه ..

واستانست بالمدينة وودي اذا الله كتب مره 2 ورحت لها بتم يومين فيها هالمره ماقدرنا لانه الفنادق كلهم فل ماشاءالله مع انه حجزنا قبل السفره بشهر يمكن ..

Labels: جولة مكوكية, سفر, شرق اسيا, ماليزيا-malaysia |

0 comments

Monday, December 24, 2012

رحلتنا الى ربوع جبد ..

9:50 AM

مو اليمعه اللي فات لا اللي قبلها كان الويك اند حلو ومزحوم استمتعت فيه ..

ومن الشغلات اللي سويتها رحت مع اهلي لجبد ياخور نسيبنا ..

وهذي جم لقطة منه لانه توني ماسحة صور بالغلط من الايفون :(

والحلو ماشاءالله انه في اكثر من مكان للقعده هالكراسي وفي بيت شعر كنت اتنقل بينهم ..

وهني حبيت الاضاءءه الملونه بالليل

وفي اكثر من لعبة دوارف العادية وزحلاقيه وهالنطاطيه ( حدي كيفت عليها) احب العب :)

وبالنسبه للاكل ماشاءالله جيلنا لسنة جدام انا شريت واختي الجوز شرت واختي الكبيره شرت هذا غير اللي رفيجت اختي يابته ماشاءالله و3\4 ماجسناه :\

الغدا والعشا كله مشوي الظهر شوينا دياي لنا ولليهال سمج يحبونه و بالليل شوينا برغر وانتكست منها مع انها كانت لذيذه :(

وهذا ملفوف من رفيجة اختي..

حبيته ويونس ميني الميني ..

وطبعا بما انه عيد ميلاد عيال اختي بينهم اسبوعين خذينا كيكه واحتفالنا فيهم هناك ( منزله فيديو عن العيد ميلد بكيك "اغنية بالاثيوبي" اما الكية فمنزله بوست عنها هني

ورحت اشتري اغراض للعيد ميلاد صحون و زينه وكبابيس وغيره .. مالقيت ع سمج فخذيت اقرب شي له على قرصان وخذيت ماسك ع ويه قرصان بس حسافه ماصورته وطبعا طقمين 3 احتياط خخ (عشان اذا ماعجب اهلي واحد يعجبهم ال2)

صور اكثر عن الرحلة منزلتهم بالانستغرام ..

اسمي بالانستغرام :@roroalk

اسمي بkeek : roroalk87

Labels: اكل, الكويت, جولة مكوكية, مناسبة |

4 comments

Thursday, May 17, 2012

عالم من الورد في الافينيوز ..

6:04 PM

توني راده من الافنيو وانبهرت بالورد الموجود فيه مااشاءالله تقريبا من فيز تو لي gap ..

اول شي شفته كان مثل الحديقة بالنص بين بريشكا و h&m وستاربكس وشيك شاك ..

صورت اجزاء منها ع السريع :

من الشغلات اللي عجبتني وتوني منزلتهم بالانستغرام ..

كنا نشوف الورد يانا صبي من الهلال الاحمر وقالنا عن مشروعهم اهو تشترون ورده بدينار وهالدينار يعتبر تبرع ..

عاد رحنا خذينا وقلت ابي ورده حمرا قالوا ماكو خلصوا قلت ابي ورده تم ماتموت بسرعه :

قالت لي هذي اتم اسبوعين بس وعليه ساعتين و حاشها اعدام :(

والهلال الاحمر موجودين لي يوم الاحد ان شاءالله

وفي وايد غيرهم ..

كالعاده البرنامج بيطلع الصور بشكل بايخ اهي اهي ..

- Posted using BlogPress from my iPhone

Labels: beauty, جولة مكوكية, فنتوقه, معرض, مناسبة |

0 comments

Monday, February 27, 2012

جولتي القصيرة بحديقة الشعب ..

6:39 PM

بعيد ميلاد اختي شاءت الاقدار انه نمر حديقة الشعب , خبري فيها اذا ماخاب ظني ب2004 ايام 4 ثانوي ..

تصدقون فرق علي الباب والتذكره خخ..

لي الحين الدخله بنص بس زادوا ربع سعر الكرت ..

وصورت جم صوره للالعاب ..

هالعبيتين الاخطبوط و جبل الثلج اول لازم العبهم :\ مادري شعاجبني فيه خصوصا جبل الثلج تفتر ويفتر راسي فيها ..

ولما كنت اصور جبال الثلج صارت هوشة بس مو معاي ولا جان حطيت حرت الدوام فيهم خخ اللي صار اني صورت وقبيت واثناء القبه عرفت انه الريال معاه ولدين صغار ممنوع يدشون هاللعبه حسب القانون لانه طولهم اقل من المطلوب والعامل رافض يدخلهم والابو مصر فرفض العامل يشغل اللعبه وخلاها وراح ينادي الامن(معاه حق) بهالوقت الابو دخل عياله وقعدهم باللعبه وراح بيشغلها عابل فيها ماعرف :\ ليما يا الامن وكلموه ويالله اقتنع وطلع عياله استغفرالله :\

ونرد لالعابنا لعبت لعبتين :

الاول قليليبه وكانت فيلم انا خابره يوقفون اللعبه ونصعد مو نركض ونجلب بالباب وعقب نطب داخل !! حسيت اني بالمغاوير خخ..

ولعبنا الحصن وكانت كوميديا اكثر ..

اللعبه ترجخ ماي والحصان قعدت عليه جان ينزل قلت حشى انترتيكا مو رورو ولما اشتغلت اللعبه الحصن تصعد وتنزل الا حصاني انا واختي محلك سر الحمدالله طلعنا واهو صاغ سليم زين ماطبع فينا خخخ..

وكنت بقعد بعربة سندريلا اللي نزلت صورتها بالانستغرام بس كان الكرسي مبطط وجنه فيه ماي بعد فهونت :(

ملاحظة : اغلب اذا مو كل العاب حليه (رايح لونها) واللي الكراسي مشققه والخ الخ ليش هالاهمال !!!!!!!!!!!!!!

Labels: الكويت, جولة مكوكية, فضفضة, مناسبة, موقف |

2 comments

رحلتنا الى جنتنغ ..

رحلتنا الى ربوع جبد ..

عالم من الورد في الافينيوز ..

جولتي القصيرة بحديقة الشعب ..

About Me

ايميل المدونة :)

Labels

Followers

Blog Archive

انستغرام المدونة (roroalk)

follow me

My Blog List

Ads