شخبوطة كويتيه

Wednesday, August 18, 2010

mini massager :)

10:24 PM

السلام عليكم ..

اليوم بقولكم عن جهاز صغير , اعتقد اول مره اكلمكم عن جهاز :\

المهم اهو جهاز صغير للمساج ..

خذيتها من السوق الصيني بدبي ..

واختي ادمنت استخدامه بالمطار حاطته بالجنطه وتطلعه تتهمز وترد خخخ..

ومره علاوي (عمره سنه) بينام ويبجي << عسر المهم ابوه سواله مساج بهذي جان يطخ وينام ..

و سمسم يمشي واهي بيده ويسوي مساج لراسه و ويه :\

وبالنسبه لي تونس للمقالب توني مخرعه اختي جم مره فيها خخخ اهي تشوف التلفزيون وانا امسجها فجاءه واول مره جربتها باخوي بالمطار وهم اخترع و طبعا جربتها باليهال خخخ احلى شي لما اباغتهم فيها ..

Labels: تجربة, تكنولوجيا, مشتريات |

34 comments

شنو اكلتكم المفضله برمضان ؟؟

12:37 AM

السلام عليكم ..

عندي وايد بوستات بس دايخه مالي خلق اضبط صور..

سو بسالكم شنو طبقكم المفضل اللي يسونه حصريا برمضان وباجي شهور السنه نادر ماتحصلونه ؟؟

عن نفسي القطايف ..

واحبها كموالح باللحم او جبن ..

وكحلو بالجبن الكيري ..

ومااحب اللي بالمكسرات ..

وبجربه كبيتزا ان شاءالله..

وعقبها التشريبه لانه احس خبز الرقاق مو متوفر ع طول مثل رمضان :)

وانتو؟؟

Labels: اكل |

44 comments

Tuesday, August 17, 2010

صالون رشنا :)

12:32 AM

السلام عليكم ..

قبل رمضان بيوم رحت مع رفيجتي صالون رشنا عشان نحط نقشه ..

وصلنا له 10 وشي توقعنا مابطل بعده لما دشينا انصدمنا قبلنا 11 تقريبا ماشاءالله دفعنا ورحنا تريقنا وردينا ولا الصالون مفول وكلهم يبون نقشه ..

لا ودورنا طاف خخ ومع الحوسه حكرنا وحده ونقشتنا ..

رايي :

زينه بس كنت ابيها انعم , وماشاءالله طولت يالله راحت تمت تقريبا اسبوع ..

وسعرها مناسب انا اخترت السودا ب3 الايد رفيجتي اختارت العاديه الحمرا بدينارين ..

عنوانه :

بالشعب البحري اجبال مطعم ريوق وفيلا فيروز ..

Labels: beauty, صالون |

35 comments

Sunday, August 15, 2010

tangled bangles :)

8:01 PM

السلام عليكم ..

قبل فتره كنت احوس بالبلوقات ولقيت هالبوست ببلوق SoCoMoCo ووكان عباره عن مشروع صغير للاكسسورات هاند ميد وعجبوني المضاعد فطلبت لي منهم ..

وكاهم مضاعدي ..

بس عيبهم شوي اعراض اقصد كرتفاع ..

رايي :

- كشغل ماشاءالل نظيف و مضبوط ..

وسعرهم 10 ..

مناسب لانه شغل ايد :)

مرسي SoCoMoCo..

وطلب يكون عبر الايميل ..

socomoco303@hotmail.com

وبالرابط اول الموضوع موجود تفاصيل وصور للمجموعه اللي اهي مسويتها واسعارهم..

موفقه يارب اخيتي :)

Labels: beauty, fashion, مشتريات |

24 comments

Saturday, August 14, 2010

كيفكو :)

7:34 PM

السلام عليكم ..

اليوم وصل طلبنا من كبب وفطاير والخ ..

كنا طالبينه يوم الخميس ..

الطلب قسمين قسم لاخوي و قسم لنا هذيل ملوتنا..

كبة دياي بالكرافت ..

كبة برغل

كرواسان مشكل ميني ..

كبة بطاط ..

فطاير مشكل سواريه << يعني كاشخه لعرس خخخ..

هذيل نماذج منهم ..

اممم الفطاير والكرواسان شويه يابسين انا توقع منا لانه في بعضهم احتراقوا من فوق فقلت للخدامه تدهنهم بزيت :\ ولا شرايكم في طريقه احسن ؟؟

وهم كبة البطاط تفلشت اتوقع لانه دهن حار:\

مميزاتهم :

1- طعهم زين مو وااو..

2- حجمهم صغير ينفع للتقديم او للرجيم ..

3-اسعارهم رخيصه مالقيت اعلانهم كنت بتاكد من اسعارهم بس هذيل كلهم تقريبا ب9 وشي..

4- توصيل مجاني للبيت ولكل مناطق الكويت ..

امم انه الطلبيه توصل عقب جم يوم ميزه اذا كان الطلب متجهز خصوصي لنا يعني فرش :)

دورت عيوب مالقيت مخي فازي :\

عنوانهم :

صبحان الصناعية

تلفونهم :

24724443

Labels: اكل, تجربة |

26 comments

Friday, August 13, 2010

براوني صانداي :)

10:55 PM

السلام عليكم..

تعودت ع الصيام او لا..

غلبتوه او غلبكم خخ..

عن نفسي الحمدالله ماحس فرق شي ..

فامس وانا اتصفح الجريدة لفت انتباهي هالاعلان الحلو :)

عقب الفطور طرشت سايقنا عتريس ويابه لي ..

ابد الخالق الناطق نفس الصور بس عقب زلزال ومع الظلمه ولمسات سمسم كانت هذي النتيجه جنه طبق 2 خخخ ..

سعره تقريبا 550 فلس ..

رايي:

انا مو وايد احب البرد واذا باكله انطره يذوب واشربه <<تذكرت عندي برد بالثلاجه خاس من قرن عسى محد كلاه مالي خلق ادبهم خخخ..

فلما يالي ذايب كان عز الطلب :) حبيت صوص الككاو وحبيت البراوني احلى من اخر جم براوني جربته مثل هاجن داز وفرايدز وغيره ..

شهادتي مجروحه بمعشوقي الابدي الككاو <3

Labels: اعلان, اكل |

36 comments

Thursday, August 12, 2010

شكرا شكرا (اسبوع الهدايا العالمي)

10:54 PM

السلام عليكم..

الاسبوع اللي فات تحديدا يوم الاحد رديت الدوام عقب الاجازه..

ورفيجتي هم ردت ويايبه لي هالهديه(صوغه)..

ست كريمات لافندر << اول مره اجرب هالنوع ..

واصباغ اظافر..

وهم اصباغ اظافر..

وبعد اصباغ اظافر..

* اغلبهم فوشي لانه غرامي هاللون..

************************

يوم الاثنين اهو اليوم اللي قالت لكم طلعت فيه مع مدمد وانصدمت انه يايتلي هدايا :\ انا توقعت شغلتين بس..

ست كريمات مع جنطة مكياج والحلو فيه انه حتى علبته خام ماتنقط تصير علبة تخزين ..

اصباغ الاظافر اللي كنت ابيهم هما يتغير لونهم بالشمس جربت واحد ضبط وال2 جاري المحاوله وان شاءالله بقولكم عنهم عقب..

اصباغ اظافر وقلوس يتغير لونه اول شي يكون شفاف عقب يصير وردي .. مدمد صورت براتمي فيه خخ براويج النتيجه :)

مشكورين مدمد وام مشمش اخجلتوني بكرمكم :*

Labels: makeup, اظافر, هدية |

26 comments

Wednesday, August 11, 2010

اكواريم دبي :)

4:14 PM

السلام عليكم ..

احترام لمشاعري ومشاعركم طوفت بوستات المطاعم :)

باخر يوم مرينا الاكواريم ..

واهو موجود بدبي مول

بالنسبه لتذاكر الدخول في نوعين :

النوع الاول : تذكرة ب50 درهم تشمل الحديقه و النفق ..

النوع ال2 :ب100 درهم وتشمل الحديقة والنفق وقارب نوكل سمج و وكوبون ب20 درهم من المحل ..

اول شي دشينا الحديقه وهذي لقطات منها :

ترا في مخلوق يطل خخخ..

اسماك ..

للسحوته عنوان خخخ..

وقت الاكل ..

هالدعله عيزت اصورها مو قادره هذي اوضح صوره لها..

معلومات عنها..

هالمكان يخوف وقف عليه اخوي يقولي لا ينكسر وتطيحين قلت عادي اتسبح قال شدعوه بيخلونج بياكلونج اهني خفت صورت ووخرت عاد الصور عجيب ظلمه ومهزوزه :\

جلي فيش ..

بطريق برمائي..

خخ الصوره مو واضحه بس اختي لعبت فيهم لانه تموا يلحقون جنطتها :\

وجباله حاطين بطريق نوع2 ..

جنهم دود..

وهذي معلومات عنه..

وعقب رحنا نركب القارب ..

وعطونا اكل للسمج واي ريحته قاتله..

وسترات نجاة..

وقبل لا ممزل صورنا صوره تبجي ماابي اتذكرها خخخ..

هني الصوره جنه حايشني دوار بحر وانا اصورها وهي صورت قاربنا..

وهذا القارب بالنص ..

واخو قاربنا..

والسمج قبل لا نوكله ..

لما وكلناه مشفوح..

لقطة عامه ويبن فيها غواصين كانوا بينزلون ..

والاجواء العامه كان حر وقمته :\

واخر شي رحنا النفق ..

قربنا وكان زحمه ..

ولقطات منه ..

وهذا شي من الشغلات الللي شريناه..

صورته مره 2 لانه كانوا مطنقرين علي :\ ومعطيني ظهرهم..

وبس مادري شخربطت مالي خلق اقرا مره 2 :\

Labels: دبي, سفر |

28 comments

mini massager :)

شنو اكلتكم المفضله برمضان ؟؟

صالون رشنا :)

tangled bangles :)

كيفكو :)

براوني صانداي :)

شكرا شكرا (اسبوع الهدايا العالمي)

اكواريم دبي :)

About Me

ايميل المدونة :)

Labels

Followers

Blog Archive

انستغرام المدونة (roroalk)

follow me

My Blog List

Ads